بحري طراوة... ويا ناس بحري .. قالوا بتحبوا يلا حبونا..

Quote: # من طرائف الاولمبياد انو فى سباح سوداني نزل الموية قبل السباحين لما سمع صفارة وهى ما صفارة البداية.. يكون السبب التدريب؟ - عندنا مدربين مقتدرين، وانا ما عارفة ظروف البعثة ديك، لكن الاحتكاك مطلوب لمزيد من الخبرة. # بقولوا «ابن الوز عوام»، انت برضو مشيتِ في طريق الوالد جاد الله جبارة وعملت في الإخراج؟ - انا تخرجت في المعهد العالمي للسينما، وعملت مصورة ومونتيرة ومخرجة، وعندي شركتي الخاصة اسمها بلسار للانتاج الفني. # بديتِ شغل في الرسوم المتحركة والكرتون.. ليه الحركة وقفت؟ - لانه شغل مكلف جداً مادياً، ولو انتجته ما في جهة بتشتري منك او تنتجه بى مليون يشتروه منك بى ميه جنيه. # فيلم «البؤساء» آخر فيلم عملت فيه إنت والوالد معاً قصته شنو؟ - كان فكرة الراحل الوالد، وقبل خمس سنوات من انتاجه أنا جيت من السعودية، الراحل الوالد قال لى قبل ارحل امنيتي اعمل فيلم «البؤساء».. وفعلاً أمنيته اتحققت واتكتب السيناريو ولقينا دعم مالي من شركة البيبسي ومجموعة معاوية البرير مقابل اعلان، واهدانا المركز الثقافي الفرنسي الافلام وحمضتهم لينا المستشارية الثقافية لسفارة ايران، واخرجناه حسب امكانياتنا. # هل الفيلم حقق نجاحا؟ - عرضناه في كمبالا ولاقى قبولا، وكان بطولة جمال حسن سعيد وعبد الواحد عبد الله وسمر بلة وعوضية مكي وغيرهم. واتمنى ما يكون آخر فيلم روائى سوداني، لكن حال البلد وقرايتي للواقع الآن بقول انه حيكون الفيلم الاخير، واتمنى اكون غلطانة. # اتجهت للافلام الوثائقية؟ - الفيلم الوثائقي ما مكلف مادياً، محتاج كاتب سيناريو ومعلق ومخرج، ما زي الفيلم الروائي فقط امكانات اخراجية عالية وكاتب سيناريو شاطر ومصور محترف، وافتكر نحن لسع ضعيفين في الروائى وماشين في اتجاه الوثائقي. # جديدك شنو من الأفلام الوثائقية؟ - حالياً شغالة في فيلم عن المرأة السودانية، يتناول دورها في كل المجالات الرياضية والفنية والسياسية وغيرها. # تناول إيجابي ولا سلبي؟ - بحاول اتناول كل الجوانب السلبية والايجابية، مع التركيز والتوثيق لشخصيات معينة والرائدات. # بعجبك في المرأة السودانية شنو؟ - إنها امرأة مثابرة وسبقت كل نساء العالم، وكانت من الاوائل في الطب والقضاء، والمرأة في الدول حولنا بتفرح بمنصب نحن نكون أخدناه قبل «50» سنة، بس للأسف ما قاعدين نوثق لنجاحاتنا.. ويعجبني أيضاً اجتهادها، ويكفي أنها في بعض مناطق السودان تمشي تشتغل والراجل يكون قاعد في البيت. # والمابعجبك فيها شنو؟ - في بعض النسوان كسلانات شوية، الواحدة همها كلو تعرس وتجيب أولاد، بعد داك تربيهم كيف دي ذاتها ما مهمة عندها. # الوالد كان أنصارياً إنت برضو انصارية مثله ولا سبحت عكس التيار؟ - في رأيي إنه الفنانة ما تتلون بأى لون سياسي، عشان تكون صادقة في عملها. # السباح كيجاب ترشح لرئاسة الجمهورية وفشل، هل ممكن تحكمنا سباحة او تجي يوم امرأة رئيسة للسودان؟ - ليه لا.. عندنا نسوان قويات جداً ومؤثرات في كافة المجالات، فاهمات ومتعلمات.. وعندنا برلمانيات قُدام وبرلمانيات جدد يمكن يقدمن شغل كويس. # وإنت في حوض السباحة بتحبي تسمعي موسيقى هادئة ولا صاخبة؟ - بعد التمرين بكون تعبانة بسمع موسيقى هادئة، لكن أثناء الرياضة المائية بحب أسمع أصخب موسيقى ممكنة في الدنيا. # بتسبحي على أنغام منو من الفنانين؟ - بحب الفنان شرحبيل أحمد جداً، وطبعاً محمد وردي ومحمد الأمين. # ومن الفنانات؟ - سمية حسن وحنان النيل. # قلت إن السباحة غرقانة ومحتاجة انقاذ.. منو ممكن ينقذها؟ - نعمل مؤتمر تفاكري ندعو ليه رأس الدولة، ونلتزم بالتوصيات عشان ننافس إقليمياً ودولياً زي زمان.. ولا بد من إنشاء مسبح خاص باتحاد السباحة، ونعمل معاً روادا وجددا، فالمسابح الخاصة الآن تخرج كل عام أكثر من 2000 سباح وسباحة ما لاقين رعاية.. وطرحت فكرتي دي على الزملاء بنادي الضباط ومديرة منظمة اولمبيا الشبابية الرياضية الاجتماعية مديرتها الأستاذة ابتهاج قاسم حتى ننقذ منشط السباحة وننقذ أبناءنا لأنهم لما بتخرجوا من الأندية الخاصة وما يلقوا اندية ترعاهم بقعوا البحر. # نختم حوارنا بموقف طريف؟ - زمان العلاقة بيننا سباحين وسباحات كانت علاقة أسرية وممتدة حتى الآن.. ومن الطرائف كان عندنا سباق وأي سباح وسباحة كان بتمرن مع المدرب استعداداً للسباق، وكالعادة بتحصل في أي منشط «غتاتات» وصادف إنه السباق بعد العيد، قمت أنا قلت أعمل تمارين زيادة عشان أفوز، ويوم العيد الصباح بدري سقت الوالد ومشيت نزلت النيل جمب نادي الكشافة البحرية، والدنيا عيد والصباح بدري عارفة إنه ما ح ألقى زول.. فجأة شفت شيء جاي عايم في اتجاهي من بعيد. تمساح؟ - أنا اتخيلتو تمساح ما كنت شايفه كويس، لما وصلت الكبري قرب لى لقيتو السباح ماجد طلعت فريد، هنا قلت ليه وقال لى في نفس الوقت، الجابك شنو يوم العيد؟! وكان موقف لا ينسى..!!