الى خريجى معهد الكليات التكنولوجية.......أجمعوا هنــــــا.....

Quote: الأخ / حيدر المحترم السلام عليكم ، أشكرك على نشر الرسالة 0 الصورة التى نشرها الأخ/ أسعد إبراهيم أعتقد أنني أعرف بعض الناس اللي فيها 0 أعتقد أنها كانت رحلة لتريعة البجا عام 1982 م 0 فيها أستاذ إسمو عبدالقيوم كان يدرس اللغة الفرنسية لناس السكرتاريه 0 المدنقرة وإيدها فى الموية (مش أيدها فى النار) دى واحده كان إسمها حرم جميل من بنات الدلنج – خريجة سكرتاريه بعد عام التجميد يعني 84م 0 والواقفة بجانب أستاذ عبدالقيوم ديك إسمها عرفه من بنات الأبيض إتخرجت عام 82 من السكرتاريه أيضاً وأعتقد فى علوية التوم برضو من بنات رفاعة إتخرجت عام 85 ، وبعدين فى محمد محي الدين وأظن عزيزة الكرسني والباقين ما عرفتهم 0 خالد كودي شايفو مشارك ودا شيء عظيم 0 خالد كان ورانا وأخوه إسماعيل كودي برضو كان ورانا وخالد كودي كان دايماً يجلس تحت النيمة الثالثة وإنت ماشي على إتجاه شيد الفنون بعد ما تفوت باب مكتبة الفنون الفاتح على داخليات الـ أس تي أس وأنت متجه الى ستديو التلوين ومعاهو كانت تقف إيزيس بنت النور عثمان أبكر الشاعر الفطحل 0 الفاضل أبو شنقره – شايف سيرتو جات - كان فى التجارة (بنوك) دفعتنا يسكن فى الحلة 0 أيام الإمتحانات التى كانت تمتد زهاء الشهر يلبس جلابية واحدة لا يغيرها 0 كان مرضان قراية ، بعد الإمتحانات على طول تضربو ملاريا 0 الزمن داك كان الناس شوية وكل طلاب الكليات يعرفو بعض 0 يعني أظن طلاب الجناح الغربي زمان كلهم كانوا أقل من طلاب دفعة واحده الآن 0 شايف ناس البي تك ماشاء الله كتار هنا 0 ديل نحن حضرنا بداية دخولهم للمعهد فى الهندسية 0 كان فى حاجة فى الهندسية إسمها المعلمين الفنيين – ديل إنقرضوا سنة 84 م ، آخر دفعة تخرجت منهم ذلك العام 0 كان الغرض منهم أن يسدو النقص والحاجة للمدرسين الفنيين فى المدارس الفنية آنذاك0 عبدالباقي شحطو دا مصاغرني فى كل حته 0 فى المعهد كان معاي مشيت المركز الثقافي الفرنسي لقيتو قدامي جيت البورد لقيتو بيكتب 0 هو وواحد صاحبو أسمو خالد سندباد كان ساكن فى الـ أس تي أس 0 إلتحق بالمركز الثقافي الفرنسي لأنو شحطو دا زول حريف جداً ، كان بجانب الفنون بيدرس فى الفرع قانون 0 وناس قانون فى الفرع عندهم مذكرة مصطلحات قانونية باللغة الفرنسية 0 فمعظمهم كانوا بيدرسوا فرنساوي بالمركز الثقافي الفرنسي 0 فى الحقيقة الكلام عن المعهد بقدر ما هو جميل بقدر ما يؤجج ألمى لأني فقدت زوجتي وزميلتي وحبيبتي ورفيقي وصديقتي 0 ولك يا أخ / حيدر كل شكري لروعتك ومساعدتك لي لنشر هذه الكلمات 0 ولأخونا الرائع الآخر صديق صاحب الفكرة 0 إذا حيدر سمح لي بنشر موضوع آخر سيكون عن حفلة وردي بمناسبة إنشاء الإتحاد العام لطلاب المعهد عام 1982 م على ما أظن "bush med"