ما هو المعيار ؟

Quote: المحاكمة الحاصلة هنا يا تيسير.. هي محاكمة المرأة لأختها المرأة بمعايير صنعها الرجل.. يعني تطبيق ممتاز للذهنية البطرياركية.. فالعادات و التقاليد و منظومة الأخلاق السودانية صنعتها الذهنية البطرياركية الذكورية يا تيسير.. يعني الرجل هو البحدد شنو المقبول من المرأة و شنو المرفوض.. مش المرأة هي البتحدد..و لو في مؤمنات طيبات لازلن يستمرأن عبوديتهن للذهنية البطرياركية فهن مخيرات.. لكن كمان ما يقمعن كل من تحاول الخروج من دائرة العبودية.. البطرياركية السودانية شارع لإتجاه واحد في التعامل مع المرأة.. يعني كل فهمها انها آلة جنسية..و من هنا تم تفريخ الكثير من ادوات المحاكمة.. يعني أي شوية بوح ..طوالي نرجع لتروميتر الجنس (السواهو الرجل مش المرأة).. يعني لمن تجي بعض الأخوات هنا تقول لينا البصل اسقاط جنسي.. فده بالنسبة لي أنا شخصيا محمد النور كبر.. هو اعادة انتاج سيئة و مفجعة للبطرياركية..يعني انتو مركبين مكنة رجال بدون ما تشعرن..!

Quote: الكتابة موضوع النقاش.. ما بتكتل زول..و لم تنقص من حق زول.. ولا بتسئ لزول.. اللهم الإ كن الناس قاعدة على الهبشة ساكت..و القعاد على الهبشة بيعني انو الناس ما واثقة من حاجاتها.. الناس البتصنف هنا ديل ناس كويسة و التانيين كعبين.. انما هي محاولة رخيصة لإرضاء فحولية البطرياركية.. يعني البطرياركية هي المتحكم في الأمور.. و دي وضعية بنقول حقو الناس تمرق منها شوية.. المرأة فلتكن كويسة بحاجاتها هي مش بي حاجات الآخر(الرجل) ..

الكتابة المبتذلة بالمناسبة يا أستاذ كبر ما أذية لسمعتي أنا بشكل شخصي (ولي باقي الصديقات) لأنو لا يمكن أختزل نفسي بكل ما أحمل وأفعل وأنتج في الحياة دي في مجرد شخص يتأثر بسوء الحولو و إسفيرياً كمان اريتو كان واقعياً ولا يمكن أنقل الأذى دا زاتو لأرض الواقع اللي معاييرو برضو بتختلف عن معايير الإسفيرأنا هنا شخصية إسفيرية تكتب في موقع إسفيري وبتحاول تدفع أذى إسفيري إخترت الموقع دوناً عن مواقع تانية كتيرة تتفاوت ما بين المثالي للغاية والمبتذل للغاية لأنو الطابع العام هنا الوسطية لا إفراط في الإنضباط ولا تفريط في حدوده الدنيا حدوده الدنيا دي ممكن تعتبرها الدرجة البعد الأخيرة في السلم المعياري ولأنو نوعية الكتابة النسائية كانت جاذبة ويتكرس لصورة مختلفة بعدين يا أستاذ كبر عندك نحن المعترضات ديل أقل واحدة فينا ليها في المكان دا 5 سنوات قرينا فيها ما قرينا ومر بينا ما مر من مواضيع قد تكون بمعايير آخرين لا تليق بل وفعلاً بنلقى ناس إعترضت عليها تفتكر شنو الخلانا نتكلم ونعترض المرة دي بل ونتفق كلنا دون إستثناء رغم إختلاف منطلقاتنا في إنو البيحصل دا غلط نكون يا ربي فعلاً غيرانين منها كما يُشاع وإنها محض حركات نسوانية؟
عندك أنا القدامك دي ما حصل من جيت المكان دا شاركت في كتابة ضد حرية التعبير على الإطلاق لا في الدين في المواضيع من شاكلة صراع الأديان ووجود الله والرسوم المسيئة لا في الكتابة الأدبية التي قد يصنفها البعض كإباحية يا قولهم وفي هذا يتفاوت ولا الكتابة المجردة ساي بمعني ركيكة وفارغة أو بذيئة ولا كتابة مكربة ومتماسكة ما شغلتي ولا بيخصني كل زول يكتب الدايرو
أنا إتولدت وإتربيت وعشت في مدينة يا أستاذ كبر علمتني المعنى الحقيقي للديموقراطية وإحترام الآخر
تمشي في الشارع تلقى الجامع والكنيسة ومعبد اليهود ومعبد الهندوس والأبيض والأسود وخاتف اللونين واللسان العربي والأفريقي والآسيوي والأوروبي تلقى البار وبنات الليل المرخصات بالقانون وغير المرخصات "وديل بيكشوهم عشان بدون ترخيص ما عشان البيعملو فيهو شفتا كيف" تلقى اللابسة شورت واللابسة سكيرت فوق الركبة ولا تحتها واللابسة بنطلون والمنقبة والمحجبة ساي عمرو ما في زول وقف زول عشان دينو شنو ولا لونو شنو ولا لابس شنو عشت التنوع دا من أنا طفلة وبقى جزء من تكويني لكن التعدد والتنوع دا برضو علمني إنو الكوكتيل الفوق دا كلو ممكن يتفق على رأي موحد حول where to do what أعمل الدايرو لكن في المكان المخصص لذلك الكون دا ماشي كدا يا أستاذ كبر لو إنت داير تغيرو أدينا خبر ..


ــــــــــ
أطول رد أكتبو في حياتي
حقو تاني سنة لي قدام ما أكتب حرف