نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
خاشين ..خاشين .. حكومة الدبابين
|
أمس الضهر حضرت مؤتمر صحفي للأستاذ الزهاوى إبراهيم مالك الرئيس الجديد لحزب الإصلاح والتجديد ... مؤتمر حكاية والله ... الزول لم ليك في مبارك الفاضل قص وحلاقة ... صلعة موس ... وحبس قشلاق عديل ... والغريبة وأنا قاعد في مؤتمر قلت يا ربى أنا خشيت الفيلم دا وين ؟؟؟ اها ... قبل كم سنة لمن مبارك والزهاوى ونهار ومسار وباقي الجماعة مرقو على السيد الصادق المهدي شبكونا ليك نفس الحنك ... ما عارف الحزب ماشى بالجلالة والروزيف وقاطع وبقى شجرة عائلة ... وصديق مساعد يكتب المقالات الطوال – عارفين طبعا صديق مساعد – ينتقد مرة الصادق المهدي ومرات الفكر لحزب ألامه ... اها قلنا اصلاح اصلاح ... ما كعب ... لمن فجاة كدا قامت الوهمات الجديدة ما عارف مبارك شلع نهار ونهار حرد مشى عمل ليهو اصلاح وتجديد ( جديد ) وجا الاستاذ عقيل محل (نهار ) وقعد مع مبارك الفاضل طلعو ليك نهار زول اى كلام ... والزهاوى برضو كان معاهم ... مشينا قدام شوية يا مان عقيل زاتو ختاهو قرض مع مبارك ومرقت جماعة (القيادة الجماعية ) ديل ناس عقيل ومسار والصادق المهدى الصغير ... لمن مبارك زعل مع ناس الحكومة والبشير شلعو يوم ستة اكتوبر – يوم العبور – ومرق مبارك زعلان ( فقاه يامر عيش ) زى ما بيقولو المصريين ... اها ولسه ماشيين فجاة عقيل زاتو عفص ليهو لغم هو زاتو قاد انشقاق فى القيادة الجماعية ... ومرق فرع جديد من الاصلاح والتجديد ... الكلام دا كلو والزهاوى ومبارك قاعدين سوا ... ومعاهم صديق مساعد ... اها يا زول فجاة كدا ... الزهاوى ومبارك – سيد مبارك – قامت بيناتهم شمطة ... مبارك يعزل الزهاوى والزهاوى يعزل مبارك ... ومبارك يعين نفسو الكابتن والزهاوى يعين نفسو الكابتن برضو ... والقصة جاطت .... يعنى لو انت ماسك ليك قسم اخبار وجاب ليك زول تصريح عاوز ليك ساعتين عشان تهبش جاى جاى عشان تعرف زولك المصرح دا ملاح شنو .. عاوز مفتاح خريطة عديل والله ... الكلام دا بالمناسبة ما من ناس الاصلاح براهم كل احزابنا كدا يعنى هسة شوفو القضروف الجابو لينا ناس الاتحادى ديل ... ناس تمشى ليهم يقولو ليك خاشين خاشين حكومة الدبابين دى .. تمرق تغشى قائد حزبى اتحادى يقول ليك ... ها ... انسى .. يلقوها عند الغافل ! طيب يا مولانا ما فلان وهو زول مسؤول قيادى فى الحزب قال مشاركين ... يقول ليك على كيفو ... لكن الحزب ... دت ... ما بشارك ! هسة فى جرائد الليلة دى الاستاذ تاج السر محمد صالح وصف تصريحات على محمود حسنين من مسالة المشاركة فى الحكومة بانه (امر شخصى ونفسى ولا يعبر عن راى الحزب ) شفتو الكلام دا عاد ... وطبعا حسنين تلاقهيو يقول ليك ... ما مشاركين ... نهائى ... ومعاها جرة زى بتاعة جمال عبد الرحمن ديك .. وغايتو حالة الاحزاب كلها تحنن .... ناس المؤتمر الشعبى ... اخرها قالو احسن نقعد بعيد ونكشف ولكن تانى شالتهم خرمة للهبيش فى ناس الحكومة ورجعت ليهم الغبينة القديمة مشو عملو اتفاقات مع فصائل مسلحة – حركة العدل وهى اصلا حقتهم – قوم يا السيد الصادق المهدى امشى خش ودخل كراعك ... عشان شنو وليه ... بيعرف السيد الصادق بس ... لانو فى زول قرن فى حزب الامه سالوه الصحافيين قال (يطرشنى ) ... قال كدا .. تصوور . الاحزاب دى مالها ... تصدقو المؤتمر الوطنى والحركة الاسلامية فى اضعف حالتها ... شفتو الشفافية دى .... لكن بالشايفو دا .... حقو ناس الانقاذ يمنحو كل قادة الاحزاب والتنظيمات اوسمة وشهادت شكر وتقدير لانهم براهم ... بيدعمو انو الانقاذ دى تحكم .... وتحكم ..
|
|
|
|
|
|
|
العنوان |
الكاتب |
Date |
خاشين ..خاشين .. حكومة الدبابين | محمد حامد جمعه | 09-19-05, 02:01 AM |
Re: خاشين ..خاشين .. حكومة الدبابين | محمد حامد جمعه | 09-19-05, 02:08 AM |
Re: خاشين ..خاشين .. حكومة الدبابين | محمد حامد جمعه | 09-19-05, 02:10 AM |
Re: خاشين ..خاشين .. حكومة الدبابين | Mohamed E. Seliaman | 09-19-05, 02:14 AM |
Re: خاشين ..خاشين .. حكومة الدبابين | صلاح الدين عبدالله محمد | 09-19-05, 02:24 AM |
Re: خاشين ..خاشين .. حكومة الدبابين | محمد حامد جمعه | 09-19-05, 02:31 AM |
Re: خاشين ..خاشين .. حكومة الدبابين | صلاح الدين عبدالله محمد | 09-19-05, 02:40 AM |
Re: خاشين ..خاشين .. حكومة الدبابين | nazar hussien | 09-19-05, 03:49 AM |
Re: خاشين ..خاشين .. حكومة الدبابين | محمد حامد جمعه | 09-19-05, 07:42 AM |
Re: خاشين ..خاشين .. حكومة الدبابين | nasiradin | 09-19-05, 07:57 AM |
Re: خاشين ..خاشين .. حكومة الدبابين | nazar hussien | 09-19-05, 08:21 AM |
Re: خاشين ..خاشين .. حكومة الدبابين | waleedi399 | 09-20-05, 03:03 AM |
Re: خاشين ..خاشين .. حكومة الدبابين | Ahmed Abdallah | 09-19-05, 01:48 PM |
Re: خاشين ..خاشين .. حكومة الدبابين | waleedi399 | 09-20-05, 00:28 AM |
Re: خاشين ..خاشين .. حكومة الدبابين | ala elfaki | 09-20-05, 02:28 AM |
Re: خاشين ..خاشين .. حكومة الدبابين | Abdelrahman Elegeil | 09-20-05, 06:55 AM |
Re: خاشين ..خاشين .. حكومة الدبابين | نادية عثمان | 09-20-05, 07:58 AM |
Re: خاشين ..خاشين .. حكومة الدبابين | Abureesh | 09-20-05, 08:50 AM |
|
|
|