وهمات الفنانين الشباب ..!!

Quote: والله يا كودي وقعت معاي !! هسي بقى ليك حار ؟!! ووقع ليك كلامي عن ضرورة إنو الفن والغناء ما يكون مطلوق ساي ولازم يتقيد بي قوانين ..؟! في بوست وهمات الفنانين الشباب شبكتني إنو الفن تذوق وإنو الجماهير بتعرف تختار وتفرز الغنا .. وانو الفن دا ذائقة وما في ضرورة لوجود قانون لتسجيل الفنانين والشعراء ..!! اها هسي رايك شنو ؟! يعني لو كان في لجنة جد جد راجعت القصيدة وراجعت ترخيص فهيمة وكلمات الاغنية مش كان افضل ..!! عليك الله مش حقو تكون حقاني وتعتذر لي وتقر بضرورة وجود لائحة وقيد ورخصة عشان ما أي زول يغني ساي وإنت تجي تقول لي الجمهور يختار والجمهور هو البيقرر منو المبدع من المامبدع ؟!! بعدين إنت هسي بس يا ها دي الكلمة الوحيدة اللفتت نظرك ؟ يا خي الغنا بتاع الصواميل المالي البلد فيهو مفردات أتفه من دي وكمان بي صراحة ومباشرة لمن تستغرب ..! التاريخ بيذكر يا خالد كودي قبل سبعة سنين سنة 2005 أنا كتبت بوست فيهو إهداء ليك لي قصيدة وانت تفهت القصيدة وما عجبتك وطالبت إني أنزل أغنية عشان تقرر اني فنان ولا لا .. متذكر ؟! متذكر إني نزلت ليك أغنية مكتوبة وفي نص الغنية كتبت ليك (سجمنا الـ عب هجمنا) .. قمت انت خليت دا كلللللللو وأقتبست الجملة دي وحايم بيها من بوست لي بوست تبكي وتتنايص بتروج لي عنصرية ناذر الخليفة وكمان قشرت بيها في بوست سامبو واكون القربت ترسمني فيهو من غير هدوم !! يا كودي إنت قابل جملة سجمنا العب هجمنا دي أنا كتبتها من راسي ؟ ما برضو كانت لازمة وتتقال في نص الأغاني .. هسي بعد سبعة سنوات جيت برضو كررت غلطك و قاطع ليك جملة من غنية وتتهم فهيمة بالعنصرية ..!! يا خي لو ما عندك قول .. يمين بالله ارسل ليك سي دي فيهو زي عشرين غنية وانت بعدا كان ما طالبت بي وقف الغنا نهائيا تعال أسألني !! اها بي نفس مفهومك الكتبتو لي في بوست الوهمات أنو الجمهور بيعرف يتذوق ويختار .. أها انا هسي ك جمهور الاغنية دي عاجـباني وبالذات الفرخة النايمة في سريرنا ولا شنو ما عارف .. حا تتهمني برضو بالعنصرية ؟!! إنت يا كودي ما عندك قرون استشعار تقدر تحس بيها بالخطر الجاي من الأغاني المطلوقة إلا بعد ما تجيك في اللحم الحي ؟! غايتو أنا شمتان فيك وهسي ماشي أرفع بوست الوهمات وبنتظرك تجي تعتذر لي فيهو وتقر معاي بي ضرورة تسجيل الفنانين وضبط مفردات الساحة الفنية واي فنان أو فنانة تاني ما يغنوا ألا بي رخصة ولا حتى في الحمام !! منتظرك بي هناك ..!!