امتداد الدرجة الثالثة ذلك الحي المتفرد

Quote: وأخيراً تكشفت فصول المؤامرة وظهرت النوايا الحقيقة من وراء تلك الصور التي ظل الأخ ياسر حنا ينشرها في البوست والبراءة تقطر من حروفه وكلماته. إذ لم يدر في خلدي أبداً أن نزاعنا في قضية جون قرنق سيبلغ به هذا المبلغ وأن حديثه عن اتصالاته بجورج بوش وكوفي عنان لم تكن سوى خيوط لمؤامرة تم التدبير لها بحنكة داخل دهاليز السي آي أيه. لقد تبين لنا أخيراً إن تلك الصور ما هي إلا رسالة مشفرة للسي آي أيه حتى يسهل عليهم استهداف منزلنا بصواريخ كروز وتوما هوك في محاولة يائسة منه للقضاء على أصوات الحق والحرية. لم أدهش لوجود الإشارة على منزل الأخ طارق جبريل فهو الآخر أصبح مصدر تهديد للأخ ياسر حنا في الآونة الأخيرة. لقد حاول ياسر حنا تضليلنا بالإشارة لمنزل الأخ أمير الجمري الذي يعتبر حليفه القوي ولكن سرعان ماتبين لناأن ذلك ماهو إلا مجرد تمويه لا سيما وأنه قام بنشر هذه الصور بعد تأكده من إخلائهم للمنزل واستقرارهم بمنطقة أخرى بعيدة عن مناطق القصف. "قل جاء الحق وزهق الباطل إن الباطل كان زهوقاً"

،

الصديق العزيز صديق

خلاص الصور الجوية دي خلينها وانا حضرت لي مجموعة صور أرض أرض اها تاني كيف؟

العزيز ناصر

Quote: ولا يهمك يا ياسر ولا تكترث للاعداء واصل في الدر ر بعدين يا صديق عليك الله حصل شفت صور للامتداد بالشكل دا

بارك الله فيك عزيزي وياها المحرية فيك وما بتقصر تب، لكن اخوك ده غايتو انا خليتو لي لضميرو والله يسامحو

الريس د حاتم

Quote: ويا جماعة غبت كم يوم جيت لقيت ياسر طائر بفوووووووووووووووووووق ... الزول ده نزلوا . ويا أمير وصديق .. ياسر قبل متحلقو ليهو صلعه ,كان تقصوا جناحتو .. الزول ده بقي خطر جداً

اها مسكنا لسانا علينا ما نفع طرنا بالجو ما نفع بعد ده نخت الكورة واطه بس

وبمناسبة الكورة واطه وحكاوي الكورة والدافوري التي يمتعنا بها العزيز تيتاوي. اذكر زمان كنا لاعبين في درقة فاينال مع مربع تمانية والكورة في حلتهم الميدان الجنب المدرسة قدام بيت ناس شاهر، وانا صراحة ما حريف لكن بعرف العب، يعني ما كيشة، لكن جني وجن الخبت والكسير والفاولات، عشان كده كورة في درقة ومشاكل اصلو ما بخش فيها المهم الحصل انه في الكورة دي قامو لعبوني ليك وانا كايس طريقة اتخارج.

طبعا الجماعة مشوا غطو الجماعة الحرفة وخلوني ليك ساكت، وفجاة كده حارس المرمى بتاعنا شات لي الكورة، وهنا انا اتورطت وبقيت افكر هسع اعمل شنو؟ اطير وين انا؟، لأني عارف الكورة دي لو صلتني ح يكون فيها كسر ولبيع وشليت اها بقيت افكر اتخلص من الكورة دي كيف؟ في الاثناء دي الكورة وصلتني وانا خاتي رجلي في الارض فقام واحد من الدفاع جاء جاري علي، اها لما وصلتني الكورة دقت في رجلي وطارت بي فوق وراي هو في الوقت داك جا جاري قدامي عشان يقطع الكورة، انا قمت لفيت وجريت بالكورة، وانا والله لا قاصد ولامتوقع الحصل توفيق من الله بس ، وفكرت بسرعة اني اتخلص منها فعلا شتها للتاج عصيدة انفرد بالقون وسجل هدف، اها هنا الجماعة قالوا خلي بالك الزول ده خطير ونحن ما مخدين بالنا ساكت اها قامو غطوني ليك تلاتة اظن وطبعا اتكيفت آخر كيف وبقيت اقدل في الميدان ساكت مش كده وبس بقيت اكورك في الجماعة ياخي ما تلعبوا باصات عارف مافي كورة تاني ح تجيني

اها مواصلة لحكي الحبيب عامر تيتاوي المرة الجاية بحكي ليكم قصتنا مع الدرقة مع ناس مربع 12

Quote: شايف يا ياسر حنا عشان بعدين ما تقول الزول ده بتكلم ساكت

شايف يا صديق القصة دي كتبتها الليلة الصباح لكن اكيد ممكن تكون صاح

(عدل بواسطة Yassir7anna on 05-03-2006, 09:54 AM)