|
Re: اوضاع ماساوية للسودانيين بالسجون اللبنانية (Re: رسالة بيروت)
|
دمشق مطعم الباشا أو السفارة السودانية
جواز سوداني ... تذكرة مضروبة ... بنما بالجبل وحاجات تانية ,,, يالللا علينا جاي علينا جاي
تحت المطعم والجسر كوم سودانيين أول , والونسة مدورة عن بنما وطلوع الجبل , وبنما مصطلح لي بيروت بين السودانيين خوفاً من كلاب السرة , والسرة مصطلح تاني لي السرة وخلوها كدة عشان كلاب السّرة ما تعضي باقي السودانيين هناك , وتبدا حصص الجغرافيا وقالوا فرنسا فتحت بي طريق روسيا البيضا , ويا زول الجربا منو والله واحد قريب فلان داك وقال ظابطة مية المية والناس اتكسرت كيمان علي فرنسا, وتبدا حصة تانية في اسعار التذاكر ومراجعة اطلس العالم من الذاكرة لتحديد خط الرحلة وقوانين الأياتا وحق التذكرة والنوم في جامع والرزق علي الله لحدي مانصل, وحق التذكرة!!! ورا الجبل .
كوم تاني مطار دمشق الدولي , الطيارة السودانية جات ؟ لسة قالوا ما اتحركت , نفس الأوجه والناس في كل طيارة , تجارة المنقة والكركدي والصمغ والحنة والبشر , واحد جاي جديد من السودان أول محطة ليهو الخرطوم تلاتة شهور اجراءات واوراق ولبن الطير والذي منو , وحلم الوصول منية , فريسة سهلة , وتبدا المساومة , ويا زول الجواز بي تذكرتو بي مية وخمسين . ما شوية ؟ لا والله ده سعرو وهو سوداني انت قايلو امريكي !!! والمسكين يبيع الجواز ومن جدة لي امبدة ويشتروا من الجواز ويحجزوا ليهو مقعد في طيارة الجبل , ومعاناة الوصول وطلوع الجبل والتهديد من المهربين لإستنزاف كل العندك تحت تهديد السلاح , نص الرحلة كداري ومساسقة وناس التهريب بحددوا مكان الدورية ومفروض بي وين الناس تخش والمبيت في مخزن لو طال التهديد . في طلمبة وقفت عربية وسأل صاحبا عبدالرحمن : سوداني ؟ رد عبدالرحمن أيوة , قال سيد العربية عندي تلتمية دفتر عندك ليهم صرفة ؟ وفي البداية ما عرف عبد الرحمن يعني شنو دفتر ولييه هو السوداني في نص السوريين ديل , سأل الزول قال ليهو دفتر شنو ؟ قال ليهو السوري الهوية دفتر السفر وقصدو علي الجواز السوداني , تلاتمية جواز عند سواق تاكسي خلوها أصحابا لي الزول السوري ده علي أمل انهم يشتغلوا في بنما ويقدروا يطلعو المية دولار حق التهريب لي بنما , والعوير عشمان انهم يرجعوا لي الجوازات وما عارف انو سفارة مطعم الباشا بتوفر البديل الامثل والأرخص والجوازات الا يبلها ويشرب مويتا .
مطار دمشق كنا في وداع سوداني جا من بنما بي قرحة وكمية امراض , وبعد العلاج في سوريا إقتنع الزول يرجع السودان يعيش في نص أهلو وخاصة بعد ما دقت في العراضة وجات علي كدة , حق التذكرة مافي والناس لازم تشوف السفارة ,مطعم الباشا قصدي ما سفارة جمهوريتنا الحبيبة , وإتفقناانو الزول ده من محمد بقى عصام الدين بي جواز سوداني وتذكرة ما معورف صاحبهم مصيرو شنو , مع السلامة مع السلامة ركب الزول ووصل مطار الخرطوم من غير مشاكل واول مشكلة كات ليهو في حق التاكسي لأنو ما لقى في السودان حاجة مضروبة أو مزورة ممكن تخليهو يدفع نص القيمة لي سيد التاكسي .
مطار دمشق , الصيف , وفي الصيف بكتر حضور أسر العاملين في سودانير والمسافرين السودان عن طريق سوريا من بلاد العم سام , المطار مليان مسافرين ومودعين وأسر وكلام وونسة ووصايا وجواب للحبيبة سين ماتقلق من طول الإنتظار ولو حصل العشرة سنين , فجأة خيم الصمت , موسيقى تصويرية أصوات الجنازير في بلاط المطار الأبوات لقوات الشرطة العسكرية اللبنانية , قاطرة سودانيين مرحّلين السودان من السجون اللبنانية , مسافرين تحت تهديد وحراسة الشرطة العسكرية وقوات المارينز اللبنانية تنظر لي جمع السودانيين في زهو الفاتح عكّا , مؤثرات صوتية صوت طفلة صغيرة فزعة من هول المشهد , واحدة بكت وفتحت شنطتها وطلعت جلابية لي واحد من المسفرين كان ماشي السودان بي ترينيق سووت وملابس داخلية وآخرين بي شباشب , سألنا موظف سودانير مافي طريقة الناس ديل يفكوهم يلبسوا أحسن من كدة ؟ قال مابفكوهم الا في آخر صالة ويكونوا في عهدة الكابتن , وده مشهد مكرر .
آلاف القصص عن التزوير والجواز وبنما الوسيلة لي حلم الهجرة لي بلاد النور على حسب ما فرضت علينا الظروف تسميتا , والسفارة ... من غير ظلم للسفارة السفارة مرات بتجي المطار وبتمشي السجن لكن ترحيل أكتر من تلاتين نزيل في الشهر فوق إستطاعة السفارة , وفي إجراء روتيني من السفارة علّقت ورقة في مدخل المطعم السوداني وكل تجمعات السودانيين بتصرخ فيهم يا سودانيين هووووي أي زول بجينا من طرف الجبل حيتعرض للساءلة من قبل السلطات السورية واللبنانية وحيرجع السودان من مطار الخرطوم لي مطار جوبا , وعن مساءلة السلطات السورية الله لا وقّع سوداني في المساءلة دي واللي ممكن تنتهي زي ما حصل في بعض الأحايين بالزول المغلوب علي امرو في القبر يعني المشى لي سلطات المساءلة دي بي نية سؤالين تلاتة ويرجع بلدو علي حسب تخويل السفارة لي السلطات دي في صندوق لو لقى حق الصندوق .
الله يكون في العون اللهم نسألك السلامة
أبنوسي
|
|
|
|
|
|
|
العنوان |
الكاتب |
Date |
اوضاع ماساوية للسودانيين بالسجون اللبنانية | رسالة بيروت | 07-21-03, 04:13 PM |
Re: اوضاع ماساوية للسودانيين بالسجون اللبنانية | bayan | 07-21-03, 04:41 PM |
Re: اوضاع ماساوية للسودانيين بالسجون اللبنانية | elsharief | 07-21-03, 04:48 PM |
Re: اوضاع ماساوية للسودانيين بالسجون اللبنانية | البحيراوي | 07-21-03, 05:05 PM |
Re: اوضاع ماساوية للسودانيين بالسجون اللبنانية | abubakr | 07-23-03, 04:46 AM |
Re: اوضاع ماساوية للسودانيين بالسجون اللبنانية | Tanash | 07-23-03, 10:02 AM |
Re: اوضاع ماساوية للسودانيين بالسجون اللبنانية | أحمد أمين | 07-23-03, 11:20 AM |
Re: اوضاع ماساوية للسودانيين بالسجون اللبنانية | قلقو | 07-23-03, 11:52 AM |
Re: اوضاع ماساوية للسودانيين بالسجون اللبنانية | kofi | 07-23-03, 01:41 PM |
Re: اوضاع ماساوية للسودانيين بالسجون اللبنانية | رسالة بيروت | 07-23-03, 07:50 PM |
Re: اوضاع ماساوية للسودانيين بالسجون اللبنانية | عشة بت فاطنة | 07-24-03, 00:42 AM |
Re: اوضاع ماساوية للسودانيين بالسجون اللبنانية | tabaldy | 07-24-03, 04:23 AM |
Re: اوضاع ماساوية للسودانيين بالسجون اللبنانية | khal fatma | 11-12-03, 07:38 AM |
Re: اوضاع ماساوية للسودانيين بالسجون اللبنانية | MaxaB | 11-12-03, 07:20 PM |
Re: اوضاع ماساوية للسودانيين بالسجون اللبنانية | أبنوسة | 11-16-03, 10:45 AM |
Re: اوضاع ماساوية للسودانيين بالسجون اللبنانية | Agab Alfaya | 11-16-03, 11:20 AM |
Re: اوضاع ماساوية للسودانيين بالسجون اللبنانية | Elmosley | 11-16-03, 01:55 PM |
Re: اوضاع ماساوية للسودانيين بالسجون اللبنانية | Agab Alfaya | 11-16-03, 02:23 PM |
Re: اوضاع ماساوية للسودانيين بالسجون اللبنانية | ABU QUSAI | 11-16-03, 02:40 PM |
Re: اوضاع ماساوية للسودانيين بالسجون اللبنانية | Agab Alfaya | 11-16-03, 03:10 PM |
|
|
|