واحد صحبي شديد من ايام الثانوي كان عندنا عادة حلوة شوية كان كل واحد فينا لمن يصاحب ليهو بت جديدة الا يوريها للتاني نظام (أنا حبيبتي احلى من حبيبتك) وكنا كل يوم قاعدين نطلع بعد الحصص من مدرسة الخرطوم الجديدة ونمشي للمواعيد البنعملا .. الأيامات ديك ما خلينا لا كفتريا لا بقالة لا موقف حافلات او باصات ما إستعملناهو .. كنا طواالي في حالة مواعيد مع (البلي) بتاع المدارس التانية .. الجديدة الثانوية بنات والعمارات بنات وعبد المنعم المتوسطة بنات وحتى مدرسة الثريا الإبتدائية بنات ما ريحناها وخلطنا منها برضو ..
ظروفنا بتاعت ما بعد الدراسة الثانوية خلتنا نفترق من بعض فترة طويلة جدا .. بالصدفة قابلتو قبل فترة وبعد السلام والسؤال عن الاحوال قعدنا نستعيد في أيامات (مجدنا ديك) صاحبي قام قال لي : بالمناسبة دي فرصة عشان اعرفك بي حبيبتي الجديدة .. عاينت ليهو بي إستغراب وقلت ليهو : إنت لسة ما خليت العادة ديك ولا شنو ؟ قال لي ما خليتا وهسي داير اعرفك على بتي دي !! والله تشوفا غزال بس .. قلت ليو : أسمع يا اخوي أنا الشغلة دي بطلتها بدري جدا والحاجة التانية انا زااتي ما فاضي عشان أمش معاك في نص النهارية عشان أتفرج على حبيبتك .. الكلام دا كان زمان لمن كنا طلبة ، هسي بقى ما عندي وكت لي جنس دا وانا زااتي شغال بالنهار .. قال لي : يا أبو النيز ياخ بطل الحنك وانا عارفك زول بكاي والله دي تعاين ليها غزال بس وأصلو ما تزح عيونك منها تاني .. إنت بس(أرحكاكا) معاي .. قلت ليو : شنو شابكني حبيبتي غزال وحبيبتي حصان ؟! أنا بالنهار ما فاضي لو بتعمل معاها مواعيد بعد المغرب أنا بجي عشان خاطرك لكن حا تكون أخر مرة .. قال لي هي بالليل ما بتطلع لكن حا أحاول أواعدا بعد المغرب .. قلت ليو أوكي يا فردة لمن تعمل معاها مواعيدك دي أديني تلفون عشان اشوف غزالتك دي !!
بعد كم يوم ضرب لي تلفون وقال لي أنو عمل معاها مواعيد بعد المغرب وممكن اجي معاهو عشان اشوفا .. قلت ليهو إنت مصر يعني ؟ قال لي أيوة مصر .. ياخي إنت لمن تشوف غزالتي دي بتقتنع بي أخوك .. قلت ليو خلاص حا أجي إنت بس ما تقفلا معاي تشبكني غزال وبطيخ بعدين أجي القى وشها عامل زي (وش الملاح) تجيب لي نفسيات ..
08-15-2006, 12:50 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
يوم المواعيد أنا إتجهزت للزول دا قلت فرصة يا أبو النيز تستعيد ذكريات الثانوي أيام الجهل والتسكع بين الأسابيع الثقافية في مدارس البنات ... مشيت غشيت صحبي دا ولقيتو قاشر قشرة أصلو ما شفتها قبل كدة .. فنلة كت لونا اظنو أحمر طوبي ومرسوم فيها هيفاء وهبي وبنطلون جينز لونو ظهري وفيهو ستة ولا سبعة جيوب تحت الركبة وفوق ليها (نظام جلكسات) وشاكي القميص (شانقو) فووووووووووووق قريب صدرو !! .. وشعرو مجلطو ليك بي دهن ولا مصيبة كدة لمن مدفقة وسايلة في جبهتو و (ورا) إضنينو ، مجرد ما ركب العربية وشميت الريحة الكابي منها رطلين في هدومو طوالي قعدت اقح وشعرت إنو الأزمة حا تقوم علي !! قلت ليهو دا شنو العاملو في روحك دا !! هسي دي خلقة زول ما شي يقابل حبيبتو الجديدة ؟؟!! ما كان ممكن تلبس حاجة محترمة شوية ياخ !! قال لي : يا خي انت مالك ؟ غزالتي دي بتحب الموضة وإنت ما بتفهم في الموضة الايامات دي !! قفلت معاي قلت ليهو كويس أركب خلينا نتخارج نشوف (حصانتك) دي حا تجي لابسة شنو كمان !!
دورنا مشينا لي واحدة من الكافتريات في شارع محمد نجيب ودي الحتة المواعدين بعض فيها .. مجرد ما وصلنا المطرة بقت تنقط !! والبت لسة ما جات .. قلت ليهو أها هسي العمل شنو ؟ قال لي كدي موبايلك النضرب ليها ! قلت ليهو جابت ليها (إستعمار) كمان ؟ يا زول أنا ما بحب نمرة موبايلي دي تظهر في اي موبايل تاني أمشي أضرب من محل الاتصالات داك !! صاحبنا مشى وجاني بعد شوية قال لي الموبايل ما بيرد ؟! قلت ليهو هسي العمل شنو ؟ قال لي بيتم قريب بي هنا نقوم نمشي ليها .. قلت ليهو أنت مجنون ؟ أنا مباريك من سنة دو حصل يوم مشينا لي بت في بيتا ؟ولا حدنا بس الكافتريات والمظلات ؟ قال لي يا خي بتكون حصلت ليها ظروف أو ما قدرت تجي عشان المطرة . كدي النمشي ليها .. صدقني البت دي غزال وبتخاف من النسمة خلينا من المطرة ..
الزول قفلا معاي لكن قلت النمشي نشوف (غزالتو) دي .. قلت ليهو شوف هنا أكلمك من هسي أنا بقيف بعيد بنتظركم إنت تمشي ليها وتجوني سرعة كويس معاك ؟ قال لي ما مشكلة أنا متاكد هي هسي بتكون راجياني قريب باب بيتم .. عاينت ليهو بغيظ .. قلت ليو سمح يا توم كروز .. النشوف ..
دخلنا شارع بيتم لقيت في بقالة في اول الشارع قلت ليهو أنا بنتظرك في البقالة دي أمشي وتعال سرعة ما تتاخر قبل ما المطرة تزيد .. بتاع البقالة طلعت بعرفو قعدت اسلم عليهو وفي نفس الوكت عاينت ناحية صحبي (المتشنط ) وهو ماشي على باب البيت بي قشرتو العجيبة دي .. الزول دا ماشي مشية زي الروبوت لأنو لو رفع يدو لي فوق ساي للسلام حا يبوظ منظر (الشكة) دا لو ما رمى البنطلون (الشاكيهو تحت حنكو) !!
الزول بي كل ثقة ضرب جرس الباب (التقول بيت ابوهو) يعد شوية شوف عيني في حاجة كبيرة كدة زي (الصبة) جات ناطة من جوة البيت وقبضت ليك صحبي دا وبدون أي مقدمات (وقشطتو) ليك بونية رمتو اربعة أمتار لي ورا !! وشوف عيني الدهن ولا الحاجة الكان مجلط بيها شعرو لمن إتكشحت في ا########## .. عاينت للمنظر مخلوع وما مصدق قلت لي بتاع الدكان الزول دا مالو !! بتاع الدكان قال لي أوعى يكون الضربوهو دا صحبك ؟ قلت ليو ااي صحبي !! الزول دا منو ؟ قال لي صحبك دا الليلة يحلو الحلة بلة من التور دا !! عاينت للمنظر لقيت (التور دا) قابض ليك في صحبي دا وبيعمل فيهو عملية أنا أصلو ما شفتها ولا حتى في أفلام توم وجيري ديك !! (التور دا ) عامل بالضبط زي المصارعين اليابانيين في الحجم والضخامة وكان لابس ليهو سروال عريض وفنلة داخلية وبطنو لمن مدفقة قريب ركبتو .. ساموراي بس !!
08-16-2006, 07:16 AM
ناصر البطل ناصر البطل
تاريخ التسجيل: 10-14-2005
مجموع المشاركات: 2806
أول حاجه إنته متأكد إنو ده صاحبك تانيايا ما ناقش حاجه: لمايقولوا ليك الزوله دي بت أسد معناها ... أما لما يقولوا ليك الولد ده لبوه معناها ... (فهمته ) يلا أمشي نوم
11-20-2006, 04:34 PM
الفاتح يوسف جبرا الفاتح يوسف جبرا
تاريخ التسجيل: 10-31-2006
مجموع المشاركات: 1617
عمري كلو بتفرج على المشاكل والضرب البيحصل في الأسواق ومطالعات نهاية اليوم في المدارس ، لكن زي الشفتو قدامي دا أصلا ما قابلني ولا حا يقابلني !! الساموراي دا رفع ليك صحبي المسكين فووووووق من رقبتو بي إيد واحدة و(تااااااااح) قشطو كف وهو معلق لسة في الهوا لمن أضاني أنا صنت !!!.. بعد شوية مسكو من كرعينو و(رحل) بيهو كدة في الهوا (نظام طوطحانية) وبعد تلاتة او أربعة لفات (فكا) كرعينو وصحبي دا طاير في الهوا ويلفلف زي الضقل بتاع (سكج بكج) وطاااخ خبت الحيطة بي راسو ورقد زي الحطبة !!
أنا لسة مخلوع قلت لي بتاع البقالة أرح نحجز الزول دا !! قال لي إنت مجنون !! زولك دا قبل كدة الحلة كلها ما حاشتو دايرنا نحن الاتنين نمسكو ؟! أمشي براك لو داير تحجزو ؟؟ عاينت لي جهة (الحلبة) وانا ما قادر إتصرف .. (وزولنا الساموراي كان بدأ يطبق في نظرية جديدة) ..قلت ليهو هسي العمل شنو ؟ الزول دا حا يموت بالطريقة دي !! بتاع البقالة بارد جدا قال لي : لا لا هو ما بيكتل ليو زول .. لكن أمكن يعمل ليهو عاهة مستديمة ولو صحبك دا محظوط بيطلع بي كسور وجروح بسيطة أو حاجة بالشكل دا !!
غايتو ما عارف لكن زولي دا في اليوم داك إتجيه جيهة تمام .. أي نوع من انواع الدق أنا شفتو .. دق الحرامي في المولد ودق توم لي جيري ودق الجرتق ودق الدلجة ودق الريحة وكل انواع الدق المعروفة والما معروفة لي أي زول .. لكن زي جنس الشفتو قدامي دا تاني ما حا يمر علي أصلو ..
أنا أبشع منظر شفتو في حياتي كنت قايلو منظر دق( مل جبسون) في فيلم آلام المسيح لكن في اليوم داك عرفت روحي غلطان وأنا لسة جاهل في الدنيا دي وما شفت حاجة لسع !!
الوكت داك الساموراي كان قطع في صحبي كف مذدوج (بي يدينو الإتنين يعني ) من صوت الكفين أنا لمن ضروسي خلخلت !!
والشي العاجبني في صحبي إنو والله ثبت قدام التور داك (أي والله) الزول دا لا كورك لا صرخ لا إتحرك ولا إتنفس زاتو .. واقف زيو وزي أي بطل أسطوري قدام جلادينو .. بس ما عارف لحدي هسي هو ثبت قدام التور دا .. لمجرد الثبات ولا عشان هو ما قادر يعمل حاجة ولا عشان كان غمران ؟ أنا غايتو إفترضت حسن النية ونسبت ليهو البطولة ..
طبعا بعد ما بتاع البقالة حذرني قلت خلاص انا احسن اقعد في محلي وقعدت ادعو ربنا انو الزول دا يفتر من الضرب أو يكون متابع المسلسل يمشي يحضرا و(يعتق) صحبي المسكين دا .. لكن برضو كنت في دي غلطان !!
صاحبنا لا فتر لا كان متابع مسلسلة لا بطيخ
!! إستمر في مجذرتو وإنتهاكاتو لحقوق الإنسان في صحبي دا قريب النص ساعة وانا كل مرة بعاين للساعة ... وأسأل الله السلامة ..
بعد شوية الساموراي نفض صحبي دا من ا########## (قبل الحركة دي كان راميهو على ضهرو ونايخ ليهو في بطنو وشغال فيهو (هوكات) وكفوف ) قام مسك ليك الفنلة (الكط) المرسوم فيها هيفاء وهبي .. وبي جرة بسيطة شرط ليك وش هيفاء وهبي لي إتنين .. (والله ذكرني بس بي هوقن بتاع المصارعة الحرة ) !! بعد داك إستعدل صحبي بي بنية في بطنو.. ولمن داك دنقر جرا الفنلة الداخلية وشرطا برضو .. أنا في سري قلت هسي صحبي دا لو ما عبيط ساكت في داعي يلبس فنلة داخلية تحت ال تي شيرت المرسومة فيهو هيفاء وهبي !!
شلوت جا طاير فجأة كدة خلي صحبي يلف زي القرقور (وانا جد معجب بي صمودو ووقفتو الباسلة لأنو لو أنا في محلو كنت حا اكون في أحمد شرفي من الكف الاول داك) .. بعد شريط الـ تي شيرت والفنلة الداخلية الساموراي دا قبل على البنطلون وجراهو من تحت جرة واحدة (أنا مما سمعت شرررررررررررررررررط ) بتاعت الشريط طوالي عرفت إنو صاحبنا دا غشوهو وما ادوهو بنطلون الجنز الاصلي .. باعوا ليهو النوع البيجي من ليبيا بالتهريب وانا دا عارفو ما بيعيش كتير .. لكن الحمد لله الحزام الكان لابسو كان جلد أصلي لانو ابى ينقطع كلو كلو .. والله العظيم لو كان إنقطع كانت حا تكون مصيبة لانو بكل تاكيد اللباس الداخلي (البياري) ما كان حا يطلع اصلي وحا يتشرط من اول نفخة من التور دا ودي كانت حا تكون مصيبة تانية !!
08-15-2006, 01:06 PM
عادل فضل المولى عادل فضل المولى
تاريخ التسجيل: 11-28-2004
مجموع المشاركات: 2165
غايتو بعد شوية ولي سبب أنا ما قادر افهمو التور دا رفع صحبي دا فوووووووق زي الرافع ليهو مخدة .. وفكاهو ناحيتي بي كل قوتو (إتخيلو المسكين طاير في الهوا قريب التسعة امتار) !! وخبت ا########## .. بعد داك الساموراي دخل بيتم وقفل الباب وراهو (بيكون ما شي يحصل باقي المسلسل) !! سرعة سرعة جريت على صحبي عشان اهنيو على الثبات والصمود دا وأوريو إنو ما في فرق بينو وبين ثبات حزب الله في لبنان .. وبالمرة كدة اعمل ليهو عملية (إخلاء) سريعة من ميدان المعركة .. غايتو لقيت صحبي عيونو مفتحة (وما مهم لوكانت بتدور في محجريهما زي ريشات الخلاطة) المهم أنها مفتحة ودي براها سلامة ..
تكلتو سرعة كدة وركبتو العربية ورقدت ليهو المقعد عشان يكون مرتاح لمن دورت بتاع البقالة قال لي .. : عليك الله طمني عليو .. قلت ليهو سمح !!
دورت سرعة كدة ووقفت في شارع الزلط قلت ليهو : إنت كويس يا زول !! إنت سامعني !! قول حاجة إنشاء الله (أح) عشان إطمن عليك !! ... صاحبنا قاطع موية ونور قلت احسن ادور أوديهو الحوادث للإسعافات الاولية ولي قدام بمشي معاهو ناس العظام والمخ والاعصاب والأذن والحنجرة !! في الطريق قال لي : موديني وين هسي !! قلت ليهو الحمد لله مخارج حروفك سليمة ودا معناتو ما في كسور في خشمك أو (قطوع) في لسانك .. موديك الحوادث يعني موديك وين ؟ قال لي لا لا وديني بيتنا انا داير أرتاح شوية ؟ قلت ليو : ترتاح من شنو ؟ ما إنت كنت مرتاح من جبيل يدك ساي ما رفعتها وزولك دا هو القام بي الشغل كلو ؟ قال لي بس إنت وديني بيتنا !!
حمدت الله لأنو في الحوادث كان حا يقولوا لي جيب أورنيك تمنية لانو الدكتور ما حا يصدق إنو صحبي مضروب في شكلة وأنا زااتي ما بقدر أقنعوا لأني زاااتي داير اليقنعني ..
وديت الزول بيتم ورقدتو في السرير .. كانت حالتو صعبة خلاص عريان من فوق و(هاف كاست) من تحت وريحتو الجبيل ديك اتغيرت بقت ريحتو طير طير .. والشعر الكان مجلط بي الدهان داك تاني لو كتبوهو ليهو ما بيقوم خليهو من التجلط ..
جبت ليهو موية يشرب قال لي داير منك طلب : قلت ليهو إنت أفتح خشمك وقول : قال لي توعدني ما توري زول بالحصل دا !!.. قلت ليو في دي ما معاك لاني لا زم أحكي لي لأي زول عشان تكون عبرة لمن يعتبر .. شابكني حبيبتي غزالة وحبيبتي رمانة .. هسي كدة كويس ؟
قال لي بعد تنهيدة : يا ابو النيز يا خي هاك الحكمة دي .: أي غزالة اخوها اسد
صنفرة :
مشيت امبارح المسرح القومي عشان احضر عروض التخريج بتاعت كلية الموسيقى والدراما .. واحد صحبي جنبي قال لي يا أبو النيز عاين البت دي حلوة كيف ؟ عاينتها لقيتا بالجد غزالة .. قلت ليهو هي كدة اخوها بيكون كيف ؟ قال لي قصدك شنو ؟ قلت ليهو خليك من قصدي واشرت ليهو على بت تانية وشها عامل زي الإجزخانة (كلو حبوب) تطير الرحمة من البيت .. قلت ليهو هسي زي دي مالا ما كويسة على الاقل أخوها ممكن (تجازفو) !! عاين لي مستغرب قال لي يا أبو النيز دا كلام شنو البتقول فيهو دا !! إنت بقيت ...... قبل ما يتم كلامو قلت ليو : أسكت ساكت خلينا نتابع العرض لانو عمرك ما حا تفهمني !!
08-15-2006, 12:57 PM
على محمد على بشير على محمد على بشير
تاريخ التسجيل: 08-07-2005
مجموع المشاركات: 8648
الإبن ناذر المجنون سلام كلما أتضايق (والضيق كتر الأيام دي) أفتش لي بوستاتك (جمع بوست) وأقراها حتة حتة .. شكرا والله قاعد تمرقنا من حالات الإكتئاب ... عندي بت غزالة ، تجي تجرب كان عندي أسد ولا لا .... ولا التوبة يا حبوبة.....
08-15-2006, 01:11 PM
عادل فضل المولى عادل فضل المولى
تاريخ التسجيل: 11-28-2004
مجموع المشاركات: 2165
سعد الدين سلام شديد شدة بركة الجيت ولقيت البوست يا دوبك طالع من الفرن نظام قروووووووووووووض يعني زي العيش الساخن مع اجواء السودان اليومين ديل ياخ والله مشتاقين ومتابعين و.. ومتلومين كمان .... هانت خلاص
08-15-2006, 02:19 PM
mulhim mulhim
تاريخ التسجيل: 04-11-2002
مجموع المشاركات: 491
ابو النيز ياخ حمدلله الف على السلامة و الجاتك فى الفانلة و بنطلون الجينز الما اصلى سامحتك و انا كم يوم كده فاقدك اتاريكملازم السرير بترتاح من المجهود البزله اخو الغزالهقال واحد صاحبى قال ..ياخ حسى دى قصة تحكيهالكن كويسالاعتبرت بالحصل المرة دىوكان تحكى لصحابك الحضر معاكالتخريج ده ولا عايزه يشوف الاسد بعيونه
08-15-2006, 04:45 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: و انا كم يوم كده فاقدك اتاريك ملازم السرير بترتاح من المجهود البزله اخو الغزاله قال واحد صاحبى قال
شنو يا ملهم .. إنت بتشكك في روايتي ولا شنو
والله انا ما هو .. أخوك حاليا مرتبط على سنة الله ورسوله واخر عهدي بالامور دي كان سنة 95 يعني من زمن صحبي الشليق دا وانا الشلاقة خليتا من زمن اخر علقة أختها في مدرسة البشير الريح في الحلة الجديدة لكن هو ما خلاها ... لو كان قلت كلامك دا قبل عشرة سنين كان الناس ممكن تصدقك لكن هسي ما اظن
Quote: قلت ليهو هسي زي دي مالا ما كويسة على الاقل أخوها ممكن (تجازفو) !!
ذكرتني واحد عندو نظرية غريبة ومطبقا وماشة معا عارف دا كان لمن يدور يجكس ليهو واحدة طوالي يخلق ليك أي مشكلة مع اخوها وفهمو للقصة دي يقول ليك اخو البنت ما بقبل اختو تجكس واذا في يوم لقاهو مع اختو احسن تكون من الاول البيناتهم ما عامرة
كدي اديها زولك دا على الاقل من بدري يكون جس نبض الاسد
08-15-2006, 05:29 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: يا رائع يا فاكهة المنبر العام .. الله يجازى محنك والله صحكتني لما قطعت مصاريني .. دامت ايامك فرح وسعادة .. ربنا يديك العافية
بالمناسبة سمعت نكتة الثعلب والكلب
قالوا كان في كلب مضبلن عامل فيها اسد وداير يقشر قدام الثعلب إنو صياد وإنو بتاع مجازفات والثعلب شاميهو في قشرتو دي .. في يوم من الايام كان النمر راقد ورا كوم بتاع أشجار قام الثعلب جاب الكلب وقال ليهو . ورا الاشجار دي في غزالة سمييييينة إنت أمشي أصطادا .. الكلب فرح وعمل نرررررررررررررررر وقال للثعلب : شوف عيوني حمرت ؟ الثعلب قال ليهو : لا لا ما حمرت !! الكلب تاني عمل نررررررررر وقال للثعلب : كدة كيف عيوني حمرت ولا لسع ! الثعلب قال ليهو : لا لا ما حمرت .. الكلب تاني عمل نرررررر وشد عضلاتو وقال للثعلب : كدة حمرت ولا لا ؟ الثعلب اتضايق قال ليهو أي حمرت ياخ ! أمش تلب قبل ما الغزالة تمش .. الكلب طبعا تلب على اساس إنو في غزالة وقام قابل النمر بي هناك .
غايتو النمر جيه ليك الكلب زي جييهة الساموراي لي صاحبنا الفوق دا .. جلدو جلد نضيف !!
الكلب جا ليك للثعلب يترنح وحالتو صعبة خلاص .. الثعلب عاين ليهو في وشو وقال ليهو : تعرف يا كلب يا دووووب عيونك حمرت
08-16-2006, 01:50 AM
عمر عبد الخالق سعيد عمر عبد الخالق سعيد
تاريخ التسجيل: 08-14-2005
مجموع المشاركات: 2235
.. . والله مبالغة يا ابو النزيز ياخى دى اروع شمار من شهور..
Quote: أي نوع من انواع الدق أنا شفتو .. دق الحرامي في المولد ودق توم لي جيري ودق الجرتق ودق الدلجة ودق الريحة وكل انواع الدق المعروفة والما معروفة لي أي زول .. لكن زي جنس الشفتو قدامي دا تاني ما حا يمر علي أصلو ..
انواع الدق دى براها كوم .. حتى دق ميل جبسون ما نسيتو!! بس الشوفكـ دق الريحة شنو !! انتو ابتديتو التجهيزات خلاص!؟
ياخى انت ابداع .. u really made my day
يديك العافية
08-16-2006, 03:37 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
ناذر... نذر ينذر.. نذراَ... وهنالك النذير...ومناشير التقدميين.. زمان كان يكتبوا عنوانا( النذبر العريان) ..... أما نذر ينذر نذراً النذر في اللغة.. هو الوقف( نذرت نفسها فداءاً لمن تحب) ...... يا ناذر.. ناذر معناها ناذر روحو.. ليه ما ساعدت صاحبك وإنت اسمك ناذر ناذر روحو..أمال فايدة الصحبة شنو؟ أما النذير من النذارة.. هي عكس البشير من البشارة.. ..........
08-16-2006, 05:53 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
يا عمك في حاجه مفقوده هو مع المارينز و لا انتحاري .. و لا ما عندو خبر انو اخوها ساموراي .. بعدين الساموراي ده معناها بيعرف صاحبك ده او عندو مشكله معاو.. يعني من الباب للطاق كده يجي يخبتو !!! كدي امشي اسال صاحبك و اسالو من اليوم الاسود
إحتمال يكون كان شايل ليو سكينة و خاتيها لليوم الاسود
بعدين انت ذاتك ليك كم يوم ما ظاهر -- اوعك تكون ده انت ذاتك !!
نسال عاصم !! ولا مافي داعي
تهريجة: دومة مشتاقين اطنان
Quote: يا ناذر تاني لما صاحبك دا يمشي يفتش ليهو غزاله لازم يسوق معاه نوبي
عشان أعمل ليو ( باك اب ) من الساموري مش كده يا دومه
08-16-2006, 06:48 AM
محمد علي يوسف محمد علي يوسف
تاريخ التسجيل: 05-16-2006
مجموع المشاركات: 327
سلامات ناذرناذر انت متاكد ان الزول ده صاحبك شديد ساي يعني يعني ما انت لو خجلان تقول ده انت مافي مشكلة بعدين اسمع هو الزول ده قال لي اخو البت شنو اوعا يكون قال ليهو اختك حبيبتي دي وين لانو عندنا واحد صاحبنا ملرة عملها لي واحد كان جانا زيارة في الجامعة وقام صاحبك خش فيه عرض وشبكو ليك الجكس وانا جكسيني واوريك حبيبتي وشنو شنو في الاخير طلعت حبيبته اخت الزول الجا زاير ده لكن الزول طلع عاقل بعدين صاحبنا زاتو كان كبير وضخم وبتاع مشاكل فداا ساعدن و و و و و و الشباب وقعو للزول اعتذارات وجرسة وكدة الجميل انو الزول ساق معاه اخته وبعد شهر جاتنا البت راجعة لكن محننه من تحت لي فوق تمت السنة ديك وخلت الجامعة لظروف الحمل والولادة .
08-16-2006, 07:20 AM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
ياخي قصة لذيذة بشكل عجيب لكن الفردة بتاعك دا اظنو ياناذر البت تكون قالت ليهو ياخي لازم تنضرب قدامي من اخوي عشان انا عاوزة اعرف انت ممكن تصبر عشاني ولا مابتصبر عشاني
صنفرة: وين صاحبك دينق
أبوفتحية
08-16-2006, 08:09 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: يا ناذر.. ناذر معناها ناذر روحو.. ليه ما ساعدت صاحبك وإنت اسمك ناذر ناذر روحو..أمال فايدة الصحبة شنو؟
قالوا المساعدة حسب المقدرة ... هسي عليك الله بعد القصة الحكيتا ليكم فوق دي كان في مقدرة لي أي مساعدة أنا والله حسب مقدرتي إتشاورت في أمرو مع سيد الدكان وجيت عملت ليهو اخلاء من الميدان وكنت داير اوديهو الحوادث ووديتو بيتم وشربتو موية وفي النهاية طلعت بي حكمة بليغة بتقول (أي بت غزال اخوها اسد)
أها أكتر من دا يساعدوهو كيفن
08-16-2006, 08:31 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: لانو عندنا واحد صاحبنا ملرة عملها لي واحد كان جانا زيارة في الجامعة وقام صاحبك خش فيه عرض وشبكو ليك الجكس وانا جكسيني واوريك حبيبتي وشنو شنو في الاخير طلعت حبيبته اخت الزول الجا زاير ده
والله ما تشوف المتداخلين الكتار ديل هنا .. أنا متاكد أنو كلهم بيكونوا مروا بي موقف زي دا وأمكن انجلدوا فيهو لكن ما دايرين يحكوا ساكت .. من أكبر واحد في البورد (أظنو صديق الموج) لحدي أصغر واحد (أظنو ناجي الملك)
عليك الله خليهم يحكو بدون خجل
08-16-2006, 08:39 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: تروتو ... Quote: ابومحمود ازيك.. البوست دا كاتبو أبو النيز ... عندك اي موضوع مع ابو محمود امشي ليهو في الماسنجر بتاع ال أم اس ان عشان هنا في باندويثات قاعدة (تهرق) في جنس كلامك دا
ناذر انت مالك.. اسى انا جيتكم فى بيتكم ولا جيتكم فى بتنا ؛ مش منبر بكرى انا حر … بعدين ياخ انت بعد عمليتك فى الزول الدفعه ده عندك خشم ياعديم الضمير .. والناس منتظرنك مهند بكون دينو طلع…
يا ناذر مرة اخوك مقدم غزالة باكستانية لى عمارتم، واقفين بنتونس جمب الصانصير، يفتح الصانصير ويطلع ابوها من الصانصير..وقف دقيقة كدى حدرليها وحدر لى، وcheeew الغزالة تدخل الصانصير وتخلينى واقف مع ابوها...والله يا ناذر بقيت اشوف ابوها زى الملا عمر بتاع طالبان...غايتو ربك رب الخير اظن ابوها اتزكر this is Canada, not Pakistan, otherwise, كان حصلت صاحبك
Quote: أي نوع من انواع الدق أنا شفتو .. دق الحرامي في المولد ودق توم لي جيري ودق الجرتق ودق الدلجة ودق الريحة وكل انواع الدق المعروفة والما معروفة لي أي زول .. لكن زي جنس الشفتو قدامي دا تاني ما حا يمر علي أصلو ..
في دقه اسمها "عجوز سدت بابها". ان شاء الله من ضمن الدقات الشفتهم ديل...
08-16-2006, 10:35 PM
عصام الطيب حسن عصام الطيب حسن
تاريخ التسجيل: 11-17-2005
مجموع المشاركات: 63
جلبت هذه المداخلة من بوست الدكتور نزار لما لها من علاقة بمعنى الاسم (ناذر) و (نزار) .
Quote: العزيز ناذر الزمخشري كان ناذرا، ووفى بنذره، وجاور حتى لقب بجار الله. ظني أنك أنت أيضا ناذر في الخير مش نزار. قالوا نزار معناها (قليل)*، عشان كدة الناس الـ بنادوني (نزار الدين) بيحيروني فعلاً ولا أملك موافقتهم أو معارضتهم فقط أشرح لهم معنى ما قالوا!
* جاء في لسان العرب في سبب تسمية جد الرسول صلى الله عليه وسملم نزار بن معد بن عدنان، أن أباه (معد) رأى نور النبوة في وجهه فأولم ولائم كثيرة حتى قيل له: لقد أسرفت، فقال: إن هذا نزار في حق هذا المولود، يعني قليل في حق المولود!
08-18-2006, 01:07 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
أضحكتني لمن قربت ادردق جنب سيد الدكان أقوليك حاجة القطعة الكوميدية دي حجزناها لي مسرحيتي الجديدة انا كلمتك ماتمشي تبيعة لي بدرالدين شنا ولا جمال حسن سعيد الا اجي ادقك دقة صاحبك براك شوفتني كيف وبعتذر عن عدم رجوعنا ليك تاني وتوقعنا حضورك في افتتاح معرض عصام قلت شنو نمضى العقد ؟؟؟؟
08-18-2006, 02:13 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24916
Quote: أضحكتني لمن قربت ادردق جنب سيد الدكان أقوليك حاجة القطعة الكوميدية دي حجزناها لي مسرحيتي الجديدة انا كلمتك ماتمشي تبيعة لي بدرالدين شنا ولا جمال حسن سعيد الا اجي ادقك دقة صاحبك براك شوفتني كيف وبعتذر عن عدم رجوعنا ليك تاني وتوقعنا حضورك في افتتاح معرض عصام قلت شنو نمضى العقد ؟؟؟؟
ما عندك مشكلة تشيلا طوالي بس حضر الكاش
والله أنا شفتك كيف لكن والله ما تسوى حاجة قدام الساموراي داك
بعدين ياخي تعال هنا ذكرتني إنت مشيت وين يوم إفتتاح المعرض !!
أنا جيت وسألت منك قالوا لي السني جا مستعجل شديد وحتى بالإمارة ما لقى المقص عشان يقص الشريط قام شال الشريط معاهو وإتخارج عشان يقصوا في بيتم بي رااحتو
08-18-2006, 03:08 AM
عصام الطيب حسن عصام الطيب حسن
تاريخ التسجيل: 11-17-2005
مجموع المشاركات: 63
Quote: يا اخوانا السرق باصويردي منو وكتب بيهو القصة دي !!
انت قايلة قصة 00 اصبر لي انا بوريك الزول بتاع النظريات العكسية دا فهمو للدنيا دي كلها عكس يقول ليك اذا جاتك نزله استحما وامشي عكس الهواء تبقى كويس ياخي مره في واحد اخونا كدا بحاحي لي في واحدة وما خلى حاجة تقربو منها الا وسواها اها جاء مغترب جاهز كدا واتقدم ليها وادوها ليهو طوالي اخونا تعب خلاص وبقى يجقلب وقعد يحكي لينا و وو وانا وانا قام صاحبنا الاتجاه المعاكس دا قال لي اسمع ما عندك أي مشكلة انا بفش ليك غبينتك دي بس عايزك يوم الحفلة تجي قاشر وتعمل فيها الوضع عادي والولد روحك رياضية والباقي سيبو علي وجات الحفلة والعريس قاعد ليك جمب الحاجة اخر انبساط والناس تبارك والمزك راشح بعد شوية العريس قام يبشر والحريم يزغردن والجو ولا اروع يقوم صاحبنا الاتجاه المعاكس يعمل فيها الولد عايز يشارك ويعبر عن مشاعرو ويقوم يشيل ليك العريس ويلف بيهو زي هداف البطولة وفجأة يعمل نفسو اتعتر ويجيب ليك العريس دا من فوق ارضا زي بتاعين المصارعة ديلك تماما ياخي انا من شفت ليك كرفتة العريس بي ورا ضهرو شايلها الهواء والزول دا نازل بيهو عمودي قلت خلاص فقهو فقهو ياناذر العريس دا لمن وقع قال جغ وكتم واتكوم حتة واحدة الناس جرت على العريس يجبدوا ويفرتكوا فيهو بقى زي النضارة لمن تقع وتعفصها بدون قصد غايتو العريس بدلتو اصلية ما جاتها أي عوجة وزولنا وسط الزحمة ديك كب الزوغة والشي المتاكد منو العريس دا اليوم داك ما دخل على عروسو
08-18-2006, 04:33 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
زماان الرومان كان عندهم إختراع كدة بيدكوا بيهو الحصون والقلاع والسفن وهي في نص البحر وكان أقوى سلاح في العصر داك ,, الإختراع دا إسمو (المنجنيق) أها لولا إنو المنجنيق إنقرض كان دا حا يكون الشي الوحيد الممكن إتدخل بيهو عشان اساعد صحبي دا
تقول لي طوبة .. بعدين انا زااتي أشتر وما نياش ولو فكيت طوبة في إحتمال أنيش صحبي دا يقوم ينسى الكوجنة الكوجنوها ليهو ويعملني سبب
08-18-2006, 04:34 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: ياخي مره في واحد اخونا كدا بحاحي لي في واحدة وما خلى حاجة تقربو منها الا وسواها اها جاء مغترب جاهز كدا واتقدم ليها وادوها ليهو طوالي اخونا تعب خلاص وبقى يجقلب وقعد يحكي لينا و وو وانا وانا قام صاحبنا الاتجاه المعاكس دا قال لي اسمع ما عندك أي مشكلة انا بفش ليك غبينتك دي بس عايزك يوم الحفلة تجي قاشر وتعمل فيها الوضع عادي والولد روحك رياضية والباقي سيبو علي وجات الحفلة والعريس قاعد ليك جمب الحاجة اخر انبساط والناس تبارك والمزك راشح بعد شوية العريس قام يبشر والحريم يزغردن والجو ولا اروع يقوم صاحبنا الاتجاه المعاكس يعمل فيها الولد عايز يشارك ويعبر عن مشاعرو ويقوم يشيل ليك العريس ويلف بيهو زي هداف البطولة وفجأة يعمل نفسو اتعتر ويجيب ليك العريس دا من فوق ارضا زي بتاعين المصارعة ديلك تماما ياخي انا من شفت ليك كرفتة العريس بي ورا ضهرو شايلها الهواء والزول دا نازل بيهو عمودي قلت خلاص فقهو فقهو ياناذر العريس دا لمن وقع قال جغ وكتم واتكوم حتة واحدة الناس جرت على العريس يجبدوا ويفرتكوا فيهو بقى زي النضارة لمن تقع وتعفصها بدون قصد غايتو العريس بدلتو اصلية ما جاتها أي عوجة وزولنا وسط الزحمة ديك كب الزوغة
إتخيلت المنظر عشان كدة من هسي في يوم عرسي كراعي دي ما برفعا من ا########## كلو كلو واي زول داير يتشبر من هسي يشوف ليهو عرس تاني
Quote: والشي المتاكد منو العريس دا اليوم داك ما دخل على عروسو
Quote: إتخيلت المنظر عشان كدة من هسي في يوم عرسي كراعي دي ما برفعا من الارض كلو كلو واي زول داير يتشبر من هسي يشوف ليهو عرس تاني
غايتو لو في واحد جاء عايز يشيلك يبقى هو صاحبي الاتجاة ذاتو 00 اعمل حسابك وفشق وخليك قريب من ا ل ارض كإجراء احترازي لحدي ما نجي نلحقك ومايهمك كل يقرب عليك زيد قربا الى الارض انشاء الله تبقى زي ناس الاكروبات مش احسن من ما تدخل نهائي
Quote: لكم بيكون مالو
08-18-2006, 01:32 PM
saadeldin abdelrahman saadeldin abdelrahman
تاريخ التسجيل: 09-03-2004
مجموع المشاركات: 8857
يا ابو السعود انت قاعد لي في البلد السمحة ديك وما جايب خبر ياخوي العرس اليومين ديل بختلف ما زي عرس ناس زمان داير ليهو تجهيزات خاصة استعدادات مبكرة شي تمارين سويدي وصالات مغلقة وقوات حراسة خارجية وقوة حماية شخصية هسه يجي زول زي المعاكس دا يصيب العريس في مقتل ويبوظ كل شي في لحظة ما مكن ياخ ابو النيذ دا دايرن عرسو يكون زي عرس امير ولز
08-19-2006, 09:26 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
تتصور بداع الدكان دا انا ما بلومو لأنو الظاهر الفلم د هو دخلو لوج كم مرة .. الزول ما كان متفاعل مع الحدث نهائي .. يعني تخيل وانا بتفرج على المذبحة.. بتاع الدكان دا كان ما شغال بي حاجة وكمان فتح تلفزيونو عادي وقعد يتفرج على المسلسل وما متفاعل معاي نهائي ..
Quote: قلت االراجل قاليك وديهو البيت عشان إرتاح....تعرف إنت مجنون ويوم بتودر ليك روح زول يكون عنده إرتفاع فى الضغط......................
تعرف ذكرتني بي بورداب (دولة شقيقة) في واحدة من تجمعاتم إتكلموا عني وقالو ناذر دا غياااااااااظ وكتاباتو بترفع الضغط وهو قاصد كدة ، واحد من الجماعة إعترض قال ليهم أحسن حاجة إنو بيرفع ضغط الناس البيقصدم ناس ......... و ......... و ........ وما عندو مشكلة مع ناس غيرم ..
تتصور انا بعد الشمار دا جاني ومعاهو لستة الأسماء القالو عني كدة طوالي قصدتهم وبقيت ادخل ليهم في بوستاتم وارفع ضغطهم بي مناسبة وبدون مناسبة (عشان يآمنو) لمن هم قالو الزول دا جن ولا شنو وكل فترة يجيني خبر إنو الجماعة متغيبين من المنبر ولما اسأل بيقولوا لي (والله الايامات دي موعوكين شوية)
صنفرة :
اها من هسي أي زول عندو مشكلة في ضغطو ما يخش بوستاتي .. كفاية علينا انو الصفحة الاولى من المنبر بقت عاملة زي شواهد القبور
يا خي عليك الله المرة الجاية لو داير تعقب على البوست إستعمل أيقونة (أضف رد) القاعدة تحت وما تستعمل أيقونة (رد) الجوة البوست عشان المداخلة تجي بالترتيب وما تتشنق فوووق كدة زي السفة
Quote: يا ود باللاي عليك الكلام ده حقيقة؟
باقيلك صعبة على الزول المرسوم في الصورة دي
10-20-2006, 05:30 AM
محمد احمد سنهورى محمد احمد سنهورى
تاريخ التسجيل: 07-31-2006
مجموع المشاركات: 367
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناذر محمد الخليفة
ناصر البطل
الفاتح يوسف جبرا
عادل فضل المولى
على محمد على بشير
معتز تروتسكى
طارق أحمد أبوبكر
Gaafar Ismail
Khalid Osman Jaafar
حيدر حسن ميرغني
saadeldin abdelrahman
mulhim
أحمد الشايقي
doma
عمر عبد الخالق سعيد
aosman
أبوبكر حامد الأمين
Ahmed Mohammed Osman
بدرالدين شنا
فيصل نوبي
محمد علي يوسف
الصادق صديق سلمان
إدريس البدري
معتصم دفع الله
Yassir Tayfour
محمد سنى دفع الله
ناصر محمد خليل
munswor almophtah
صلاح الأحمر
محمد احمد سنهورى
فيس بوك
تويتر
انستقرام
يوتيوب
بنتيريست