هنا فداسي

شوفو ليكم جنس غيرة
كانت أم الصديق رغم تقدم عمرها تعتني بزوجها أبو الصديق وتسهر على راحتة وتبذل كل ما في وسعها لتوفير الراحة له، وكانت غيرتها على أبي الصديق وخوفها منه على الزواج عليها يمثل لها هاجساً وقلقاً دائميين بالرغم من بلوغه سن الشيخوخة، ودائماً كانت تردد" الرجال ما ليهم أمان ولو تكرمشت الجبهة وقام الصوف في الأضان".

تحت إصرار ولدها الصديق وافقت أم الصديق على مضض أن تذهب معه إلى الفاشر حيث كان يعمل لتقضي معه أياماً لزوم البر بها والأنس بطيب حديثها وليستمتع أبناؤه بعذب حكاويها.

في جلسة لطيفة وكانت الأرض "مرشوشة وريحة البخور طاقة والجبنة مدورة والونسة ظريفة" فجأة يطل عليهم ابن أخيها القادم من البلد وتوجه نحو عمته وقام" بمقالدتها" وهمس في أذنها مداعباً : "إنت قاعدة هنا مبسوطة مع ولدك وفنجان جنبتك قدامك وبخوركم طاق وعمي أبو الصديق بي هناك خطب وعقده يوم الجمعة ". انزعجت أم الصديق وتغير وجهها وأصرت على السفر للبلد وحلفت أن لا تبيت تلك الليلة في الفاشر

ضحك ولد أخيها وقال لها " علي بالطلاق يا عمتي أنا بهزر وبمزح معاك ساكت". لم تصدق كلامه ، فأقسم لها بالله العظيم" أن هذا الكلام غير صحيح وقصد به المزاح ، لكن أم الصديق أصرت وألحت على السفر قائلة لابن أخيها:" كل شيء ولا الهزار بالعرس ، دا كلام ما فيهو هزار، والعود كان ما فيهو شق مابقول طق".

لم يفلح جميع الأجاويد في ثني أم الصديق عن رأيها . وتحت إصرارها لم يكن هناك حل غير النزول عند رغبتها . ذهب الصديق إلى موقف الباصات ومن حسن الحظ أن وجد باص في طريقه إلى أم درمان. سافر الصديق مع أمه ولما وصلوا إلى البلد إستغرب والده وأخوانه وانزعجوا لمجيئهم المفاجيء. فقص عليهم الصديق قصة إصرارها على السفر المفاجيء فضحك الجميع وتعجبوا من شدة غيرة أمهم.

لم يمض إسبوع وأصاب المرض أم الصديق، فنادت على ابي الصديق وقالت له: " أنا المرض الجاني تاني مابفكني وياهو دا مرض الموت، فدحين دايراك تسمعني كويس، بعد ما أموت عاوزاك تغسلني كويس، وتكفني كويس وتمشي قدام الناس في جنازتي، وتنزلني في القبر"بيشيش" وتوسدني طوبة تحت راسي، وتعدي ليك إسبوع واحد بس وسكتت. قام أبوالصديق قال ليها أها أقضي إسبوع واحد وأقوم أعرس؟ "ترترب" قامت على حيله وقالت ليهو بحرقة"تعرس ركبك" قام قال ليها أها أعمل شنو بعد الإسبوع؟ قالت ليهو تجي لا حقني طوالي. فضحك أبو الصديق وجميع الحاضرين وقال :" شوفوها المطرطشة" يعني اضرب نفسي طلقة ؟ قالت ليهو تضرب نفسك طلقة ولا تطعنه بسكين المهم تجي لاحقني طوالي وما تعرس.