* كانت حلقة اليوم حلقة فلسفية موسيقية متخصصة..إستهلها عمنا السر قدور بالحديث عن إحتياجات الإنسان المادية-الجسدية و إحتياجاته الروحية. قال إنو إحتياجاته المادية من سكن و لبس و غيره تزول كما يزول الجسد...لكن إحتياجاته الروحية ك الفن و الشِعر و الموسيقى و غيرها من الفنون...تبقى ما بقي الجسد. a very good point .
* في 24 أغسطس الفات..مرٌت 37 سنة على رحيل إبراهيم الكاشف....أبو الفن السوداني و عبقري الأغنية و اللحن السوداني. و الكاشف خير مثال على الفن الذي يبقى رغم زوال الجسد.
* ذكر أبو الكلام أن الكاشف أدرك فن الغناء بصورة لم يدركها غيره و كان سبب أساسي في تطور الغناء السوداني.
* بدأ الكاشف حياته الفنية مُقلداً لأغاني سرور و كرومة...لكن و من نهاية الثلاثينات..بدأ في تقديم ألحان غير مألوفة..خرج بها عن الألحان المُتعارف عليها. غنانا ود البنا من عبقرية الكاشف.. (( في الشاطي طال بينا السمر...حبيبنا قال..ضوء القمر ..بيكشفنا..آآآآه ضوء القمر )).. (( الأغنية دي يا عاصم أول مرة أسمعها..سمعتها من واحدة إسمها (( نادية البنا ))..بتبقى ليك؟؟؟!!! ))
* نفس الإسلوب العبقري في تلحين أغنية في الشاطي طال بينا السمر...تكرر مع أغنية (( داخل روضة غناء )).. غنانا لها....عصام محمد نور.
* إستطاع الكاشف أن يجعل كل من حوله يغني..ففي كل لحن له..هنالك ((لزمة)) تستدعي مشاركة من حوله.. من الأمثلة لذلك... حبيبي قلبي حاب..رحلة بين طيٌات السحاب..
في الحتة دي دخل فردتنا و قال إنو (( اللزمة )) دي إتسمت مع كل الغناء السوداني..بمعنى أن الكاشف لم يأتِ ب جديد..و إنما فقط طوٌر ما هو موجود.. لكن عمنا السر قدور أصرٌ على رأيه..و ذكر نقطة حلوة جداً و عجبتني خالص.. و هي إنو في أي أغنية في كلمة محورية أو أساسية ..يرتكز عليها كل معنى القصيدة.. يعني في أغنية (( بإسم الحب أقدم ليك حياتي ))... حياتي هي الكلمة المحورية الأساسية... و في مقطع مثل.. حياااااااااااااااتي و معاها العاطفة النبيلة..بإسم الحب أقدم ليك حياتي... يمكن بسهولة معرفة إن روح القصيدة هي كلمة (( حياتي )) وفي ترديد جملة (( روح يا ليل,,تعال يا ليل ))...تظهر قاعدة الغناء الجماعي و عبقرية ألحان الكاشف التى تُجبر كل من كان حول المٌغني على ترديد اللحن و الأغنية معه.
أنا خايفة يجي مرتضى..يشنف بت الناس تاااااااااااااني!
* وصف أبو الكلام ألحان الكاشف...الهادئة..ثم تتصاعد...لتهدأ مرة أخرى.. بلاعب الكورة,,,الذي يوفر وقته و طاقاته لنهاية المباراة.
* خُتمت الجلسة برائعة (( عبيد عبد الرحمن ))...الجمعة في شمبات.. غناها بمنتهى السلطنة..لغاية ما إتكيف أبو الكلام ظااااااااتو.. جمال فرفور...الشهير ب جمال مصطفى..!!
بره الموضوع: حلقة اليوم كانت حلقة متخصصة...تستعصي على فهم الرجرجة و الدهماء أمثالي... يا ريت الموسيقيين و الملحنين المعانا.. ناس عاصم البنا..أزهرى نور الهدى..و نجوان.... يورونا رأي متخصص في الحلقة دي..
10-05-2007, 00:07 AM
نجوان
نجوان
تاريخ التسجيل: 04-01-2006
مجموع المشاركات: 2641
أعجبني تحليل ابوالكلام لفن الكاشف الغنائي.. كان في كلام ابوالكلام كلام جديد (على الأقل بالنسبة لي).. وهذا في حد ذاته أمر يستحق الوقوف عنده..
ذكر ابو الكلام فيما ذكر ان الكاشف كان يبدأ اغنياته بهدوء ثم تأخذ الأغنية منحى تصاعدي.. والpeak يكون تقريبا في نهاية الأغنية.. وقدّم عدّة امثلة.. بصوته
فسّر قدور ان الكاشف -بهذه الطريقة- كان يوفر طاقته كفنان ومؤدي الى نهاية الأغنية.. تماما كالرياضي الذي لا يهدر معظم طاقته في بداية المنافسة.. (نظرية سليمة .. وصحيحة لكتير من الرياضيين المحترفين).. _____ من الممكن (والأرجح )ان التكنيك كان ايضا لجذب المستمع من بداية الأغنية والى نهايتها.. والتغيير الممنهج في نبرات الصوت (المقامات؟) وسيلة من وسائل كسر الرتابة.. والاستمرار في جذب انتباه السامع..
لا شك أن الكاشف كان perfectionist بقدر ما كان مبدعا.. (عارفة.. دي ما جديدة ) أراد ان يكسر القالب.. سعى للمزيد ... حتى للأغنية الواحدة ان تكون متجددة.. فيها عنصر مفاجأة.. وألا تُقرأ من عنوانها.. والأهم.. أن ينافس اللحن .. الكلمات.. في زمن كانت الكلمة هي روح الأغنية.. وكان لها القدح المعلّى ..
10-04-2007, 07:00 PM
abubakr
abubakr
تاريخ التسجيل: 04-22-2002
مجموع المشاركات: 16044
وين الزوول ؟؟؟ وين الشابات والشباب الكانو بجاي قبلما البربري يستولي علي البوست ويبقي الجمهور وكل السلطات؟؟ دة كلام ... يعني الجمهور يتنازل عن سلطاته ؟ اصلو اسبوع ويومين الباقيين علي عهد البربري يا تستحملوهم يا تقولو لي من هسع اهو الواحد يتنازل بس مش عارف لمين ؟ حكاية التوريث المولعة اليوميين دييل ما عندي ليها طريقة ؟؟ اها البربري "الجمهور" يخلي الكراسي فاضية وفلزع ؟؟ اول ديكتاتورية دايرة تتنازل وما لاقية طريقة ؟ دة كلام
10-04-2007, 11:18 PM
Hussein Mallasi
Hussein Mallasi
تاريخ التسجيل: 09-28-2003
مجموع المشاركات: 26230
ازيكم ياناس .... نجوان (بتعرفى تهرشى ؟؟؟؟) طبظتيها واكدتى تحليلى انا بى تحليلك الماخمج ده . الزول ... خنقو عضم فى الفطور باقى ناس النيل الازرق بقو يزقو الحلقة شويه شويه رمضان دخل العضم . تمبس كجشنا ساكت برا سبب (خارج النص ..) فى بادىء حياة الكاشف كان يلقب بى طرظان عشان بكورك كواريك عالية زى القالا السر قدور وقرب يمشى احمد شرفى ... فى زمن كان فيه الغناء على شاكلة اسلوب عبد الحميد يوسف , واحمد المصطفى , وحسن عطية, وعثمان حسين ... قام جاهم زول بكورك زى حقت السر قدور دى سموهو طرظان .... وعندما اتى الكوريون الى معهد الموسيقى والمسرح فى اغنية( فنت بيهو) كانوا يانجوان بيسألو خريج اى معهد من الف هذا التاليف الموسيقى ..؟؟؟ الا وهو طرزان (بانت سعاد بعد مابقت حبوبه كالعادة وكرموها بعد ماماتت) ... تتفقو معاى انه الحلقة مربوطة بالشخصية المحورية التى يغنى لها الشباب .. موضوع الحلقة.
ملاسى ... قلت ليك بظعمطوك ماتقول لى شخصى ....
ممكونة .... عندى احساس انو الكتب القصيده دى ممكون شخصيا ... واجارى السر قدور واحلل ليك شويه ... قصة حلة الملاح والضيفان والكلام ده دحين رمضان ده ولا الفات ؟؟؟؟؟؟؟؟
مرتضى ... (اسراااااار .) يعنى اسرار كوتار ... وانت مابتاع شمارات لكن فى سر فاتك ... الحقو... الناس ديل ختو قرض معاك ...
الليله حضرت الحلقة فى ود البنا ولد اختى قال لى ياخالو السر قعور وقع ليه ؟؟؟؟
قلت ليهو وقعنا كلنا مع الكاشف كاشف العيوب ده ياولدى ....
ود العباسية ... ناس العباسية واولاد المورده مابكوركو نادر خضر البرنامج ده حايخليهو (نادر ) لانه حايضيف الكثير لى نادر خضر الفنان الجميل ويعطينا الاحساس زى حسن عطيه....
بالمناسبة مداخلتى لى السر قعور الكانت عن حسن عطية ما الحكاها (يقال ان واحد من ابناء الخرطوم طلب من الاستاذ حسن عطية ان يوضح الالفاظ اكتر فى الغناء ليتمكن من فهمه ..... فكان رد الاستاذ ... يا ابنى انا بغنى مابديش حصة املاء.) مودتى.
10-05-2007, 11:22 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا والمرتضي .. حسين ما اتخيل البرنامج بدون فردتنا وخصوصا الحلقات البجو فيها ناس البخرات ناسنها في البيت او من الحفله توش الي البرنامج ؟ حتي الشباب اول ما يبدو اغنية ما حافظنها بيعاينو ليهو وتلقي الواحد/ه يعاين ليهو" ليطمئن قلبه " زي حصص العربي زمان والواحد يجي ما حافظ والمدرس يوقفو يقول ليهو "اتمم القصيدة من قوله "وجلمود صخر حطه السيل من عل "" فالواحد يحوص " انا كنت علي الاقل بحوص بالذات مع اللزول القال القصيدة دي عندي حساسية ضدو لله "...
يا سلام عليك انت وياسلام على الابداع وربنا يديك ويدهم العافية جد الواحد مستمتع معاكم بالرغم من انو لندن ما فيها تلفذيون نيل ازرق بس لازم نجي ونستمتع بيكم هنا كل يوم وزغرت يا حبيب كان علي التحاليل هينة وتسلم يا شفيف
10-05-2007, 12:15 PM
عبد الله عقيد
عبد الله عقيد
تاريخ التسجيل: 09-20-2005
مجموع المشاركات: 3728
Quote: اما ابنائى (فكان ندائهم كما يلى(يا بابا السر قعور جا اجرى )
انا برضو أولادي اتعلقوا بالبرنامج وخاصة مشعل (5 سنوات)
بالأول طبعا قلت ليهم (على سبيل الافتخار) انو عاصم دا (صاحبنا).. فصار مشعل يقول لي (أصحابك جو).. بعد كم يوم أصبح يصفّق عند بداية البرنامج وهو يصيح (أييييييييييييي أصحابي جو)..
مرة كنت ما حاضر الحلقة وجيت سألتو عنها قال لي (صاحبك البيغمِّد داك جا لابس جلابية)
بالمناسبة يا ممكونة: البوست دا هو الوحيد الذي أقرأه خلال رمضان هذا..
تحياتي لكم جميعا
10-05-2007, 12:57 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: انا برضو أولادي اتعلقوا بالبرنامج وخاصة مشعل (5 سنوات)
مبرووك يا ودعقيد بس ادينا الوصفة بس عشان اجربا مع اولاد اخوي " انا بتاعني فاتو السن القانونية وتلقاهم مع بيونسي وجماعة غير "..ياخي يجو صدفة بكان ما انا قاعد يلقوني قاعد اسمع يعاينو لي شذرا ويجرو...امشي ليهم في غرفهم القاهم بيشوفو حاجات غريبة واستغرب ما بيجرو منها كيف .. حكاية اصحابي ما بتشتغل .. انا سويت اكتر من كدة مرة زمان وعيالي صغار في فنان اسمو بالضبط زي بتاعي "ابوبكر سيداحمد " وشفتو في التلفزيون وهو غناي ومصورين ليهو اغنية جميلة وهو راكب جمل وفي مناطق جميلة في غرب السودان وانا ما صدقت وجري لبكان العيال " تعالو شوفو ؟" جو جاريين واشرت ليهم الي التلفزيون وانتظرت لحد الاسم ظهر تاني كتابة وعاينو لي برضو شذرا وفاتو ...اجيال النيدو والبلاي ستيشن دييل الواحدج كيف يروضم بشان يسمعو زي النسمعو دة ؟
مساكم سعيد.. الي حين حضور ممكونة لبطن البوست ده.. والباشمهندس..
الغربة كانت الموضوع.. حسب افتتاحية ابو الكلام.. رغم انه الإختيار للأغنيات لم يعكس ذلك.. (او اكون انا الما مركّزة)..
فردتنا ابدع في "بتتغيّر" لصالح الضي.. وسمعنا ابعاد جديدة في صوته.. وكالعادة .. غنّي بارتياح.. ودون مجهود..
الأمسية كانت لنادر خضر.. والفرقة الموسيقية.. فهو (اخيرا) غنّى الأغنية التي وجد فيها ذاته خلال هذا الشهر.. اغنية صعبة.. "ابني عشّك يا قماري" لسّيد خليفة... أظهرت الأغنية حنيّة وجمال صوت نادر..
اعتقد ان نادر يظلم صوته كثيرا بدفنه وراء همهمات الأداء المتأثر بالغناء الأثيوبي..
10-05-2007, 06:53 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: فردتنا ابدع في "بتتغيّر" لصالح الضي.. وسمعنا ابعاد جديدة في صوته.. وكالعادة .. غنّي بارتياح.. ودون مجهود..
الأمسية كانت لنادر خضر.. والفرقة الموسيقية.. فهو (اخيرا) غنّى الأغنية التي وجد فيها ذاته خلال هذا الشهر.. اغنية صعبة.. "ابني عشّك يا قماري" لسّيد خليفة... أظهرت الأغنية حنيّة وجمال صوت نادر..
اعتقد ان نادر يظلم صوته كثيرا بدفنه وراء همهمات الأداء المتأثر بالغناء الأثيوبي..
وبس ...
10-05-2007, 06:29 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
الحلقة 23 عن "الغربة " وارادها السر قدور عن غربة الفنان والشاعر في زمن صارت الغربة والاغتراب و"الهجرة " معلما اجتماعيا واقتصاديا وثقافيا فلذا ربما تجد هذه الحلقة هو عند من يشاهدها من مئات الالاف من شتات اسودان في اركان الدنيا ...لاحظت انه لم يشير الس سرور وهو اول فنان سوداني اغترب شرقا قبل التجلني السيوفي ....
10-06-2007, 01:23 AM
mamkouna
mamkouna
تاريخ التسجيل: 12-05-2004
مجموع المشاركات: 2246
* دارت حلقة اليوم عن الشعراء و الملحنين و المطربين الذين إغتربوا..لكنهم إقتربوا أكثر إلى الفن السوداني...حملوا أوطانهم في حناياهم...و إحتفظوا في وجدانهم بالوطن.
* تحدث أبو الكلام عن (( التجاني السيوفي )) الذي إشتهر في السودان..بل و نافس أحمد المصطفى و الكاشف و عبد الحميد يوسف. لكنه إتجه شرقاً عام 1943 إلى الحبشة و منها إلى اليمن. من أشهر أغانيه.. (( دموعي نازلة هميلة..يراني بين قفار..و أراه بين خميلة...من هوى المحبوب )) غنانا مقطع منها...جمال فرفور.
*تحدث أيضاً عن صالح الضي و غربته في مصر و علاقته الودية مع الشاعر عبد الرحمن الأبنودي. من أشهر أغنيات صالح الضي..و التي عشقها الأبنودي....أغنية (( بتتغيٌر )).. غنانا مقطع منها...عاصم البنا.
* من القاهرة أيضاً..تذٌكر أبو الكلام..الشاعر الموهوب..عبد المنعم عبد الحي...الذي إشتهر بقصيدة (( أنا أم درمان )) التي جاءت ك رد على قصيدة عبد الرحمن الريٌح (( الخرطوم )), ل عبد المنعم عبد الحي و سيد خليفة..أختار أبو الكلام أغنية (( أبني عُشك يا قماري ...قشة..قشة.)) غناها لينا...نادر خضر.
* من أشهر شعراء المهجر و الغربة و الإغتراب...الشاعر الكبير..إسحق الحلنقي..الذي رغم غربته فقد كان متواجداً بكثرة على الساحة الفنية السودانية. من أعماله...و من غناء صالح الضي..إختار أبو الكلام أغنية (( عيش معايا الحب )).. غنتها لينا...أسرار بابكر.
* خُتمت الجلسة برائعة الفنان الكبير..و المغترب الشهير..الطيب عبد الله.. .. ...(( السنين ))... غناها لينا...عصام محمد نور...الشهير ب عصام فرفور!!!
والله ياجماعة ناس مرتضى وملاسى ديل لو ما بعرفهم لكنت اقول من (اصحاب الخيال الواسع) زى مابقولو ناس الهيلا هوب ...
نجوان الله يديك العافية بس ماتنطى زى احمد ادم بتاع الهلال زمان فى دعاية الزيت تتعشى نجيلة .... يخوانا بى صراحة الزول ده ماتمام افقدو ... ولا قام يتعزز الليمون ؟؟؟؟
فكرته من لقياك اغيب قلتا كان يومين تلاته عايز اشوفا مكانتى عندك ياصفا الروح ياحياتا ولمن اتخيلتا شوقى فاق حدود الصبر فاتا غيرتا راييى وما احتملتا واشتقتا ليك فى اللحظة زاااتا
دى هدية يالزول كان ترضى عننا ... كلمات صباحى (والد الفنان معتز صباحى )
ممكونا بعد كدى نحن بنمشى الملجأ .... هملتينا شديد ...
صاحبك ياعقيد البغمد ده الهرشات كترت عليهو مرات بغمد خايف ليهو من كف ولا محطة غوس كمنجة ...
الليلة برضو حضرتا الحلقة فى ود البنا وبرفقة العم مختار البنا قال لى وكان من اول دفعة ابتعثت الى امريكا من اذاعة السودان الى تلقى كورس فى هندسة الاكترونيات والصوت .. قال بدون مقدمات(هو صالح الضى دة لمن كان بغنى زول كان بسمعو مافى لمن شرد .. عليك الله شوف الغنا ده سمح كيفن .) غريبة يابلد دايما كده ؟؟؟؟؟؟ بس جننا نقول الجنيه فى السبعينات كان بساوى 3 دولار ....
من اغنيات صالح الضى الكان لابدا من دخولا الحلقة (دلال) (ان قلت والله بحبونى يزداد دلالهم ويسلونى ... وان قلت خليتو هواهم يشكو الهوى ويسيبونى ... عملتا ايه ياناس فيكم ايه ذنبى بس حيرتونى ...تم تم تم تم ... بس الكف قرريييييب . خااااارج النص والشنقيطى
مرتضى ... والحاضرين بدون فرز .... عندى بوست اسمو (مطلوب القبض عليهم احياء ) اجو المرور ضرورى جدا ..ز
ها ها ها ناس النيل الازرق عادونى بالدعايات ...
مودتى
10-06-2007, 03:07 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
دة كلام؟ الزول مافي وممكونة نايمة جو بطن بيتا وتجي بعد دوبلاج وفردتنا حائم مع عمو المن زمن مشروع ايزنهاور ونجوان بقت تجي متاخرة وودالعباسة بيمشي الحولية ويجي وش الصبح وابومهيار بس يتاوق بصمة خشمو وود وداعة من دييييك وعيييك يعني هسع انا لو عترت لي كلمة اقول يا منو؟ ...قولو ياباسط وادفرو معاي لحد الجمعة الجاية وبعدين نشوف ؟
Quote: وود وداعة من دييييك وعيييك يعني هسع انا لو عترت لي كلمة اقول يا منو؟ ...قولو ياباسط وادفرو معاي لحد الجمعة الجاية وبعدين نشوف ؟
حبيبنا ابوبكر تحية وسلام ود وداعه موجود ومعاك هنا كل يوم ومستمتع بي مجهودك الجميل ورائع وكل يوم بكون منتظرك هنا زي مدفع الافطار بس مرات الواحد بتاوق من بعيد لي بعيد بنسرق نظرة خجولة وبنطلع مبسوطين وانحنا عليك الله غير الدفر دا بسووا بينا شنو؟ شغلتنا في الدنيا كلها بقت دفر و دفير ندفر بوستات ندفر عربات والدنيا ما داير تدفرنا الله كريم keep it up وتسلم يا الحنين
10-06-2007, 01:29 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: ود وداعه موجود ومعاك هنا كل يوم ومستمتع بي مجهودك الجميل ورائع
طمنتنا الله يطمنك دائما .. اها بقينا في زولنا الضارب طناش حتي بعد ان وقف فردتنا علي بابه والقي قصيدة عصماء عله يستجيب .. ياناس هو زولنا هسع بيكون شايل العلم ومشي وين ؟
10-06-2007, 04:26 PM
mamkouna
mamkouna
تاريخ التسجيل: 12-05-2004
مجموع المشاركات: 2246
سلام كبييييييييير ,,و تحية و لا أحلى.. للصحفية المُتميزة.. و الزميلة الإسفيرية العزيزة و الغالية.. التي طال إنتظارنا لها.. عطوفة. نوٌرتي و شرٌفتي... و غيابِك طال...كفاية تعال.
10-06-2007, 05:38 PM
abubakr
abubakr
تاريخ التسجيل: 04-22-2002
مجموع المشاركات: 16044
* كانت حلقة اليوم عن الغناء باللغة العربية الفُصحى. أكٌد أبو الكلام أن الغناء السوداني بدأ ك غناء (( إستماع )) لذلك كانت للكلمة دور قوي جداً و أساسي. و أن الغناء العامي السوداني قريب إلى الفُصحى...و إستدل على ذلك بكلمات أغنية (( قائد الأسطول )) .
* أول من غنى بالفُصحى كان الفنان (( زنقار )) بأغنية (( يا عروس الروض يا ذات الجناح...يا حمامة ))... و حكى أن الأغنية المذكورة كانت محل نزاع طريف و وديٌ بين صلاح عيسى و أبو داؤود...حسمه أبو داؤود بقوله (( ياخي أنا رفدوني من الشغل عشان زنقار ))!! أصل الأغنية بدأ عند زيارة زنقار لبيروت...عندما أصرٌ عليه الطلبة السودانيين أن يغني لشاعر لبناني...فإختار هذه الأغنية للشاعر اللبناني إلياس فرحات...و غناها وقتئذٍ بمصاحبة آلة البيانو.
غنانا مقطع منها...جمال فرفور.
* من روائع الغناء السوداني الفُصحى ...أغنية (( هل أنتَ معي )) للشاعر المصري (( محمد على أحمد )) و هو موظف مصري عاش في السودان. لحٌن الأغنية برعي محمد دفع الله. و غناها عبد العزيز محمد داؤود. غنت مقطع منها..بتنا أسرار.
* من أشعار عباس العقاد الفُصحى ..إختار السر قعور رائعة الكابلي.. شذا زهر..و لا زهر..أين الظل و النهر. غنى مقطع منها...نادر خضر.
نهديها بصفة خاصة...للأخ العزيز...حسين ملاسي.
* عن العاقب محمد حسن..حكى أبو الكلام أن العاقب إبتدأ حياته الفنية بقصيدة عبد الله الفيصل (( نجوى ))...و كان آخر تسجيل إذاعي له..أيضاً لعبد الله الفيصل (( حبيب العمر )). للشاعر المعروف مصطفى عبد الرحمن.....غنى العاقب محمد حسن أغنية (( هذه الصخرة ))..التى غنتها أيضاً النجمة العربية المعروفة..فايزة أحمد. (( يا حبيبي ظمأت روحي و حنٌت للتلاقي )). غنى مقطع منها...عصام محمد نور.
* من أجمل من غنى للفُصحى.. أحمد المصطفى....راحل مقيم..لأحمد رامي التاج مصطفى...أيها الساقي...شعر أندلسي. و.. عن عبد الدافع عثمان...حكى أبو الكلام..أن عبد الدافع علامة من علامات الغناء السوداني..و من أجمل من غنى الفصحى... اختار لعبد الدافع ,,,أغنية (( أذكريني و أذكري يوم البحيرة )) لعلي أحمد باكثير.
السلام عليكم كل الشكر لفردتنا على القصيدة العصماء زملائنا في قسم الفيدو عنهم الباش أبوبكر رئيس قسم المراسلين الفنيين الممكونة نجوان .. ود وداعة ولكل من سأل عن الغيبة الفجائية ويرجع سبب الغيبة لهجوم رمضاني عائلي داخل بطن البيت على فكرة .. تركزت الونسة في معظمها عن البورد والبوست وأكتشفت – للأسف – أن شقيقي الأكبر الذي يكتب معي هنا منذ 5 سنوات تمكن أخيراً من معرفة أن الزوول هو الأسم الذي أكتب به هنا الله في ............................. وما الناس إلا هالك وأبن هالك *** وذو نسب في الهالكين عريق
10-07-2007, 04:33 AM
abubakr
abubakr
تاريخ التسجيل: 04-22-2002
مجموع المشاركات: 16044
Quote: تمكن أخيراً من معرفة أن الزوول هو الأسم الذي أكتب به هنا
عجيبة ودة وملفك فاضي ما فيهو شي .. اكيد عرفك من الكدارة اللابسة في صورتك الشايل فيها العلم ؟ يمكن هو شغال في الس اي دي وانت في الكي جي بي وبعدين جورباتشوف قال ليهو ؟؟
10-06-2007, 07:38 PM
نجوان
نجوان
تاريخ التسجيل: 04-01-2006
مجموع المشاركات: 2641
السلام عليكم تعرف يا حسين كان عندنا استاذ لغة عربية لا شأن له بالغناء وفوجئت عندما عرفت انه مستمع مدمن للكابلي وفسر لي بقوله أن الكابلي هو أفضل سوداني ينطق اللغة العربية غناءً وانه يحبه فقط بسبب غنائه الفصيح ..... جهزت تعليقي على هذه الحلقة حينما اختفى اسم الكابلي ب ( يبدو أن الأمر أكبر من مجرد قلة زيارات الكابلي لمصر .. ) ولكنه أتى - على مضض - بقصيدة العقاد شذى زهر وأقول (على مضض ) لأنني أحسست احساساً ( شريراً) أنه اختارها فقط ليمكن نادر خضر من اشباع رغبته في اظهار مدى جماليات صوته عفواً يا حسين ولكني أظن أنه كان يجب أن يختار إما حبيبة عمري للحسين الحسن أو معللتي بالوصل والموت دونه .... لأبي فراس الحمداني ............................. وما الناس إلا هالك وأبن هالك *** وذو نسب في الهالكين عريق
اليوم لقائي بكم من هنا وانا في لقاء ممتع وجميل مع امدرمان نفسها . احييكم اخوتى ممكونة الاخ ابو بكر واخي المرتضى والاستاذ عاصم ود القبائل من قثلب امدرمان شارع الشهداء .
عميق المودة
شيقوق
10-06-2007, 08:21 PM
abubakr
abubakr
تاريخ التسجيل: 04-22-2002
مجموع المشاركات: 16044
انت بطن بيتكم دة كبير قد كدة يغيبك فيه اسبوع وتجينا طالع ببالونات ومعاك اخوك الكبير كمان ..؟ باقي لينا اسبوع فمافي غياب تاني لا جو ولا برة بطن بيتكم ....
عودا حميدا
10-06-2007, 08:02 PM
abubakr
abubakr
تاريخ التسجيل: 04-22-2002
مجموع المشاركات: 16044
شذي زهر الحان وغناء عبد الكريم الكابلي اداء نادر خضر
مهداة الي حسين ملاسي من الجمهور "الهو انا" وست البوست من جو بطن بيتا ونجوان برضو من جو بطن بيتا والزوول وهو هابط بالبلونات وودالمرتضي برضو من جو بطن بيتو وود وداعة من وادي عبقر ودالعباسية من الحولية وابو مهيار وهو بيتاوق من الشباك وكافة العاملين لدي ست البوست ( ياخي نفسي قام هو دييل كلهم شغاليين هنا ؟ )
10-06-2007, 09:31 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
العقاد المصري كابلي السوداني تالاهون الأثيوبي الملابس بوركينا فاسو
عاش الإتحاد الأفريقي
مافي شي بيزعلني إلا الناس الزي (الزول) دا ، يغيب شهر ويجيك شايل بالونات يقول ليك شذى زهر أبرزت إمكانيات تالاهون الصوتيه ياخ عليك الله خاف ربّك وين (شذى زهر) بتاعت كابلي و (شقى دهر) اللي سمعناها اليوم؟ (الزووول ) أمشي أنفخ بالونات غيرها. قسما عظما كابلي لما أسمعو في حفله يصدح ( وبي سكر تملكني وأعجب كيف بي سكر) أنا بتّرتَح وأتّكَل بالحيط وأخشى على نفسى من الإتهام بالتواجد في حالة سكر ظاهر في الأماكن العامه، اليوم سمعتها زيها وزي حاجات المجلس الوطني إياها.
والله يا ابوبكر أنا زعلان ومتحسس وماخد في خاطري إنو ساره الليله ماغنّت كأنها حردانه بسبب كلامي رغم انو التسجيل تم في يوليو. يا فردتنا ، ليه ساره ما غنت؟
يا فرده ، أنا ألف مره ما قلت ليك ما تتسدر لمشاكل التانيين وتشيل تقصيرهم وتعمل فيها جمل الشيل؟ السر قدور وضع كل الأغاني اللي مفروض تتغنى قبل 3 شهور من التسجيل وطالما الناس زاغوا من البحيره في اللحظات الأخيره، كما هو واضح ، كان تغني غيرا، على أية حال لولا تغنيك بالبحيرة لما كانت هناك حلقة اليوم ، عفيت منك يا السوخوي وفي رواية أخرى زين الدين.
في زول يقول لي فيرساتشي الليله مالو؟ ساهي ساهم، في احتمال يكون شايل هم مشوار جاكرتا شان يجيب قمصان زي بتاعت مانديلا؟
والله يا حسين كلما الكاميرا تتجه لمحمديه وأحمد المك أتذكر (المحطه) المتوقعه وأضحك حتى بانت نواجذي. الله يجازيك.
10-06-2007, 08:59 PM
abubakr
abubakr
تاريخ التسجيل: 04-22-2002
مجموع المشاركات: 16044
ممكونة ... الديمة برة بطن بيتها لكن ما مقصرة ابدا في نقل صورة كاملة لكل حلقة ...
شكراً يا سنوية على الكلام الحلو دا... لكن ما تصدقي الإشاعات دي.. أنا مُرابطة في (( بطن بيتي )) ... و بالتحديد قدام شاشة الأزرق أو شاشة الكومبيوتر.. هل تصدقي إنو هدوم العيد...طلبناها هوم ديلفري..!!!؟؟؟
10-06-2007, 09:20 PM
abubakr
abubakr
تاريخ التسجيل: 04-22-2002
مجموع المشاركات: 16044
والبرنامج يكاد يصل الي نهايته ارجو من الجميع الجو بطون بيوتم وبرة والهابطيين بالبالونات وناس الحولية والمتاوقة ووادي عبقر ونجوان وسنوية وكل العامليين وكل الزوار والمراقبيين وحتي الزعلانيين مني وبمناسبة عيد الفطر ان يختارو الاتي : 1- اغنيتيين لكل واحد من الشباب( كل الاغاني موجودة هنا او في اليوتيوب :فتشو sidahmed07) 2-برضو ادائيين مميزيين للفرقة الموسيقية 3-موضوعيين ابدع فيهما الاستاذ السر قدور
واكييد حتكون في جوائز بس ما ليكم ....
الغرض هو ان ننظر الي الكم الهائل من المعلومات والابداع بتعمق اكثر من السماع فقط وينته الامر بنهاية الحلقات فالموضوع مهم حيث يتناول جوانب متعددة من الغناء شعرا ولحنا واداء وتاريخا لم يوثق من قبل لعل قي ذلك ما يفيد اجيال شابة وقادمة من مبدعين السودان لياتو بجديدهم يضاف الي المتراكم في وجدان السودانيين منذ قرن ...وامر اخر هو البحث عما يجمع ولا يطرح فالملاحظ ان هذا البوست يزوره يوميا ما لايقل عن 200 الي 300 زائر وان الاغنيات المسجلة في يوتيوب في مكان واحد فقط ( هو الذي ارفع اليه تسجيلات هذا البرنامج ) شوهدت حوالي 15الف مرة حتي اليوم ...في دوامة ما يحدث في بلادنا مهم جدا ان نبحث عما يجمعنا ونحن شتات في الداخل والخارج ..
لكم مودتي ابوبكر سيداحمد
10-06-2007, 09:58 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
الباش بكري، يا سيدي ربنا يديك العافيه وبصدق صاف لا تشوبه المجامله أرى أنك من يستحق الجائزة، كما قالت الأخت سناء جعفر مجهودك في النقل والتحميل والشحن كان ضخما ونثمنه عاليا وعليه أصدرت مرسوما غنائيا بمنحك وسام النقل الوطني من الدرجة الممكونه، أنا أثمن لك دورك في تفعيل البوست ودعمك اللامحدود لفردتنا وكافة القضايا المصيرية وإنزال الأغاني الى أرض الواقع (يوتيوب). بجد بدون مجهودك كان مشينا الإصلاحيه .
10-07-2007, 04:21 AM
abubakr
abubakr
تاريخ التسجيل: 04-22-2002
مجموع المشاركات: 16044
تعرف يا ملاسي ، بمناسبة الهلال وكدا ، كان مفروض في الظروف دي الواحد يقيف معاك، نحن لما المريخ العظيم يكون لاعب لا بنساهر لا بندافر ، بس ننوووووم وباكر نسأل: يا اخوانا المريخ غالب كم. بالله يا باش أنصح ملاسي دا يحافظ على صحّتو ويجينا.
10-06-2007, 11:33 PM
mamkouna
mamkouna
تاريخ التسجيل: 12-05-2004
مجموع المشاركات: 2246
من وحيٌ أغاني و أغاني.. و... من وحيٌ البوست الكامل - الدسم دا... .... كانت مُشاركتي في العدد الجديد من مجلة (( سودانيات ))... الحاج فيفالدي...جميل المواسم
10-07-2007, 00:04 AM
Hussein Mallasi
Hussein Mallasi
تاريخ التسجيل: 09-28-2003
مجموع المشاركات: 26230
انا البوست دا ساكن فيهو سكنى وما فتجت خشمى عشان ما تدفعونى الايجار! تلهون ابدع فى توبة يا انة كان رضيتوا كان ابيتو! عاصم البنا كان هو المقروض يغنى باسم الحب ! فرفور طوالى سرحان تقول مضيع ليهو بلنتى! تلاهون بفص قماش البجامة جلابية وقماش الجلابية بيجامة! مفروض يسجلوا الحلقة فى بيتهم! بوست جميل زى اصحابو! نصيحة اى واحد داير ليهو شناف! حسين ملاسى على مدار الاربع وعشرين ساعة! الحوادث! جنى
10-07-2007, 04:10 AM
abubakr
abubakr
تاريخ التسجيل: 04-22-2002
مجموع المشاركات: 16044
Quote: تدفع ايجار باك داتد مع غرامة المتاوقة والترس باسنق وايجار الاسبوع الجاي مقدم .. هو بس جهاز المغتربيين البتدفعو ليهو ؟؟
باك داتد مع غرامة المتاوقة والترس باسنق وايجار الاسبوع الجاي مقدم انت كنت شغال معاهم ولا شنو! اتنين تيمان اقباط جابوا ليهم ضرائب 186 مليون جنية! واحد فيهم قال لا اله الا الله محمد رسول الله! التانى قال ليهو:انت اسلمت ولا شنو! الول قال ليهو موش حاجة تكفر! هم خلوا لينا حاجة عشان ندفعها! جنى
10-07-2007, 05:49 PM
jini
jini
تاريخ التسجيل: 02-05-2002
مجموع المشاركات: 30716
Quote: مرحب بيك يا جني.. نوٌرتَ و شرٌفتَ... بالمناسبة الإيجار في البوست دا بالدقيقة.. شوف حسابنا عندك كم!!!
تستاهلو بس ايه هناخد الريح من البلاط! شرف الله مقدارك
Quote: بره الموضوع:
شكلَك ما غريب علي...إتلاقينا وين قبل كدا..؟؟!!
يكون فى عمرة كانون الأول! ابوالعبد رجع من الحج الى بلده لبنان وطبعا راجل يحب الفشخرة برغم غباؤه واصحابه حوله بسألوهو عن السعودية! أبو العبد: كل شئ منيح ومرتب أكل شرب اتصالات مواصلات أنا بنصح اى حدا بدو يحج يطلع على السعودية!! ياممكونة لا تروحى تحجى فى سويسرا! تحياتى
10-07-2007, 10:19 AM
mamkouna
mamkouna
تاريخ التسجيل: 12-05-2004
مجموع المشاركات: 2246
وانا القلت اخليها لاخر الموسم "البرنامج" واجي لافحا ؟؟ انت ما بتعرفي انو انا امين المكتبة ؟؟ اصلو الطلعك شنو من جو بطن بيتك الوكت دة ؟ بوظتي البرنامج بتاعي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة