والله المغتربين السودانيين البيجوا السودان اجازات ويرجعوا حيرونا ..!!

Quote: ناذر إزيك.. كلامك صاح مليون في المية !! أنا ما عارف (المغتربين) ديل زعلانين ليه؟؟ الزول ده كلامو واضح ، قال ليكم ما تهولوا المواضيع، ما قال ليكم ما تكتبوا إنطباعاتكم عن السودان، فيها شنو دي؟؟ معروف إنو الزول البيكتب انطباعاتو بيكون مشى بلد لأول مرة ، وجاء يقول لينا عنها بدون ما يجي زول يتفلسف ويقول ليك طيب السودان ده ما كأنو بلد غريب علي بالحاصل فيهو ده وده ردنا عليهو إنو الحصل شنو يعني خلال السنين الفاتت دي وما كان مُتَوقَع!! في الكهرباء والموية والشوارع والاسعار .....للآخر ، ما ياها ماشة (كل إجازة) من سيئ إلى أسوأ و كل المغتربين ديل بيمشوا اجازات وعارفين الحاصل ده كلللللو...!! الجديد الجبتو لينا شنو وما عارفينو؟؟ يعني مفروض ده يكون شئ متوقع للمغترب أوالقاعد جوه السودان ، ودي ما محتاجة لذكاء عشان نعرف الحركة التصاعدية لحال البلد.. ده حال بلدنا الما خافي علينا ، كان رضينا أو أبينا .. لفينا وشفا كتير من البلاد وما لقينا أحسن من السودان ، مش من النواحي البيتكلموا عنها الناس ، لأنو مافي مجال للمقارنة ولأننا ما عندنا حاجة عشان نقارن بيها (خلاف سودانيتنا) الما ممكن تتغير لو كان حاكمنا ابليس مش الكيزان.. ياخ في مغتربين (لغاية الآن) فاكينها في نفسهم وعايشين دور مغتربي العصر الذهبي للإغتراب كما يجب !! ياخ معقولة بس؟؟ شخصياً وبحكم العمل بسافر كتير وبشوف دنياوات جديدة ، لكن ما حركت فيني ساكن ، وما برتاح نفسياً لو ما مشيت السودان تلاتة مرات في السنة، السودان غير ( بي جنو ودايرينو).. وبعدين – أيها المغترب - لو ما دخلّت نفسك ( ترس ) في الحركة الحاصلة ورشحت مع العالم الراشحة هناك دي وقعدت تتفرج عشان تجي تحكي (تجربتك) فأحسن ليك تقضي إجازتك في بلد تانية، لأنك ما استمتعت بالمعاناة والبرامج والناس والحياة الحقيقية.. مرات يا ناذر والله بحس إنو (بعض) المغتربين (مهجومين) بقصة سفر وطيارة واغتراب وبلد ما بتشبه السودان وحياة ساهلة وعربية وبنطلون وفتيل ريحة، والدولار وصل كم !! ياخ دي أوهام تجارية مُضِرة.. في نماذج من المغتربين تحيّر.. بالله يا ناذر خليهم يقولوا الدايرينو، وخلينا نشوف السودان من خلالهم يمكن نعرف حاجة جديدة..

Quote: عزيزي ناذر محمد خليفة تحية طيبة وبعد, اولا انا عاوزة اشيد بيك لأنك فعلا بتحب بلدنا السودان ومستحمل الكلام القلته ده كله وما بتشتكي.. وكما عاوزة هنا اردد ليك كلام اخونا جلال جبريل :" السودان يا هو في النهاية بلدنا وما عندنا فيهو كلام"" لكن نحن المغتربين والمهاجرين والمغتربات والمهاجرات ما بتشتكي انو البلد ما فيها سيستم وما ماشة عديل.. وما بنشتكي من الغلاء عشان المغتربين اساسا عندهم القروش الكفاية .. وما بنشتكي من السخانة عشان نحن في امريكا عندنا سخانة هنا في الصيف اسخن من السودان بعشرين مرة.. لكن بنشتكي من حاجة واحدة بس.. بنشتكي من الرشاوي في مكاتب الحكومة.. يعني ما ممكن تقضي ليك حاجة في السودان بدون ما تدفع رشوة.. وحتى لو بتعرف واسطة لازم تدقع رشوة.. وانا ما عارفة موظفين الحكومة ديل مشغلينهم لشنو؟؟ مش عشان خدمة الشعب ولا عشان الشعب يكون في خدمتهم..!! انا قاعدة في بلد , وعلى الرغم من جرائمها الكثيرة والمسيخة, لكن موظفين الدولة يخجلوك في التعامل ويقضوا ليك الغرض الجاي عشانه في لمح البصر وبابتسامات مش زي موظفين السودان تلقى الواحد مكشر وشه ويحاول يخت ليك الف عقبة امامك عشان يعجزك واول ما تقول ليه حقك محفوظ .. تلقاه سريع عمل ليك الواجب... عرفت با ناذر نحن بنتنرفز ليه لمن نجي السودان اجازات؟؟؟ انا نفسي تزورنا هنا في امريكا عشان تشوف موظفين الدولة بيعاملوا الناس كيف ؟؟ والله يديك العافية

Quote: ده حالته جلينا وقت يا ريت يا ريت ( الزول البطرش دخلته في تايم بدري شويه)

Quote: ما أظن حصل اشتكيت لية ( غايتو ما بتذكر أبدا )

Quote: العزيز ناذر... تحياتي... آذن لي أن أشركك للأهمية وجهة نظر لي سابقة قلت بها من قبل ببوست بهذا المنبر (تجد اللنك أدناه) حول تصوري لأحقية ثلاثة شهود في الحديث عن "المشهد" بذات القدر من الأحقية لا بل والأهمية (هم كل الشهود المحتملين) لدى هذا المقام، وهمو وفق لغتي الخاصة ومصطلحاتي، كالتالي: 1-الشاهد الحاضر المشهد أي العايش المشهد من أمثال نذار (المقيم في الأساس في السودان بشكل دائم كل الوقت) المشهد المعني به الحالة المشهودة وهو السودان "طبعآ" لدى هذا الحكي. 2-الشاهد "العائد" إلى المشهد بعد الغياب ... زي الناس الذين تحدثت عنهم نذار. 3-الشاهد "الغائب" الغايب كلو كلو "لم يعد أبدآ بعد"... برضو من حقو يتحدث (زيي كدا) ومئات الآلاف... لأننا نتحدث من منطلقين: شهادة الشهود (الشاهدين أعلاه) وهما الناس بكل وسائل إتصالهم وتواصلهم ثم الذاكرة الأصيلة إضافة إلى ما هو أهم وهو الهم والواجب الوطني و الأسري والعملي والسياسي والأدبي والأخلاقي (ومن ضمنه المصلحة المادية والمعنوية في التغيير السياسي وحلم العودة في أجواء سياسية وإقتصادية وإجتماعية مواتية). كما أن هناك شاهد رابع بدوره مهم وهو "الآخر" غير السوداني... برضو من حقو يشهد (الناس الآخرين والإعلام العالمي) بل ومرات يستطيع أن يوقع عقوبات (الأمم المتحدة ) على المشهد الجغرافي (السودان) بما به من ناس وكائنات وأشياء. (لأن المشهد الواحد "السودان هذه المرة يستطيع أن يسقط ذاته سلبآ أو إيجابآ على المشاهد الأخرى = بقية مجتمعات العالم "الإرهاب مثالآ").... سو يا مان القصة ما نحن بس كمان كسودانيين في عكة بيننا بل أكبر!. ولك أن تتصور الليبيين زمان والسوريين الآن يطلبون نجدة "تدخل" حلف الناتو بوصفه شاهد أصيل على المأساة!. خلاصة: عندي كلنا نستطيع أن نشهد بلا مزايدة وبلا أفضلية وبنفس القدر والأهمية وفي المقامات والمناسبات المختلفة عاملين كل الممكن من طرق تفكيرنا وبحسب مصالحنا الذاتية التي نشعرها في الحقيقة أو/و الخيال وبحسب آيدولوجياتنا المختلفة وأعمارنا وأقدارنا كما بحسب تجربتنا الجمالية والنفسية. هنا رابط البوست المعني ( مع التركيز على ص 2):

Quote: ناذر بوست جميل وبالنسبة لينا ممكن يكون عنوانو كدة والله المغتربين السودانيين البيجوا من السودان اجازات كرهونا

Quote: عارف يا ناذر عندى خالتى مراة راقية شديييييد وسمحة شدييييييييد ومرتاحة شدييييييييييييييييييييد وراجلها ملياردير مشت السودان بعد عشرة سنين غربة معاها 4 اطفال قامت حصلت ليهم مشكلة بتاعت جوازات ومشوا المغتربيين علشان يعملوا جوازات جديدة عارف كل يوم يقولوا ليها امشى وتعالى وجارة معاها اولادها لما الولاد زهجوا ومرضوا بعد شهر من المساسقة غلبا الصبر ساقت اولادها ومشت دفرت ليك مكتب مدير الجوازات وردحت ليك ردحة لما خوفتن ليك ومدير الجوازات امن زاتوا في نفس اليوم طلعوا ليها الجوازات اليوم التانى طوالى اخدت اولادها وسافرت بمجرد ما وصلت امريكا فى المطار وهم طالعين اولادها مسكوا الجوازات وشرطوها وقالوا ليها نهاى تانى ما تقولى لينا امشوا السودان عاوزة تمشى امشى براك للناس ال و س خ انين ديل

Quote: بأمانة يا ناذر هل زمان كان تشوف بعينك طائرات تضرب موقع معين وتقوم انت تزوغ من الحي بعيالك وتفتح التلفزيون (فى بيت أقربائك الساكنين شمال العاصمة) عشان تفهم الحاصل يقوم المذيع يقول بان ما شاهدتموهـ جنوب الخرطوم عبارة عن حريق ناتج من ماس ماكينة لحام ؟ يا زول نحن بنكون مندهشين من اول يوم لآخر يوم فى الإجازة

Quote: ياناذر يا اخوي انا خائف كلامك دا حسادة على المغتربين .. شايفهم لامعين وجلابيبهم بيضة واقلامهم ما بت###### الجيوب .. يازول الناس ديل ما اخوانك والبلد بلدهم.. انت خت 5 الف دولار بنشتري ليك فيزا لو عايز..

Quote: والبعوضة ما بتجيك واحدة بس يجو اتنين .. واحدة ترفع البطانية والتانية تخش آيييي !! كان عجبك يا ناذر !!!

Quote: السودان دة يا ناذر دق الدلجه من يوم سان جيمس بقي صينية حركة وإشارة مرور ساكت

Quote: عزيزي ناذر كدي اقرأ كلام وضاحة مرة ثانية وارجع اقرأ كلامي عن شهادة الميلاد .. وما تضحك ساكت لكن عاوزين رأيك شنو في الحاصل؟؟وهل الحاصل ده فعلا حاجات عادية في السودان..

Quote: ولكن لماذا لا تنغير للأفضل أن كانت هناك أشياء في إستطاعتنا والتي خارج إستطاعتنا يجب علينا أن لا ننتقد البلاد ولا العباد . وفي النهاية السودان بلدنا بكل المحاسن والمساوئ

Quote: صينية يا صينيه انت Saint James كان كل الخرطوم بالليل مع أشقائه وشقيقاته G M H والليدو وهلما جرا اوع تقول اي الليدو اللعبه البتعرفها ديك عاكف صغير وجاهل

Quote: نسيبي الله يرحمه حكي لي مرة انو في حلفا سنه خمسين كانت في تليفونات عمومية Call box في الشارع

Quote: إحنا البيخلينا نباري الشفع شنو ما عارف يا ناذر انت مشكلتك انك يا دوبك من زمن الطلائع عشان كدة ما ممكن تصدق انو كانت في حاجات حلوة في السودان وكنا زينا وزي العالم المتقدم بل كنا أحسن من دول كتيرة في الجوار العربي والإفريقي ولكن بعد التردي الحصل بعد داك ما ممكن تتخيل انها. كانت موجودة تعرف البلدان التانية كانت بتجي تأخذ الخبرات والأفكار والخبراء مننا زمان كان في رئيس زامبي اسمه كينث كاوندا جا حنس الزعيم الأزهري الله يرحمه انو يمدو بخبرات في مجال السكك الحديدية مشينا مع الوالد اتجدعنا كم سنه في زامبيا وكانت وقتها زامبيا مقارنه بالسودان زي لمن تقارن شارع الشانزليزيه بشارع الهوا عشان كدة سابع المستحيلات بتاعتك دي كانت من المسلمات بها في زمن ماضي يا ناذر هل تصدق انو في عطبرة كنا مشتركين في جمعية تعاونية بتجيب حتي الكرز المعلب والكلام دة في السبعينات انت هسي بتصدق انو عمال السكة الحديد كانو بياكلو ثلاث وجبات في اليوم لغاية ما يشبعوا وبيشربوا شاي الصباح مع لقيمات وبعد الفطور والغداء وكمان بيدورو شاي بلقيمات وقت المغرب وبيضبحو في الضحية وبيشتروا هدوم العيد لعيالهم هل تصدق يا ناذر انو في المدرسة كانوا بيصرفوا لينا الكتب والكراسات وطين الصلصال وحبر الأقلام هسي كلامي دة ما من سابع المستحيلات بفهمك ومشاهدات اليومين ديل

Quote: ما تراكا يا ناذر عارف كل شئ وكأنك عايش معانا هنا في امريكا.. واحتمال تكون صحي عايش هنا لأني كل ما ادخل السيوبر ماركت الجنب البيت اشوف واحد اقول الزول ده شفتو وين انا يا ربي.. وهسع يادوب افتكرت انه ده انت ذاتك.. والله يديك العافية..

Quote: حضرنا السودان بغسلو الشوارع بالماء بعربات مخصصة لذلك قبل ان اراها هنا.. السودان كان فيه تلفونات العمله فى الشارع تكلم منها كل السودان ومدنه الكبرى.. السودان كانت عربات الحليب بتجوب الشوارع وتوزعه على المشترين مبرد..لازلت اذكر القصديرة الحمراء التى تغطى بها زجاجات الحليب الانيقة السودان كانت فيه عربات خدمات بتوزع الغاز الى المنزل (تسمونها الان الركشة وتستعملونها اداة مواصلات) السودان كان يوزع البريد والتلغرافات الى البيوت السودان كلن ترش فيه البيوت بالمبيدات كل ثلاثة اشهر..(بتاع الجمكسين) السودان كان ضباط الصحه يجوبون الاسواق وعمال الصحة يرشون البرك والمستنقعات ان وجدت.. السودان كانت الزائرة الصحيه تزور المنازل كل شهرين وتسأل عن تطعيم الاطفال وصحة الام.. لا اعرف شارع (على الاقل الرئيسيه منها) فى العاصمة لاتسيل الزهور من حواشيه واطرافه.. كان ( لمارك اند اسبنسر) فرع واحد فى العالم غير المحل الرئيسى فى لندن ، كان فى السودان حدثنى خواجه انجليزى عملت معه هنا انهم فى الستينات كانو يخيروا قضاء راس السنه بين بيروت والقاهرة والخرطوم كانو يختارون الخرطوم عشان يشتروا الصوف الانجليزى الهيلد والاحذية الايطالية الفاخرة. كان مطار الخرطوم هيثرو افريقيا وملتقى شركات طيران العالم.. كان مكتبات الخرطوم تعج بكل صحف ومجلات العالم المشهورة عربية وانجليزية الاهرام، اخبار اليوم، النهار، مجلة العربى، ميكى ، سمير، هنا لندن، الهيرالد تربيون والتايم وافريكان شالنج .. معهد جوتة الالمانى ، النادى الفرنسى، برتش كاونسل، النادى الامريكى ، نادى ناصر، كانت مزارات يحج اليها الناس. فرق الباليه والسيرك الهندى وفرق الجاز العالميه الروك اند رول واخواتها كانت تعرض بضاعتها فى الخرطوم.. حتى خرجنا من السودان كان اهل الدين فيه ارق الناس اقئدة وان شجو بالعظم، وكان من آمن بلدان العالم.. كان حكامه حتى الدكتاتوريون منهم مهذبون ومؤدبون ولم نسمع برئيس او مسؤول شتم وسب شعبه مثلما ما نرى من الغلاة الصعاليق هولاء..

Quote: اها دحين صاحبك دة عمل بالوصية دي بلا ابو حمار بلا حليمة بتاعت ديم سلك

Quote: لكن الحاجة ألما قدرت اتعايش معاها وبتدهشني لحد ما ارجع هي تخانة جلد الناس القاعدين هناك وشايفين الحاجات الفظيعة الاطبعت بيها البلد وساكتين عليها ومش كده وبس وكمان مساهمين فيها بنشاط ، اديك مثال عشان ما تقول بنجر ساي - يا خي كمية ال###### الشفته في اجازتى الفاتت فى الخرطوم ممكن تفرش أفريقيا براحه ، ال###### ده مش مخلفات الناس ؟ كيف يعني ناس ما قادرة تتصرف فى مخلفاتها

Quote: ابو النيذ بوستيك ابو اربعة ضلف دا حيرني هسه انا جيتكم كم مرة حصل طلعت مني كلمة كدا وللا كدا قلت البلد سمحة وللا شينه ولا عندنا هناك شنو وانتو ما عندكم شنو ما قاعدين نندرش معاكم شير السمكة معاكم ياخي ( اوعا تضحك ) وتيب

Quote: صباح الخير اليلة عندى مزاج ادلعك ما عارفة ليه هههههه

Quote: ناذر كل عام وأنتم بخير ...يازول الاغتراب دا الغرض منه تحسين مستوى المعيشة للرجوع للعيش في حظيرة الوطن وسط الناس والاسهام بكل وسيلة في مساعدة الناس وهذا حال هم غالب المغتربين ، والمغتربين كثير منهم يعتمد في تقييمه للأمور على الاعلام او الزيارات القصيرة للسودان ..والسودان بخير رغم ما يعانيه الناس من ضلئقة خانقة إلا أن ربك فوق الجميع ولو الارزاق على الحكومة لمات الشعب الفضل لكن لكل مجتهد نصيب وربك مقسم الارزاق ....ولربما بعض المغتربين يخطيء في التققيم إذا وقع في فخ المقارنة بين الداخل والخارج فكل بلد ظروفه مختلفة عن السودان وأزمة السودان أزمة توزيع السلطة على ضوء نظام ديموقراطي يضمن للجميع الحق في العمل والحركة والانتاج ويسمح بالمراقبة على اداء الاجهزة التنفيذية عبر انتخاب حر ..فإن زالت هذه الازمة فسيعود غالب المغتربين لأرض الوطن للشعور بقيمة الحرية والابداع في وطن معافى يسع الجميع ...فلا تحتار يا صديقي كثيراً ...تحياتي