|
صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0
|
بناء علي رغبة الجماهير خاصة الاخوان بكري (أبوبكر + عبدالله) أطل عليكم من Inuvik رغم أن درجة الحرارة أسف درجة البرودة ١٠ تحت الصفر٠ اتصل بي أحد الاخوان هاتفيا وقال لي والله يا ابوصلاح بالغتوا عديل السودانيين وصلوا الاسكيمو ٠ انا غايتو بفتش لي في مكان يكون مافيه اي سوداني ، فرديت عليه بان يرجع السودان فهو المكان الوحيد الما فيه سودانيين ٠
|
|
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
اخونا احمد خضر اخو اخونا حافظ خضر (زميل سابق بمدريد) لك التحايا انت والاسرة وطبعا انت راجل بتحب السواقة نتوقع حضورك يمكن الوصول لمدينة Inuvik بالطريق السريع معظم ايام السنة Dempster Highway وهو طريق غير مرصوف ويكون مقفولا تماما اثناء فترة التجمد تقريبااواخر اكتوبر الي منتصف ديسمبرحتي تكون طبقات الجليد السميكة وكذلك فترة الذوبان منتصف مايو وحتي منتصف يونيو حتي يمكن للعبارات من نقل السيارات من ضفةلاخري يعني ذي معدية توتي بس الفرق انو الانهار دي بتبقي طريق سريع في الشتاء والمعديات بتاخد اجازة مش ذي معدية توتي اللسة مدورة والساقية برضو لسة مدورة
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: Mutwali Malik)
|
ينصر دينك يا بكري ابوبكر
صلاح الكوفي ,,,,,,,,,,, بشحمه ولحمه شئ يفرح ,,, والله النت نعمة يعني الزول ده اخر مرة شفت قبل اكثر من 30 سنه,, كان حينها مبحرا نحو مدريد,, ومع ذلك ذكراه وحكاويه مازالت في القلب له التحية,,,,,
صلاح الطيب مالك منور وبكره بلم ليك شباب السكه حديد,,, ليتواصلوا معك من بشير عباس بشير , الهادي عباس بشير, السر عبدالوهاب المليك, وعبدالعظيم عبدالله, وازهري نصار , وعادل ربيع, كمال السمين,,,,,,,,,,,,,,,,,,,وو
خليك بعافية عمر عبدالله عبدالرحمن
(عدل بواسطة عمار عبدالله عبدالرحمن on 10-26-2007, 04:28 PM)
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: Tagelsir Elmelik)
|
اخونا محمد عمر والله مشتاقين كما تقبل تحيات الاخ جعفرالذي التقيته بالامس وبقية الاخوة الذكرتهم موجدين هنا عدا اخونا عبيدالذي ذهب في نهاية رمضان لزيارة الاهل بالسودان صحبته السلامة اخونا خالد الخضر بالفعل وصل الي مدينة Iqaluit بمقاطعة Nunavut ولكن لم يواصل ورجع الي Ottawa وحسب رايه انها لاتصلح لشخص` لديه عائلة ومقاطعة Nunavut انضمت لكندا في سنة 1999 وحسب رائي الكنديين لمن سمحوا لينا بالدخول عشان نجي المحلات الغير ماهولة بالسكان دي وانا ضيعت عمري بين المحافظات الكندية ثم امريكا ثم البراري الكندية واخيرا المقاطعات ولاول مرة اشعر بالاهمية قبل ايام كنت جالس اتحدث لعمدة المدينة تصور الناس كلها كانت بتقول القاعد مع صلاح مالك دة منو هنالك منطقة قريبة من هنا اسمها Coville Lake عدد سكانها حوالي 800نسمة وبيحنسوا فينا جنس تحنيس عشان نجي نقعد معاهم حتى لو اسبوع اقله
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
عبدالكريم الامين صديق شقيقي متولي شقيقى متولي شكرا علي الترحيب الحار الاخ عمار عبدالله عبدالرحمن السكة حديد ياليتنا عدنا اوعادت الايام تحياتي لاخوانك بالعين خاصة صديقي وزميل دراستي عبدالعظيم والبدون عين صالح وابوالقاسم وشنو ياراجل صلاح الكوفي واخر مرة شفتني قبل 30 سنة لك التحايا وشكرا على الترحيب اما اخونا تاج السر جانكوف ابوالسرة ابو اشرف ابومروة شفت العالم بقي كيف Global Village والفضل يرجع لاخونا بكري وكمان عقبال ال Global Warming كلكم قولوا امين وبجيكم صادي
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
يعود الفضل لتواجد السودانين بهذه المدينة الي شيخ امين الذى اتي لتلك الاصقاع في اوخر الثمانيات وهو الان يعيش في احدي الدول الافريقية يعني ضارب الدفو وقد التقي بالاخوان عبدالله مصطفى والاخ عصام عبدالحليم بمدينة ادمنتون ونصحهم بالذهاب الي Inuvik وبالفعل جاءوا لتلك المدينة قبل 17 سنة تقريبا عبدالله مصطفي يملك شركة التاكسي بالمدينة United Taxi وكذلك هو المالك لشركة خدمات الاسعاف Blue Ice بالاضافة الي Blue Ice Bed & Brakfast والاخ عصام يملك بعض ااعقارات بالاضافة لمشاركته في الشركة المنافسة الاخري Town Cab والتي انضمت مع شركة United Taxi واصبحت الشركتين نحت اسم United Taxi هنالك ايضا الاخ امير سليمان والذي يملك شركة Amirco Security service والتي تقوم بالخدمات الامنية لمستشفي Inuvik بالاضافة لثلاثة فنادق بالمدينة زايدا بعض المناسبات السنوية علي سبيل المثال Inuvik Petroleum Show Great Northern Arts Festival End Of The Road Music Festival اما بقية الاخوان بمافيهم العبدلله ذي ماقالوا ناس الهيلاهوب عبدالعظيم يعمل كشك ناس حاكوا حاكو يسوا بي جنبو الكشك عبدالعظيم يعمل مظلة علي الكشك ناس حاكو حاكو يكرهوا الناس المظلة مع الكشك لو كل زول سايق تكسي البركب منو وسوف اعود للحديث عن المدينة وعن التكاسة
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: Tragie Mustafa)
|
سلاح الدين التحية والمودة الدافيه يعني نفهم من كده انوبره تاكل على الحيطه كم تيتل وكم اييل وزحافة ؟؟ يعني الواحد لو داير ابرك ارسل ليك فحم للشتا الجاي ياخي والله حيرونا السودانية تمشي اطراف العالم تلقاهم وصلوا زمان ياصلاح كنت بقول السوداني زي الكركاسة تخوتو في اي لستك بمش هسي كلامي طلع صاح (الجسم البتمسح بزيت السمسم ما بتشقق في الإسيكيمو) ايه رايك في المقولة الجديدة دي؟؟ دمت طيب ياصديقي وصاحب للأيام الجاية مرحبه ومودتي
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: محمد سنى دفع الله)
|
خالص الموده والتحيه لك يا اخي الاكبر صلاح مالك والواحد بكل صراحه سعيد وهو يرى مشاركاتك الرائعه من INUVIK في حوش السودانيين برعاية ودالناظر وده شيء فعلا يسر ومتاكد ستزيدالمنتدي الق بذكرياتك الجميله وتجاربك الرائعه مع الغربه بداء من السعوديه( بداية الدنيا ومنتصف الكره الارضيه) ومرورا بمحطات كثيره منها امريكاو حتي الوصول لاخر الدنيا هنا ((عليك بالله شوف الرحله الطويله ده اظن السودانيين من سلالة العالم الرحاله ابن بطوطه)) واتمني ان تكون هذه هي المحطه الاخيره في الغربه وتكون محطتنا القادمه هي السودان وحقيقة انه اخونا الكبير صلاح مالك لمن الواحد يراه اول مره يتخيل انه قابله من قبل فهو اخ مالوف الوجه وحبوب مع كل الاخوان ويتمتع بدماثة خلق عاليه وهذا الشيء الجميل نتمنى ان يتخلق به كل الاخوان في المهجر حتى يعكسواالمظهر الجميل لاهل السودان ويكونون خير سفراء لبلادهم وهذا بالفعل ما نسمعه من جل الوسط الذي نعيش فيه سوا ان كان في الدول العربيه او غيره وكمثال لدينا هنا اخ عزيز من ارض الرافدين (الباشمهندس احمد) هو جالس هنا في اخر العالم ........ يقول جلست فيها لانه وجدت بها سودانيين والسودانييون هم علي رائه مساجد اي بمعني اذا لقيتهم باي مكان تجد مسجد وهذه سمعه جميله ,,, و نتمنى دوما ان نكون علي حسن ظن الناس بنا . وبالمناسبه اود ان افيدكم علما بان امام المسجد سوداني اضافه للتاكسي والامن ايضا ماسكين الشئون الدينيه واخيرا التحيه لك الحبيب بكري واتوقع مجموعه من المشاركين في منتداك العامر من INUVIK هم في الطريق علي راسهم اخونا امير علي كان منتظر الفرصه ده ليه زمن علي قوله ونكرر لك الشكر اجزله
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: hamid abdalah)
|
اخونا بكري وين انت هاملتون ام اتوا والله ماجاب يوم شكرك بس انت رسل لي ايميلاتي والايميلات العندي شيلها شيلها اختي تراجي ناس هملتون والتي كنت اتابع اخبارها عبر المنبر دائما وصلتني دعواتك فشعرت بالدفء الذي ينبعث من الحروف فلك من الشكر اجزله ومن الثناء اعطره وامني نفسي بزيارتكم بهملتون والتي اخر عهدي بها في عام 1990 حين كان بها فقط اثنين من الاخوة السودانين وكنت في زيارة اخي وصديقي وليد عبدالغني المتواجد حاليا بمدينة اتوا اخونا الزول الظريف والفنان الموهوب محمد السني ضحكت كثيرا قبل ان ارد اليك وقد اعجبتني المقولة ( الجسم البتمسح بزيت السمسم مابتشقق في الاسكيمو ) نعم فانا من ذلك الجيل الذي كان يطلب فول بي قرشين وزيت سمسم بي خمسة قروش تاكل منو وتتمسح منو في زمان لم يكن فيه كباب ولاارهاب ولااغتراب وحيث كان زيت السمسم يباع بالصفيحة مش جركانة بلاستيك صغيرة انا عايز زيت سمسم اكله واتمسح منه مش احلف عليه فائق حبي وتقديري للاطلالة السمحة
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
الاخ العزيز صالح مالك حسه نهر الهنا ده اتجمد متين؟؟الآن في اكتوبر ده وله دي صور العام الماضي في ديسمبر؟؟؟
اما اذا انتو كده من حسه فما هو حالكم في ديسمبر؟؟؟ كر عليكم وسجم خشم امهاتكم.....
Quote: نعم فانا من ذلك الجيل الذي كان يطلب فول بي قرشين وزيت سمسم بي خمسة قروش تاكل منو وتتمسح منو في زمان لم يكن فيه كباب ولاارهاب ولااغتراب وحيث كان زيت السمسم يباع بالصفيحة مش جركانة بلاستيك صغيرة انا عايز زيت سمسم اكله واتمسح منه مش احلف عليه فائق حبي وتقديري للاطلالة السمحة |
حليل السودان يا صالح وحليل ايامه وحياتك لو شفته آخير لك الانويت الانت فيها دي يازول ده بقى حكايه ثانيه ربك بس يستر,وتابع المنبر ده تقرأ العجب. وننتظركم في الكريسمس لو عندكم طريقه بس جيبوا لينا معاكم لحم تيتل ولا اقول لك دب قطبي صغير كده.
تحياتي
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
Quote: الأخت Sudania2000 شكرا علي المرور وطبعا احسن حتة دافئة في كندا حسب رائي هي الثلاجة يعني من المطار وعلي الثلاجة عدل بس انشاء الله الكهربة ماتقطع
|
صلاح أخوى الظاهر القطب الشمالى دا خلعك شديد ياخى احنافى انتاريو درجة الحرارة اليوم عندنا 18 ولينا سنين ماشفنا جليد قبل الكريسماس (Global Worming) وبعدين انت نسيت ناس فانكوفر وفكتوريا? ديل مابعرفو حاجة اسمها جليد خالص, يالله ياسو دانية 2000 كندا ترحب بيك فى كل الفصول.
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
المدينة صغيرة جدا وعدد سكانها تقريبا بالعبدلله حوالي 3500 نسمة وبالمدينة شارع رئيسي واحد Mackenzie Road وهنالك فقط اشارة مرور واحدة وابعد مشوار هو المطار حوالي 14 كم (8 ميل)من نص البلد والسرعة القصوي في الظروف العادية ان وجدت 35 كم في الساعة لأنه لو زادوها حتلاقي نفسك فت المطار واحتمال البلد ظاطها المشاوير داخل المدينة كلها قريبة وكما قال أخونا أحمد شرف الدين المشوار هنا نانا يانانا وتلقي نفسك وصلت عشان كده ناس التكسي عيني باردة نايمين في العسل وانا بقول ليهم هنا الواحد من شدة البرد لو عايز يمشى من غرفة الجلوس للحمام عايز تكسي
| |
|
|
|
|
|
|
Re: صلاح مالك يكتب اليكم من Inuvik رغم أن درجة الحرارة أسف درجة البرودة 10 تحت الصفر0 (Re: salah malik)
|
الأخُ الجميلُ / صلاح مالِكْ :
لا تأسَف يا رجُلُ فأنتَ مُحِقٌّ فيما
ذهبَ إليهِ ظَنُّكَ أوَّلاً " درجة الحرارة "
فهيَ درجةُ حرارةٍ حتَّى وإنْ كانتْ تحتَ
( -10 ْ C )الصفر المئوي ..
فدَرجةُ الحرارةِ في اعتقادي وكما علِمْنا سابقاً –
وقبلَ تغييرِ المناهِجْ :
" هي مَدَى سُخونةِ أوْ بُرُودةِ الجسمْ ... "
فأتمنَّى لكَ شتاءاتٍ دافئةً ،
وجمالاً بكلِّ الألوانْ ،
وعِمْتَ صُبْحاً ومساءْ ،
واقْرأ عَنِّي لِمَنْ حوْلِكَ السلامَ
وعميقَ الوُدِّ وكاملَ
الاحترامْ .
أخوك دَوْمَاً / محمَّد زين ...
| |
|
|
|
|
|
|
|