حوّاااااااااااااا .. داوووووووووووود .. ( قططٌ فاسقة )

مرحبا Guest
اخر زيارك لك: 03-29-2024, 01:40 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة عماد عبد الله (Emad Abdulla)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
01-13-2008, 11:04 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
حوّاااااااااااااا .. داوووووووووووود .. ( قططٌ فاسقة )


    1 - مدخل :

    القماري تغني : أحمدو ربكم .. أحمدو ربكم ؛ و هي طيرٌ مباركٌ لا يجوز صيده أو أكله . بهكذا قالت جدتي , و لا راد لقضاء الله . جازمةٌ و حاسمة قررت لنا أن الضب خصيم الرب , فهو ما غيره الذي دلّ الكفار إلى مخبأ النبي ( ص ) في الغار .. إذ راح يشيرعليهم بالبحث : ( في القد داك .. في القد داك ) و لولا الحمامات و العنكبوت - ما عدا الكربة المركبة بالقلبة - لكان العالم في ضلالٍ مبين . ذات الحمامات يتراقصن هادلاتٍ : ( أمشي بيت أبوووك .. أمشي بيت أبووك ) فتتشاءم النسوة و يهشنهن مشفوعاتٍ بلعنات : طيرن تطير عيشتكن . أما القرد " بخيت " فقد سرق مركوب النبي و خبأه تحت مؤخرته , فصارت المؤخرة إلى حال الفسخان الوارم ذاك . الكلب عند جدتي سارقٌ للسان التمساح الطويل , فإن أردت ان يتجنبك كلبٌ وقح النباح , فقل له : ( سيد اللسان جاك ) .. فيهرب المنعول , أو فاهزج له : ( كلباً كَلَبكْ .. رباً خلقك .. دنقِر راسك و ارفع ضنبك ) , فيكف عن الهوهوة من فوره .
    و أفتت جدتي كذلك أن الجقر يهرب باحثٌ عن حرمه الخائنة " ست النسا " و هو خجِلٌ من صرمحتها مع جَقَرة الحلة , يفعل ذلك إن رددت عليه : ( هوووي يا راكب عينو حمرة و رقبة طويلة .. قول لحاج فاره .. ست النسا شالتا الطيارة ) . ( ما عرفنا الطائرات التونسية التي لا عودة لمن يركبها , إلا منذ زمن قصير , و عرفها قبلنا جقر ) .

    حفظت تلك المآثر و اتبعتها في تعاملي اليومي مع تلك المخلوقات التي تقاسمنا الأرض و أنعام الله القليلات , فسار حالي معهن طيباً , و بقينا رفقة حسنة و جيرة تراعي خصوصيات بعضها البعض .

    إلا القطط . ما عرفت ماذا أنا فاعلٌ مع القطط .
    كن يرعبنني بذاك المواء الطويل الغريب ليلاً . القطط في حيّنا لها امبراطوريتها الكبيرة , و التي تدول دولتها و تبسط نفوذها كلما أرخى المساء على الحي أستار ظلمته , فتلتمع مئات الأعين الصفراء المرعبة فوق الأسقف و بين الأزقة و الكرور المتراكم هنا و هناك , و تحت الأسرّة و عند النوافذ , فوق أسقف السيارات و عند بيوت الجداد و حيثما كانت رائحة زفرة , أو كوشة معبأة بمخلفات قعدات جهابذة الحي , من بقايا سمكِية و كوارع و أم فتفت و بيض . و كان ذاك الكنز من المخلفات ( القعداتية ) متوفراً في عدد من بيوت الحي , أشهرها " جنة الأطفال " . و هو البيت الذي ظل يتوارث سكناه عزابةٌ من أهلي الدناقلة .. أقدمهم و أشهرهم فيه " قدورة " .

    " قدورة " أقسم أنه قاصم ظهر " عبدو " و مشوه لوجهه رداً لكرامته المهدرة .
    فقد إعتادا على ( القعاد ) سوياً في الشارع أمام بيت العزابة كل ليلة , و بينهما صحن الكوارع و جركانة دائمة . " عبدو " كان حداداً حريفاً , بينما " قدورة " سائقاً حكومياً محترما . حكى قدورة الواقعة فقال :
    الوهم ده قايلني إرنقتنق !! قال لي بيجيني بعدين .. لكن الليلة مسخن شوية و القنزب يللن , قت ليهو ما مشكلة يا أخو , أنا معاي الدوا و العضة , إنت جيب الدغنة و تعال . مشيت أجيب دخاخين من الغالي و نظامات تانية كده و طوالي كبيت راجع الجبل . لقيت الباغة ملحوس نصها يا غان , و الكوارع فاني .. شفت عفانة الفاره ده !! . لما قرصت عليهو قال دي الكديسة , قال شافا بتاكل الكوارع قام هرشا فرتقت . و هو الليلة نظام بطنو غلتانة ما داير سنسنة . شوف المكنة الوهم !! . قول الكديسة أذهلت الكوارع , آمننا بكديسة تعيش ملية صحن كوارع . برضو الكديسة شربت الشوربة و لحست نصيصة الدوا ؟؟ كديسة هي وللا صلاح باكومبا ؟؟ يا أخو الليلة أخش ليك طقطقة كده للفاره ده لمن يعرف حاجة .

    القطط مخلوقات كريهة .
    كانت تستمر المواءات و الخربشة و التلّيب و الغرغرة و الزمجرة , سيمفونية من الرعب تنتظم الليلة بدءاً من سقوط دولة النهار و حتى استقلالنا بشمس جديدة في الصباح التالي .
    كنتُ صغيراً حينها . كثيرٌ ما أبقى الليل بطوله شاتماً كلما فجعتني زمجرة فجائية قريبة صادرة عن عشرات مخلوقات الليل البليدة تلك و هي تسيطر على أسطح المنازل , أو تمارس مطارداتها الصاروخية أرضاً و فوق و تحت الأسرّة , فأقفز شاتماً و انا في وسط فراشي : فسسسسس .. إنعل أبوك , فتنبري أمي من نومها فزعة : يا ولد نوم نومك , الكدايس ديل فيهن بسم الله , إنخمد .. باكر عندك مدرسة . كيف ينوم الولد و هذه المخلوقات المفترسة يمتلئ بها الليل كله ؟ !! .


                  

01-13-2008, 11:08 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)


    2 - مخرج :

    في مرحلة لاحقة من عمري ظل ملازماً لي مقتي للقطط عظيما , أعود كنت في أواخر الليل و رأسي في مزاجها الحلو العالي .. ممنياً النفس بسرحان و تأمل لذيذ الخدر . و قد كانت السماء جميلة زمانئذٍ , و قريبة حتى ليمكنك رؤية السيدة المرسومة على القمر جالسة على كرسي تخيط الثياب لأطفال يتقافزون حولها .. سيدة صبورٌ لا شك في جلستها الأبدية تلك . فما كان ينغص عليّ ليلي , و يطير عصافير مزاجي إلا تلك المخلوقات البشعة : القطط .
    على ذلك فقد أحببت الكلاب كثيراً , و امتلكت عدد منها طوال سنوات : جيمو / بوبيس / توسكا ( كنت في حالة عشق حاد حين أطلقت عليه ذاك الإسم ) / ريغان / بيبو ...
    يصغرني كان شقيقي " وحيد " , و لئيماً لميضاً متمرداً , أصرّ أنه واقع في حب إحدى بنات الحي ( س ) و نحن بعد صبيين نتنسم مراهقة , فجلب قطيطة صغيرة إلى البيت و أطلق عليها اسم ( سوسو ) تدليلاً لاسم حبيبته تلك . القطة عمصاء العينين كانت ذات حظوة عنده , تنام معه و تشاركه الشاي و الرغيفات المغموسات فيه , و يؤثرها بالمغانم من لحيمات ملاح الغدا , و يمعن في المسح عليها و التربيت و التقبيل و المناجاة : شديدة إنتي يا ( سوسو ) ياخ .. أحب شعرك و عيونك ديل يا حقتي !! .. ( و كان تغزله جلفاً دون خيال و لا ذخيرة رومانسية , ما أدى به ليصبح عسكرياً ناجحاً فيما بعد ) .
    كنت أبغض تلك القطيطة و أتجنب كل ما يتصل بها , للونها البايخ و عيناها البائستين , و وبرها اللزج حين يلتصق ببناطيلي الكرمبلين فيعلق فيهن .
    ظل " وحيد " على حال التعشيق ذاك زمان ليس بقصير . يتخاصم و حبيبته .. فتنال القطة منه ما تنال من القسوة و السب . يستتب بينه و حبيبته الهوى فتهنأ القطة بأيامٍ عسلية . حتى جاءني يومٌ من بعد شهور التربية القططية تلك غاضباً ..
    : ( سوسو ) طلعت ضكر .
    فزعت أنا .. فقد كانت البنت جميلة و انثى حقيقية بمنحنيات و تكورات و .... , حتى انني كنت أرازيها بالإبتسام و الحركات المبطنة كلما تصادفت و إياها .
    : أوع تكون شفت حاجة ؟؟ .. قلت ذلك و انا أتحسبن من قبح المنظر الذي شطح به خيالي .
    : ياخي شفت شنو إنت كمان !! .. قاصد ليك ( سوسو ) الكديسة .
    ارتحت من غزله السوقي بعدها , ومن تدليله المفجع لتلك الكديسة . لتتخذ القطة الخائنة مكانها فوق راس البيت من حينها مع صويحباتها , و ذلك تجنباً لكثرة الركل و القذف بما في متناول اليد من براطيش و أحذية , و المهانة التي حاقت بها جزاء فضح ذكورتها .

    إحتللت ذات ليلة شتوية سرير أبي في الحوش الجواني , كان غائباً في إحدى أسفاره سائقاً لقطارات سكك حديد السودان , يغيب كان رحمه الله فيها لأيام , ليعود محملاً بجوالات الفحم و الذرة و الشاف و الطلح و القونقليز و سمن و كثير مباهج لنا . سريره ظل طوال فصول الصيف و الشتاء يحتل الموقع تحت الجدار الفاصل بيننا و جارنا " إسماعين البوليس " . أبعدت السرير كثيراً من تحت الحيطة تحسباً لغدر مخلوق مجنون آخر يتخذ من الجدار ذاك منصة للقفز أو الزحف أو التسلق , ثم نمت نومة الديك في الحبل .
    حووووووا .. داووووود . حووووووا .. داووووود .
    صحوت على ذاك المواء العظيم فوق سطح الغرفة خلف رأسي , فتناومت ثانية و لعنت يومي كعادتي كل ليلة . ليستمر دون توقف ذاك الدويتو بين المخلوقين الغبيين , هو ينادي عليها حووووووووا .. و هي تجيبه : داوووووووووود .
    أي غزلٍ هذا الذي تظن تلك الكدايس أنها ممارسته ؟! واحد يقول لحبيبتو حوا , تقوم تقول ليهو داوود .... أها و بعد داك ؟؟ .
    تعالت الأصوات شيئا فشيئا لكنهما ما برحا مكانيهما .
    فكرت غاضباً : ماذا لو أن القطط تتكاثر كما النبات .. تكاثراً خضرياً !! .. أو حتى لو تتكاثر بالإنقسام .. مثلاً !! او أي مصيبة تكفينا هذا التناسل الفضائحي . لكان الليل أهدأ و أحلى .
    نمت من ملل تلك الحواا داووود .. حوااا داووود , و انا مطمئنٌ إلى أن تلك العوارة لا بد منهكةً حلاقيم هذه المخلوقات المتخلفة .. فتنصرف إلى ما يفيد .
    في سلام تناومي ذاك , أظن داووداً فاجأ حوا بقفزة بهلوانية حين فاض به , قفزت فزعة على إثرها حوا , ليقفزا معاً في تشابك شرسٍٍ عبيط من أعلى سطح الغرفة مستقرين تماماً فوق جسدي الممدد مستدفئاً تحت البطانية , لأنتفض من هول الواقعة و أهب قافزاً في منتصف الفراش من الصدمة المفاجئة, رامياً مِن عليّ بالبطانية الصوفية الثقيلة مباشرة فوق معركة أولئك الحوا و الداوود , فعلقتُ معهما .. و زادت البطانية من تلك الشربكة , و دارت رحى حربً شرسة لثواني بيني و البطانية التي أمسكت برجليّ , و بين حوا و داوود داخلها ( لا علم لي بتفاصيل ما دار بينهما في تلك الثانية تحت البطانية , إلا أنني أرجح انها محاولات فكاك من ورطةٍ ما .. لا غير ) .
    كان أن إنكسر حلق سرير الحاج محصلةً لتلك الحرب فائقة السرعة .

    في الصباح التالي لاستقلالي من الليل و الحرب و القطط , عرفت ان ذاك الداوود المتهور قليل الخبرات .. لم يكن إلا صاحبنا ( سوسو ) في أولى محاولاته لأن يصبح داووداً .


                  

01-13-2008, 11:15 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    Quote: .....
    أبوساندرا !! :
    ساعدنا بالكلام الرشيد بالله .

    مودتي .


    بس انت أشطب أبوساندرا الفوق دي وأكتب بدلها
    عمدة !!!

    الله لقاني فيك يوم
    يا حامي الحمى

    بس هسع المطرة صابة
    والسماء بتجهش
    وقلبي

    والهر الكامن في نافوخي


    حبي الأكيد
                  

01-13-2008, 11:26 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: أبو ساندرا)


    يا كبير ..

    كلامك ده قولو للكدايس .. خليها تساعدنا بالمواء الرشيد ..
    كل ليلة يا أبوساندرا ياخي أساهر أنا بالعوّة دي ؟؟
    ذنبي شنو ياخ !!

    ثم أنني لا أفهم بالسياسة ..
    ح أبقى رشيد لما أكتب سياسة ( بعد عمر طويل )
    Quote: والهر الكامن في نافوخي
    هو بالله لحقك هناك ؟
    أطردو .. خلي يمشي بيت ناس خالتو .

    محبة كبيرة يا منعول .


                  

01-13-2008, 11:32 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    Quote: كل ليلة يا أبوساندرا ياخي أساهر أنا بالعوّة دي


    انت الوداك في موسم الأخصاب شنو
    لكن أحسن ليك
    فالحال هنا أظرط
    على الأقل { كدايسنا} بيعملوها بالستر
    ليلآ وفي سقف المنازل وماينوبنا غير الغنج

    لكن هنا سمع وشوف
    جهارآ نهارآ
    وفي الجابرة دي
    على الهواء مباشرة
    بث حيي ومباشر

    قبل 3 أيام والدنيا ماطرة رأيتهم عند باب بيتي
    فلعنت إبليس وإستعذت بالله

    تعوذ
                  

01-13-2008, 11:44 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: أبو ساندرا)


    داير تجيب لي شبهة بكلامك الشين .
    كده ح تفخخ لينا بوستينا ده ..

    أبو ساندرا ..
    ساعدنا بالكلام الرشيد بالله .



    ....
    بالله في مطره في الدوحة و غيم ؟
    و إنت المقعدك ورا الكمبيوتر شنو و الحال كذلك ؟؟


                  

01-13-2008, 11:37 AM

تماضر الخنساء حمزه
<aتماضر الخنساء حمزه
تاريخ التسجيل: 10-13-2006
مجموع المشاركات: 5215

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

                  

01-13-2008, 11:50 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: تماضر الخنساء حمزه)




    مين ؟؟؟؟ ..
    داوود في شكل سوسو !!؟



    .....

    خنساء .. مشتاقين .

                  

01-13-2008, 12:10 PM

فيصل نوبي
<aفيصل نوبي
تاريخ التسجيل: 09-16-2005
مجموع المشاركات: 14194

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    ماشين كويس لحد هنا ..
    Quote: في الصباح التالي لاستقلالي من الليل و الحرب و القطط , عرفت ان ذاك الداوود المتهور قليل الخبرات .. لم يكن إلا صاحبنا ( سوسو ) في أولى محاولاته لأن يصبح داووداً .
    بس دي عرفتها كيف


    __
    عماد
    دوما اؤجل قراءة ما تكتب لما بعد المغارب لاجهز فنجان من القهوة التركية و اشعل بعض من تبغ لاسبح مع كتاباتكـ
    و عندما اصل النهاية تراني نهما للمذيد ..
    تعليقات علي شاكلة ما كتب شخصي الاشتر اعلاه تفسد متعة البوست لذا تراني دوما اقراء و اذهب لادعو لكـ او عليكـ سراً كما علمتني حبوبة ..
    اليوم قررت ان اثقل حروفي عليكـ في هذا النص صباحا لاكتب الخرمجة اعلاه .



    _
    دي نتيجة كتابة الليل بتاعتكـ و خرمجة الصباح تبعنا
                  

01-13-2008, 05:49 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: فيصل نوبي)


    Quote: بس دي عرفتها كيف
    بالكسرة الظاهرة يا نوبي ..

    لقيتو مشلضم و ماشي جنباوي و نفسو قايم ..
    سوسو المسكين .

    ......
    Quote: لاجهز فنجان من القهوة التركية و اشعل بعض من تبغ لاسبح مع كتاباتكـ
    و عندما اصل النهاية تراني نهما للمذيد ..
    أهااااااا ده نوع الكلام البيكعوج الزول ..
    و يلخبط حال الواحد ..
    خاصة لما يجي من زول لعنة و مقرّم .

    ياخي عاجز عن الرد على الكلام الصعب ده يا فيصل .
    لكن ح أتسداهو فيك يوم ما .

    مودة يا نوبي ..
    و عامك سعيد .

                  

01-13-2008, 07:59 PM

Ishraga Mustafa
<aIshraga Mustafa
تاريخ التسجيل: 09-05-2002
مجموع المشاركات: 11885

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)




    كان لى قطة صغيره سميتها سميرة
    تنام فى الليل معى وتلعب باصابعى



    القطط اليفه وتمارس الفتها وفق طقوسها....



    استمتعت بقراءة حواااااااااااااا ودووووووووووووووووووووداها {الفاسقون}



    ------------------

    القطة اعلاها تنتمى للمخلوقات الأوربية
                  

01-14-2008, 05:59 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Ishraga Mustafa)


    Quote: القطط اليفه وتمارس الفتها وفق طقوسها....
    أليفة يا إشراقة ؟؟؟
    لا أعرف لها إلفة هذه المخلوقات ..
    يقال أن أهلكم الأوربيون يفعلون لها السبعة و زمتا تدليلاً و رفقا بها و بلاوي ..
    .. لا بد أن القوم بهم لوثة , حمانا الله .

    لدي كتابٌ كان عن القطط ..
    نوعٌ من الإنسايكلوبيديا أظنه , ما اهتممت إلا بالتطلع إلى أشكالها ..
    عجيبٌ كيف أنها تختلف في درجات قبحها ..
    تصدقين ان أحدها بلا وبر ولا شعر ؟؟ .. فقط جلدٌ خشن متغضن !! .. تخيلي الأمر معي .
    تشبه ذاك الكائن الغريب في ( لورد أوف ذا رينقز ) .. ممعوطة و مفسوخة .

    سعدت بوجودك هنا يا إشراقة .
    كوني بخير .


                  

01-13-2008, 10:22 PM

wd al geran
<awd al geran
تاريخ التسجيل: 09-08-2003
مجموع المشاركات: 670

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    كِتابتك حلوة يا عِماد ..



    عساك طيّب

    (عدل بواسطة wd al geran on 01-13-2008, 10:52 PM)

                  

01-14-2008, 00:37 AM

محمد عثمان الحاج

تاريخ التسجيل: 02-01-2005
مجموع المشاركات: 3514

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: wd al geran)

    تحياتي عماد ...
    وياليتك رأيت قططنا هنا لإذن لكنت ترثى لحالها فهم أولا يقومون بإزالة أظافرها declawing فتفقد القدرة على الخربشة وتمزيق الملائات والأفرشة وفوق ذلك كله تفقد القدرة على تسلق الجدران وأسطح البيوت والأشجار، ولا يكفهم هذا العذاب فيقومون أيضا بإزالة الغدد الجنسية وبالتالي يفقد داوود كل رغبة في حواء، مع ذلك كثيرا ما أراها تتجول حائرة وأسئلة فلسفية ضخمة تدور في رؤوسها الصغيرة!

    وشوف الونسة الدقاقة دي:

    (عدل بواسطة محمد عثمان الحاج on 01-14-2008, 00:39 AM)

                  

01-14-2008, 08:15 AM

Ishraga Mustafa
<aIshraga Mustafa
تاريخ التسجيل: 09-05-2002
مجموع المشاركات: 11885

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: محمد عثمان الحاج)

    بعد إذن الاخ عماد

    استوقفنى تعليق الاخ محمد عثمان الحاج:

    Quote: وياليتك رأيت قططنا هنا لإذن لكنت ترثى لحالها فهم أولا يقومون بإزالة أظافرها declawing فتفقد القدرة على الخربشة وتمزيق الملائات والأفرشة وفوق ذلك كله تفقد القدرة على تسلق الجدران وأسطح البيوت والأشجار، ولا يكفهم هذا العذاب فيقومون أيضا بإزالة الغدد الجنسية وبالتالي يفقد داوود كل رغبة في حواء، مع ذلك كثيرا ما أراها تتجول حائرة وأسئلة فلسفية ضخمة تدور في رؤوسها الصغيرة!


    منذ سنوات وانا افكر ان اجد مدخلا لهذه الكلاب والقطط فى هذه البلاد
    مبرمجة وفقدت احساسها {بهويتها}، تدهشنى وداعة القطط {الاوربية} وكذلك كلابهم وكثيرا ما اقف مع المنادين والمناديات بحقوق الحيوان حين بنشرون فى الشوارع طلبا للدعم، كلاب وقطط هنا مختلفة تماما احس بيها مسجونة فى سجن الحضارة والتحضر، بالمقابل محزن امر كلابنا الضاله وقططنا {الفاسقه} الا ان حريتها لاتشترى بثمن فلنتركها تنطط من السقف الى الاسره اصلو القيامة حاتقوم..وعليك ياعماد يا اخوى ان تتعود على ذلك.. امرك لله

    اخاف الكلاب وصوت عوائها واحس ان كارثة بعدها سوف تحدث ولن انسى احتجاج النمساوية فى اليوم الذى جفلت فيه وانا جديدة لنج فى فيينا والكلاب النظيفة والقطط المشذب صوفها، جفلت من الكلب واذا بالسيدة العجوز تغضب منى وتقول: من يخاف من من؟ بالنسبة ليها افريقية بالتأكيد قادمة من الادغال وربما لاتتوانى من اكل اللحوم البشرية ناهيك عن كلبها الذى تغرى عجيزته الضخمة بالافتراس...

    الخلاصة: الاسئلة الفلسفية هى عن قيمة الحرية؟
    ثم عن تعامل صغارنا فى هذه البلاد الاوربية مع هذه الحيوانات، كيف حين يخاف الوالدين من الكلاب او القطط ويطالبك صغارك بهدية قيمة عبارة عن اربعة قطط وكلبين وثعلب كما تطالبنا مرافىء بتى الله يديها العافية... اشارة الى الاختلاف بين اهواء الابناء عن الوالدين... وحكم
                  

01-14-2008, 06:50 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: محمد عثمان الحاج)


    Quote: وياليتك رأيت قططنا هنا لإذن لكنت ترثى لحالها فهم أولا يقومون بإزالة أظافرها declawing فتفقد القدرة على الخربشة وتمزيق الملائات والأفرشة وفوق ذلك كله تفقد القدرة على تسلق الجدران وأسطح البيوت والأشجار، ولا يكفهم هذا العذاب فيقومون أيضا بإزالة الغدد الجنسية وبالتالي يفقد داوود كل رغبة في حواء
    عارف يا ود الحاج ..
    أهلنا الخواجات ديل خبيثين يعلم الله .
    جانا زمان إعلان في ( تهامة للإعلان ) ..
    السيد العميل مُصِر يستعمل صورة كديسة بتجر في شراب نايلون بتاع واحدة رجلينا ناعمة شديد ..
    عايز يسوّق الشراريب دي في السعودية !!!
    قال من متانتا حتى الكدايس بأضافرا ما بتقدر تمعطا !!!
    هن النسوان الخلاقة ديل , شراريب شنو العليهن كان ما ساكت ؟؟ ..
    شراب طويل يا ود الحاج يوصل لغاية نهاية الساق فووووق !!
    مُنتج خواجاتي للنساء جميلات السيقان اللاتي يفورن البطن ..
    ما عندو علاقة بسيقان نسوانا الزي كريعات الجراد ديل , و ما بينفع في الخليج مع العبايات و البنطلونات ( مع إنه في إشراقات بديعة هناك حين ميسرة .. قادر الله ) .
    أها الخواجات ديل عرفوا حاجة , الكدايس بدون أضافر مريحة للشرابات ديك ..
    و كمان كدايس بدون غدد جنسية ( مع إني ما عارف الغدد دي قاعده وين ) لكن أهم شي إنها بتوقف حكاية حواااا داوووود دي ..
    تاني الكدايس يكوركو لشنو ؟ سخانة و مافي ..
    عشان كده خواجاتنا ديل عاملين فيها بيحبوا الكدايس !!
    ياخوي العندهم دي ما كدايس ..
    العندهم مخدات ناعمة متحركة ..

    تسلم يا ود الحاج .
    مودتي .


                  

01-14-2008, 06:28 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: wd al geran)

    عدلت شنو إنت ؟؟
    إعترف ..

    جنك تعديل ..
    كرهتنا ..
    كان عندنا في كلية الفنون محاضر و رسام و صديق من أجمل مخاليق ربك ..
    أستاذناالفاتح اللعوتة ..
    أول زول عرفني على فكرة ( الفيرست طتش ) FIRST TOUCH خلاني إلى اليوم مؤمن تماما إنو الدفقة الأولى بتاعت إحساسك هي البتكون شايلة جواها كل التعبير .. ( زي القطفة الأولى ) .. ( القبلة الأولى ) .. ( الإرتعاشة الأولى ) .. أو ( العرقي البكر ) ..
    و كيف إنها أصدق اللمسات على الإطلاق في الرسم و التلوين ..
    كان جنو و جن حكاية المسح دي .. او حتى التظبيط ..
    لأنه طوالي بتدخل فيها حكاية " العقلنة " بقياساتها الكتيرة و مسيخة و مشوهة .

    يا زول أنا زاتي بعدل و أراجع و أحاسي و أواسي ..
    ( الخواف ربى عيالو ) ..
    لكن إنت كترتها يا ود الجيران ياخي ..
    بتمغس لما أحس إنو في حاجة فاتتني .
    تاني بالله ما تفوتنا الحاجات .. الله يرضى عليك .

    شاكر كلامك الحلو ..
    يا زول يا حلو .
                  

01-14-2008, 00:29 AM

Adil Osman
<aAdil Osman
تاريخ التسجيل: 07-27-2002
مجموع المشاركات: 10208

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    2 Spotted Silvertabby cats copulating : Tonka x Truus
                  

01-14-2008, 01:40 AM

wd al geran
<awd al geran
تاريخ التسجيل: 09-08-2003
مجموع المشاركات: 670

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Adil Osman)

    سؤال فنّي يا عادِل عُثمان ..

    إنتا في (شُغل) الكدايس
    التِحِت بكورِك والفوق بِكورِك

    ليه؟!!
                  

01-14-2008, 04:26 PM

Adil Osman
<aAdil Osman
تاريخ التسجيل: 07-27-2002
مجموع المشاركات: 10208

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: wd al geran)

    Quote: سؤال فنّي يا عادِل عُثمان ..

    إنتا في (شُغل) الكدايس
    التِحِت بكورِك والفوق بِكورِك

    ليه؟!!

    علمى علمك يا ود الجيران.

    بعدين (التحت بكورك) ولا (التحت بتكورك)؟
    زى ما واضح فى الصورة الكديس بكون عاضى رقبة الكديسة اثناء الجماع.
    فهل تصرخ الكديسة من المتعة أم من الألم؟
    الكديس طبعآ يصرخ من المتعة فى كل الاحوال.

    ارجو ان نحول السؤال الى قسم علم الحيوان او كلية البيطرة فى جامعة الخرطوم.
                  

01-14-2008, 07:20 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Adil Osman)


    يا عادل .. !!!








    تسكتو إنت و ود الجيران ..
    وللا ننادي ليكم بوليس الحريقة ؟؟!


                  

01-14-2008, 07:13 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: wd al geran)


    ود الجيران !!!
    ح أفُطّك ..





    ....

    لعنة الله على الكافرين

                  

01-14-2008, 07:08 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Adil Osman)


    يعني يا عادل أعلق أقول شنو في المِحنة الجبتها لينا دي ؟؟؟

    بعدين زاتو بتاع الكاميرا ده زول عجيب ياخ ..
    الجماعة ديل ما بتلحق تشوفهم زاتو .. فووووووووووو لما ما تفهم الحاصل شنو !!!
    يا زول صورتك دي ( فابريكيتيد ) !!
    ديل ناس قاعدين براحة كده و مرخمين مدلعين نفسهم ..
    هسه لو جد جد .. كان تلقى الكترابة للسما و النونواا و المخاخيت و السكلي و العميان شايل المكسر ..
    ده لو ما جوك ناطين من الشاشة دي و قهموك ..
    ده شغل ما مضمون كلو كلو .

    بعدين ليه دايماً ذكور المخلوقات أجمل من إناثها ؟
    عاين لكل الذكور ( عدا ود ابن آدم ).. تلقاها منفوشة و ملونة كده و شبعانة و سمحة ياخ ..
    أعراف و لعاليع و غوفات و و قرون و أب عديلات و أصوات و حلاقيم و ريحة ..
    ( الله ذاتو عارف الإناث بتعجبهم المظاهر الفشنك دي , و طوالي يغرودن عويناتن و يدوها كوز غنج و دلال ) .. يا ربي ما تمحِننا ..

    غايتو نقول شنو .. الحمدلله .

    تسلم يا عادل .


                  

01-14-2008, 04:20 AM

نها محسن أبورأس
<aنها محسن أبورأس
تاريخ التسجيل: 04-04-2007
مجموع المشاركات: 856

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    أخي عماد
    تحيات طيبات
    Quote:

    فإن أردت ان يتجنبك كلبٌ وقح النباح , فقل له : ( سيد اللسان جاك ) .. فيهرب المنعول , أو فاهزج له : ( كلباً كَلَبكْ .. رباً خلقك .. دنقِر راسك و ارفع ضنبك ) , فيكف عن الهوهوة من فوره



    جربت التعويذة دي لكن الكلب إتلوم معاي شديد ...والنصيحة لي الله هو كف عن الهوهوة لكن ما كف عن الجري(السك)

    Quote:
    القطط مخلوقات كريهة .
    كانت تستمر المواءات و الخربشة و التلّيب و الغرغرة و الزمجرة , سيمفونية من الرعب تنتظم الليلة بدءاً من سقوط دولة النهار و حتى استقلالنا بشمس جديدة في الصباح التالي .




    دي أسالني منها أنا ...للقطط عندنا في مستشفي الخرطوم رابطة , منظمة أو شئ من هذا القبيل.تقرأ ليها تعاويذ تتقلب ليها فكي عديل برضو ما بتتزحزح ...ثقالة وقلة ذوق وجرأة غريبة...أما عن الأكل فهي محتلة مطابخ المستشفي وبتاكل أكتر من المرضي ..يعني بدل ماتزور ليك مريض مسكين جعان الافضل إنك تزور ليك كديس متسلط شبعااااان بتمطئ في أركان المستشفي ويمشي بمزااااج بين العنابر ولاااا أجعص جراح ...والله بس ناقصاهو السماعة واللاب كوت ويبقي بروف كديسو الهرري ..
    عندي قريبي كان معصعص(ضعيييف) قام سافر السعودية وبعد سنة رجع سميييين مجضم قاموا أصحابوا قالوا ليه بقيت عامل زي كدايس المستشفي.. يعني الجماعة الطيبين بقوا مضرب مثل...والغريبة إنهم قاعديين ومافي أي طريقة إنهم يطلعوا من المستشفي وفي النهاية طلعنا نحن وخليناها ليهم..

    ربنا يسعد أيامك ويبعد عنك شر مخلوقاته الشرسة..
    مودتي
                  

01-14-2008, 05:40 AM

محمد سنى دفع الله
<aمحمد سنى دفع الله
تاريخ التسجيل: 12-10-2005
مجموع المشاركات: 10986

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: نها محسن أبورأس)

    طول عمري ده
    قايلك فار
    اليلة طلعت لينا
    كديييس
                  

01-16-2008, 02:25 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: محمد سنى دفع الله)





    الليلة يا سني كان تنوم .. !!
    سميني كوكو .

    شفت و إنت طالع أنصاص الليالي في سلمكم داك , تلقي البعاتي ده وششششششششش ..
    و كده و كده .. و زاد وجدي .




                  

01-14-2008, 06:08 AM

هاشم أحمد خلف الله
<aهاشم أحمد خلف الله
تاريخ التسجيل: 01-16-2007
مجموع المشاركات: 6449

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: نها محسن أبورأس)

    عماد يأخي أحبك واحب كدايسك معاك

    تخريمة :-

    معاي نمر ممكن أشارك بيهو


                  

01-16-2008, 02:36 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: هاشم أحمد خلف الله)




    هاشم ياخوي ..
    غايتو بس حامدينو ما جاحدينو ..

    عاين الخلقة !!



                  

01-16-2008, 02:18 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: نها محسن أبورأس)




    يا سيدي الحسن فوق عماد ..

    هسه النصيبة دي غير التاج ود بشير الطهّار بتشبه شنو تاني ؟؟
    Quote: ربنا يسعد أيامك
    سعادة مع ديل !!
    إنتي يا نها جادة ؟؟؟


                  

01-14-2008, 06:25 AM

د.نبراس


للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    استاذ عماد ,,

    والله قدر ما حاولت اقاوم الرد عليك , عشان كترة الطله
    البتمسخ خلق الله ,, ما قدرت !!
    عندك اسلوب لجذب مخلوقات الله فريد من نوعو !!
    (مخلوقات من البشر قصدي , غير الكدايس) !!

    اها القصص بتاعة الكدايس وحبها البليد دي ضحكتني كما لم افعل
    من قبل ,,
    وحمدت الله انهم (حوا وداوود) , لانو لو ناداها قال ليها حوااااااااا
    قالت ليهو ادممممممممم , كان اتأكدت انو المخلوقات دي فيها عرق بشري !!
    لانهم مرات ببقوا لي زي البشر ,,
    العواء الفيهو مناداه ومناجاه واستجداء العطف ده بيشبه مناجاة بعض البشر
    (اللواييق) منهم !!

    غايتو ,,
    الله يجعل صباحاتك كلها ضحك كده , زي ما ضحكتني من الصباح ,,
    ونهارك سعيد ..
                  

01-17-2008, 11:31 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: د.نبراس)


    مساء الخير يا نبراس ..

    مساءٌ آخر من شحذ العصب لمدافرة قبيلة الليل الموّاءة التي تترصد به ..
    حكمة الله أن هذه البلاوي لا تقرب أعداءها الطبيعين !!
    فهي تعاف الفئران بتقسيمات فصيلتها ..
    فلا يعجبها جقرٌ ماكنٌ , و لا هي تعبأ لأم سيسي .. و لا شأن لها بكميات الضفادع و الجنادب التي اجتاحت المدينة ..
    هي فقط تسعى وراء المخلفات و تفتح الحلل و تأتي على ماطاب فيها ..
    ثم إذا تجرأتها هارشاً حدرت لك و حقرت بطولك و عرضك .

    لم يكن ألوق من كديسة في إنبراشة رومانسية مجيهة .. إلا صاحبي مصطفى ع ..
    شكراً لله أن الكدايس الداوودية لا تضحك ضحكته اللزجة التي يلصق بها الكلمة ورا الكلمة ..
    كان الضحك شرطنا بالليل ده ..
    الغريب أن البنات كن يسلمن أمرهن لله في آخر الأمر و يكلمنه ..
    و هي حكمة منهن , فقد كان يمل سريعاً تلك التي تفصل , فيعتقها لله و الرسول .

    يسعدني وجودك أينما كان ..
    فهو يضفي على المكان روحاً حلوة .

    الله يحلي أيامك يا نبراس .
    مودتي .

                  

01-14-2008, 06:58 AM

د.محمد حسن
<aد.محمد حسن
تاريخ التسجيل: 09-06-2006
مجموع المشاركات: 15194

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    نضر الله وجهك
                  

01-14-2008, 07:55 AM

ابو جهينة
<aابو جهينة
تاريخ التسجيل: 05-20-2003
مجموع المشاركات: 22456

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: د.محمد حسن)

    العماد

    سلام مربع

    Quote: حفظت تلك المآثر و اتبعتها في تعاملي اليومي مع تلك المخلوقات التي تقاسمنا الأرض و أنعام الله القليلات , فسار حالي معهن طيباً , و بقينا رفقة حسنة و جيرة تراعي خصوصيات بعضها البعض .

    إلا القطط . ما عرفت ماذا أنا فاعلٌ مع القطط .
    كن يرعبنني بذاك المواء الطويل الغريب ليلاً . القطط في حيّنا لها امبراطوريتها الكبيرة , و التي تدول دولتها و تبسط نفوذها كلما أرخى المساء على الحي أستار ظلمته , فتلتمع مئات الأعين الصفراء المرعبة فوق الأسقف و بين الأزقة و الكرور المتراكم هنا و هناك , و تحت الأسرّة و عند النوافذ , فوق أسقف السيارات و عند بيوت الجداد و حيثما كانت رائحة زفرة , أو كوشة معبأة بمخلفات قعدات جهابذة الحي , من بقايا سمكِية و كوارع و أم فتفت و بيض . و كان ذاك الكنز من المخلفات ( القعداتية ) متوفراً في عدد من بيوت الحي , أشهرها " جنة الأطفال " . و هو البيت الذي ظل يتوارث سكناه عزابةٌ من أهلي الدناقلة .. أقدمهم و أشهرهم فيه " قدورة " .


    ما تحته خط هو شعوري تماما حيال غزل القطط عيانا بيانا و على مسامع الجميع و في فصل الشتاء على وجه الخصوص حيث تنتقل طبقات صوتها لتقتحم سكينة الغرف و طيات البطاطين.

    سرد ممتع يا قريبي
                  

01-14-2008, 08:38 AM

salma subhi
<asalma subhi
تاريخ التسجيل: 06-29-2006
مجموع المشاركات: 4817

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: ابو جهينة)



    Quote: القطط في حيّنا لها امبراطوريتها الكبيرة , و التي تدول دولتها و تبسط نفوذها كلما أرخى المساء على الحي أستار ظلمته , فتلتمع مئات الأعين الصفراء المرعبة فوق الأسقف و بين الأزقة و الكرور المتراكم هنا و هناك


    شفت مع إنك بقيت ما بتطل على بوستاتنا لكن المكان الفيه صورة كديسة ما بفوتو...


    كل سنة وانت طيب أخ عماد

    (عدل بواسطة salma subhi on 01-17-2008, 11:37 PM)
    (عدل بواسطة salma subhi on 01-31-2008, 07:47 PM)

                  

01-31-2008, 08:03 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: salma subhi)



    جايبة لي الكدايس أم كشافات كمان ؟؟
    الفيكي إنعرفت يا سلمى ..
    دي صورة مخيفة جداً .. و كدايس شينة و معولقة .
    عارفة , بقرا عن قصص الخواجات العجايز العايشين مع قبايل كدايس كاملة جوه بيوتهم .. نسأل الله السلامة ..
    هسه دي كيف دي ؟ ..
    يكونوا السنة كلها متحمداهم النبيحة .. حوا , داوود .. حوا , دااود ..
    ...
    و بعدين أنا متابع بوستاتك كلها يا زولة ..
    لكن ما بعرف للكلام الرومانسي الجميل داك ..
    أقوم أرمي لي درابة تخرب نسق الكلام البديع ..
    نحنا ناس دبش ساكت .

    شاكر حضورك اللطيف ..
    و .. ليك العتبى حتى ترضي .


                  

01-31-2008, 07:44 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: ابو جهينة)


    Quote: غزل القطط عيانا بيانا و على مسامع الجميع
    غزل شنو ده يا جلال ياخ !!
    كل مخاليق الله دي قاعدة " تتغازل " ..
    بدون الكواريك و التهديد و الوعيد و الكتاحة و القيامة الرابطة ..
    المهلة سمحة ياخ .

    شغل حوا و داوود ده ما غزل يا أبو جهينة ياخ ..
    دي بشتنة عديل يشهد الله .


    لعنة الله على الكدايس .



                  

01-31-2008, 07:33 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: د.محمد حسن)



    يديك العافية يا دكتور ..
    شكراً على المرور الحلو .
    ( و اعتذر عن الرد المتأخر يا صاحبي ) .


                  

01-14-2008, 08:53 AM

fadlabi
<afadlabi
تاريخ التسجيل: 12-13-2004
مجموع المشاركات: 4116

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    عماد

    إنا لله!

    دي كتابة جميلة جميلة جميلة.
                  

01-31-2008, 10:04 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: fadlabi)


    فاضلابي الجميل ..

    و لا في أحلى من صدقك الكامل مع نفسك ..
    قرض على كده يا صاحبي ..
    سمح و متوافق مع ذاتك .

    و .. عقبالنا .


                  

01-14-2008, 06:45 PM

خضر حسين خليل
<aخضر حسين خليل
تاريخ التسجيل: 12-18-2003
مجموع المشاركات: 15087

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    Quote: إحتللت ذات ليلة شتوية سرير أبي في الحوش الجواني , كان غائباً في إحدى أسفاره سائقاً لقطارات سكك حديد السودان , يغيب كان رحمه الله فيها لأيام , ليعود محملاً بجوالات الفحم و الذرة و الشاف و الطلح و القونقليز و سمن و كثير مباهج لنا . سريره ظل طوال فصول الصيف و الشتاء يحتل الموقع تحت الجدار الفاصل بيننا و جارنا " إسماعين البوليس " . أبعدت السرير كثيراً من تحت الحيطة تحسباً لغدر مخلوق مجنون آخر يتخذ من الجدار ذاك منصة للقفز أو الزحف أو التسلق , ثم نمت نومة الديك في الحبل .


    كل مرة تعيدني كتاباتك ياصاحبي لدورة الحياة
    ترجعني بقدرة الحرف لأري الأشياء والدنيا علي إخضرارها
    تذيب عني جليد يتراكم بفعل أمور (ماغايبة عنك)

    شكراً للقطط وللكدايس ولأي ككو في بلادنا

    شكراً مرةً أخري ياطاعم
                  

01-15-2008, 09:53 PM

ibrahim kojan
<aibrahim kojan
تاريخ التسجيل: 03-29-2007
مجموع المشاركات: 1457

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: خضر حسين خليل)

    تحايا الزول المارق من حمي الزفت الانا كنت فيها...

    والله أمس قرأت هذا النص....

    لا حوله منك يا مجنون .... قطط قال .. قطط!!

    كنت في المكتب فرفرت من الضحك .. فقال لي واحد معاي .. باين انك بقيت كويسس .. قلت ليهو لو قريت الكلام الانا بقرا فيهو مناخيرك
    حتفتح لي هوا الدنيا كلو وكمان (......)؟

    حتولع...

    لكن كده خلينا من حكاية القطط دي..

    دا نص واقف علي طولو يا عماد وبعالج كل مشاكل الهوا المانضيف والله عافيت منك

    أهديك.....

    (حدثٌ الرواه منك المواقف التي تضوع سنبلات الكلام!)

    اه ...فقط لو يفهمون..فقط!!
                  

01-15-2008, 11:56 PM

Adil Osman
<aAdil Osman
تاريخ التسجيل: 07-27-2002
مجموع المشاركات: 10208

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: ibrahim kojan)

    Quote: يا عادل .. !!!








    تسكتو إنت و ود الجيران ..
    وللا ننادي ليكم بوليس الحريقة ؟؟!

    أشعلت النار يا عمار!
                  

01-16-2008, 05:32 AM

AMNA MUKHTAR
<aAMNA MUKHTAR
تاريخ التسجيل: 07-31-2005
مجموع المشاركات: 13679

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    أمال لو شفت كدايس سواكن وبورسودان كنت عملتو شنو؟؟

    كان زمااان دقو ليك القيد..

    الضكر فيهم اسمو العرى ( بضم العين) شنبو زى شنباتك
                  

01-16-2008, 07:16 AM

محمد سنى دفع الله
<aمحمد سنى دفع الله
تاريخ التسجيل: 12-10-2005
مجموع المشاركات: 10986

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: AMNA MUKHTAR)

    عارف ياعمده انا من شفت المقال ده وانا خايف
    يعني ما محتاج لي صورة كديس شين قدر ده
    عشان اخاف ..
    نحن من الأطفال ـ ايوة بالمناسبة دي انا كنت طفل ـالأطفال الحجونا بالحجى الجميل ولذيذ ومعاه
    حكايات غريبة عن ترب البنية والبعاعيت والشكلوتاوالكدايس
    اها قصص الكدايس دي الكانت بتبهدلني ، لانو البعاعيت وام بعولو اصلو ما شفناهم
    ولا موجودين في دنيتنا
    لكن الكدايس اهي قدامنا يعني لو لاقتك كديسة سودا بالليل
    في زقاق ضيق ما ب...ام اهلك
    قول لي ليه؟؟
    لانو قالوا لينا الكديس بتحول وبنقلب
    شوف قبل قصص افلام الكرتون بتاعة المتحولين وشنو ما عارف
    نحن قصص المتحولين دي جد جد عندنا ..
    اها بقيت بتابع حكاية الكدايس .
    اول حاجة اسم كديس جا من وين
    في النوبية القديمة حارس الجحيم إله قط واسمو كاديس
    وفي اليونانية يكتب هاديس
    ولو شفت الكوشيين والفراعنة عندهم ليهو شكل كده عجيب
    واهو نحن شيلنا الأسم ولاصق علينا ـ كديس ـ
    تاني حاجة الكديس روح التيمان بتلصق فيهو
    وهي دي القصة المخيفة حاحكي ليك قصة
    سوسن اختي عندها تيمانـ سارة وساريه
    مرة بتفلسف معاهم يعني الود بتاع دراسات ما ورا العقل والتيلبثي والبار سايكولجي
    قلت ليهم انتو صحي عندكم علاقة بالكدايس ؟؟
    طوالي بنمش مع الكدايس !!
    امبارح دي مشين مع كديس اكلنا لين عجين حاجة عاشة!!!
    وحاجة عاشة جارة عجوز صبوحة الروح وبتعوس الكسرة للجيران والحبان
    ولمس قلبي الخوف احساس كده إخلي شعرة جسمك تكلب،، ليه ما تكدس ؟؟ليه تكلب، واصلو نحن بنتكلم عن الكدايس ما علينا..
    مرة لاقيت حاجة عاشةقلت ليها خالتي عشا كيف عامله مع الكدايس ؟؟
    مجنني يا ولدي يالسني كل يومين مدفقين العجين يا ماكلينو!!!
    رحعت للتيمان قلت ليهم انتو ما قلتو لحستو العجين ما قلتو لي بدفقو!!
    ردت سارة : دا الثقيل ده البدفق العجين جنو اقلب الحلة بتاعت العجين مضر خلاص
    انا في زمتك محتاج تخوفني بي كديس شين ؟؟؟

    (عدل بواسطة محمد سنى دفع الله on 01-16-2008, 07:22 AM)

                  

01-16-2008, 07:19 AM

معتصم الطاهر
<aمعتصم الطاهر
تاريخ التسجيل: 11-26-2004
مجموع المشاركات: 3995

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    Quote: فكرت غاضباً : ماذا لو أن القطط تتكاثر كما النبات .. تكاثراً خضرياً !! .. أو حتى لو تتكاثر بالإنقسام .. مثلاً !! او أي مصيبة تكفينا هذا التناسل الفضائحي . لكان الليل أهدأ و أحلى ..


    لا أعرف ماذا فعلت بك هذه الكدايس حتى تحرمها من لذه المطالعة ..

    و عندنا " نحن السودانيون الحنس المعلن كما تقول د. ناهد .. دخاخين تملأ الحي ..
    الليلة ناس هناية عندهم مطالعة ..

    يشتاقك الصقط هنا ..
    والشعر .. وحلجات تانية حاميانى



    قبل متاكاة الباب
    منو الفاسق ..؟
                  

01-16-2008, 07:52 AM

إيمان أحمد
<aإيمان أحمد
تاريخ التسجيل: 10-08-2003
مجموع المشاركات: 3468

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

    Quote: إلا القطط . ما عرفت ماذا أنا فاعلٌ مع القطط .


    إلا القطط يا عماد
    إلا القطط


    إلا القطط يا هؤلاء
    إلا القطط

    القطط

    القطط

    القطط

    وماذا أفعل أنا مع القطط؟!

    (عدل بواسطة إيمان أحمد on 01-16-2008, 07:53 AM)

                  

01-16-2008, 09:26 AM

mohmmed said ahmed
<amohmmed said ahmed
تاريخ التسجيل: 10-25-2002
مجموع المشاركات: 8758

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: إيمان أحمد)

    يا عمدة
    احكى لينا شوية عن صاحب الاسم الجميل دا صلاح باكومبا


    تعرف يا عمدة
    من الله ما خلقنى وانا بكره الكدايس
    فى الاسكندرية
    واحدة صاحبتنا سمحة لامن غلط ودلوعة خالص
    جات الشقة وقالت هى مسافرة القاهرة ودايرا الاوطة بتاعتنا تبيت معانا
    وتعال شوف شايل اكل الاطة وتعليمات نديها العشا الساعة سبعة وبعدين اللبن

    والمهم المهم تنوم معاى فى السرير وما تخلوها براها
    والكديسة معطرة ومسرحة ولابسا سلسل

    وانا ما بحب الكدايس لكن البيت الشديدة دى ما بقدر ارد ليها طلب

    المهم الليل كلو اطرد الكديسا واقفل الباب تقود تكورك وتخربش
    اجيبا معاى فى السرير اخاف منها
                  

01-17-2008, 03:58 PM

محمد سنى دفع الله
<aمحمد سنى دفع الله
تاريخ التسجيل: 12-10-2005
مجموع المشاركات: 10986

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: mohmmed said ahmed)

    اااااوواااداااااووووود
    وين المعفن البنبذ فييييينا
    دااااااووود
    عيييييماد
    مييييييياووو
                  

01-18-2008, 00:40 AM

طلال عفيفي
<aطلال عفيفي
تاريخ التسجيل: 06-20-2004
مجموع المشاركات: 4380

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: محمد سنى دفع الله)



    Quote:
    ظل ملازماً لي مقتي للقطط عظيما

    يا عماد ، قطط شنو ؟ قول الكدايس ، إنعل دين الكدايس .
    انا ما شفت في حياتي ، مخلوقات زي دي ..
    دي شنو الانانية والحرمنه دي ؟
    صحي مخلوقات بنت كلب !

                  

01-18-2008, 10:30 AM

رأفت ميلاد
<aرأفت ميلاد
تاريخ التسجيل: 04-03-2006
مجموع المشاركات: 7655

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: طلال عفيفي)


    القطط السمان
                  

01-19-2008, 01:02 AM

Adil Osman
<aAdil Osman
تاريخ التسجيل: 07-27-2002
مجموع المشاركات: 10208

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Emad Abdulla)

                  

01-31-2008, 08:17 PM

Ishraga Mustafa
<aIshraga Mustafa
تاريخ التسجيل: 09-05-2002
مجموع المشاركات: 11885

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Adil Osman)

    Quote: عارفة , بقرا عن قصص الخواجات العجايز العايشين مع قبايل كدايس كاملة جوه بيوتهم .. نسأل الله السلامة ..
    هسه دي كيف دي ؟ ..
    يكونوا السنة كلها متحمداهم النبيحة .. حوا , داوود .. حوا , دااود ..



    كدايس الخواجات دى مهذبة
    مش مهذبة لانو الله خلقها كدى
    مهذبة لانو الجماعة اهلها شذبوا ليها حواسها- مسكينة- خلت الجمعيات بتاعة حقوق الحيوان تتظاهر لاجل حقوقها الحياتية

    يعنى كدايس مبرمجة بعيد عنك!!


    لكن بينى وبينك الكدايس بتغيظ خاصة النوع اللى بكركب فى العده والحلل
                  

01-31-2008, 11:21 PM

محمد أبوعاقلة الطريفي
<aمحمد أبوعاقلة الطريفي
تاريخ التسجيل: 05-11-2006
مجموع المشاركات: 482

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: Ishraga Mustafa)

    كديستين ...
    واحدة تفرفر في (الكشرة) ... وتقابض ساااااي كان شفتها ...
    تطلع يااااا الله ويامين ... وتنزل تٌلّب ...

    والتانية في راسي ...

    أدخل بالكديسة اليمين ولا شنو رايك ؟...




    اسمعني ... الـسي D جاهزة عشان ما تنونو !!!
                  

02-02-2008, 07:50 AM

خدر
<aخدر
تاريخ التسجيل: 02-07-2005
مجموع المشاركات: 13188

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حوّاااااااااااااا .. داوووووووووووود .. ( قططٌ فاسقة ) (Re: محمد أبوعاقلة الطريفي)
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de