ساندريلا .. النيل الأزرق ...

Quote: الملاحة مندوبة وليست كافية!الحضور والآداء والثقافة والصوت والاداء تشكل المقومات الأساسية للوجه التلفزيونى !

في بعض الأحيان كافية يا جني دا طبعا ما بيعني أنها بتغطي قصور الاساسيات الأخرى بمعنى اصح ما ممكن اقبل اطلاقا جمال .. وملاحة وتعري زي الحاصل في الكتير من القنوات المشوهة المفكوكه في هواء الله دا .. مقابل انو يسد لي خلل رئيسي ..
ونموذجنا هنا يا جــن .. في وجه مقبول لو ركنا لي مقائيس الجمال، في حضور .. في ثقافة تعامل مع مشاهد في برنامج من أهم اساسياتو الأخذ والعطاء مع شخص إنت ما بتعرفو إلا من خلال الصوت البيصل ليك .. والبيكون عادة مباشر .. وبتكون معرض فيهو للكثير .. وفي نفس الوقت مطلوب منك خلق حوار معاهو اقل ما يكون انو حوار ودي تاخد منو .. وتديهو وفي نفس الوقت تعبر عنو هو زاتو ..
تعرف:
كنت بحضر في حلقة فيها اتصال من زولة في أمريكا ما زي جماعتك بتاعين مكتب جنيف طرفكم كان الحوار طبيعي جدا وحميم وودي ممكن يكون بين أي اتنين ـ الزولة المتصلة اخدت مساحة كانت محتاجه ليها بالضبط علشان تتنفس عن اشياء كتيرة .. في نص الحوار سالته:
إنت ليك كم سنــة ..؟
ردت:
أنا لي تسعة سنوات .. واخدت ليها صنه شوية .. ممكن تحس فيها كل آلم الغربة الما بنقدر عليها نحن السودانيين مهما كان مدى احتمالنا ..
ردت ليها ريهام بي طريقة .. اعتقد انها اختصرت ليها كل الشوق دا ووصلت العايزه بالضبط تقولو لي اهلها ولي نفسها .. ودي هنا ياجني ( الثقافة ) البقصده .. ثقافة انك تسرح داخل نفسيات الآخــر وتتعامل معاهو بطريقة هو محتاج ليها الآن .. مع الأخذ في الاعتبار البرنامج مباشر ومطلوب فيهو سرعو البديهة وكل الجوانب الأخرى ..

(عدل بواسطة tmbis on 10-16-2007, 10:34 AM)