خريجي جامعة أسيوط ، أين الأحياء منكم؟

Quote: الأخ العزيز كيمو المحترم شايفكم جبتوا سيرة أولادنا والمصطلحات القديمة والألعاب حقتنا زمان (بقينا حكاواتيه يا مكي) خليكم من المصطلحات والألعاب دي لأنه دا بحر غريق مابتقدروا عليهوا . انت يا كيمو شفت التلفزيون والكمبيوتر والجوال عمرك كم سنة؟ وبعد كم سنة مشاهدة عرفت تتعامل معاها ؟. قبل كم يوم يا كيمو انت قلت لي مكي أنا عندي شوية صور بس ما عارف أتعامل معاها بس منتظر الولد يخلص امتحانات ويظبطها لي هذا طبعا اعتراف بقدرة ابنك على التعامل مع التكنلوجيا الحديثة . بالله قارن عمر ابنك الحالي مع نفس عمرك لتلك الفترة في الماضي وشوف انت كنت بتلعب كيف , وبتتكلم كيف , وبتفكر كيف وقارن . لكن ما لفت انتباهي في أبنائنا وأنا بحكي ليهم عن الدراسة زمان وكيف كانت الناس بتجي للمدرسة من مسافات بعيدة بعضهم كداري وبعضهم بالحمير ( الكلام دا ليناس القرى بس يا مكي يا حضري ) وبعضهم كان بيسكن في الداخلية . فنظرت الي أحجامهم فقلت في نفسي بالله عليك الله زى دا كان ممكن يسكن داخلية فتذكرت زملاء كانت أحجامهم صغيرة مثلي ولكن كانوا يسكنون داخلية فتذكرت طرائفهم فكانوا يحكوا لنا معاناتهم لقصر القامة حيث كانوا يضعون الطوب البلوك حتى يستطيعوا ان يفتحوا ماسورة الدش لأنها عالية . وكذلك عندما يريدون ان يستعملوا حبل الغسيل إذ غالبا ما يستعينوا بإخوتنا من طوال القامة . وحيث أنني والأخ مكي من قصار القامة ( في الطول طبعا ) مقارنة بالأخوة كمال وعصام كمتور وفضل الله وآخرين . حيث كنا بالنسبة لهم شفع . بقول ليهم الآن الدقون أتلاحقت والشيب ساوانا معاكم لو ما كان فتناكم بالشيب (طبعا الأخ مكي حا يحتج ). حيث يظهرني الشيب اكبر منكم سنا . زمان الشعر الأسود كان ساترنا لكن هسع الشيب كشفنا . محمد الفاتح أبوكنه