معليش للتاخير في الرد الاخوات الكرام انا اقبل كلام الجندرية و الاخت لنا ما محتاجة واسطة يكفي انها انصارية بت انصار و الاخت لنا معزومة معانا حاجات كتيرة الايام دي شي ملاح ويكاب شي نعيمية لحمها ناشف من السودان بصلتها محمرة من السودان دقيق الذرة من السودان الدخن من السودان و الله ما فاضل الا نجيب الحطب يعوسو بيهو تمام التمام لنا مهدي تلفونك كم نخلي المدام تعزمك طبعا برضو في فسيخ . و دكوة اها نشوفك بس ادينا التلفون
05-09-2006, 03:02 PM
الجندرية
الجندرية
تاريخ التسجيل: 10-02-2002
مجموع المشاركات: 9450
والله ونستكم عن الويكاب دي ألذ من الويكاب ذات نفسو .. أنا طبعاً من الشمالية (ناس تركين وكدا) يعني ماعندنا معاهو أي علاقة لكن دا ما بيمنع إنو أكون أكلت الويكاب .. مشيت رفاعة زيارة وأكرموني بيهو في فريق القبتاب .. كشئ جديد ما استسغتو لأول مرة , لكن كلامكم دا خلاني أغير رأيي وأفكر أجربو تاني ..
اول مره انا اضوق الويكاب دا كان مع عرب من البطاحين المسلميه و انا بت بندر وكدا ومع اني ما حنكوشه باكل النعيميه والكراره وام تكشوا والسبروق ,الورق وحتي الكداد ممكن اكله وبموت في التركين والفسيخ والمرس والويكات بانواعها ام رقيقه .ام شعيفه ,التقيله , ام بربر . اها لما جابن ملاح الويكاب دا ودخلت يدي والله بقيت ابلع فيه ومعدتي تجي مخمومه لي فوق. النصيحه لي الله ما عجبني تب. لكين طبعا هو تقريبا فطور شبه ثابت عند جاراتي المهم بعد فتره بقيت اكله لكين من فارقتهن ما اشتهيتو . ويا عجوجه والله ملاح المرس دا حلو شديد والعجب كان ظبتتوا ليك و زوله غرابيه تاكلي اصابعك وراه متل التركين برضو بحبه موووووووووووووووووووت.
05-02-2006, 11:32 PM
nazar hussien
nazar hussien
تاريخ التسجيل: 09-04-2002
مجموع المشاركات: 10409
Quote: غايتو الما عارف يقول ويكاب .. نزار ودعمي دا بتاع .. القطر قام .. النوع البيكب الحاجات كلها مع بعض يعني عادي جدا تغرفي ليك .. جردل يا طشت من جوه الحلة ولا بيهمو حاجة
يا تمبس والله جبت الحكاية من آخرها...يا راجل انا لي تلتاشر سنة باكل في المطاعم...القطر ان قام هسي دي تلقاني قاعد جنب ست الطعمية... والقطر يقوم ويتدفق ويتحتحت حتة حتة...لامن حديدو يتلصق في الفلنكات حتين اجي من جملة الجماعة الطفائين...غايتو اكيش مني الله ما خلق لكن النصيحة لي الله جارتنا هنا ملكة الويكاب...لكن بس في رمضان
05-03-2006, 00:05 AM
الجندرية
الجندرية
تاريخ التسجيل: 10-02-2002
مجموع المشاركات: 9450
أنا لي تلااااااااتة يوم بقرا عنوان البوست ده وأزوغ منو !!! ما عشان ما باكلو لكن بس منتظر الملاح يمرق والكسرة تكون بقت بايتة ومجهز شطتي الخدرا الما خمج.
الواحد جاي من برا خشمو يمطق ، هسع التقول عاصرين ليمونة في خشمنا!!! الله لينا نحنا العزابة
نقول ملاح الويكاب نلقاها مرقت في السلج ... وفي الأم كرم كرم تخصصنا نحنا ناس سنجة وناس النيل الأزرق زي ما قال أخونا عصام جبرالله. وأخونا الفوق ما قصر في الفهم والقعدة وجو المطرة والسمنة وااااااااااااااااااع... غايتو ما عارف لكن إنشاء الله باكر دي أنا صابح شبعااااااااااااااااااااان كده ملاحات (والفاتنا في البوست ما بفوتنا في حلمنا) والحمد لله مقدماً .
الجندرية سلام ملاح الويكاب هو أول ملاح كيماوي في العالم. وأنا شاهدت أماكن تصنيعه زي ما قالت بت الحسين في قرية(عد الخضر) بالقرب من رفاعة وهي مصانع أشبه بالمفاعلات النوويةبس المصيبة يقوموا يضربوها صواريخ.
05-03-2006, 03:39 AM
منصوري
منصوري
تاريخ التسجيل: 09-28-2003
مجموع المشاركات: 2504
جندريتنا إزيك... يقول ليك فلان ده(عربي جزيرة ساكت) ليه ماتراهو عشان الحاجات دي..قصب ورماد.. وإنت ماك بعيدة من هذه المركب.. ........... لكن اقول ليك حاجة؟ جربتو والله.. بجد يستحق إفراد بوست.. وفعلاً غسيل عدتو يكره الحياة زي ما لاحظتي إنت ملاحظتك الدقيقة خاصة الحلة العملوهو فيها... وغسيل العدة هذا الشهر على أنا..حسب القائمة المطبخية الجديدة ومشاركة ومؤازرة في الحياة.. وجربناه هذا ال.. ويكه..اب.. شكري
05-03-2006, 04:43 AM
nile1
nile1
تاريخ التسجيل: 05-11-2002
مجموع المشاركات: 2749
ناس البندر بخموا الرماد وإنتو هناك بتاكلوه؟؟..طيب دا برضو بتاكلوه قبل رمضان بيوم؟؟ خم الرماد معروف حرام..بس أكله داير ليهو فتوى...ودي مابقدر ليها إلا الشيخ بدر الدين شنا تحياتي
الزاكي
05-03-2006, 06:07 AM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
شكرا للجندرية ... اخيرا الواحد لقى common ground تفتح النفس
الويكاب ياسادة هو ملك اللايوق بدون منازع Wake up is the king of lay oooooogh وسمى الويكاب..لان انواعه العديدة تنتمى لقبيلة الويكة..وهى القبيلة المسيطرة على مائدة اهل السودان وافضل انواعه ويكاب الدخن ..يعنى المعمول من قصب الدخن.والويكاب من غير سمن بلدى زى المكشن بلا بصل الويكاب رفيق العصيدة الازلى...الاستثناء الوحيد ..هو الرهيفة الجاية حارة من الصاج... وطوبى لمحبى اللايوق فلهم فى الويكاب مثلا اعلا....
05-08-2006, 03:40 PM
Siddig A. Omer
Siddig A. Omer
تاريخ التسجيل: 04-06-2005
مجموع المشاركات: 3818
Quote: * الويكاب : جاء في قاموس اللهجة العامية لبروف عون الشريف قاسم ، أن الويكاب " رماد القصب المحروق يعمل منقوعاً بالماء مع اللبن أو الماء وكلاهما يضاف له البامية الناشفة مسحوقة او اللوبياء فيصير إداماً . وهي مكونة من مقطعين ويكة والمقطع البجاوي آب الدال على المفعولية . قال العبدلابي : ويكابو في السوايب مكمد ". قاموس اللهجة العامية في السودان ، ص 1065.
انتظرهــا كل عام.....تاتى الينــا تحمــل خيرات بلادى...و تقول "جبته ليكم معاى دقيق كسرة" بالرغم من أننى الح على أخوانى" رجاءاً... لا أريد أى شىء من السودان أى حاجة متوفرة هــنا" بالرغم من ذلك تاتى الينــا محملة بالخيرات , أفاجــأ فى أول "جمعــة" من حضورهــا بأن الفطور جـــاهز الساعة 8 بالضبط يزينه الويكــاب...فهى تعرف باننى أحبه كمــا احبهــا...ربنــا أمد فى ايامك واديك العافية يا أعظم والدة......
شكراً الجاندرية على المعلومة...كنت أظنه حجراً مجهول الهويـــة...
الجندرية سلام عليكم شوفي يا بت الناس مما فتحت البوست بتاع الويكاب ده انا حصل لي فتح ويكابي يعني لو ما فطرت بي ويكاب اتعشي بيهو عليك الله افتحي ليك بوست بتاع قروش كتيرة و لا بيوت فخمة نقوم نشارك فيهو يحصل لينا فتح نملا جيوبنا و لا نسوي لينا ضظل لي ولديتنا اها رايك شنو و شيخك منو سلام
05-09-2006, 11:41 AM
saif massad ali
saif massad ali
تاريخ التسجيل: 08-10-2004
مجموع المشاركات: 19127
اسة يا الجندرية يعني ملاح الويكاب ده ملاح رماد؟؟ أسة أنا أقول بسم الله وأقوم آكل لي ملاح رماد؟؟
بشهد الله ما في اي استعلاء طعامي نحنا من مناطق مهمشة لكن سمعت بيهو لي سنة وأنا أقدم من الكسرة المرة وبعد داك اتمنيت من باب السودانوية اضوقوا واتعرف على الأخ يطلع ملاح رماد؟؟
05-09-2006, 05:26 PM
Imad Khalifa
Imad Khalifa
تاريخ التسجيل: 11-26-2004
مجموع المشاركات: 4394
الأخت/ أماني وضيوف ملاح الويكاب الكرام السلام جاكم
جابتنا ريحة الويكابة قلنا ندخل. أتمني ان تواصلي ايها الجندرية في تعريف الحناكيش و الحنكوشات بثقافة الملحات (بكسر الميم) التي تعج بها مناطق وسط السودان بصفة عامة والجزيرة بصفة خاصة.
هناك أيضا ملاح التمليكة وملاح البصارة من الملحات التي تحتاج شيئا من الوصف ومن ثم اضافتها الي قواميسنا العامية ان لم تكن مضافة.
Quote: وبعد داك اتمنيت من باب السودانوية اضوقوا واتعرف على الأخ يطلع ملاح رماد؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة