|
Re: الدوبيت ... أوجاع القصيد ... (Re: مجاهد عبد الرحمن)
|
مجاهد يازول الدرب دا طويل.. الا تشد ناقتك..وتورك معاك لجنيات الخمية..القاعدين يشربو فى الجبنة ديلك نمو قبلك وفترو.كانت عندهم خيمة الحاردلو قيسان سيف كلى اهل العوض شنتير سنجاوى الملا عمر
لكن انا بشد معاك تانى...وفوق درب جدنا ود شورانى.
الليل امسى والبل حررنو مشهين عقبن موية والجبل اب قرود راجيهن دا الخلانى فرض الخمسة ما مقضيهن رزق الدنيا والمحن البصارع فيهن
| |
|
|
|
|
|
|
Re: الدوبيت ... أوجاع القصيد ... (Re: abuguta)
|
أبو قوته الشكر كتير على السربه وهاك دي للشاعر ود ضحوية
الليل أمسى والنعسان جرايدو بدحن كبس الهم علي السلط قلوبن وحن كضم الجره سحار الغروب وإتمحن نعود سلمانه يا عمر الظنون إن صحن
ولنا عودة واصل
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
أبوقوته أخوي حبابك وحباب ناس الخيمة في نمتنا البتفرق الهم دحين شخينا ود ضحوية قال في واحد من مربعاته بوصف الحاله الما بداويها إلا النمة والدوبيت :
يوماً كربتيت ويوماً عشانا ربيت ويوماً نسف التابا وعليها نبيت
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
وقال عكير الدامر رحمه الله
ممشوق القوام الما وجدت نظيرو جفاهو إلي أخير لي من محنة غيرو جافاني العزيز الكنت ديمه نصيرو هو يسوي الغلط وأنا أسوي كَتّر خيرو
شبال صغير :
أتهجرني وتورثني إلتياعاً وكنت الشمس تشرق في حياتي وحبك قد تفجر في الحنايا ينابيعاً من العذب الفرات تعاتبني بأني قد ذممتك وهل أقوى على تجريح ذاتي فإن عدتم فيا سعدي بعودٍ يعطر بالمودة أمسياتي وإن كان الفراق جزاء صبري فإن القبر أولى بالرفات
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
وللحاردلو نصيب من الكلام الرصين ففي إحدى المرات زار حديقة الحيوان فوجد شبل الأسد داخل القفص فخاطبه بقوله :
جابوك للبنادر ساكت درادر وضيعه وأمك في الحريم ماها المرا السمّيعه نترات ناس أبوك اللرجال لويعه وإتّ إن كان كبر جنباً تقلب البيعة
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
وقال الحارداو :
يا رب العباد أنا قلبي كاتم سرو ما لقيت من يدرك المعنى بيهو أبرو قصبة منصح الوادي المخدر درو قعدت قلبي تطويه وكل ساعة تفرو
وقال عمر بن أبي ربيعة :
أيا من كان لي بصراًً وسمعاًً فكيف السلو عن بصري وسمعي يقول العاذلون نأت فدعها وذلك حين تهيامي وولعي ً أأهجرها وأقعد لا أراها وأقطعها وما همت بقطعي وأقسم لو حلمت بهجر هندٍ لضاق بهجرها في النوم زرعي
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
وقال الحاردلو :
عبد الإله أخوي السيسبان مأنوس وفوق ضلو الرهين راتعات معيز أم روس الفي عينو حمره وإيدو فيها فلوس إن ختا ها الملم ما أظنو يلقى عروس
وقال حكيم :
إن ختا ها البورد ما أظنو يلقى عروس ... صحي الكلام دا ... ؟؟؟
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
قال ود الرضي رحمه الله عندما رأى سرباً من الحسان :
إعاينن توبتي في كامن ضميري ويمحن والشاف فاتن جمالن وإنتشارن يمحن قلوباً ما إنكوت بى نار غرامن قمحن الله يكبرن الكبرني وسمحن
وقال حسن عوض أبو العلا رحمه الله في قصيدة أسراب الحسان :
أتركوها في ذراها ودعوني لجواها شغل القلب هواها وهي لا تدري الهوى كم تمنيت لقاها وتمناني النوى
| |
|
|
|
|
|
|
Re: الدوبيت ... أوجاع القصيد ... (Re: أبو عبيدة البصاص)
|
أبو عبيدة البصاص
تسلم يا غالي ... شاكرين على المداخلة ... الله يحفظ الصيد من كل شر .
ولك مني :
يا ريح الصبا الجيتينا من أبو سالف شايله سماح عطوراً سيدا عالف وكالف الخلاني فوق نيران جهنم خالف حار باللحيل فراق الزول بعد ما يوالف
| |
|
|
|
|
|
|
Re: الدوبيت ... أوجاع القصيد ... (Re: abuguta)
|
سلام يامجاهد أخوي
جيناك في دارك نسديك مسدارك وأهلك العرب قالوا الدائن يخلص
نميمك بالحيل قلب علينا المواجع وهاك مربوع من طه ودالشلهمة :
مالكن شيبنا بتدورن تخربن كبرو ومالو قلبنا عودتنو لى قل صبرو نسيتننا الموت الشــبر في قبرو خليتننا الأعوج نســـي ومانخبرو
ولنا عودة ...... سمية طلحة
| |
|
|
|
|
|
|
Re: الدوبيت ... أوجاع القصيد ... (Re: سمية الحسن طلحة)
|
قالت الخنساء : مرحب بيك كتير بت الكرم والعفة نوَّرتى المكان شال من لهيجك كفَّى ياست الحروف ميزانا جنبك خفَّ أهلاً بالبطانة زايدة فينا الإلفة
ومني لك: مرحب بيك كتير بت الكرم والعزة بت ناساً عزاز بينين نحاسم رز يا ست الحروف طيب البطانة النزا نورتي الديار والخنسا بيك تعتز
قال المفتاح : الفين مراحب بالخريف الجانا مو رعدا بكضب رشو ما بغشانا مطرا بلو ظاهر زى تقول فى بطانا ناس ود طلحه عوووك أرحمونا كفانا
ومني لك : ألفين مراحب بالبدر في دجانا مو برقاً يلوح بي ضو ما عمانا قمراً بق ظاهر للسمر نادانا ود مفتاح وإنتي وبالخنسا تب لمانا
ومني لك : مرحبتين حباب ناس الشعر والبادية مرحبتين كتير نفح البطانة النادية هيجتو الشجون وأشواقنا صبحت بادية لأرض الكرام دار ناس أبوي يا نادية
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
يا خدرة المفرهده في جروفا نديه على الواقع وراك كيفن بشيل إيديا حتى إن كان كتلني عافي ليه الديه مالي ودمي ليك أقبليه هدية
(العبادي على لسان طه )
أختي سميه باالله ما تقطعي الجيه وطبع الكريم ما بجيك إيدو فاضية ... ود الشلهمه ومن هم على وزنه نحتاجهم كثيراً دمتي في رعاية الله .
شكراً على الطلة والمرور .
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
أبو قوته الحبيب :
تسلم للنمة والدوباي :
الشجر إن وقع بتكسرن فراعو وقمحان الطلب للما بجيبو ضراعو ليه يا أخوانا للبيناتنا ما بتراعو البقول راسو موجعو بربطولو كراعو
( العبادي على لسان ود دكين )
ننتظر جيتك بالثمينة
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
ما بابى المسيكين والفقير بي فقرو وما عواس قوالة وما رفيقي بعقرو بدخل لجة الوادي البتلب صقرو قلبي مكجن الناس السوا وبتنقرو
مو ولدا بدر فرح القريبات دقرو مو حساس محرق ولدو فوقو وعقرو عقاد القصص جحر الدبيب من مقرو راعى غنم هناى بقر اللعين من بقرو
منصور
| |
|
|
|
|
|
|
Re: الدوبيت ... أوجاع القصيد ... (Re: مجاهد عبد الرحمن)
|
عندى بيتين داير لى زول يتمهن مادام الرزق من الله موبى ضراعنا نرضو بنبسطو ونرجع نشوف اوضاعنا 000000000000000000000000000000 00000000000000000000000000000 التانى بقول الدايرنى والمابينى محلول ربطو لابسعدنى لابشقينى من حوض الجرايم ضق شرب بى هينى وحلف بالله ماتكسر برا البانيتى خالد المحرب
| |
|
|
|
|
|
|
Re: الدوبيت ... أوجاع القصيد ... (Re: khalid almohrib)
|
اللو خالقك ولا صارف عليك موجود زعلو عليك متل خنق الحبل في العود الأرزاق مقسمه والعمر محدود والهوى عن كريماً بابو مو مسدود
دي تصبيرة يا خالد بعد الشكر الكتير ... لكن البيتين ديل هم أصلاً بتاعين واحد وانت عايز زول يتذكر ليك باقي المربع ولا انت كتبتهم وعايز زول يكتب البيتين الباقيين ... ... نرجو التوضيح وأبشر بالخير يا الحبيب ...
| |
|
|
|
|
|
|
Re: الدوبيت ... أوجاع القصيد ... (Re: khalid almohrib)
|
الدايرنى والمابينى محلول ربطو لابسعدنى لابشقينى من حوض الجرايم ضق شرب بى هينى وحلف بالله ماتكسر برا البانيتى الأخ/ حالد حسب علمى أن قا ئل هذا المربوع هو الخال الشيخ عبد العزيز الشيخ الزبير فهل لديك مايفيد نفيا او اثباتا؟ ولك الشكر
| |
|
|
|
|
|
|
Re: الدوبيت ... أوجاع القصيد ... (Re: khalid almohrib)
|
مادام الرزق من الله موبضراعنا برضو بنبسطو ونرجع نشوف أوضاعنا إن كتر الرزق قط ما بتزيد أطماعنا وإن فاتنا ورحل ما ببقى سر أوجاعنا نكرم دون حدود تحوي الجميع أوساعنا بنشيل الفقير ونحمي الضعيف بضراعنا الهوي والشرق ما بملوا قط لسماعنا بالمدح الصريح كم شنفوها أسماعنا
أخي خالد ... أختي سمية : هذه مجرد محاولة ... اتمنى أن أكون قد وفقت ... وسوف أكتب في المرة القادمة عن موضوع آخر بنفس أدوات الكتابة أعلاه .
شكراً لكم على المرور وإثراء الساحة
في إنتظار إفاداتكم
تحياتي لكم .
| |
|
|
|
|
|
|
Re: الدوبيت ... أوجاع القصيد ... (Re: khalid almohrib)
|
الأخ / مجاهد هذا هو عين الإبداع قولك محاولة انما هو تواضع العلماء الى الأمام ونحن بجانبك نواصل ولكم مربوع من الخال الشيخ عبد العزيز
نحنا بنركب التيس البقرقر حسو ونحنا جميع الأنفخ بنفـشو وريلات المعوز بالفارغة ماتتفشو كل طيرا بكوس نقدو وبرك فوق عشو ولكم مودتى
| |
|
|
|
|
|
|
|