كـلاب الكـبـابـيـش !!

Quote: رئيس مجلس الإدارة: طه علي البشير المدير العام: هاشم سهل رئيس التحرير : النور أحمد النور مستشار التحرير: حيدر المكاشفي مستشار هيئة التحرير: أمال عباس مدير التحرير: حسن البطري أغنى وأغلى الكلاب في السودان الكلاب التي استأنسها ود ابن آدم من زمان تجد في الدول الغربية عناية خاصة من الكلبة لايكا الطلعت القمرة الى كلاب الرئيس الامريكي بوش التي تسكن في الهلتون وعندها رتب عسكرية من جنرال الى ملازم ونسمع عن عروض لأزياء كلاب في انجلترا ومستشفيات خاصة فهل كلابنا في بلدنا مظلومة واللا مرتاحة.. وهل نحن بنقابل وفاء الكلب واخلاصه بالاحسان ولا بالضرب والإبادة.. اختصرنا البحث في ثلاثة انواع هي كلاب البيوت والكلاب البوليسية وكلاب الصيد فكانت هذه النتائج... «1» كلاب الحلة جرقاس واخوانه.. ü الحاجة علوية امرأة كبيرة في السن مات زوجها واولادها فقامت بتربية الكلاب مشينا ليها زيارة في منطقة الحتانة وتمتلك عددا كبيرا من الكلاب حتى سمي شارعها بشارع الكلاب تقوم بإعداد حلة الفطور والغداء وعند كلابها اسماء، والعجيب انها تحميها من الحرامية ولا تغادر حيطة الشارع والبيت وتتزاوج مع بعض، واذكر في زيارة سابقة ان الحاجة انخرطت في بكاء وعويل عندما قتلوا بعض اولادها الكلاب في حملات لمكافحة الكلاب الضالة الكلاب تسمع الاوامر ولا تفارق علوية وتحرسها بالليل والنهار ولا يدخل منزلها جار ولا بعيد اإلا بعد جهد وتصريح خاص منها. ü الحاج عبد العزيز محمود ذكر أن كلبته بعد ما قنع منها لولاداتها المتكررة وضعها في شوال ورماها خارج العاصمة الا انها رجعت ثاني للبيت في كامل لياقتها.. ü سألنا كندي جيمس عن اهمية الكلاب في جنوب السودان رد تستعمل عند رعي الابقار وفي القرى للحراسة من هجمات الحيوانات الوحشية. ü ياسر حمد النيل من اولاد ام بدة تحدث لركاب الحافلة عن كلبه الذي اشتراه من اولاد الحلة بي مبلغ 5 آلاف جنيه وباعوه للصينيين.. وقال الخرطوم ح تفضى من الكلاب لأن العمال الصينيين جنَّهم اكل كلاب. ü حكايات كثيرة عن كلاب انقذت اصحابها من الثعابين وقبضت اعتى الحرامية واهلنا عموماً بفضلوا تربية الكلاب المحلية.. ü وائل مرسال دخل مجال تربية الكلاب من السلالات العالمية وهي موضة جديدة وسط الشباب وغالبية الكلاب تأتي من دولة مصر من الوولف وهنا يباع الكلب بي 500 ألف الى مليون جنيه للجريو، ويعتني بها باعطائها أكلات معينة ومعالجتها الدورية خاصة من القراد.. ü الكلاب البلجيكية أخذت تحل محل الكلاب المحلية في البيوت للحراسة وقلَّ اهتمام الناس خاصة في المدن بالكلاب، كما قلَّ اهتمام السلطات الصحية بمكافحة الكلاب الضالة واعطاء شهادات تطعيم زي زمان، ونسمع قليلاً فلان عضاه كلب مع غلاء سعر المصل حتى اهتمام الاطفال باللعب معها وتربيتها قلَّ.. «2» الكلاب البوليسية ü وانا داخل لحوش وحدة الكلاب البوليسية التابعة للمباحث المركزية الجنائية رغم انني ما ارتكبت اي جريمة يعاقب عليها القانون الا انني (شعرت الرعشة من صوف رأسي لي كرعي) رغم فرايحية المكان والزهور والورد إلا ان احجام الكلاب وضخامتها فهي من سلالة الراعي الالماني واصوات النباح العالية المخيفة تخليك تلاوز فكرت اشيل نعلاتي وارقد صوف الا انني نعلت ابليس وواصلت.. ü الكلاب تعيش في نعيم تحت اشراف أكفأ المدربين عندها اقفاص خاصة ووجبات غذائية مفيدة تصنع داخل الوحدة. ü ومعها مدربون نالوا دورات آخرها في السودان بمشاركة دول من شرق افريقيا، فالكلاب متخصصة في مكافحة المخدرات حيث ضبط كلب 10 قناديل بنقو في ولاية الجزيرة داخل زير اضافة لحكاوى كثيرة وانجازات اخرى سمعناها. ü للكلاب اسماء معينة وهي مع ضخامتها مطيعة للمدرب شديدة مع اللصوص حيث كشفت في مطار الخرطوم شحنة قرود مجمدة في طريقها لفرنسا. ü اضافة لعملها الشاق في مكافحة ومنع السرقات الليلية تعمل في كشف المتفجرات والالغام وضبط مخالفات المخابز وحماية الشخصيات . ü النقيب د. عمار محمد الباقر نال درجات علمية في ابحاثه عن الكلاب حيث كشف ان كلاب الكبابيش السودانية افضل من المستوردة في كشف المخدرات والعمل البوليسي. ü المهم أن الكلاب تعيش في راحة وتحت مراقبة واشراف طبي حيث توجد وحدة علاجية بها احدث اجهزة الفحوصات من صور الاشعة الى الموجات الصوتية إضافة للعمليات الجراحية. ü وترد الكلاب الجميل حيث تقدم تضحيات وخدمات وانجازات ولها قصص ومواقف ممتعة وجميلة. «3» كلاب الصيد ü من المهتمين بكلاب الصيد الفنان الشاعر العائد بعد غربة وشوق بعد الغياب لحظيرة الوطن الفرجوني رجع معه كلاب صيد من اميركا وله قصة طريفة مع كلب من كلابه زمان قتله سواق لوري ولحقه الزينين فرثاه وقال.. «ما دوامة يا تمام كيوف الشارع اصلوا الدنيا معدا والمعيشة شوارع بعدما كت سبات يمينك ضارع كتلت الليلة وادردقت فوق الشارع». ü وشتم سواق اللورى الدقش الكلب وقال: «وضربك لوري عاد ينشل يمين السايقو وينحصر النفس تعدم عليه طرايقو مثل ما تف زورك قندراني يضايقو يتفو تفيق ملاح ما يلقا زولاً يلا يقو). ü ومشى من ام درمان لديار الكبابيش يبحث عن كلب وقال للشيخ المر... (جيتك وعندي فيك املاً سمح يالمر بدور كلباً من الغنم المعادي يجر مرخرخ شاكله لين ارساق واسع وقد باهي وريدو منيع ليحان وفي عرقوبه لون وقصر رقيق نايبه ابيض لونو مثل الدر شدوقه طوال ومثل الجمر عينيه حمر).. في بيت البنا ü الفنان الكابتن محمد حسن الشهير بالجقر استقبلنا بكرم وترحاب في داره بود البنا وهو -ما شاء الله- موسوعة له معرفة بما يتعلق بالكلاب كلاب القنص اوردها في كتابه الممتع ادب الصيد والقنص في السودان. ü وهو يعمل الآن في تدريب الشرطة الامنية واتحاد المصارف ويحمل شهادات في رفع الاثقال ويعمل استاذا للتربية الرياضية العسكرية. ü سألناه عن كراهية بعض اهلنا للكلاب رد وقرأ الآية يسألونك ماذا احل لهم قل احل لكم الطيبات ما علمتم من الجوارح مكلبين تعلمونهن مما علمكم الله فكلوا مما امسكن عليكم واذكروا اسم الله عليه واتقوا الله ان الله سريع الحساب)، ورفض تنجيس الكلاب فربنا ذكرها وحلل ما تمسكه من صيد اضافة لمتابعة الكلب لأهل الكهف ونومه معهم.. كذلك الرسول صلى الله عليه وسلم اكل لحم الارنب والصحابة قنصوا وحمزة كان صيادا والصيد او القنص مهنة الملوك. ü عن اصل الكلاب هي كلاب سلوقية من قرية سلوق في اليمن في السودان موجودة في دار الريح في الغرب وعند الكبابيش وعند الزغاوة يسمى الكلب (الكتيوي) وعبد الرحمن شبيكة وعبد الله كرمان من رواد مجال تحسين نسل الكلاب في السودان مع الكلاب الانجليزية. ü مهنة القنص نحن ورثناها من عمنا عمر البنا ربينا الكلاب هجناهم عرفنا نسبهم من كلب فلان وكلابنا من افضل الكلاب في العالم لأننا هجناهم مع كلاب امراء الخليج كانوا يقنصوا عندنا وولَّدنا من كلابهم سلالات ممتازة حتى الملك فيصل جاء قنص دفع لينا كلاب والفرجوني مريض بالكلاب يوضع مبالغ كبيرة جداً نستفيد منها وهي مهنة مكلفة جداً ندفع عشرات الالوف لعلاج واطعام الكلاب. ü عن مكانة كلاب القنص قال العرب تعاملت مع الكلاب كشي كريم العربي تديه كلب ما تديه ناقة وعملوا كتب اشعار في الكلاب وبيقولوا الكلاب قبل السلاح العربي لو ما اكرمت كلبو يسوق جملو ويفوت والكلب حيوان ولوف وكمان ضرب الكلب قدام سيدو حقارة مهما عمل والكلب وفي المثل جوِّع كلبك يتبعك عندنا زمان حكاية عن كلب عبدالجليل واخلاصه والكلب الاصيل اقتناؤه ما ساهل والفرجوني سافر من ام درمان لدار الكبابيش لكلب حر مثلما سافر عنتر لبلاد النعمان بن المنذر للنياق الحمر ونحن نفتخر بي الكلاب هي علامة لإكرام الضيف وانا نهرت لي كلب لي هسع زعلان عليه وحالياً في شباب دخلوا مجال تربية كلاب القنص. ü عن مواصفات الكلب القناص قال الاصيل بلون سمني لون الاسود والسرعة الشديدة ما مطلوبة ما بتنفع تهجنو مع السلوق يعطي جينات سرعة وقوة وصبر والذكر يبلغ في عمر 9-10 شهور والانثى تلد بعد 60 يوماً في بطن امه الجرو يسمى بهم يجري بعد 8 شهور وما بنخلي الانثى تحمل إلا من كلب معروف عشان ما تجيب (دشر) اصلو ما معروف كنا بنولد الدوبرمان مع الكتيوي والكلب بالفطرة بعد التدريب يعرف يقنص الصيد بدون ما يأكله.. ü أسماء الكلاب نحن نسمي زي العرب ما بتسمي أولادها صخر جلمود وابن سن مثلاً جملو اسمه السحار وعمنا البنا عندو كلاب باسم بارم ايدو والدابو لقو ومن الاسماء التمام اسم روينة وملقومة ونحلة للبخت والزيفة والصاقعة ورعد وبرق للعنكد اسماء حركة يعني ما مكن تسمي ابو القدح، وفي الضرب يسموا الكلب حاج ابراهيم اثناء تأدية اورادي اكتشفت ان الاسم هو حاج ابراهيم بمعنى جادل وليس ابراهيم بمعنى ابو الانبياء وحاج من الحج اعظم اركان الاسلام وهذا اكتشاف اعجب الاستاذ الطيب محمد الطيب في واحدة من الندوات فأهل الغرب اهل دين ما ممكن يقولوا اضرب حاج ابراهيم.. ü وقال نهتم بإطعام الكلاب في الشتاء والصيف يختلف الطعام.. اللبن وهو خشم بيوت نفضل لكلاب القنص لبن الماعز لأنو دهنو اقل واللحم ما مرغوب لأنه يردم الكلب لكن نديه كبدة في ايام القنص كحافز وخير ما تطعم الكلب هو الضلافين او الكوارع لان بها مادة في الشعر تخرج مع الدوت مثل بعض انواع النجيلة التي تخرجها الكلاب تعمل كحرجل او جردقة علاج بالفطرة وصنفوه للمعدة ونعطيها برضو الخبز الجاف او عصيدة الدخن والفتريتة (عصيدة) (بني كربو) نعوسها في الخلا عكس (لقمة) البيوت.. ü سألنا الجقر عن مكان القنص قال في الستينات الصيد كان يهاجر لمنطقة البطانة حالياً مافي صيد في ارانب بس وحبار وكنا نصيد في دار السلام ام درمان وكبري شمبات هسع الا نمشي بالعربات بعد مدني او عطبرة وما في كلب يلحق الصيد الا في الرملة لما يفرز او ينزل في شهر ستة في فترة يمرض بي دودة القذ (مرض جلدي) الكلب يلحقوا وعلمنا المهنة دي علي الفضل وعبدالجبار ابو عاجة وعندنا من الكلاب الوديع البيجيب الارنب حية او الشرس البمسك الكديس والبعشوم ونحن (بنشرع) واحد واحد عشان ما تتعارك الكلاب دي من آداب الصيد وأنا في عداء مع ناس الصيد بالبنادق والكشافات دا عدم تكافؤ نحن نصيد لنقضي لحظات جميلة في البادية اسعد لحظات لما تكون 10 كيلو ساكي ليك ارنب ونمشي للخلا معانا الخرفان ما عشان تأكل من الصيد بس عشان نسعد ونعمل شهر في القنص.. البهدد الثروة القومية ديل ناس البنادق. ü مهنة الصيد مهنة رجالية ما مهنة نسوان وما مهنة ساهلة المرأة ممكن تصطاد سمك والافندي ممكن يصطاد بالبندقية لكن ما قناص القنص محتاج لمعرفة جغرافيا والرياح وقمة سعادة القناص لما كلبو يسبق، مثلاً الفنان الامين البنا كلبه سبق الكلاب ضبح كبشين... والكلبة ما يسبق يبقى مضحكة وملطشة المهم عالم القنص عالم ممتع جداً فالأرانب تجيد التمويه.. ü سألنا عن القنص والصيد في الاغنية السودانية الحقيبة قال كثير منه عبدالرحمن الريح (لي في المسالمة غزال)، وهو خلاف (ظبي المسالمة في الخمائل حالمة، ومن الاغاني (الشادن الكاتلني ريدو) سيد عبدالعزيز في (يا جدية الصيد ما شفنا خلافك صيد) ومنها (عيون الصيد الناعسات عيوني) و (غزال البر يا راحل) عبيد عبدالرحمن واغنية عمر البنا (غزال يا غزال جيب تعال) وحكى قصة اغنية في الضواحي (قومو خلو الضيق في الجناين شوفو عز الصيد في الحساين يلى نقنص نطرد نعاين النهار ان حد الكمائن) وفي اشارة لخيانة المستعمر قال (كلبي يا جمجوم اصلو خائن شوفو كيفن يبدا اللاين هب شاله وكشح المداح).. - ودعنا الفنان الجقر ونحن نعرف ان كلاب السودان في امان..!