ما أحلى ساعات اللقاء...

Quote: الله يرحمك يا عبدالمنعم حسيب ، لما كان يقول عيووووونك كانوا في عيوني تتبخر كل النظارات الطبيه والشمسية وتذوب العدسات اللاصقه وتكاد ترى ليس (إنسان) العين وحسب بل القرنيه والقزحيه والعصب البصري و الأهداب المسبله والجفون الناعسه كلها تلامس عيونك وقلبك في رحلة رؤية تمتد من الفؤاد إلى الفؤاد. لم يكن حسيبا يؤدي النص بالقطاعي كما فعلت وتفعل ساره بل كان ، بنَفَس واحد ملوّن كقوس قزح يوصل إليك جدولا منسابا من المشاعر والمعاني، ولا أضف جديدا إن قلت أن الأداء له دور في توصيل المعنى ، فعلى سبيل المثال ما أحسه من حسيب عندما يغني عيونك كانوا في عيوني هو تلاقي نظرات العاشقين وعندما تغنيها ساره أحس أنو في واحد (بيحدِر للتاني)، يا اخوانا بالله مش مرات بجيكم إحساس بانو ساره دي غناها زي الفانوس الببقبق؟ يا صوتا فيهو كم بلف مقفول؟ أو بلكات الصوت دايره صنفره أو تغيير؟ يا جني أنا ما شناف خليني أسأل ، فيرساتشي عليك الله في زول في الدنيا بيكورك بالطريقه دي ويدَّعي انو قام على (مهلنا) ؟ طيب يعني لو كان قام (سدّاري) كان عمل شنو؟ ياخي أنا جاتني غمده وصحيت قايل الكونكورد رجّعوها للخدمه تاني ، يعني عندنا ناس بيغنّوا ما بيعرفوا يوائموا بين الصوت والكلمه لإكمال المعنى عند المتلقى بما في ذلك البودي لانقويج ،مثلا المحاكم الصوماليه يبتسم طالع نازل يعني لو مافي صوت في التلفزيون حاتفتكر انو الزول ده بيغني ياعقد اللولي اللولي يا بت يا حلوه يا هولي ، ولو رفعت صوت التلفزيون حتلقاهو بيغني عشان أهلك بخليكي واشيل في جرحي ماضيك. برضو في واحد تاني دفعة الجماعه ديل والحمدلله ما مشارك وأصبح يقدم البرامج بيغني أي أغنيه ويحرك يده رأسيا باتجاه أذنه اليمنى ولو رخيت صوت التلفزيون حاتعتقد إما انو في حالة تذمر واحتجاج أو بينش في بعوض. يا ناس تلفزيون النيل الأزرق، أتفهَّم انو المسألة بيزنس والدعايات والإعلانات هامة ولها دور في رفد خزينتكم لكن معقوله بس تكون في خلطه بتعالج المصران والزكام والعجز النفسي والجلوكوما والبهق والدبرسه ومرض حامد و(تنظم) السكري والملاريا والبواسير ؟ بالله يا اخوانا تلفزيوناتنا دي بيشاهدوها في العالم ناس كتار ومافي داعي، زي ما الايام دي القناه الرئيسة تبث رسائل بئيسه معظمها من نوع هنايه (يتهني) هناي بمناسبة الهناي و(المريج) على (الفقاقسي المصري), .. رحماك ، هل عائد شركات الإتصالات والعمولة المدفوعة للتلفزيون يبررا هذا التشويه للقناة الرئيسة؟ ياخ مش كفايه الباقي؟ الليله ضارب العود قلع الجاكت لما عرف انو محمديه ما جا باعتبار أن الجاكت كان لها دور تخفيف اثر (المحطه) زي ما زمان كان البعض (يردِّف) يوم حصة التسميع. تالاهون قسَّسَا أدخل نفسو في مطب عجيب بأدائه عيون المها ، ياخ دي لما كان العميري يقول فيها : (علمتيني كيف أهواك ) توشك أن تشاهد إفتتاح (مدرسة الحب) اللي قال عليها نزار قباني وتبتهج فصول الوله ويغدو السلم التعليمي هو وسيلة الإرتقاء من طابق العشق إلى دور الصبابه ، العميري ، عطر الله ثراك أيها الجميل الشامل الراحل. والله من أكثر الوجوه وضاءة وراحة وعزفه يسعد الروح المُعَنَّى ، عازف الكمان الذي شارك لوحده اليوم في غياب محمديه، ياخ ده زول مريح. غايتو يا فردتنا زي ما قال فيصل نوبي الليله الدكتاتور قدور تب ما قصّر معاك لكن يا فيصل باقي ليك شغل فردتنا في ( فقدت صحاي لاتنصحوني) والتحليق على ذلك الإرتفاع الشاهق سيترك لقدور فرصة غير أن يقول ما قال للفرده؟ بمناسبة حلقة العيون يا ممكونه ، بعض الخبثاء أطلق الكثير على أغنية (عيونك فيها شي يحير ويغير اتجاه الزول) وقيل انه اتضح انوالعيون كان فيها كونتاكت لينسز ملونه وبعضهم أطلق على ( أرخي الرمش فوق الرمش) أنها من (أغاني التراكوما). الناس ما بتريِّح.