|
|
 نزار حسين.... وأي فتى أضاعو!!
|
سأهديك بعض إبداعات الفتى الذي
خرج مغاضبا..
نزار حسين..
وهو من القلائل الذين يتميزون بحضور البديهة
والقريحة المتوقدة..
فكل ما سأستعرضه هنا.. كتب ارتجالا..
في بوست نجود الذي أوردت فيه قصيدة بعنوان العذابة
كتب نزار:
في التعزيب الضل بستني
نتم النوم رايقين في جهلنا
ندوبي الليل ما طال
يا ليلي اليلك جنّ
محبوبك اوه وغني
وهي ليلي أكان ما جنت
سامعه الدوباي فوق كم
حلتنا تجقجق ونارا فحم
ممهووولة النار...
والشوق بطفيه الليل
بين حبة صبر وحبة وهم
وتاني صباحنا يجينا في عزيبنا
اسياد فزعة...ونكوي الوجعة
الامجاد ..التكسي...الكارو
الحرنت لي سيدا
يا العزابة ادونا جريدة
الغاز الكمل الجمرة القطعت
ويحيدة
يا العزابة المغسة شديدة
نجود دا نجر اخدر هسي ماشي الطراويح وكان قدرت بجي راجع اتمو
|
|
 
|
|
|
|
|
|
|
 Re: نزار حسين.... وأي فتى أضاعو!! (Re: عبد الله عقيد)
|
في بوست (جنون البدر)
لبدر الدين شنا
كتب نزار:
جني وجن ريحة زيت شعر الهنود
وجني وجن الناس أبان حركات قرود
وجني وجن الحمي البتبنوها بالعود
جني وجن الزول البنخنخ
وجني وجن الشتم المتختخ
وجني وجن البعجن ويلتخ
جني وجن اللبس المشاتر
وجني وجن نهزرة العساكر
وجني وجن ال لي العشره ناكر
جني وجن صوت القواله
وجني وجن الزول اب رياله
وجني وجن الاسبتاله
نواصل الجنون يا البدر
جني وجن الناس السوا وبتنقرو
وجني وجن ردّيم عدة العزابه
جني وجن الفلس وكتين يجيك بي فقرو
وجني وجن رفعة السبابة
جني وجن ملاح القرع
وجني وجن الغره بلا ورع
وجني وجن العوم الفي الترع
جني وجن الكلاب
وجني وجن الكتل بي الحراب
وجني وجن الرجال أبّان...ب
جنّي وجن الزول الشليق
وجني وجن البنطلون البضيق
وجني وجن مطلوقة الفريق
جني وجن الشافع البهبّش
وجني وجن الشبط البكرمش
وجني وجن الشرطي البفتّش
قبيل بعد الغداء وانا راقد اتذكرت ليك كترة جنون
جني وجن المس كول
والشويفع الخاتنو مسئول
والمحارس عند لجنة قبول
جني وجن ناس الجمارك
والببيعو العشا بي الموارك
والصفوف امّات كواريك
جني وجن الاجتماعات
وانتظار صالة المطارات
والتبرك والصفوف
كان في البنوك والله السفارات
جني وجن العجايز البتحنن
البلبسن للخواتم ويدخنن
وهن من زمن..
قالو لي جن
هوي حلاأأأأأأأأأأأأتن
كونكش كوش كونكوش كوش
جني وجن الراجل اب سلاسل
البباري البنوت وديمة فاصل
والشغلتو قصادهن مراسل
جني وجن حضرت ولم اجدكم
والبسالم الناس بي طرف كم
والبقول لك جيت من عربكم
جني وجن الضرائب
واللخابيت البتفرق الحبايب
والشواكيش الزي قرص الدبايب
جني وجن السهر
وقلقيل السراير في المطر
واللضان الما بتسمع وتر
جني وجن ماك جا تعرّس
وعدم احترام التلاميذ لي المدرس
والبجلدك بي دو وتريس
يا البدر شن بلحقني ليك...
ما اكتبه هنا نجر خلال ساكت يا اخوي...
فشكرا ان أعجبتك هذه الجنياتك
وعفيتن ليك لله والرسول
كان جنك وجنهن
| |
|
|
|
|
|
|
|
|
|
Re: نزار حسين.... وأي فتى أضاعو!! (Re: عبد الله عقيد)
|
وفي الدوبيت يقول:
للطيب بشير
الحق كلو فضلة خير بشير وابوه
الطيب فعال وسما ولا بقاربوه
ادبك فطرة نديان ان بقت شربوه
ينسوا العود عديل حرم يمين يابوه
نما كان ختاك يا ابو البشير شن طعمو
توزن للحروف لي ابان قلوبا بعمو
ماذونا الحبيب زاد في كلامو ودعمو
شان الخوة كان لا زم يؤكد نعمو
الدنيا ام قدود لعبتبنا الفرتيته
كل ما نلقي خيت تلقاها شالت زيتا
الزي ود اللمين صاحبا حمش كبريته
بتلقي في النوايب والفرح والكيتا
وقال لـ أبقوتة
التمره وين تنجض بلا امثالك
ابقوته العفيف حرم تأمّنو مالك
تبسط في الحروف والمعني من اجمالك
راجلا مو سهل تتمنا يوت في شمالك
وعندما قلت له:
يا ود الحسين العمدة سيد البيت
تأمر يا أمير كيفن بقول لك ابيت
فيك سماح خُلُق مطبوع علي اتربيت
وزي ما قال لك الطيب "حريف دوبيت
أجابني قائلا:
المسدار تركتك من نشيت تبيت
ومن فطموك غزولك درب دوبيت
الدار هي دارك ماك غريب في البيت
نم..اخلف كراعك...ما بتقوم كربيت
ما شفت السحاب يا ود عقيد في جبيت
تقول تلفاهو بي نبله وحصاية وخيت
يوم يهرج يبش قبال يموص البيت
نعرف قولنا كان ونسه وحكي وهقيت
وقال لـ جني
تراني مكجن الساسه الدروبهن سوس
والغواصة والدبابة والدقنية والمجروس
واحمد ربي فعلا ما بقيت جاسوس
ولا اتحشرت ما بين الحلوق والروس
سأل الطيب بشير قائلا:
يا ناس عندي ليكم زي سؤال جاوبـوهو
السوداني كيف أخوانو يوم يابـوهـو
إن بقى جبهة و لا شيوعي ما يعابوهو
الناس تختلف و(الآخر) آآآ بزابـوه
فرد عليه نزار بقوله:
السوداني الاصيل لا بعادي لا بعابي
وما بتحفر تلاقيه جوه الدفان دابي
النيل العظيم ما شفتو كيف كابي
راويهن سماح المهدي وترابي
| |
|
|
|
|
|
|
|
|
|
Re: نزار حسين.... وأي فتى أضاعو!! (Re: عبد الله عقيد)
|
نزار.. واعد نفسه على نبذ ما شهده المنبر مؤخرا
من إسفاف وفجور في الخصومة، بلغ حد هتك
الأعراض..
على أن لا يبقى في مكان واحد مع من وصلوا
هذا الحد من الخصومة..
وطالب صاحب المنبر بإيقافهم.. وإلا..
وآثر أن يوقف نفسه، وهو أضعف الإيمان..
فهل..
نسكت على توقف توقف هذا المبدع
الذي عرضنا نماذج من إبداعاته هنا
وخفي عنّي أكثرها وأجملها.. ؟
أم ندعو نزار لجبر خاطرنا
والعودة.. ؟
وأهلنا قالوا: أقعد لا الحول.. ما تقوم بي خاطر زول
| |
|
|
|
|
|
|
|
|
|
Re: نزار حسين.... وأي فتى أضاعو!! (Re: عبد الله عقيد)
|
إنت الأجمل يا ود عقيد ..
حزنك هذا على خبو حزمة ضوء في عتمة واقعنا الشين ..
حزنك النبيل هذا على تفريطنا للقيمة التي تدوزن تقبلنا ( لنا ) .. دون ( عك ) وتجريح و .. فجور .
يستدعي الإحترام .. ويستدعي مناداة ( مروتنا ) أن :
نزار .. أرجع .
نزار - مهما اختلفت رؤانا الفكرية - كان واحدا ممن يشعلون درب بكره ..
وكان حفيا بقيمنا السودانية السمحة .. دون إسفاف أو ( رَخَسَه ) ..
أنا ونزار قد لا نلتقي في الكثير من القضايا .. ونلتقي في الوطن ..
لذلك أقبله .. وأحتفل به ..
ويوجعني إنسرابه منكساً هكذا .. وفي حلقه غصة .
هو واحد من قلائل يستحقون الإحترام و .. الود
.................
هزمك القبح يا نزار ..
( ما كانت محريه فيك ) ..
..........
شكرا ود عقيد
| |
|
|
|
|
|
|
|
|
|
Re: نزار حسين.... وأي فتى أضاعو!! (Re: Emad Abdulla)
|
Quote: نزار - مهما اختلفت رؤانا الفكرية - كان واحدا ممن يشعلون درب بكره ..
وكان حفيا بقيمنا السودانية السمحة .. دون إسفاف أو ( رَخَسَه ) .. |
لك التحية أخي عماد
ولك التقدير
أنا أيضا لم ألتق نزار إلا في دروب إبداعه الخالي من الإسفاف والخسة
ورسالته المبسوطة وضوحا وشفافية..
لم أعرفه من قبل، وربما لا ألتقيه من بعد، لكني أحببته هنا
مع اختلافي مع رؤيته للكثير من الأمور..
ولكن ما علاقة الاختلاف بالمحبة؟!
لا أظن أن بينهما علاقة.
فلكل طريق
ولا أزيد على ما قلته أنت أخي عماد فهو كاف..
ولك المودة
| |
|
|
|
|
|
|
|
|
|
Re: نزار حسين.... وأي فتى أضاعو!! (Re: عبد الله عقيد)
|
حبيبي وصديقي عبدالله عقيد
سلامي وإحترامي وحسرتي على فراق نزار ومناشدتي له بالعودة
Quote: فهل..
نسكت على توقف توقف هذا المبدع
الذي عرضنا نماذج من إبداعاته هنا
وخفي عنّي أكثرها وأجملها.. ؟
أم ندعو نزار لجبر خاطرنا
والعودة.. ؟ |
حقيقة الأجواء في اليومين الفاتو كانت سخيفة ولا أذيع سراً إن قلت أني هممت بما اقدم عليه صديقي نزار ولكن عزيمتي وإرادتي كانت ضعيفة فما استطعت وما دمت موجوداً ولم أغادر فلابد أن يعود نزار وإلا فكيف يطيب لي المقام؟؟؟
دار بدون نزار؟؟؟
لا لا لا لا لا لا لا لا
حبيب تعال تعال تعال تعال نتم الريدة
ولك التحية أخي ود عقيد وأنت تتفقد الإخوان
| |
|
|
|
|
|
|
| |
عبد الله عقيد
Emad Abdulla
Mohamed E. Seliaman
saadeldin abdelrahman
بدرالدين شنا
garjah
فيس بوك
تويتر
انستقرام
يوتيوب
بنتيريست