|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: د.إبراهيم قناوى ** حمداً لله علي الطله.. ** وربنا يكتب سلامة الوالده ,, ولو مابت فقرا دا كلو مابيحصل.. أصلو اولاد الفقرا سرهم باتع الخوف يشفى الدكتور الكهربا تقطع نتمنى لهاالسلامه.. ودام الود بيننا.. (ابو محمد فؤاد) |
شكرا ليك أخي أبو محمد فؤاد وأضحك الله سنك
Quote: الاخ الدكتور ابراهيم قناوي
نسال الله ان يوالي والدتكم الكريمة بالشفاء العاجل . |
شكرا استاذنا حسن طه ولك الود كله
جزاكم الله خيرا الأخوة الأعزاء ودعواتكم معانا دايما وبحري طراااااااااوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الرسالة التالية من الاستاذ عماد عثمان:
Quote: انتقل الى رحمة مولاه لاعب التحرير والمريخ السابق
سيد بطة والذي يعتبر احد رموز مدينة بحري الرياضية
نسال الله ان يتغمده بواسع رحمته وان يلهم اله وذويه
الصبر والسلوان وان يثبته عند السؤال ويجعل الجنة
مثواه مع الصديقين والشهداء والعزاء موصول الى
ابنه الأخ الصديق خالد والى افراد أسرته الكريمة
بحي الديوم بحري وانا لله وانا اليه راجعون
عماد عثمان احمد - جدة
|
الا رحم الله سيد بطه بقدر ما قدم لمعجبيه وابناء مدينة بحري ونادي الوحده الذي عمل فيه مدربا
بصفة خاصة .
الا رحمه الله رحمة واسعة والهم آله وصحبه وذويه الصبر والسلوان وانا لله وانا اليه راجعون.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بحري وناسا حلوين ومترابطين ووالله خجلتوني عديييييييل كدة والوالدة مافي زيها يا كمال وقد ثبت في الحديث الصحيح ما معناه
((إذا ماتت أم العبد نادى مناد من السماء: يا ابن آدم مات آخر من يحبك على ظهر الأرض))
اسال الله ان يتقبل دعواتكم وان يرحم من مضى من والدينا وان يعيننا على الاحياء منهم
ولي عودة لمسالة بر الوالدين بالتفصيل ان شاء الله
وقد افرد لها بوست خاص نسبة لأهميتها ووقوع الكثيرين في التقصير والعقوق بعلم او بجهل
عفا الله عنا جميعا
تخريمة: الباشمهندس الجميل طارق ميرغني متابع بوست الشاعر ابو امنة حامد وبلاقيك بي هناك بس بلملم قدرتي الباقية وجاييك
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
البركة فيكم فى نجم التحرير البحراوى الكابتن سيد بطة ...رحمه الله ..... سلامات على الوالدة يااخ قناوى وانشاءالله تتعافى قريب يااارب...وتقعد تكاويك... ويااخ عبدالرازق كل سنة وانت طيب وبخير وربنا يخلى ليك اولادك ويخليك ليهم... ويااخ كمال اليتم حااااار اسألنى منه ...احكى ليك ....(ولا بلاش ).....ومبروك الصفحة 31 وعقبال مانشوف بحرى دى برنامج عدييييييل فى التلفزيون ..... وياخ طارق ربنا يوفقك فى البوست الجميل بتاع ابوامنة حامد وعجبنى الحوار الكان معاه ونزلتو....بجد زول ماساهل .... واخونا الماكيكى ياخى يديكم العافية ياااارب .....بس الحالة شلش والمخ فااااااضى وقلت مااجى يدى فاضية....لكن مع المخ الفاضى .. .بقيت عاملة زى دكتور شداد بتاع الفلك القال( بصوم وبفطر حسب علمى ومعرفتى ...) ويااخ حسن وعبدالمحمود والعجب بالله عليكم ماتختفوا تانى ...خليكم قراااب .... اخ معاوية ....ياخى عندك غتسات كده اخير منها حقت كمال ...اظهر وبان ..... ويااخونااااااااا عزالدين ...ياخى ماشاءالله ذاكرتك حديد ...بذكرك لناس حى الدناقلة رغم غربتك الطويلة دى .....وابراهيم عوض قال فى اغنيته (اليوم البيمر وين نلقاه تانى )......ودى من الايام الجميلة ....والتاريخ لن يكرر نفسه لان الانسان الى فناء ولو طال الزمن ... (سلامى لست بيتك).....
_________________________________
يااخوانا لى كم يوم بفكر انه نحن كاانسانية ماشين فى شكل( دوائر )... اكون مالى ياربى ....ولا راسى ده لافى ساى ... خليتكم بعافية ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: يااخوانا لى كم يوم بفكر انه نحن كاانسانية ماشين فى شكل( دوائر )... اكون مالى ياربى ....ولا راسى ده لافى ساى ...
|
استاذتنا ناهد لي عشره دقايق بافكر في قصة الدوائر الماشين في شكلهادي....
اقول يا ربي نحن زي ناس الاسكيمو ملفلفين لمن مدورين ...!!!
اقول يا ربي نحن ضاربين لينا سيجاره وشايفين نفسنا لافين حول نفسنا...!!!
اقول يا ربي لانو نحن سمان بنبان وعليك الامان .....
ولا اقول يمكن زي ناس آفو في الصين ...وهذا لكمال السر ولي فوق ... يعني حسن طه ودكتور عبد المحمود ولي فوق.
بالله اخت ناهد تفسير عاجل لبرلمان بحري طراوه.الاخ عبد الكريم للمتابعه.
يعني حسن طه حتي المتاوقه بقت بالملي ... ان شاء الله انت وعبد الكريم تجروا لينا كرار التهامي ده من اضانو وتخلوه زي ما قال ابو آمنه ينفحنا جارية وغلام
والف دينار....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: يعني حسن طه حتي المتاوقه بقت بالملي ... ان شاء الله انت وعبد الكريم تجروا لينا كرار التهامي ده من اضانو وتخلوه زي ما قال ابو آمنه ينفحنا جارية وغلام
والف دينار.... |
العزيز طارق
الحكاية بهنك مسخنة..... وعافيت من ابو محمد فؤاد
والمتاوقة بقت زي متاوقتك بعد بوست المرخوم ابو آمنة.
الغريبة اليومين ديل الدكتور متاوقته بقت بالملي
لكن بصراحة متاوقة نكشات بترد الروح
ياخي سيد البيت ود كرار ذاتو احيانا المتاوقة الا يجروه عليها جر خاصة في الويك اندس .
دمتم
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: استاذتنا ناهد لي عشره دقايق بافكر في قصة الدوائر الماشين في شكلهادي....
اقول يا ربي نحن زي ناس الاسكيمو ملفلفين لمن مدورين ...!!!
|
مع الراس اللافى ده فعلا بيجينى احساس انى استاذة ومرة دكتورة ومرة ربة منزل وربت عيال برضو ...وقالوا المرة ان بقت فاس ماتكسر الراس المثل ده يااخوانا غلط لانه ممكن تكسر الراس كيففففففففف..... مابالنقة يعنى بشنو ..... اما بخصوص الدوائر الماشين فيها دى و(المشغولة )24 ساعة ونحن بندور معاهابقينا عاملين زى لاعبين الاكروبات مع الصحون ديك يدورهم كلهم ويرجع ليهم عشان ماتقبف واحدة ....
Quote:
اقول يا ربي لانو نحن سمان بنبان وعليك الامان .....
|
حلوووووة بنبان وعلينا الامان دى يااخ طارق ..... اريتواخوانا ناس قناوى وحسن طه وعبدالمحمود والعجب يجوا يسمعوا كلامك ده .....وبخصوص اللفة وما اللفة راسى لافى ليه كم يوم دايرة استثمر فى اى حاجة ....الكاتب يحى فضل الله عنده قصة بقراها اليومين ديل بتاعة استثمار وما استثمار اسمها (اسثمار زلابية بلبن الحمار فى السوق الشعبى ) نخش الحوار شوية مع يحى فضل الله .....
(بقول ليك ياعبدالرحمن دى عملية مضمونة جدا انا عملت دراسة جدوى للموضوع - طيب كويس يعنى الربح حيكون كم ؟ بى الميت كده ممكن ترجع ومعاك حوالى 700 جنيه لكن تصحى بدرى الساعة 7 ونص نكون انتهينا نشترى لحمتنا وخدارنا ونرجع البيت بعداك نستحم ونمشى للشغل عاااادى خلاص يازول اتفقنا)
Quote: ولا اقول يمكن زي ناس آفو في الصين ...وهذا لكمال السر ولي فوق ... يعني حسن طه ودكتور عبد المحمود ولي فوق.
|
Quote: . بالله اخت ناهد تفسير عاجل لبرلمان بحري طراوه.الاخ عبد الكريم للمتابعه.
|
اعجل من كده تانى عاد الا كان بعجلة ناس حسن ومعاوية السرقوهامنهم جنب المركز الثقافى ديك
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
نسأل الله المغفرة للاعب البحرواي سيد بطة...
يا د. إبراهيم يا أخي صورة البروفايل بتاعك حاجة ظريفة ذكرتنا الأفلام الأبيض بتاعة عبدالوارث عسر..
غايتو أنا شايف فيها حركة وإن كانت من الماضي..
يا ناهد يا أختي اليتم أصلا ما بتوصف...وحديث الرسول المصدوق دلالة ما بعدها دلالة عندما قال: أنا وكافل اليتيم كهاتين وأشار بأصبعية.. (الحديث).. نسأل الله ألا يجربه أبناؤنا...
حسن طه.. يا أخي.. أنا قلت ليكم نطالب مطالبة رجل واحد بحل الجهاز... لكن ود التهامي.. جابكم في الخط وبقينا نتكلم عن اتوميشن.. وفايبريشن وطبعا أسمه الأول كرار..من "مكرٍ مفرٍ مدبرٍ مقبلٍ معا.. كجلمود صخر حطه السيل من عل... وجابكم الدلجة... طبعا دي نكتة ساكت ونحن معاكم في السخانة ديك لغاية الطيش.. عبدالكريم... يديك العافية ...
طارق يا أخي أنا مصر على صورتي بتاعة الكاونترباس ديك...ولو ما لقيتها أن شاء بتاعة "ام كيكي"..
المهم نثبت للعالم دي أنو نحن عازفي الزمن الجميل..
أبو رزقة، عماد، معاوية... يديكم العافية
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
سلاما يا ناس والله جيت ماري سريع كدة ولقيت البوست بقى آخر حاجة في الصفحة الأولى قلت معقول بوست بحري طراوة يمشي الصفحة التانية وفيني جفن يطرف أفو أفو أنا اخو البنات هيييييييييييييييييييييييع
وأهو المداخلة دي لزوم عتالة وكدة
تخريمة: الصورة دي يا أستاذ كمال جاتني في الإيميل وهي للخال عبد الله نصر قناوي الرئيس السابق لإتحاد نقابات عمال السودان في الفترة من 1969 - 1985 وقد حدثت وفاته في عام 1999 وكانت الوفاة في الحج بعد أن أفاض من عرفات إثر نوبة سكري لم تمهله طويلا. رحمه الله وجميع موتى المسلمين
وبحري طراااااااوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: آفو في الصين دي شنو يا طارق؟
أول مرة أسمع بيها... نحن درسنا حاجة أسمها مسكننا...
قالوا لينا التُكل يعني المطبخ!!! حاجة غريبة...
والنفاج يعني friendly access point
وحاجات زي دي... آفو في الصين دي إلا تكون في الكيمياء!!!!
|
والله يا كمال لو ما قريت معاك اقول من قدمك انت دفعة آفو ذاتو
ياخي انت كان بتشتري كيلو الطحنيه بي سبعه قروش.!!!!!!!!!
هصع لو قلنا الكلام ده لي ناس شمس الدين ولا معاويه او التلب وعلي سرالختم يقولوا ليك انت بتتكلم عن التركيه السابقه .
خلي ده امال لو كلمهم حسن طه عن العجله الرالي بي سبعطاشر قرس يقولوا شنو ؟
بعدين يا كمال هسع في زول جاب سيرة البحرين والخميس الفات الفرق الحبان ؟؟؟؟
يا اخوانا وين ناس الدوائر ؟؟؟؟؟؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أبوكمال ... 26 نوفمبر 2008م:
Quote: بس وين شعر (رٌشك في الهند) ... تتذكره يا طارق.؟؟؟ ... |
ابوكمال ... 6 يناير 2009م:
Quote: آفو في الصين دي شنو يا طارق؟ أول مرة أسمع بيها ... نحن درسنا حاجة أسمها مسكننا ... آفو في الصين دي إلا تكون في الكيمياء!!!! ... |
؟؟!!! "آفو" كان في الصفحة القبل صفحة "رشك" في كتاب "الأراضي القديمة" ـ جغرافية تانية وسطى!!!
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اعزائي د. عبد المحمود ومعاويه وابو رزقه جزاكم الله كل خير ولا اراكم الله مكروها في عزيز لديكم.
رساله من حسن ميرغني:
Quote: وداعا يا بطه أذكر فى ايامي ألاولى من إحدى عطلاتى بالسودان قاعدين ومتلمين وبنتكلم فى مصير ذاك الحمل الوديع وبعد إتفاق جميع الرفاق على المصير قالت الوالده : دايرين فحم ... قلت ليها امشى أجيب شوال قالت لى: بغشوك ويدوك شوال كلو دقه .... قلت ليها بسوق معاى صديقي منعم الطويل . قالت كان كدى سمح .... فمنعم صديق طفوله واشهر شخصيه فى حلتنا كلمت منعم الذ اكد ان سيد بطه بالفعل احسن من يظبط الموضوع دا وهسه بيجى عشان حيأذن لصلاة العصر وبالفعل جاء الكوتش بطه الله يرحمه. منعم قال ليو بموضوع الفحم رحب وقال نمشى لعبدالله مشينا لعبدالله فى زريبة الفحم خلف جامع الديوم وقدام سوق الديوم القديم الكان فيهو دكان عمو عثمان وبتاع الخضار وحبوبه بتاعة العجور بالشطه. إستقبلنا عبدالله إستقبالا كبير وكان كلو مره يدينى كحله كأنو الكوتش جايب معاهو مؤذن اجنبي اعطانا عبدالله احسن شوال عندو . ودعنا بطه قدام باب الجامع لانو ماشى يرفع آذأن العصر فى اللحظه ديك اتذكرت المرحوم محجوب ود اب كالوك " وهو من اشهر شخصيات بحري التي تحتاج توثيق " قال ود اب كالوك انو بيمشى يصلى فى جامع الصافيه عشان ترطيبه وكندشه يعني وتين وزيتون اما جامع الديوم سخانه وإذا زلزلت الارض. لك الرحمه يا بطه بقدر ما ابدعت واشبعت ولبحرى والطراوه حسن العزاء حسن ميرغني
|
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا عبد الكريم أخوي..
فاتت على فطنتك وأنت الكيس الفطن..
ده الهكر .. الله لا تكسبه.. ما عملت ليهو أي حاجة بس.. يمشي وين من الله يسب الناس على لساني..
وأنا الذي لا أعرف من السباب أكثر من أن أدعو عليه كما فعلت...وبرضو أقول ربنا يهديه..
بس كمان عايز أسجل صوت شكر للريس بكري.. لأنه والحق يقال ما أن يقرأ أيميلي الذي أبلغه فيه بما فعل
السفهاء منا حتى يرجع لي الباسويورد.. فله من الشكر أجزله..
سوف أحاول أمسح المداخلتين الغريبتين على أخلاقي وأنت وطارق ود. إبراهيم أرجو أن تمسحوا تعليقاتكم..
والله من وراء القصد
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
رسالة من الاخ عماد الدين عثمان:
Quote:
المشاركة التالية من عماد عثمان احمد – جدة شخصيات بارزة من بحري ( 3 ) نواصل الكتابة عن الشخصيات البارزة و التي لم يتم التطرق لها في هذا البوست وسبق ان ذكرنا في الجزء الاول ( 37 ) شخصــية وفي الجزء الثاني ( 50 ) شخصية في وفي هذا الجزء الثالث نستصحب معنا بعض القامات السامقة وبعض النجوم البحراوية الشابة التي ننتظر منها الكثير :- 1/ الشيخ صادق عبد الله عبد الماجد المراقب العام لجماعة الأخوان المسلمين سابقا واحد قادة العمل الإسلامي في السودان اشتهر بالصدق والأمانة والعفة والتواضع وخريج جامعة القاهرة فرع الخرطوم ( حقوق ) . . الكثيرون لايعلمون بان الفنان الراحل إبراهيم الكاشف تغنى له بأغنية سلوا قلبي والتي لم تجد حظها من الإنتشار . . يسكن شمبات بالقرب من ميدان رابطة شمبات ومسجد الحضراب . 2/ الشاعر تاج السر عباس بدأ كتابة الشعر الغنائي وهو طالب في المرحلة المتوسطة وكانت اول اغنياته صابر معاك للراحل حسن خليفة العطبراوي وتوالى بعد ذلك انتاجه الشعري الغنائي فكانت اغنيات قبل ميعادنا بساعتين للفنان الراحل خليل اسماعيل وحبه حبه وقلنا نسيت وبعدك الايام حزينة وكتير بتناسى ايديا للفنان الراحل خوجلي عثمان وبنتلاقى للفنان ابراهيم حسين وبدون كلمات للطيب عبد الله ومع الأشواق للفنانة ام بلينة السنوسي ونشيد ثورة شعب للفنان صالح الضي واشتياق للفنان عز الدين عبد الماجد وعدت سنة للفنان الشاب محمود عبد العزيز ويسكن الختمية . 3/ الفنان التشكيلي الكبير الدكتور عبد الله بولا خريج كلية الفنون الجميلة له العديد من الكتابات والمؤلفات وكان يسكن الختمية . 4/ الشاعر والدكتور والسينمائي وجدي كامل نال البكالوريوس من معهد موسكو للسينما كما نال الماجستير والدكتوراة ايضا من موسكو وتغنى له الفنان محمود عبد العزيز باغنيات شذى الايام وعشان نغني ويسكن المزاد جنوب . 5/ الدكتور والمسرحي عبد الحكيم الطاهر خريج معهد الموسيقى والمسرح بدأ مسيرته الفنية ببرنامج ركن الأطفال الذي كان يقدمه المرحوم الفكي عبد الرحمن والذي نصحه بضرورة التعليم حيث كان يعمل في ذلك الوقت بمصنع النسيج السوداني ولم ينل إلا جزء يسير من التعليم وهو في تلك السن الكبيرة من العمر وعمل بتلك النصيحة واكمل دراسته الإبتدائية وعند الإمتحان اندهش الطلبة اللذين يجلسون للإمتحان معه وكانوا يسألونه : انت ممتحن معانا ياعمو ! ! واتم المرحلة المتوسطة والعليا والتحق بمعهد الموسيقى والمسرح لينال البكالوريوس ومن ثم الماجستير والدكتوراة ولنا عودة بصورة موسعة لتجربته الحافلة بالعزيمة والكفاح والإصرار لتسليط المزيد من الضوء عليها . . عمل في البرنامج الشهير محطة التلفزيون الأهلية وفي العديد من الأعمال الدرامية ومن ادواره الشهيرة كابتن كابو في مسرحية نقابة المنتحرين كان يسكن الختمية وحاليا يسكن الدروشاب . 6/ الدكتور والمسرحي فيصل احمد سعد تخرج من كلية الموسيقى والدراما تخصص تمثيل واخراج دفعة 1987 م وعضو فرقة الأصدقاء المسرحية اشتهر باداء دوره الكوميدي ( كبسور ) ويعمل الأن محاضرا بكلية الدراما والموسيقى وهو عضو في موقع سودانيز اون لاين ويسكن الشعبية . 7/ الفنان صديق عباس بلبل الغرب تخرج من معهد الموسيقى والمسرح ولد بمدينة النهود وله العديد من الأغنيات الرائعة مثل اللالاية وعبر الأثير وتعال نحلم وياقلبي الله يصبرك وغيرها . . تشكلت ملامح طفولته وجزء كبير من مقتبل شبابه بحي الختمية . 8/ المؤلف المسرحي عادل ابراهيم محمد خير له عدد كبير من الأعمال المسرحية منها عنبر المجنونات ويسكن كوبر . 9/ الصحفي خالد محمد الحسن ابن الصحفي الكبير الراحل المقيم محمد الحسن احمد ويعمل صحفي بصحيفة الراي العام ويسكن المغتربين . 10/ الموثق الكبير صلاح لبيب موسوعة بحراوية نادرة له العديد من المساهمات الصحفية واللقاءات التلفزيونية ( برنامج مشوار المساء سابقا ) تضمنت سرد وتوثيق رائع لمدينة بحري ويسكن حلة حمد . 11/ الشاعر الراحل الحسين الحسن شقيق الشاعر تاج السر الحسن تغنى له الكابلي بطائر الهوى وحبيبة عمري تفشى الخبر . . تعاون مع برنامج فرسان في الميدان الذي كان يقدمه حمدي بدر الدين في فقرة المطارحة الشعرية مع البرفسسور الراحل علي المك والفريق معاش المرحوم احمد عبد الكريم. . كان يسكن حلة حمد او خوجلي على ما اعتقد .
12/ الصحفي الدكتور كامل ابراهيم حسن عمل بصحيفة الصحافة وتميز بمقالاته الساخرة الموغلة بالعامية ومن امثلة عناوين مقالاته معاينة القبول وهجرة العقول , علاقة الدواس بالكسرة والوسواس , مقدرة زعيم الشعب المحبوب في التخبط ولخبطة الدروب . الجن الكلكي لابس ملكي ويسكن شمبات . 13/ الممثل طارق علي تخرج من كلية الموسيقى والدراما من ابرز الممثلين الشباب في الساحة حاليا ومن اشهر اعماله قيامه بدور البطولة في مسلسل الدهباية الذي تم عرضه قبل فترة ويسكن الصافية . 14/ حسن مصطفى من قيادي تنظيم نهضة نادي المريخ وهو يعمل الأن عضو مجلس إدراة بنادي المريخ ورئيس الجهاز الإداري السابق لفريق الكرة بنادي المريخ ويسكن الختمية . 15/ الشاعر امين محمد طاهر تغنى له الفنان محمود عبد العزيز بأغنيات منو القال ليك ومعقولة بس وهو خال الفنان محمود عبد العزيز وبحكم قرابته له كان له دور كبير وفاعل في مسيرته الفنية ويسكن المزاد . 16/ القاضي الدكتور المكاشفي طه الكباشي سليل أسرة الشيخ الكباشي من اشهر القضاة في تاريخ القضاء السوداني عمل بعد تقاعده محاضرا بجامعة امدرمان الإسلامية وله صلة قرابة برئيس بورداب الخرطوم الأخ العزيز العوض المسلمي الكباشي ويسكن الكباشي . 17/ الفنان عوض الله بشير من مؤسسي مجموعة عقد الجلاد الغنائية خريج معهد الموسيقى والمسرح ويعمل حاليا مدرس موسيقى بجامعة كميبوترمان لعلوم الكمبيوتر وكان يسكن بحي الدناقلة شمال والأن يسكن شمبات الأراضي . 18/ الشاعر تاج السر يوسف ابوالعائلة وهو شقيق الرياضي الكبير المرحوم حسن ابو العائلة تغنى له الفنان كمال ترباس بأغنية فيك الرجاء والمرتجى وتغنى له الفنان التاج مكي بعدد من الأغنيات . . كان يسكن كوبر والأن مقيم بدولة الإمارات العربية المتحدة . 19/ الصحفي المهندس عثمان ميرغني مقالاته تحدث دويا كبيرا في الشارع السياسي من خلال عموده ( حديث المدينة ) بصحيفة السوداني وبسبب ذلك تم ايقاف صحيفة السوداني عدة مرات من الصدور ويسكن الخليلة . 20/ الدكتور والشاعر احمد فرح شادول اخصائي طب الأطفال تغنى له الفنان عاصم البنا بأغنيات اعز غرام وفي حضرتك و ما ألمك وللفنانة منال بدر الدين ابتداء العمر ويسكن شمبات . 21/ المحامي مصطفى عبد القادر خريج جامعة القاهرة فرع الخرطوم في العام 1965 م نقابي محنك وتعرض لكثير من الإعتقالات من خلال عمله في نقابة المحامين وكان له دور مشهود وكبير في انتفاضة السادس من ابريل 1985 م. 22/ المرحوم عوض محمود من رواد موسيقى الجيش السوداني تغنى له صلاح بن البادية بأغنية انت يا غرامي ويسكن كوبر. 23/ الشاعر الدكتور الزين عباس عمارة تغنى له الراحل عثمان حسين باغنية اوعديني و الراحل عبد العزيز محمد داوؤد با أغنية عودة قلب والراحل احمد الجابري بأغنية سامحني وقام بتلحينها برعي محمد دفع الله وتعتبر من اجمل اغنيات أحمد الجابري والتي نادرا مايتغنى بها . . وارتبط بصداقة قوية مع الراحل المقيم عثمان حسين وهو صاحب العبارة المشهورة ( عينا لم تبكي عثمان حسين لافائدة من الإبصار بها ) ويذكر بانه عند وفاة الراحل عثمان حسين سافر الى السودان للمشاركة في عزائه بالرغم من انه كان قد اجرى عملية في عينيه لم يمضي عليها سوى ايام معدودة . . نشأ وتربى في اشلاق البوليس بحري حيث كان والده يعمل في البوليس وعمل وهو في سن صغير في لجنة إجازة الاصوات مع العمالقة ابراهيم العبادي ومحمد بشير عتيق وبرعي محمد دفع الله واسماعيل عبد المعين . . ومن اراد معرفة الكثير عنه يمكنه الرجوع الى موقعه في الشبكة العنكبوتية . 24/ الصحفي الساخر جعفر عباس والذي يكتب في العديد من كبرى المطبوعات العربية كان يسكن حي الشعبية شمال وسبق ان اشاد في إحدى مقالاته ببوست الشعبية نجمة في سماء الخرطوم بحري . 25/ الشاعر الاديب الطيار والصحفي تاج السر كنه تغنى له الفنان الموسيقار محمد الامين بأغنيتان هما سوف ياتي وليتني تراس صحيفة المريخ في العام 1978 م وتعاون مع صحيفة قوون الرياضية وكان يسكن حي الدناقلة شمال والأن مقيم ببريطانيا . 26/ المحامي مجدي شمس الدين سكرتير الاتحاد العام السوداني لكرة القدم تدرج بالعمل الإداري بداية من فريق منطقته امدوم الى ان وصل الى سكرتارية الإتحاد العام السوداني ويسكن امدوم . 27/ الناقد الفني والشاعر هواري النعيم عمل بعدد من الصحف السياسية والإجتماعية مشرفا على الصفحة الفنية و يسكن الحاج يوسف . 28 / الممثل جمال عبد الرحمن سعيد خريج كلية الدراما والموسيقى في العام 1986 م . . عضو فرقة الأصدقاء المسرحية واخر اعماله تم عرضها في قناة الشروق ( يومية سالم ) في شهر رمضان وتعرض له حاليا مسرحية الحاج متذكر بالمسرح القومي بأمدرمان له شركة انتاج فني واعلامي ويسكن حلفاية الملوك . 29/ الممثل محمد عوض سيد احمد خريج قصر الشباب تخصص تمثيل . . وعضو فرقة الأصدقاء المسرحية وقام بالإشتراك في مسرحيات المدرسة المختلطة وحبظلم بظاظا والمهرج وتلفزيونيا في محطة التلفزيون الأهلية ومتاعب . . ويعمل بالخطوط الجوية اليمنية ويسكن الختمية . 30/ الممثل القديرعبد الواحد عبد الله قام ببطولة العديد من الأعمال الدرامية التلفزيونية والمسرحية والإذاعية كان يسكن البابورات والأن يسكن الحاج يوسف . 31/ اللواء حسن كركب تولى قيادة سلاح الخدمة وتعاون لحنيا مع عدد كبير من الفنانين تنقلت أسرته مابين حلة حمد والصافية . 32/ فنان الطمبور عبد الرحمن بلاص ومن أغنياته المعروفة اغنية نسمة . . يسكن الديوم . 33/ الملحن علاء الدين احمد قدم العديد من الألحان الجميلة للفنانين الشباب ومن اشهرها أغنية ( يامولاي آه من غلبي ) للفنان الجيلي الشيخ ويسكن حلفاية الملوك – حي الشايقية . 34/ الفنانون الشباب : محمود عبد العزيز فنان الشباب الأول ( المزاد ) وعماد الصبابي وجمال فرفور ( الصبابي ) وطه سليمان ومسعود فائز ومعاذ الاصايل ومحمد خضر بشير ( شمبات ) وهشام درماس ونهلة عبد المنعم (الشعبية ) وطلال حلفا ( حلة حمد ) وامير حلفا ( الديوم ) ورائد ميرغني واميمة يحي عضو مجموعة عقد الجلاد الغنائية ( حلفاية الملوك ) وصفوت الجيلي واسرار بابكر وعبد المنعم النذير ( الحاج يوسف ) واحمد البحراوي وعزة عبد العزيز داؤود ( الدناقلة ). 35/ الممثلون الشباب : احمد عبد الكريم ( شمبات ) وسيد احمد احمد ( الشعبية شمال ) وعادل علي الحسن مالك ( الدناقلة ) . 36/ نجوم الغد والمستقبل المرتجى : فضل ايوب ( شمبات ) ونزار ختم وحسين محمد حسين ( المزاد ) ومي عمر محمد ( الصافية ) ومحمود عز الدين ( شمبات ) و غادة حسن وشروق حسن ومحمد عبد الله محمد عمر ( الجريف شرق ) وخالد عثمان العمدة ( حلة حمد ) وهيثم يوسف ويسرا ابوعشرا ( الحاج يوسف ) وسبق ان فاز فضل ايوب ونزار ختم ومي عمر محمد بجوائز مسابقة برنامج نجوم الغد . . والأن يشارك الشاب المبدع محمد عبد الله محمد عمر في التصفيات النهائية لمسابقة برنامج نجوم الغد وامنياتنا له بالتوفيق والفوز بالمسابقة إنشاء الله . والسلام عليكم ورحمة الله وبركاته .
|
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
Quote: د. إبراهيم ود العجب ** كشكش لينا ابو النور دا خليهو يفتح السحاره ,, آخر حاجه وصلتنا منو والله نسيناها وماعارفين انو وصلنا الجيلي ,,, شمبات ,,, واوستى ,,, ودرملي .. ** ماتطول الغيبه... ودام الود بيننا.. (ابو محمد فؤاد) |
دكتور إبراهيم ود العجب ** كلامنا الفوق دا ليهو سنه هسه ,, ولم يستجيب العريس المُرتقب...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
## تـــعـــمــــيـــم رقـــم (1) لــســــنـــــة 2009 /ب/ط/مفقودين...
** من تاريخ 06/01/2009 الساعه 1:52 م. والي الآن بت بشير الطيب مفقوده ,, لكل أهل ست الهوى والطراوه بالسعوديه ومصر وبحرى سرعة البحث والتحرى وإخطار القياده العامه بالمنطقه الشرقيه:-(ودالسر كرار) أو نائب القائد العام بالرياض :- (ود ميرغنى علي مصطفى) أو إخطار مُمثل القياده الموحده بدولة الامارات العربيه المتحده:-(ابو محمد فؤاد).. (ابو محمد فؤاد)
# نسخه للسجلات. # نسخه لمُمثلي ب/ط.بالدول المذكوره في هذا البلاغ..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا ابن عمتي ..... اطمئنوا الاخت ناهد بخير فقط كما اعلمتنا في القيادة الوسطي انها بصدد الانتهاء من حلقات شهر كامل من برنامجها في قناة النيل الازرق
" احلام مسافره" وذلك بجانب مشغولياتها الكبري مع فرقة تيراب الموجودة حاليا بجده كذلك بعض المشاريع الاستثمارية التي سوف تقوم بها لانعاش السوق المحلي
بست الهوي والطراوة وذلك عقب الانتهاء من النيل وترابه.هذا ما لزم توضيحه للجمع الكريم وشكرا.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: لا أدري لماذا تداعت عليّ صورة ميرغني الكجر... وهو وعلى بساطة رتبته إلا أنه كان أشهر شرطي في المزاد |
الاخ كمال لو كنت تقصد الشرطي الذى كان يسكن جوار منزل تاس انور العجب ،لاني لا اذكر اسمه الان فهذا الشرطي قابلناه كثيرا فى نهاية الثمانينات فى محمكة بحري عندما كنا نعمل فى المحاماة ،وقد تدرج حتى وصل فى ذلك الوقت لرتبة ملازم ولطول خبرته فكان يعتبر من أفضل المتحرين فى شرطة بحري
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: ## تـــعـــمــــيـــم رقـــم (1) لــســــنـــــة 2009 /ب/ط/مفقودين... ** من تاريخ 06/01/2009 الساعه 1:52 م. والي الآن بت بشير الطيب مفقوده ,, لكل أهل ست الهوى والطراوه بالسعوديه ومصر وبحرى سرعة البحث والتحرى وإخطار القياده العامه بالمنطقه الشرقيه:-(ودالسر كرار) أو نائب القائد العام بالرياض :- (ود ميرغنى علي مصطفى) أو إخطار مُمثل القياده الموحده بدولة الامارات العربيه المتحده:-(ابو محمد فؤاد).. (ابو محمد فؤاد) # نسخه للسجلات. # نسخه لمُمثلي ب/ط.بالدول المذكوره في هذا البلاغ.. |
* الي القياده العامه بالمنطقه الشرقيه.. ** نائب القائد العام بالرياض .. ** مُمثل القياده بدبي.. بالاشاره الي التعميم رقم :- (1) لسنة 2009 /ب/ط/مفقودين.. نود أن نفيدكم بأن المُبلغ عنها قد ظهرت وأبانت نفسها وذلك بإخطارها لنائب القائد بمنطقة الرياض وعليه تم تسديد القيود وإلغاء التعميم الصادر..
# نسخه للسجلات. # نسخه لمُمثلي ب/ط.بالدول المذكوره في هذا البلاغ.. بالبحث والتحرى .. ********************************************************************** ## ملحوظه :- أقامت المُعمم عليها بت بشير الطيب مأدبة غداء أسفيريه بمناسبة العوده الطوعيه دعت اليها كل أهل ست الهوى والطراوه ولقد أعقب المأدبه شاى كرك بالحليب مع اللقيمات..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: قلت ناس بحرى أحسن أكريهم بالعضه الماخمج وكمان معاها زقني (وزيد عذابي) من بلد الناس الله راضي ليهم فاتح ليهم المُكيف ومدينا ضهرو..
|
اخوى عبدالكريم ازيك واولادك وخبارك والبوست والطراوة..... جاية جعااااااااااااانة ......وعطشانة....
الجاهز كتلنى ...ستة يوم اكل جاهز ....قلت الحق البيت بسرعة ...قبال ماالمخرج بتاع البيت (يحيلنى للصالح العام ).................
يس اكتشفت ليكم حاجة خطيييييييرة ... انه المخرج.......واولاده بيحبونى عشان العضة بس اسبوع تمام مكشرين لى فى وشى .... طول ماانا فى المطبخ هم سعداء .... وطول ماانا.... مافى المطبخ ده التعاسة تلف وشوشهم .... (الغريبة بيموتوا فى اكل بره )
ماعلينا ..... المهم الليلة طبخت الحمدلله .... (ومافى زول اكل .....قالوا دايرين جاهز )
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: انت المعمم عليها دى ليه ماقلت ... سمراء اللون سليمة العقل شعرها اسود تلبس عباية سوداء |
Quote: وتنتعل سفنجة خضراء |
بت بشير الطيب ** لم تُذكر الاوصاف أعلاه لانو تم تعريفك بأنك بت بشير الطيب والمُعرَف لايُعرف.. ** حلو تنتعل سفنجه خضرا يعني أُخت الساحه الخضرا وكدا.. مايجى واحد ناطى ويجيب لينا سيرة حاجه خضرا تانيه.........!!؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: يا كرومة...شايفك فصلت لما شفت لقمة القاضي... ومال لو جابوا ليك نابلسية بحراوية تسوي شنو؟؟ |
ود السر كرار ** مع السكرى والضغط والكلورسترول والله الواحد بقي زى الناظر النزلوه المعاش وقاعد حارس السبيل لاماتشرب من الزير الاول اشرب من الثالث - أها هسه بيقينا لا ماتأكل اللقيمات دى سكرا كتير لا أكل اللقيمات رقم اربعه دى الزيت فيها ماكتير وسكرا شويه- الشغله بقت بالوصيف.. ** أهو التعميم عن المفقودين جاب فائده - رجعت بت بشير الطيب وأولمت لناس بحرى اسفيرياً.. (ودام الود بيننا)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بصراحة الواحد شبع بالمتاوقه للطيبات النشرتا الاخت ناهد والحمد لله نحن من اول امبارح في حالة
لقيمات يقمن صلبه.طبعا ناس هسع بيسموهو لقمة القاضي وكده والناس القبليهم بيسموها زلابيه. صاح!!
Quote: طارق لو العضة ما فيها كوارع..حشاهو ما بيبرد...
صدقوني.. وهو بقى يتهرب من مسألة الفسيخ درءاٍ للحلبنة |
ما قلنا ليكم يا اخوانا "وقفونا"( من الكوليسترولات والقاوتات)... علي وزن نقلونا يا كمال.
والقصه انو زميلنا صلاح "طايوقه" هكذا كنا نلقبه وعندما تخرجنا جميعا كان هوالوحيد الذي يقود
ويمتلك سياره حيث كان يعمل بالجمارك لانه الوحيد من دفعتناالذي لم تتاح له فرصة دراسات جامعيه لكنه
في نفس الوقت كان مرتاحا كما عودونا ناس الجمارك في ذلك الزمن الجميل.
نقطة تلاقينا اليوميه كانت استراحة الاطباء بمستشفي بحري حيث العديد من الزملاء واخونا طايوقه كان
يتمختر بالفلوكسواجن الزرقاء كأكبر اخصائي تجميل.
البنات " الجكس" الزائرات والممارضات ومن لف لفهم ينادونه بدكتور صلاح.
المشهد صالة الجمارك بمطار الخرطوم حيث يعمل وبعض فتيات المستشفيات في حالة استقبال او وداع لا فرق
بينهما حين شاهدن صلاح يختم في بعض من اوراق الجمارك صحن فرحات ...
هي !!!...دكتور صلاح ؟ شنو الجابك هنا؟؟
فأجاب: ما نقلونا ... ومنذ ذاك اليوم صارت " ما نقلونا " مثلا نردده كلما رأينا دكتور ... اقصد
ضابط الجمارك صلاح.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
طارق ....
كريمة العم حسون عثمان.. تعيب عليكم أنكم لم تذكروا الكثيرين من أهل بحري...من بينهم العم حسون عثمان وكان مديرا للمخازن وسكرتيرا لنادي التذكار.. وهو والد كل من محسن والمرحوم مصطفى وهاني ومجدي.. وأربعة كريمات أخريات...والعم حسون عثمان رحمه الله من قدامى كبار موظفي الخدمة المدنية ومن أهل بحري العريقين...وأظنك تعرف إبنه هاني...فهلا سلطتم الضوء على هذه الشخصية البحراوية؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي كمال بحري غنيه برجالها وجميله بناسها شأن اهل المدينه في المملكة العربية السعودية حيث ارتبط اهلها منذ هجرة افضل خلق الله سيدنا محمد صلي الله
عليه وسلم ارتبط خلق اهلها بالطيبة والكرم والتسامح وهكذا بحري واهلها.
الاستاذ حسون عثمان من رواد الخدمة المدنية في السودان وهو من اقدم سكان حي الدناقله شمال حينما كان للناصية معني واسما مدنيا او تجاريا فقد عمل عمنا
رحمة الله عليه مديرا للمخازن والمهمات حينما كانت حكومة السودان تستدين من المصالح الحكومية وذلك قبل ان ينفرط عقدها ويتم حلها بواسطة الحكومة الحالية
لسبب في نفس يعقوب.
كان كما ذكرت اخي كمال سكرتيرا لنادي التذكار زمن حربي عباس وعبد الحليم احمد يعقوب وصالح اب اصبع وغيرهم من فطاحلة كرة القدم البحراوية . رحمه الله
رحمة واسعة بقدر ما قدم لوطنه واهله وجعل البركة في ذريته.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: والحمد لله نحن من اول امبارح في حالة
لقيمات يقمن صلبه |
غايتو ياطارق ياخوى الله يساعدك ويوفقك .... كتر من العصائر الفريش ...ماعندكم قريب فروت؟ بالله مابيعجبنى فى السودان الا عصير القريب فروت الفريش منه والغازى ....
______________________-
انتوا وين اخونا عبدالوهاب على الحاج من يوم قندهار وفارقناماشفناه بى هنا ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
عبدالكريم اخوى شوف الخروجة (على قول اخواتنا السعوديات ) بتاعة الضمير دى كيف
(( شُوهدَ آخرَ مرة يتجه إلى الغرب ... ))
منذ سنين طويلة أبحثُ عنه و لكن بلا جدوى ... بحثتُ عنه في كلّ مكانٍ و زمان ... بدأتُ بنفسي ... ثم بيتي ... فمدينتي ... ثم وطني ... فأوطاني العربية و لكن ..... بلا أي جدوى ، استسلمتُ و أيقنتُ أنّه لا وجودَ له أصلاً ، فلماذا أشغل عقلي و قلبي بالبحث عنه ... بدى لي كسرابٍ في صحراء مترامية تحت أشعة شمسٍ ساطعة ، أيقنتُ أنه ليس أكثر من وهمٍ و تخيلات ، إلى أن جاء ذاك اليوم !!!
سأعود الآن إلى بداية الحكاية ... فذاك الضميرُ الذي صدحَ به من يؤثر بالأمة هذه الأيام ، قد خرج منذ عشرات السنين و شوهد آخر مرة يتجه إلى الغرب ، يلبس سترة حمراء بلون الدم و ينتعل بقدميه شيئاً كان يسمى كرامة ... و فوق رأسه عمامة بيضاء و على جبينه نقشٌ حُفِرَ بأحرفٍ من نار :
خرجتُ و لن أعود ... إلا أن !!!
إلا أن ...
إلا أن ...
______________________ بقلم : محمد غيث
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: بالله مابيعجبنى فى السودان الا عصير القريب فروت الفريش منه والغازى ....
|
. الاخت ناهد شكرا على الوجبات والخرفان المعلقة دي ،لكن لسع منتظرين فسيخ طارق
وبمناسية عصير القريب فروت فى السودان واللة لو الخطوة ودتك لقلب الخرطوم وفى اى محل عصير هناك شربتي عصير تبلدي تاني ماحتتذكري عصير القريب فروت نهائياً ، ماعارف ديل بعملو فيهو شنو من رهابتو
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: وبمناسية عصير القريب فروت فى السودان واللة لو الخطوة ودتك لقلب الخرطوم وفى اى محل عصير هناك شربتي عصير تبلدي تاني ماحتتذكري عصير القريب فروت نهائياً ، ماعارف ديل بعملو فيهو شنو من رهابتو |
الخطوة ان ربنا هون بتكون خطوات لبحرى وضواحيها والخرطوم وماجاورها وام درمان وازقتها ومابخلى عصير فى كشك بتاع ليمون مابشربو بالذات سوق بحرى بشرب عصير الشعير فى الكوز واكون قاعدة فى الكرسى تحت الشجرة ديك وجنبى جماعة بى جاى يقروا جرايد وبى جاى واحدين سارحين ...وبى جاى بتاع التسالى ...وتحتى الطين والخميج بتاع الخريف والعجب كان كمان سيد الكشك مشغل ود اللمين ... ده بشرب ليه القونقليز طوالى ان لقيت فى المعدة فراغ وفضا.............
بالله شفت عصير الليمون ده مركز كيف واخضر يامعاوية ياخوى ؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: بالله شفت عصير الليمون ده مركز كيف واخضر يامعاوية ياخوى ؟ |
بت بشير الطيب مــعـــاويــه
خليتو الواحد يتمطق من الصباح ,, ويذكر عصير الليمون بتاع عمك حسن نضيف في بحرى ,, وعصير الليمون بتاع المحطه الوسطى الخرطوم وإن لم تخنى الذاكره صاحب الكشك إسمو عم ميرغنى وأمام كشكه تشاهد صفوة العاصمه من صحفيين وادباء وكبار الموظفين ,, وكافتيريا عبد القادر حاج السيد جنب بحرى الحكوميه.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: أرسلت الكلبة ملاكا إلى القمر |
ود السر كرار ** يُخيل لي أن أسم الكلبه التي أُرسلت الي الفضاء (لايـــــكا)..
Quote: وأنا بشرب تداعت للساني مذاقات كل مشروبات حسن النضيف والرشيد هافانا والأندلس...(شوف الأسم ده كيف).. يوديك ويجيبك... مش تقول لي مؤمن وفلفلة !!! من أين أتي هؤلاء |
** ماعارف ياود السر انو العصائر البنشربا في ذلك الزمان من :- هافانا والاندلس وحسن نضيف وأتنى بالخرطوم ومحلات ابناء عمي ناس يوسف الفكي قد لايتكرر مذاقها في هذا الزمن الردئ ومستوى نظافة المحلات ,, هل هي أنتلجسيا الحنين الي الماضى؟؟؟ أم أننا لعامل السن نرفض كل جديد من أجل الرفض؟؟ أم أنها الغربه وتأثيرها علينا فى تقبل الاشياء؟؟ لاأدرى!!!!؟؟؟؟ (ودام الود بيننا) (ابو محمد فؤاد)
| |
|
|
|
|
|
|
|