والله يا تونى .. لو كان (مريخاب) اليوم كلهم مثلك، لتمنيت اذا مد الله فى الأعمار وعدنا للوطن سالمين وغانمين، أن اذهب لاستاد (المريخ) أو استاد (شاخور) كما أطلقت عليه من عندى، لا للشماتة والاستمتاع بهزيمة المريخ، او حتى لمجرد رؤية لاعب (يراوغ) احد لاعبى المريخ، فأعود لنادى الهلال أصور للرفاق شكل الهزيمه أو حالة المراوغه .. وانما لكى اذهب كما كنت افعل فى السابق خلال زمن جميل برفقة صديق الطفولة وزميل الدراسة ولعب الكره .. وأخى الذى لم تلده أمى، الباشمهندس (سيف) وهو مريخابى أكثر من اى مريخابى عرفته بعده فى اى مكان فى الدنيا، خاصة فى منابر الحوار كلها ودون أستثناء، نذهب لنستمتع معا (بتابلوهات) دكتور (كمال عبدالوهاب) وتمريراته الماكره لزميله الهداف (الفاضل سانتو)، ثم نذهب فى اليوم الثانى لأستاد الهلال على ايام مدربه (استاروستا)، لنشاهد (جكسا) و(أمين زكى) و(سبت دودو).
بل للأستمتاع كذلك بلاعب وحارس مرمى لا اظن يتذكره حتى المريخاب انفسهم أسمه (عمر)، قد لا يصدق البعض انه كان فى مستوى ومهارة (حامد بريمه) فقد كان يلتقط جميع التهديفات القويه والخطره حتى من داخل خط ال 6 ياردات، وبعد كل هدف ينقذه (عمر) الذى لم يظهر ولم يلمع نجمه مثل عدد كبير من المواهب والنجوم التى لم تلمع فى السودان، نضحك حتى نكاد أن نقع اعجابا بذلك الحارس الخرافى، الذى لم يسمع به أو يشاهده كثير من عشاق المريخ.
أخى أو ابنى (تونى) لله درك، فقد اعدتنا الى زمن جميل لا أدعى كذبا أننى كنت خلاله أشجع المريخ فى اى مباراة من المباريات كى ينتصر فيها، لكننا ما كنا نعرف الحقد والكراهية، التى زرع ثمارها صحفى اسمه (مزمل ابو القاسم) تهمه نفسه ولا يهمه المريخ أو الهلال أو كرة القدم السودانيه، للأسف كثير من اندادك واترابك وقفوا الى جانبه داعمين ومساندين بغير الحق، فكان لا بد من أن نسقيهم مر (الحنظل) حتى يختاروا بين المواصله فى ذات الطريق أم يدعموا ويساندوا المخلصين الشامخين من احباب المريخ مثلك، فيعود الحب والصفاء بين (الهلالاب والمريخاب) مهما تعصب كل منهم الى ناديه.
كتب الشامخ (تونى) فى منتدى (محبى المريخ)، ونقل ما كتبه الأخ/ محمد الحافظ الى موقع الهلال، فوجدت انه مقال يستحق النقل الى هنا:-
Quote: الاخ عبد الله ما عشان اتحذف ليك موضوعين خلاص تقوم تحرد المنتدى .. بخصوص موضوعك عن هلالية عبد المجيد ف بصراحة موضوعك دا كان يستحق الحذف لانك اهنت الاستاذ دا اهانة كبيرة ، ووصفته بانه مصاب بانفصام في الشخصية وانه يتمري في الزبالة وكلام من النوع دا، وانا رديت عليك وقلت ليك ياريت توقف الهجوم دا تخيل لو الاستاذ مزمل ولا اي صحفي مريخي كبير دخل المنتدى وقرى البوست دا ، وشاف أستاذه الكبير عبد المجيد بيتهان الاهانة دي حيقول عننا شنو ؟؟؟ ليهم حق لما الكتاب المريخيون يتجنبوا المنتدى دا لانهم ماضامنين حيتكتب عنهم شنو اذا في يوم قالوا كلمة حق عن الهلال انا هسه بقول كلام حق عن الهلال هل دا معناه اني مصاب بانفصام في الشخصية ؟؟؟ انا قلت ولسه بقول انه الهلال في العقد الاخير افضل من المريخ في المنافسات الافريقية والعربية.. يعني لما اقول كدا معناها انا مصاب ومريض والكلام المؤذي الانت قلته عن صحفي يعتبر من رموز الصحافة الرياضية اذا كنت بتتكلم في مواضيع جادة وبتنتقد بموضوعية دون الاساءة للبشر صدقني مافي زول حيقفل موضوعك اما حكاية انه المنتدى ما بيزيد في حبك للمريخ فانا متفق معاك في النقطة دي ، لاني خلاص قربت اوصل لنقطة ابطل ادخل المنتدى ، مش عشان حذفوا لي موضوع ، عشان المنتدى بقى كله سخرية وتريقة وشتيمة في الهلال ومواضيع ماتستحق انها تتقري او يتعمل ليها بوست ومكانها سلة المهملات .. يعني بالعربي كدا مواضيعنا دي كلها كلام في الهوا وما فيها اي فايدة للمريخ او لمحبي المريخ ناس تقرا مقال لعبد المجيد وتجي تشتم فيهو هنا باقبح الاوصاف ، وناس تقرا خبر عن الهلال وتجي تتريق هنا وتسئ للهلال... وبعد دا كله الاعلام مسمينا صفوة ، لا حول ولا قوة الا بالله ، طيب لو ما كنا صفوة كنا عملنا شنو
بصراحة المنتدى لو واصل بنفس الاسلوب دا الناس حتهجره وحتهجر المشاركة والكتابة فيهو ارجو انه الاخوة الاعزاء في منتدى المريخ ما يضايقوا من صراحتي ، في النهاية المنتدى دا اسمه محبي المريخ ، واي حاجة بتحصل فيهو بترجع لاي مريخابي ، وحقيقة مستوى كتاباتنا في المنتدى هنا ما اظن انها في صفنا راجعوا نفسكم يا شباب وياريت نغير مواضيعنا واسلوب كتاباتنا ونبتعد عن الشتيمة والاهانة والسخرية والكلام دا ( يأيها الذين امنوا لا يسخر قوم من قوم عسى ان يكونوا خيرا منهم ولا نساء من نساء عسى ان يكن خيرا منهن ولا تلمزوا انفسكم ولا تنابزوا بالالقاب بئس الاسلام الفسوق بعد الايمان ومن لم يتب فاولئك هم الظالمون)
(عدل بواسطة تاج السر حسن on 11-12-2007, 10:01 PM) (عدل بواسطة تاج السر حسن on 11-13-2007, 10:25 AM)
العنوان
الكاتب
Date
هذا المريخابى الأصيل .. ما هو (بعيو) .. بل ينتمى الى فصيلة (النخيل) !!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست