|
|
 بكـري دحين انا ما نسيت لي جلابية مشختّة في مكتبك؟
|
سري للغاية
من سجيمان الي بكري ابوبكر
النضم دا سر اوعك نهارت باكر اسمع بو مرق من هنا وابقى انا ونسة في خشوم الناس... تظكر ايامك الفي السودان ديك .. وانا قاعد اشولت عليك في المكتب.. الفيهو المكيف الساقط داك.. يوم جيت شايل لي كيس بمبي.. فيهو جلابية سمنبة مشختة.. وكيس سعوط بخمسمائة جنيه مكتوب عليهو سلطان الكيف.. وحبوب خُدُر اللات دغت.....جيت قعدت في الكرسي الوهيط داك وختيت الكيس بينات كرعي.. والونسة اخدتني ونسيت الكويس بي عدتو دي عندك...دحبن ان لاقاك غايتو السعوط والحبوب اللات الدغت ان دخلن عليك عفيتن ليك فضلة خيرك.....علا الجلابية جديدة وحات الله بنات اعمها ما سمعن بها ولا فشيتا.. الايامات دي معووج فيها..وباقي عليها تب...
عليك الله ان راحت في شنطك ساعتك القاعد تستف في هدومك لامريكا رسلها لي.. وان بقيت كمان داير تتفنجر بها علي بوش ما عندي مانع حرم آآزول ما اكهمك...باقي انا وبوش قاعدين نتلابس...يعني في الجلاليب مقاساتنا واااحدة....وان لحمو اكلو وقال داير يرد الجميل اوعك تمسك منو شي... انا عارفن الخواجات ديل ما بيخجلو ويقول انا وسجيمان دا قاعدين نتلابس يقوم يرسل لي شيتن تخجلني قدام بنات اعمي... افو.. يا زول حرم ان مشيت ساكت طٌلوق... ما البسها...
في الختام سلم علي الوليدات
الخرتوم في10رمضان 1424 هـ
اخوك النسى جلابتو المشختة في مكتبك
سجيمان
|
|
 
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
سجيمان اخوى لا تتبلى على الوليد ساكت
الكيس الليلك يبقى نسيتو فى الباظ ولا امكن محل ما بتمشى تتطمش
غايتو اخر مرة كنا فى مكتب بكرى عامن اول
ما كانت عندك جلابية غير الدارعا فى رقبتك ولونا رمادى وصحى مشخته
لكين يبقى نسيتا فى بيت طارق اللمين
ساعة الوليد ناذراكان بغنى
غايتو جلابيتك دى ما تتصلبط فى ود الناس ولا شيتا دايرلك مشاكل مع بوش
هسى تجيب للناس كفوة
يجيك يقول ليك سجيمان عنده (حلاليب الدمار الشامل) ويبقى سبب يدخل بيهو
ما ناقصين
عليك الله بكان رميت جلابيتك افقدا
وكان يقيت لقيتا خسمتك ان ما كلمتنى نعنو الناس ديل قاعدين على الهبشة
الحمد لله الماعندنا تماثيل فى الشوارع لكن بطريقتك دى بتقوم علينا نفس عمك بوش
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: Siham Elmugammar)
|
سهام المجمر
Quote: دحين انت سلمى الشيخ كانت فى الخرطوم
و اتحاومت معاه قدر كدى لمن حضرتو الغنا العند ناس طارق الامين |
هي حوامة نصاح.... شفتي شمش الخرتوم كلها فوق قنيقيناتنا انا وسلمى...وبعدين انتي اكنك كنت في الخرتوم؟.... انا قايلك في امريكا... بافي قدر مافي زول في المنبر دا اسعلو انت وين يقول لي في امريكا.... الله يسعلني البلد كلها رحلت الغرب
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: سلمى الشيخ سلامة)
|
يا سلمى يا اختي اسكتي الجلابية الخبارها ديك لمت فيها عين السواد والرماد...اتحرقت بالمكوى اربعة بكنات والله تشوفيها تقولي عندها غيرقان...اها قمت مشيت اشتريت دي... وجيت عن بكري وقعدنا نتونس وحق الله وبق الله... وانسى الجليليبية.. وارجع اهلي بلاها.....عليك الرسول شفتي الجلابية ديك كانت شرط قدر شنو؟ شرط شراطة ما بعدها شراطة
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: soma)
|
تعرف يا سجيمان , كيسك الرايح الفيهو جلابيتك المشختة ده ,
ذكرني بي قصة ظريفة وحقيقية حصلت فى تورنتو / كندا ,
حيث زار أحد السودانيين صديقا ليهو فى نفس المدنية وكان
الظاهر عليهم مرتبين أوضاعهم على أساس إنو الضيف يبيت
مع صاحبو ده , وعلى هذا الأساس قام أخونا الزائر وقبلما
إطلع من بيتو جهز عدة المبيت ومستلزماته من جلابية { ما
عارفا كان مشختة ول لا } وبشكير وفرشة أسنان ووضع
جميع هذه الاشياء فى كيس , ذهب إلى منزل صديقه وطقوا
الحنك ثم ناموا فى أمان ... إستقيظ كلا الرجلين تغريبا في
وكت واحد وتم إعداد وجبة فطور سريع وقرر الضيف أن
موعد عودته إلى منزله قد حانت , فأعاد ترتيب مستلزماته
الشخصية مرة أخرى ووضعها فى الكيس , كان حينها صديقه
صاحب المنزل يلملم فى الوساخة بتاعة المطبخ والتي وصلت
حدا كافيا لربط كيس القمامة وإيداعه فى الغرفة المخصصة
لتصريف القاذورات , كان وقتها الرجلين على باب الخروج
وقال صاحب المنزل لضيف ... طالما أنت ذاهب فخليني
أقدمك شوية خاصة وأنني طالع لرمي كيس القمامة , كان
الضيف { أظرف } مما يجب وأصر على مضيفه ألا داعي
لخروجه من شقته , إذ سوف يتكفل برمي كيس القاذورات
وهو خارج من المبني , فإستلم كيس القاذروات في يد وكيس
مستلزماته الشخصية فى اليد الأخرى , وعندما وصل إلى
غرفة القمامة رمي بكيس وإنصرف إلى أسفل المبني ثم إلى
مكان البص ثم إلى داخل البص ثم إلى خارجه ثم إلي منزله ,
وعندما فتح الكيس وجد أنه كيس القمااااااااامة {عووووووع }
للمرة التانية ... هذه القصة حقيقة ... ولا داعي لذكر الأسماء
... اللهم إلا تحت زخات الشديد القوي .
تشكر سجيمان ... على هذه الإستراحة الطيبة التي تشبهك
فى خفة دمها وفكاهة موضوعها .
مع مودتي
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
Quote: عليك الرسول شوف سماحة الحلومر القدام الناس ديل... قادر الله الحلومر دا مافي زول علي ضهر الدنيا دي ما بيعرفو
علا مالم خاتينو في قزازة ؟الكورية كان اخير لهم.... |
حلومر؟؟؟؟
سجمك يا سيجمان، كمان بقيت ما بتفرز؟
غايتو الغربة خلتك تتغابى العرفة...
لكين، دي جلابيتك الفي الصورة دي ولا لأ؟ (وخلي الحلومر)
---
حاشية:
آيي عارف إسمي صعب، خلينا في الجلابية!
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: حليمة محمد عبد الرحمن)
|
حليمةمحمد عبد الرحمن
حبابك الف في بوست الجلابية..وفي كل البوستات الراجن والجايات
Quote: اللخو بدور اسعلك..
نعم..
تاتي اجابة التكاسي فاترة، خاصة وان المشوار يبدو انه قد طار هو الاخر.. فيلحف قريبي وقد اتشبث بالباب المفتوح وغرز اصابعه الخمسة القوية في الباب حتى (فطس الحديد)..
اسمعني آ اللخو دحين اناالليلة الدغش ، ما نسيت لي فريدتن زيقها اخضر عندك ؟ |
يجد قربيك مني كل تعاطف حيث حسيت بنار الحشا علي فردتو كتلك التي علي جلابيتي.... انشا الله بعدين لقاها؟
| |
|
|
|
|
|
|
|
|
 Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
يا سجمان الرمدان يالغبيان جانى خبر قالوا جلابية مشخطة فى كيس بمبى موجودة ضمن المعروضات القبضوها مع محاولى العملية التخريبية اها انت كان راجل شداع امش اسال منها بدل السلبطة فى اخونا بكرى امش وجيب جلابيتك داكان ما نكرتها
الخبر الجانا قالوا سيد الجلابية دى جارى البحث عنه لانه هو الراس المدبر وهو الوسيط بين المخابرات البرازيلية والمتهمين وهو صاحب مصنع بتاع قنابل عنقودية فى سوق امبدة وتاجر سلاح شهير بين سوق ستة وسوق امدفسو
اها يا سيجمان اوصف ليك تمشى بس غايتو كيس الصعوط احتسبه قسموه الجماعة المتحرين بينم وسمعت كدا قالوا معاه قزازة بس ما بغرق زمتى ما اتاكدت قزازة شنو
لك الود
| |
|
|
|
|
|
|
|
|
 Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
الأخ الـحـبيـب الـحـبوب،
ســجـيـمان،
تـحـيةطـيبـة،
ورمـضـان كـريـم.
بـمناسـبة مـرور خـمسـة اعـوام عـلي عـضـويتـك بـ " سـودانيـزاونلاين "
والتـي كانت في يـوم 3 اكـتوبـر 2002، فأسـمـح لـي ان ازجـي لك اطـيب امـنياتـي الطـيبـة مـتمنـيآ مـن اللـه تـعالـي الايـحـرمنا مـن كتاباتك الـمـرحـة الـخـفيـفة وبالطـبع اشـكرك علي ماأسـبغتـه عـلي الـمنبـر الـحـر سـابقآ والعام حـاليـآ.
وكـل سـنة منـبـرية ومـيـلادية ورمـضان والاعـياد وانت زي ماإنت.. مـرح لـطيف صـاحـب قلـم شـيـق.
لك مـودتي.
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
غايتو لكن البوست دة عاجبني جنس عجوبية
الزيارات الـ 1933 ديل انا بكون عملت 2000 منها
وقصة جلابيتك الضايعة دي ذكرتني قصة إلا كان احكيها ليك
عندي عمتي كبييييرة مرة مسافرة شندي وشايلة معاها حلومر لي رمضان
في الطريق ضاع ولا سرقوهو منها ما عارفة .. المهم
جات زعلاااانة تحكي لي امي
قامت امي قالت ليها ما تزعلي بتلقيهو (قدام) (بتقصد ليها في الآخرة طبعا)
قامت قالت ليها نان انا كان عارفة بيمشي لي قدام ما كنت شلتا لي معاهو حبة سكر
حسة بعدين بشربو كيفن بلا سكر ...
أها دحين يا سجيمان جلابيتك دي ما تزعل عليها بتلقاها قدام
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: Nesta)
|
| Quote: دي زي يحمر يا دكتور ؟؟ |
حمّر الرجل البصلة.. اي كشنّها..والكشنّة اكلة شهيرة عندنا في الشمالية... كنا ناكلها ونحن حامدين شاكرين ونمشي نلعب في القمرا شعيرة بووبت....
حمّر الرجل لاخيه الرجل اي صرا ليهو.... جرا فيهو نور طويل...
ايهما تقصد
وحمرت البتيخة... اي لون لحمها اصبح احمر
وكانت هناك لعبة نلعبها ونحن صغار للبنات نقول ليهن.." جا ملك احمر في السوق"... فكانت بداية شكلة وفلقة....
| |
|
|
|
|
|
|
|
|
|
Re: بكـري دحين انا ما نسيت لي جلابية مشختّة في مكتبك؟ (Re: سجيمان)
|
هذه مداخله لا علاقة لها بالبوست وسانشرها في بوستات كثيره
لماذا يحذف بكري مداخلاتي في بوست الذي يكتب باسم لبنى آدم علي
Quote:
16-10-2007, 06:07 م
Tragie Mustafa
.
تاريخ التسجيل: 29-03-2005
مجموع المشاركات: 16184
Re: James’ Journey to Jerusalem (Re: لبنى آدم علي)
كاذب ايها الذي تكتب باسم لبنى أدم علي
تشكر بكري لانه حذف مداخلاتي للبحث عن حقيقيتك
من هي لبنى آدم علي التي يتستر عليها بكري ابوبكر؟؟؟
ويا ايها الذي تكتب باسم لبنى آدم علي....
Quote: شكرا بكري للمداخلة الثرة
فاتني أن أذكر أن الفلم بالفعل يحكي قصة حقيقية حدثت لأحد المهاجرين الأفارقة لإسرائيل في الأعوام السابقة .
اليهود العرب وغيرهم لا ينظرون للأفارقة الوافدين إليهم أكثر من أنهم عبيدا لا يستحقون شيئاً سوى الإحتقار حتى ولو كانو يهودا مثلهم يدينون بالعبرية ، وجميعنا يذكر المعاملة التي لقيها الإثيوبيين الفلاشا عندما تم تهجيرهم لإسرائيل في الثمانينات .
حسه من تنتقد انت هنا يا هذا؟؟؟
تنتقد اليهود ام تنتقد العرب؟؟؟؟
واليس كان من الامانه ان تكتب لنا عن اضواع النيجرين الهاجروا منذ سنين لمكه لاجل الحج؟؟؟
ومن هم سوى عبيد في السعوديه؟؟؟
|
| |
|
|
|
|
|
|
| |
سجيمان
سلمى الشيخ سلامة
Siham Elmugammar
اشرف السر
بكرى ابوبكر
HAYDER GASIM
دوت مجاك
ابو جهينة
حليمة محمد عبد الرحمن
رهف
tariq
محمد ابو القاسم
Shayma
قلقو
Raja
Hisham Ibrahim
عمر عبد الخالق سعيد
ayooby
Tragie Mustafa
عبد الحميد البرنس
elham ahmed
فيس بوك
تويتر
انستقرام
يوتيوب
بنتيريست