جريمة تعذيب بشعة بقسم شرطة الشجرة ..

Quote: .الاولاد بعد ماعوقوني طبعا بقيت ما بقدر اربيهم جات حبوبتهم ساقتهم مشت بيهم الدخينات , قبل ما يعوقوني كنت مؤجر بيت في العزوزاب بي 100 جنيه بعد ماطلعت سيد البيت جا طردني لانه كان عنده قروش متاخرة مليون جنيه لمن بقي ما عندي قدره ادفعها قام مرقني من البيت , يوميا كان بجيني في البيت يعمل لي ازعاج, ولانه انا عندي عصب قلت احسن ما يجي كل يوم يتعبني زيادة قمت فضيت ليه البيت ومشيت بيت اخوي ايك بول شول ساكن في العزوزاب برضو الاولاد بعد بقيت ما بصرف عليهم بعدو مني وبقيت قاعد براي مع اخوي , الولد الكان برضع بقي مع امه والبت قاعدة مع اختي في الفتيحاب اسمها انجلينا بول شول , شغالة بتعمل شاي واخوي القاعد معاه شغال برضو بنيان , الولد الكبير قاعد معاي في نفس البيت مع اخوي , هو لسة بقرا في المدرسة , بصرفو عليه صحباني لمن يجو بدوه, قروش المدرسة ما كتير واخوي برضو احيانا بدفعها , الولد دا متالم شديد بالحالة الانا قاعد فيه ,وهو مالاقي محل ياكل زي الناس واله يرقد فيه زي الناس , عشان كدا بقي طوالي زهجان , لكن ماقال داير يخلي المدرسة .