في ذكري آخر مكالمة تلفونية مع مصطفي سيد أحمد سامحني فلقد قصرت في حقك
اليوم14/1/96 الساعة الواحدة صباحا لوس أنجيليس كالفورنيا الساعة الواحدة صباحا الدوحة قطر محادثة هاتفية ............011974 آلو منو مصطفي يا دكتور متوكل أهو كويس عرفتني طوالي معقول صوتك يغبي علي الله يخليك يامصطفي ...طمني علي صحتك اهو الحمدلله عايشين وبنصارع ليه صوتك كده ماتضعف أنت راجل شجاع يادكتور... معليش يامصطفي والله صدقني كلنا حاسين بألامك بس شد حيلك وانشاء الله كل شئ يكون تمام بالأمس كنت أتكلم مع زميلي وأخي الأكبر د.عمر عبود وأخبرته أن أخصائي أمراض الكلي وجراح زراعة الكلي هنا معنا في جامعة UCLA والوحيدين في العالم الذين لهما أحسن النتائج في مثل حلتك هذه قد راجعا الملف الطبي بتاعك وهم علي درجة عالية من الثقة بمقدرتهم في التحكم بحالة البطن ونسبة ال Cure فيها عالية ومن ثم الزراعة تكون سهلة خالص وناجحه بأذن الله أنشاء الله يادكتور متوكل بس أنت ماعارف الشئ ده بيطحن في بطني كيف الله لاوراه لزول صدقني يامصطفي والله عمر وأنا عارفين بس ده التلفون الثالث مني ولي هسع ماعارف حتجيني متين وريني الحاصل شنو ومنتظر شنو منتظر الشفاعه يا دكتور متوكل الشفاعه؟ الشفاعه من منو ؟وفي شنو؟ خليها في سرك يادكتور لاماحأخليها في سري أنا طبيب ولازم أعرف الحاصل شنو والممكن شنو أنا ود.عمر والأخوة عمله من هنا يامصطفي أنت عارف أحنا بنسابق بيك الزمن بالله سيب طيبتك وخجلك ده وكلمني المشكله شنو والأ ما حأضرب تاني ماتزعل يادكتور المشكله الباسبورت الباسبورت؟باسبورت منو؟ باسبورتي أنا يا دكتورمحجوز يامصطفي باسبورتك السوداني محجوز أيوه يادكتور متوكل منو الحاجزوا وليه؟ قصه طويله شئ يحير بالله عليك الله وريني ديل منو والسبب شنو عشان هنا من أمريكا أسل لساني وأوديها لكل الجرائد والمجلات الأمريكية عشان العالم كله يعرف أنو فنان بقامتك كده ومريض في حالتك دي باسبورته محجوز عايزين منك شنو عشان عارفك عمرابي أحمق ماكنت عايز أكلمك لكن حأقول ليك بقدر ماأستطيع بس أنت أسمع وماتعلق عشان ما تعقد الأمور طيب يامصطفي وريني الحاصل شنو الله يرضي عليك يادكتور بأختصار شديد لازم أدفع مبلغ 40 ألف دولار قبل ما يدوني الباسبورت 40 ألف دولار لشنو ؟ جزء من أجرة الغسيل والأدوية بالله يامصطفي وصلت كده ؟ يحجزوا علي باسبورت مريض ذيك عشان ما قادر يدفع قروش؟ والله ده الحاصل يا دكتور طيب يامصطفي أخوانك السودانيين في الغربه عملوا شنو؟ والله المساعي جاريه جاريه مع منو ؟ وبيحنسوا في منو؟ولشنو؟ لو ماعندهم القدره وده كلام أنا ماقادر أفهمه طيب يخلوك كان تعمل حفلات وتدفع قروشهم من عرق جبينك ولاجميلة أي واحد فيهم اهه يادكتور ماتتحمق تصدق أنا طلبت منهم يدوني باسبورتي أمشي بيهو الأمارات أعمل حفلات وأدفع ليهم قروشهم والحصل شنو؟ برضوا رفضوا يامصطفي الماسك باسبورتيك منو بالتحديد؟ اهه فورت ذي أي سوداني ذي ماقلت ليك عارفك عمرابي أحمق لو وريتك عاوز تعمل شنو؟ أنت بس مالك وريني وأنا بتصرف بوريك بس ماهسع ليه؟ لأنه في مساعي جاريه ده كلام فارغ سيبني من المساعي والزول الزيك لو في بلادنا في ذره من التقدير للفن كان يعمله ليه تمثال مش يحجزوا باسبورته أصلها جبانه هايصه وعشان كده ما حتقوم لينا قايمه مش لو جانا بترول والله لو قلبو ليهم البحر طحنيه ما منهم فايده يادكتور اهه ولعت حاسب علي كلامك شوية أحنا ما في السودان ولابحاسب ولاحاجتين عارفك عمرابي أحمق ...أقول ليك وعد أديني أيام وحاأحلها صدقني يا دكتور مصطفي الله يرضي عليك مافي زمن أنت عارف نحنا بنسابق الزمن بمرضك ده وأنت عارف عندك شنو عارف يادكتور طيب يامصطفي حأديك 72 ساعه وبعدها وبعدها حتسوي شنو يعني حتسوي أنقلاب ها.هاهاها .ها والله ياكا مصطفي بتضحك حتي في لحظات الألم الشديد والظلم والله أنا عايز أطرشق هسع عارفك كدي بالله خلينا أنا رسلت ليك شرائط وفيديوين جميلات وصلوك أيوه وصلوا والله من التعب لسه ماشفتهم ولاسمعتهم خليك من الشرائط يلا أنتهي وقوم تعال بسرعه أنا راجيك حاضر يادكتور ربنا يخليك ويحفظك لينا ربنا يحفظك ويخليك لينا أنت السودان ممكن يجيب مليون ذي متوكل لكن ماأظن يجيب واحد ذيك بالساهل تاني أفو يادكتور سودانا عظيم وحيجيب مليون ذي مصطفي ده شعب ترهاقا ومهيره بس أصبروا يلا يا مصطفي أنا ماشي أنوم الساعه بقت أثنين صباحا بالله الساعه أتنين صباحا في أمريكا وانا عندي ظهر وحاأتغدي بي باميه وتقول لي العسيلات تحذر أمريكا هاهاهاها الله يجازيك يامصطفي شفتها في صوره في جريدة الشرق الأوسط أمبارح بالله شفتها يادكتور مصطفي أي شفتها أيوه العسيلات تحذر أمريكا أصلوا الكلام بقروش يلا تصبح علي خير أنا في أنتظار مكالمتك بعد 72 ساعه فقط حاضر جنابك تصبح علي خير وأنت سالم يا دكتور أحبائي أحباء مصطفي في يوم 17 يناير ذكري وفاة الراحل الرائع سوف أشارككم المحادثة الأخيرة التي كنت أتمني أن لا أسمعهاأوأن تغطس بي الأرض آخ يامصطفي سامحني أن أقلقت مضجعك فلقد قصرت في حقك أغفر لي تقصيري وفشلي لأنقاذك فنحن مثلك بشر من تراب وطين (عدل بواسطة Mutwakil Mahmoud on 01-15-2003, 07:29 PM)

العنوان	الكاتب	Date
في ذكري آخر مكالمة تلفونية مع مصطفي سيد أحمد سامحني فلقد قصرت في حقك	Mutwakil Mahmoud	01-15-03, 08:27 AM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	sheba	01-15-03, 08:43 AM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	azza	01-15-03, 10:22 AM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	HAMZA SULIMAN	01-15-03, 10:59 AM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	Yasir Elsharif	01-15-03, 11:17 AM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	اسامة الخاتم	01-15-03, 01:15 PM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	kofi	01-15-03, 01:37 PM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	atbarawi	01-15-03, 03:04 PM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	sheba	02-21-03, 12:28 PM
Re: في ذكري آخر مكالمة تلفونية مع مصطفي سيد أحمد سامحني فلقد قصرت في حقك	sheba	05-07-03, 06:21 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]