ألف شكر يا باشمهندس على الموال الجميل دا... رماز من الأصوات الجميلة و مُميزة..و من نجوم الغد الموعودين بمستقبل مشرق.
حقيقي عجبني أداءها للكثير من الأغنيات..و أحتفظ في كومبيوتري بأغنية البلابل (( البيسأل ما بيتوه )) بصوت رماز.. ...صوتها مُنساب بسلاسة و بتنفعل بكل جوارحها مع الأغنية.كما تتميز برزانة و رصانة.. و جمال هاديء لا يُخفى على العين..مما يزيد قوة حضورها و درجة تقبل الجمهور ليها..
يا ريت نسمع رأي (( عدو الفنانات الأول )) فيها.. يا ربي بعد بسكويت سارة...و زيت عافية..و مدام توسو.. ح يكون عندنا شنو؟؟!!
11-03-2007, 10:01 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: يا ريت نسمع رأي (( عدو الفنانات الأول )) فيها..
يا ممكونه والباش ، بصدق ما عندي عداء لفنانه بل العكس تماما وربما لحِظتما من مداخلاتي السابقه أني كنت أتباكى على البلابل وعائشه الفلاتيه والزمن السمح والأيام الخضر (أيام قرطبة)، كما عرضت للشابة نسرين هندي التي استمعت ل (إلبوم) تغنت فيه لعدد من المطربين بإجادة وكان أداءا مشجيا ثم شاهدتها مرة واحدة في تلفازنا تؤدي أغنية للراحل صلاح محمد عيسى فزاد إعجابي بها ليس لأنها أجادت بصوتها ولكن لأن لغة الجسد والتعابير المصاحبه للأداء كانت جد آسرة. (رماز) التي أشرت إليها لا أعرفها لكن إن كانت تلك التي غنّت (صبابة) في برنامج (نجوم الغد) فهي ممتازة لأن التي أعنيها كانت متمكنة وتغني بيسر وسلاسة مع صوت جميل ومخارج حروف واضحة ( مش زي الجماعه المخنوقين البيقوِموا النَفَس)، أها الكلام بجيب الكلام ، بعض اللي بيغنوا اليومين ديل من الفنانين الشباب في رأيي الخاص إنهم ما عندهم أدنى علاقة بالغناء سوى أن آبائهم أو بعض ذويهم من قبيلة الفن أو من المحسوبين عليها أو ما إلى ذلك ، ولعله ومن البدهيات أنك يمكنك تقديم مثل هؤلاء الى أجهزة الإعلام أو التطبيل لهم هنا أو في الوسائط المختلفة وسيبقون لفترة محدودة يطيرون بصواريخ الدفع وسرعان ما ينفد وقود المحسوبية ويذهبوا بعدها إلى مكانهم الطبيعي.
_____
تنويه:
شاهدت مؤخرا مدام توسو واعتذر بعد تلك المشاهدة عن ذلك اللقب وحاليا أفكر في تعديله إلى (باربي).
11-03-2007, 11:50 AM
abubakr abubakr
تاريخ التسجيل: 04-22-2002
مجموع المشاركات: 16044
يا باش ياها ذاتا (رماز) اللي أنا قاصدا وهي بالفعل متميزه وأعتقد إنها هسه في بدايةالمشوار ومستقبلا حاتكون أفضل بس أغنية البلابل (البيسأل مابتوه) دي البلابل بيعملوا فيها شغل حقهن براهن، في منحنى خطير في الأغنية بيقولوا فيهو (كان سألت علينا كنت عرفت نحن الليله وين) ما أظن تاني تقدر واحده تكررو. قلت ليك في مداخله عن فردتنا فوق إنو في حركة في الطيران كدا ما بتعملا إلا السوخوي الروسيه Sukhoi إسمها الكوبرا بتعمل فيها عربده بين السحب يبدو أنني أحتاج لوضعها هنا شان تشوفا وتآمن.
11-03-2007, 02:23 PM
abubakr abubakr
تاريخ التسجيل: 04-22-2002
مجموع المشاركات: 16044
يالمرتضي سومرسولت مع ارتداد للخلف ثم توجه الي الامام ما اظن عندنا كتار بيقدرو عليهو .. دى شغلانه عايزة تمكن فطري .. يعني ما ممكن الواحد يتعلما في اجعص معهد في الدنيا.. اغلب العندنا ياتوجه اماما او خلفا وشوية سايدووي موفيمنت ...
11-03-2007, 03:21 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
انت حوليتكم ما خلصت ؟؟ رماز غنت اغنية خاصة بها من تلحيين احمد الك وكلمات الحلنقي اول امبارح وقالت انو عندها انتاج خاص قادم لشعراء معروفيين واحمد المك قال انو هم بحضرو اغاني تانية ...المهم انك تتابع شوية الحاصل برة الحوليات بعدين انت ما شفت السوخوي الفوق دة ؟؟ اها فردتنا كان بيسوي زي السوخوي دة وهسع هو مقرشنو لانو من العيد تاني ما طار
11-03-2007, 05:05 PM
abubakr abubakr
تاريخ التسجيل: 04-22-2002
مجموع المشاركات: 16044
الموضوع دة شاغل بالي :: دائما بنضحك من المصريين في انهم بيورثو المهن لاولادم ومرات غصب يعني ابن/بنت المدرس في الجامعة لازم مدرس/ة وكذلك ضابط الشرطة والقاضي ..ولكن ما عندهم مغني يورث ابوه كما هو عندنا الايام دي وقبل فترة قصيرة استمعت لاكثر من اربعة من ابناء فنانيين كبار رحلو و بنت او ابن يغنون وهنالك ابناء فنانيين احياء يدفعون بابنائهم الي الساحة وهناك من الفنانيين من يحاول استنساخ صورة اخري منه باحتضان صوت وفي هذ الصدد اشير الي التوام اللاتي يغنيان لثنائي العاصمة .. ومن الفئة الاولي اي ابناء وبنات الفنانيين شاهدت او اشاهد الان بن خضر بشير وهو يقلده حتي في اشاراته وسكناته .. المرحوم خضر بشير لجيلي انا واجيال الستينات والسبعينات في جامعة الخرطوم كان يمثل لنا شهادة باننا طلاب في تلك الجامعة فقد كان معلما مهما ومميزا ففناننا الاول هو خضر بشير ثم ياتي بعده الاخرون مهما كانت مكانتهم .. فالمرحوم كان لا يغيب من اية حفلة في الجامعة ولا رحلاتناويغني لطلاب الجامعة مجانا وبمزاج وفي اي لحظة ولا يرفض لنا طلبا ...اذن فخضر بشير لم يكن صوتا غنائيا فقط كان تصرفا ومعاملة ومعاشرة فصار الطلاب كلهم جمهوره ..ان يحاول ابنه استنساخ ابيه بلبس جلبابه شكلا وصوتا واشارات لا يجعل منه ابيه وانما يثير فينا جمهور ابيه حسرة علي ابيه ..
الموهبة يندر أن تورث ياباش، قريبك وردي لم يكتف بالنأي عن المحسوبية وتقديم النحاس على أنه ذهبا بل بالغ في صدقيته بقوله أن إبنه لايصلح كمطرب. كنت ايضا سمعت بدرالدين عجاج يقول أن نانسي ليست مطربة جيدة أو هكذا كان المعنى. أما التوأم اللي بيغنوا لثنائي العاصمه ديل الله يكون في عونم.
11-04-2007, 09:26 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: يالمرتضي سومرسولت مع ارتداد للخلف ثم توجه الي الامام ما اظن عندنا كتار بيقدرو عليهو .. دى شغلانه عايزة تمكن فطري .. يعني ما ممكن الواحد يتعلما في اجعص معهد في الدنيا.. اغلب العندنا ياتوجه اماما او خلفا وشوية سايدووي موفيمنت ...
وطلعة السوخوي دي يا باش تعجبني منذ نعومة الأذن في رائعة الجميل أبوآمنه حامد سال من شعرها الذهب بصوت صلاح بن البادية ، عندو (طلعتين) من نوع الكوبرا وتحديدا في :
فارِه. مترف.. لــــدن فنن .. لا .. ولافنــــــــــن هدني الوجد والشـــجن في الهوي قلبي اغتـــــرب
قلت أنقلهم ليك بالكامل مع شكري لتوجيهاتك الفنية وتوجهاتك اللارطانية.
ود العباسيه، كيفك يا بَرَكَه، قلت لي الطياره دي بتعمل في شنو؟ دي موظفه في الأرصاد الجويه.
11-12-2007, 07:20 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: كمان ولده بيضيف عناصر تخليك تلف وتدور حول الزوجة الاولى لحدى المقابر
والله يا الطيب دي brilliant وزي ما بيقولوا مرضانين الكوره ناس تمبس دي في التمانيات. تعرف يا الطيب أثناء عطلتك في الدندر مع النهر الجاف المنبر ده طعمو بقى زي أكل الإسبتاليه ولم يعد له الألق إلا بقدومك ، شايف مصنع التلج ده كيف؟ قلت لي يلف ويدور حول الزوجة الأولى حتى المقابر؟ ذكرتني قلب الدينمو ، والله كلامك ده أعاين فيهو واضحك وامشي واجيهو راجع ووالله ما متلاعب ليسئلا لكن حالتك تحنن ، يعني هسه قصدك الواحد يكون maktoob وقايل روحو Yahoo ؟
العزيزة نجوان...و كل الحبايب.. سمعت كتير جداً عن الأوبريت دا و كان نفسي أشوفو..لكن للأسف كل مرة بشوفو من غير تركيز! مرة شفتو في الفضائية السودانية و كنت بره بطن بيتي ...as usual ... و أمبارح شفتو من جوووووه بطن بيتي لكن معايا ضيوف ..as usual برضو و لله الحمد.
عاوزة من الشافو الأوبريت في برنامج ((مشاوير)) يجاوبوا لي على سؤالين:
1/ ليه أمجد كان بيقول للكابلي..يا دكتور؟؟؟ 2/ هل الزولة الكانت بترقص و ملفوفة بعلم الإتحاديين...حواء الطقطاقة؟؟!!!
11-20-2007, 01:31 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: 1/ ليه أمجد كان بيقول للكابلي..يا دكتور؟؟؟ 2/ هل الزولة الكانت بترقص و ملفوفة بعلم الإتحاديين...حواء الطقطاقة؟؟
!!!
اها السعواليين دييل ما لاقي ليهن اجابات وكلو مرة اشوف الجزء دة-السعوال الاول- (كل يوم بجيبوه في البي ان ) وافتش السماعة والبالطو الابيض وما القاهم ؟؟ هو "دكتور" يعني شنو ؟ حكيم يعني واللا والي واللا وزير واللا رئيس نقابات واللا مدير واللا مذيع واللا مساعد رئيس جمهورية واللا مستشار واللا منشار ... شنو يعني جننتونا دكتور بروف دكتور بروف ...
اها اللابسع توب علم السودان انا بس عرفت النطارة اللابساها
11-20-2007, 01:42 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
Quote: شايف جابو للقطر دا مفتش جديد لنج يا ممكونه وشايفك انتي وأبوبكر وملاسي رحبتو بيهو ودي طلعه كويسه منكم .. مش قلت ليكم؟
أنا و الباشمهندس عملنا الواجب....ليس إلا.. لكن الناس الهوهوت و بأبأت و نونوت و كأكأت... و إحتفلت مع المفتش بيوم الطفل... ما عارفاهم ح يركبوا القطر دا تاني كيف.
حكمة اليوم:
إتقِ شرٌ من...كأكأتَ إليه!
11-20-2007, 09:55 PM
نجوان نجوان
تاريخ التسجيل: 04-01-2006
مجموع المشاركات: 2641
كابلي قمة دون شك.. لكن اللحن أتى فعلا متكلفا.. رغم التعقيد الظاهري إلا انه بسيط موسيقيا لدرجة الإحباط
يا ريت لو أوكلت المهمة للأستاذ وردي أو أبوالأمين فهؤلاء تخصص ملاحم.. ولأعطونا زوادة جديدة للتلاتين سنة القادمة.. _____ الكلمات إحتفت بالتعددية بسلاسة ووضوح لكن اللحن إبتذلها.. ______ كله كوم والدوبلاج كوم يا ود العباسية
11-21-2007, 03:23 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: الكلمات طبعا.. قوية غطّت المليون ميل بعمق..
اوبريت سوداني
كلمات الشريف زين العابدين الهندى
تلحين وغناء عبد الكريم الكابلى والكورال
مساهر ليلك الطول نجومه هجوع وغرقان قمره في جوه السحاب مصروع بصارع فيك ضلام تمن سنينه سبوع واراقب فجرك الآذن زمانه سطوع وشايلك سيف نصر لا يطيش ولاهو بزوغ ورابطك يي حشاي من العطش والجوع واسقيك مني دم ودموع واوقد لك جحيم وشموع واقش منك دموع الضيم على خدودك بتتحدر واقبل فيك جبين مرفوع كراية النصر وبيرق عزة رفرف في ركاب فاتحين واغسل لك تراب الهجرة باليدين راجيك المجد مدخور لك سنين ودنين من حبوبتك الوقفت ترد الدين وتطرد حملة الباشا ومع الغازين حليله مهيرة كاسرة التوب وحد الزين
**
ومن جدك بكبرفوق جبل سرغام ودافن ضهره في كرري ومتكنتل ركاب ولجام وسال في ايده سيف العود ببعج بيهو كبدة وهام وقبال دمه ما إرشح مع البارود اكون شتت عليك اجسام ** أجسام من غزاة ماقدروا اسبوك ولاكشفولك المقنع ولا في الشينة ختوك ولا حلولك احداقهم ولاهم قدروا ادنوك ومما فاتوا لي هسع بدوروا رضاك واطروك
**
وكيف انساك وذكراك لي دما هو عروق ومما الهجرة حلت ليهو لابسك انتي عمة وطوق وعايشك جوه وجدانه معايشة الحنين لي الشوق وممزوجة فيك ممازجة اللسان لي الضوق
**
بشوفك في عيون النيل وفي الاطفال وفي تاريخك الاخضر على الاجيال وفي بحر الدمي اللسع بجم سيال وفي مستقبلا واعد كبار وعيال بشوفك بشري فيك شقق جبال ورمال بترسم لي طريق نجم العشا الولوال وتكشف فيك اسرارا كتار واهوال
**
والقاك حتى في رمش الغريب الضال مهوم في اليمن لا الحامدي لا السلال والاقيك في الخليج مشرورة حالك حال واثكل فيك يبيعوك بي الدهب والمال
**
فلذاتك مبعثرة في البلاد مأجورة تبني على الرمال احلامها ثم قصورها خلوك سايبة في ايد الطغاة ماسورة شان ما اسلموك الحلبي روب في كورة
**
ابشري نحن لسع في الخلا مرابطين ونحن عقاب عهود انصار مع مهاجرين ونحن سهارى ما بنعرف غمضة العين ونحن فداك نذود عنك بقالنا سنين حالفين بيك قسم غالي وعزيز ويمين مانضوق راحة لانشوف زوجة لا والدين ولا ندفن رؤوسنا على الرمال خايفين حتى نوقي من اشلانا اعلامك على القصرين وحتى نسوي لي القصفوك مقبرتين زي ما صنعنا تاره على الالف الفين وحتى انكسر القيد وانقسم نصين واكون عيدنا الكبير في مقرن النيلين
**
ومابننساك عشان اطراك في الازمان قريب منك قرابة الحدقة لي الانسان وجايل فيك جولة الدم على الوردان وقيمتك عنده زي قيمتك معاهو زمان
**
بعيشك هضة بتشارف تلال قيسان ويحياك موية في دارفور تبل عشطان واديم فيك من سنار ترع خزان وادفق خيره بي عند الرهد بستان واقول لي الدندر الغاضب كفاك جيشان واسهر لي وليداتك اعشى الحاري والجيعان
** منو الزيك ولد واستالد الاولاد منو الزيك يجيبهم ديمة عشرة انداد منو الزيك ببز الدنيا موية وزاد منو الزيك ضروع وزروع ونيل مداد منو الزيك بطان وغابة دون حداد منو الزيك سهول وادي وجبال اوتاد منو الزيك اصل موروث من الاجداد منو الزيك جراتق دم قدام وجداد قشى الدمعة يابت الرجال مابحكموك اولاد
**
بت الحر وام الحر واخت الحر وست الضنبة مردوم بي وراهو بجر ست الفي الخشش من العصير بنتر ست الخيل وست الفي القلوب بنقر وام الحلفو بيك وبي العذاب المر مابختولك الشينة ومناحة كر
**
اولادك فضلة الموت وبتلجوبو ودائماً سيرته في لسانهم ويتسلوبو وزرعك من زمان المهدي طارح دوبو واحدين بحصدوا وواحدين بكفو دروبو
**
تيلادك مسكر في الخزن محروس هجليج واندراب ومهوقني وابنوس ومن صمغ الهشاب سوي السنط ترتوس ومن شدر التبلدي الموية كوس في كوس ومن ضل النخيل الشمس دايرة تكوس ومن حرب المطر فرع الحراز مدروس ومن شوك السدر جيش السلم هكسوس ومن زهر التبر البادية باقية عروس وبي توب البرم سوي الطلح مبلوس ومن شدر الاراك عطر الرعاش مبثوث ومن سيف العشر جيش هكس صار مهروس والدوام واج بقيف الابتراوي خروس
**
فيك الفيل وفيك العنزة والجاموس وفيك التيتل اللبات قرونه تروس وفيك الاصلة والدابي اب درق وجروس وفيك ريل الودي البي ناله راتع اجوس وفيك صقر الكواهلة العينو كالفانوس وفيك فهود وفيك نور وفيك طاؤوس وفي نيلك عشاري اشيل من الجاقوس
وفيك بحر الجبل حاقب عري الرجاف وفيك بحر الغزال والجور وبحر زراف وفيك سوباط ملولو زي دبيبا خاف وفيك بحر العرب مليان نعام وزراف وفيك بحيرة قال (نو) سيده ما الاسلاف وفيك خور اب حبل شاقي البلد كشاف وفيك تمت العظيم شايل الكليت والشاف وفيك خور الدهب ذو الذكرى والاعراف وعندك مقرناً حرم سواك ما انشاف
**
وعندك الف خور في الوادي والفين رافد وحسبان الجزائر والجروف ماوارد والنبرو الحبيب لي عودو سيدو اقالد والساقية الحنين توريقها باكي وساهد والبلدات ونجاضات حليلة فايد وسمسم وام صقور وسهل قبوب ود زايد وصقيعة ام بليل براقها قايم وقاعد والمطر البكب اربع شهور ويدارد وفيك قنبلية كمبو سته الوارد وام سنات تغازل دوكة ماشه تحادد اسفاي بقول لي الفشقة بهمك شارد كونه الفار بقت ترع وجناين وموارد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
abubakr
mamkouna
محمد المرتضى حامد
ودالعباسية
الطيب شيقوق
نجوان
Hussein Mallasi
فيس بوك
تويتر
انستقرام
يوتيوب
بنتيريست