|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: عبدالمحمود محمد عبدالرحمن)
|
Quote: واضح إنقلاب سـدنــة وشوية مرجفين ...
نرفض التعيين، ونتمسك بشـرعية الدستوريين ...
. |
دكتورنا
قبال اعرف عبدالكريم ومعاوية قائدا الانقلاب كنت مسكيييييينة
لا بعرف انقلابات لا وزارات لا بنوك ....
حتى اقرا اسمى فى موسوعة جينيس للمسكنة والمحنة 
لكن هم شكيتهم على الله مجرمين الحرب طوالى فتحوا حسابات بره
لللغف .....
________________________________
لكن تحت تحت كدة مشاريعك شنو ؟
تاكلنا معاك ...بنجيهك
مابتاكلنا اعتبر اى شغل
نحن بنفركشوا ليك ...بالواااضح كده
| |
 
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
قرر قادة تنظيم يبحرون إعادة السلطه الي الحكومه الدُيمقراطيه المُنتخبه كما أنهم قرروا تعويض السلطه الشرعيه تعويضاً مُجزياً خلال فترة إستلامهم للسلطه المؤقته ,, إيماناً منهم بالديمقراطيه والعدل السائده في دولة يبحرون ,, لذلك علي كافة الوزراء الذين تم تعينهم تسليم إى عُهده بحوزتهم...
*** هتافات مُتناقضه:- هي لله , هي لله , هى لله ,, لا للسلطه ولا للجاه.. (حركات بالاصابع والعصي)..
نعم للديمقراطيه والشرعيه _ لا للإنقلابات العسكريه...
**** قوات الامن والاحتياطى المركزى والجماعه المامعروفين تابعين لإى جهه يراقبون الموقف من بُعد...
(ابو محمد فؤاد) الرئيس السابق..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: حتى اقرا اسمى فى موسوعة جينيس للمسكنة والمحنة |
ههههههههههههههااااااا يكا.....!!!!!!!
والله يا كمال ناس ابو رزقه والتلب وعلي سر الختم المختفين ديل تسالهم عن الكظرظر يقولو دقة ظار ولا ريتنزا جنب الكربريتر.
بعدين شوف ابن عمتي قال شنو ؟؟؟ اولا يا خي اسمها التربيه مش الرعايه ثانيا ناس كمال شربوا من الشربه القلويه دي لامن فتروا زمن بيمشوا التربيه شايلين
كراسة التحويل وبعدين عمنا حسن مختار رحمة الله عليه يكتب عليه متصنع ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: قرر قادة تنظيم يبحرون إعادة السلطه الي الحكومه الدُيمقراطيه المُنتخبه كما أنهم قرروا تعويض السلطه الشرعيه تعويضاً مُجزياً خلال فترة إستلامهم للسلطه المؤقته ,, إيماناً منهم بالديمقراطيه والعدل السائده في دولة يبحرون ,, لذلك علي كافة الوزراء الذين تم تعينهم تسليم إى عُهده بحوزتهم |
يعنى شنو ؟
كل شىء ببح (بكرى ده مفروض يعمل لينا وش بيبكى )
اخونا كمال
مالعلاقة بين بحرى والبحرين ويبحرون ؟؟؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: اخونا كمال
ماالعلاقة بين بحرى والبحرين ويبحرون ؟؟؟ |
بت بشير الطيب (الوزيره السابقه في دولة يبحرون)
** العلاقه الطبيعيه هي الاشتراك في هذه الحروف (ب)(ح)(ر)(ي)..
العلاقه المكانيه :-
# بحرى:- هى ست الهوى والطراوه وواحده من أضلاع عاصمة دولة دولة سازونيا الاسلاميه.
# البحرين :- دوله خليجيه أصغر من إى حي في بحرى ,, ومنتجع دائم لصاحب هذا البيت بما يُماثل (كامب ديفيد) ودائم التردد عليها في نهاية الاسبوع ..
# يبحرون تنظيم مُسلح خاص بحراسة ست الهوى والطراوه ,, وبه قوات تدخل سريع ,, وكذلك حكومة ظل تستلم السلطه في إى وقت وتعيدها ولاتحب حكومة الظل الجلوس علي كراسي السلطه لانها تجلب الفساد الذى يودى بدوره الي الإفساد وخراب الذمم وسرقة المال العام..
## العلاقه بين هذا الثلاثي علاقه تكافليه..
ودام الود بين أهل ست الهوى والطراوه..
(ابو محمد فؤاد) - (الما كيكي)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: يعنى شنو ؟
كل شىء ببح (بكرى ده مفروض يعمل لينا وش بيبكى) |
بت بشير الطيب (الوزيره السابقه في دولة يبحرون)
بح كيف؟؟؟ ماهو طلعت ليك بعقارين حلويين..
| Quote: أُفيدك تم شراء فيلا لك بجزيرة النخله بدبي وبنايه من ثمانيه طوابق جوار مدينة دبي للاعلام.. |
** اللعبه شوفتيها ماشه عسل كيف مع الجماعه تمسك ثلاثه يوم تطلع بتلاته مليار سازوني..
** التغيير الوزارى الجاى واضعين ليك تكوني والي ولاية العاصمه في دولة يبحرون وبرضو ماتنسينا من النسبه المُتفق عليها ومن هسه جهزنا أسماء شركاتك (OFF SHORE CO) وتم تسجيلها في المناطق الحره , رسلي الدولارات عشان تستلمي الشهادات..
(الرئيس السابق لدولة يبحرون)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: المره دى قلنا بمناسبة رأس السنه الهجريه والسنه الميلاديه وعيد ميلاد محمد فؤاد (31/12/2008) جبنا ليكم كرتونة فـــيـــمـــتــــو _ عشان تواصلو مع الرقم (30) , وكل سنه وإنتو طيبيين.
(ابو محمد فؤاد) |
كل محمد فؤاد والسنة حلوة ...وكل انت ومحمد فؤاد طيب
وكل محمد فؤاد وانت طيب ......
وعقبال تشوفه كبييير واميير ياااااارب
_______________
كل صفحة وانتوا بخير
وكل انتوا والصفحات بخير
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: البحرين :- دوله خليجيه أصغر من إى حي في بحرى ,, ومنتجع دائم لصاحب هذا البيت بما يُماثل (كامب ديفيد) ودائم التردد عليها في نهاية الاسبوع |
تاني قام جاب سيرة البحر ....!!!!!
انت يا عبد الكريم مره تكاوش براك ومره تدردق لي معاويه ومره لي كمال ومره لي ناهدومره لي منو داك ما بعرفو ... مره واحده ما تقول ود خالي ده النحن
عليهو ونديهو شوال جديد يفتحو لينا ...!!! عالم عجيبه.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
طارق...
القلوي الكنا بنشربو في التربية
بيقولوا عليه مزيج....
وفي مس بتاع اللوز...
يعني تمشي وأنت مضروب في رجللك..
يدوك كباية طلس بتاعة مزيج...
ويعملوا ليك مس بقشة زي قشة الأضان بس على أكبر...
وقرقرة... وسلفة.. وتنكشح...
إن شاء الله عندك برجم... لازم تأخذ ليك مس في اللوز
وأغرب حاجة كبابة الطلس... مطرقعة من كثر ما بتقع في البلاط...
من مرارة المزيج...
وعييييييييييييك
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أيوة يا طارق...
أعتقد الشرقرق.. أسمه الأوتوكليف...
وكانت الحقن والإبر بمختلف درجاتها تلقاها
عند أي ممرض في الحلة خاتيها في علبتها الحديدية الأنيقة...
بس الحاجة اللغاية هسع عالقة بذهني.. تفريغ الممرضين للهواء
من الحقنة.. منظر سادي بطريقة... يروح مفرغ الهواء بعين
ويعاين ليك بطرف عينو...
بعدين يا طارق رائحة غرفة الغيار والحقن لغاية هسع شاميها
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أبناء و بنات بحري الأعزاء
أطيب التحايا و الود
و كل عام و أنتم بخير و صحة و عافية و تحيات خاصة لكل أهلنا المسيحيين بمناسبة أعياد الميلاد و
تمنياتي للجميع بأن يكون العام2009 خير و بركة علي الجميع و أن تشهد بلادنا أحداث و تغيرات
أيجابية تخرجنا من النفق المظلم .. و الى شمس الحرية و يترتب البيت الكبير أو الحوش الكبير
السودان ,,,,,
من الأشياء الجميلة في السودان التعايش و التداخل بين المسلمين و المسيحيين و خاصة في مدينة بحري
التي يسكنها الكثيريين منهم و توجد بها العديد من الكنائس . فهم معنا في كل شئ المدارس الرياضة
و في كل الأحياء,,,
و هذه مناسبة لنتذكر بعض منهم الفنان أدمون منير الرسام و مقدم البرامج المعروف ( خد وهات) و هو
من سكان الأملاك بحري و أذكر في بداية أيام عمله كان لديه موتر فيسبا و كان يحضر يوميا ليرسم و
يكتب فيلم اليوم بلوحة الأعلانات بسينما حلفايا و كنا و قتها في مدرسة العزبة (1) نتتظر هذه
اللحظات لأنه كان يجود علينا ببقية الألوان و الأقلام التي يرسم بها,,,
و جيراننا بالمزاد أدوارد و أسرته تعايش تام مع كل الجيران ,,,و الأن ومنذ 10 سنوات جارنا ماجد
جرجس و زوجته الفاضلة سارة فليب عباس غبوش و أولادهم نعم الجيرن و الأهل,,,
في مدرسة بحري الأهلية ( السكة حديد) و المدرسة تتكون من 3 أنهر شمال و جنوب و غرب و كنا في غرب
مجموعة متجانسة والمشرف (أبو) الفصل كان الأستاذ الفاضل و الرياضي الأنيق فتحي كامل غندور رحمه و
أسكنه فسيح جناته مع الأنبياء و الشهداء و الصديقين,,,, فكان ضابط المدرسة في نفس الوقت و المشرف
على النشاط الرياضي و كان الفصل به مجموعة متميزة في الأنشطة الرياضية في كرة القدم والسلة و
الطائرة منهم الأخ ماريو خرستو( ماريو خريج قانون جامعة القاهرة الفرع و عرفت من الأصدقاء انه الآن
مقيم بلندن و يعمل مستشار قانوني بمجلس الكنائس و أذكر اننا و مجموعة من الأصدقاء حضرنا مراسم
عرس أخيه أليكس بالكنيسة الأنجلية ببحري) و ماريو لعب لفريق الكوكب الرياضي و من أميز اللاعبين في
السلة محجوب محمد محجوب ود.عاصم محمد عباس د.علي عبدالرحمن (البرلوم) و كنا في نفس الوقت في
أشبال نادى الكوكب الرياضي للسلة و مدربنا علي كامل غندور أخ الأستاذ فتحي و في كورة القدم كان
الفريق يضم حسين سورج و علي حسن و علي عبدالرحمن و عمر علي سليمان وصلاح أبايزيد و آخرين و كانت
تربطنا صداقة قوية بالأستاذ فتحي وفي ذالك الزمن الجميل كان للأستاذة هيبة و مرتاحين و ما كان في
دروس خصوصية و دروس البيوت في نطاق ضيق جدا و أذكرأن الأستاذ فتحي كان لديه موتر فيسبا انيق,,, و
دائما ما كنا ندخل معه في مناكفات يمكن كان الغرض منها فقط أبراز الشخصية في تلك المرحلة من
العمر و كان دائما مايردد مقولته المشهورة( أنتو كان تنفعوا انا حاأشيل لي بيرك و ألف بيهو سوق
بحري) و الحمدلله أنو حضر تلاميذه في مواقع محترمة في جميع المجالات,,,
مدير بحري الأهلية في ذالك الزمن الأستاذ الجليل أبراهيم سيد جمعة من سكان حي الختمية,,
و أذكر من المعلمين في تلك الفترة أستاذ الرشيد علوم ...(دبل هيد) جغرافيا المحجوب قريب معاوية
أنجليزي و كان أستاذ جديد و الأستاذ بابكر (دقريشينة ) في الجغرافيا أستاذ الطاهر و أستاذ يسن
حاج ماجد و أستاذ حسن ( ترينتي) في اللغة العربية أستاذ عبدالرحيم وكيل المدرسة و أستاذ
رياضيات ,,,,
و لنا قصة طريفة مع استاذ حسن (ترينتي) طلب منا أن نحضر حصة أضافية في العصر و طبعا مجاني لا قرش
لا تعريفة( زمن!!! سمعنا الآن في المدارس الحكومية الأستاذ بيزوغ من حصتو الأساسية و بعدين يجيب
الطلبة لحصة مدفوعة مقدما؟؟ ),,,, و في نفس اليوم كان الفريق القومي السوداني لديه مبارة مهمة
مع فريق ساحل العاج و منقولة عبر الأذاعة و حاولنا معه تأجيل الحصة لوقت آخر فرفض رفضا قاطعا و
الغياب عقوبته الجلد و كان عندو سوط بلاستكي أبيض كنا نسميه سوط الشمع!! فقررنا الحضور و لكن نحضر
راديو ونجلس في نهاية الفصل و نسمع الكورة
و هذا ما حصل و انا ممسك بالراديو تحت الدرج و فريقنا مهاجم و هجمة قوية و علي قاقارين ماشي
بالكورة علي القون و علي الحسن مالك مسخن و انا هنا عليت الصوت شوية و فجأة حالة صمت عمت الفصل
و هنا أكتشف الأستاذ الأمر و بدأ يتحرك في أتجاه الصوت و أردت ان أوقف الصوت فصار العكس في لحظة
قفلت الراديو و أعطيته لجاري الذي أبعده, و قد أتهمنا أنا و عمر علي و بشير الشيخ و نكرنا الجرم
الثلاثة و قرر جلدنا في اليوم الثاني في مكتب الوكيل,,,
و من طرائف دفتر العيادة في مدرسة المزاد في واحد من أصحابنا كان يوميا بيجي أول و احد بسجل أسمو
و بعداك بيدهو الدفتر يسوق الجماعة و في نهاية اليوم يرجعهم, و في المرات القليلة التي لا يحضر
فيها الناظر برسل ليهو يسوق الجماعة ويقوم بتوزيعهم علي العيادات الباطنية و الأسنان و
العيون و في نهاية اليوم يرجعهم المدرسة ,,,,,(نظام ألفة لدفتر العيادة).....
والطريف في الموضوع كان مرات بيسوق معاهو واحد أو أثنين لمساعدته و بعدين الفطور فواحد من هؤلاء
الشباب
و مغتربين آخرين كانو في الأجازة و مشوا يزوروا ليهم مريض بمستشفى البراحة بشمبات و هم خارجين من
المستشفي شافو البورد المكتوب فيه اسماء الدكاترة فقال أحدهم ولما صاحبنا ألفة دفتر
العيادة هسع كان نكون في نص الستة دي....)
وكل عام و الجميع بخير و عافية
و الى لقاء قريب بأذن الله
د. أبراهــيم العجـــــــب
__________________________
تحية خاصة للأبن محــمد فـــؤاد و كل سنة و انت وكل الأسرة
بخير و عافية
(عدل بواسطة Ibrahim Elagab on 12-30-2008, 05:05 AM)
(عدل بواسطة Ibrahim Elagab on 12-30-2008, 07:46 AM)
(عدل بواسطة Ibrahim Elagab on 12-30-2008, 07:49 AM)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Ibrahim Elagab)
|
الاخوان الاعزء
تحياتي وكل عام والجميع بخير وسنة حلوة سعيدة لكم ولجميع افراد اسركم
وياعبد الكريم الايام دي كل القنوات السودانية تعلن عن احتفالات رأس السنة فى الاندية والصالات وردي فى الفندق الفلاني وترباس وندى القلعة فى قولدن قيت والبكاسي الجدد فى كل مكان ،واتذكرت ايامنا الفى السودان وعربيتك الكارينا ومن حفلة لحفلة فى راس السنة لشروق الشمس وبعد داك نمشي نوصل حبايبنا اولاد امدرمان ومن الملازمين ولحى العمدة وامير يرفض ان ينزل امام سوق ودنوباوي و يصر على ان توصلوا امام منزلو عشان خائف من ناس القمائر وانت تقول ليهو ياخي انا سائق عربية روضة ،ويالها من ايام ياكريمو ويارب تعود تاني ويعود كل الاصدقاء المهاجرين للسودان ،وهل من عودة هل .والان بقينا لا رأس سنة ولا رأس قطر .
ومبروك صفحة 30 وتاني محافظة مافى والارشفة المرة الجاية محمدانا Quote: و من طرائف دفتر العيادة في مدرسة المزاد في واحد من أصحابنا كان يوميا بيجي أول و احد بسجل أسمو
|
الدكتور ابراهيم
تحياتى لك ولابو النور ولعادل ووين حلقات ابو النور ولماذا توقفت .
وبرضو من طرائف دفتر العيادة كان معانا واحد فى الاميرية يوم الاسبلنق يمشى العيادة وفى الطريق يشتري ثوم وياكلوا ولما يصل المستشفى تكون درجة حرارتو 104 وطوالى الدكتور يكتب ليهو راحة ويجى جاري ويشيل شنطتو ويتخارج من الاسبلنق ولا ادري من وين حاب معلومة انو الثوم برفع درجة الحرارة ،
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
| Quote: وياعبد الكريم الايام دي كل القنوات السودانية تعلن عن احتفالات رأس السنة فى الاندية والصالات وردي فى الفندق الفلاني وترباس وندى القلعة فى قولدن قيت والبكاسي الجدد فى كل مكان ،واتذكرت ايامنا الفى السودان وعربيتك الكارينا ومن حفلة لحفلة فى راس السنة لشروق الشمس وبعد داك نمشي نوصل حبايبنا اولاد امدرمان ومن الملازمين ولحى العمدة وامير يرفض ان ينزل امام سوق ودنوباوي و يصر على ان توصلوا امام منزلو عشان خائف من ناس القمائر وانت تقول ليهو ياخي انا سائق عربية روضة ،ويالها من ايام ياكريمو ويارب تعود تاني ويعود كل الاصدقاء المهاجرين للسودان ،وهل من عودة هل .والان بقينا لا رأس سنة ولا رأس قطر . |
العزيز ابو عوه
ياحليل الزمن الجميل ,, وين هسه العاصمه بقت زى دكاكين الاقاليم من الساعه 10:55 م. يتوقف إى نشاط ولاحظ دا الوقت الكنا بنفكر فيهو نطلع للسهرات والعوده بعد الخامسه صباحاً ,, ياخى ديل كرهو الناس ضهرا وبطنا وخلو أغلب الناس ورقا زايد ويحلها الشربكا,, 2009 عام مُظلم B]
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
كل عام و أنتم بخير مع اشراقات السنة الجديدة
و طبعا ناس الخرطوم آخر حفلات و تحضيرات و طبعا الحفلات براها ما كفاية بدون مرطبات؟؟؟؟
و أحسن شئ في رأس السنة انو يكون في برد شديد
و في بعض الدول لازم يكون في جليد و سنة جديدة بدون جليد بيعتبروها سنة تعبانة...
يا جماعة الخير الحاصل شنو في المنبر....
من أمس أكتب أرجع القى ليك الكتابة ناقصة سطر سطرين
الحاصل شنو في هكر حائم؟؟؟ و لا خلاص نحنا زاتنا بقينا نفط سطر
وكل عام والجميع بخير
و دام الود
د. ابراهـــــيم العجــــــب
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
Quote: ** أها المره دى قلنا بمناسبة رأس السنه الهجريه والسنه الميلاديه وعيد ميلاد محمد فؤاد (31/12/2008) جبنا ليكم كرتونة فـــيـــمـــتــــو _ عشان تواصلو مع الرقم (30) , وكل سنه وإنتو طيبيين.
(ابو محمد فؤاد) |
أستاذنا عبدالكريم
استاذنا ودالسر كرار
وكل الاحباب ناس بحرى ست الطراوة
تحية لكل ناس بحرى الحلوين وتحية خاصة جدا جدا جدا للابن محمد فؤاد نتمنى ليه عيد ميلاد سعيدوكل سنه وهو والاسرة طيبين.. وكل ناس بحرى الحلوين.
ابدا
على سرالختم
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
((لاحول و لا قوة الا بالله))
أتقدم بأصدق التعازي
للأعزاء عبدالعظيم مهدي و أخوانه عبد الغفار و عبدالعزيز و عبدالحفيظ و عمار
و لأبن عمهم الأخ عوض الله مصطفى و أخوانه
و لكل الأهل و الجيران بالمزاد
في و فاة المغفورة لها بأذن الله و الدتهم
نسأل الله ان يسكنها الجنة مع الأنبياء و الشهداء و الصديقين
و حسن أولئك رفيقا...
و الصبر وحسن العزاء لأبنائها و جميع الأهل و الجيران
((و أنا لله وانا اليه راجعون))
د. ابراهيم العجب
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ناس بحرى سلام
مالكم صاااااانين كده الصفحة دى مالها معسمة كده....
يعنى نكتب ولا نقيف ...بقت زى ايام المدرسة الميتانة ديك
الواحد يجى المدرسة وماعارف فى قراية ولا لأ ...
لكن الغريبة طوااااالى مابتكون فى مدرسة وبيدونا اجازة والبيوت
الله يستر ...لانه الاجازة هنا فى البوست ده ابدا ماسمحة ...
كمال طارق الماكيكى رزقة معاوية قناوى حسن طه عبدالمحمود نادية
ابراهيم العجب ...اظهروا قلقتونا عليكم
البيوت .....ولا نقعد فى (قراية)
شكرا يااخ طارق على البوست الجميل ده وانشاءالله بالتوفيق
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
Quote: لا فى قراية وسبعة حصص كمان
بس الناس ديل باين عليهم الليلة مروسين وكدة
وخاصة عبد الكريم اصلوا الاحتفالات براس السنة فى دبي حاجة تانية وافضل من الاحتفالات فى اوروبا |
وحيث انه يامعاوية ياخوى نحن فى (القعودية ) دى وراس سنة ماعندنا
لاميلادية لا هجرية ياكافى البلا ...بناتى جوا من المدرسة قبل يومين سألتهم الليلة السنة
الهجرية الجديدة المعلمات قالوا ليكم شنو ردت على البتقرا فى المتوسط (الابلة قالت لينا:
اليوم يابنات حنكتب التاريخ غير ...(على وزن جده غير ) اليوم حنكتب عندنا فى الدفاتر 1430 هجرية )..
سالتها وبس ؟
قالت لى: ( ايوة ...ولا حتى ماقالت لينا كل سنة وانتوا طيبين ...
عارفة ياماما السنة الجاية ودونا السودان خلاص ....)
اتذكرت وقتها النكتة بتاعة الهيلاهوب
السالوا طالب فى الفصل عن ماهى عاصمة السعودية قال ...الحج ...
اخونا كمال فى بحرين الاسبوع ده ولا لأ  ؟...طارق حيحتفل اكيد مع ابو امنة حامد
قتلى عبدالكريم حيكون مع الالعاب النارية فى سماء دبى ...رزقة طبعا معانا هنا
الدكاترة... وهبة... ونادية اظهروا بالله ....
______________________
خلاص ياجماعة الاقيكم السنة الجاية ودعناكم الله والرسول ....
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
| Quote: كمال طارق الماكيكى رزقة معاوية قناوى حسن طه عبدالمحمود نادية إبراهيم العجب ...اظهروا قلقتونا عليكم.. البيوت .....ولا نقعد فى (قراية) |
** بت بشير الطيب
كل سنه إنتي والاسرتين الصغير ه والكبيره بخير وسنه ميلاديه سعيده لانو الهجريه عندكم بتغير التاريخ بس وبدون إحتفال .. والله الوضع اليوم يتحمل إى من الإحتماليين والخيار متروك لصاحب الخيار مُمكن تكون في قرايه ومُمكن تكون مافي قرايه ,,, ولما تكون مافي قرايه بتكون الزوغه واللفلفه العشوائيه من دون هدف مُعين مُمتعه..
(ابو محمد فؤاد) الماكيكي..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: والله الوضع اليوم يتحمل إى من الإحتماليين والخيار متروك لصاحب الخيار مُمكن تكون في قرايه ومُمكن تكون مافي قرايه ,,, ولما تكون مافي قرايه بتكون الزوغه واللفلفه العشوائيه من دون هدف مُعين مُمتعه..
|
الماكيكى ياخى كل سنة وانت بالف خير واسرتك بالطبع وكل الاهل ويعود عليكم بالخير ياااارب
وعلى كل المسلمين وربنا يرفع عن غزة ...ياااارب ....
لا لا الليلة مادايرين قراية ولا حاجة الليلة هرجلة بس ....اول شىء ارح نمرق نشرب موية من
المزيرة البرة ديك ...تانيا نغشى الدكان نحشى طحنية بموية الجبنة ...وقزازة بيبسى بااااردة
بعدها ارح نشوف باقى الشباب وين ...ونمرق ...وزى ماقلت ..نلفلف من دون هدف ..عارف يا الما كيكى
احلى حاجة تكون ماعندك هدف (لا فى قونك لافى قون الخصم ) ...,تكون تاكلا على الله ..
ماانظر ليك كتير ...مادام قلت بدون هدف دى ...ارح يلا بلا هدف ....
كمال اخوى
بصراحة غتساتك كترت ... ليه كده ؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: بس الناس ديل باين عليهم الليلة مروسين وكدة
وخاصة عبد الكريم اصلوا الاحتفالات براس السنة فى دبي حاجة تانية وافضل من الاحتفالات فى اوروبا.. |
العزيز ابو عوه
** (اهابالخليجي حنيت علي الموضوع لغوا الإحتفالات) بالبحراوى نقيت في الموضوع ودوهوا الخوور وكجيتو كمان ... وفعلاً الإحتفال برأس السنه مُش حاجه تانيه ,,, دى دورى مُمتاز غير عادى..
**ودام الود بييننا ,, وكل سنه إنت والاولاد بخير ,, وياحليل رأس السنه البتعرفو وبنعرفو..
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: يا ناهد جبتي سيرة الطحنيه هسع كمال يجيك ناطي.
لكن بالجد في زمن ناس كمال ما كان معاها بيبسي كانت اما بزيانوس او دبل كولا ...!!! |
ياإبن خالي
والله الكلام دا زى الخطفتو من خشمي ,, والبزيانوس والدبل كولا بذكر أنو ناس خالتي زينب في حلة حمد بيعتبروها ستوك دائم في إى وقت وإى موسم موجوده بالبيت..
** والله يابت بشير الطيب وياطارق:- خليتيو الواحد يتدشا طحنيه وموية جبنه مع طعم البزيانوس...
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بمناسبة حلول تباشير العام 2009
أتقدم بالتهاني القلبية لك من شارك معنا في هذا المنتدى وساهم في تميزه وإستمراريته وتهنئة خاصة لصاحب هذا الدار العامرة أخي كمال كرار ولأسرته الكريمة ..
أتمنى للجميع أن تكون سنة مليئة بالحب والسعادة والنجاحات وان تتحقق امنياتكم وأحلامكم ..
من إنجازات العام المنصرم على المستوى الشخصي أن إتاح لنا هذا المنتدى الجميل التعرف على كوكبة طيبة من أبناء بحري والتواصل معهم أسفيريا وأتطلع لتوطيد هذه العلاقات الإجتماعية بصورة أفضل خلال العام الجديد من أجل خير ورفعة المدينة التي تعشقونها جميعاً ..
أمنياتي في 2009 :-
* أن يحل السلام في كل أرجاء بلدي الحبيب وأن يكون عاماً للسلام والتنمية
* أن تصبح مدينة بحري في مصاف المدن العالمية
* أن أحضر العيد الصغير والكبير في مدينة بحري
وربنا يحقق أمنياتكم ؛؛
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
سلام يا ناس بحر ي كلكم...
إن شاء الله تامين ولامين كل سنة...
لما تبقوا أحفورات FOSSILS
يا جماعة معليش بمناسبة السنة الجديدة
عندي شوية تغييرات في الشقة...
يعني إشتريت قفة جديدة.. وغيّرت المشلعيب
بواحد DIGITAL
أما المعراكة.. فلا زالت ANALOG
أهي تغيير عسى ولعل 2009 تكون سنة بحق وحقيقي
طارق آخر طحنية أكلتها أمس... وبالعسل الأسود...
يا د. عبد المحمود .. ناس حسن طه من زمن (الأورنجيتا)...
لأنها كانت مع الكيتي كولا.. أهو بنسمع...
الأخت ناهد .. أمنياتي لك وللأسرة بسنة سعيدة
كرومة ومعاوية تحياتي لكما..
د. إبراهيم ود. إبراهيم العجب وأبو النور كل سنة وأنتم طيبين..
ناس الشعبية .. المزاد.. المزاد المفتوح...البدوان.. الختمية.. كرش الفيل..
حلة حمد .. حلة خوجلي .. الدناقلتين... الصافية.. الأملاك.. كوبر
شمبات.. الحلفايا.. الميري (زمان).. الديوم.. الأملاك.. الكرين..
المغتربين.. الصبابي.. كافوري... شارع الصناعات.. شارع الزعيم.. شارع التمنة
شارع البوستة.. شارع المعونة... شارع الضواحي..شارع الضابطية..
شارع الملجأ.. سهة الشيخ موسى.. ميدان عقرب.. ميدان الخطر..
ميدان الطرف الأغر... مدرسة الدايات...وكل أقليم بحري... نتمنى لكم عاما سعيدا
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
Quote:
يبدو انو عبد الكريم لازال نائماً من سهرة رأس السنة رغم إلغاء الحفلات رسمياً فى دبي لكن عبد الكريم انا عارفو لو احتفل براهو مابخلى احتفال رأس السنة ولا ماكدة يابو محمد فؤاد |
العزيز معاويه
** وحاتك الربه شغاله في كل الفنادق والإلغاء يعني أنو الناس بعد تطلع من أماكن الإحتفالات ماتتجمع وتحتفل في الطريق العام .. لكن كان في رطوبه لدرجة أنو لو رفعت أصبعك مُمكن ماتشوفو ..
** وفعلاً إحتفلت دكاكينى مع محمد فؤاد وامو لن راس السنه بيصادف عيد ميلادو..
*** وكل سنه أنت والاسره بخير ..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: وكل راس سنة (مهبب) وانتو بخير
. |
قالوا الدكاترة لما يدرسوهم فى الجامعة بيقولوا ليهم
ماتتخفوا مع العيانين خليكم جادين معاهم .....وهسى عجبتنى
حكاية مهبب دى ولاول مرة اسمعها هنا ....غااااايتو ياناس بحرى
صحى رائعين ومبدعين ...الله يسألنى حسيت بيها زاااااتا قلتها كيف؟
مهبب
مهبب
مهبب
ياخ كل راس ....اى راس ......وانت بالف خير ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
ناس بحري طراوة كلكم
سيد الحوش ود كرار كمال
وووووالمشاكش ود ميرعني طارق
والمناضل معي في بوست المغتربين ابو محمد فؤاد
والدفعة اخوي الكاشف دكتور محمود
والمناضلين من اجله عماد
والمستقطعة من وقت عيالها من اجل البوست ناهد
وكل من تداخل وشارك او قرأ حرفا في هذا البوست الجميل
لكم جميعا اطيب التحايا والامنيات القلبية بعام جديد سعيد وكل عام وانتم بخير.
اما بعد
راحت الكيتي كيتي كولا ( دي يطرشني ما سمعت بيها الا عند الدكتور )
والبزيانوس الاصلي ( في الاجازة الفاتت لقيت بزيانوس في البقالات لكن تايواني ).
والسينالكو ( دي يطرشني ما سمعتها الا عند ود الكرار ).
والدبل كولا ( دا كان شراب الدكتور المفضل سكره كتير وكميته ماهولة ).
نحن كنا ناس ميرندا وفانتا ساكت خاصة في سينما حلفايا.
عمركم هل جربتو التسالي مع الميرندا؟؟
السنة الجاية كلكم سالمين وغانمين ومتلمين في بحري.
والزمان والمكان يحددهما ود الكرار.
دمتم بالف خير.
حسن ود البوب
( والبوب هولقب الوالد امد الله في عمره ومعناه الشاب النشط ونحن ان شاء الله ذاك الشبل من ذاك الاسد ).
هذا الاسم لا يعرفه الا الدكتور ومن الآن هو الاسم الرسمي في هذا البوست وكل من يخالف فله المستشار ابو محمد فؤاد بالمرصاد.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
.
كل عام وانتم بخير مرة أخرى ياشباب وشياب بحري العزيزة؛
.
ويابوعلى قلت:
| Quote: راحت الكيتي كيتي كولا .. دي يطرشني ما سمعت بيها الا عند الدكتور .. |
"الكيتي كولا" كانت أرقى مشروب غازي على الإطلاق يمكن أن تحصل عليه من دكان اليماني ـ أفضل بكثير وأغلى (بتعريفة) من "الدبل كولا" التي ذكرتها يابوعلي:
أذكر شعاره الأصفر والأحمر وإعلانات النيون عنها مع الدعاية الشهيرة: الكيييتي كييتتي كولا ...
.
ويابو محمد فؤاد:
| Quote: إحتفلت دكاكينى مع محمد فؤاد وامو لن راس السنه بيصادف عيد ميلادو .... |
يعني المسألة فيها شبهة "تسنين" !!!
وعموماً عقبال مية سنة للشبل محمد فؤاد.
.
ويا أخت ناهد قلتي:
| Quote: الدكاترة لما يدرسوهم فى الجامعة بيقولوا ليهم ماتتخفوا مع العيانين .. |
وياريت لو كان "تِخِفف" مع العيانين ـ لكن مجمل "تخففنا" الآن أصبح مع طلاب يفع تفصلنا عنهم عقود من الزمان ويختلف حس "التِخفف" لدينا عن حس الفكاهة لديهم.
وبيني وبينك كان مفروض أكون دكتور "أصلي" لولا أبوعلي (حسن ود البوب) وأخونا أبوعفان (عثمان حسن أحمد) ـ ربنا يطراه بالخير ـ فقد اتخذت قرار صبياني طائش في القرن المضي بالتحول عن تخصص "علمي" إلى تخصص "أدبي" في امتحان الشهادة السودانية وثلاثتنا جلوس في "قهوة الملتقى" وبدون أي مقدمات أو حيثيات على قول المستشار "أبو محمد فؤاد" .. فقط مزاج، ولم يعترض أحدهم ـ خاصة أبوعلي ـ على هذا الخيار النزق بل تبعني ابوعفان في ذلك.
أحد الأعمام ـ عليه رحمة الله ـ لم يخف خيبة أمله بعد أن زرته حال عودتي من البعثة فصاح ممتعضاً: يعني دكتور ورق؟؟!
.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
الاخ ابو محمد فؤاد
تهانينا بعيد ميلاد الابن محمد فؤاد وعقبال مائة شمعة وشمعة
وانشاء اللة انت تكون لسع بتعمل عيد ميلادك وماخليت الاحتفالات لمحمد براهو
ومرة ابنائي عملو لى عيد ميلاد ،وبعد ايام من الاحتفال زارنا فى الدوحة شقيقي محمد من الرياض فقالت له أبنتي مرام قبل ايام عملنا عيد ميلاد لبابا ، فقال ليها العيد الكم فقالت ليهو مرام العشرين
فقال لها باللة العشرين فى كم .
والبركة فيكم فى حاكم ام القوين .
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
نبدأ بالحبيب محمد فؤاد
ونقول ليه عقبال مية سنة وفي طريق ابو محمد فؤاد واحسن سائرون ان شاء الله.
بالمناسبة:
قالو بعد ما شاب دخلوه الكتاب
في اغسطس الماضي فوجئت بقميص منكالفن كلاين تمنه اربعمائة ريال بعد التخيض وكرافتة تمنها مئتين ريال ( لا ادري قبل ام بعد التخفيض ) من عيالي وقالو لي بمناسبة عيد ميلادك.
بعد تقديم ايات الشكر وابداء علامات الفرح والسرور قلت في نفسي : يا عيالي الحلوين لو انا بعمل زيكم كدا اظنكم ما كنت دخلتو مدارس ولا الجامعات البقت بالدولار قبل هبوطه وبالسوداني الآن.
الأخ العزيز صلاح هاشم السعيد
شكرا علي التهنئة وكل عام انت وكل من تحب بالف خير
أما أخوي الكاشف دكتور الورق
انت ما سمعت كلامي- قلت ليك امتحن ادبي عشان تجيب الدكترة في اللغة الانجليزية مع شطارتك ديك في الليتريتشر .
بالمناسبة في بحري الثانوية كنا معجبين بانجليزية عبد المحمود وكنا فاكرين عندو قرابة بخواجة.
مع كدا يسعدني الاعتقاد بان من نهلوا من علم العالم الجليل كثر وسوف يقدمون للوطن الكثير.
أخوي الباشمهندس طارق
قبل الميلاد .... بعد الميلاد .... كله راح وفضل التنايواني.
بالله هسه البيسبي زي زمان كله سكر وبس.
قالوا راس السنة في البحرين ساعات .. وود كرار عملها ايام. بس يا طارق ساق معاه العيال؟؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote:
من منا سكان حي الدناقلة لم يشاهد ويستمتع بتمارين فريق الصاروخ . . .
قام الأخ محمد احمد محمود ( شقر ) ومجموعة كبيرة من اصدقائه بتكوين فريق الصاروخ في الستينيات . . وفي اوائل السبعينات اندمج فريق الصاروخ مع فريق ( النداء ) بقيادة محمد بكري وصلاح زيادة وصلاح طه خليل وعبد الرحمن كرار وطارق ميرغني مصطفى وحمدتو وكمال سيد احمد ميرغني واخرين وتم تسمية الفريق باسم نداء الصاروخ وسرعان ما عاد اسم فريق الصاروخ وتم حذف اسم فريق النداء , كانت تقام تمارين فريق الصاروخ بالجانب الغربي الشمالي لملعب نادي الإتحاد البحراوي وكان فريق الإتحاد في تلك الفترة زاخر بعمالقة لاعبيه امثال عوض كوكا وكرومة وجمعة وابراهيم عجبنا وفيا وكمال خيري وغيرهم . .
كانت تمارين الصاروخ ثلاث مرات في الاسبوع ولعلاقة الأخ محمد احمد شقر بالوسط الرياضي لذلك كانت تمارين الصاروخ تذخر بالكثير من نجوم دوري الدرجة الاولى انذاك وكانت خانة الأخ شقر هي الثيردباك – ولكثرة عدد اللاعبين اللذين يحضرون تمارين الصاروخ كانت يتم تقسيمهم الى ثلاث مجموعات في دوري لمدة عشر دقائق والخروج بالمهزوم قبل الوقت المحدد . . اعداد كثيرة من ابناء حي الدناقلة كانت تاتي لمشاهدة التمارين ففي الجهة الشرقية كنا نجد العم المرحوم زيادة محمد احمد وعبد الرحمن كرار وقريب منهم المرحوم علي يوسف واخوانه ثم اولاد كدوك ثم اولاد الخليفة واولاد المرحوم نقد محمد نقد وبالجهة الجنوبية السر حمامة وجماعته وبالجهة الشمالية مبارك وحسن ابنعوف وجماعتهم واكثر ما يميز التمرين هو النكات والقفشات والتحديات التي تصاحب التمرين بين شقر والسر النور وافراد الهجوم الذي يلعب ضد فريق شقر والذي كان غالبا مايتكون من نجوم دوري الدرجة الاولى امثال عصام مصطفى ( عمو ) وعصام سليم ( ابو الجاز ) والمرحوم حيدر حسن والمرحوم شيخ ادريس كباشي ومرتضى مبارك وصبري الكجع والمرحوم فاروق محمد علي ( جيرة ) وعبد المقصود كرار ومنعم بلحة وكان يلعب في الوسط مرضي عطية ( افضل من يعطيك باص في المكان الذي تريده ) وعبد اللطيف محجوب ( تمساح ) وعبد القادر عثمان بادي وسيف شكشك وخط الدفاع بقيادة صفوت مصطفى وصلاح نصر الدين ( سامبو ) ويوسف زمبة وحارس مرمى فاروق منير ( العجوز ) وكان فريق شقر مكون من محمد عطية وعادل ولي حراس مرمى وشقر ثيردباك والسر النور استوبر وهاشم رحمة الله ( كابوس ) وعزالدين عثمان ( الضابط ) شخصي الضعيف باكات وكما ذكرت كان يحضر لتمارين الصاروخ عدد كبير من اللاعبين وعلي سبيل ممن اسعفتني الذاكرة بتذكرهم :-
محمد احمد محمود ( شقر )
السر النور ( ابو السرة )
المرحوم فاروق محمد علي ( الجيرة )
محجوب الفيل
مرضي عطية
كمال محمد علي
عامر ميرغني مصطفى
عبد المقصود كرار
حسن احمد محمود ( ابو التوم )
صلاح عوض دقيس
علي عوض دقيس
عبد اللطيف محجوب ( تمساح )
عبد القادر عثمان بادي
المرحوم شيخ ادريس كباشي
المرحوم شرف الجيلاني
صلاح زيادة
المرحوم شرف الجيلاني
المرحوم سامي عز الدين
السر المصباح ( مدافع الموردة الدولي ) كان صديق شخصي لشقر .
بشير حسين
هاشم عبد الكريم ( سمكة )
بدر الدين عبد الكريم هاشم ( العربي )
احمد البشير ( شكشك )
سيف الدين بشير
ساتي محمد ساتي
عبده مصطفى
عبد المنعم عوض ( بلحة )
كمال خيري
عبده خيري ( جندبة )
فتحي بلال
عز الدين النور
محمد النور ( تنقو )
احمد حبيب
محمود ابشر
عصام سليم ( ابو الجاز )
عصام مصطفى ( عمو )
صبري الكجع
عبد الحي جسور
صلاح حسن
عبد الرحمن الزغاوي
عادل ولي
عادل دهب
عز الدين عثمان ( الضابط )
هاشم رحمة الله ( كابوس )
محمد عطية
يوسف ابراهيم زمبة
صلاح نصر الدين ( سامبو )
صفوت مصطفى
سليمان فارس ( السد العالي )
مرتضى مبارك
كينجيز
المرحوم حيدر حسن
معتصم حسن
فتحي حسن
اسامة العطا الفضيل
هاشم العطا الفضيل
محمد عباس غالب
المرحوم عصام محمد خميس ( شقيق جمال الثعلب )
يوسف سيد يوسف ( كلين )
عثمان الزبير
محمد مصطفى ( شيش ) شقيق عصام مصطفى
كان يتمرن معنا المرحوم سليمان فارس ( السد العالي ) وقبل التمرين نبدا التهديف على المرمى وعلى ما اذكر ان سليمان فارس كان واقف معنا يوجهنا في كيفية التهديف والتركيز نحو المرمى وقد لاحظ ان الأخ صلاح كباشي يملك قدما قوية وقام بتوجيهه عدة مرات وكان تهديف صلاح بعيدا جدا عن المرمى وتضايق سليمان فارس منه وقال له بلهجته المصرية : يا صلاح شوف لك حاجة غير الكورة . . زعل صلاح كباشي وقال ليهو : انت منو القدم ليك الدعوة لتتمرن معانا وامشي ماتتمرن معانا . .
اتذكر احيانا كنت العب امام الأخ شقر اقوم بإفساد الهجمات قبل ان تصله الكورة وقبل التمرين نبهني بان العب شديد وكانت هناك كرة مشتركة بيني وبين شقر والمرحوم فاروق الجيرة وهو كان لاعب خطير وقام شقر يكورك فيني : شتت الكرة بعيد قمت شوتها في بطنه في مكان حساس وتعب جدا واخذ راحته بره الميدان وفي تلك اللحظة احرز عبد المقصود هدفا في فريقنا وعند دخول شقر قال لي : اقول ليك شتت الكرة تقوم تشوتا فيني . .
التحية للأخ العزيز الصديق ( شقر ) وهو من الشخصيات ذات الثقل الإجتماعي في حي الدناقلة حيث عرف بمواقفه الطيبة ومشاركاته للجميع افراحهم واتراحهم و يعتبر من ظرفاء مدينة بحري كما كان من من كبار مشجعي فريق الموردة وارتبط بعلاقات اجتماعية طيبة مع اسرة فريق الموردة وياريت توثقوا ليه لانه يستحق ذلك .
وكانت تقام تمارين الصاروخ عكس ايام تمارين فريق ( الردستار ) بقيادة المدرب بدر الدين هاشم ( العربي ) ومن بعده المدرب مرضي عطية وكان فريق الردستار يلعب في رابطة حي الدناقلة و تخصص في هزيمة فريق النجوم ( حلة ناس طارق ميرغني ) وكان رئيسه سيف الدين بغدادي شفاه الله وكابتنه فتحي ( سكج ) ومن لاعبيه عامر ميرغني وبكري غانا وقاسم غانا وقد تخرج من فريق الردستار اللاعب الخلوق الفنان عصام سليم جابر ( ابو الجاز) والذي انتقل الى فريق النجوم ثم الكوكب البحراوي ثم الهلال العاصمي كما قدم فريق الردستار العديد من اللاعبين للاندية البحراوية امثال صلاح نصر الدين ( سامبو ) والبلوم ( شقيق حافظ عبيد ) للتذكار وحسن عبد المتعال للكفاح ومحمد حسن نمر ومحمد حسن زلط للإتحاد –وكان اللاعب المبرز يسمح له بالتمارين في فريق الصاروخ ومن لاعبي فريق الردستار اذكر :-
عز الدين عثمان احمد ( الضابط )
صفوت مصطفى علي
صالح صديق
بشير هواري
صلاح كباشي
احمد عبد العال
عبد المنعم عبد الله عبد الماجد
حاتم محمد عبد الله ( حنكول )
عادل عبد الله عبد الماجد ( منقريتا )
محمد حسن نمر
محمود حنفي
صلاح نصر الدين ( سامبو )
عماد نصر الدين ( دلش )
صلاح محمد علي
محمد حسن ( زلط )
عصام محمد صالح ( الجمصي )
عاطف عبد العزيز محمد داوؤد ( داؤود )
زهير منير
علي ابو اليسر مدني
علي عوض دقيس
مصطفى عوض دقيس
عبد الهادي عوض دقيس
علي محجوب
حسن عبد المتعال
البلوم ( شقيق حافظ عبيد )
جلال علي محمد الحسن
يوسف سيد يوسف ( كلين )
عصام سليم جابر
هاشم محمد الحاج
عماد عبد الله ( عجوز )
محمد عطية
احمد عبد القادر
طراوة وحلاوة يابحري . . فيك شفت كل جديد . . وعشنا ايام حلوة جميلة مع اخوة كرام منهم من انتقل الى رحمة ربه لهم الرحمة جميعا . . وتبقى ذكرى تلك الايام خالدة ولاتنسى محفورة في الوجدان وياترى ماهي اخبار تلك الاسماء المذكورة في هذا الموضوع ومعذرة لمن فاتنا ذكر اسمائهم وازجي خالص السلام للأخ العزيز المهندس طارق ميرغني ولصاحب هذا البيت البحراوي كمال كرار واركان حربه حسن طه وعبد الرازق سعيد وعبد الكريم احمد وناهد بشير والسلام عليكم ورحمة الله وبركاته .
عز الدين عثمان احمد - جدة
|
فائق الشكر والتقدير للأخ عز الدين عثمان على هذه المداخلة الجميلة والتي تضمنت ذكريات رياضية محفورة في الذاكرة والتي عرفنا من خلالها بدايات بعض نجوم كرة القدم في مدينة بحري والسودان عموماً .
نترحم على أرواح من رحل منهم ونسأل الله لهم المغفرة ، ونتمنى الصحة والعافية للذين ما زالوا يواصلون مسيرة الحياة مبدعين في مجالاتها المختلفة .
أرجو أن لا تبخل علينا أخي عز الدبن بمثل هذه المداخلات الرائعة .
ولك فائق تحياتي ؛؛
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي عز الدين عثمان كل عام وانت واسرتك الكريمة بالف خير ووالله مشتاقين وسائلين عنك.
والله ذكرتنا ايام محفورة في الذاكرة في حي ما زالت العلاقات مستمره لان الكل كانوا كاسرة واحدة .
الاخ والصديق شقر من الشخصيات المرموقة في حي الدناقله وبالفعل يستحق التوثيق لاخلاصة للحي .وطبعا المدهش في مسيرته الرياضية انه الوحيد في كل تلك
المنطقةالذي كان كان موردابيا.
ارجو من موثقنا الكبير الاخ عماد عثمان ان يتحفنا عن تلك الشخصية الجميله" شقر"
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
| Quote: قلنا مع السنه الجديده دى طالما سيد البيت غائب ناخد لينا معاهو طشه ولما يرجع نرجع معاهو.. |
يعنى ياعبد الكريم نظام لو غاب القط العب يافار
انا افتكرتك ملازم الفراش فى ام القيوين وتوزع فى الشاى ونحلف على الناس ينزلوا ياكلوا أتاريك انت طاشي .
طيب انت قلت تاخذ ليك طشة مع سيد البيت الاخت ناهد وين ليها يومين ماظاهرة عندها ضيوف ولاشنو
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
Quote: يعنى ياعبد الكريم نظام لو غاب القط العب يافار
انا افتكرتك ملازم الفراش فى ام القيوين وتوزع فى الشاى ونحلف على الناس ينزلوا ياكلوا أتاريك انت طاشي .
طيب انت قلت تاخذ ليك طشة مع سيد البيت الاخت ناهد وين ليها يومين ماظاهرة عندها ضيوف ولاشنو |
قاااعدة..... قعدة نص كم.... زى قعدة الزول لما يركب الحافلة ويلقاها مليانة ويقعد فى الكرسى
المطرف البينزل وبيطلع داك مع زول قاعد فيه اصلا ...تكون قاعد لاعارف تقبل على الناس الوراء
لا تعرف تقبل على السواق .....لا تعرف تقبل على الشباك اليمين ...
المشكلة يامعاوية اخوى انه حافلتكم ماشة وجاية فى الخط فاضية وكمسارى مافيها ...ونص الركاب نايمين
غايتوا انا خاته شنطتى فى الكنبة الاخيرة (للتسدح )اللى هو (النوم)ولما تجى محطتى الكزونى
يانزلت........ ياكمان ناس البيت ناولونى الشنطة وارجع الت واعجن هنا ....
اخونا كمال
بالغت يعنى (غيابك طال )
اخوى عزالدين عثمان جاياك للرد ..
اخونا الماكيكى ...ماتقيف بالله اكتب بس
اخونا معاوية ...مرة مرة الكزنا صحينا... يديك العافية
اخونا طارق خليتنا وبقيت مع ابو امنة حامد (ونعم اللقاء)
اخونا رزقة ...كفاك الحجاج رجعوا اظهر وبان
اخونا الدكتور عبدالمحمود ...جاياك ارد على مداخلتك
اخوانا الموسميين حسن وقناوى والعجب
ماتطولوا ....بالله ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: يعنى ياعبد الكريم نظام لو غاب القط العب يافار |
| Quote: انا افتكرتك ملازم الفراش فى ام القيوين وتوزع فى الشاى ونحلف على الناس ينزلوا ياكلوا أتاريك انت طاشي. طيب انت قلت تاخذ ليك طشة مع سيد البيت الاخت ناهد وين ليها يومين ماظاهرة عندها ضيوف ولاشنو |
العزيز معاويه
** القط عرفناهو بس ماحددت نوع الفار (الفيران أنواع) وإنت عارف وأنا عارف..
** إنت من زمن الناس بتلازم الفراش بقت الشغله وينتهي العزاء بإنتهاء مراسم الدفن وكل قرد يطلع شجرتو ,, بعدين في الخليج إنت عارف أنو الجثمان بتستلموا البلديه وهي بتقوم بكل الاجراءات ,, إنت مفتكر الموضوع زى ناس بحرى تصحى الجماعه عشان يمشوا يحفرو وواحد فيهم يسلم بطاقتو لمن يجيبو شهادة الوفاه ,, واولاد الحله يمشو يظبتوالصيوان ,, وجماعه بتتشاور عشان يشوفو الناقص شنو في بيت العزاء ,, ونقة الجماعه عند الدفن في المقابر لإنزال الجثمان في ود اللحد..
** يعني حتي البكاء عندنا في بحرى مجيهنو خليك من الافراح..
ودام الود بيننا.
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: انا افتكرتك ملازم الفراش فى ام القيوين وتوزع فى الشاى ونحلف على الناس ينزلوا ياكلوا أتاريك انت طاشي .
|
الاخ الاستاذ معاوية محمد الحسن
تحياتي
ابو محمد فؤاد عارف السكة عديل وما بيطش ودروبه كلها ما شاء الله بتوصل بدون طشيان.
بعدين ما شايفك في بوست المغتربين ..... لعل المانع خير.
أعزائي ناس الطراوة
بالامس تحدثت عن قميص كالفن كلاين
بعد ان وضعت الاصبع علي جنب من الكيبورد افاجأ بتلفون من الحبيب المجتبي ابن حسن البوب وهو يأمر : لا تنسي يا بابا هدية عيد ميلادي .
اليوم الموافق الرابع من شهر ينائر 2009 بلغ الشقي الحبيب السابعة من عمره بالتمام والكمال.
طلبه هو : دباب يا بابا. الدباب بلغة الخليجيين الموتر .
هسه كيف ورايكم شنو : اشتري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كمال ود الكرار : ما دام فيها بونص .. طيب ما تشحن الدباب وتخلصنا.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
Quote: بعد ان وضعت الاصبع علي جنب من الكيبورد افاجأ بتلفون من الحبيب المجتبي ابن حسن البوب وهو يأمر : لا تنسي يا بابا هدية عيد ميلادي .
اليوم الموافق الرابع من شهر ينائر 2009 بلغ الشقي الحبيب السابعة من عمره بالتمام والكمال.
طلبه هو : دباب يا بابا. الدباب بلغة الخليجيين الموتر . |
| Quote: هسه كيف ورايكم شنو : اشتري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟[/B |
]
| Quote: كمال ود الكرار : ما دام فيها بونص .. طيب ما تشحن الدباب وتخلصنا |
ودالبوب
** كل سنه أنت والمجتبي بخير وعقبال الشمعه الميه..
*** إذا إشتريت ,, يرجي تكليف شركه بحراسة الدباب ,, ومراقبة صاحب الدباب..
**** مابيغلي علي ود ود البوب الدباب ,, بس البونص إتلحس قبل إستلامو في سوق الدهب والفضل شالو المقاول..
(وكل سنه وناس الطراوه بخير ومتفائلين بــ 2009 )
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
| Quote: إنت من زمن الناس بتلازم الفراش بقت الشغله وينتهي العزاء بإنتهاء مراسم الدفن وكل قرد يطلع شجرتو ,, بعدين في الخليج إنت عارف أنو الجثمان بتستلموا البلديه وهي بتقوم بكل الاجراءات ,, إنت مفتكر الموضوع زى ناس بحرى |
واللة ياعبد الكريم لو البكاء مازى بكاء ناس بحري الصيوان والجرائد وونسة الكورة وعلى هينو بهنا والكجر بهناك حقو ذاتو مايسموه بكاء .
قبل فترة ووفى عزاء فى بحري والبكاء حار جاءت واحدة داعية من انصار السنة وعملت محاضرة للنسوان عن الصبر وانوالناس ماتبكي والنسوان متلمين حولهاويسمعوا فى المحاضرة ويهزوا فى رؤوسهن كانهن مقتنعات بالكلام وفجاء جاء شافع داخل للنسوان وقال ليهم هى هى خالتى فلانة جاءت وهى ابنة المرحوم جاءت من الخليج للبكاء فما كان من نسوان المحاضرة الا الجري نحو باب الشارع والبكاء والثكلى وخلو الداعية قاعدة براها وومحاضرتها راحت شمار فى مرقة .
وزى ماقال الشاعر هاشم صديق
شيلوا الفاتحة وأقروا السورة
وابدوا الونسة وناقشوا الكورة
خلوا بلدنا تموت بالسكتة
وحللوا سانتو واعظم هجمة واروع لقطة
ولو دايرين الماتم يبقي محو أمية
وتبقى الونسة معاها قضية
ممكن نخلق من الكورة سؤال يتسطر فى السبورة
نسيب الكلفة ونسال دغري
مين الأحرف ؟سانتو الاسطي ولا السلطة
صحي ياكريمو منو الاحرف ؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا كمال البونس لهطوا " الدفار" بس ما قادر تقول عشان بت عمك .
عرفت قصة الدفار دي ولا احكي ليك.
طيب بتاع الدفار جاتو وليه عايزه مشوار واتفقت معاهو بي سته الف جنيه وطوالي طلعت القروش .
بعد ما عمك وافق بعد ما شاف القروش رفض.
الوليه " التي لا تنقطع عن الولوله خاصة لو حرمت من البونص" مشت تشوف دفار غيرو .
لمن لفت بالناصيه لحقا الراجل بتاع الدفار الاول.
يا حاجه جيبي القروش.
يا ولدي هسع ما ابيت.
لكن يا حاجه تديني القروش قدام ده ( مشيرا الي الدفار).
هسع يكون عايز بطاريه وجوز لساتك وشنو داك ما بعرفو ...!!!
فانت يا ابو كمال غلطان توري الدفار "الضحاكات" .
اخي عبد الكريم الريسين الكبيره دي برضو الجثمان بيستلموا ناس البلديه؟انا قايل بيستلموه ناس الجنه.
اخي حسن طه كل سنه وولي العهد بخير وسنه حلوه يا جميل.... مش انت ...هو..!!
بعدين يا حسن دباب مره واحده قول ليهو يا مفتري زمان نحن لمن يدوك قرش عشان تتعشي عند الحلواني تغير مشيتك ..." عرفت الحلواني"
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
لوووووووووووول يا طارق..
يا حسن ود البوب.. عقبال ما تشوف أحفاده...
يا د. عبد المحمود الظاهر وراء الأكمة ما وراه..
شنو قصة زي أبوه دي؟؟ ود البوب أتلطش عجلة ولا ترتارة قبل كده؟؟؟
عبدالكريم يا أبا محمد فؤاد... البوست ده فرايحي... شنو فراش...
وحنجرة.. واربعين ويوم الغسيل؟؟!!! خضيتنا يا أخي.. بالمناسبة
الفراش ذاتو قالوا بقى أفتراضي... يعني كل واحد فاتح اللاب توب
وفاتح صفحة الشاي أو القهوة... وكل 10 دقائق يشيل الفاتحة...
ويضغط space متمنيا أن يوسع للمرحوم في اسبيسه...وثالث يوم
يعمل باك آب backup ويكون كده الفراش اترفع...أنت وين يا عبد الكريم
زمان الفراش الفيه شكل على مساند الكراسي... وشاي الصباح المقنن
أنتهى إلى غير رجعة... حليلك يا عبدالكريم ويا ود عمة طارق...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote:
أخوانى الأماجد أبناء مدينة بحرى الهادئة الوريفة
لازلت متابعا هذا البوست ولكن بالمتاوقة
وقفت كثيرا متأملا تلك الأيام التى خلت وأنا اتابع رصد بعض الأخوان لاحتفالات رأس السنة وأعياد الميلاد بفترة السبعينيات من القرن الماضى وعلى حد قول اخونا عبدالكريم ان العاصمة بقت زى دكااكين الأقاليم يتوقف نشاطها عند الساعة العاشرة مساءا، طبعا نحن لازلنا نتذكر التحضير لهذه الحفلات منذ وقت كاف قبل يوم الاحتفال، نجد ان كافة الشوارع تضج بالإعلانات عن الحفلات مثلا، الأستاذ/ محمد الأمين فى حفل الكريسماس بالقرين فيلدج، الموسيقار محمد وردى يحي حفل راس السنة بفندق الواحة، فرقة وليم أندرية،
وصالة جوردون ميوزيك هول، الكريزى هورس، وكازينو حماد العائم، كابلى بكافتيريا السكة حديد ( لاحظ هذه صالات للرقص والغناء وتمضية اوقات سعيدة كانت بالخرطوم فى ذلك الزمن الجميل).
وكانت الناس سعيدة تلهو وتمرح وتسعد حتى شروق شمس العام الجديد ليس هناك ما يقيد حركتهم او يكبل عزيمتهم من المضى فى الإستمتاع بالحياة وذلك كله فى حدود القانون والمسؤولية- كما لايفوتنى أن انسى عندما الواحد فينا كان يطالع صحيفتى الايام والصحافة وخصوصا صفحة أين تسهر هذا المساء – مثلا سينما الصافية- تعرض ولااول مرة بالسودان فيلم الفراش ل ديستان هوفمان وستيف ماكوين، اي والله الفيلم كان يعرض فى هوليود ولندن والقاهرة والخرطوم فى ذات الوقت.عجبا اصبحنا نحلم بالأيام التى مضت مع ان الأحلام تتوافق مع مالم ياتى من ايام
سيف الدين نجار
--------------------------------------------------------------------------------
|
الرسالة أعلاه من الأخ/ سيف الدين نجار وهي ببريدي منذ نهاية العام الفائت ولم أرها إلا الآن.. عليه أعتذر من الأخ/ سيف على التأخير الغير مقصود
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
| Quote: قاااعدة..... قعدة نص كم.... زى قعدة الزول لما يركب الحافلة ويلقاها مليانة ويقعد فى الكرسى المطرف البينزل وبيطلع داك مع زول قاعد فيه اصلا ...تكون قاعد لاعارف تقبل على الناس الوراء لا تعرف تقبل على السواق .....لا تعرف تقبل على الشباك اليمين ... |
بت بشير الطيب
** بتعرفي كرسي وشكراً في الحافله- طبعاً دا آخر كرسى في الحافله الجماعه الكواكب بيحبو يركبو فيهو دائماً وخاصةً لو الحافله مُتحركه من الحي وطبعاً الكمسارى بيبدأ من الجماعه الراكبين في الاول وفي زمن الظرف والاخلاق والجوز 3 فرد والدسته 18 تلقي الواحد دفع لنص الحافله والجماعه الفي الكراسى الورا شكراً يأأستاذ ,, شكراً ياعمو ,, شكراً ياخالو - أها عرفتي لي بيقول عليه كرسى وشكراً ..
*** هسه قال ليك في ظل الاوضاع المُرتبطه بتوجهنا اللاحضارى الواحد لو ركبت معاهو مرتو يعمل ليها عبدالفتاح حمد ويعمل كانو ماشايفا....
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
د. إبراهيم ود العجب
** كشكش لينا ابو النور دا خليهو يفتح السحاره ,, آخر حاجه وصلتنا منو والله نسيناها وماعارفين انو وصلنا الجيلي ,,, شمبات ,,, واوستى ,,, ودرملي ..
** ماتطول الغيبه...
ودام الود بيننا..
(ابو محمد فؤاد)
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بالله يا دكتور عبد المحمود اهم شيء في العام الجديد تكلمنا عن الانسرق من حسن طه.لانو عامل تفتيحه
للآخر.
سيف الدين النجار البركه في الشوفه وكل سنه وانت طيب وذكرتنا زمن جميل بحق.
| Quote: حليلك يا عبدالكريم ويا ود عمة طارق |
يا عبد الكريم فوتت دي كيف ؟... بالله شوف لي ود كرار ده قاصد شنو وتعال لي باللفه الجايه؟؟؟
يا عبد الكريم سمعت بي نكتة البص السياحي هي قديمه لكن بالمناسبه لازم اقولا.
بعد ما عمك ركب البص السياحي وجاهو الكمساري طلع متين جنيه .
الكمساري: يا عمك التذكره خمسميه يا معلم ما متين ؟
- ليه يا ولدي
_ لانو بص سياحي
وهاك يا غلاط في النهايه عمك قرر يشيل قروشو وينزل وهو نازل مانسي يودع الركاب قائلا :
ان شاء الله البلد عجبتكم ؟؟؟
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: عبدالمحمود محمد عبدالرحمن)
|
| Quote: حليلك يا عبدالكريم ويا ود عمة طارق... |
| Quote: [B]يا عبد الكريم فوتت دي كيف ؟... بالله شوف لي ود كرار ده قاصد شنو وتعال لي باللفه الجايه؟؟؟ |
ياإبن خالي
فوتها بمزاجى وقلت هم إحتمالين والاتنين بيبدو برضو بالباء:-
** بحرين..
مشوار مطرشق..
** بونص..
مامشى الحال وأقل من المتوقع..
## لذلك تأثر الكيبورد ومن يستعمله بهذه الحاله الضبابيه التي تؤدى فى أغلب الاحيان لتحويل الخال الى عمه والعمه الي خال وهي حاله جديده ومن أحدث إكتشافات العام الجديد 2009 وفى روايه بحراويه (لاحظ برضو بتبدأ بحرف الباء) ان هذه الحال في اول ظهور لها علمياً إنطبقت علي صاحب هذا البيت..
** في إنتظار المزيد من الدراسات ولقدسُميت (بالحاله البائيه) وفي إنتظار الاسم العلمى..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
Quote: لسوء الحظ سطا لص على دراجة أبوعلي ذات يوم وانطلق بها في غمضة عين من أمام المكتبة الأمريكية بشارع القصر لا يلوي على شيء ولم تفلح الجهود في تعقبه "مخلفا في قلب أبوعلي حسرة" ـ حتى اليوم.
. |
أعزائي المشاكس ود ميرغني وصاحب رحلة البحرين المطرشقة ود كرار
والراوي الدكتور
اولا شكرا للراوي الذي لخص القصة ووضعني دون حق في فئة البرجوازية وهو شرف لا ادعيه بل كنت اتمناه ولم يتحقق للاسف حتي الآن رغم الغربة الطويلة بسبب مصاريف الجامعات التي اصبحت بالدولارات قبل هبوط قيمتها.
وثانيا لم تكن العجلة جديدة لنج كما ذكر الراوي وان كانت بمقاييس ذاك الزمان والأسعار المتداولة وقيمتها الشرائية تعتبر كما لو كانت جديدة لنج . صحيح كانت سكند هاند ولكن كالجديدة لانها عند شرائها وبعد الكشف عليها بالليزر والكترونيا لم تكن قد استخدمت الا كيلومترات قليلة.
واتماما للقصة
فقد اشتراها الوالد - اطال الله عمره - بمبلغ ستة جنيهات ونصف وكان الجنيه في ذاك الزمن الجميل يتحدث عن قوة السودان الاقتصادية حيث كان يساوي ثلاثة دولارات وثلث الدولار .( يعني حتي انكل توم ما كان يقدر يعيش معانا ) .
بعد ان فكر الوالد وقدر بان شراء عجلة لي للذهاب بها من الشعبية الي بحري الثانوية سوف يحقق كثيرا من تخفيض المصاريف التي كانت تمنح لي لركوب بص الكندة ذهابا وعودة ، قرر شراء عجلة لي للذهاب بها الي المدرسة وليس للفسحة طبعا.
في مساء احد الايام الجميلة
كانت الخطة هو الذهاب للمركز الثقافي الامريكي بشارع القصر ( شفت كيف يا طارق كنا مثقفاتية ) وتبديل الكتب فقط ودخول سينما كلوزيوم .
ذهبنا الي المركز الثقافي ووضعنا العجلات وكانت عجلتي بالنسبة لعجلة المرحوم يكن كالجديدة .
أخذنا دقائق فقط في تبديل الكتب وعند خروجنا وجدنا عجلة يكن كما هي واقفة وكانت قديمة جدا وعجلتي ليس لها ريح.
واعترف بغلطتي لاني لم ( اسكرها بالمفتاح رغم وجوده ) .
ذهبنا لبوليس السينما لنحكي الحكاية .
سالني : هل كنت قافلها
اجبت : لا
سالني : هل حافظ نمرتها واول مرة اعرف ان العجلة ليها نمرة ويبدو هو كان قاصد نمرة الشاسيه.
قلت : لا.
قال: لا استطيع ان اعمل لك شيئا واذهب وبلغ في المديرية.
طرشق الفيلم .
اصبح الوقت ليلا وترادفت مع يكن في عجلته القديمة التي لم يكن بها نور واتجهنا صوب المديرية للتبليغ عن الحادث المحزن سالكين طريق سوق الخضار عكس الاتجاه حيث كان السير في الاتجاه المضاد.
هنا اوقفنا بوليس ( شرطي بلغة اليوم ) وافاد بمخالفتنا لثلاث من مواد قانون الحركة وهي :
الترديف وكان ممنوعا
وعدم وجود نور بالعجلة
والسير في الاتجاه المعاكس.
وبعد تحنيث وتضامنا مع موقف السرقة بعد معرفته بها اطلق سراحنا بعد الامر بعدم استخدام العجلة.
اطلق سراحنا مشكورا بعد ان علم بانني من نفس قبيلته
وغيرت الراي وطلبت من المرحوم يكن الذهاب فورا الي بحري ولكن مترادفين.
ذهبنا الي البيت
وكالعادة احضرت الحاجة الوالدة - اطال الله عمرها - الشاي بالقرقوش ( القرقوش يا ود كرار احسن من كيك استار بوكس ) .
الكبابي في مكانها حتي برد الشاي
عرف الوالد القصة بعد ان حكيتها له وانا ارتجف .
كل ما قاله بعد ذلك : ستذهب الي المدرسة برجليك وخرج .
هنا انفتحت الاسارير وانفتحت الشهية للشاي .
وما زالت الحسرة _ كما قال الراوي - مستمرة علما بانني استخدمتها شهرين وستة عشرا يومكا فقط .
يعني لسه ما كنت ضقت حلاوتها .
وهي من ماركة الرالي الشهيرة.
هذه هي القصة بالكامل وعذرا للاطالة.
دمتم لدائم الود ود البوب.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: نسال من المختفين من زمن ناس
التلب ونزار عتيق وقناوي وغيرهم .... |
يا ناس بحري
السلام عليكم
ووالله رغم الغياب لكن متابع البوست
وما قادر أدخل لإنشغالي بمرض الوالدة
حفظها الله
وهي تحمل عناد آل قناوي بالتمام والكمال
يعني عندها مشكلة نزيف في الشبكية
ناتجة من السكري
ولينا عدة سنوات نحاول إقناعها بالليزر
وفشلت كل محاولاتنا
لأنو كل ما نقنعا يجي واحد ولا واحدة
يقول ليها والله فلان داك الليزر عماهو
وعِلاَّن داك الليزر كتلوا
المهم نحنا في خضم هذه المناوشات
حتى اجازتي الاخيرة بالخرطوم
حيث استخدمت فيها آخر أسلحتي مع الوالدة
يعني نظام لو بتعزِّيني وكدة
وكلام من النوع ده لمن راسا جا
واقتنعت تعمل الليزر
وعندها كانت المفاجاة .........
على مدى تلاتة أسابيع تاجَّلت العملية
ولأسباب مختلفة
مرة الجهاز بايظ ومرة في مشكلة في شنو كدة ما عارف
وآخر حاجة أمبارح بعد قلنا كل الأمور تمام
قالوا الدكتور عَيَّان عشان كدة ما حيجي
(بالله شفتوا ليكم دكتور بعيا؟)
وتأجَّلت العملية
بالله الحاجة سِرَّها ما باَتِع؟؟؟؟؟؟؟؟؟؟؟؟؟
(طبعا هي بتقول إنها بت فقرا وكدة)
وده هو سبب الغياب الطويل يا أهل الخير
وشكرا لسؤالكم ونحنا ما بنستاهل
كل هذا الإهتمام
لكن أسألكم بالله
أن تدعوا للوالدة الحاجة: زهرة نصر قناوي
بالشفاء شفاء ًعاجلاً غير آجل
آميييييييييييييييييييييييييين
وكل سنة وانتو طيبين
يا ناس بحري يا حلوين
| |
|
|
|
|
|
|
| |
عبدالمحمود محمد عبدالرحمن
عبدالكريم أحمد الامين
ناهد بشير الطيب
Kamal Karrar
معاوية محمد الحسن
حسن طه محمد
Ali Sirelkhatim
صلاح هاشم السعيد
ابراهيم قناوي
فيس بوك
تويتر
انستقرام
يوتيوب
بنتيريست