بحري طراوة... ويا ناس بحري .. قالوا بتحبوا يلا حبونا..

Quote: الاخ العزيز / كمال كرار بحري وذكرياتها التي لاتنسي وشخوصها والتناغم الاجتماعي يجعلها نسيجاً جامعاً لكل أقاليم السودان نتمني أن نستطيع أن نقدم لها ماتحتاجه منا :- السينما في بحرى جزء من المد الثقافي الذى كان موجوداً بالعاصمه المثلثه في ذلك الزمان الذى تستطيع وانت جالس أمام بيتكم أن تعرف المارين من أمامك من إى حي في بحرى او أن انهم غرباء عنها ,, ولاننسي عم قصوده والد رافت ورفعت بالشعبيه وهو الفني المسوؤل عن تشغيل أجهزة العرض بسينما الصافيه وماكان يلاقيه من عبارات الترحيب من جمهور الترسو عند إنقطاع لقطه في الفيلم – كما وان هنالك بعض الاسر في بحري لديها لوج يكون محجوزاً عند ورود الافلام الجديده ويتم الحجز بالتلفون – وبعض الاسر زبائن لسائقي تاكسي معروفين ببحري وهؤلاء السائقيين يعتبرون أنفسهم جزء من تلك العوائل – * ولاننسي أشهر ظرفاء بحري شلنكح وأبو الهول , موقف طريف لابوالهول الدنيا رمضان وهو طبعاً جالدو ومُظبط صحن فول وقاعد تحت البنك في مغلق أخونا حبيب دارقيل وفجأة جا داخل أبراهيم عيونو (أبن خالة أيوب وسليمان فارس) وطبعاً أبراهيم ملك الظرافه والسخريه , جالدوا يا ابوالهول , رد عليهو ابو الهول قال ليه والله سنة 55 رمضان دا في بحري كان صايمونو السيد علي وانا والشمس بينا وبين راسك كان الشعر .. · ومن مواقف شلنكح التي تروى عنه انو كان خرمان وعايز ليهو علبة برنجي وورق برنسيس والساعه تجاوزت الثانيه عشر مساءاً مشي دكان عمك صالح اليماني في الركن الجنوبي من مستشفي بحري , وعمك صالح ضارب النومه في البرنده القدام الدكان والدرابزين مقفول , وشلنكح بيبكي ياعم صالح أصحا الوالده ماتت عايزين الكفن , عم صالح فتح الدرابزين وجاب السلم عشان ينزل الدبلان , شلنكح قال ليهو كدى ثبتني إديني علبة برنجي وحلاوه كرمله وورق برنسيس , وخلي موضوع الكفن للصباح وادى عمك صالح طراده (الكلها عساكر) وشكلها وسخان ومشرطه , عمك صالح بقلب في الطراده يمين وشمال , شلنكح قال ليهو مالها في عسكرى ناقص. · إن ظرفاء بحرى والعاصمه عموماً يجب أن يؤرخ لهم فهم إنعكاس للنسيج الاجتماعي وللحاله السياسيه والاقتصاديه والاجتماعيه في ذلك الزمن الجميل حتي تتعرف الاجيال الحاليه علي جزء من حياة الماضي والتواصل الذى كان.. · وكطلب الاخ عبدالرزاق سعيد أول منزل في المزاد شمال هو منزل المرحوم / امين محمود في شارع ناس هاشم سند وناس عمك عبدالله مبروك وأبناؤه (محمد امين , كان من اميز اللاعبين في فريق النجم الاحمر ومحمود وابن آخر لاتسعفني الذاكره بتذكره) · ولاننسي في المزاد المرابطين الذين لايستطيعون المبيت خارج المزاد ناهيك عن البعد عن السودان :- صلاح جرب , علي هينو , عبدالمنعم نمر , عمر محمد عمر (ودالشاويش) وحلمي شكرى. · رجال ساهموا في تخديم خدمات إجتماعيه بحي المزاد:- 1/ المرحوم العم علي يسن بخيت . 2/ المرحوم العم فضل حمد . 3/ المرحوم احمد الامين . 4/ المرحوم عوض ابراهيم موسي. (والد عصام "وهم", عادل "جيتار" , عزيز الحبشي) 5/ المرحوم العم حسن مختار . 6/ عم إدريس (والد عبدالخالق) . 7/ المرحوم العم حسن الزين . 8/ المرحوم العم حامد العلوب . 9/ العم الطيب سليمان (والد تنقو) 10/ المرحوم العم إسماعيل عبدالسلام . 11/ المرحوم العم عبدالله عبدالرزاق (والد عزيز نكش) وأخيراً الدكتور حسن أبراهيم أبوزيد والذى كان فقده فقداً لكل منزل ببحرى وليس المزاد فقط .. والعتبي لمن فاتني أن أذكرهم فلقد بدأت الذاكره تصدأ بسسب الرطوبه وعوامل التعريه..