قبل الباصوورد بتكون عايز تكتب في كل شي. بعد الباصوورد نويت اكتب بعيد عن المشاكل... لكن طيب اكتب في شنو
السياسة؟ كلها مشاكل وزاتو ما مكجنة شي في الدنيا زيها وزي بوستاتها، وصراحة كدة ما شايفاها شغلة نسوان من زمان ما بدور النسوان البيفتن في السياسة وحتى كان قلنا نفتي فيها مرة مرة برضو ما بنقدر نفتي وناس (كمال عباس) و (عادل عبد العاطي) في المدينة... اقصد المنبر.
وكان لي قضايا الهامش (تراجي) ما بقدر عليها هامشهم دة كان وصلوهو نص الصفحة ما بأتدخل!
المواضيع الادبية والنقدية بتستهويني جدا لكننا تلامذة في مدارس ( فضيلي جماع وتاج السر الملك والخواض ودكين وعبد الكريم الامين) وكتيرين تانين
بوستات النقاش خاصة ام اربعة وخمسة صفحات ديك بس تخليها لي (احمد الريح) ما شاء الله عليه
عندي حبة آراء كدة في حاجات مختلفة في المنبر لكن لو قلت بِغِم بيجوا الجماعة يشبكوني: انتي متييييييييييين جيتي للنقد (زي بوست بهاء عيسى "المنبر الى نهاية محزنة..). ويجيني (تمبس) يهرشني بي مداخلاتو الملونة الكلها روابط وكوتيشنز ديك (انت يا تمبس بالمناسبة دي الالوان دي بيعملوها كيف؟)
الأغاني ( ام وضاح وفيصل نوبي) مستلمينها
خلاص طيب ابقى على الجنس اللطيف وناسو اللطيفين ومسالمين ومواضيعهم الخفيفة ناس (غادة ورجاء واشراقة وسودانية ومنى خوجلي) وغيرهم كتير ... أها طيب لما نستثني الفوق دة كلو نتكلم معاهم في شنو؟ غايتو ما فضل الا الحنة والطبيخ وكان لي موضوع الجندر داك الله يرحمو قُتِل بحثا في المنبر دة.
طيب نقعد ساي ما نقول أي حاجة .... برضو ما بيحلني اكتشفت انه هنا في ناس ما بريحوا حتى الزول اللازم حدوده (اديكم امثلة ولا الدنيا رمضان)... أها كيف العمل؟ وعلى بال ما تدبروني انا ما بين بوستات التهاني والتعازي والارشيف
حكمة اليوم (دي عاجباني شديد عند Player) بس ما عرفت اعمل الخط التحت
البوست دة قصدت بيهو الخروج من روتين المواضيع الجادة مع الصيام دة فالناس الوردت اسماؤهم ما يزعلو المسألة كلها لاتتعدى المزاح فأدوني خاطركم الدنيا رمضان!!
تحياتي وتصوموا وتفطروا على خير!
شَيْماء
09-17-2007, 09:22 AM
دوت مجاك
دوت مجاك
تاريخ التسجيل: 07-15-2007
مجموع المشاركات: 2253
الاخت شيماء مرحب بيكى اولا وحبابك الف رمضان كريم (كمان) شوية شوية بتلقى نفسك مع احد التيارات مهما وقفتى بعيدا سوف يجرفك السيل الى احدى البحار ان كان مالحا او خلافه وسوف تجدين نفسك مع مناخ تتكيفين معها (سياسيا ام اجتماعيا) ولا تتركى نفسك ان تقعى تحت وصاية احد اخلقى لنفسك فضاء (حر) واطلقى لافكارك العنان ثم (الجنان) الف مرحب بيكى اختنا (شيماء)
09-17-2007, 10:30 AM
Shayma
Shayma
تاريخ التسجيل: 09-09-2007
مجموع المشاركات: 501
الاخ العزيز دوت مجاك تحية وكل سنة وانت طيب عجبتني مداخلتك الواعية وموزونة زي عادتك. شايفة المنبر دة سودان كامل متكامل بي كل تنوعاته واكيد زي ما انت قلت حألقى البتكيف معاه بس أهو قلنا نسمع آراء الغير. أما
Quote: ولا تتركى نفسك ان تقعى تحت وصاية احد
لا انشاء الله ما حيحصل مش عشان عقلنا لكن عشان كبرنا. كبرنا على موضوع الوصاية دة. لك كل الود
09-17-2007, 09:27 AM
د.محمد حسن
د.محمد حسن
تاريخ التسجيل: 09-06-2006
مجموع المشاركات: 15194
Quote: طيب نقعد ساي ما نقول أي حاجة .... برضو ما بيحلني اكتشفت انه هنا في ناس ما بريحوا حتى الزول اللازم حدوده (اديكم امثلة ولا الدنيا رمضان)... أها كيف العمل؟ وعلى بال ما تدبروني انا ما بين بوستات التهاني والتعازي والا
تقعدي ساي ليه
هو الباس وورد ده لقيتيه بالساهل
والا الخط بدوك ليه مجاني والا الكومبيوتر مشترياه من الدلالة امتبي اي حاجة ان شاء الله عن حجر الزلط او اقول ليك اكتبي عن علاقة خزانات تيقا بالحنة التيقا ( طبعا التيقا الاخيرة بالاردوية تعني الكويس )
واذا عايزة موضوع جاد
اكتبي الموضوع ده
الفيضاناتتفضح عرينا فنكتشف اننا افقر الشعوب محاصرين بالهمر قصرت معاك؟
09-17-2007, 10:07 AM
فدوى الشريف
فدوى الشريف
تاريخ التسجيل: 09-14-2006
مجموع المشاركات: 5390
الكتابة فيها متعة، اكتبي عشان نفسك انتي قبل القراء. وحتستمتعي.
وانتي ما شاء الله جيتي بسنونك وحافظة البورد صم
وكان خايفة من النقد دقستي , جاييك جاييك دا غير الناس الما بعجبهم العجب (وبدون اسامي زي ما قلتي) وناس اليافطات. بس كمان اووعى تكتبي في السياسة عشان ما تقري الردود البتفقع المرارة وتهيج المصران.
رمضان كريم
09-17-2007, 10:48 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: وكان خايفة من النقد دقستي , جاييك جاييك دا غير الناس الما بعجبهم العجب (وبدون اسامي زي ما قلتي) وناس اليافطات. بس كمان اووعى تكتبي في السياسة عشان ما تقري الردود البتفقع المرارة وتهيج المصران
.
كل سنة وانتي طيبة ورمضان كريم تعرفي يا فدوى انا من النوع الخواف شديد زمان لمن كنت في الابتدائي البنات كانو لاعبين بي لعب الا يجوا اخواتي الكبار يدافعوا عني. ولغاية الآن انا زولة مسالمة وعندي فوبيا من محلات المشاكل أها يعني تفتكري مافي امل اتجنبها هنا؟!لكن النقد الساي هين بنقدر عليهو!
وكان للمصران عندي مبادئ حالياباخد حبوب مخففة اها بعد المنبر دة ازيد الدوز ولا شنو؟
تحياتي يا غالية نورتيني
09-17-2007, 10:37 AM
Shayma
Shayma
تاريخ التسجيل: 09-09-2007
مجموع المشاركات: 501
انت قايلة الناس هنا كلها بتكتب ؟ غلطانة البكتبوا شوية .. اها القلتيهو فوق دا كتابة جادة و نقد وتصنيف كمان .. وعرفنا بتقرى لى منو و بستهويك شنو .. يعنى صنفتى الناس و صنفتى روحك يعنى كتبتى
خلاص .. بث .. نتلاقى .. بس ما تتكاكى الباب ..
09-17-2007, 10:57 AM
فيصل نوبي
فيصل نوبي
تاريخ التسجيل: 09-16-2005
مجموع المشاركات: 14194
الاخ العزيز هاشم خلف الله سلام عليك ايها الاديب وكل سنة وانت طيب
Quote: إجتماعية درجة اولي مع إنها إتولدت في السعودية
لييه ياخ السعودية بتتعارض مع الاجتماعيات في شنو كلنا فيها وتصدق انا شايفة الاجتماعيات هنا اكتر من السودان يمكن من الفراغ وسهولة الظروف يعني كان واحدة عندنا وقعت ليهم حيطة في السودان الناس يجوها مليون مرة بي فطورهم وغداهم وعشاهم يندموها علي وقعة حيطتهم الله يحفظ شيماء واخوانها
Quote: في مثل بيقول الطيور علي أشكالها تقع شوفي انتي طيورك وين واقعي فيها
حابقى عشرة على الوصية بتاعة الطيور دي وتسلم انشاء الله
09-17-2007, 11:05 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: إن شاء الله تكتبي عن الملوحة والتركين وما تشتغلي بالفارغة
الاخ العزيز طارق تعرف انت جبت التايهة لانو زوجي من الرطّانة بتاعين الملوحة والتركين وانا لأ. أها عشان كدة اضطريت ألغي ليهو ثقافته النوبية في الاكل تماما وافرض عليهو ثقافتي لكن كان لقيت زول يساعدني في بوست لنا داك ويوصفهم لي يكون عمل (فيهو) معروف وبعد ما اتعلم بجي اعمل ليكم بوست ايه رايك!
كثير شكري على المرور
09-17-2007, 11:25 AM
Safia Mohamed
Safia Mohamed
تاريخ التسجيل: 07-21-2007
مجموع المشاركات: 2365
Quote: قبل الباصوورد بتكون عايز تكتب في كل شي. بعد الباصوورد نويت اكتب بعيد عن المشاكل... لكن طيب اكتب في شنو
عزيزتي شيماء، كل سنة وانتي طيبة وعقبال مليون شمعة.. ورمضان كريم.
مرحب بيك قلم يٌعبر بكل حب وحرية وأريحية ومسئولية..
صوتك وصوتي وصوت الآخر هم في النهاية سيمفونية السودان التي نعزفها معاً بكل تجرد، فدوزني صوتك بمقدرة بحيث لا يخبو فيَغيب ولا يعلو فيٌغيِّب أصوات أخرى، فالمعزوفة لن تكون كما يستحق الوطن في قلوبنا إلاّ إذا عبرت عنا جميعاً ولن تكون كما نحب إذا لم نشارك فيها بما نستطيع.. فإذا حملنا هم الوطن في كل آهة ونمة كنا بحق نحن الوطن.
سني قلمك وأكتبي بلسان حال الناس الما عندهم باصوورد.
وأكيد وجودك إن شاء الله إضافة حقيقية للبورد، وصوت يهمنا أن نسمعه.
09-17-2007, 12:26 PM
kamalabas
kamalabas
تاريخ التسجيل: 02-07-2003
مجموع المشاركات: 10673
مرحبا بك مرة أخري ياشيماء ...قلمك طيع وأسلوبك الكتابي سلس أرجو ألا يصيبك الغثيان من كثرة العك والعراك وشخصنة القضايا والاسفاف الذي يطفح أحيانا ويغطي كل ما هو جميل...... لك التقدير وأرجو لك طيب المقام وتفاعل منتج يضيف و ويثري البقع المضئية بالمنتدي كمال
09-17-2007, 12:49 PM
علاء الدين حيموره
علاء الدين حيموره
تاريخ التسجيل: 08-08-2006
مجموع المشاركات: 5689
والله نقناقه بشكــل يا عماد .. وقالت يوروهــا الكوتيشنات والتلوين .. غايتو بي طريقتك دي يا شيما.. بعد رمضان دا ينتهي إلا يخلو ليك البورد حالتو الدنيا رمضان حسع دي ..
اخت شيماء تحياتي ورمضان كريم العصيدة بملاح روب وله ويكه
يمكن أنا وأخرين من المحسوبين "جُداد" بضم الجيم - أشان ما يجي واحد يكسر الجيم ويطلع عينه وعينا معاها - واهو قاعدين نشلت يمين شمال لا ظلامية ولامستنيرين وطبعا تحس بوحشة في اي مكان جديد ولكن مع الايام تعتبر نفسك واحدا من الموجودين..
فاسمحي لي بان أرحب بك نيابة عني وعن كل هؤلاء قلماننتظر منه الكثير
09-17-2007, 02:22 PM
Amir Omer
Amir Omer
تاريخ التسجيل: 06-14-2007
مجموع المشاركات: 950
أول حاجة إن شاء الله تكوني برأتي ساحتي من حكاية المكفوفين ديك عشان خطي ما شين للدرجة ديك
ثانياً: جذبني أسلوبك السلس في طرح فكرة ربما تمر بالكثيرين من رواد هذا البورد، بل مررت بها أنا شخصياً عندما سجلت حضور بهذا البورد لأول مرة. فعلا إحساس مختلف بأن تكون متابعاًُ من الخارج ما يحدث وبين أن تكون "عضواً" فاعلا له حق المشاركة في كل موضوع يُطرح بل له حق طرح مواضيع يعتبرها المجتمع من المحرمات. هذاالوضع في حقيقته أشبه بمتابعة مباراة كرة قدم عبر الشاشة وأنفعالاتنا مع ما يحدث خلال المبارة و"أأأه لو كنت في الملعب!!" ولما يجي وقت الجد تلقى الكورة الفي الرأس طارت والكلام العايزين نقوله طار وأحياناكثيرة يفتر حماسنا ويتضاءل فينتج عن ذلك إنزوائنا وإبتعادنا عن الملاعب وأكتفاءنا بالمشاهدة وتشجيع اللعبة الحلوة.
عارفة يا شَيْماء ، بوستك دا أجمل ما فيه أنه فعلا كسر روتين المنبر الحاد أحيانا ، وجاب فطاحلة البورد (الواحد بشوفهم زي نجوم الكورة الكبار ديك) .. جنبهم ما بقدر يهبش كَفَرْ ولا بعمل فيها حريف. أها غايتو إنتي حظك ببوستك دا ، من الليلة الناس دي ح يهتموا بيك ويرعوك ... بس نحن نمشي وين؟!! ما تنسي تعايني لينا في المدرجات
بستأذنك يا شَيْماء بس عشان أشكر العوض الطيب الرجل الرائع الكتب الكلام الرائع دا ... بالله عليك الله يا شَيْماء أقري الكلام دا براحة كدا وشوفي بالله ممكن الواحد يتردد تاني يشارك ويكتب؟
Quote: صوتك وصوتي وصوت الآخر هم في النهاية سيمفونية السودان التي نعزفها معاً بكل تجرد، فدوزني صوتك بمقدرة بحيث لا يخبو فيَغيب ولا يعلو فيٌغيِّب أصوات أخرى، فالمعزوفة لن تكون كما يستحق الوطن في قلوبنا إلاّ إذا عبرت عنا جميعاً ولن تكون كما نحب إذا لم نشارك فيها بما نستطيع.. فإذا حملنا هم الوطن في كل آهة ونمة كنا بحق نحن الوطن
ويبقى الود
09-17-2007, 06:43 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: يعني انا التقول خلاص ضالعة في شئون البورد حسع انا بكتب في نصحيتي دي وخايفة يجي ناطي لي زول يقول انتي قلتي كدة ليه؟
يا صفية يا عزيزة
تعرفي في ناس هنا في المنبر دة لو الزول جديد بيفترضو انو اي شي يقولو غلط فاكرين البني آدم عقلو بيتكون بعد باصوورد المنبر دي قطيعة جندرية ما تكلمي بيها اي زول بالذات تمبس
شكرا ليك وشرفتيني
09-17-2007, 06:48 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: صوتك وصوتي وصوت الآخر هم في النهاية سيمفونية السودان التي نعزفها معاً بكل تجرد، فدوزني صوتك بمقدرة بحيث لا يخبو فيَغيب ولا يعلو فيٌغيِّب أصوات أخرى، فالمعزوفة لن تكون كما يستحق الوطن في قلوبنا إلاّ إذا عبرت عنا جميعاً ولن تكون كما نحب إذا لم نشارك فيها بما نستطيع.. فإذا حملنا هم الوطن في كل آهة ونمة كنا بحق نحن الوطن.
اتحفتني بالفهم الراقي دة الله يقدرنا وتسلم انشاء الله
09-17-2007, 06:56 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: الكورة مالا عيبيها لى اكتبي وقولى : المريخ دوزن التاريخ والهلال أكل الفسيخ ..... تكونى كتبتى فى اى شيء..
يا طلحة حصل لاقاك زول هلالابي ومريخابي في نفس الوقت؟ خلاص لاقيني عشان يكون لاقاك تعرف نحن بيتنا في السودان في العرضة خطوة واحدة من استاد المريخ الاستاد في طرف بيتنا وطبعا استاد الهلال برضو قريب جدا فنحن اتربينا ما بين الاستادين واي شي يتعمل فيهم بيكون كأنو جوة البيت بنعيش معاهم كل المباريات والاحتفالات لما يكون في مباراة الناس الداخلين الكورة بيجوا يوقفوا عرباتهم جنب بيتنا ويوصونا عليها، وناس يجوا يمسّكونا حاقات غريبة ويمشوا (على قول عادل امام) عموما الاحساس بالانتماء ليهم الاتنين على السواء نشأ معانا واي زول يتكلم عن استاد المريخ او الهلال انا بحس كأنه بيتكلم عن شي خاصتي أها شنو ليك؟!
09-17-2007, 07:37 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: خلاص طيب ابقى على الجنس اللطيف وناسو اللطيفين ومسالمين ومواضيعهم الخفيفة ناس (غادة ورجاء واشراقة وسودانية ومنى خوجلي) وغيرهم كتير ... أها طيب لما نستثني الفوق دة كلو نتكلم معاهم في شنو؟ غايتو ما فضل الا الحنة والطبيخ
والله يا شيماء ضحكتيني بشكل غير عادي الحمد لله أن كسب معشر الجنس اللطيف شخصية لطيفة مثلك وأن كسب معشر البورداب ككل كاتبة لطيفة وياستي الفورة ألف، أي موضوع تحبي تتكلمي فيهو من الحنة للطبيخ للبكر العوير والما عوير ولحدي ما نصل الحد كمان
سعيدة أنا أن أتيت بين ظهرانينا
خالص المحبة غادة
09-17-2007, 08:08 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: يمكن أنا وأخرين من المحسوبين "جُداد" بضم الجيم - أشان ما يجي واحد يكسر الجيم ويطلع عينه وعينا معاها - واهو قاعدين نشلت يمين شمال لا ظلامية ولامستنيرين وطبعا تحس بوحشة في اي مكان جديد ولكن مع الايام تعتبر نفسك واحدا من الموجودين..
ههههههههه غايتو كان كسروا الجيم بتاعتنا انا وانت والزينا تبقى عوجة أها دة دربي حأشلت معاكم بس الله يكفينا شر التصنيفات دي
مشكور وتسلم
09-18-2007, 08:58 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: والله يا شيماء ضحكتيني بشكل غير عادي الحمد لله أن كسب معشر الجنس اللطيف شخصية لطيفة مثلك وأن كسب معشر البورداب ككل كاتبة لطيفة وياستي الفورة ألف، أي موضوع تحبي تتكلمي فيهو من الحنة للطبيخ للبكر العوير والما عوير ولحدي ما نصل الحد كمان
غادة يا حبيبة انشاء الله دايما مبسوطة وضاحكة وتشكري على التشجيع والكلمات اللطيفة أها شفتي مش معاي حق ابقى عليكم؟!! والبكر دة زي ما واحد من المتداخلين قال ليك هو ما عوير البيكونو عويرين امه وابوه وعذرا للآباء والامهات وانا واحدة منهم.
Quote: وياستي الفورة ألف،
هي يا غادة الفورة مش زمان كانت مليون متين نقصتوها يا اعلاميي الانقاذ مودتي وتسلمي
09-18-2007, 08:21 AM
Shayma
Shayma
تاريخ التسجيل: 09-09-2007
مجموع المشاركات: 501
مرحب بك في المنبر على اعتبار اني واحدة من الناس القدام هنا ، لكن في نفس الوكت بعتبر نفسي عضوة قديمة مبتعدة و قارئة فقط يعني نرحب ببعضنا الاتنين
بعيد من كلمات المجاملة المدفقة في ارجاء البورد هنا ، حقيقي البوست جذبني جدا لبساطة كلماته عارفة ، في الاول كنت بقول البورد هو سودان مصغر ، لكن اكتشفت انه البورد ده عالم براهو ولا سودان مصغر ولا يحزنون تجي تقري مواضيع السياسة ، تجيك حمى في مداخل الفهم عندك .. جلابة واستلاب ودواس وعنصري ومتعنصر.. وكلمات كدا حقيقي بتؤدي للشلل.قدر ما حاولت افتش على مرادفات ليها في الواقع نهائي ما لقيت مما يثبت انه هنا لاسودان مصغر ولا حاجة وخاصة لو كنتي زي حالاتي كدا عايشة في الخرطوم حتلقي نفسك بتقولي .. الناس في شنو والحسانية في شنو ( حسه يجيني عكاز طاير اطلع بيهو عنصرية بسبب كلمة الحسانية دي)
معظم المواضيع ، بتلقي روحك فيها مرات لافة صينية ، عشان كدا يمكن بيكون الصمت افضل والقراءة من على البعد وعلى وزن المثل كيبوردك حصانك ان صنته صانك
دمتي عزيزتي وتسلمي لهذا البوست
09-17-2007, 08:34 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: عارفة ، في الاول كنت بقول البورد هو سودان مصغر ، لكن اكتشفت انه البورد ده عالم براهو ولا سودان مصغر ولا يحزنون تجي تقري مواضيع السياسة ، تجيك حمى في مداخل الفهم عندك .. جلابة واستلاب ودواس وعنصري ومتعنصر.. وكلمات كدا حقيقي بتؤدي للشلل.قدر ما حاولت افتش على مرادفات ليها في الواقع نهائي ما لقيت مما يثبت انه هنا لاسودان مصغر ولا حاجة وخاصة لو كنتي زي حالاتي كدا عايشة في الخرطوم حتلقي نفسك بتقولي .. الناس في شنو والحسانية في شنو ( حسه يجيني عكاز طاير اطلع بيهو عنصرية بسبب كلمة الحسانية دي)
نظرة فريدة جديرة بالوقوف عندها وكلامك عجبني شديد . واهو شفتي معنى كدة انه آرائك لو ما راقت للبعض ممكن تروق لآخرين ما دام التنوع موجود اذن انتي ظالمة نفسك والقراء والباصوورد بالاكتفاء بالمتابعة وقلة الكتابة ولا شنو؟!!
Quote: ( حسه يجيني عكاز طاير اطلع بيهو عنصرية بسبب كلمة الحسانية دي)
واهو انتي عارفة من اين تأتي العكاكيز يعني ممكن تتجنبيها وكان كمان مقتنعة بي فكرتك قوليها وردي العكاز عكازين
شفتي يا غالية النصايح دي كيف عملت فيها انا السينير وانتي البرلومة
09-17-2007, 09:29 PM
mamkouna
mamkouna
تاريخ التسجيل: 12-05-2004
مجموع المشاركات: 2246
أنا زاااااتي كنتَ زيك كدا يا شوشو.. أول أيام لمن جيت..كنت بتتضارى وراء البوستات..خايفة يلموا فيني ناس يشاكلوني و لا يضاربوني و لا بالميت...يقابلوني. لكن شوية شوية..مرقت من ورا الحيط..لقيت ناس البورد ديل ناس لذاذ و طيبين و حنينين. إنتي بس حددي إنتي عاوزة تقري ل منو..و تتداخلي مع منو.. و..ح تلقي نفسك مستفيدة إستفادة قصوى من الحوش دا. رمضانك كريم.. و خلاص.. أمرقي من وراء الحيطة..الدار أمان.
09-17-2007, 10:48 PM
mohmed khalail
mohmed khalail
تاريخ التسجيل: 06-14-2007
مجموع المشاركات: 4509
Quote: كلنا فيها وتصدق انا شايفة الاجتماعيات هنا اكتر من السودان يمكن من الفراغ وسهولة الظروف يعني كان واحدة عندنا وقعت ليهم حيطة في السودان الناس يجوها مليون مرة بي فطورهم وغداهم وعشاهم يندموها علي وقعة حيطتهم
يا ماكل كسار (جمع كسرة) الناس! التاس جوك! اها لسة بتحلفوا بى يبقى لى بخروج نهائى ولا خليتوها! جنى
09-18-2007, 08:33 AM
mayada kamal
mayada kamal
تاريخ التسجيل: 08-31-2007
مجموع المشاركات: 8015
اختي الفاضلة شيماء صباحك زين ورمضان كريم عليكي وتصومي وتفطري على خير على راي الاخ القال ليكي
Quote: انت قايلة الناس هنا كلها بتكتب ؟
اربطي حزامي وخشي الحلبة واكيد حتدلوي بدلوك في التقيل واديكي فكرة تعالي نناقش قضايا المراة السودانية بعديا عن السياسة واللي بقت اصلا مملة اهو محاولة نطلع منها بي حاجة ولكي كل الود الحلفاوية
09-18-2007, 08:45 AM
فدوى الشريف
فدوى الشريف
تاريخ التسجيل: 09-14-2006
مجموع المشاركات: 5390
Quote: أنا حالتي جيت قلت نشوف البت دي حصل عليها شنو
ما شاء الله عيني باردة. يا بت عوجة ما بتجيك.
وعاملة فيها دايرة وصاية وخايفة.
هم الدقسو ما انتي
فدوى يا عزيزة الله يجبر بي خاطرك يا ستي الناس دي بتجامل فيني ساي عشان لغاية هنا مافي شي يجيب العكاكيز لكن بعد البوست دة مافي شي مضمون وتسلمي على المرور واعادة المرور
09-18-2007, 09:45 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: اربطي حزامي وخشي الحلبة واكيد حتدلوي بدلوك في التقيل واديكي فكرة تعالي نناقش قضايا المراة السودانية بعديا عن السياسة واللي بقت اصلا مملة اهو محاولة نطلع منها بي حاجة
حلو اتفقنا
Quote: الحلفاوية
انتي تبع نصفنا الآخر شاكرة ومقدرة مرورك
09-18-2007, 09:37 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: اها لسة بتحلفوا بى يبقى لى بخروج نهائى ولا خليتوها!
خروج نهائي بتاع الساعة كم اي زول عندنا مشى نهائي احتفظ بي اقامته وبنهاية الاجازة جاء راجع زي الترتيب مِِِِِِِِِِِِِِشششششششششششششششششششكلة الله يسهل القواسي بس
09-18-2007, 09:29 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: أول أيام لمن جيت..كنت بتتضارى وراء البوستات..خايفة يلموا فيني ناس يشاكلوني و لا يضاربوني و لا بالميت...يقابلوني. لكن شوية شوية..مرقت من ورا الحيط..لقيت ناس البورد ديل ناس لذاذ و طيبين و حنينين.
ممكونة يا عزيزة انتي تتضاري وراء البوستات؟ ياخ انتي كتّابة جدا وكتابتك المفروض تكون واقفة بكل ثقة في واجهة البوستات نصايحك مقدرة وشكرا كتير
09-18-2007, 09:47 AM
tmbis
tmbis
تاريخ التسجيل: 10-19-2002
مجموع المشاركات: 24862
يا شيمــا.. غايتو عليك جنس حرفنه يا برلومــه .. يعلموك التلوين والاقتباس بعد شوية .. تقولي إلا يعملوا ليك مكتبة مش كدا ..؟
كدي انا قاعد في البورد دا اشوفك تقولي عايزه ليك مكتبة .. ياخي اساسي دا دفع دم قلبو قبل كدا علشان بكري يعمل ليهو مكتبة .. دفع دم قلبو عديل كدا .. لكن بيني وبينك .. بتستاهلي مكتبتين مش واحده اللــون .. الصورة .. الخطوط .. الاقتباس ده البوست بتاع الخطوط .. والاقتباسات والحاجات دي .. غايتو اتصرفي كان لقيتي الصور مافيشه لحدي ما افتش ليك باقي البوستات التانية ..
09-18-2007, 10:00 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: غايتو عليك جنس حرفنه يا برلومــه .. يعلموك التلوين والاقتباس بعد شوية .. تقولي إلا يعملوا ليك مكتبة مش كدا ..؟
كدي انا قاعد في البورد دا اشوفك تقولي عايزه ليك مكتبة ..
يا تمبس ياخي افحمتني عديل بي ذوقك انا قلت طنشني وما اشتغل بي الشغلة وموضوع الالوان دة انت عارفو عند النسوان مهم كيف وعشااااااااان ذوقك دة اصلي ما حأقول عايزة مكتبة وكان بكري عمل لي مكتبة لله كدة حأبيعها ودة دربي على الرابط دة وكان شفت ليك اي الوان تاني حايمة في بوستاتي بس خليك عارف السبب
تسلم وتشكر كتير
09-18-2007, 10:41 AM
Siham Elmugammar
Siham Elmugammar
تاريخ التسجيل: 06-18-2004
مجموع المشاركات: 3488
ٍShayma سلام عليك اها كدى اقرى ده مشيت نبشته ليك من الارشيف
Quote: خوفه اولى: اسبوع كامل و انا احاول الكتابه لاعلن انضمامى لهذا البورد الغنى بالسودان.... فكرت فى موضوعات من كل شكل و من كل لون بس تكون جاده و هادفه و رصينه و... و.. و (خايفه من مثقفين البورد و خايفه موت من ناس العلوم الاجتماعيه) المهم أجلت الموضوع بتاع الكتابه ده لانى اكتشفت عدم أجادتى لاى لغه؟؟؟؟؟؟؟؟!!!!!!!!! خوفة تانيه: نفسى قالت لى يازوله ما تبدى بتعقيبات صغيره و زوغى لغاية ما تتعودى و امورك تسلك... برضه خفت من القصه دى.. شايفه فى عكاكيز جاهزه للمعقبين و المعقبات.. تانى زوقتا.. المهم قدر المخ الفضل لى ( يا ود جبرالله من الجراده) قررت ان تكون شيمتى اكتب البقدر عليهو و أكب الزوقه.. لقدر ما سعدت بهذا الزخم من الكتابات من مختلف الفصائل حتى الكوزيه منها (شفت ليكم زول بفرح لكتابة الكيزان؟!!!!) الزول ده انا...كلنا نحاول اقصاء الاخر لكن باساليب و أليات مختلفه و كمان تواقيت مختلفه ... و انا أفضل الديقراطيه كغربال (و ياحبذا الناعم منه) لاقصاء خصومى... لانو البتغربله الديمقراطيه لا مجال لعودته حتى و لو اعاد انتاج نفسه مره أخرى وأتحورب (ياخوانا/تنا دى من حرباء..أفتكر انا هيئتكم للغتى) فغرباله ح يكون راجيهو... المهم كيف نجعل من الديقراطيه غربالنا المشدود.... اعتقد ان هذا البورد تمرين جيد لنتعلم أحتمال شدة هذا الغربال ونتحرك بهدوء و نتوخى طولة البال و النفس الطويل بالموضوعيه وبهذا نقطع الطريق على من كل تحدثه نفسه بالقفز ليلا......تعالو نشيل الحوار الايجابى يا جماعة الخير و ليبق الطالح على ظهر هذا الغربال و لينزلق بهدؤ كل من يصلح أن يكون مكون لكيكه سودانيه صحيه .
خوفه تالته: يا جماعه انا عندى تعقيبات على و تساؤلات عن بعض الموضوعات لكن البمرقنى من عكاكيز الايمان الناقص و التكفير شنو؟ يا ربى الجماعه الشايلين العكاكيز ديل لو حلفت ليهم انى مؤمنه(لاحظ/ى مؤمنه دى يعنى ما مسلمه بس) و ملتزمه بالعبادات اهىء اهىء اهىء ( ده بكاء بالمناسبه و من وهسه يا ود جبرالله اااااااى لسه بقرا ميكى انت مالك و مالى) اها بتحل منهم؟ افيدونا ايها المجربون (بضم الميم و كسر الراء)
خوفه رابعه: الواحد كمان ما يكضب... ما كمان فى جماعه كده ممكن ما يعجبهم كلام الايمان ده و يمرقو لى عكاز التساقط و السقوط ......
لهؤلاء و اولئك لقد التزمت الزوقان كمبدأ و الخواف ربى عياله او هم ربوه فى حالتى....
الاخ ابوبكر: الواحد ما ممكن يعمل ليهو بورد للخوافين؟؟؟؟؟؟؟؟
لى و لكم الامل فى منبر تقارع فيه الحجه بالحجه و الكلمه و بالكلمه بعيدا عن جاهزية الاجابه و شخصنة المواضيع ....... و غربله معافاه من أجل الجميع سهام المجمر 22/6/2004
اها رايك شنو؟؟ ماياهو ده حال البورد مهما لكع الزمن
لازلت اتمنى غربله معافاه للجميع!!!!!!!
09-18-2007, 06:31 PM
Shayma
Shayma
تاريخ التسجيل: 09-09-2007
مجموع المشاركات: 501
العزيزة سهام المجمر مسائك خير وسلامات الله يطمنك يا ستي طمنتيني يعني الاحساس العندي دة عادي مسك الناس القبليني وكان في النهاية وصلني لي زي كتاباتك جيد لي!
Quote: (خايفه من مثقفين البورد و خايفه موت من ناس العلوم الاجتماعيه)
والبيزيد الطين بلة نظرتهم للزول الجديد شايفة مرات في ناس جُداد يكتبو حاجات عادية يلاقو تحامل شديد ومرات ناس قُدام يكتبو كلام عجيب مافي زوووووووول يسألهم.. غايتو... الله يسهل
تسلمي يا عزيزة ومشكورة على (النبشة) القيمة
09-18-2007, 10:01 AM
عاطف عمر
عاطف عمر
تاريخ التسجيل: 11-26-2004
مجموع المشاركات: 11152
Quote: والبكر دة زي ما واحد من المتداخلين قال ليك هو ما عوير البيكونو عويرين امه وابوه وعذرا للآباء والامهات وانا واحدة منهم.
تحياتي أختي شيماء رمضان كريم وتقبل الله طاعاتك . الناس الفوق ( الظراف ) ديل قالوا ليك كلام حلو وجميل أما أنا فـ ( جاييك ) زول شكل وخناقة ساااااكت ( يجو أخواتك يدافعوا عنك أو ناس العرضة أو حتى جمهور الهلال والمريخ مافارقة معاى ) السبب يا ستي إنو أنا ما برضى الحقارة فقد خالفت قانون المصنفات البوردية والملكية الفكرية فالفقرة اعلاه هي حكمة جادت بها قريحة وعبقرية صديقتي اللدودة الست الفضلى ( بعلتنا ) . فكيف تجعلينها ( مجهولة ) ؟؟ لو كان الكلام كلامي أنا كنت سامحتك لكن المدام ( شخصية ) تقولي عليها أحد المتداخلين ؟؟؟ أمانة ما إتلومتي
شيماء قلمك ( كيبوردك ) ينبئ عنك الردود السلسة الرشيقة تبشرنا بإنسانة عندها الكثير لتشارك به .
كل الإحترام
09-18-2007, 10:23 AM
Shayma
Shayma
تاريخ التسجيل: 09-09-2007
مجموع المشاركات: 501
الاخ الظريف عاطف عمر كل سنة وانت طيب وتصوم وتفطر على خير
Quote: فقد خالفت قانون المصنفات البوردية والملكية الفكرية فالفقرة اعلاه هي حكمة جادت بها قريحة وعبقرية صديقتي اللدودة الست الفضلى ( بعلتنا ) . فكيف تجعلينها ( مجهولة ) ؟؟
ياخي شديد اسفنا ليك وللفضلى بعلتكم القصة بس كسل ساي عشان ما امشي افتش بوست غادة واقرأ المداخلات كلها. لكن بيني وبينك كان كنت عارفاها بعلتكم الفتيش ما كتير عليك ولا عليها!
Quote: قلمك ( كيبوردك ) ينبئ عنك الردود السلسة الرشيقة تبشرنا بإنسانة عندها الكثير لتشارك به .
تصدق الكلام دة بدأ يخوفني بالجد خايفاكم تجوا بعدين تقولوا طلعت دعاية ساي لكن الشي المفرح الارشفة الجاية دي والبوست حيتقفل ويتنسي وبعد داك ممكن اطبز واكتب اي كلام
Quote: ( يجو أخواتك يدافعوا عنك أو ناس العرضة أو حتى جمهور الهلال والمريخ مافارقة معاى )
لكن جماهير الكورة ديل جيرانا وما بيرضو فينا أعمل حسابك عشان ما احرشهم عليك!! تخريمتين:
تعال هنا بكري يديك انت وبعلتك باصووردين لييه؟ يعني انتو احسن من esam&amal في شنو؟ دة دربي على بوست غادة من باب الشمار وكدة عشان اعرف بعلتك هي منو!!
09-18-2007, 10:26 AM
Raja
Raja
تاريخ التسجيل: 05-19-2002
مجموع المشاركات: 16054
Quote: وصراحة كدة ما شايفاها شغلة نسوان من زمان ما بدور النسوان البيفتن في السياسة وحتى كان قلنا نفتي فيها مرة مرة برضو ما بنقدر نفتي وناس (كمال عباس) و (عادل عبد العاطي) في المدينة... اقصد المنبر.
عاد ياشيماء خليتى لى شنو تانى يعنى علوم النقة القريتها دى ابلها واشرب مويتها؟
* كمال عباس وعادل عبدالعاطى السياسة العاوزنها بنقرر فيها نحنا {النسوان} ديل معاهم النص بالنص، انا متأكدة من كلمى ده وبراهن عليهو، اسأليهم لو انا غلطانة
09-18-2007, 10:41 AM
Shayma
Shayma
تاريخ التسجيل: 09-09-2007
مجموع المشاركات: 501
Quote: تخريمتين: تعال هنا بكري يديك انت وبعلتك باصووردين لييه؟ يعني انتو احسن من esam&amal في شنو؟ دة دربي على بوست غادة من باب الشمار وكدة عشان اعرف بعلتك هي منو!!
لا حولاااااااااااااا طلعتي ( فتانة ) بشكل هو لو بكري ( غلط ) وأدى الست بعلتنا باسوورد أنا تاني حتشوفوني وين ؟؟؟ ناس منى خوجلي ورجاء العباسي ياما ( حرشوها ) عشان تطلب العضوية قالت كفاية عليها ( غلاط البيت أمشي كمان نتغالط على الهواء ) . وعشان ما تتعبي أنا جبت ليك بوست غادة لحدي عندك .
Quote: غايتو الحمد لله أنا ما بكر ترتيبي الثالث في الأسرة وللرقم 3 قصص كثيرة في حياتي ، أرجو أن أتمكن من سرد بعضها .
بعد أن أنجبنا كريمتنا هديل ، و( دفقنا ) فيها كل شحنات المحبة التي كانت بدواخلنا ، طلعت صديقتي اللدودة سعدية بنظرية جديدة قالت فيها
" أنا إقتنعت إنو البكر ما عوير ، لكين العورا أمو وأبوهو "
Quote: قالت كفاية عليها ( غلاط البيت أمشي كمان نتغالط على الهواء )
هي كان جات واتغاطت معاك انت براك ما هين تعرف انا زمان كان عندي قريب من الشعور دة بستغرب في الفيميلز الفي المنبر اقول مالهم الجابرهم شنو كل يوم يتشاكلو مع ستين الف راجل لكن بعد كدة احسن اسكت ساكت
Quote: ما تمشي يا شيماء تسوي الفطور لى وليداتك إفطار السعودية الباقي ليهو يا دوبك 3 ساعات
ياعاطف مداخلتك دي الساعة حداشر وربع وفي السعودية واحدة وربع + التلاتة ساعات بتاعتك دي تبقى اربعة وربع
غايتو يا عاطف الله يقبل صيامك البتحللو اذان العصر دة
09-18-2007, 11:33 AM
ismeil abbas
ismeil abbas
تاريخ التسجيل: 02-17-2007
مجموع المشاركات: 10789
هاشم خلف الله قال ليك .دارنا نحن قريبة ليك .عايز يجرك لى ناس الكلام الحلو مجموعة الشعر..وألأدب ناس سمية الحسن طلحة الملكة وأسماء الجنيدوتماضر الخنساء وهم كثر من جنسك..
عبرى ....فضفضى..ليس كل من له باس وورد أديبآ أو شاعرآ....هناك الكثير من الذين يثرون الحوار بالمداخلات الجميلة...
الاخ العزيز اسماعيل عباس تشكر يا جارنا في امدرمان على المداخلة المميزة اصلو جيران ناس العرضة مميزين دايما لقيت في مداخلتك عُصارة كل المداخلات مليانة وجميلة تسلم عليها وعلى التشجيع
09-18-2007, 04:50 PM
Amir Omer
Amir Omer
تاريخ التسجيل: 06-14-2007
مجموع المشاركات: 950
محمد عبد المطلب حسن يا شكّال يا شراني امانة في ذمتك البورد دة كلو فيهو تلاتة بس كتّابين؟!! دي غايتو الا كان زي جنيه السودان الجديد الواحد بي ألف لا وكمان شايفاك تشاكل وتلون في مداخلاتك حزنان وواعي
تمبس غايتو ما قصر معاي في موضوع الالوان دة الله يديه العافية لكن كان عُزنا استشارتك في الموضوع دة كيف؟
Quote: دي هرشة خفافية كده عشان رمضان وكده ما عايزين نتقل عليكي!!!
تسلم يا سيدي على الهرشة الخفافية وفي انتظار الهرشة التقيلة
09-18-2007, 07:24 PM
Shayma
Shayma
تاريخ التسجيل: 09-09-2007
مجموع المشاركات: 501
Quote: والله حنيت على حالك ... هسي تقعدي من الفطور للسحور عشان تردي على الناس ديل!! ما كان أرحم ليك تقعدي معانا في المدرجات تتفرجي ساكت؟!!
لا ما تحن علي الجديد شديد دي فرحة بالباصوورد ساكت زمان لما كنا صغار (اقصد قريب دة لما كنا صغار) كنا مكملين احتفالات استاد المريخ أي مناسبة تتعمل فيهو بنمشي يعني خلاص كملنا قعاد المدرجات دي حسي عاوزين نلعب شوية وانت ذااااتك بي سماحة اسلوبك دة مافي سبب بيقعدك في المدرجات أها رايك شنو نلعب في فريق واحد.
Quote: دي مكنتك؟
بس بيني وبينك المصحف جيب مصحفك وتعال
09-18-2007, 08:24 PM
Amir Omer
Amir Omer
تاريخ التسجيل: 06-14-2007
مجموع المشاركات: 950
رمضان كريم وكل سنو انت والزملاء الحلوين بعافية .. كما تفضل الزملاء ورحبوا بك بشدة فانا ارحب بك بالكوم وياريت تستمري في خطك الظريف دة .. اما نوع الكتابات التي لاتعجب البعض فاتركيها لنا .. لانك مابتستحملي؟ وربنا يكون في عونك .. بهاء//
09-18-2007, 08:55 PM
Shayma
Shayma
تاريخ التسجيل: 09-09-2007
مجموع المشاركات: 501
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة