امتداد الدرجة الثالثة ذلك الحي المتفرد

Quote: جيناكم ياحبايبنا الكنترول والديب سنتر فرود طارق والهاف ماش عامر (طبعا الخانات الزمن ده اتغيرت بقت فيها مساك وارتكاز واسترايكر وكورة مافى) المهم الشوق بحر لكل الشباب وانا واخوى الكاشف الفاضل شنقوره اليومين ديل فى القاهره ومهما استفزيتو عشان يخش الجاتينق اللذيذ ده وقلت ليهو جتى اخوك الصغير الجوص بيسرح ويمرح فى البورد وانت مطالب بيك بشدة قال انشتو تعبانة ثم وين مع ناس امير وصديق ديل تقول اساتذة لغة عربية بس قال ليك ياعامر اسال امير الفصيح ده مشى لميرغنى يس فى الازهرى ولا لا المهم ياطارق الله يجازيكم عطلتو شغلنا صباح ومسا لازم نمر عليكم لو اشتقنا للطابية ندوس زر طارق ولو حنينا لقعدة المسطبة وونسات تيتاوى وغلاطات كدو و ايهاب ابراس ومعلومات صديق ندق انتر حتى لوخرمنا لشيشة الجوهرة ساكت وونساتا بس نخت جمرة فى الكى بورد التحيه للزول السمح عماد عويس والريس د.حاتم والقردابى عمر واسرته الكريمة واخوانه عصام وعماد وعادل وعبيده و الريده كتاحه لياسر حنا وطبزاتو (فى قصة لذيذة حاحكيها ليكم حصلت فى ندوتنا بتاعة الرابطة عن الفرعونية اذا حنا ادانى القرين لايت طبعا مع الحذف ياحنا) وبالمناسبة اتوقعو اخونا قرشى يخش عليكم توش قريبا واخيرا التحية لحبيبنا بكرى وكفارة ياهبو اجر وعافية اخوكم مجدى بركية

Quote: يا منى خوجلي : يعني كل نداءات اهل البوست لم تعيدك الينا .. نسوي شنو يعني؟ طبعا ما ها نعمل زي الولد المصري ونقول ليك ( عسل اسود ومنيل) لسة الامل كبير .. وامنحينا لحظة من فضلك. امير الجمري

Quote: عامر تيتاوي ما شاء الله وعيني باردة يا ولد لسة محافظ وصغيروني .. طبعا نحن جار علينا الزمن وفعلت بنا الايام ما شاءت وهبت علينا الرياح ببطن ثمرة شجرة (العوير) فسكنت اعلى الرأس وطردت منه الجبان من السواد وابى بعض السواد الا ان يجاهد الزمن ويصارع مدعوما باقتراحات ييف سان لوران وغوتشي فساكنه البياض وهادنه على ان يرحل رويداً رويدا .. فصار الشعر يحتاج زيت سمسم وعيشة وجنوبي.. لكنه لازال ياخذ نصيبه من ماء الوضوء يا طارق. احمد جمعة هنو سليم : اين انت ايها الرائع الرمز الجدع الضكران اخو الاخوان .. مفتقدنك يا جومو .. عاود عاود عاود فالعود اعوج من دونك. طارق جبريل : يا راااااااااااااااااااااااااااااااااااااااااجل (واسيني الاعرج) ده كتيييييييييييييير . انا فقط قزماً اتقافز لأرى هاماتكم واستنير بها فمن يقرأ للعمالقة عامر وطارق وصديق وجومو واحمد خضر وعماد عويس والدكتور حاتم وياسر حنا وبقية العقد الفريد لا يملك الا ان يبدع والا !!! وين اميقو وكع ؟!! اضم صوتي للمنادين بمشاركة الاستاذ صلاح تيتاوي المحامي فالرجل كنز .. في انتظارك يا صلاح وبطل كسل وسيكون للبوست رونق خاص بطلتك (ونكهة متفردة) ونلتقي احبتي امير الجمري

Quote: قلت عنك الكتير يلا انكت لينا حاجات شارع جوبا ديك

Quote: بسم الله الرحمن الرحيم ياناس يا حلوين ياطيبين يا احسن ناس في العاصمه المثلثه لكم كل الحب والاحترام (الاخ طارق جبريل (الاخطبوط كل الود لك الاحترام والله الواحد ما لاقي كلام يقول فيك وزي عمليتك دي ما بعمل الا اخطبوط عموما ربطنا ولميتنا لمة معلم كان نفسي قولك من زكان................ شباب في ناس كتار ماظهرو الحاصل عليهم شنو زي محمدحسبو مره واحده وزاغ وكمان في حاجه غريبه كل الناس بتسال من مني عوض خوجلي وهي مامعبر الناس خلوها في حاله ............................... في مجموعة ربطتني بيهم الرابطه والمدرسه ماظاهرين وين هم داود حسن مربع 1 بدر الدين ابصلعه مربع 1 ياسر ابنعوف مربع 1 طواف مربع1 امير اخوحمبيه مربع1 بابكر الجخص مربع 1 عاطف علي عبيد مربع4 محمدو مربع 4 علي بنقر مربع 4 عوض كمبا مربع 4 ابو عبيده العب مربع 4 بكري اخو مربع 4 معاويه فتحي مربع 4 محمد فتحي حسبو احمد النعيم مربع 4 ال جعفر مربع 4 وحاليا الصحافه نادر شكوته مربع 4 حافظ مربع 4 عزالدين احمد علي مربع8 حمدتو مربع 4 محجوب عكود مربع3 اسامه مربع 3 سيد احمد مربع2 والبقيه تاتي عبدالله كع مربع 8 و11

Quote: بسم الله يا اطيب ناس سلامات انتو شكلكم ناسين نادي الامتداد والقمم الفيه بس الواحد عايز يعرف اخبار تلك الققم موجوده والا غابت عن الامتداد نقيش فاروق عبد الهادي الريس عبد الواحد فضل ام مقد ـــــــــــــــــــــــــــــــــــــــــ ابكر المكسر ود الكول بتاع الفول السر بعيره وعمنا خواجه ــــــــــــــــــــــــــــــــــــــــــ يا امير ياجمري سينما شنو البتحكوعليها دي . المسرحيه كانت متين وين ؟؟ لكن والله كل الناس في المسرحيه دي انا متزكرهم تمام التمام طيب وين كان عمر هاشم جلك مان و الصيني وهبرو كركدندي ولا كانوا من المتفرجين ؟ الظاهر كانت مسرحيه قويه البطل منو عليك النبي؟ المهم يا عزيزي انتو عشتو الزمن الجميل كلو وخليتو لينا حاجات بسيطه والحمدلله انحنا استمتعنا شويه معاكم وشويه برانا عموما سلام لابطال المسرحيه وخاصة اختنا اخلاص عبد الاسد سلام كبير يا كبير في كل شي عبدالله كع ابو مصعب النضيف مربع8و11

Quote: اهل الامتداد الحلوين طبعا الايامات دي أمير مبسوط جدا ببوست الامتداد وليه سنين لم يتنفس الصعداء ووجد في هذا البوست ملاذ له واصبح يتكلم درر وينشد ويغرد .... وده كلو عشان سمع اسم الامتداد , أمير بطبعه انسان حنون وعاطفي وودود ويحب الخير للجميع ربنا يحفظك (ياجبنة ) ويخلي ليك اولادك ...................... ياعامر والله نفس الشعور انا برضو لمن اشوف مجدي بركية بحس باحساس غريب واضحك لانو فعلا مجدي راجل لذيذ وحبوب ويجبرك لاحترامه ....... يادجله كشكش الفاضل ده شوية طبعا الفاضل راجل سكوت لكن لو فتح الا الناس تخلي ليه البوست ده بس كيف هو يبداء وانت عارف حركتة تعبانه مش انشتو تعبانه . المسطبه العجيبة وشيخها صلاح تيتاوي لسه عامرة بوجود عوض عمر وطارق الخير واحيانا الفاضل ومجدي ,,,,,,,,,, فعلا ياعامر اصبحت باسم روافد أتصالات تابعة لكم وانا في الاجازة ربحتكم كتير بالاسكراتشات . دائما كنت وانا جالس مع الاخ صلاح بنتذكر ايام زمان النقاش والغلاط والعواميد ( اخير ليك يازول اقعد ساكت ) ,,,,,, وايضا جهبوز وشطحاته وايهاب ابو راس ودجله ذي ماقال مجدي بركية وسليمان العتود ( ياعامر سليمان العتود ده حكاية مفروض تضيفه ليوميات( عبده حنيفه وفتاح الكج ) وينك ......(يادقس ) مطول ولا عايز تخرج لينا با بداع من ابداعاتك, ذي ماقال الفاضل تقول صديق وامير ديل استاذة لغة عربية , واقول للفاضل أمير الفصيح ده انا وهو وصلاح ذهبنا للاخ ميرغني يسين في بيته في الازهري وانبسط جدا لتلك الزيارة الباقي انتو (يادجلة عايزين ليكم رقم تلفون في القاهرة ) عندنا شباب هنا حلوين هايمين بحب الامتداد وراجين اي اقتراح لمصلحة الامتداد وهم جاهزين موية ونور للدعم والمساندة ............ عبد الغفار – أمير الجمري – عبد الروؤف كمال – خالد اميقو – عبد الله كع – الشاذلي وايضا هنالك اسماء كثر جاهزين في اي وقت . بدر الدين يعقوب مربع 4 منزل 105

Quote: والله يا طارق جبريل شكلك حتتعبنا ............ أولا تكنولوجيا ألنت دي تعتبر ترف عندنا في السودان ... لكن المنبر ده بقي لينا كيف عدييييييييييييييييييييييييييييييييل كده يعني لو اشتقت تمشي المسطبة تفتح المنبر ---- حنيت للطابية تدوس زر جبريل ----- اشتقت تجر نفس من شيشة الجوهرة بس تخت جمرة في الكي بورد --------- اشتقت (لويجة ) عامر تيتاوي وأمير ألجمري ( فول بالعيش !!!!!!!!!!!!!!!!!!!!!!!! ) الهد ندوي حسب قول مصطفي سوكو ( نقلو هو في حتة الإذاعة بتصلها بعد يومين ) ولما اتزكر ندوتنا عن ( الفرعونية ) بنادي الامتداد بتذكر (حنا ) وطبزاتو -------- مشتاقين ليكم يا احمد خضر وبكري خليفة والقردابي عمر والانيق الذكي صديق حمدتو وشوقي الكتييييييييييييييير لعويس (مسكين أنا ما انت ) و(اللعنة عليكم أيها المسئولين ) والأخيرة دي لتيتاوي بالله ذكرني يا عامر بقصة أغنية مصطفي سيد احمد --------- وبالغت عديييييييييييييييييييييييل بالبوست ده ياود جبريل وتحياتي لكل أسركم الكريمة والفاضل سابل كويس بس كراعو ذادت --------- مجدي بركية

Quote: و(اللعنة عليكم أيها المسئولين ) والأخيرة دي لتيتاوي بالله ذكرني يا عامر بقصة أغنية مصطفي سيد احمد ---------

Quote: ربنا يرحم عمنا خالد .. و التعازي موصولة لاخواننا محمد واحمد وامير وكل الاسرة وجيرانهم بمربع 6 وكل الامتداداب امير الجمري

Quote: ازيكم يا حبايب يا اطايب طارق جبريل استأذنك وانوه تنويه بسيط : في آخر مداخلة لي سألت عن خالد اميقو وعبد الله كع ودي كانت فقرة لوحدها يعني ما عندها اي علاقة بالجملة القبلها ( وبالمناسبة انا لاحظتها براي يعني مافي زول علّق لكن لقيتها شينة) لذلك اعتذر وبشدة للاحباء مقة وكع وشايف كع رجع بأصالته المعهودة وسؤاله عن الرموز في الامتداد الرمز لكن لا زال اميقو في نوم اتمنى الا يكون عميقاً ويرجع لينا من جديد بنقائه المعروف. مجدي بركية والفاضل سابل طبعاً (جوز اللوز ) ديل مهما تكلمت ومهما اجتهدت لا يمكنني ايفائهم حقهم فهذا الثنائي الجميل كتلة من السماحة والظرافة والشهامة وكان لي نصيب الأسد من مآثرهم التي شملت الجميع .. وطبعاً كلو واحد منهما عندو طرائفو وروائعو .. طبعا يا مجدي قصة اغنية مصطفى سيد احمد لو بتتذكر اعتقد كنا ماشين نودي عصام ود عبود الرياض والاغنية كانت اغنية نورا في اول مقطع بتاع وكتين يضيع عرق الجباه الشم شمار في مرقه واظنك كده تكون اتذكرت باقي القصة (عشان سكتنا ليه) .. الفاضل ومجدي ديل زي الاكل البتاكل في اي وقت من غير ما يغلّط عليك يعني تخيل انو الفاضل يجيك يصحيك من النوم الساعة اتنين صباحاً يقول ليك قوم كسر تلج عشان نعمل الشيشة ومهما تحاول تجوط فيهو يقوم يقول ليك ياخي انت حقو تكسب زمنك وتقوم تجيب التلج عشان اصلك حا تعمل حا تعمل وفعلا تقوم تعمل الحاجات دي وتقضي وقت ممتع جدا وتضحك ملء شدقيك وده كلو الساعة اتنين او تلاتة صباحاً وزي ما قلت هم الاتنين مبلوعين في كل الظروف وكل الاوقات ومجدي زي ما قال عامر يكفي ان يجي طاريهو بس طوالي تلقى نفسك بتتضحك.(قصة فول بالعيش دي دايره ليها فيديو لانها فيها حركات) .. علي طاري الحركات دي يا جماعة وين محمد عبد الفتاح (تلي) ( يا عامر جيب موية في فنجان وكشكن اعملها في عينك طوالي الوقيعة بتطلع .. يا حبائب انا اسف للتخصيص لانو المداخلة دي يعرفو مقاصدها قلة لانها احداث منفردة كده كانت ..ويا الفاضل انا مشيت لي ميرغني وباقي انت لكن انت معذور زي ما قلت في اطلال ناس عمنا محمد الحسن محجوب انو الاربعة سنة دي انت اغلبها كنت بره السودان انشاء الله يا ابوي تستقر وتمشي الازهري .. لا زلنا في انتظار روائعك يا جومو . كلامك صاح يا طارق بس شوفو طريقة للتأكد من معلومة وصول الخبر إلى جميع ذوي المتوفى . صديق حمدتو : مالك لبدت كده الفترة الفاتت دي يبدو انك انت العاوز تسوي فعلة عابدين لكن انت ماك محتاج لانك انت زي الاجازة في السودان الواحد يكون مستمتع بيها شدييييييد وخايفها تنتهي يعني ( بشتاق ليك وانت معايا ). خش يا الفاضل وامرنا لله بس ما تكتب بطريقة كلامك ومسحة الوش اعملها لينا اربعة نقاط ونلتقي احبتي امير الجمري

Quote: أخواني .. وأحبائي لكم مني كل الحب أتحفونا بالذكريات الجميلة الشيقة خواطر مغترب ذكريات هذا اليوم العظيم يوما مولد المصطفي عليه أفضل الصلاة وأتم التسليم من منا لا يذكر هذا اليوم في طفولته وشبابه .. من لا يذكر والده ...ووالدته .. وحلاوة المولد ألا رحم الله موتانا وأسكنهم فسيح جناته ... أمد الله في أعمار ألإحياء منهم وزاد في حسناتهم حاتم حمدتو

Quote: بسم الله الرحمن الرحيم الاخوان الاعزاء سلام من اعماق قلبي للكل جميعا انا حاوريكم معذة الامتداد عندي وعند ابو كمان نحنا سكنا الامتداد سنه 1967 طبعا قيل اختي الكبيره ماتتولد المهم ياشباب عشنا في الامتداد في بيت ايجار اكتر من20 سنه في مربع 8 وفي سنة 1992 طلب مننا صاحب البيت انترك البيت لظروفه الخاصه ولكن كان الامر في غاية الصعوبه لنا يعني 25 سنه وعشره وامتداد كبير وناس طيبين ورابطة ومركز سمير وحلواني البصري وسوق الندي وسوق الجوهره محطة سبعه وحلويات حاكم ومدرسة فاطمه عبد الرحيم ومدرسة الامتداد والمرضي ودكان صالح ونادي الامتداد ومربع 1234567891011121314 وظلط شرق وغرب والبراميل و واي شي في الامتدادكان له معني حتي الكلاب والغنم 0 المهم الراجل عايز يضيعنا بالرغم انو عندنا بيت في جبره جاهز ولكن كل الاشياء السالفة الذكروقفت عايق وعقبه في اننا نرحل ونسلم البيت 0كان للوالد محاولات كبيره كتير عشان نشتري البيت ولكن سالم احمد علي سالم صاحب البيت اتحجج ورفض ونحنا كمان رفضنا 0 وبقدرة قادر لقينا بيت الفي الحبيب الغالي امتدادنا في مربع 11والحمد لله كان لنا ما اردنا 0000 مربع 8 لو ما لقينا فيه ما نطلع بره الامتداد وهذا كان اتفاق اسرة عوض كع الحمد لله رب العالمين 0 امكن في امثله كتيره زي في الامتداد لان الا البسكن الامتداد بعرف معزة هذه الوطن 000 وفيما ازكر ناس عمك الجمري رحاو اركويت عشان يزبطو بيتم في الامتداد وكان بامكانهم يشترو بيت في اي مكان في العاصمه ولكن معزة الامتداد اقوي من اي شي في الدنيا والحمد لله

(عدل بواسطة طارق جبريل on 04-10-2006, 06:20 AM)

Quote: الأخ العزيز طارق جبريل كتب الفاتح سابل (الجص) مايلي دى ....... الردستار وعن طريق الزول العاب محمد مصطفى لمه فى كورتين من بعيد شات وفى الشبك بقينا متقدمين 2.0 لقيت ما الكوره انتهت الطريف فى الموضوع ونحنا راجعين طبعا شارع واحد ماشين نحنا وناس السلام , ناس العشش بكوركه الصادق يا هرامى الصادق يا هرامى الصادق يا هرامى كيف لي ألا ألبي نداء الإمتداديون .. وكل شهاداتي محررة من الإمتداد مربع أربعة منزل رقم أربعة ورغم تكرار الرقم (أربعة) لم يكن لي في (سلام 4) اسوة حسنة , فقد كنت دائماً صاحب الأهداف في شباك (سلام 4) وأظن أن في ذلك تعمد غير مقصود .. فمنزلنا يقع بين مربعي واحد & أربعة حيث معقل السلاماب وقليل من الردستاراب .. لاأنكر أن من حركني للإشتراك في بوسط الإمتداد غير حلاوة السرد وإشتراك (النجوم) الكبار : مجدي بركية , أمير الجمري , أب قاوون , عبدو محمد سعيد, والفاضل سابل (الكسلان) وصديق حمدتو وعيلة التيتاويين والنوار وكل (نوار) الإمتداد .. دفعتني (ذاكرة) الفاتح سابل (الجص) للعبة سلام أربعة والردستار وهتافات عشش فلاتة ( يالسادق ياهرامي) لووووووووول أياااااااااااااااااااااااااااااااام والله .. وبما أننا لسة (صغار) فلا غرو أن تكون هذه الأحداث كأنها الأمس ولانحتاج لي (عصر) الذاكرة كثيراً كما يفعل أعمامنا ناس عبدو محمد سعيد واب قاوون .. فنحن دفعة أخوانهم الصغار الجص , ماهر , منتصر , علي سبيل المثال وليس الحصر ودفعة (راشد جبريل) الأخ الاصغر من عيلة جبريل بمربع تلاتة ( أخوك ياطارق) عشان ماتعمل فيها قدري بعدين *** لاأنكر أن للفاضل سابل (ايادي بيضاء) في إنضمامي لفريق الردستار دون سلام أربعة .. ولو أن الرجل يذكر أنه قام (بسرقة) شهادة ميلادي من منزلي قبل عوض أبنعوف .. وإرغامي علي التسجيل في صفوف الردستار معللاً ذلك بأن أخي الكبير (شيخ الدين) كان ردستارابياً حتي النخاع - وأكتشفت عدم مصداقية المعلومة بعد عودة أخي من السعودية في زيارته السنوية إنها روح المنافسة والغيرة الشديدة علي الفريق والحي .. فهل مازالت في الإمتداد هذه الروح الجميلة ؟ كنا أطفالاً صغاراً ( بنجيب الكورة من برة) حينما كان ( عماد عويس) يرتدي التي شيرت مكتوباً عليه إسمه من الخلف ويقف في حراسة مرمي فريق الردستار .. وفي الدفاع عبد الجليل وأخوهو عماد .. والتيم الخرافي أبوزيد وقرشي ودكتور صلاح .. وحافظ الحمار وابناء سابل .. والغايب مجيد )(بالله الراجل دا وين) ؟؟ وحينما صرنا نحن داخل الملعب ..كانت لنا خبرات كبيرة من هؤلاء النجوم والشرزمة النادرة .. فالمتفرج علي صدت الكرة من عويس أو عبد الحليم الحلبي أو عاطف (الفشقة) الشهير بي (هيقيتا) والناظر إلي دفاعات حافظ وعبد الجليل وعباس ياسين ...وأخيراً اب قاوون .. ولاعبي الوسط الأفذاذ الذين تطول القائمة بهم والهجوم الشرس .. والله إنها تشكيلة من حلاوة (ماكنتوش) الرهيبة .. لهم جميعاً أنحني وأرسل التحايا صرنا نحن إلي الملعب فكنا جميعنا أخوان هؤلاء الافذاذ .. فالموهبة تورث .. فجاء اسامة العب ..خير خلف لخير سلف .. والجص .. ومعتز أبنعوف .. وأبو شعيشع (عبد الهادي) .. والنور الشايقي ثم حافظ خليل وعزام .. وحازم وعلم ومصباح .. وكل من لم أتذكر الآن هذا جانب من ابداعات الامتداد الرياضية .. لفريق واحد ألا وهو الردستار ...وعلي وعد بذكر تفاصيل أكثر في المرات القادمة إن شاء الله .. متناولاً نواحي ثقافية وإجتماعية ...ولكم مني ألف تحية محمد مصطفي الإمتداد مربع 4 منزل رقم 4

Quote: العزيز صديق حمدتو اسع عليك الله عامر دا موش تقول من مواليد السبعينيات والله الواحد نفسو يشوف صوركم بصراحة الذاكرة خلاص ح تتلحس وبعدين شوف صورتي دي

Quote: بالله يا صديق الله يجازي محن منو فينا يا صديق حمدتو يعني محمد تلّي ده قصة كلامو لي بتاع البكس دي امكن هو ذاتو ما يتذكرها .. بس الجميل في الامر انو بتاع البكس شال الخمسين جنيه كلها بدون ان يجادل محمد مره اخرى بطريقته المخزية .. لكنها ايضا من الزمن الجميل .. العزيز كع قال ناس الجمري رحلو اركويت عشان يظبطو البيت ورجعو ( اها يا عبد الله اتخيل بعد ده كلو بعناهو ومشينا جبره .. وعلى فكره يوم الجمعة 7/4 شهد انتقال الاسرة للمقر الجديد بجبرة نتمنى ان يجعل الله فيه الخير والبركة وان يتمكن الامتداد كمان وكمان في الوجدان ونظل مسكونين به .. وين يا جماعة مجدي والفاضل ؟؟ ووين جووووووووووووووووووومو؟ امير الجمري

Quote: الاحباء الامتدادب .. بطاقة حب وتقدير لكم جميعاً .. وشايف نفسي اطلت الاستقامة واقفاً فلك الانحناءة طارق جبريل ولكم التجلة و (الانحناءة) جميعاً احبائي مرتادي البوست.. الوجيه ناصر جبريل : تحياتي يا رائع والله اديت البوست طعم بنكهة القهوة بالزنجبيل .. طبعاً صديق اقترح استثناء مواليد الستينات من انزال الصور وفتح لينا المجال نحن مواليد السبعينات وناس عماد عويس مواليد الثمانينات (يعني مولود في جنيف) ..صدقني ما في زوغة .. بعدين بيني بينك نحن حا نعتمد على الأرشيف بس الشغلانية دايره ليها شوية بحّيت وبما اني انا فاشل جداً في الاحتفاظ بالأشياء لذلك ادعو الأعزاء عامر وصديق لان ينقبوا في البومات الزمن الجميل عسى ولعل ان يجدو لي صورة حتى لو من النوع ( ابو تـفّة) بكسر التاء .. وبمناسبة اضاعتي لأشياء بتحضرني قصة طريفة جداً مع طيب الذكر الحبوب بكري الخليفة .. في زمن انتشار تبادل الشرائط الغنائية كنت معروف باضاعة الشرائط البستعيرة من الشباب فأخونا بكري الخليفة قال : والله امير الجمري ده تديهو الشريط تكون اعصابك بايظة لمن يجي يقول ليك الشريط راح .. بعدين يا ناصر شنو النطة الطوييييلة دي من البحيرة للمعلمين ولا عزاء للاتحاد وربيع 12 والنجوم والردستار وسلام 4 الفي طريقك ؟ المهم عزيزي ناصر المعلمين فريق رقم لا يمكن تجاوزه فهل ينسى حسين جعفر وعبدالله كمر وبدر الدين وعادل وديدي وبقية جيلهم الذهبي؟!. عماد عويس : كيفنك يا غالي .. بنود تسيير العمل غاية في الروعة اتمنى ان تجد الاهتمام من الجميع والكل جاهز واقترح على طارق وعامر الشروع في تكوين تلك اللجان ونحن بدورنا جاهزين ويشرفنا اي تكليف لدفع مسيرة الاصلاح في الامتداد .. ويا جماعة استغاثة بدر الدين يعقوب باهل الامتداد من توالد البعوض وبكثافة فظيعة وانا كنت شاهد عيان.. هذه الاستغاثة والصرخة لابد من تحرك عاجل وسريع لمحاصرة ومكافحة هذاه الحشرات القاتلة . امير الجمري

Quote: كل سنة وانتو طيبين يا اغلى الناس اكتب الان من مقهى انترنت وانا في مدينة الرياض ويشدني حنين عنيف إلى الماضي وعندما يكون الحنين عنيفاً فهذا يعني التقاء الاضداد الحنية والعنف ودي حاجة ما بتتحكي فقط بتتحسّ . المهم هذا الحنين يشدني الى ذكريات ليالي المولد الروحانية الهيامية حيث حلقات الذكر والمديح للمصطفى عليه افضل الصلاة واتم التسليم تلك الحلقات التي تضج باصوات الطبول والدفوف والنوبة والطارات ويصول فيها الدراويش طالقين العنان لما تجيش به نفوسهم في وله وحب حتى الثمالة للحبيب المصطفى وطبعا كان هذا المنظر يجذبنا بشدة ونحن اطفال لكن كنا نمتعض من كثرة الوقوف في تلك الحلقات خوفاً من ان يقضى على الحصين والعروسات الحمراء البهية فننطلق امام والدين متجهين صوب صيوانات بيع الحلويات وكل منا يمني نفسه .. وتنتهي الجولة بشراء كميات من الحلويات السمسمية والفولية والكابكبيه واللكوم مكومة في اكياس في المقعد الخلفي اما الحصين والعروسات فكانت تتوسد احضاننا ونحن نيام . المهم كنا بنصحى الصباح ويبدأ الاحساس بالخوف من الهجمات المرتدة من اخواننا الكبار وكان هاشم وفتحي الجمري يطلقو على الحصين والعروسات ود اب راساً حلو وكنا لما نسمع الكلمة دي يتملكنا قلق ما عادي والحاجة العجيبة انهم كانو بيخوفونا ساكت لكن انا كنت باخد الكلام على انو جد واقول يا ود طالما اصلو القصة ما مضمونة احسن تاخد نصيبك وطوالي الحصان يبقى سكوروج ثم تتوالى الهجمات مني حتى ينقضي وتتحول النظرات تجاه ( العروسات وفعلا كان يحدث ما اسماه عامر بـ (الجريمة المدسوسة) وبعد كده نفكر في اللكوميات وغيره . هي كانت ايام جميلة نتمنى ان يحظى ابنائنا ولو بالحترب منها. . وقد كان بعد قراية مداخلة دكتور حاتم ان اتصلت بام العيال في السودان وطلبت اليها ان تاخذ الاولاد للمولد وفعلا تم ذلك وانا قبل شوية كنت بتكلم معاهم وقالو رجعو وعثمان ولدي الكبير كان متخيل انو حا يجيب حصان عديل ويركبو فلما لقى ىالشغلانية حلاوة فضل الموتر على الحصان مواكبة للعصر .. كل الاحساس الجميل دجه يا اخواننا وانا اكتب واتلفت مره مره ومافي زول في الناس الجنبي ديل عندو اي احساس بالمولد ( اصلو هنا حرام !!!!!!) الحبيب طارق صاحب الرسالة هو عبدالله كع .. ويا اخوي انت بالطريقة دي ما حا تطلع دفعة دكتور طارق محمد حسين انت حا تكون دفعة عم جعفر الله يرحمو يعني زرياب ومحمد مصطفى شكلهم ما حا يجيبوها لبر . امير الجمري

Quote: عندي فكرة ممكن تناقش وافتكر هي مسألة ما صعبة يعني ممكن دي تكون من اول الافكار الممكن تنفذ وهي مقهي نت في نادي الامتداد وافتكر دي ممكن تساعد شباب كثيرين للتواصل معنا عبر هذا البوست وممكن عمل ويب لنادي الامتداد وارشيف للصور وناس بركية ما بيكون عندهم مشكلة تاني مع النيت يعني من داخل النادي ممكن الناس تتواصل وانحنا خارج الوطن ممكن نساهم بالاجهزة وعائد المقهى نيت ممكن يساعد في دعم النادي ولو بالقليل مجرد فكرة ورايكم يا شباب

Quote: مقهي نت في نادي الامتداد وافتكر دي ممكن تساعد شباب كثيرين للتواصل معنا عبر هذا البوست وممكن عمل ويب لنادي الامتداد

Quote: سلامات لكل للامتداداب نسمات ليلة المولد ... حمل عبيرها ألينا أمير ألجمري عبر أبناءه ... الله يحفظهم ... حقيقة أسعدتني وأضحكتني حكاية موتر المولد دي .. يا ابني موتر المولد الكنا بنعرفو كان موتر موكب الرئيس لمن يجي المولد ... يعني زمن حصان المولد راح ... عجبني ليهو .... يا ما أبكاني ... بس أول ما نصل البيت .. الواحد بيكون نعسان أو في الحقيقة نائم .... أشيل حصاني يقوم يقع مني يكسر رقبته ... خلي تاني الحصان يتلفت في المولد ... ما يلقي البيشتري .. أشكرك أخي عماد عويس علي ذكر أستاذ الأجيال حوته .. كنت من المحظوظين الذين نالوا من علم الأستاذ محمود حوته كأول دفعة نالت حظها منه ... أنا ... وأخي وصديقي شاهر حسن خليل .. وأخي وصديقي عادل صالح ( بله ) وذلك في عام .. 1977 في مدرسة بشير .. حيث كنا نذاكر لامتحانات الشهادة المتوسطة .. وتصادف بأن أستاذ حوته كان يراجع أيضاً دروسه لامتحانات جامعة القاهرة كلية التجارة .. فكنا نلتقي في حوش المدرسة .. وبطبعه الكريم تبرع بمراجعة مادة الرياضيات لنا فسحرنا بطريقته وعلمه .. وحبب إلينا مادة الرياضيات .. فكان له الفضل الكبير في نجاحنا ومواصلة مسيرتنا التي ندين بالكثير منها لاستأذنا محمود ..... ولقبه المحبب إلينا حوته...... يا ناصر جبريل الناس ديل ما يقشوك ساكت كلهم شباب .... حالياً أنا أكبرهم خصوصاً بعد غياب بعض العجائز ... يعني أنا الوحيد المعفي من حكاية الصور دي ... حاتم حمدتو

Quote: ازيكم ياشباب....................طبعا حتستغربو وتقولو الزول المن زمان ده جايينا ناطى من وين.......التحية لاولاد جبريل ومنسوبى المسطبة سابقا عامر وامير وصديق وبدر وحبيبنا عويس والتحية لشباب رابطة الامتداد بجامعة الخرطوم والتحية ايضا لصديقى مجدى بركية والفاضل العرفونى بالبوست ده ..........وعلى فكره انا جاى ترانزيت القاهره ومع الشباب ديل وراجع البلد البعيدة ديك وبطنى طامة يعنى حاقدكم من هناك .............ززززززززز اسامه فقير(السعودى

Quote: الأخ الفاضل / صديق حمدتو يسرني من خلال هذا البوست ان أتقدم إليك بأنبل و أعطر واصدق التحايا …واقدر لك مرورك الكريم فى مداخلة فائتة خلال الأسبوع المنصرم ومن خلال متابعتي التى ربما لاتكون منتظمة لهذا البوست المتسامي عظمة وتناولا وحوارا … ونسبة لكثرة المشاغل هنا ولكن هذا بدون شك لن يقف حائلا دون رد التحية بأحسن منها ….عزيزي صديق لعله فى توارد آخر مع الأخ ( أمير الجمرى ) والذي لم تسعدني الظروف ان أراه قد يتكرر نفس الشي مع شخصكم الموقر ..ولكن العزاء إنكم جميعا اصدقاء لأشقائي ولابن أخي عامر الذي انا بمثابة عمه والذي اكن له كل الود والتقدير…. فهذا يكفيني بان اعتز وأتشرف واسعد بمعرفتكم والتي أسال الله ان يجمعنا بكم فى ساعة خير وفرح…وحقيقة أخي صديق ونحن نعيش هنا فى الغرب ليس لنا سلوى سوى هذه الشبكة العنكبوتية ملاذا… هذه الابتكاره التى أفقدت الغربة قليلا من مرارتها التى عاشها آبائنا فى سنيين خلت … فأصبحت هي انسينا وملجأنا اذا ما انتابانا الشجن لبلادنا و أهلنا وأحبائنا من أمثالكم لذلك كان لظهور بوست امتداد الدرجة الثالثة طعم ومذاق خاص تعجز الكلمات ان تنقل الشعور به… كيف ولا وهو الحي الذي أسقطت فيه رؤوسنا … واصبح سفرا فى حياتنا أعاد لنا ذكريات شجية وممتعة يتناولها كل من شارك و سطر فى هذا البوست بطريقته الخاصة والمميزة … فأصبحت متنفسا لكل من كانت له رابطة أو أدنى صلة بهذا الحي المتميز والمتفرد … فيا أيها الصديق ( صديق ) اكرر لك تحياتي العميقة وأعجبتني سطورك الرائعة عن ( الطابية) هذه القلعة التى كانت منتدا للصداقة والتواصل والرياضة والثقافة .. ومن الطرافة المتناقضة أخي صديق حينما بدأنا عمليات إزالة حوائط الطين و( الجالوص) و اعادة البناء لم اكن اعلم وأنا برفقة المهندس استعجله بضرورة انهاء المرحلة الأولى على عجل قبل سفري لم نكن نعلم بأننا نهد مركزا ثقافيا وملتقا للصفوة من أمثالكم…وكنت فى تلك الأيام التقى ببعض الشباب وربما أكون قد التقيت بكم ولم تكن المعرفة عميقة وأيضا قد كنا حضورا فى الحفل الذي نظمه شباب الطابية بمناسبة زواج ابننا عامر تيتاوى والتي شجي فيها الأستاذ عويس فيا لها من ذكريات وأيام سكنت عوالم الذكريات.. أخي صديق أيضا أرجو ان تسمح لى بان انقل لكم عبر هذه الأسطر تحيات أخي طارق الخير ولكل شباب الامتداد ومن خلال محادثاتي التلفونية معه اصبح الحديث عن البوست وظهور الأسماء الامتدادية فيه وسؤالي له عن ما لا اعرفها تأخذ حيزا مقدرا وأخرها تعريفي بشخصك الكريم …وبهذه المناسبة الطيبة انقل إليكم خبر قدوم باكورة إنتاج الأخ طارق بالتحاق زهرة ندية الى أسرة آل الخير عروس امتدادية اختار لها طارق اسم ( مريم ) ونسال الله ان يجعلها قرة عين لوالديها وان يجعلها من بنات الوطن الصالحات فلطارق خالص التبريكات والتهاني . أعيد لك أخي (صديق ) تحياتي العميقة وللإخوان عامر وأمير الجمرى وفارس الحوبة طارق جبريل ساقي وراعى هذا البستان الذي تفيح ازاهيره بكل جميل تتنفسه القلوب . والى اللقاء فى عودة أخرى…. أخوكم على محمد الخير إدريس

Quote: احبتي الامتدادب .. سلام بقدر الود الذي يجمعنا رن جرس هاتفي : اجبت فقط بألو مرحب وسكتّ فلقد انهالت عليّ كلمات رنانة مليئة بعبارات المدح والتبجيل والتهاني والتبريكات والشكر الجزيل للاب الروحي للبوست (طارق) وكنت في زخم التهليل والتبجيل هذا اتلصص وانا متلذذاً به علني اعرف صاحب الصوت وتيقنت من الوهلة الأولى بأن صاحب الصوت امتدادياً حتى النخاع وصدقت توقعاتي فكان الآتي هو صوت الاستاذ المحامي / مجدي خليفة الصادق صديقي الصدوق الشفاف وبدأ يجتر الذكريات وامتع سامعي بعذب الحديث وتمتم بالم لما آلت ايه الامور من شتات الفرقة والغربة الكربة فأوقفته كرمأ مني فمن يلتهم المطايب وحده لاشك سيصاب بالتخمة ذلك ان لم يقاسمه الشيطان مطايبه .. وقلت له هذه الدرر لابد ان يكون لاحبتي مرتادي البوست الامتداداب نصيب منها .. ووعد الرجل وانا اعرفه جيداً حراً ويتضايق من الدين .. فانتظروا الحبيب مجدي خليفة الصادق في مداخلاته والتي بلا شك ستكون اضافة كبيرة لهذا التجمع الخرافي . ولك الود والتقدير يا طارق كل يوم تزداد القاً في داخلي فازداد غروراً وتواضع. امير الجمري

Quote: الحبيب ناصر : خلاص انا استسلمت لمخترعك وحا امشي اتصور مخصوص للبوست طبعاً مع ادخال بعض المحسنات او البهارات عشان تطلع الطبخة مسبكة ونكون مهضومين .. كما انتم. طبعاً نحن كان حيين بنتلاقى وما حا نخت اي شروط عشان نتلاقى ونتلمّ في سودان الامتداد الحب الكبير .. دايرنو بي شكلو الزمان ذاتو ( غنماية تحك ضهرها في الحيطة رغم كتم حريتها من استمتاعها بهذه الحركة بوضع السلك الشائك على الجدران الجالوصية الحنينة ودايرنو بي حمامو الطائر قدام الطاحونة وبي صقورو الحايمة فوق بيت العرس ـ السماية ـ الطهور في انتظار كشح موية غسيل بطن الخروف علّ وعسى ان تحظى بمأدبة ..دايرنو بي باولا الخواجة سكرتير الرابطة لما يتغدى في حلواني البصري بي كيكة) .. ولو ده كلو مافي ما مشكلة المهم نتلاقى في كنف الامتداد و صدقني يا ناصر والله انا من كل قلبي اتمنى ان يمد الله في العمر والتقيكم جميعاً وحتماً وبلا شك (انا الكسبان) ..وربنا يسوي لينا الفي مرادنا . عامر تيتاوي يواصل هواياتو في امتاعنا واسعادنا صورة تجمع حبايبنا صلاح والفاضل وابنعوف ومونية واب قيقة ووليد بلد وكمان في المسطبة .. ده كتير علينا يا عامر .. الله يديك العافية ويخليك لي جنس ده عليك الله واصل وانا عارفك مكتنز بالدرر لكن بتدينا ليها بالبزة وبرضنا راضين بس حقو تعمل لينا البزة حسب الحجم يعني بزتنا مفروض تكون (جالون) .. يللا يا حلوين انتظروا مداخلات مجدي المحامي. امير الجمري

Quote: تحية إجلال لله دركم يا أبناء الامتداد هذه الحميمية والتواصل الرائع الذي أسعدنا أيما سعادة ونحن في الشتات , لقد أعدتم إلينا الق الماضي وذكريات الزمن الجميل في ذلك الحي الراقي بأهله وبما جدتم به عبر الشبكة الدولية الأمر الذي جعلنا نشتم عبير الأمكنة ونحلق عبر الأزمنة في ذلك الزمان والمكان الذي يسمى الامتداد ونحن أبناء الامتداد كنا ومازلنا وعلى الدوام نتشرف بالانتماء لهذا الحي الشعبي العريق من بين أحياء الخرطوم ونقدم له تحية إجلال وتقدير وشرف انتماء. والتحية موصولة للأخ / طارق جبريل على هذا الجهد المقدر . مدخل 1 الشاعر الراحل المقيم خليفة الصادق سليل دوحة لها كعب راسخ في العلم والتصوف والأدب فجده لامه الشيخ صغير ون وأعمامه آل البنا لذلك نال قدرا وافرا من حلاوة البيان وسحر الكلام فنظم شعرا عذبا كأنفاس الربيع تضمخت بعبيره كل الدنا لاغرو إن انتشيت به وحرك في الجوانح ساكنا هو خمره روحية أسرارها في الغيب لم تكشف لنا. لذلك تسابق كبار الفنانين للتغني بشعره العذب فعلى سبيل المثال لا الحصر غنى له الأستاذ/ محمد الأمين( اسمر جميل فتان) و(من شوفتو طولنا نهواه مازلنا) وابوعركى البخيت (دنيا) وصلاح بن البادية (توبة) وصالح الضى (سلوان) ومنى الخير /أم بلينة السنوسي /محمد حسنين/زكى عبد الكريم/مصطفى سيد احمد/فيصل عبد اللطيف/ خليل إسماعيل/ سمية حسن وآخرين يطول حصرهم لكن كل ذلك يمكن الرجوع إليه بشكل تفصيلي دواوين الشعر التي أخرجها الراحل المقيم وهى (خلجات وجدان) و(نبض الإحساس) و(حداة الركب). كان صالونه الادبى بمنزله العامر بأهله سكان مربع 12 والامتداد قبلة لكل الأدباء والشعراء والفنانين وعشاق الفن الأصيل فلا يخلو يوم جمعة أو إجازة من منتدى ادبى وجلسة استماع . كان للرحل المقيم مساهمات مقدرة على امتداد الوطن وخارجه. هاجر من الوطن في العام 1984 وتوفى بالخارج فى العام 1997 . التحية عبركم للاديب الاريب الشاعر العم مصطفى عوض اله بشارة فهو قامة سامقة يتشرف بها الامتداد والسودان . مدخل 2 تحية للرائع عامر تيتاوى , حقيقة هذا الشبل من ذاك الأسد فوالده على قبره شبائب الرحمة أستاذنا الجليل المحامى القدير محمد عبد الرحيم تيتاوى كان من جيل المحامين المخضرمين الذين لهم إسهامات مهنية مقدرة في مجال مهنة المحاماة وفى دروب النضال والتحرر الوطني نرفع الأكف له بالرحمة والمغفرة وحقيقة تشرفت بمعرفة ذلكم الراحل المقيم والذي يعتبر من الرموز الخالدة . نعود لعامر الابن الذي تشرب من والده أجمل السمات منها الحضور وفصاحة اللسان وسلاسة المعاني ونبل المقاصد والمرامي في مرافعاته الصحفية فأصبح له كعب راسخ في مهنة المتاعب الصحافة ومما لا شك فيه أن مهنة الصحافة والمحاماة تلتقيان في أوجه عدة والعمود الفقري المشترك هو الدفاع عن الحريات وإعلاء قيم العدل والمساواة فابشروا اهلى واحبتى ناس الامتداد بإخوانكم أمثال عامر وصحبه من شباب الامتداد لأنكم سليلة دوحة مثمرة تتواصل فيها الأجيال . مدخل 3 نماذج لإبائنا وأعمامنا في الامتداد الذين قدموا تضحيات كبيرة في ظروف من اجل أن نكون لهم منا تحية إجلال وإكبار والحقيقة أن الامتداد يذخر بأمثال هؤلاء لكن اسمحوا لي بتناول أمثلة لبعض الرموز في مربع 12 الرحمة لمن توفى منهم والباقيين نتمنى لهم دوام الصحة والعافية : العم/ عبدا لواحد والتفاني في خدمة مجلس الامتداد وطوافه الدائم بعجلته على كل المربعات لجمع العوائد. العم/ نجم الدين عباس (المحسى) ضابط المطافئ الشهير بحسه الفكاهى وتصدره لكل نفير وفزعة. العم/ أمين المشلى رجل الخدمة المدنية المرموق ومساهماته الفاعلة في تسهيل العمل التعاوني في المربع وفى الامتداد بشكل عام . العم/ عطية ودكانه المشهور حيث كان من الأوائل وهو والد المرحوم /جعفر عطية المهندس الميكانيكي المشهور وقائد السيارات الحريف البارع وإخوانه عباس ومحمد ومصطفى وعلى العم/ عبدا لله المنا الترزي الافرنجى المشهور في قلب الخرطوم الأنيق في هندامه الزجل كلامه . العم/ جلال وديدى صاحب الطاحونة الأولى والوحيدة في المربع . العم / السر والتاكسي الهنتر العتيد والدكان العريق. العم / عمسيب العرضحالجى المخضرم في وسط الخرطوم قبل قيام محكمة الامتداد الجنوبي. العم/ مولانا البيلى ذلك الرجل الورع الذي يؤثرك بعلمه وتقواه وحسن معشره . بالمناسبة توجد شريحة في مربع 13 وهو المربع المجاور لنا من الناحية الشرقية وهى الشريحة الممتدة بعد أخر منزل في مربع 12 من الناحية الشرقية وحتى شارع النص يعتقد الكثيرون أنها تدخل ضمن حدود مربعنا للتواصل الشديد الذي يربط بين الجيران وتداخلهم مع بعضهم في كل المناسبات لذلك فاننى اعتبر الحال من بعضه بين 12 و 13 وأشير إلى بعض المواقع والشخوص المرتبطة بتلك الشريحة من مربع13 المجاورة لنا فدكان محمد على الأطرش له سمعة مدوية في تلك الإنحاء حيث كان يمتاز بالفول العالي الجودة وهذا الدكان كائن في منزل عمنا طيب الله ثراه إدريس هلساب والد كل من محمد وجمال ومصطفى وعائد وقرشي وبجوارهم كانت جزارة أولاد ملاح ثم دكان الحاجة حليمة تلك المرأة المكافحة المنتجة والدة الأخوان عوض حليمة وعمر حليمة ووالدهم العم عبد الرحمن . ولا ننسى أولاد العم سعد/ عوض و جمال واميرابولنقة ومحمد والضب وناس الهادي عوض وإخوانه والحسين الفنان والعم الحضري الطهار . ولنا عودة أخرى إن شاء الله لرموز الفن والكفر وكل صنوف الإبداع الأخرى فالامتداد المشكل من ( 14 ) حجرا كريما . يذخر بدرر تزين ذلكم العقد الفريد ولن ننسى ضمن هؤلاء طليعة فاعلة من الامهات والاخوات اللائى كان لهن مساهمات اجتماعية وتربوية ونضالية مقدرة سوف نتعرض لها بالتفصيل لاحقا فمن الواجب علينا ان نعكس هذه الصور المشرقة لانهن بدر التمام لسماء الخرطوم عموم ,انه الامتداد بدرا مكتملا (14) مربع لا ولن يزيد او ينقص عددها لكن نجومه قابلة للزيادة باستمرار وهاهم يزينون هذا التلاقى القا وسحرا . استدراك لازم: الرائع الاخ/ امير الجمرى اشكرك على التواصل ونبش ذكرى الايام الخوالى وكم هو جميل هذا التنادى للامتداد واهل الامتداد لكم كل الحب والتقدير . اخوكم / مجدى خليفة الصادق مربع 12 منزل رقم 109