Quote: يانجوان .. اها بعد 44 حلقة ( بتاعة السنة الفاتت وبتاعة الحالي ناقص حلقة شفتي الحساب كيفن ) انا يبدو لي والله اعلم بقيت اعرف غني العرريب والالحان ز.يعني ممكن ادلو بدلوي ( شفتي العربي كيف) في الموضوع حيث انني محايد يحكم اني بره تقريبا بعدد سنوات عمر اجعص شاب من دييل ( بس الصلعة ما بتتحسب ).. كل صوت من الاصوات الخمسة متميز بامكانات ولون يكاد يكون مختلفا عن الثاني وهذا يظهر في غناء جماعي لبعض الاغاني التي تتطلب مقامات متنوعة فتجد كل صوت يظهر في وضوح في المقام الذي يناسبه كما ظهر في الغناء الفردي لكل صوت منهم حيث اجاد كل علي حدة ..فردتنا صوت بدوي سوداني(صوت البادية بكل نقاوته وجبروته) قوي ومتمكن في ما يناسب هذا الصوت ( اغاني الحقيبة او غناء اهل الوسط الشايع والذي يتراكم الجيد منه منذ اكثر من قرن ويبقي مستجدا دائما يناسب وجدان كل جيل )ولو اني سمعت له مرة واحدة اغنية جديدة بلحن وتوب مختلف كان قد رفعها المرتضي في بوست العام الماضي هنا فبدي لي كذلك انه قادر علي اشكال اخري غير الحقيبة متما توفر لحن يناسبه..وفرفور ياتي تقريبا في سياق واحد وبامكانات لا تبعد كثيرا عن فردتنا في ترديد غناء اهل الوسط الشايع بتمكن لكنه عندما يرفع عقيرته عاليا ثم يعود يتعب او تتعب الكلمات .. عصام يجمع بين امكانات صوتية كثيرة تجعله مثلا يغني بتمكن للكاشف ولوردي ولعثمان حسين وابراهيم عوض وهوواع للموسيقي كثيرا وهذا يساعده في الغناء الصعب .. نادر منذ ان استمعت اليه قبل عقديين من الزمان عندما كان هنا في الخليج صبغ صوته باثر الغناء الاثيوبي وبالتالي فانك لا يمكن ان يغيب عن المستمع ذلك الاثر حتي لو غني اغنية ممعنة في سودانيتها انه بذلك ربما حبس امكاناته الصوتية في قالب واسلوب معين يحاول من خلاله ان يغني الحان تبدو متباينة وربما لا تتماشي ذلك الاسلوب واحيانا اشعر بانه يتجاوز صعوبات لحنية في بعض الاغاني السودانية الصعبة الاداء بالقفز بها الي الساحة الاثيوبية .. اسرار الصوت النسائي السوداني الهادئ الحنين والذي يجبرك ان تسمعه في اغاني تناسب ذلك الهدوء ولكنه يتعب كثيرا في مقامات عالية او عندما تحاول ان تصدح رافعة عقيرتها عاليا يعيب غنائها انها لا تحفظ الكثير وتكتفي بابيات قليلة من الحان كثيرة ....يتميز فردتنا بان له مخزون كبير من الارث الغنائي الشايع في الوسط شعرا ولحنا ومعايشة بحكم انه ياتي من اسرة ربما هي سدنة هذا النوع من الغناء والشعر في السودان وبنقاوة صوته من الشوائب ونلاحظ ذلك في السهولة واليسر الذي يتعامل بها صوته مع مقامات جد عالية لا يزيدها المايكروفون ولا المؤثرات الصوتية شيئا .... ____________________ اها ان قلت العايز اقولو ما في زولا يجي ناطي ويقول شن دخل الاسمنت والمونة والحديد والمطبخ (بحكم الارث) في النضمي عن غناء العرريب واللا واحد يجي يقول لي انت مالك يا عجمي في غنانا .. اصلو مشغلني بلاش اسجل ليكم اغاني وما تسمعو كلامي يعني اشمعنا السر قدور ما انا برضو مخضرم ولي سنتيين في مجال الغناء (ياعتبار حضوري ل 44 حلقة ) وفي حنتي غني البعيو والعرس غني ابوعركي (حبيبي انا بحب الزول ده لله في الله وكنت عامل مع جماعة اول ما اتخرجنا وهو يادوبك وصل الخرطوم حزب لمساندته ضد حزب زيدان وطلحة الشفيع مع اني كنت ساكن جنب دكان امنة في حي الصقور جنب النادي -بيت واحد من ناس مكاوي عوض-وما بعيد من بيت ناس زيدان في الزمن داك " شايف كيف يا تمبس يعني ما براك القطعت خور ابو عنجة كداري واللا مشيت مدرسة المؤتمر كداري (كان اخوي الكبير استاذ الانجلزي هناك) .. دة كلام في التاريخ ما ليكم بيهو شغلة..)....
ده كلو حرام عليك كده حتنزل سهم اعمار في ا########## . الناس عايزة تكتب ليها مسكولات ساى .
09-28-2007, 08:03 PM
abubakr
abubakr
تاريخ التسجيل: 04-22-2002
مجموع المشاركات: 16044
* في البداية أعتذر و بشدة لكل أسياد و سيدات و زوار البوست عن التأخير الذي صَاحَبَ إنزال التقرير اليومي. رمضان كريم و بيحب اللٌمة و ممكونتكم ممكووونة الأيام دي بضيوف أعزاء . ربنا يقدرنا على إكرامهم و حُسن ضيافتهم..إذاعة الحلقة بتكون في نفس توقيت القهوة و الشاي و لم العدة و من ثمٌ غسيلها....و إعادتها بيكون (( الجداد غمٌد ))... عذراً مرة تانية...رمضان كريم و بيحب كل كريم.
* حلقة الأمس كانت عن الغناء السوداني خارج السودان.
* حكى أبو الكلام عن دعوة الملك فاروق لفنانين سودانيين للمشاركة في حفل زفافه إلى الملكة ناريمان. تم إختيار الفنانين..الكاشف..أحمد المصطفى و حسن عطية للمشاركة في الحفل.
* كان الحفل باذخاً حيث غنت أيضاً فيه..سيدة الغناء العربي..أم كلثوم. فاجأ الكاشف زملائه بأغنية جميلة صُنِعَت خصيصاً للمناسبة...إسمها (( سلوا قلبي )).. تغنانا بها..فردتنا..ود البنا.
* غنت أسرار (( أنٌة المجروح )) و التى تقول إحدى أبياتها.. مصرية في السودان..بحبي ليها أبوح.
* ذكر أبو الكلام أنه لا يُمكن الحديث عن الفن السوداني خارج السودان مالم يُذكر الفنان الراحل (( سيد خليفة )). للفنان سيد خليفة رصيد رائع من الأغنيات باللغة العربية الفُصحى و بالدارجي.. أبو الكلام ما يختار إلا (( إزيٌكم..كيفنكم ))..!!!؟؟
الاغنية الاولي لم استمع اليها انا من قبل ولا اظن كثيرين منكم وجميل ان يكون زولنا عاصم كالعادة حافظ لمثل هذه الاغاني النادرة وهذا يؤكد مكانته وسط فناني جيله
سلو قلبي سلوه عن مدي حبي لهذا الكوثر العذب كلمات صادق عبدالله الحان وغناء ابراهيم الكاشف اداء عاصم البنا
قالو متالم شوية الحان وغناء محمد الامين اداء نادر خضر (ملحوظة: رغم ان التسجيل كامل صوتيا الا ان الصورة في اخر الاغنية مشوشة وسابدلها بعد التسجيل من الاعادة )
09-28-2007, 07:30 PM
abubakr
abubakr
تاريخ التسجيل: 04-22-2002
مجموع المشاركات: 16044
مرة في عرس في جدة؛ طلبت إحدى السيدات المتسعودات من عبد العزيز المبارك أن يغني ازيكم كيفنكم
ابتسم عبد العزيز .. فقد كان يظنها تمزح .. و لما تأكد من جدية طلبها اسقط في يده و نظر للفرقة الموسيقية مستنجداً .. بس ما كان في طريقة يقولوا ليهو ما حافظنها!!
09-29-2007, 07:13 AM
mamkouna
mamkouna
تاريخ التسجيل: 12-05-2004
مجموع المشاركات: 2246
السلام عليكم أبوبكر والله ما مقصر كلو كلو بس ممكونتنا دي الحاصل عليها شنو؟ كورتها فكت والا شنو؟ وحتى لما تكون فاطرة في بطن البيت مافي منها خبر يا الممكونة ياختي لما تكوني ناوية تفطري برة بطن بيتك أو عندك ضيوف جوه بطن بيتك قولي عووك عشان ما ننتظرك وننزل تلخيص الحلقة طوالي هسع أنا أعمل شنو؟ بعد كده زاتو بقى بايخ ................ وما الناس إلا هالك وأبن هالك *** وذو نسب في الهالكين عريق
09-29-2007, 06:51 AM
mamkouna
mamkouna
تاريخ التسجيل: 12-05-2004
مجموع المشاركات: 2246
لا احسن تكتب لانو حلقة امبارح لازم تشرح ففيها اشياء تخص الموضوع واختيارات الاغاني والموجوديين والغائبيين ... اما ممكونة فستقدم الي لجنة ادارية للمحاسبة لانو بقت زي ناس النيل الازرق يمكن اتاثرت بيهم اهو يقطعو الارسال يوميين ومحمدية ما يجي وعصام ما يجي وفرفور يفرفر وهرشات .. اما تمبس فيبدو انو عندو تصويير خارجي السنة دي
09-29-2007, 05:24 AM
abubakr
abubakr
تاريخ التسجيل: 04-22-2002
مجموع المشاركات: 16044
بيان بخصوص الصورة في تسجيل اغنية ود الامين الباشكاتب الغناها نادر امس : نسبة لعدم التزام النيل الازرق بمواعيد البرامج وعدم التنبيه لذلك - عادة اذاعية وتلفزيونية سودانية - فلقد وجدت صباح اليوم ان التسجيل التلقائي للحلقة المعادة طلع مدايح وكورة ما فيها اقوان ( قدر المسجل) فمسحت الملف الكام قيقابايت وهكذا سننتظر اعادة في الفطر ودي ما مؤكد نحضرها .. لذا لزم التنويه
09-29-2007, 06:17 AM
mamkouna
mamkouna
تاريخ التسجيل: 12-05-2004
مجموع المشاركات: 2246
Quote: ممكونه دبلوماسيه في عرضها للحلقة ، شوفي ياممكونه زمان لما كان واحد يقول فلانه (ظريفه) فهذا يعني عند البعض إنها ما عندها حاجه تانيه، أنا لاأعني أن ساره (ظريفه) لكن مامكن كمان زول جايبنو يغني تقومي تقولي لينا أنيقه وما عارف شنو.
ملاحظة ليك يا مرتضى مقابل (( سارة )) زي ما كنتَ مقابل (( سوسن )) السنة الفاتت..
إتكلمنا عن كرفتة أبو الكلام الدٌاقة سيستم.. إتكلمنا عن جلابية فردتنا حقت العيد.. إتكلمنا عن جلاليب نوم فرفور.. إتكلمنا عن عصام الجاي من الدافنة.. إتكلمنا عن نادر المتألق بالأبيض... حتى..محمدية...إتكلمنا عن قميصو المرة بره..و مرة...برضو بره..
سارة..حيطتك القصيرة....؟؟ أقول ليك شنو غير.. كان قابلتها..يقابلنَك شباشب المولد..!؟؟؟!
Quote: فردتنا صوت بدوي سوداني(صوت البادية بكل نقاوته وجبروته) قوي ومتمكن في ما يناسب هذا الصوت ( اغاني الحقيبة او غناء اهل الوسط الشايع والذي يتراكم الجيد منه منذ اكثر من قرن ويبقي مستجدا دائما يناسب وجدان كل جيل )ولو اني سمعت له مرة واحدة اغنية جديدة بلحن وتوب مختلف كان قد رفعها المرتضي في بوست العام الماضي هنا فبدي لي كذلك انه قادر علي اشكال اخري غير الحقيبة متما توفر لحن يناسبه..وفرفور ياتي تقريبا في سياق واحد وبامكانات لا تبعد كثيرا عن فردتنا في ترديد غناء اهل الوسط الشايع بتمكن لكنه عندما يرفع عقيرته عاليا ثم يعود يتعب او تتعب الكلمات .. عصام يجمع بين امكانات صوتية كثيرة تجعله مثلا يغني بتمكن للكاشف ولوردي ولعثمان حسين وابراهيم عوض وهوواع للموسيقي كثيرا وهذا يساعده في الغناء الصعب .. نادر منذ ان استمعت اليه قبل عقديين من الزمان عندما كان هنا في الخليج صبغ صوته باثر الغناء الاثيوبي وبالتالي فانك لا يمكن ان يغيب عن المستمع ذلك الاثر حتي لو غني اغنية ممعنة في سودانيتها انه بذلك ربما حبس امكاناته الصوتية في قالب واسلوب معين يحاول من خلاله ان يغني الحان تبدو متباينة وربما لا تتماشي ذلك الاسلوب واحيانا اشعر بانه يتجاوز صعوبات لحنية في بعض الاغاني السودانية الصعبة الاداء بالقفز بها الي الساحة الاثيوبية .. اسرار الصوت النسائي السوداني الهادئ الحنين والذي يجبرك ان تسمعه في اغاني تناسب ذلك الهدوء ولكنه يتعب كثيرا في مقامات عالية او عندما تحاول ان تصدح رافعة عقيرتها عاليا يعيب غنائها انها لا تحفظ الكثير وتكتفي بابيات قليلة من الحان كثيرة .
عجبني جداُ جداً التحليل العميق دا.. أوافق و أبصم بالعشرة على أي حرف فيه.. تسلم يا باشمهندس يا رطاني.
09-29-2007, 10:30 AM
abubakr
abubakr
تاريخ التسجيل: 04-22-2002
مجموع المشاركات: 16044
يا ممكونة انا خايف اغتر واقوم اودر شغلانة المباني والعمارات والمشاريع واصلو الواحد تعب وكبر واقوم اصدر مجلة فنية (ايه رايك يا ملاسي ؟) وهاك يا معييط في الفنانيين والمستمعيين والمشاهديين وبعدين اخت صورة فردتنا في غلاف العدد الاول ..عايزين مراسليين للمجلة يا ناس ؟ انا حامشي اخد لي رقدة(نص يوم اجازة) وانا بفكر في الموضوع دة واكيد حاصل لحل لحد رمضان الجاي ؟
09-29-2007, 08:51 AM
الزوول
الزوول
تاريخ التسجيل: 05-14-2003
مجموع المشاركات: 2463
السلام عليكم بناء على طلب الجمهور الجمهور ده هو أبوبكر تكملة ما بدأته الممكونة بعد الفيلم المشهور ( سهر الجداد ) .................... ذكر أبو الكلام أن بداية خروج الفن السوداني كان اتجاهه شرقاً ، فقد زار الحاج سرور ارتريا ، أثيوبيا والصومال حيث هناك نسبة مقدرة من المعجبين ، وأيضاً اتجه الفن السوداني غرباً نحو تشاد وأفريقيا الوسطى ونيجيريا. كل هذه المناطق لم تكن تمثل مشكلة أمام الفن السوداني لتشابه السلم الموسيقي ، ولكن المشكلة مع الغناء العربي ذو السلم السباعي. ومع ذلك فقد اتجه الفن السوداني إلى مصر منذ القدم بدأ عبدالله الماحي سنة 1927 فسجل عدة اسطوانات في مصر ثم الحاج سرور سنة 1932 وأقام عدة حفلات.. ............... على البرير ( لا أدري إن كان يمت بصلة لآل البرير الحاليين) عميد الجالية في مصر آنذاك هو من كان له الفضل لدعوة فناني السودان لزواج ملك مصر والسودان الملك فاروق وكان له الفضل ايضاً في دخول الفنان اسماعيل عبدالمعين وسيد خليفة لمعهد الموسيقى بالقاهرة.. كلمات أغنية الكاشف (التي سمعنا بها لأول مرة) تأليف صادق عبدالله وهي أول أغنية للكاشف تسجل في الإذاعة المصرية. سلوا قلبي ..عن السودان ينبيك سلوه عن مدى حبي لهذا الكوثر العذب ومصر حبيبة القلب ........... إبداع والله يا فردتنا ...... يلاقي المصريون صعوبة في فهم كلمات أغانينا حينما تغنى بالسلم الخماسي وقد روى أبوالكلام حكاية الرجل الذي علق على أغنية عثمان حسين بأنها كانت ستكون جميلة لو كانت باللغة العربية ولذا ابتكر الحاج سرور طباعة كلمات أغانيه وتوزيعها على الجمهور ....... غنت (سارة) أنة المجروح فأعملت فيها سكين الكوجنة ولا أدري ماذا كان سيحدث لها لو لم ينجدها فردتنا .. الله يخليك لزنقات ناس سارة .......... سيد خليفة شهرته من القاهرة ، وقد عرفه السودانيون من خلال الإذاعة ، وعندما رجع إلى السودان طلب من الشاعلر اسماعيل حسن أن يؤلف له أغنية تقدمه إلى جمهور السودان ، فكانت أغنية ازيكم أغنية ذات موسيقى متفردة وأداء متنوع ولا أعرف لماذا يكره السودانيين ( على قول حسين ملاسي) ترديدها ، حتى الممكونة تكرهها ( على قولي) ذكرأبو الكلام أن شهرة الأغنية ذاعت أكثر حينما القى الأزهري خطاباً في المطار حين رجوعه من السعودية قال فيه: فتحت لنا الأبواب ، وزرنا رسول الله صلى الله عليه وسلم ، وأعتمرنا ، وقابلنا أخوتكم السودانيين وقلنا لهم .. أزيكم ..كيفنكم .. انا لى زمان ما شفتكم ... وسيد خليفة هو أول سوداني يطلع في أضواء المدينة الذي كان يقدمه المذيع اللامع جلال معوض ، وله الفضل (سيد خليفة ) في تعريف العرب بلهجتنا المحلية.. .............. ذكر أبوالكلام ايضاً قصة مساعدة الشريف حسين الهندي ابراهيم الكاشف عام 1959 حينما استاجر له المسرح على حسابه..بعد أن ذهب له أبو الكلام والكاشف في فندق Intercontinental .................. آخبر أيضاً عن حفلة وردي في الثمانينات في سنما ريفولي حينما اقفل الشوارع المحيطة بها ، وتكرر الأمر مع محمد الأمين في حفلة نادي الزمالك وايضاً اقفل أكبر شوارع القاهرة ش الدول العربية
............................. وما الناس إلا هالك وأبن هالك *** وذو نسب في الهالكين عريق
09-29-2007, 12:56 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: ولا أدري ماذا كان سيحدث لها لو لم ينجدها فردتنا ..
ذكرتني دي ..الغريبة المرتضي فوت دي كيف ؟ فردتنا دي وجودو في البرنامج دة محوري وربما في برامج شبيهه في المستقبل فعنده مخزون في ذاكرته من الكلمات واللحن يتفوق به احيانا علي السر قدور .. وهناك امر اخر هو ان نوبة صحيان تعزف عندما يستلم هو المايك وخصوصا في الحلقات الاخيرة والتي راينا فيها الشباب وهم يتثاءبوون او مرخميين ..ان صوته قوي يقدر من خلاله بعث روح ونشاط وسط الشباب والموسيقيين واكييد نحن المشاهديين (فالامر ايحائي في مثل هذه الحالات)ويشاركه في ذلك لدرجة ما عصام محمد نور وهو فنان مقتدر ولذا كان لغيابه امس اثر واضح في سير البرنامج ... انا ما متحيز- اكيد لانو واحدا فيهم ما رطاني - وانما وجهة نظر متابع لما يجري في هذا البرنامج ( وما عندي غيرو في رمضان حيث اعيش وما عارف الواحد يسوي شنو لو ناس النيل الازرق قطعو الارسال تاني والناس هنا كلو واحد مشغول والشوارع زحماااااة ولذا كلو واحد بيلزم بيتو واحيانا الواحد بينسي وقت الفطور ..الخ )
09-29-2007, 10:15 AM
abubakr
abubakr
تاريخ التسجيل: 04-22-2002
مجموع المشاركات: 16044
ايوه كدة عشان يكون نزولا عند طلب الجمهور (الهو انا) وودالعباسية
تانيا ياخي تمبس دة مش من حلتك او جنب حلتك ما تكورك عليهو خلي يشوف شغلو ..دة ضارب طناش ساااي ..اها هسع ممكونة وعندها البيغطي ليها بعد ما قالت عييييك للزول .. فيصل نوبي صحي يوم ورجع نام وهسع علقو البوست وبقينا علي الهوا يعني كان برامجنا طلعت ما كويسة يانا الحنبقا زي البي ان يوم ما قطعت الارسال ونبقي ملطشة للرايح والجاي .. انت ياولدي في الدوحة ما في تسجيل بس كلو عالهو ما تغطي لينا لما نقول ليك عييييك(اشمعنا ممكونة؟) ...
09-29-2007, 01:38 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
شايفك في صورة فاطريين برة بطن بيوتكم انتو وناس بدرالدين الامير.. ما في طريقة لفطور بر بطن بيوتنا الا المطاعم هنا فلذا دائما جوة بطن البيت .. ما عليك انت بس سجل يمكن تفوتنا حلقة مهمة نورييك كيف ترسلا لينا
Quote: تمبس دا مختفى فى ظروف غامضة جدا جدا ، ،،
ما يكون اعتكف ،،
شايفو في بوستات تانية معتل كاميرتو وحائم ...هسع اقوم اتصل بيهو القاهو نايم و " والله يا خال بس هسع جيت من برة وناس اتصالات ما مريحني يوم النت شغال ويوم ما شغال " دة لو ما عندو حساسية وانفلونزا اها نقول عييك لفيصل نوبي ..يمكن ..
09-29-2007, 02:00 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
* أقل ما يُمكن أن تُوصف به حلقة اليوم...أنها كانت حلقة (( حماسية )). أراهن أن كل من شاهدها..عَرض....بَشٌر...أو..زي حالاتي كدا...زغرد..!!
* كانت حلقة اليوم عن ألوان الغناء الشعبي السوداني,..الحديث و القديم.
* ذكر أبو الكلام ان في الشعر الحديث عدد قليل جداً من الشاعرات بينما 99 % من شعراء الاغاني الحديثة من الرجال!!!! بينما نجد في الغناء الشعبي 99% من النساء بينما 1 % فقط للرجال!!! ذلك لان المراة خجولة بطبعها و لا تُعرب عن حبها و عشقها بسهولة لكنها تجد نفسها في أغاني الحماسة التى تدعو لمكارم الاخلاق و الشجاعة و الكرم و الفروسية و غيرها من الأخلاق الحميدة.
* وجٌه أبو الكلام شكر خاص الى (( طه عبد الرحمن)) الذي فتح أذهان الناس على الغناء الشعبي لما كتب عن مهيرة بت عبود و ذكر قصيدة مهيرة الشهيرة.
* ذكر أبو الكلام أيضاً ((بنونة بت المك )) و .. أخت (( النعيم ود حمد)) التى غنت لشقيقها... احيا سنن البرامكة ....عاجبني طول ايدو سامكة انا غنيت للولد ...الاسمو النعيم ود حمد غنى مقطع منها ...فرفور
* ذكر أن كلمة ((بابا)) التى تأتي في سياق الاغنية ماهي إلا عن بابا محمد بابا المحسي و هو رجل يحفظ مدائح اب شريعة.
* ذكر أيضاً قصائد اخت ((عبد القادر ود حبوبة ))..من أشهر قصائدها.. (( الواعي ما بوصو ))... هذا ما قاله..السر قدور.. لكن..دكتور أحمد القرشي قام مشكوراً بتصحيح المعلومة.. (( الواعى ما بوصو من كلمات ((بت مسيمس)) وقالت هذه القصيدة فى ودحبوبه وذكرت فيها اسم رقيه اخته( وقال انا اخوك يارقية ) اما رقية فانشدت فى اخيها الاغنية المشهورة ((بتريد اللطام اسد الكداده الزام))...
* غنى مقطع منها.... عاصم البنا
* ذكر أيضاً أن عازف العود ((عثمان عوض الله )) هو اول من قدٌم في الاذاعة السودانية اغنيات شعبية.... ك اغنية الدود قرقر... حبس الدرب. غنى فرفور مقطع من اغنية الكابلي الجنزير في النجوم... زي الهيكل المنضوم.. ما بخاف.
* من أشهر من غنى أغاني الحماسة ..الفنان الراحل..سيد خليفة.. من أشهر أغانيه.. الوافر ضراعو... الدود قرقر ... ثم... شدولو و ركب فوق مهرك الجماح غناها لمن رقصنا و زغردنا.... عصام محمد نور!
* قال أبوالكلام انو أغنية (( التجني )) بتذكرو موقف تعرض ليهو في حفلة سنة 57 في المقرن .عندما حاول شخص ان يمنعهم هو و حسن عبد المجيد من التمثيل لكن أبو الكلام واجهه و تصدى له بشجاعة ليُجبر الرجل على الاعتذار بل و دفع مبلغ عشرين جنيه !!!!
بره الموضوع:-
* عرفنا عصام محمد نور مشى مدني ليه!!! عشان يجيب بدلة (( فطوطة ))..!!
السلام عليكم غريبة ... أبو الكلام عندما يتحدث عن أغنية شدولو وركب ما يذكر اى شيء عن شاعرها المبدع عمر الحسين الذي غادر دنيانا هذه قبل عامين تقريباً - رحمه الله رحمة واسعة – وعمر الحسين للعلم هو مؤلف وجامع إشعار المادح حاج الماحي وهو في رأيي عمل توثيقي جيد حيث استغرق سنوات من البحث وأنتج حوالي 150 قصيدة جمعها في كتاب بأسم ديوان حاج الماحي ................ بما إن الحلقة كانت عن أغاني الحماسة فقد كنت اتوقع اكتساح فردتنا (صاحب الصوت البدوي الحماسي) للكل ..ولكنه ظهر بشكل خجول .. .............. توقعت – وبما أن أبو الكلام مغرم بالفلاتية – وبما أن الحلقة دارت حول أغاني الحماس والبطولة ، أن ( يأمر) ( سارة) بغناء ( يجوا عايدين .).. لاتساقها مع موضوع الحلقة ولكنه أتى بأغنية ليه التجني وهي أغنية رتيبة لا صلة لها بموضوع الحلقة ................ ذكر أبو الكلام عن أغنية الفلاتية أنها تذكره بالموقف الذي حدث له في الحفلة ولم استطع معرفة الصلة بينهما ................. فردتنا ... قميصك شرط لكن ... ............................. وما الناس إلا هالك وأبن هالك *** وذو نسب في الهالكين عريق
09-30-2007, 00:34 AM
Hussein Mallasi
Hussein Mallasi
تاريخ التسجيل: 09-28-2003
مجموع المشاركات: 26230
Quote: توقعت – وبما أن أبو الكلام مغرم بالفلاتية – وبما أن الحلقة دارت حول أغاني الحماس والبطولة ، أن ( يأمر) ( سارة) بغناء ( يجوا عايدين .).. لاتساقها مع موضوع الحلقة ولكنه أتى بأغنية ليه التجني وهي أغنية رتيبة لا صلة لها بموضوع الحلقة ................ ذكر أبو الكلام عن أغنية الفلاتية أنها تذكره بالموقف الذي حدث له في الحفلة ولم استطع معرفة الصلة بينهما
أتفق معاك يا الزووول... أنا زاتي إتوقعتَ أن تغني سارة أغنية (( يجوا عايدين ))..بكل مافيها من حماسة . و لغاية اللحظة دي ماقادرة أفهم سر أغنية (( ليه التجٌني ))..و علاقتها بالعشرين جنيه الرسلهم ليهو البك..عبد الله خليل!!!
يا اخوانا اولا مبروك التعليقة .... الحاجة التانية اخجلتو تواضعنا ياعنى فردتكم ماقصرتو معاهو ابدا لما الواحد بيقى ماقادر يصنقر من تقل الراس .... الحاجة التالتة دور برنامج بتاع عزايم فطور برا يعنى الواحد عاذر ممكونة والله مقدر صمودا امام كل ما تعانيه خارج وداحل بطن بيتا من افطارات جماعية ..... السنة الفاتت بيت محمد المرتضى خمستاشر يوم كان الفطور فى بطن بيتو بس نلم العدة وطوالى جلسة ما منظور مثيلا ... المرة دى جابت ليها جوبا وفطور بره ويا عالم .... عندى ليك خبر يا باش مهندس ... هسة انا جاى من التلفزيون ... وسجلنا سهرة العيد لى تلفزيون السودان القومى فى برنامج كل الجمال تم التصويت لى top 7 لعام 2007 وكرمونى مع 6 من الزملاء الاعزاء فى التلفزيون فى وجود حوالى 40 من اهل الفن السودانى ويال سعادتى بها والله بينكم اهديكم ايها فردنا فردا فردا بدون فرز ... بعدين انا لى تلاته حلقات ماحضرت البرنامج لكنك يازول ويا ممكونة وابوبكر مامقصرين يقصر الملح ...اطمنتا على شغلتى ... الحاجة الاجمل كان معانا عمر قدور اخو الاستاذ السر قدور وطيب خاطرى من الهرشة .... المكرمين فى البرنامج اى الفازت اغنياتهم بالتصويت الاتية اسمائهم ...
عادل مسلم محمود تاور عافية حسن جمال فرفور عبدالكريم ابوطالب محمد شبارقة عاصم البنا
نرجع لى مرجوعنا ... ملاسى ده مالو مقاشرنا السنة دى ؟؟؟؟ ولا هارمنى ؟؟؟؟
يا الزول عملت ليكم الصور مع الاستاذ عثمان حسين الليلة لكن يخربنى كان بعرف ارفعا ...
بكرة
09-30-2007, 01:57 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
.. يا سلااااااام عليكي يا ممكونة وعلى الشباب الرائعين .. امبارح بس شفت البوست ده !! للأسف الأوقات القليلة البدخل فيهاالمنتدى بقضيهو مناكفات مع اخوانا المريخاب .. ومن أمبارح وأنا مستمتع بالصفحات الفاتت يا دووووب وصلت للصفحة دي .. والله حاجة أكثر من رائعة .. خصوصا بالنسبة للمساكين زينا الما عندهم قناة النيل الأزرق شكرا بالجملة لهذا المجهود وشكرا لامتاعنا ..
رمضان كريم .. وكل سنة وانت وجميع المتداخلين بألف خير ...
09-30-2007, 12:47 PM
mamkouna
mamkouna
تاريخ التسجيل: 12-05-2004
مجموع المشاركات: 2246
النيل الازرق الارسال انقطع في عز انشغالنا وجهجهنا يوميين الارسال بين كمبيوتري والريسيفر كمان لخبط اثناء التسجيل البارحة الكمبيوتر زاطوووو حصلو ليهو كراش ولذا ساضطر الي صرف ساعات في اعادة تشغييل وتحمييل برامج وملفات ( حالة ما عادية لانو انا بتاع كمبيوطرات الحصل دة ما مفروض يحصل كدة ساااي ؟؟؟؟)
يعني الليلة حاستعمل جهاز اخر محمول laptopوبطاقة تسجيل PCMCIA دة كلام .....كان اتاخرنا استحملو ..يا تمبس انت وووين ؟ ودالعباسية انت بتعرف للصور ما بتعرف للتسجيل ليه ؟؟ اها شوية بخور تيمان والذي منو ...
09-30-2007, 09:35 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: مبروك يا ابوبكر (البوست بتاعك) علّقوهو في المشلعيب زي بُخسة الروب واللحمه خايفين عليهو من
الكدايس والكدّارات والحايمات برّه (بطون بيوتن). يعني بكري أبوبكر لما شاف ست البوست يوما كلو
بره بطن بيتا قال يشيل البوست يوديهو الإصلاحيه.
كان بتاعي ما عارف ..؟؟ دة بوست الممكونيين بس عامليين ديليقيشن لانه ما فاضيين او المسؤليات زادت عليهم مما يجعلم دائما بر بطن البيت .. وانا جيت ساااي اعاين لقيت نفسي امين مكتبة وتمبس ما فاضي لينا السنة دي اهو معتل كاميرتو وحايم في بوستات تانية في تصوير خارجي ..
يا اخي فرفور دة زي ما قلت عايزولو ساحة وجماعة معلقيين فوق الاشجار وواحديين فوق العمود وبعديين هو يلعلع ..ما بيقدر علي زنقة الكنبة والكاميرات ... حسين ملاسي لانو مزنوق في امتحانات عايزنا نزنق في رمضان ما نلقي البونسنا مع انو هو الابتدا وزاغ وهسع بعد ما البوست اتعلق فوق عايز يشمت الكدايس فينا ... انت "سارة" دي منو ؟؟
09-30-2007, 02:42 PM
عبد الله عقيد
عبد الله عقيد
تاريخ التسجيل: 09-20-2005
مجموع المشاركات: 3728
اتابع باستمرار هذا البوست الجميل ... اما حلقة الغناء الحماسى فلم اتابعها الا من خلال استعراضك لما دار فى الحلقة ولقد ذكرت ان الاستاذ السر قدور ذكر ان اغنية الواعى ما بوصو من كلمات رقية اخت عبدالقادر ودحبوبه وهذه المعلومه غير صحيحه لان الواعى ما بوصو من كلمات بت مسيمس وقالت هذه القصيدة فى ودحبوبه وذكرت فيها اسم رقيه اخته( وقال انا اخوك يارقية ) اما رقية فانشدت فى اخيها الاغنية المشهورة بتريد اللطام اسد الكداده الزام ... ولقد حدثنى بهذه المعلومه بادى محمد الطيب وهو الذى لحن هاتان الاغنيتان بهذا اللحن المتعارف عليه حيث كانت تغنى الاغنيتان كالمناحه قبل ان يعطيهما بادى هذا اللحن الجميل
09-30-2007, 08:26 PM
mamkouna
mamkouna
تاريخ التسجيل: 12-05-2004
مجموع المشاركات: 2246
Quote: الواعى ما بوصو من كلمات بت مسيمس وقالت هذه القصيدة فى ودحبوبه وذكرت فيها اسم رقيه اخته( وقال انا اخوك يارقية ) اما رقية فانشدت فى اخيها الاغنية المشهورة بتريد اللطام اسد الكداده الزام ..
سعيدة للغاية يا دكتور بمتابعتك للبوست. شكراً على المعلومة القيُمة.. سأقوم بالتعديلات اللازمة لتصحيحها.. يا ريت باشمهندس أبو بكر..يصحح المعلومة في أعلى مداخلة الأغنية المذكورة.
09-30-2007, 07:07 PM
Ibrahim Algrefwi
Ibrahim Algrefwi
تاريخ التسجيل: 11-16-2003
مجموع المشاركات: 3102
حلقة الليلة كانت عن الأغاني الفيها اللحن مأخوذ من لحن المديح زي إغنية في الليل الهاجع وغرد يا ساجع
وإغنية صفوة جمالك وطبعا عاصم تـالق كعادته
عصام وفرفور وأسرار بس تقول بروفة كورال شايلن ورقهم عين في الورقة وعين في الكاميرا تأني شنو ده المتذكراه من الحلقة فنيات ما معانا غير وردتي الحمراء الفوق دي ما بعرف شي
تسلموا على البوست كنيل من الجمال العذب ودي أجزله وأعمقه
10-01-2007, 11:31 AM
mamkouna
mamkouna
تاريخ التسجيل: 12-05-2004
مجموع المشاركات: 2246
* فعلاً و زي ما قال ود البنا...كانت الحلقة عن الغناء المأخوذ من المديح..أو الألحان التي تحوٌلت إلى أغنيات غزل بعد أن كانت مدائح نبوية.
* ذكر أبو الكلام أنه لاحظ اليومين ديل..إنو في ألحان أغاني عادية..تتحول إلى مدائح نبوية..فقال دا زي التشيل من المجرى..و تودي البحر...لأن العكس هو ما حدث في مسيرة الغناء السوداني.
* ذكر أبو الكلام أن أشهر أهل الفن السوداني القديم ك كرومة,,سرور..الأمين برهان..أقتبسوا ألحان أغنياتهم من المديح...و بالتحديد من مدائح الشيخ أحمد أب شريعة...الذي تأثروا به..نظماً و لحناً و إسلوباً.
* وُلِدَ الشيخ أحمد أب شريعة في منطقة البطانة قبل المهدية.درس في الخلوة و تميٌز بصوته العذب في التلاوة. صار بعد ذلك (( زمٌال )) أي شيٌال مع المداحين و كان يجوب مناطق السودان المختلفة مادحاً الرسول عليه أفضل الصلاة و السلام.
* من لحن مدحته الشهيرة (( صلاةُ الله ذو الأيدِ )) أُخِذ لحن (( جوهر صدر المحافل ))... تغنت بها...أسرار بابكر و المجموعة.
* من لحن مدحته الشهيرة (( الرسول سيد أسماء ))..لحٌن الشاعر عمر البنا أغنيته المشهورة (( في الليل الهاجع )). بدأ غناءها عصام محمد نور...و تمٌاها ليهو..ود البنا.
* من لحن مدحته (( على النبي المختار )) إقتبس الحاج سرور لحن أغنيته (( صفوة جمالك )) غناها لنا..عصام محمد نور.
* ذكر أبو الكلام أن أب شريعة إشتهر ب (( لِ متين )) إي (( إلى متى )).. و من مدائحه اللمتينية...(( لمتين للرسول..أسري )) كما ذكر أن إبراهيم عوض أيضاً إقتبس من (( متين يا المهدي نتلاقى...على الكوثر بلا عادة)) ...لحن أغنيته (( متين يا روحي نتلاقى..فراقك نارو حرٌاقة )). غنى مقطع منها...نادر خضر.
* ذكر أبو الكلام أن أثر أب شريعة إستمر حتى الجيل الثالث من شعراء الحقيبة.
* ذكر حاجة فيها إسم الشيخ (( من الله )) و مدحة تقول كلماتها.. يا الكريم أنقلنا..للديار الفيها....!!!! طه مدحو شغلنا.. (( معليش ما متذكرة الحتة دي ))!!! عووووووووك يا الزووووول.
* خُتمت الجلسة خير ختام...بأغنية.. (( الرشيم الأخضر..في الخديد الأنضر..هم سبب آلامي )).. شدا بها..فرفور.
بره الموضوع :-
* كانت في ضيافة (( بطن بيتي )) مساء اليوم..سيدة الخواطر الدافئة..إشراق ضرار و كانت سعادتي قصوى..لمن عرفت إنها بتتابع البوست دا كل يوم. تقبلوا تحياتها.... و يا ناس الشيخ و مرتضى و ود البنا الشايلين حالي..و قاعدين لي على الهبشة.. أنا لمن أفٌوٌت الحلقة...بكون بعمل في حملات ترويجية للبرنامج و...البوست..!!!
10-01-2007, 00:44 AM
mamkouna
mamkouna
تاريخ التسجيل: 12-05-2004
مجموع المشاركات: 2246
إشراق ضرار لمن لا يعرفها.. شاعرة رقيقة و جميلة...و صديقة قريبة و حبيبة.. و زميلة إسفيرية عزيزة من بطن بيتنا التاني (( سودانيات )).. لديها قدرة عجيبة على تطويع اللغة و تشكيلها...لتخرج إلينا في شكل خواطر إسبوعية..و أحياناً عندما تبخل علينا..شهرية.. دي كانت آخر خواطرها... خاطرة 45
الي رجل ....تأريخ ...! .....
اللحظة الاشهي بين اللحظات المقطوعة من جلد النهارات الحارة اللحظة الاخصب بين اللحظات الغائرة في عمق الارض المجدبة
لحظة هي، لحظة النشوة العارمة، الصادقة، المزمجرة! نشوة انطلاق زغاريد الفرح بعد ان رصّع الكون نبأ البشارات ...
اللحظة الازلية من بين كل اللحظات التي توالت علي عمرها اكثرها دهشة اعمقها فرحة وانبضها حسا
الساعة الماطرة التي انتظرتها بفارغ الغيم ها هي تهطل بالبشارة و النبوة فتهلّل السماوات والارض . ... "انني احمل نبضي ونبضك مجتمعين في نبض صغير لمّا يزال خفقة بعد.....!"
هكذا قالت له وهي تخبره ببعض خجل وكثير فرح وكبير خوف هو سيبي ودفقك مرحي وفرحك بكائي وأنينك هياجي ونشوتك خوفي ورعونتك
هو بعض حلمي وبعض حلمك، أحمله كله في دمي مضرّجاً بدمي ودمك كائنا مخلوقا من الحب
الانبهار الصارخ رغم حتمية النبض الدهشة المزلزلة ..رغم طبيعة الخفقات
من بين كل الدهشات والمعجزات تبقى هي اللحظة الاكثر احتداما في النفس التناقض بين الرفض القاطع ..والايجاب اليقين والدهشة والدهشة والإيمان المحض بالخلاّق العليم!
(2)
قال لها وقد تفتحت اوردة الفرح والرهبة بداخله :" ؟أهي بنت ...؟"
قالت، في احتفائها العارف المتسربل بغلائل الدهشة والدعابة والانبهار:
هي اوائل غسق التخلق ، و النبض لمّا يشتعل بعد ....في دمي ... أيها الاخرق ..! ".. "فكيف لنا ان نتبين خيط الحب الابيض من خيط الالتزام الاسود .....؟"
كيف لنا ان ندرك ان كان اقحوانا او كانت قرنفلة ؟
ردت عليه...
فأجابها " لا يهمني كثيرا ان كان اقحوانا او قرنفلة ..اتوق فقط ان يحمل اسمك ، لآن أحرفه مغموسة في غدائر الشمس متوهجة كلما نطقت بها "
قالت له :" الآن أوقن ان بذرة الحب التي غرستها في ارض عشقي الخصبة قد انبتت عشبة ذات نبض سيكون لها سحر عينيك ولون شفتيك المزرق وانفك الانثوي ورجولتك الجامحة !
قال لها وهو يحاول جاهدا ان يتلبس لسان جدها غير الناطق بالعربية ..
" ألعن عكاريتك ...كم أحبك ..!!!"
10-01-2007, 01:04 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: أنا لمن أفٌوٌت الحلقة...بكون بعمل في حملات ترويجية للبرنامج و...البوست..!!!
عجيبة .. وانا ليه ما فكرت في حكاية تروييج البرنامج دي امبارح ..مرة واحدة اللوري اتعطل وغرز وبشتفتو حالي "وين الفيدو؟ ؟؟ وانتي كلو ليلة بر بطن بيتك وكمان جو بطن بيتك مزوغة وطالعة حملة ترويجية وما في زولا يقول بغم الا انا .. اها انا طالع حملة ترويجيةلاعادة البرنامج طوالي كل 3 شهور بشان سنة كتيرة والظروف بقت ما معروفة مع الاتحاد الافريقي والبخرات
10-01-2007, 02:58 AM
الزوول
الزوول
تاريخ التسجيل: 05-14-2003
مجموع المشاركات: 2463
Quote: • ذكر حاجة فيها إسم الشيخ (( من الله )) و مدحة تقول كلماتها.. يا الكريم أنقلنا..للديار الفيها....!!!! طه مدحو شغلنا.. (( معليش ما متذكرة الحتة دي ))!!! عووووووووك يا الزووووول.
قال أبو الكلام أن لأبوشريعة قصيدة مشهورة بصوت حاج التوم من الله وهو والد الكاتب الساخر والمخرج فيما بعد صلاح التوم ( دي من عندي) ويقول فيها يا كريماً قلنا للديار الفيها البريدو عقلنا طه مدحو شغلنا
أخذ محمد بشير عتيق اللحن وركب عليه أغنية من أشهر الأغاني للفنان عبد الرحيم الأمين ، حتى وإنه اشتهر بها فصار اسمه (عبدالرحيم الأمين الرشيم الأخضر) .................. برة بطن الموضوع: • فضحتينا يا (سارة) ... عليك الله جوهر صدر المحافل المافي زول في الدنيا دي ما غناها ، ما حافظاها ؟؟ وكمان بخرتك عينك عينك • يا فردتنا ... بى عين الرحمة والرضا (يرعاني )؟ أظن انها ... يلفاني ما يرعاني أو كما يقول عوض الكريم عبدالله • كما ذكر أن إبراهيم عوض أيضاً إقتبس من (( متين يا المهدي نتلاقى...على الكوثر بلا عادة)) متين يا المهدي نتلاقى ...على الكوثر بلا عاقة • أثبت أبو الكلام أن ثقافته الواسعة تشمل فيما تشمل المدائح ايضاً ... فالطريقة التي كان يترنم بها بالمدائح ( من غير بخرات ) تدل على المامه الواسع بهذا الفن • أبوبكر .... ؟؟ قسمكم (قسم الفيديو ) حاصل فيهو شنو
................ وما الناس إلا هالك وأبن هالك *** وذو نسب في الهالكين عريق
10-01-2007, 04:26 AM
الزوول
الزوول
تاريخ التسجيل: 05-14-2003
مجموع المشاركات: 2463
السلام عليكم مدير الفيديو أبوبكر الحاصل شنو ؟؟؟ أأطع نفسي عموماً نقوم بالواجب .... إلى حين في الليل الهاجع وقبلها المدحة التي اُقتبس لحنها بصوت أبو الكلام
............................. وما الناس إلا هالك وأبن هالك *** وذو نسب في الهالكين عريق
10-01-2007, 09:41 AM
abubakr
abubakr
تاريخ التسجيل: 04-22-2002
مجموع المشاركات: 16044
معقولة دي ؟ تطلع نفسك وين ؟ تمبس عاداك ؟؟ انت بس لو شفتني بعد الحلقة 3 ساعات ما رفعت الفيديو والذي منو دي يعني عيييييك عدييل مع اني حاجتهد خالص بدون بخرات واكمل ....
10-01-2007, 04:35 AM
abubakr
abubakr
تاريخ التسجيل: 04-22-2002
مجموع المشاركات: 16044
ياشباب انتو شابكننا الخرطوم تقرء وبيروت تطبع سااااي ؟؟ ما بتقرو الكلام البيتكب بس تسمعو غني ... انا نضمت عن نظرية المؤامرة وكمبيوطراتي الاتدشدشن وانو حاقضي ساعات اصلحن وانو وانو وكمان اقترحت "بخور تيمان " من العين العاينة وانتو لا من شاف لا من دري ... اها الحلقة تمناشر في المشمش ؟؟؟ وخلو ملاسي يشوف ليكم حلل؟ الحلقة 18 مسجلة فيديو وحنشوف طريقة نعمل ليها اينكودنق يوما ما ونرفعها في بكانها وقبل العيد ...لكن لو فيصل نوبي رسل لي المسجلن باي فورمات انا بغيرن وبرفعن بشان ابومهيار ما يكجن ولدنا تاني ....
كفر الله سيئاتك وكتر خيرك الناس هنا بقت كدايس بس تاكل بس .. الخ (تشوف بس) مافي زولن قالي كفارة غيرك وانا الضيعت ساعات طويلة مساء الامس اسجل وفيديو واصلح كمبيوترات ( اصلح حلل !!) ..دة كلو هين وبس الغاظني وانا متشبرك اشوف شوية واصلح شوية البخرات الكانو شايلنها عيان بيان تحت( مش امام) الكامير ورغم انف المراقبيين والممتحنين بس انا شفت محمدية ما مرتااح خالص وليهو حق بعد العمر الطويل دة مع الحافظيين ؟؟ يعني هسع انا بعد كام وتلاتين سنة شغال بناء وجو ساءلوني عن الطوب امشي لحد الكماين واجي راجع واقول .. هو الدخول للاستوديوهات دي سااي .. يعني انا اشيل بخراتي واجييكم يافردتنا.. ؟ الامتحانات بقت سااااهلة خالص عندكم بشان كدة البروفات كترو ( زماااانك كانو بيقولو عليها البروفسورات هسع ناس د.همزة عوض او حمزة عوض شابكننا يابروف يابروف بس بينسو النقطة (full stop ) البعد بروف .. هسع لو الحلقات الجاية كلها بخرات طيب انا حارق زيتي( دة ما زيت عباد الشمس بتاع الدعاية الفي نقسك بكان البرنامج دة) في شنو ..؟ انا ما عارف المرتضي مالو ومال قرايبنا الفي القرن الافريقي وناس كوناكري ؟ يعني هسع البخرة واللا الوحدة الافريقية احسن ؟..
Quote: (يا حليلكم والله بعد إنتهاء رمضان )
ما عليكي بالبخرات دي اكييد فيها اعادة السنة اها زي زمانك كان عميد كلية العلوم معروف بانو بيكتل الطلبة خوف ايام النتائج في مارس شهر الكوارث وقفنا صفوف صفوف ويبدء فلان الفلاني والواحد يجي طالع مزغطط ويقوم يعاين ليهو مليا( مليا "دي عربي) و dismissed وصاحبنا يرجع محوص اما الاعادة repeat the year فكانت عادية خااالص ( ما القراية كانت مجانا وفيها بيرسري ) اها ناس فردتنا يمكن يدوهم بيرسري مع الاعادة ...
10-01-2007, 09:57 AM
نجوان
نجوان
تاريخ التسجيل: 04-01-2006
مجموع المشاركات: 2641
يا باش البخرات دي من سمات العصر (ولم يعد إسمها بخرات لأنها ما مدسوسة).. الفنانين الكبار (في العالم الناطق بلغة الضاد دي) أصبحوا يغنّوا (أغانيهم ظاااتها) وعلى جنب منهم كراسة ضخمة بها كلمات الأغاني كمان خاتّنها في ستاند ظريف (في عيانا بيانا أكتر من كده ).. وكتّر خيرهم على الأقل غنّوها فعليا.. (بدلا عن ال lip singing الأصبح منتشر..)..
ما عندي مشكلة مع البخرات.. مشكلتي في غياب ال fashion police لأنه في جرائم كتيرة من النوع ده إرتُكبت في هذا البرنامج.. (أبشعها فرفور بالأمس.. بالغ والله)..
10-01-2007, 04:03 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: الفنانين الكبار (في العالم الناطق بلغة الضاد دي) أصبحوا يغنّوا (أغانيهم ظاااتها) وعلى جنب منهم كراسة ضخمة بها كلمات الأغاني كمان خاتّنها في ستاند ظريف (في عيانا بيانا أكتر من كده )..
وانا اقوول الجماعة مجتهديين خالص بذاكرو حتي هم بغنو ؟ انا عندي حساسية مع اللبس الما بيلبق (زي كما بقولو الناس هنا ) واها فرفور دة يا يفرفر يا يجي كل يوم وهو متنكر في جلابية ناس غير واخرها بقي بتاع بخرات كمان ..انا قلت قايلو مذاكر وحافظ زي فردتنا ....
10-01-2007, 10:14 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا باش كيفك ياخ، أنا ماعندي مشكله مع ناس كوناكري أو اوباسانقو ، على العكس أحترم فيهم اعتزازهم بزيهم الوطني الجميل بحق وهو يليق عليهم هم فقط لكن بصراحه ما جميل عند السودانيين بنفس الطريقه اللي مامكن جناح ام جَكّو تكون لايقه على توني بلير أو مثلا تلاقي كويزومي بتاع اليابان لابس على الله ، ما جايه مش كده؟ أنا ماعارف ليه لكن هي كده ، يعني مجرد إحساس رغم ذلك عندنا بنات سودانيات لائق عليهن زي الشعوب الأخرى ( المحبه للسلام) ناس أستر أويكي وبوزنيش بكيلا ، كلام الأزياء والتزيي ده بيذكرني واحد صاحبي قال لي كان شغال في فرع بنك أجنبي في السودان وجابو ليهم مدير لبناني فأصدر منشورا بأن يرتدي رؤساء الأقسام بذله كامله ، أها اليوم التاني عينك ما تشوفش إلا النور أي واحد مشا فتح السحاره وطلَع العجايب منها، المهم واحد فيهم بالغ عديل كده لأنو جا بحاجه كاروهات برتقالي بأخضر ببنفسجي يعني حاجه تزغلل فرآه المدير واقترب منه وهمس في أذنه قائلا: يا استاذ المنشور بتاعي دا ما ملزم.
Quote: برعاية شركة (......) للانتاج الفني ,تصدح \ المبدعة اسرار بابكر علي ضفاف النيل الخالد,بفندق شهرذادالعجوزة
ثالث ايام عيدالفطرالمبارك في امسية قاهرية تزدان القا بحضوركم
المتباهي
دا إعلان في صدر المنبر أو (المُعلاق) كما تسميه ممكونه أو المشلعيب في روايتي ، ورد في شكل بوست يعني تاكسي في شكل راكشا وما أظن يا بكري ساره تقدر تحفظ صدر المحافل من هنا للعيد. ربنا يحفظاويوفِقا..
10-01-2007, 02:42 PM
abubakr
abubakr
تاريخ التسجيل: 04-22-2002
مجموع المشاركات: 16044
Quote: بصراحه ما جميل عند السودانيين بنفس الطريقه اللي مامكن جناح ام جَكّو تكون لايقه على توني بلير أو مثلا تلاقي كويزومي بتاع اليابان لابس على الله
يا ودالمرتضي سلام .. اللبس الوطني لكل بلد يليق فطريا باهل ذات البلد ..هنالك علاقة روحية اولا او "المعتاد" تجمع الانسان مع لبسه الوطني حتي تناسق جسم الانسان حجما وشكلا مع لبسه الوطني يتضاءل امام تلك العلاقة فلا يهم كبيرا او صغيرا سمينا او ضعيفا ..فلذا نري لبس بلد معين في جسد انسان غريب حتي لو كان شبيها باهل البلد شكلا غير ملائم ..فجلاليبنا واثوابنا لنا وجلاليب اهل الخليج وعباءتهم لهم وكذلك جلاليب اهلنا في غرب افريقييا هي لهم مهما تقاربت الاشكال والسحن ...فكذلك بعض البلاد تتشابه في مبانيها وشوارعها لكل واحدة فيها او لها شيئا ما: غطاء عاما تشعر به ولا تراه او رائحة تميزها عن الاخري ..وعموما يغيظني لبس اي سوداني لبسا وطنيا هو لشعب اخر حتي الطاقية والتي استبدلوها بطواقي من الخليج وغرب ووسط افريقيا بدلا عن طواقيناالحمراء والخضراء والبيضاء الجميلة الخاصة بنا والتي لها مكا في ارثنا الغنائ ( عند النوبيين مثلا ) وكذلك ثياب وطرح وجرجار المراة السودانية التي لا اعرف لبسا للمراة السودانية اجمل من ذلك (وجهة نظر شخصية )...
حاشية : من النواقص في اعداد هذا البرنامج عدم وجود متخصص ما ينصح المشتركيين والمشتركات في خصوص ازيائهم فبرنامج يستمر شهرا كاملا ويستقطب انتباها كبيرا يجب الاستعداد له ( الا البخرات دي ما عارف كانو حيعملو فيها شنو ..يعني الواحد والواحدة مغني من غير كلمات..)
والله ياممكونه البيزعلني جد يقوم يجيك واحد من أديس أبابا توووش داخل المسالمه وحي العرب وينط بي فوق الحيطه في بيت الرائع الراحل إبراهيم عوض عبدالمجيد ويقول ليك متين يا روحي نتلاقى ومتين ياحبيبو نتشاقى و..غايتو. حقو أي زول ما حافظ جوهر صدر المحافل ما يدخل أستوديو نهائيا ، بالله مش حاجه تجيب السكري إنو زول بيغني في السودان وكمان يجي التلفزيون وما يكون حافظ ( في حُق نَهَدو قلوبنا قافل)؟ ياخ دي فرانك سيناترا بدوبي بيها الطابق البوخه the one who doubled the steam و شارل أزنافورعامل منها رمية Apres toi وياما بعدك شفت الألم بالفرنسي . يا اخوانا الشال طبشيره و (شَخَّت ) القماش اللابسو (حركات) ده منو؟ قال لي صديق لم يشاهد (حركات) من قبل : انت يا اخوي ده عمر كوناكري ولاسفير بوركينا فاسو ؟ ودي أغاني وأغاني ولاّ الساحل والصحراء؟ تعرف يا عاصم زي ما قالت أختنا نهال ، الجماعة ديل كانوا شغالين بروفه وكل واحد شايل ورقتو يغني منها والحلقه بقت زي شراب الشاي بالتمر أو متابعة الترجمة أثناء مشاهدة الفيلم ما تعرف تركِّز مع شنو وباعتبارك الوحيد الماكان عندك (بخره) كان تقول لساره : أمشي أقعدي مع خَيَانِك ديل شان أديكم إملاء. ممكونه :
Quote: هو بعض حلمي وبعض حلمك، أحمله كله في دمي مضرّجاً بدمي ودمك كائنا مخلوقا من الحب
بالله ممكن تسلفينا أعمال إشراقه ضرار لل (الحب في المنبر)؟ ما تقولي لي إلعن عكاريتك.
10-01-2007, 11:45 AM
Souad Taj-Elsir
Souad Taj-Elsir
تاريخ التسجيل: 05-30-2007
مجموع المشاركات: 3100
(1) أي كون لا يسعك .. يضيق بكواكبه أي زمان لا يجود بك ... تنتحر ساعاته أي أرض لا تحملك ... تظل بوار أي ابتسامة ... لا تضئ من وجهك .... تعلن خاتمة المهرجان أي شعر يغفل عن عطرك .. تختل موازين وروده وقرنفله وياسمينه أي حمائم لا تهدل باسمك ... تنتحب منها ممالك السجع أي قمر لا يعلن عن انهمار ضوءك ... ينخسف أي غمام ، لا يهطل بحنانك ... تغور امواهه حسرة في صحاري الرهق أي حرف لا ينبض باسمك ... أنفيه من مملكة الكلام وأي قصيدة لا تغنيك ...أعلن عليها الحرب الآن وباسم جميع النساء وباسم جميع العاشقات أعلن أنني بحبك قد توجت مليكة الشمس
.......
(2) أراك في حلمي كل ليلة تطل من شرفات القمر وتمسك الانجم بيديك اتطلع اليك في عليائك متوسلة ان تأخذني اليك وان تغدق علي بعض ازهارك فتجلجل ضحكاتك أركان السماء وتقول لي:" يامجنونة.... ينبغي ان تكوني رحيقا تمتصه نحال العشق لتصلي الي أني لي .. وانت كل العطر ؟؟ أي سلم من الشوق أرتقي؟ أي درج من اللهفة اصعد؟ لاجدك؟؟
.... (3) متي تفجأني مواسم القمح بالنضج قبل الشتاء ؟؟ متي سيتفجّر النهر خصبا بلون الفرح ..؟؟
متى يلبس ليلي القمر؟؟
... (4) بحت لك ذات بكاء بان الدموع التي تغرق حرفي لن تكف عن الانهمار ..حتى تعانق ابتسامتك
... (5) حلمت بأنني أستحم في ضوءك .. ذات مدينة فأهديتني شفتيك منشفة
... (6) سافرت في اخضرار ضحكتك وفي ندى صوتك حتى آخر حدود السنابل وارسلت لك بطاقة حب بلون العشب فهل فاح شوقي في بريدك؟؟
10-01-2007, 12:42 PM
Hussein Mallasi
Hussein Mallasi
تاريخ التسجيل: 09-28-2003
مجموع المشاركات: 26230
هو في جمهور غيري؟ عموما الف مرحب بيها باسم الجمهور (الهو انا) وزوار المكتبة الفنية يمكن تجي وتشوف لينا حل في "المؤامرة" الحاصلة : يوم ارسال مقطوع ويوم كمبيوترات ضاربة وتمبس غائب وبخرات كترت اليوميين دييل ...
10-01-2007, 07:01 PM
abubakr
abubakr
تاريخ التسجيل: 04-22-2002
مجموع المشاركات: 16044
حلقة تسعتاشر عن غناء الشياليين والكورس الذي له تاريخ صار قرنا ( ودالفكي اول من ادخل الكورس في 1908 .. اها يعني تحتفلو بالعيد المئوي السنة الجاية انشاء الله )...
دي بس تصبيرة لانو نظرية المؤامرة شغالة والليلة يوتيوب الان موقفة بعض الوظائف لرفع الفيديو نسبة للصيانة الاسبوعية يمكن تاخد وقت مش عارف بس صبرا صبرا ....
حاشية :1- بتاع الكامير رجع يزاول تصويرو للقفاوات 2- الواحد بقي يلاوز لما يشوف الشباب بيعاينو للتحت يمكن تكون في بخرة والليلة فرفور كان ما بيفرفر وبعاين تحت وهو بيغني وبتاع الكامير ابي ينزلها شوية نشوف البخرة وين ونفس الحركة سواها نادر خضر وانا كنت مشغول بس القي البخرة عشان اطلعم من الفصل ..؟
10-02-2007, 00:52 AM
mamkouna
mamkouna
تاريخ التسجيل: 12-05-2004
مجموع المشاركات: 2246
* كانت حلقة اليوم عن الغناء الجماعي أو (( الكورَس )).
* ذكر أبو الكلام أن الكورَس بدأ من زمن الغناء الشعبي...و ظهر جلياً في المدائح النبوية...حين يبدأ المادح في مدح الرسول (( عليه أفضل الصلاة و السلام ))..ثم يُردد الزُمٌال أو الشيالين وراءه المدحة..حتى تتحول الحلَقَة كلها إلى مادحين.
* عمنا الشيخ ود الفكي أدخل الكورَس في أغاني الطنبور عام 1908 ..و أغاني الطنبور كما هو معروف..أغاني شعبية.
* إشتهر محمد ود الرضي بِ (( الرميات ))..و أظنها بداية للمدحة..و كان يُدخِل عمل الكورَس في الرميات.. مثلاً..رمية.. سبب نوحي..و سبب دمعي الدوام جاري..جاري!! و غناها بنفسه...عمنا السر قدور...!!!
* بعد كدا تطٌور الدور الكورَسي..فأصبح الكورَس يُشارك في الغناء.. و من أشهر من إعتمد على الكورَس..عمنا سرور.. و من أمثلة ذلك..أغنية..أجلي النظر يا صاحي... و غناها بنفسه..مرة أخرى...عمنا السر قدور..!!!
* أدخل كذلك كرومة الكورَس في أغنية ...من كلمات محمد بشير عتيق.. (( ذُبت وجداً في هواك..يا حبيبي و لم أزل..عايش على سفح الأمل )) غناها لينا...فرفور.
* إنتقل بعد ذلك الكورَس إلى الغناء الحديث...و ظهر جلياً في أعمال الأستاذ محمد وردي.. أختارت المجموعة أغنية (( الليلة يا سمراء )) ذات اللحن الشعبي.. غناها لينا...نادر خضر.
* ذكر أبو الكلام أن من أكتر الفنانين الحديثين الأشركوا الكورَس...الفنان عثمان الشفيع..صاحب أكبر رصيد من أغنيات الكورَس... أختار أبو الكلام أغنية (( أيامنا..يا النسيت أيامنا ))... غنتها لنا...أسرار بابكر.
* أختار أيضاً أغنية سمعناها من أكثر من صوت..عثمان الشفيع... فاطمة الحاج..و..آخرين.. أغنية (( حبيتو ما حبٌاني..إتذكرتوا قام..نساني..ليه...أنا مالي )) غناها لينا...عصام محمد نور.. (( إن شالله خالة الجريفاوي تكون شافتها ))!!!
* ذكر أبو الكلام أن (( صالح عبد السيد أبو صلاح )) هو شيخ مشايخ الأغنية السودانية..و هو عبقري في الشعر و في المدائح النبوية.و أنه من الروٌاد المؤسسين و الأكثر تأثيراً في شكل الأغنية السودانية.
* أختار لأبو صلاح أغنية (( يا سمير بنظرتك أوفي الميعاد ))... التى حكى أبو الكلام أنه كان يطالب بها دائماً الفنان المطرب (( أحمد الفرجوني )). تغنى بها.. و من غير بخرات.. فردتنا..ود البنا!
بره الموضوع :
*على الرغم من أن الحلقة كانت عن(( الكورَس )) و الشيالين و الغناء الجماعي.. لكن كان واضحاً..ملل و زهج الزٌمالين... الظاهر كلام ملاسي صح.. آثار الصيام ظهرت عليهم جميعاً بدون فرز..!!
10-02-2007, 01:07 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة