رسالة الي عضو المنبر "عواطف ادريس اسماعيل" من القارئات "و & ر& ه"

Quote: بسم الله الرحمن الرحيم الاستاذ فيصل النوبي السلام عليكم ورحمة الله وبركاته ونتمني ان تكون بي عافيه وخير نحن من قراء منبركم الرائع (سودانيز اونلاين) طبعا رسلنا ليك الايمل وبنتاسف لي الاقتحام واخدناهو من البورفايل و لانو حقيقه ونتمني توصل رائينا لي الاستاذه الفاضله عواطف أدريس اسماعيل عن بوست المهمة الصعبة ... الفتيات السائبات ورحلة البحث عن المجهول !!!!! حقيقه الموضوع رائع بس حقيقه حسينا انو مسنا شديد ووجعنا لانو الاستاذه عواطف عممت وبي رغم خصصت الخليج بس برضو عممت وتداخل بعض الاساتذه في الكان رائيو منصف والبعض الاخر مجحف في حقنا الفتيات السودانيات في الخارج بس حقيقه نحنا حنكي ليك قصتنا ونتمني انو الاستاذه عواطف و المتداخلين والقراء ما يحكموا علي العموم ويخصصوا وحقيقنا نحنا بي رغم طموحنا وحاسين من الضغوط الطموح قل شويه بس الدكتوره الرائعه اشراقه بعد سماع قصة حياته حفذتنا زياده وعرفنا انو نحنا صح وانو حنواصل انشالله والظروف ما حتقهرنا و احتمال 80% من القراء او الاعضاء يعتبروا قصتنا دي خيال بس اي انسان درس في الدول الاوروبيه واي انسان عاش حياه طلبه في غربه بعرف انو نحنا علي حقيقه او لا واكيد في قراء من الدوله النحنا فيها وبمجرد سرد القصه حيعرفونا نحنا منو !!! القصه كالاتي!!!!!! نحنا ثلاثه بنات سودانيات بندرس في احدي الدول الاسكندنافيه وتخصصنا كالاتي 1)رياضيات و2) فيزيا 3)علوم طبيه تخرجنا من السودان من احدي الجامعات وقررنا انو نحنا لازم نثبت وجودنا ولازم نحضر ولا زم نكون يشار لينا بي البنان وبرضو ما ناسين عاداتنا وتقاليدنا ودينا البحكمنا والحمدلله وسالنا عن الجامعات وعرفنا انو الماجستير في الدول دي مجانا بس العيشه عليك وعرفنا انو العيشه غاليه بس قلنا مافي زول بموت بي الجوع بس اهم شي التمسك بي حيل الله قوي وبدينا رحله البحث عن الجامعات والحمدلله وتوفيق من الله ليقنا قبول في احدي الجامعات وساعدتنا صديقه لينا وهي كانت موجوده قبلنا وأ ثنا الفتره دي في السودان اشتغلنا ووفرنا وجينا علي هنا ونحنا الثلاثه ساكنين في غرفه واااااحده وعباره عن غرفه وبداخله حمام ومطبخ يعني غرفه م كويسه وواسعه واتشاركنا في السكن علشان نخفف الصرف واشتركنا في الاكل طبعا القراصه مدوره و ملاح التقليه وشوربه العدس ما تديك الدرب والكركدي والعرديب شنطنا كلها فيها عباره عن بهارات واكل ناشف علشان ما عارفين الظروف ونزلنا الجامعه وياسلام علي الجامعه مجتمع غير وثقافه وحضاره وبعد الاسبوعين الاوائيل قررنا نشتغل وسالنا بعض الزملاء من الهند و وباكستان لانو مساكين زينا وحالتمم تحنن زينا وصديقتنا الحكينا عنها من قبل انو ساعدتنا في القبول دي برضو من التعبوا جدا جدا جدا وحاليا رجعت واتزوجت ومحاضره في احدي جامعات السودان ومن الفتيات البرضو تعبوا في الغربه وحصلت علي الدراسات العليا من هنا واشتغلت نفس شغلنا ده واكتر قالو ما في شغل غير النظافه في مطاعم وشغل جرايد و قلنا كلوا شغل ومافي شغل بارد وتوكلنا علي الله وحده فينا اشتغلت جرايد الصباح وتقريبا بتقوم الساعه 3:30 صباحا بتوزع لغايه الساعه 6 بترجع وبتاخد راحه شويه وبعداك بتقوم الجامعه الساعه 9 الثانيه اشتغلت في مطاعم ماكدونالز وكانت ماسكه نظافه من الساعه 11 لغايه الساعه 1 صباحا واثالثه كانت بتشتغل في مطعم ماكدونالز برضو بس في ايام الويك أند (ايام الاجازه)بتشتغل من 7 صباحا لغايه 11 ليلا لمده يومين وفي نهاية الشهر بنشيل القروش وقروش تمام جدا جدا وبنلم لكن برضو بنرفه شويه ههههههههههههه بنمشي نتعشي برا ونرجع لي غرفتنا المتواضعه ندور في القراصه والشاي المقنن واكيد اغلب الاعضاء في سودانيزاونلاين خارج السودان وبعلموا تمام العيشه كيف في الدول دي وانو التوفيق بين الدراسه والشغل صعب كيف اما الجامعه الحمدلله ربنا سبحانه وتعالي وفقنا وماشين كويس ووحده مننا جاته منحة دكتوراه في كندا وهي تخصص فيزيا Organic Physics وانشالله حتناقش في خلال شهور بعد اجازه الكريسماس وحتسافر علي كندا وهذه مثال لي السافروا اما خريجة رياضيات برضو بتدرس في Bioinformatics Technologyوانشالله في خلال شهور حتناقش وانشالله حتواصل اما خريجة علوم الطبيه بتدرس الان في Medical genetics وانشالله التواصل مستمر وزي ما بقولوا الناس ( الدكتوراه جاته بلاء ونحنا مؤمنين طالما العزيمه موجوده والاخلاق موجوده وقبل كل شي ماسكين في حبل الله سبحانه وتعالي قوي ربنا حيكرمنا احسن اكرام نحنا مثال بسيط في كتاار زينا بس الظروف ما لمتكم تتعرفوا عليهم من الفتيات السودانيات . استاذه عواطف انو ما كل سودانيه طلعت من السودان مارقه لي الخراب والتلاف لالالالالا والف لا في سودانيات ومرقوا من بيوت سودانيه واتربوا علي الكسره بي المويه وموية النيل ورضعوا من امهاتم الحفاظ علي النفس والحرص وورثوا من ألاباء الوش الكعب وصرة الوش والفقاره والحمدلله برضو في السودانيات ماسكين في حجابم ودينم ودراستم وبي جي اليوم حنتقابل يا وطنا ويا اهلنا ورافيعن راس اهلنا وراس كل من حولنا والله نحن بنكتب في الايميل ده وكل وحده عايزه تقول بس نحنا بنتكلم بي اسامينا الثلاثه ومزرورين لانو امتحاناتنا قربت نرجو الدعاء اما انو الفتيات الانحرفوا ديل المشكله من بيوتم ومن تربيتم ومن اهلم ومن اهمال اهلم ليهم وعدم زرع الثقه في النفس وعدم زرع الطموح وطموح العلم وطموح الانسان يبقي كويس بي عرق جبينو وبي سهر عيونوا لكن بي كل اسف يا استاذه عواطف الاسر هي ليها الدور الاكبر علشان طلباتم فاقت الحدود و طموحاتم في الفارغه والمظاهر الخداعه وعايزين نضيف ليك اضافه صغيره نرجو منك تسلطي الضؤ علي الشباب الاولاد البطلع وبنحرف والبطلع برضو بلقط قروش لكن ما برجع ولااا بي شهاده ا ب ت ث ما عندو اسالي الاسباب شنو لكن ما كل شئ البنت البنت البنت هل البنت بتنحرف براها برضو بنحرف معاها الرجل وربنا سبحانه وتعالي لمن نزل احكاموا في العقاب ما نزل حكم لي البنت براها ولي ارجل براهو ما قال البنات يحاسبوهم براهم والاولاد براهم كل سوا في الحساب ويوم الحشر العظيم بنقيف كلنا سوا بنتمني انو تنصفي وبرضوا توجيهي اسئلتك لي الرجل برضو!!!!!!!!!!!!!!!!!!!!؟؟؟؟؟؟؟؟؟؟؟؟ ويا استاذه عواطف بنشكرك برضو انو سلطي الضؤ علي الموضوع ده علشان برضو الناس ما تظلم كل بنت وفي الختام بنقول ليك المابخاف الله سبحانه وتعالي تاكدي ممكن يعمل اي شي وديل شريحه معينه من فتيات ما بخافوا الله لكن تاكدي في البخافوا الله سبحانه وتعالي قبل ما يخافوا الناس وفي الختام نشكرك يا استاذ نوبي ونتاسف لي اقتحام الايميل سلام عليكم و & ر& ه

ملاسي
ما تجي تقول لي بتنقل في كلام النسوان