خريجي جامعة أسيوط ، أين الأحياء منكم؟

Quote: أخي العزيز كيمو المحترم طبعا على أيامنا في الدراسه في أسيوط ما كانت في عولمه ذى الان خصوصا وسائل الاتصال حيث كنا نعتمدعلى الخطابات والتي كنا نشتاق اليها كثيرا والتي كانت تسلينا في غربتنا وتحمل الينا بعض الأخبار عن الأسره والأصدقاء وأخبار ناس الحله باعتبارها كلها اسره واحده وكنا ننظر اليها كأخبار طازجه (قديمه جدا بلغه العولمه الان ) وكان الناس عندهم اهتمام خاص بالبريد لأنه بتجي بيه الحوالات البريديه حقت المصاريف حيث كان الغالبيه يعتمدون على تحويلات الخليج . وبمناسبة التحويلات دى حصل لي موقف طريف جدا ، مره جيت الكليه براى ولم اجد اى احد من الزملاء (داكي يا مكي) طبعا بتحصل كتير يحضر واحد من الدفعه ويسجل المحاضره للشباب ، لكن الما بيحصل كتير الموقف اللقيته دا حيث وجدت احدى الزميلات في حاله دبرسه عاليه جدا فذهبت اليها لأن البريد أحيانا يحمل أخبار غير ساره ما أن سألتها حتى انهمرت دموعها فعرفت أن الأمر خطير فتفاعلت معها فورا وحاولت أن اخفف عنها دون ان اعرف السبب لأنها رفضت أن تخبرني (هكذا بنات حواء ) مما صعب مهمتي وبقيت اشيل واودي ، خطيبها اتخلى عنها ،عندها زول عيان ، موضوع عائلي خاص . طبعا استبعدت الوفيات لأنه الدميعات ديل حنينات ما دميعات وفاه . وأخيرا بعد ان ان جفت الدموع سألتها ان تخبرني بالموضوع فقالت لي والله يا محمد الفاتح بابا ما رسل لي مصاريف الشهر !!!!!! فقلت لها معقول !!!!! طبعا بقصد انه معقول البكاء دا عشان المصاريف !!! ومعقول بابا بيرسل ليك المصاريف شهريا . فطلبت مني ان اذهب معها البنك علها تجد الحواله هناك . فقلت جدا ولكن انتظري قليلا . فذهبت الي الشقه عشان ادبر حق التاكسي ومصاريف عشان اديهن ليها يمكن ما نلقي حواله في البنك . طبعا مشيت نفضت ليك الشقه دي ما خليت فيها بريزه حايمه والنايم صحيتو قوم النايم لها شنو وبنت الخليج ما جاتها مصاريفها . المهم جيت بوضع تمام يرفع الراس ، سقتها ومشينا البنك وللأسف لم نجد حواله وطبعا عامل حسابي كويس لأنه بنات الخليج ديل مصاريفهم ما زينا ، فقلت لها اتفضلي دي 100 جنيه خليها معاك مشي بيها امورك لحدي ما المصاريف تجيك ، فقالت لي شكرا يا محمد الفاتح والله معاى 100 دولار !!!!!! فذهلت ولم استطع الكلام !!! وبعد فتره قلت لها طيب نحن لو احتجنا بنجيك ، فضحكت وقالت لي جدا يا محمد الفاتح . فذهبت الشقه وحكيت للجماعه فاوسعوني ضربا وضحكا وتعليقا وسخرية وكان موضوعنا الرئسي في الونسه واذكر من ضمن التعليقات قلت ليهم ناس يحولوا ليهم بالبنك وناس يجيبوها صره في خيط ال100 دولار دي والله أنا جيت بيها من السودان مصاريف السنه كامله علي البريزه . فضحك الجميع ولنا عوده مع ذكريات اخونا مكي في الحلقه القادمه باذن الله محمد الفاتح أبوكنه [email protected] [email protected]