ياخ والله ما عرفتو دا دكتور أسنان ولا بتاع بنشر !!
كرهني اليوم المشيت فيهو ليو وكرهني الدكاترة والمهن المجاورة !!!
معليش يا شباب ما قلت ليكم إذيكم لكن حالتي تحنن والله !!!!
جايي من دكتور أسنان ... والله عمل فيني عملية بطالة خلاص !!! الراجل دا انتهك فيني حقوق الأسنان (هي قصدي الإنسان) بطريقة بشعة خلاص ... دارفور شنو !!! والجنوب شنو قصاد العملو الراجل دا !!!
جبيل الصباح إتصلت بي ناجي الملك عشان يوريني دكتور الأسنان القاعد يمشي ليهو .. وطبعا ناجي دا شغال الأيامات دي في سنونو شغل نضيف !! أها قلت حايكون خبرة في الشغلة دي وعارف الناس الجضيمين بتاعين الشغلة دي !! أها ناجي وصف لي الدكتور القاعد يمشي ليهو !! قمت مشيت الحتة الوصفا لي وما لقيت العيادة القاصدا ناجي ... قلت لي نفسي بلا ناجي بلا بطيخ !! أخش لي أقرب دكتور وإنتهي من الشغلة الفارغة دي !!!!
وأنا أساسا عندي زي ضرس كدة (مقرقر) ومشكلتي إني بخاف موت من دكاترة الاسنان من زمان لكن قلت رمضان قرب ولا زم( أزبط) الضرس دا لزوم العضة وكدة !! لإنو أخوكم بقى الأيامات الفاتت دي لو دخل في قدومو بسبوسة ساي الضرس بقى ما يطحنا !! المهم طلعت من الشغل رغم إنو أخوي الكبير حذرني من المشي لي دكتور الأسنان ووراني ضرسو البايظ الليو قريب الخمسة سنين وهو حالف ما يفتح خشمو دا لي دكتور عشان يدخل ليو العدة ديك !!!
ما سمعت الكلام وقلت ليو إنتا خواف براك.... وطلعت من الشغل ومشيت براي لي قدري ولمن تعبت من فتيش دكتور ناجي الملك داك لقيت لي لافتة في الشارع مكتوب فيها (دكتور فلان بطيخ الكبكي .. أخصائي أسنان جامعة ميونيخ الدنمارك ولا ألمانيا ما عارف مع كمية من الزمالات ملصقا في اليافتة ) !! أنتو طبعا عارف حنك الدكاترة بتاعين السودان .. المهم إتوكلت ودخلت العيادة ...
العيادة فاااااضية قاعد فيها الدكتور الله ورقبتو يمين لما شافني ما صدق (فت) نط من الكرسي بتاعو ور مى الجريدة الكان بيقرا فيها (أنا من ما لقيتا جريدة الدار عرفت الشغلة بايظة ..) وسلم علي بحرارة جدا وقعدني في الكرسي لمن انا شكيت وقربت أسألو (اللخو !! بتعرفني ولا حاجة!!) بعد داك قعد يسألني أسئلة سخيفة خلاس قال لي إنشالله خير !! .. قلت لي نفسي هسي لو خير كنت بجيك !! قلت ليهو لا لا خير بس عندي ضرسي دا تاعبني شوية ... بالله قلت ليهو كدة طوالي مسك الشواكيش والمنافيخ الصغيرة ديك وطوالي داير يحشرا لي في خشمي !!
إتخلعت جد جد والله .. وإتلفتا في العيادة لقيت ما في أي زول غيري ... قلت ليهو دقيقة يا دكتور مش المفروض الشغلة دي تتم في الكرسي الطبي داك .. إتلفت كدة وشاف الكرسي (والغريبة إنو إستغرب زي التقول اول مرة يشوف الكرسي هناك) !! قال لي خلاس أرح هناك !! مشيت للكرسي وأنا مستغرب من الحاصل شكيت قلت أمكن دا ما الدكتور .. يكون دا الشغال هنا ولا أمكن دا الزول البيجيب ليهو التلج !! داير أقول ليهو وريني بطاقتك إتراجعتا ي أخر لحظة ..!!!
المهم قعدت قدامو وفتحت ليهو خشمي وهو بيهبش (زي الخروف الدايرين يشوفو عمرو في عيد الضحية) !! يقوم الراجل يدخل ليك معلقة ومنفاخ صغير وشوكة ومفك وحاجات كتيرة !! عايز إتكلم معاو لقيت خشمي ملان بالعدة ديك !! المهم صبرت والراجل يطنطن وينقرض في سنوني (التقول داير ياكل بيها هو) !! طلع لي نصهم بايظات والنص التاني قال لي ديل منقرات (منقرات دي لي هسي ما فاهمة !! أسنان ولا حيطة جالوص هي !!؟؟)
أداني فرصة وطلع المعالق من خشمي .. كست للحوض عشان ابصق فيهو ما لقيتو ...!! والله لو ما الإحترام كنت بصقت ليو في .......... !!!
قلت ليو أنا متأكد انو اسناني دي كويسة وكل مشكلتي في ضرس واحد وإنت لحدي هسي ما قلت لي الحاصل عليو شنو !!! الراجل قعد يتفلسف لي عن إنو مفترض أعمل لي حشوة علاجية وبعد داك حشوة مؤقتة وبعدا حشوة فضة لإنو البيضا بتتفك .. وإذا ما نفع حا يقوم يعمل لي عملية كتل للجذور بتاعت الضرس ولو الضرس إتقرقر زيادة إلا يقوم يقلعو مرة واحدة !! وفي الحالة دي يقوم يعمل لي زراعة ضرس !!!
هو بيتكلم وانا بسمع فيهو زي الطيرة !!! يدخل مرة كلمة إنجليزية ومرة كلمة روسية ومرة عربي اوتومسفيري زي بتاع ناس شعر الخواض داك !! ومرات بدخل ليو كلام كدة أظنو راندوك بتاع قبيلتم !!!!
في النهاية منتظر مني رد !! مع اني ما فهمت منو حاجة .. قمت سألتو قلت ليو الكلام بتاعك دا بياخد كم من الزمن كدة !!! قال لي حوالي تسعة شهور لحدي ما نتأكد من حالة الضرس ..؟؟؟ تسعة شهور ؟؟!!! الدكتور دا قايلني حامل يا ربي ؟؟!! ما ضرس يا يحشوهو يا يقلعوهو تسعة شهور شنو وبطيخ شنو !! لو مشيت بعدين جنب سينما النيلين وعملت لي شكلة ساكت بتجيني بنية طايرة وأخلص من الشغلة دي !! بعدين رمضان قرب وأنا محتاج للضرس دا وبالطريقة القالا دي إلا إنتظر رمضان البعد الجايي !!
عاينت ليو كدااااا !!!!! قلت ليو بتعرف تحشي ضرس ؟؟!! إستغرب !!! قال لي أيوا !! قلت ليو أحشي لي الضرس دا لحدي ما النشوف البيحصل شنو لي قدام !! قال لي أحشيو ليك عجينة بيضاء ولا فضة ؟؟!! إتضايقتا قلتا ليو : إنشالله احشيو دكوة !! المهم خلينا نخلص من الموضوع دا بالله !!! ....
صنقعت للراجل وأنا يادوووووب عرفت اخوي الكبير ما بيحب دكاترة الأسنان لييه !! لأنهم براييين والواحد كلامو كتييير تقول حلاق ولا سواق تكسي ماعارف !! المهم صاحبنا جهز العدة حقتو وبدا الشغل .. دور لي جوة خشمي دا المكنات بتاعتو ديك وانا أسمع ليك فرررررررررر و كررررررررر و زنننننننننننننننن دي في نص راسي لمن ما قادر إتنفس .. شاعر إنو الزول دا بيحفر في حاجة وفي زي صنفرة شغالة ولا مبرد ما عارف! وانا فاتح خشمي ما قادر أقول بغم !! بعد شوية وقف التنقيب وانا صدعت ما شايف القدامي !! قال لي في ضرس تاني مسوس !! زعلت تفيت الفي خشمي وقلت ليو دا إلا سوستو إنتا هسي !! عليك الله أحشي لينا الضرس القدامك دا !!! الدكتور إتخلع ويادوووب عرف إني جادي في مساختي المعاهو من الأول وكان فاكرني بهظر معاو !! المهم مد شلاليفو وجاب العجينة دخلا في الضرس وقال لي عضي عليها .. أنا طبعا زعلان منو (ما عرفتو دكتور أسنان ولا طهار بي شغلو الحار دا!!) ويادوووب عرفتا الأطفال ما بيحبو دكتور الأسنان لييه !!! المهم قبل ما هو يطلع يدو من خشمي عضيت الحشوة (بسرعة) ويدو لسة جوة وجات في طرف صباعو لمن الجونتي الطبي بتاعو إنشرط في الطرف (طبعا أنا عملتها قاااصد) .. زحا يدو وقال أحححح .. بي سري قلت ليو : أحححح يا إبن الـ ............
المهم قمت من الكرسي وراسي لافي وداير أقع في ا########## ! قلت ليو داير كم يا أسطى ( قلت ليو ياأسطى عديييل.... بلا دكتور بلا بطيخ) لإني متأكد شغلو الإشتغلو دا لو كان مشيت لي أقرب نقاش في السوق العربي ولا ساعاتي في الأفرنجي كان بيشتغلا أحسن منو بدون العدة الكتيرة دي .. ما هي كلها معجون زي معجون القزاز وبيتليس فوق الضرس وبيصنفروا الشغلة على كدة .. قال زمالة جامعة كوبنهيجن قال !!!
الراجل طلع ورقة وقلم وقال داير خمسين الف !!!! قلت ليو : لييييييه حساب هو ولا كوار !! كدي فصل لي القروش دي !! صاحبنا قال 25 ألف اجرة مقابلة الطبيب (اللي هو زاتو) والخمسة وعشرين التانية أجرة الحشوة !!!!
بالله شوف !!! طيب الطبيب ما إنتا زاتك !! وقابلتك .. دي دايرا ليها أجرة ؟؟!! خلاص فصل لي الزمن بتاع مقابلتي ليك وزمن الحشوة عشان أدفع لي كل واحدة براها ؟؟!! الراجل قايلني بهظر لكن حمرت ليو كدة قام هرش و قال بي سرعة : لكن عشانك جيب أربعين الف عشان انتا اول مرة تجينا !!
بالله !!!!! التقول تاني حا أجيهو !!!
دفعت ليو القروش وطلعت شايف نجوم السما في عز سخانة الخرطوم دي !! وراسي كلو يزن زنننننننننن ويا ريت الموضوع لو انتهى على كدة !!!
طلعت برة لقيت شافع دقش بي عجلتو العربية بتاعتي بي قدام وكسر مراية الجنب ... وقعد يتلفت كايس لي !!! لمن قربت قال لي دي عربيتك !! قلت ليهو أاااي وإنت كسرت المرايا بتاعتا وسعرا ما اقل من 200 ألف جنيه وحا أشيل العجلة دي أختها معاي لحدي ما ابوك ولا امك يجو يدفعوا لي قروشي .. وعملت نفسي زي الداير أرفع العجلة في العربية !!! الشافع قرب يبكي عشان أخليو وانا راسي زاني وداير إتخارج .. قلت ليو .. خلاص طير من قدامي وتاني ما القاك في الشارع دا تاني (التقول شارع ابوي) مع إني زاتي ما ساكن في الحلة ديك !! ودورت جيت البيت دايخ وهسي يادوب فقت وقلت حكي ليكم القصة دي عشان تاني تفكروا مليون مرة قبال ما تمشوا لي دكتور أسنان ..
تخريمة :
طبعا ما كل الدكاترة سيئين زي صاحبنا السمكرجي دا ... ويقال أن دكتورات الأسنان كلهن كويسات .. لكني حالف تاني ما أمشي لا لي دكتور لا لي دكتورة !!
حرب ضروس يا ناذر تحية ليست ضريساء انت حكاية الاضراس القايمة اليومين ديل دي شنو..؟ انا ذاتي عندي ضرس عقل اكتشفت فجأءة انه نصف ضرس قلت امشي مستشفي المجانين (التجاني الماحي) اشوف الحكاية دي عندها تأثير على جهة المنشأ (العقل) يعني ما لقيت زمن قمت غشيت مستشفي الاسنان في شارعنا بتاع الشغل يعني ..بعد الاجراءات الأولية التسجيل وكدا قام عمك الفي باب العيادة اداني نصيحة لوجه الله انو الزمن جرى وانو الدكاترة في وقت زي دا ما بقدروا يشتغلوا وانو وانو وقعد يكسر في التلج وبين كل تلجة واختها شابكني يا مولانا ..يا مولانا في النهاية قال لي انت ادخل لكن انا مقتنع لو جيت بكرة بيكون أفضل قلت جزاك الله خيرا لنجرب الدخول ودخلت ولقيت واحدة دكتورة (Full Madame) رحبت بي بطريقة ودودة وسالتني بكل اريحية أها يا (عادل) بي الاسم كدا (شافتو في الورقة) بتشكي من شنو قلت ليها الضرس الاخير - التحت ولى الفوق التحت يا دكتورة قامت جابت ليها ملعقة صغيرة كدا في قدوما مراية وبي الراحة كدا كشفت على اخينا العقلاني وقالت لي - دا ما بنقدر نعمل ليك ليهو حاجة لكن بنحولك لي العملية يا ساتر - لا ما تخاف ما فيها حاجة ..اها عندكم هنا ولى في المستشفى الكبير قالت لي لا هنا في قسم الجراحة الصغرى (المهم حاجة زي كدا) وكتبت لي ورقة لقسم الاشعة وورقة لي ناس العملية ومشيت ليهم يا سيدي آخر احترامات وظرافة وذوق رغم انو الساعة فاتت الثانية وقام الشاب الظريف عمل الصورة واخوك قاعد تحت التكييف لحدي ما استلمها وهو كل ما مرة يبتسم ويقول اصبر شوية ..هسى بتطلع المهم كملت الحاجات ورجعت لي ناس الجراحة قالو لي تعال بكرة الخميس (28/9) بدري عشان العملية اها بالليل دا انا ماشي اكتب الوصية وأطمئن ام محمود لأنو المقادير ما معروفة وقبل كدا في زول مات في حادثة ضرس وانا ذاتي سافرت عزيت فيهو ..أها ما أطول عليك سلامي للجميع بدون فرز وكان ما اتلاقينا في الدنيا دي العفو والعافية من ناس المنبر كلهم
09-27-2005, 01:48 PM
Khalid Osman Jaafar
Khalid Osman Jaafar
تاريخ التسجيل: 01-18-2005
مجموع المشاركات: 1031
تعرف .. البنشرجي دا لو كنت غفلت منو شوية ولا أداني بنج كنت ما حا الم في اي سن ، والمشكلة غنو كان حا يتاجر بي .. يعني أمكن عادي يقلع مني سنوني ديل ويمشي يزرعن لي واحد تاني
ود عكر ما بتعرف سوق القانص !!!!
Quote: دا وين ومتين عملو .و صلتو شنو بام دفسو؟
دا اكبر سوق حرامية في الخرطوم ودول سيكافا !!! مكانو في العشش القديمة بتتباع فيهو اي حاجة وممكن تشتري منو اي حاجة ... بعدين عادي جدا يتسرق منك مسجل ولا تلفزيون وتجي تلقاهو بيبيعوهو هناك .. وكان طرت ولا ركيت ما بيرجعوهو ليك إلا تدفع حاجة رجالة كدي بعدين الشي الماحاتصدقوا غنو هناك في شية ولحوم بتاعت كلاب (أاي كلاب عدييل كدة) وبيضبحوها في حتة قريبة والناس عارفة غنها لحوم كلاب وبعد دا بتشتري !!!
الخال ود الموج !!!
Quote: والله انا مشيت هنا لى دكتور مصرى قال لى نعمل ليك حشوة موقته وبعدين
نعمل ليك جسر بورسلان فاخر مش حا يتاثر بى حار والا بارد والتكلفة 1850 ريال
سعودى قلت ليه ياخى جسر جوى لافغانستان مابيكلف كده بعدين لو حشيتو استكازوا
والا كافيار برضو غالى وزى ما قلت يا ناذر بونيه فى صف غاز امجاد يحل المشكلة..يعنى
اقطع تذكرة رياض خرطوم رياض 1200 وشكلة فى صف الغاز مجانا وارجع ويكون منها
حج وحاجة واعيد مع اهلى كمان..
1850 ريال دي لو انا عندي هنا بشتري لي خشم كامل بدل الجسر دا
بس شرط إنو خشمي ما افتحو للأخر للنجوم دي يعني أحدي الظاهر في الصورة كفاية ..
ظلموك لو يقولوا الدر شبيه اسنانك
صنفرة :
قال ليك في جعلي ضرسو مووجعو مشى للدكتور وزعلان من الضرس .. الدكتور قال ليهو أقلعوا ليك ؟؟ الجعلي قال ليو : لا لا أقلع اخوانو وخليهو ينبح براهو متل الكلب
09-28-2005, 01:58 PM
محمد ابو القاسم
محمد ابو القاسم
تاريخ التسجيل: 03-22-2005
مجموع المشاركات: 690
Quote: قال ليك في جعلي ضرسو مووجعو مشى للدكتور وزعلان من الضرس .. الدكتور قال ليهو أقلعوا ليك ؟؟ الجعلي قال ليو : لا لا أقلع اخوانو وخليهو ينبح براهو متل الكلب
واحد يا صاحبنا ضرسو ينتح يومين عشان اكل ليه طحنية..قام مشى الدكتور قلع الضرس
وجاء شايله فى منديل..ووحاتك يا ناذر جاب طحنية بى جنيه(زمن الجنيه جنيه)
وحشر الضرس المقلوع داك فى نصها وقال ليه ياود الكلب ضوق العذاب براك،،،
09-28-2005, 03:46 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الف حمد الله على السلامة والجاتك في ضرسك سامحتك، وبعدين اعمل حسابك الضرس بلحس عديل عديل كده وانا سمعتو بي اضاني دي ما جابو ليه قالوا في مراة في الثورة جاها وجع ضرس بالليل ودوها الدكتور تاني يوم ماتت الله يرحمها ويحسن اليها، فانت اقعد اتجارى لي كده بين الدكاترة لغاية ما بكرة بكري يسود لينا صفحةالمنبر ونقعد نذكر في محاسنك، ويا حليلو وكان زول طيب وما عارف شنو لكن ليك علي انا بمشي انكت ليك بوستاتك القديمة ديك كلها واجي ارصها ليك في الصفحة الأولى، اها قلت شنو؟؟؟
فدحين انا زول خبرة في مسعلة الضروس دي، وما طالبني حليفة من سنة اولى ابتدائي لغاية هسع، وما تسالني كم سنة لأني بليد في الحساب، فعشان كده عليك بواحد من اتنين يا التنمباك او السعوط أو القرنفل أو دهان أبو فاس الهندي اكيد بتعرفو، والكمدة بالرمدة
وكفي الله المؤمنين القتال
فدحين خليك حريص نحن محتاجين لينا هنا بشدة في الفترة القادمة دي
09-29-2005, 02:24 AM
ayooby
ayooby
تاريخ التسجيل: 05-14-2002
مجموع المشاركات: 110
شوف بالله الصدفة الجميلة ! أنا من زمان بقرا فى جرايدنا مواضيع عن واحد اسمو سيد مرارة ! اتاريهو ده انت وبى ضرسو زاتو .... ياخى حرام عليك الدكتور ده ذنبو شنو .... غايتو ياخوى تانى كان جيت ماشى بى جنب عيادتو ولقيت دكتورك ده واقف فى نص صينية الحركة يمشى فى العربات ما تستغرب وانت طبعا عارف السبب .
09-29-2005, 04:20 AM
الملك
الملك
تاريخ التسجيل: 01-02-2005
مجموع المشاركات: 5756
Quote: جبيل الصباح إتصلت بي ناجي الملك عشان يوريني دكتور الأسنان القاعد يمشي ليهو .. وطبعا ناجي دا شغال الأيامات دي في سنونو شغل نضيف !! أها قلت حايكون خبرة في الشغلة دي وعارف الناس الجضيمين بتاعين الشغلة دي !! أها ناجي وصف لي الدكتور القاعد يمشي ليهو !! قمت مشيت الحتة الوصفا لي وما لقيت العيادة القاصدا ناجي ... قلت لي نفسي بلا ناجي بلا بطيخ !! أخش لي أقرب دكتور وإنتهي من الشغلة الفارغة دي !!!!
ما سمعت الكلام وقلت ليو إنتا خواف براك.... وطلعت من الشغل ومشيت براي لي قدري ولمن تعبت من فتيش دكتور ناجي الملك داك لقيت لي لافتة في الشارع مكتوب فيها (دكتور فلان بطيخ الكبكي .. أخصائي أسنان جامعة ميونيخ الدنمارك ولا ألمانيا ما عارف مع كمية من الزمالات ملصقا في اليافتة ) !! أنتو طبعا عارف حنك الدكاترة بتاعين السودان .. المهم إتوكلت ودخلت العيادة ...
ده عيبكــــــ
تستاهل
..... .....
09-29-2005, 08:10 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: وكان داير ليك طقم كااااااااااامل بجيبو ليك بعد رمضان ..سمح ؟
بعد رمضان أعمل بيهو شنو !!! أنا دايرو هسي في رمضان دا ..
خلاص أفطر رمضان وتتحملي المسئولية ؟؟
الفنان ياسر حنا !!
Quote: ناذر ود الخليفة
الف حمد الله على السلامة والجاتك في ضرسك سامحتك، وبعدين اعمل حسابك الضرس بلحس عديل عديل كده وانا سمعتو بي اضاني دي ما جابو ليه قالوا في مراة في الثورة جاها وجع ضرس بالليل ودوها الدكتور تاني يوم ماتت الله يرحمها ويحسن اليها، فانت اقعد اتجارى لي كده بين الدكاترة لغاية ما بكرة بكري يسود لينا صفحةالمنبر ونقعد نذكر في محاسنك، ويا حليلو وكان زول طيب وما عارف شنو لكن ليك علي انا بمشي انكت ليك بوستاتك القديمة ديك كلها واجي ارصها ليك في الصفحة الأولى، اها قلت شنو؟؟؟
والله مشتاقين !! شنو طولت كدة !!
يا زول مالك داير تخوفني وتدخل فيني الخلعة !!
الحاجة دي تكون براها متسببة ولا في إحتمال صغير يكون بسبب الضرس لو مشت لي نفس الدكتور ... لكن هسي بما إنو إنقضت 24 ساعة وانا حي والحمد لله وما إتلحست بسب البنشرجي داك .. ما أظن تاني بتجيني عوجة
غايتو كان إتلحست من الدنيا دي بكري ما أظنو يسود لي المنبر إنتا براك عارف ناس الفتنة في المنبر دا . حايشبكو ليك بكري .. بلا ناذر بلا بطيخ !! دا كان وكان وكان وإصلو ما حا يخلو لي جنبة أرقد فيها (في القبر)
أيوبي سلامات وتحية عسكرية أوتومسفيرية ليك ..
Quote: شوف بالله الصدفة الجميلة ! أنا من زمان بقرا فى جرايدنا مواضيع عن واحد اسمو سيد مرارة ! اتاريهو ده انت وبى ضرسو زاتو .... ياخى حرام عليك الدكتور ده ذنبو شنو .... غايتو ياخوى تانى كان جيت ماشى بى جنب عيادتو ولقيت دكتورك ده واقف فى نص صينية الحركة يمشى فى العربات ما تستغرب وانت طبعا عارف السبب .
أنحنا طبعا الإتنين ضباط .. ما تستغرب !! شايفك مقدم على ما أعتقد .. والحمد لله إنتا ما مقدم طبيب أسنان أنا زمان كنت برضو ضابط ... ضابط كورال وكدة بس ما عارف الرتبة الوصلتها شنو لكن البعرفو إنو كل الإتعلموا الغنا على يدي هسي بقوا فنانين كبار في الخرطوم وأقل زول إتخرج من مدرستي برضو ضابط .... ضابط إيقاع
أها أنا والله ما سيد مرارة داك وما نفس الضرس .. أها أنت ذكرتني بي حاجة !! الدكتور المشعوذ دا أنا اقول شفتو وين وما متذكر !! تاريهو كان شفتو مرة في صينية الحركة بتاعت أبو حمامة !!
ودا معناتو إنو أساسا من زمان كان مجنون وأنا ما جننتو !! هو القرب يجنني والله !!
ناجي الملك ...
Quote: ده عيبكــــــ
تستاهل
يا خي إنتا ما بتعرف توصف بي تعريفة !!
بيت حبشية شنو وبطيخ شنو !! دا هسي وصف عليك الله !!
صنفرة :
بلا صنفرة بلا بطيخ !! شاميك شمة كدة إصلها ما حا تفك قريب !!
09-30-2005, 02:05 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
قال ليك (هو منو القال ليك دا !!) في واحد شغال في الحكومة جنو سلفيات .. ما خلا سلفية ما إستلفا .. يوم كدا مزنوق في قروش مشى للمدير عايز سلفية .. المدير قال ليهو .. للإسف إنت سلفياتك كلها خلستها وما فاضل ليك الا سلفية بتاعت عيادة اسنان وأسنانك كويسة ..
الراجل طلع زعلااان من المدير ... في الطريق كدا قابل ليهو راجل عمنا عجووووووز كدي (من زمن العصر الانا كنتا فيهو داك!!) عمنا خشمو ما فيهو ولا سنة واحدة .. عمنا (ولا هو جد جدنا) سأل صاحبنا المفلس دا .. (يا ولدي مواصلات الحاج يوسف بي وين) !! صاحبنا عاين لي خشم العجوز كدااااااااا !! وقال ليهو : والله يا عمي مواصلاتك دي ما بعرفا لكن خشمك دا فيهو حلاة سلفية !!
صنفرة :
أضحك براي ولا شنو يعني !!!!!!!!
09-30-2005, 02:34 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
ناذر الله ينعل شيطانك قتلتنى ضحكا ..يعنى بقى فيها بدل سكن وبدل سفرية وبدل
اسنان كمان..ما بقيتو دولة بترولية..بختكم.
عشة بت البشير وهى امى الله يمسيها بالخير لا تملك سنا واحدة ملك كلو سنون حكومة
ولما قلعت سنونها استعدادا للطقم ارسلت لاخواتها واخوانها تخبرهم بذلك ولم يردوا
عليها مواسين فعملت قصيدة ارسلتها لاخيها فى مدنى واليك جزء منها:
وا اسفاى على سنونى الرصيفه اتهزز كتمت الضحكة والموقف على اتعزز بعد ماكنت بى قرش القصير اتلذذ بقيت من مدت العضم الكبير اتعذذ __________________ يا اخوى السنون من يوم عين ماشدن فاقدات لى مناعة ولى واجبن ماادن على الماحى والبنوت هناك ماردن قاعدات كالخيال لا منحن لاحدن
على الماحى اشارة لخالنا على ابن خالتها واخواتها وهى قصيدة طويلة..التحية لوالدتى عشة بت البشير الشاعرة الفذة والتحية ليك يا بتاع الكسر،،،
09-30-2005, 03:17 PM
Ahmed Abdallah
Ahmed Abdallah
تاريخ التسجيل: 08-12-2005
مجموع المشاركات: 5193
Quote: عشة بت البشير وهى امى الله يمسيها بالخير لا تملك سنا واحدة ملك كلو سنون حكومة
أمي عاشة بت البشير ..
رغم فقدانك لاسنانك الا أنت ما تزالين عاشة .. أجمل من الوردة ... لان الوردة تزبل وتجف واجمل من القمر ... لان القمر يظهر و يغيب أنصع من شمس الضحى .. لانها تظهر و تغيب
السنون طايرة يمه ... رغم ذلك .. وجهك فياض على الدوام... فأنت بدر البدور يا عاشة ... دمت لصدبق الموج غابة والناس حطابة .. ودام ليك صديق الموج ضيء وتقابة
09-30-2005, 11:14 PM
بدرالدين شنا
بدرالدين شنا
تاريخ التسجيل: 07-30-2002
مجموع المشاركات: 3514
الجميل الفنان ناذر سلامي وإحترامي بعد الإطلاع على حيثيات البوست وردوك على المتداخلين تأكد للجنة المنظمة أن هذا يسمى ضرس الإبداع والتفرد لك حبي وإنبساطي
تخريمة أو صنفرة أو بطيخ كما يحلو لك : إذا وجدت "صديق الموج" ود عشة بت البشير في أي بوست فتأكد أن هذا البوست متميز والنكتة فيه حاضرة تحياتي لكما
10-01-2005, 01:28 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
أنا والله لو عارف بوستي بتاع الضرس دا حا يلم المبدعين والمعتقين بالطريقة دي ... كنت مشيت للسمكرجي دا من زمان !!
الخال العزيز ود الموج ..
Quote: عشة بت البشير وهى امى الله يمسيها بالخير لا تملك سنا واحدة ملك كلو سنون حكومة
ولما قلعت سنونها استعدادا للطقم ارسلت لاخواتها واخوانها تخبرهم بذلك ولم يردوا
عليها مواسين
أولا التحيات أزجيها لوالدتك ووالدتنا جميعا عشة بت البشير ..ولقد ضحكت وإنتابتني الشجون والله .. فحسب ما أعلم فإن هذه هي أول مرثية لي أسمعها في تأبين السنون والضروس وهي قمة الروعة والله ..
العزيز الغالي بدر الدين شنا !!
Quote: الجميل الفنان ناذر سلامي وإحترامي بعد الإطلاع على حيثيات البوست وردوك على المتداخلين تأكد للجنة المنظمة أن هذا يسمى ضرس الإبداع والتفرد لك حبي وإنبساطي
شرفتني والله في هذا البوست والذي أنا غضبان فيه أشد الغضب وكلما أمر عليه أتحسس ضرسي بحنق شديد ولكن وجودكم هنا خفف علي الكثير
صنفرة :
قررت بكامل قواي العقلية والجسدية أن أذهب لدكتورة نادية في المجمع الطبي الحديث الذي وصفه لي الأخ خالد عثمان على ان يتحمل هو كامل المسئولية إذا ما حدث لي مكروه
10-01-2005, 02:19 PM
Khalid Osman Jaafar
Khalid Osman Jaafar
تاريخ التسجيل: 01-18-2005
مجموع المشاركات: 1031
Quote: عليك الله سلم عليها (ولو انو ما أظن تتذكر اسمى) ..
وورينا البيحصل
يالتأكيد ما شي ليها لكن لو لقيتا من نوع دكاترة الأسنان الينشرجية الأنا خاتيهو في راسي حا أجي طوالي وأعمل ليها بوست (يمين لو قرتو إلا تخلي الشغلة دي وتشتغل في مصنع ولا مشغل بتاع نسيج)
والكلام دا قلتو ليك من هسي عشان بعدين ما تجي تشبكني دي دكتورتي ودي قريبتي ودي بطيختي
أما لو لقيتا من نوع الدكاترة الفنانين الأنا خاتيهم في راسي حا اجي طوالي وأعمل ليها بوست (يمين لو قرتو إلا تقدم لي بكري طلب عضوية وتقدم لي دراسات عليا في جامعة كوستنجلوكيا في مجال زراعة الأسنان بواسطة الموجات الأوتومسفيرية)
ناصر البطل ..
أصبر لي شوية لحدي ما مزور دكتورة نادية دي !!!
الوكت دا إتعاقد مع عجب عشان يغطي لي شوية
كيف يا روميو !!!!
Quote: دايرين نربط ناذر في البيت اليومين ديل.
ليييييييييه !!!!!!
حوامة الليل دي أخليها لي منو
صنفرة :
سمعتو ولا جابو ليك يا روميو !!!
10-02-2005, 01:34 PM
حسين يوسف احمد
حسين يوسف احمد
تاريخ التسجيل: 08-17-2005
مجموع المشاركات: 4490
الاخ ناذر بعد التحية والاطلاع علي البوست اعلاه و الله اجرم الدكتور ده و الظاهر يعني ما بعرفك وما بعرف قدر الابداع اها انا داير اساهم معاك في حل المشكلة دي انا اخصائي اطفال لكن مرات مرات بشتغل اسنان للاخوان طبعا زيك كدة عشان كدة كدي تعال لي نشوف المشكلة دا نحلو كيف
10-03-2005, 01:16 PM
محمد امين مبروك
محمد امين مبروك
تاريخ التسجيل: 12-23-2003
مجموع المشاركات: 1599
Quote: ناذر الله يقطع شيطانك ..قتلتنى ضحكا..والحمد لله بيمر بى نخرتو ما بيمر بى حتة
تانية ..والله كان زول واحد قدر يقعد ليه فى حفلته مافى،،
ما انا حرييييييف وناقش الشغلانة يا خال !!!
تعرف أنا في الثانوي كنت مسؤول عن كورال مدرسة الجديدة وكنت عارف كويس الناس البتغني بي نخرينا والبتغني من حتت تانية !! وكنت بزنق الجماعة بخليهم يقوموا يغنو بالحتت التانية المابيغنو بيها في الأساس وطوالي بفهم النظرية
والي الدين !!!!!!!!!!!
Quote: الاخ ناذر بعد التحية والاطلاع علي البوست اعلاه و الله اجرم الدكتور ده و الظاهر يعني ما بعرفك وما بعرف قدر الابداع اها انا داير اساهم معاك في حل المشكلة دي انا اخصائي اطفال لكن مرات مرات بشتغل اسنان للاخوان طبعا زيك كدة عشان كدة كدي تعال لي نشوف المشكلة دا نحلو كيف
كدي قبل ما تساهم معاي في مشكلة أسنناني دي النسعلك !!!! إنت بوستي بتاع الأرقام داك عملت ليهو شنو خرب كدة !!!! ما قادر أقرا أي حاجة ومن ما غنت ختيت مداخلتك البوست إتكعوج وحلف ما يستعدل !! يا راجل كعوجت لي بوستي كمان داير تكعوج لي سنوني
أمش شوف لي حل للمشكلة ديك وبعد داك بتناقش معاك في موضوع السنون
الأخ مبروك
Quote: عندنا هنا برلومة اسنان
[
Quote: ولو بقيت على دكتور حنجره
عندنا برلومة برضو
يا اخوي دا كلام شنو دا !!!!
برلومة شنو وبطيخ شنو !!!! أنا بقول ليك الحداد داك كان عندو يافطة ملانة زمالات من دول الإرجنتين والكميرون والسنغال ونيجيريا وساحل العاج وبعد دا ما عمل حاجة مفيدة !! كمان جايب لي برالمة جداد!! (زمالة في صندوق الختة بتاع الحلة اظن ماعندهم)!!
صنفرة :
دا كلام دا يا مبروك !!! والله بالغت عديل .. صمة خشمك كان مالا !!
10-04-2005, 02:04 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
عندما كنا صغارا وتنكسر إحدى أسنانا ,, كان أجدادنا وأمهاتنا يطلبون منا ان نقف في وسط المنزل في النهار ومن ثم ننظر للشمس الساطعة ونهتف (يا عين الشمس هاك سن الحمار وأديني سن الغزال) !! ثم نقذف السن بعد ذلك تجاه عين الشمس !!
ما اصل هذه الـ (ما عارف أسميها شنو) وما القصد منها !!
صنفرة :
أنا لمن كنت صغير كنت شقي جدا وعادي بكسر لي سنين تلاتة كل إسبوعين وبجدعم للشمس بالنداء دا !! لكن لحدي هسي عين الشمس دي ما أدتني لا سن غزال لا سن حصان !!
10-04-2005, 04:17 PM
Khalid Osman Jaafar
Khalid Osman Jaafar
تاريخ التسجيل: 01-18-2005
مجموع المشاركات: 1031
والله يا خالد أنا زاتي ما عارف الكلمة دي ماسك فيها كدا ليه !!!!
واحد صاحبي حلفاوي درس معاي في الهند وهو طوالي زهجان وأخلاقو في نخرتو وساخر جدا جدا . الهنود عندهم الجوافة بياكلوها بالشطة والبهارات (عديييل كدة) وأنا كنت متكيف من الأكلة دي .. يوم مشيت مع صاحبي الحلفاوي دا وعزمتو جوافة بالشطة وهو كان جديد في البلد .. قام إستنكر الفكرة وأنا أقنعتو إنها لذيذة أها قام إتوكل وأكل الجوافة دي ومن ديك ليهو تاني قريب تلاتة يوم ساكن في الحمام عدييل كدة .. شي إستفراغ وشي طمام وشي حاجات تانية حامياني المهم لمن بقى كويس قلت ليو أرح عازمك جوافة بالشطة صاحبنا إتخلع وقال لي بي لهجة الحلفاوين ديك : يا عم روح بلا جوافة بلا يطيخ معاك !! أنا ناقص !! أها من اليوم داك والكلمة أبت تروح من خشمي .. كل ما أزعل من زول أو إتضايق منو ولا يديني إقتراح ما عاجبني أقول ليهو : بلا ..... بلا بطيخ ودي كل الشغلانة .
صنفرة :
والله يا خالد لسة ما مشيت لإنو رمضان داهمني وما أداني فرصة لكن قطع شك حا أمشي لها في الأيامات الجاية دي
يا راجل إنت مقلق مالك .. أنا والله ما بجامل لو لقيتا ما نافعة حا تجي تلقى خبرا هنا دا
ياخ عليك الله زح بوستك دا من قدامي .... اششششش حي حي حي حي حي اللثَّة قامت علي والله والله ما بكضييييييييييييييييييب وإنت مشكلة ضرسك "لثَّة" ما إنتهت؟؟؟
10-07-2005, 06:12 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
اللثة علاجا ساهل وما بتفطر وعلى كل حال اليومين الجايات ديل انا ماشي لي والي الفكي يعمل لي معاينة أولية وبعد داك ماشي لي الدكتورة بتاعت خالد ديك ، أها لو بقيت على حاجة أرح نترافق للجماعة ديل ..
صنفرة :
لا زم تقلل من عصير العرديب والليمون في رمضان لإنو هو سبب أوجاع اللثة
أنا زول صغير وما بعرف الكلام دا بتجيبوهو من وين !! أنا مما قمت بديت بي حلاوة سمسمية وحلاوة عكاز بتاعت الحجات ديلك ولمن كبرت شوية لقيت قدامي حلاوة قطن وبعد داك الكرميلا وحلاوة كسلا وباقي الحلاوات !!
علا وحاتك حلاوة ترمس دي ما ادونا ليها . لكن إتخايلي أدوها لي حسبن ملاسي
صنفرة :
جيتك في جخنونك علا ما فهمت حاجة !! تراني ضعيف في التقنية وزي ما شايف لي ساعة بخاول انزل لي في غنية ابت تنزل !! إنتا نسيت إنو بكري شغل الماسنجر ولا شنو !!
10-07-2005, 07:44 AM
humida
humida
تاريخ التسجيل: 11-06-2003
مجموع المشاركات: 9806
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة