|
|
 Re: ليه يعني هي قلة الادب الفايتة حدودها دي؟ (Re: إيمان صالح)
|
Quote: اللمين ود الصديق
ها جنى ها وينك إت، شوقنا غلب بلحيل، ومشتاقين لنضمك الحلو. |
ها اسحق ود بلة ود اللمين
لا حولا
كيفنك ا زول
اصبر لي ابرك جملي دا
بالاحضان يا زول
حقيقة الحي بلاقي
كيفنك يا اسحق اخوي
وحات الله انا ذاتي مشتاق لك
لا حولا
زمن يا زول ما شفناك
اتوكرنا في قلب المنابر
وشغلتنا بقت مساسقا بين طقطقة الكبيودات وكهارب الشاشات
لا حولا
اها النقوم من هنا ونكمل نضمنا برا
ست الحوش دا انا عارفها ومجرب لسانا
امرقاكا يا جنا
| |
 
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: Abdulgadir Dongos)
|
الاخت العزيزة ايمان.... الحديث عن اطالة الشعر فيه كثيرآ من الطرائف... ففى عهد الخليفة المأمون كانت الجوارى يتبارينا فى اطالة شعرهن.... ومن طرائف ذلك ان احدى جواري الخليفة المأمون كانت تستحم فى نهر دجلة واذ هى من دون لباس فى النهر ترى من بعيد الخليفة المأمون مقبلآ على النهر ... فما كان منها الا ان غطت كامل جسدها بشعرها الطويل.... ونظم ابونواس فى ذلك قصيدة عصماء صور فيها ذلك المشهد فى الابيات التالية:
نَضتْ عنها القميص لصبِّ ماءٍ
فورَّدَ خدَّها فرطُ الحياءِ
وقابلت الهوا ء وقد تعرَّتْ
بمعتدلٍ ارقُّ من الهواء
ومدَّتْ راحة كالماء منها
الى ماءٍ معد ٍّ في اناء
ولما ان قضت وطرا وهمَّتْ
على عجلٍ لتأخذ بالرداء
رأت شخص الرقيب على التداني
فأسبلتْ الظلا م على الضياء
وغاب الصبح منها تحت ليلٍ
وظلَّ الماء يجري فوق ماء
فسبحان الاله وقد براها
كأحسن ما تكون من النساء
ولا ننسى قصيدة الشاعر صلاح احمد ابراهيم:يا مرية
يا مرية
ليت لى إزميل(فدياس) وروحا عبقرية
وأمامى تل مرمر
لنحت الفتنة الهوجاء فى نفس مقاييسك
تمثالا مكبر
وجعلت الشعر كالشلال
بعض يلزم الكتف وبعض يتبعثر
كما لا ننسى رائعة الشاعر ابوامنة حامد والتى تغنى بها الاستاذ صلاح ابن البادية
سال من شعرها الذهب
فتدلى وما انسكب
كلما عبثت به
نسمة ماج واضطرب
النجيمات والخصل
فى عناق وفى غزل
نسجت حوله القبل
موكبا يغزل الطرب
فيه من سمرة الأصيل
شعرها المذهب النبيل
ثغرها اليانع البليل
كرزة حفّها العنب
يا حبيبى ... أكلما
قلبىّ المغرم احتمى
بك وانزاح ملهما
عاد كأسا بلا حبب
فاره .. مترف .. لدن ..
فنن.. لا .. ولا فنن
هزنى الوجد والشجن
فى الهوى قلبى إغترب
رقص الورد والزهر
مهرجانا على النهر
سال فى الشط وانهمر
عطره الحلو وانسرب
أى غصن إذا انثنى
فيه تحتفل الدّنا
والثريات والسّنا
غير بدرى إذا احتجب
عشت فى الحب منتهى
التيه .. ولكن بلا انتهاء
تائه .. ذاهل النّهى
شفّنى الوجد والطرب
إن تكن أنت لم تزل
يوم بدر المنى اكتمل
نحن شلناك فى المقل
وقعدنا على اللّهب
مع خالص مودتى
سيف
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: Nader Abu Kadouk)
|
الأخ خالد
الأخت تراجي والمشاركين وصاحبة البوست
| Quote: و الله العظيم كنت عايز أعلق على الموضوع لكن كلام أبوحراز دة عقدني كلو كلوإنت الناس دي قاعدة تجيب الكلام السمح دة من وين؟؟ |
شكراً أخي على هذا الشعور الطيب وأنا اكتب ببساطة للغاية
لكنني أعبر دائماً وبكل صدق عن مايجيش بخاطري
لا اعرف اللولوة واللف والدوران
تراجي انتي قالوا ليك نحن عاوزين الشعر المنسكب حتى الخصر بس
والله لو كان تجاوز هذه الاشارة برضو يكون اجمل
لكن برضو مرات تلقى الواحدة وشها { مطاول } وعامل زي المثلث المتساوي الأضلاع وشعرها طويل
هنا في رايي ملامحمها ستتغير
ولو تركته قصيراً بيكون مناسب مع حجم وجهها
يعني لابد أن تتناسب قصة الشعر وتكوين الوجه
أكثر مايغيظني واحدة يكون وشها طويل ولابسة نضارة عدساتها كبيرة جداً
يعني انت ماتشوف قدامك الا { كووووووووووووم } بتاع نظارات !!
بعدين الشعر الطويل له فائدة جمالية وفائدة أخرى اذا شاكلتك مرتك
يعني لو شعرها طويل تجرها وتعمل فيها زي ماعايز
لكن لو كان قصير حاتتملص منك يمين وشمال وتبقى زي الدودة
بس مشكلتنا نحن الرجال السودانيين مش مع الشعر الطويل والقصير
بل مع ميزانية هذا الشعر التي تقد الجيب
ولافرق حينها بين طويل وقصير
فكلهن واحد
انا يوم يقولوا لينا قوم ياراجل ودينا الكوفير ضغطي بيرتفع 341 درجة
لكن نسوي شنو
الراجل قال عاوزو منسكب قال !!!!
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: ابوحراز)
|
بعدين الشعر الطويل له فائدة جمالية وفائدة أخرى اذا شاكلتك مرتك
يعني لو شعرها طويل تجرها وتعمل فيها زي ماعايز
اجي يا اب حراز
انت يا راجل مطرطش ولا كيفن يعني؟
يعني يا اب حرزا داير تسوي في مرتك سواة اب عكاز
كان كدي اخير مرتك التسوي كدي
ايمان
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: Saifeldin Gibreel)
|
ايمان مساء الحير:
نحن مغستنا اكبر بناتنا شينات ومقرمدات وممعطات وبعد ده كلو لسانهم طويل وطلباتهم اكتر والواحده تعرسها تشاكل ليك اخواتك وامك وتجيب اخوانا معاها وتكرهك الحياه .
والله في حيدراباد المره ب100دولار وشعرها زي الشفتوهم ديل واحلي منهم ومسكينه وما عارفه اي حاجه لا جندر ولا تحرر ولا بتقول ليك نوال السعداوي .
لو وردنا منهم 50 بحلوا المشكله وبنهوا التعصب والجهويه زي ما قال صحبي الشريف الهندي.
| |
|
|
|
|
|
|
|
|
 Re: ليه يعني هي قلة الادب الفايتة حدودها دي؟ (Re: إيمان صالح)
|
شكيتك لي الله يا إيمان صالح ,, من شدة ما اتعقدت قمت اشتريت لي باروكة ولامن لبستها وعاينت لي روحي
في المراية حتى جيت كتبت ليك ,, شفتي جنس الحالة دي ؟ يا ناس مالكم علينا شعرنا قرقدي وقصار علا
في ناس شالو همنا و لقوا لينا حل ( باروكة في اليد ولا ألف شعر طاير ) !!!
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: إسحاق بله الأمين)
|
ها اللمين أخوي
علي اليمين مشتاق ليك وداير لي قعدة معاك ويا ريت لو كانت هناك في البطانة والدنيا خريف والخضره ما تديك الدرب والبهائم شبعان اااااااااااات، والحملان الصغار والسخيلات انططن، وريحة الدعاش ترد الروح، وريحة البن المقلي تكيف ونكهة القهوة تسطل ، ومن الفريق البي قادي يجيك صوت دوبيتاً يخليك تطير لي فوق وتسل سيفك وتقول أنا أخو التاية بت حمدين أبشرن يا بنوت ومن ميسك تسمع ليك زغاريداً يخلنك تقلع عراقيك وتقيف في نص الدايرة وتحلف بالطلاق غير عشرة سيطان ما تباطن وتعال شوف السمحات قامن ارقصن وغرقنك بالشبالات .
اللمين أخوي مسعول من الخير، إت لي هسة راكب فوق جملك الأصهب ده؟ يا خي نحنا اترقينا خلاص وبقينا نركب البكاسي أبو قبينة وقبينتين وبعد شوية كان شفتنا راكبين البرادو والكامري ما تستغرب، رايك شنو يا خوي يوم الخميس الجايي نمش نقنص سوا، ترى خابر لي محل قنيص حبارو قدر الحمار الله اعزك، أها انا جاهز ومستنيك وكلابي حقات الصيد من هسي مسحت كرعينن بدهن الساق، أها نشوفك بخير يا الغالي
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: soma)
|
العزيزة سوما
تحياتي
طبعا متخيل اجتهادات الاستاذة ايمان في شعرها ومتابعة دعايات زيت دابر وما شابه ...
اكيد بتستعمل انابيب الدربات (رول) وبعد مرات بتفردو مع بعض القص الخفيف نظام كاري فرنسي ..
لكن احب اطمنها بانو حتى الرجال المتزوجين من طويلات الشعر لا يرون جماله الا في المناسبات فزوجتك تستقبلك بشعرها الملفوف (كعكات) ..
اخير قايتو تراجي مريحة البشرية وساعية ليها خلال (بضم الخاء) ...
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: إيمان صالح)
|
Quote: اسحق
اخير شيل عراريقك وخوازيقك ديل وامشي اقلعهن في محل تاني
زح من قدامي في الساعة دي |
هويي يا ايمان
مالك علي اسحق اخوي
هسه اقوم علي بنوتك ديل
امعط ليك شعيرات وابشتن ليك هديماتن واخلبت ليك كريماتن
ابشر ابشر يا ود بلة
تور بقر الجواميس العليك الرك
يا عقد الحديد للحبلي ما تنفك
الليلة بوستها دا نتمو ليها عرضة ساكت
ابشر
و حقو لي قولي ولدن غير اسحق بهز فوقي
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: إيمان صالح)
|
ايمان يا اختي
سألتي عن الراجل في الهند بي كم ؟؟؟؟
وسؤالك ده عشان تزوغي من الموضوع وتعملي رايحه مش؟؟؟
اها الراجل هنا شعره طويل برضو مقارنه بي بناتنا وكل ما كان شعره طويل البت بتدفع فيهو اكتر وعموما" المره بتدفع بالمتوسط كده 200 الف روبيه حوالي 5 الف دولار .
وااا مغستنا نحن رجال السودان ............... لمن الهندي اقولينا انا دفعوا فيني ون لاق يعني 100 الف روبيه ونحن نعضض اصابعينا.
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: العوض المسلمي)
|
يا اختي انتي عارفه انه في قبائل سودانيه لديها اكبر مشكله في الشعر
من حق الناس عليك انك تعتذري عن هذا الموضوع حتي لاتتهمي بالعنصريه
قلت كدي؟
اها ياخواني انا اسفة علي اساءتي البالغة للقبايل وبنات القبايل
وعلي عنصريتي وشيوعيتي وكوزنتي واسلامي وكفري
اها قصرت يا العوض؟
ايمان
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: طارق جبريل)
|
قالو يا ايمان اختى
الشعر والشحم سويهن وشهدن عليهن
اها يعنى الشعر قصيناه قصة عدوك
مابريدو
من يومى
غير ما بوسخ لى الفساتين من ورا ما منه فايدة
ومرات اخليهو (للشهادة )
اها مرة السنه الفاتت دى كان عندى ضفيرة
ما متل حقت نسوانك دى لكن طويلة وبهوزز بيها راسى
حلات الدنيا عليها
قمت مشيت لواحدة صحبتى جمبهم حلاق فى الديم
قوم يالراجل احلق لى قريب ما تبقى صلعة
جيت ارجعة البيت شايلة ضفيرتى فى الكيس
امى الله يرحما قالت لى
ـ سلمى بتى شعرك وديت وين ؟
وكانت زعلانه مسكينة
بى وراى قالت لعفراء اختى
والله ماقدرت اقول ليها شى لكن مزعلانى حلقت شعرا دى بلحليل
عاد يا اختى الشعر للمتلنا ما حاجة مهمة بقى
خاصة هنا
لانه مافى وكت تسرحى وشنو وتلفلفى وتغسلى
حاجة توجع اليدين ودا السبب الخلانى حالقة طوالى وبقطعيتا كان شفتى
| |
|
|
|
|
|
|
|
|
|
Re: ليه يعني هي قلة الادب الفايتة حدودها دي؟ (Re: سلمى الشيخ سلامة)
|
تعالي النحدثك عاد يا سلمى
انا طبعا شعري كان زي البنية الفي الصورة نمرة 12 بالضبط
مشينا مصر سياحة وفسحة وتغيير جو
وتعبني طبعا ياختي
قمت اتسلطت مشيت الكوافير
المصري الكريه الفي الكوافير
قلت ليه عاوزاك تواسي لي شعري ده
الراجل جاب لي المجلة اقرا فيها
قبل ما ادنقر في المجلة
جيب داك يا المقص
وجز جز جز يا الراجل الفقر
قصاه يا سلمى لي نص ضهري
اتخلعت انا لامن غلبني الاقوله
ده شنو يا ود الحلال؟
انا قلت ليك واسي لي شعري ما قصه قدر ده
قال لي ومال اواسيهولك ازاي يعني؟
ابكيلك معاه؟
ومن ديك حردت طول الشعر
وياهو سايباه واصل تحت للخصر
عشان ما يسبب لي ازعاج
متعب ياختي الشعر الطويل شديد
ايمان
| |
|
|
|
|
|
|
| |
Saifeldin Gibreel
Nader Abu Kadouk
إيمان صالح
ابوحراز
محمد الأمين موسى
عواطف ادريس اسماعيل
حيدر حسن ميرغني
salma subhi
محمد المختار الزيادى
Muna Khugali
إسحاق بله الأمين
علاء الدين حيموره
Mustafa Mahmoud
طارق جبريل
مامون أحمد إبراهيم
ملكة سبأ
رأفت ميلاد
.jpg)
العوض المسلمي
Siddig A. Omer
معتز القريش
سلمى الشيخ سلامة
فيس بوك
تويتر
انستقرام
يوتيوب
بنتيريست