|
صفقوا معي لزوجتي المسيحية
|
كنت آذهب معها إلى الكنيسة.. أنتظرها في (كافتيريا) الكنيسة لحين فراغها من الصلاة.. ولا تذهب معي الى المسجد.. لأنني ببساطة (أدك) الحصة..
تخربشنى في كل جسمي حين نتشاجر على أي موضوع تافه.. ولا تنام حتى أرجع مـن الخارج في فمها إبتسامة.. وعلى المائدة لقمة تعوض كل ما سال من دمائي..
حين تطبخ لي ملاح ويكة بالشرموط .. أتذكر حليمة بت أب شنب (حبوبة الشاعر حميد) .. ومقولتها الشهيرة (كلاب برة جابنلهن جلد).. تمسح بكل عنفوان الويكة عنف الأيام وتعنيف الضمير..
Devoted ككراس تلميذ نجيب.. Dedicated كقلم الأستاذ الأحمر..
صارمة كثورة أكتوبر.. هشة كإنتفاضة أبريل
في العيد.. ذهبت في جولة ميدانية لتبارك لكل السودانيين .. ولم أفعل أنا..
لا أعتقد أنني أحبها حبا جارفا.. تؤمن بي أكثر من إيماني أنا بالله (لا غرو ولا غرور)..
ثم.. جربنا الإنفصال لمدة ثلاث شهور..
وأنا أودعها في المطار كنت أضمها وأبكي بكاءا هستيريا.. تلملم حولنا الخواجات وصفقوا لنا طويلا .. كما يفعلون مع الجنود العائدين من العراق..
ضعت بعدها ثلاث أشهر .. كنت أشرب خلالها وكأنني جندي عاص في جيش جالوت.. أنام على الأرض وكأن باعوضة تزن في جمجمتي .. ولا تسكت حتى أضربها بكلتا قبضتي..
علمت هي بأمري ..
أتتني لا كما يأتي محمد إلى الجبل.. ولكن كما تأتي الأخبار الطيبة..
في غرفة العمليات ..بكيت مرة أخرى حين أتت (لنا) بـ (أمونة).. ترك الخواجات الـ c-section .. وبدأوا في عمل lollaby للمولود الجديد.. الذي هو أنا..
صفقوا معي لها.. فأنا أعتقد أنني.. أحبها حبا جارفا..
|
|
|
|
|
|
|
|
Re: صفقوا معي لزوجتي المسيحية (Re: Siham Elmugammar)
|
صابر كل عام وانتم وآمونه الصغيره بخير وربنا يديم عليكم نعمته( رغم عدم ايمانك كما قلت ).
العزيزه سهام المجمر وين انت يا زوله لا ياختي عندنا اخوة افضال كثر ما قصروا كتبوا عن زوجاتهم ابو ساندرا عن رشيده واحمد موسى... وقبلهم بفترة محسن خالد ولكنه الممسوخ كان يحدثنا عنها كذكرى ....وآخرين.يبدو ان هنالك تطور في عقلية السوداني وصرنا نعرف كيف نتحدث عن الايجابي بدلا عن السالب فقط.
Quote: يا صابر انا اصفق لك لاننى و لأول مره اشوف زوج يثنى على زوجته و يعلن حبه لها هكذا على الملأ!!!!!!!!!!!!!!!! انت استثناء |
الحمد لله انه ليس استثناء ولكن تناوله اكثر حميميه وخصوصيه.
| |
|
|
|
|
|
|
Re: صفقوا معي لزوجتي المسيحية (Re: محمد عكاشة)
|
Emad Abdulla محمد سني دفع الله سامي عبد الوهاب ود أبو حريرة ماجدة خوجلي حيدر ميرغني Giwey سهام المجمر تراجي ملاسي محجوب علي Ahmed Musa هادية بدر الدين جمال السلام محمد عكاشة _______________
صفقوا معي لكم..
| |
|
|
|
|
|
|
Re: صفقوا معي لزوجتي المسيحية (Re: نجوان)
|
Quote: ادينا سبب واحد يخلينا نصفق ليها؛ و الصفقوا ليها ديل صفقوا ليه!! |
ملاسي لو كانت زوجتي مميزة وعلم على رأسه نار لما إحتجت كتابة هذا البوست.. فمن عاديتها ويوميتها استحقت كل هذا التصفيق.. هاك سبب آخر للصفقة:
زوجتي أتقنت اللغة العربية.. لدرجة إنها تقول ليك (أنا مافاضية.. عايزة أدخل أغسل "المواعيد") وآه.. حين تغضب.. فإنها تكسر كل "المواعيد".. وتلقي بها في الـ trash.
ومايفضل ولا موعد واحد في البيت.. يكفي للخروج له..
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
شكوكو نجوان ------------ سال مني الكلام من غير سابق ترصد.. تماما مثل الخطوط الحمراء في انبوبة معجون الاسنان.. دائما هي موجودة هناك .. فقط لكي تظهر نحتاج أن نضغط عليها برفق.. ولكي تظهر.. لابد لها من وجود خلفية بيضاء.. قلوبكم خلفية بيضاء..
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: ادينا سبب واحد يخلينا نصفق ليها؛ و الصفقوا ليها ديل صفقوا ليه!! |
اخونا صابر
سلامات
يمكن الموقف يتاع زغاريد
انا شخصيا بصفق عشان الوفاء والمودة هي قامت بأكثر من واجب الزوجة وهو رد الجميل اعلن عليها الحب
| |
|
|
|
|
|
|
Re: صفقوا معي لزوجتي المسيحية (Re: salma subhi)
|
اخواتي عواطف سلمى ______________ شايف كل الحلوات من الجنس اللطيف إتلموا حول البوست ده.. أنا بعد ده شكلي ح أتقمص شخصية ضابط في الأمن.. وأعمل إستدعاء لعدد من رجالة البورد ليقوموا بالتصفيق ولا بأس من بعض (الطيارة قامت).. و (أرنب نط) وح يكون هناك إستدعاء خاص للاستعدائي الأول في البورد بلا منازع الأخ حسين ملاسي وأخليهم يعملوا الصفقة فوق صلعتو المملسة ديك..
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: رغيم كنت متوقعك تعمل quotation لموضوع الويكة..
|
والله يا صابر وقفت عندها و لفيت حولها لكن قلت بتاعت تنسي دي ما حتحصل بتاعت المناصير تتصور ويكة المناصير صارت من ضحايا الخزان برضو
اها بتعمل ليها مرقة ماجي ولله سن برق
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: غايتو بوستيك لملم الحريم كلهم خبر يرفع معنوايتم
لكن بيني وبينك خير فعلت مالك ومال الهم والغم
|
محمد الطيب ____________ والله ياخوي بعض البوستات في البورد ده كان عاوزة ناس محمد علي كلاي وبروس لي يكونوا مشتركين فيهو..
قلنا نحليهو بـشوية أم رقيقة.. مش تقول لي رقيق وجلابة..
وبيني وبينك القوارير ديل ما بيجي من وراهم إلا كل خير..
بس إنتو خليكم وراهم
| |
|
|
|
|
|
|
Re: صفقوا معي لزوجتي المسيحية (Re: نزار محمد عثمان)
|
نزار ركزت على اللقمة.. ونسيت الإبتسامة... ودي كيمياء
ذكرت التشبيه بالكلب.. ونسيت إنو الواحد ممكن يستحضر مشاهد كاملة عن طريق الطعم والرائحة.. دي أظنها فيزياء .. أو أحياء لوجود الكلب..
ذكرت الكنيسة والمسجد.. ونسيت المطار.. وده دين..
| |
|
|
|
|
|
|
Re: صفقوا معي لزوجتي المسيحية (Re: osman righeem)
|
والله يا صابر منذ "زمانٍ يليق بموتي" ما عتّبت المكان ده لكن جابتني "حِرَّةْ" الصفقة، ونفس الكان بجيبني ليك "بلا مواعين" في أيامنا ديك. وفي أحوالنا ديك. جيت أصفّق ليها .. وأصفق ليك .. و أصفق لي، لأني لقيتك.. ، بجيك في محل يحتمل الداير أقولو.. فهذا المكان لها وحدها، ست الريده وست كل هذا الجمال... ، محبتي،،
| |
|
|
|
|
|
|
Re: صفقوا معي لزوجتي المسيحية (Re: بدري الياس)
|
بدري صاحب السوميتة النقي..
أراني أمير شمعون واحد من كتاباتك له.. جاء في إحداها: (سلم لي على صابر... أنا ما خايف على زول من الغربة.. قدر خوفي على صابر ده)
... الخوفة الدخلت فيني من اليوم داك لليلي ما مرقت.. لدرجة إني إنكفأت على نفسي لمدة قاربت الخمسة سنين.. بقيت حتى شمعون ماقادر أشوفو.. .. خوفك كان في محلو تمام.. وخوفتي كان مصدرها إنو: (هل من الـمعقول أن يبلغ تآلف روحينا هذا المبلغ.. أنا وإنت يابدري..??).. _____________
طمني على الفنان محمد جبارة.. ووريني كيف خليتو وراك.. ومشيت لبلاد يركبها الأفيال..???!!!
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
نص بديع يا صابر يلا صفقوا كلكم
يا حسين ملاسي! ذكرتني النعام آدم رحمه الله استدعى حبيبك النميري الفنان النعام ادم وقال له: الفنانين ديل كلهم غنوا لي الا انت! المانعك شنو؟ فرد عليه النعام: والله انا بغني للبنوت!! دحين انت صفق لي بنات سيد صادق ذي ما قال اخونا محجوب
مودتي يا صابر
| |
|
|
|
|
|
|
Re: صفقوا معي لزوجتي المسيحية (Re: خالد العبيد)
|
خالد ود العبيد
الحمد لله البوست إتملى رجال.. وأي رجال..??!!!
نوعية. ____________
(الهجين ما ببقى عجين) قال مندوب إتحاد مزارعي القضارف حين حاول بعض التجار إدخال نوعية جديدة مهجنة من العيش في المشروع..
هذا ينطبق على بعض الناس .. أيضا
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
الأخ صابر تحية طيبة
Quote: بنيات اسمرا ديل حنينات ويستاهلن كل خير |
إنصرف إلي ذهني من الوهلة الأولي أن الزوجة المسيحية المعنية هنا زوجة مسيحيةغربية، بسبب الهجرة المكثفة ، ولإرتباط المسيحية ثقافياً ودينياً بالغرب ، رغم كونها ديانة شرقية .وأود أن أضيف إلي العبارة المقتبسة ، أن بنيات أسمرا ديل (مسيحيات ومسلمات ) حنينات ويستاهلن كل خير ، ولايقلل من شأنهن سمرة اللون ، إن لم يزدهن رفعة . إختلاف المفاهيم التربوية يجعل المرأة المسيحية ،والغربية بصفة خاصة،أقل عقداً في التعبير عن عواطفها، وأنا هنالاأصدر أحكاماً قيمية مسبقة . المرأة المسيحية ( أقرأالغربية ) ،إن أحبت فهي إعصار .وإن تزوجت عن حب ، فهي إعصار وبركان وأمطار وشموس . لاأجيد التصفيق ، ولكني أفهم ما تقول وأغبطك علي نعمة الحب . فهنيئاً لكما .
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: صفقوا معي لزوجتي المسيحية |
أولا إذا كنت تجب زوجتك ما علاقة ذلك بمسيحيتها وهل تريدنا نصفق لها أم لمسيحيتها لإلتزامها أم لخيبتك؟؟!!! أي حب هذا الذي تقلل فيه من شأنك وترفع من قدرها في شئ لا ترومه لنفسه وتراه فيها أهو حب أم مركب نقص؟! ودجلك عن تصفيق الخواجات ليك يؤكد مركب نقصك وداير توحي بانها خواجية طيب ما شأن هذه الصغيرة المسكينة هل عقدتك برضو خلتك تغدر بأمها عشان تشكر لينا خواجية؟! إنت تحب فيها كمالها ومتأكد هي تكره فيك هذا النقص لانه تعلقك بغير هويتك وعدم إعزازك بهويتك يجعل الآخر بلا ريب يحتقرك! أنا ما عارف الناس ليه بتبارك ساي بدون ما تعرف المغزي الواضح الخبيث من البوست وخاصة أن صاحب البوست ليست له إسهامات في هذا البورد سوي محاربة وتشويه النمازج الإسلامية وكأنه بس ناذر نفسه لهذه المهمة لا تراه يتداخل أبدا في القضايا والكوارث التي تعج بها بلادنا
| |
|
|
|
|
|
|
Re: صفقوا معي لزوجتي المسيحية (Re: Adrob abubakr)
|
بدلتك والقلم في الجيب.. كان بيصرفوهم لناس الأمن زمان.. بعرفهم مما كنت عضو في إتحاد طلاب جامعة الخرطوم المصادم عام 90/91.. وين إنت كنت الزمن داك.. أظنك كنت مع الجماعة الدقيناهم وحبسناهم جوة الجامع.. هم والسيخ بتاعهم.. شفت الجوامع بتستخدم اليومين ديل لشنو ?? تخزين السيخ والأسلحة لإرهاب الطلاب والناس البسـطاء.. عرفت ليه أنا مابمشي المسجد..?? ولا أقولو ليك تاني..
| |
|
|
|
|
|
|
Re: صفقوا معي لزوجتي المسيحية (Re: Adrob abubakr)
|
Quote: وخاصة أن صاحب البوست ليست له إسهامات في هذا البورد سوي محاربة وتشويه النمازج الإسلامية وكأنه بس ناذر نفسه لهذه المهمة لا تراه يتداخل أبدا في القضايا والكوارث التي تعج بها بلادنا |
اخونا صابر لك المحبة الكلام الفوق دا كلوا امسحوا لى فى وشى . قريبي ادروب دا ..... اخير الفيزياء والكيمياء واجمل حاجة الهوية عندو هى الدين !!! وهو ثورى بجاوى !!! انت ياصابر اخوى .. الويكة دى مابراها هوية ثقافية؟؟ ــــــــــــــــــــــــــ مستمتع جدا بالبوست
| |
|
|
|
|
|
|
Re: صفقوا معي لزوجتي المسيحية (Re: MAHJOOP ALI)
|
أي محجوب الزول ده خلي بالك ما سمعني بغني (أوولقا أشور أنا.. هامينات كالافانا).. كان مسح الكلام الكتبو ده في وشو هو..
ويسلم وشك يازول ياحلو..
عارف أنا ح أكلم ليهو الزعيم/ محمد طاهر أبوبكر يرفدو من الثورية بتاعتو دي..
والله أول مرة أشوف لي بجاوي مخو كعب.. بعدين قول ليهو زوجتي دي إريترية وليست خواجية.. وبنتي - ياخي - إسمها: آمنة.. أمونة.. حجر الطاحونة..
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
صديقي الجميل الشفيف الفنان صابر عبد الهادي
احبكم جميعا انت وهي وامونة وقبلكم الوطن والله اخليكم واديم المودة والمحبة والرحمة بين الجميع.
هباني
سندة: بالمناسبة يا صابر لازم بعد ده تنكرب و ترسل لينا علي المنبر دندنة من دندناتك الشجيةوالعذبة بالعود من روائع الراحل مصطفي او السامق الشفيع حسبما تختار لنا.
| |
|
|
|
|
|
|
Re: صفقوا معي لزوجتي المسيحية (Re: هشام هباني)
|
هشام.. زي أخونا أدروب ده يغنوا معاهو كيف..??
والله لو غنيت ليهو (باب الروح متاكا إنسربي)..لعاطف خيري وهو السي دي بتاعي under construction إلا يهدر دمي.. وأبقى زي سلمان رشدي.. حايم في المنافي.. بدون دم..!!
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
طق طق طق طق طق طق
لمن يديني حمرن سلامات ايها لرائع صابر عبدالهادي والتحايا عبرك لامونة ووالدتها .
دندنة من دندناتك الشجيةوالعذبة بالعود من روائع الراحل مصطفي او السامق الشفيع حسبما تختار لنا. ياهباني انت داير ادروب ازعل اكتر ماهو زعلان , الراجل كان عارف ان صابر متزوج مسيحية والمغسة كتلتوا دايروا يعرف ان صابر بغني لموصطفي سيداحمد وبالعود يعني( جلابي)
وطق طق طق طق الي يوم الدين
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: والله أول مرة أشوف لي بجاوي مخو كعب.. |
قرقرقرقر ادروب محل تقبل تاخد عكاز فوق نافو خك طبعا موضوعك انو الخواجيه دي جلابيه اها طلعت كوشيه عديل اصلي بلادها وصابر طلع ما مستلب نظريات بشاشا يوم بتغتس حجرك, -----------------------
و تصفيق حار للمسيحيه
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: ثم.. جربنا الإنفصال لمدة ثلاث شهور.. |
Quote: في غرفة العمليات ..بكيت مرة أخرى حين أتت (لنا) بـ (أمونة).. |
بعد مرور سنوات على الزواج، كثيراً ما تحدث حالة من التكرار والملل و الزهج.. لذلك ينصح علماء النفس الزوجين..بتجديد الحياة الزوجية و إعادة التوهج لها..بالآتي:
1/ تغيير المنزل أو..أثاث المنزل. 2/ الظهور بمظهر مختلف..أو نيو لوك..تنحيف..تسمين..تمليس..تخشين..إلخ. 3/ الذهاب معاً في إجازة... بعيداً عن الحياة الزوجية التقليدية. ... ... 4/ إنجاب طفل جديد ينعش الحياة الزوجية، ويضفي عليها مزيداً من الحيوية. 5/ الانفصال المؤقت... أي أن يأخذ كلا الزوجين إجازة من شريك حياته.
ربنا يخليكم ل بعض...و ما تنفصلوا تاني..و لو مؤقتاً.
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: واجمل حاجة الهوية عندو هى الدين !!! |
إنت يا محجوب والله مواقفك غريبة جدا وبهناك أديت منعم المبرر للهجوم علينا ما عارف إنت مننا ولا علينا بطريقتك ده حتخلينا ننفصم فيك واضح أنك هنا ما قادر تفرق بين الإسلام والدين فالإسلام رسالة وليس هوية أما الدين هو التطبيق الواقعي له بغض النظر عن صحته أو خطأه فهو يمثل الثقافة المتراكمة بالإضافة إلي الشحنة اللغوية التي يحملها والنمط التفكيري الذي يحتويه ولهذا فهو من أهم عناصر الهوية!
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
Quote: بدلتك والقلم في الجيب.. كان بيصرفوهم لناس الأمن زمان.. بعرفهم مما كنت عضو في إتحاد طلاب جامعة الخرطوم المصادم عام 90/91.. |
أولا يا صابر الفي الصورة ده ما أنا ده الشيخ أنتي ديوب وبعدين أنا ما إعتراض علي التصفيق لزوجتك ولا حتي الإشادة بالدين المسيحي ولكن ليس علي حساب الطعن بالإسلام فكلاهما دين ولكل أتباعهما ألم يكن من الممكن أن تشيد بزوجتك دون ذكر دينها مثلا؟! حسب متابعتي لبوستاتك للأسف تخلط شديد بين الإسلام والمسلمين يا سيدي هؤلاء بشر كغيرهم مشكلتهم مثلك تمسكوا بقشور الإسلام وعجزوا عن وصال الدين بالواقع ومواكبة تطورات الحياة فأصيبوا بصدمة وعقدة حضارية مذبذبين بين ذلك لا إلي هؤلاء ولا إلي هؤلاء وقد تسأل هل العيب فيهم أم في الرسالة أقول لك فيهم وفي عجزهم عن تطويع الواقع الذي سخرهم الله لهم نتيجة لقوة الإستلاب من الطرف المنتصر في المعركة الحضارية!
علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين!
| |
|
|
|
|
|
|
Re: صفقوا معي لزوجتي المسيحية (Re: Adrob abubakr)
|
Quote: علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين! |
ادروب يعني الله في المسيحيه ما في ؟؟؟ ما كلهن ديانات سماويه يهوديه مسيحيه اسلام وكل فرح بما عنده . الزول دا فرحان بحب المسيحيه وحبه ليها وكلنا فرحانيين معاهم. يا ولدي صفق ليهم وابقي متخارج ما تقلبو لينا دين ووعظ وارشاد تعال لينا هناك في بوست شبقبق
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
يا صابر العاشق سلام عليك في المترعين صبابة و أدب
صفقة كبيببببرة لحبيبتك أم أمونة و هي (تمسح بكل عنفوان الويكة عنف الأيام) على الأقل لأنها غلبتك بالعيال و بالعشق و بالدين و بعدما بقيت (زي سلمان رشدي)... مهدراً دمك... خلتّك (حايم في المنافي) بدم المحبة... و استكتبتك بالشهد ينقط علينا حبة حبة
سلام عليك و عليها و على البنت أمونة ذرية الحنين و الأخبار الطيبة كأنها مدوزنة على لحنك و موقعة على طعم القهوة و نكهة أمها الشرقية.
و لكن كمان، حرام عليك يا صابر ـ أحسست بشفقة عليهن، من (إعلانك) الحب الجارف، تتسامعه اللواتي عرفناهن في الوكت الأخضر، قد تركن لك (باب الروح متاكا) فإنسربت إليها وحدها!
تحيات لحبيبتك و لأمونة و لناس ناشفيل بالأخص عمّك علي و محمد طاهر أبوبكر و يوسف _______ أدروب، خليه ساكت ، ما تشتكيه للزعيم و أصلو ما تغني ليه كلو كلو، لا بي عود و لا بي الباسنكوب.
| |
|
|
|
|
|
|
Re: صفقوا معي لزوجتي المسيحية (Re: هاشم الحسن)
|
Quote: . علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين |
أدروب.. طيب تقدر ترجع لي الجلدة القطعها مني الحكيمباشى/ حسن علي يوم (طهوري).. بشفخانة كريمة سنة 69.. قبل ما تطردني من الباب الإنت ماسك مفاتيحو ده..?? -------------------------- لغاية قبل شوية البوست ده كان very romantic لكن يظهر بعد كده ح نبتدي قلة الأدب..
أنا عايز الجلدة بتاعتي هسي.. لا صلح.. لا مساومة..لا إستسلام
وتعال لي تاني...
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
الأخ صابر: قلت:
Quote: نزار ركزت على اللقمة.. ونسيت الإبتسامة... ودي كيمياء
ذكرت التشبيه بالكلب.. ونسيت إنو الواحد ممكن يستحضر مشاهد كاملة عن طريق الطعم والرائحة.. دي أظنها فيزياء .. أو أحياء لوجود الكلب..
ذكرت الكنيسة والمسجد.. ونسيت المطار.. وده دين.. |
أولاً: لو صح ما ذكرته في كلامك عن الكيمياء والفيزياء والدين ... فواضيعة العمر إذن. ثانيا: تخريجك لكلامي بطريقة الكيمياء والفيزياء هذه يمكن أن أصفه بصفات عديدة أخفها أنه لا يمت للموضوعية بصلة. ثالثا: أنا لم أنس الابتسامة والمطار ونحوه كما زعمت، بل قلت ما يفيد أن نصك فيه عواطف لكنك نسفتها بالإكثار من الاهتمام بالبطن والطعام، وتشبيه زوجتك بالكلب، ونحو ذلك مما يشي أن عاطفتك مظهرية (شوفونية) مضطربة.
| |
|
|
|
|
|
|
Re: صفقوا معي لزوجتي المسيحية (Re: Saber Abdelhadi)
|
الأخ صابر
Quote: نزار ياأخي.. والله .. والله.. أنا أحب إبتسامتك جدا.. وأراها لا تتسق مع اللحية..
.. ده تجريد..
أها غالطني في دي كمان.. |
الرد السابق في نظري ـ من غير غلاط طبعاًـ حيدة لطيفة عن جوهر الموضوع. أقبل بها مختتماً لحديثي.
| |
|
|
|
|
|
|
Re: صفقوا معي لزوجتي المسيحية (Re: هاشم الحسن)
|
Quote: لناس ناشفيل بالأخص عمّك علي و محمد طاهر أبوبكر و يوسف
|
عمك علي خضر.. شيوعي ونقابي مخضرم.. جعلي من كلي..
محمد طاهر أبوبكر.. the global leader بتاع مؤتمر البجا.. بشاري من بورتسودان..
يوسف.. جنوبي من البطانة.. يجيد رقصة العرضة.. ويتقن الـ DUI.. ------------
هسه يا دكتور هاشم..
عليك الله التشكيلة دي ما بتكسب الـ Power Ball..?? --------- الوكت الأخضر ده ما تخلي (بابو متاكا) أحسن.. مالك داير تجيب لينا المشاكل..?? ------------ تحياتي لعبد الرحمن ود السمين..
| |
|
|
|
|
|
|
|