ذكريات الحفلات في المناسبات : جلد بالسياط وزوغة بالعداد ومبيت في الحراسات ...

Quote: بعدين يا تروتسكي أقول ليك أنا كنت داير أكون مشروع فنان كبير بعيدا عن الهواية لكن لقيت إنو القصة دي حا تكون متضاربة مع طموحاتي التانية فقررت إنو أقلل الغناء في الحفلات وحاليا مكتفي بس بالغناء في المنتديات الثقافية وأنا عضو في أكثرها بولاية الخرطوم وبقيت هسي ما بغني إلا لي زول عزيز جدا علي وبعد تحانيس وإكتقيت فقط بجلسات العود لأني وجدت فيها الفن الحقيقي والمستمعون المرهفون ...

.
الدور ده يا المشنقه يالقبر . ..
قايتو حاتطلع د. .
بعدين انا شغال بالسلم الرباعى. .

Quote: أما عن حفلتك فأقول ليك أرقد قفا أخوك إستفاد من الإعتقالات ودخول السجون وبقيت حريف في الأمور دي وبعرف أعمل إحتياطاتي كويس

تــــــــــــــــــــانى؟؟!!!!. .
كُر..
الظاهر عليك الفتره الفاتت ديك كلها بقيت شغال ورديات ومتعهد كركونات..يارفيق نحن عضمنا كبر ومابنقدر على قدر ده..
ياخوانا دى حاله دى؟؟!!
لالالا
يازول تعال استمع احسن الغنا ده خليهو لى اسيادو ..
طبعا اخوك يارفيق اساسا كان مفكر فى الشغلانه دى ومشى بى طموحو قدااااااااااااااااام زى بتاع الزول الكسر قزازة السمن وهو لسه ماباعه..
بعد داك لمن صحيت من الحلم قلت يازول درب الفن ده مابقدر على لعلعة الغنا والمشاكلو دى..
فقلت خلاص ابقى عازف وبدينا فى الشغله دى لكن ما اكتملت ..
حتى بالنسبه للمسرح قلت كلام تمثيل ده مابجى ماشخصيتى رغم انو اخوك فى المتوسطه فوز المدرسه بى مسرحية اسمها سعاد..طبعا العبد لله كان (سعاد) زاتها ليس لشى عشان ماتمشى بعيد بس لانو كنت اصغر زول فى الشله وبعدين لسه ملامحنا كانت بريعه على وزن برئيه والصوت كان فيهو جرس ...(بجى بحكى ليك المسريحه والحصل فيها اسكت ساى جنس فضايح فتره اسم سعاد بقى ماشى ليك فينى لمن عرفته حاجه)..
مع الجرى فى درب الفن وتللتو (البسمعنا يقول ولا سلفتر زاتو) قايتو نكبر كومنا كان نلقى لينا شغله بعد داك زول يشترينا ..
اها من مواقف بتاعت الغنا اتذكر منو كنا فى الثانوى النص الاول من اولى ماقريتو فى الجديده انا جيت فى نص السنه..
اها كان فى احتفال فى المدرسه بتذكر غنيت اغنية (لى غرام وامانى )..
طبعا هى فيها دخلات شويه حاده وحرجه دايره زول متمكن..
قايتو ماقصرته معاها لكن الضحكنى بالرغم من انو الموقف محبط لانى اساسا كنت حكاية الفن دى عندى هويه يعنى مافارقه معاى..
وانا فى المسرح بغنى واشدو والناس بتستمع والاساتذه قدام قاعدين فى الكراسى الى امتداد الاستراحه فى اخر الصفوف فى الناس البتكون واقفه فى الكراسى وراء خالص ..
اها شغالين لى باشرو بى يدينهم انزل ولسان حالهم يقول ودينى نلقاك تغنى فى محلة تانيه الا نوريك وفى البعضى صباعو بى اسنانو دليل على الغيظ وانا الضحك شارطنى كل ما اقرب خلاص اضحك اقبل على بتاع الاورغن واضحك طبعا هو يعاين لى ومستغرب واستغرابو يضحكنى اكتر وهو ماعراف الحاصل شنو وانا ماقادر احكى ليهو ..
قايتو بالحاله دى كلفتها ونزلها جرى الكواليس انفقعته بالضحك ..
الشباب (الشفوت) الكانو باشرو لى انزل انزل جو خاشين الكواليس انا قلت خلاث الليله يوم الرجال واتجهزت لاسؤ الاحتمالات من كدمات وغيرو ولن احرك ساكنا امام تلك العضلات والكثره ..
واحد قال لى اسمع ..
مع قولت اسمع دى قربت ابكى بعد الضحك داك..
اسمع ماتكون اتعقده (بصوت خشن وغليظ) نهنا بنهظر معاك ساى صوتك كويس..
على العموم ماعرفت تقيمهم جاء من وين لكن مادام قالو جميل قبلنا نسوى شنو..
لانو شكلهم كده علاقتهم بالفن (زى اللغه الصينيه)..
*برضو دى وراء شويه ونحن فى تالته متوسطه فى وداع استاذ اها قمت غنيت ليك اغنية جنوبيه..
اقول ليك (صراحه صراحه)..
زمان صوتى كان شويه (رقيق)..
اها ياعمك وانفتحت ليك فى الناس قايتو القاعد جنب الساوند اليوم ده اضانو بتكون اتشرطت..
اها الناس اندمجت مع الاغنيه يعنى قول مقبوله واجدته اداءها لكن بقيت بعد داك فى الشفوت بتاعين المدرسه ..
الواحد يلاقيك فى حوش المدرسه ويقعد يقلد فيك (غايتو خششونى فى اضافرى لو كانت غنيتها بالصوره الشفتها منهم)..
المهم طبعا اخوك لانو مابشتغل بالحاجات دى (بارد جدا) ولا بعك ليك فيها بخلى ليك الزول بى راحتو عشان كده فتره براهم بتعبوا وبنسوا ..
لكن الشى البتذكرو من اثار تلك حفلة الوداع ديك.. جانى صاحبى شديد قال لى عندنا مرة جيرانا سالتنى قالت لى اسمع انتو امبارح البت الكانت بتغنى فى حفلتك دى منو؟؟؟؟

طبعا اسى الساوند سيستم سلك .. داك زمن الجهل والواحد لى شلاقة اهلو مدخلنو المدرسه صغير..

*الليله فتيتو ليك فت مش؟؟
عارفك داير النوع ده ..
بس انت ماتمشى للحفلات الخاصه بتاعتك دى جيب من بلاوى الكورال..(احييييييييييينا). .

قايتو خلاصة الموقف غررته واحد من الاتنين..
لو سلكته درب الفن الغنائى بكون عازف ولا موزع موسيقى..
ولو الفن المسرحى اكون كاتب سيناريو ولا مخرج ..
والنشوف اخرتها..

يازاهيه قلبى الشلتى جيبي..
يالا ..لاهيه عبثى البى وسيبتى..
اها



ملاحظه حكاية عمر ضحكتى بالجد بالذات المقطع ده..

Quote: أحيييييييييييييييييييييينا منكم يا أولاد الخرتوم البتستحموا ووووووووب علينا وووووب عمي قعد يضحك ضحك وقال لي مش أنا كلمتك وقلت ليك ما تستحم ... طلع البيستحمي عندهم ولد خايب ساي تصدق ؟

انت ياعمر ما سمعت مقولة..
هو جاء لى بروودو. .