|
.. حمحمة ..
|
حمامة باضت فوق بيضا نامت حنين كلاما سجع حمامة حماها حامي من نوما قامت تحك تحاحي للإيدو مخلب فحيحو .. صاحي كديس ومجرم كمان هو جارا خطير مخرب قاتل .. مسلسل مانياك .. يزعل عشان عشاه يبيع جناه عشان عشاه جاها غاير كديس وأجرب حمامة طارت لفوق .. وركت تشيل جناها وتخت جناحا بكل بسالة فاقت خيالو وكمان خيالا عشان بكرة يا ما يتم مناها وتشوف هناها بفراخها .. تسعد حمامة طارت لي فوق وغارت وكديسة فرت لبعيد هناك تلحس جراحا لحسة لحسة لفوق تعاين مرة عينك ومرة خلسة حمامة بيضا حارسة بيضا حمامة ساكت حمامة شرسة
14/6/2007م
|
|
|
|
|
|
|
|
Re: .. حمحمة .. (Re: bayan)
|
بسم الله الرحمن الرحيم الاخ ابراهيم.. سلام
Quote: حمامة باضت فوق بيضا نامت حنين كلاما سجع حمامة حماها حامي من نوما قامت تحك تحاحي للإيدو مخلب فحيحو .. صاحي كديس ومجرم كمان هو جارا خطير مخرب قاتل .. مسلسل مانياك .. يزعل عشان عشاه يبيع جناه عشان عشاه جاها غاير كديس وأجرب حمامة طارت لفوق .. وركت تشيل جناها وتخت جناحا بكل بسالة فاقت خيالو وكمان خيالا عشان بكرة يا ما يتم مناها وتشوف هناها بفراخها .. تسعد حمامة طارت لي فوق وغارت وكديسة فرت لبعيد هناك تلحس جراحا لحسة لحسة لفوق تعاين مرة عينك ومرة خلسة حمامة بيضا حارسة بيضا حمامة ساكت حمامة شرسة |
الف مرحب بيك وبي حمامك تحياتي... حاتم هاشم.
| |
|
|
|
|
|
|
Re: .. حمحمة .. (Re: حاتم هاشم)
|
أخي حاتم ..وعليكم السلام ورحمة الله وبركاته ..شكرا على تفضلك بالمرور ..وشكرا على منحي ترخيص الدخول بحماماتي كمان .. هذا كرم كبير..نشكره بتمعن.. وشكرا مرة تانية على الترحيب .. والدار داركم..
أكيد حنتشاوف في مرابع تانية ..
ودام لك ودي وتقديري
| |
|
|
|
|
|
|
Re: .. حمحمة .. (Re: bayan)
|
الأخت المحترمة دكتورة بيان ..زياراتك دايما ليها قيمة معنوية عالية ..أشكر لك تلطفك .. ومداخلاتك..وأشكرك على وقتك المستقطع على تصفح كلماتي المتواضعة بالمعيار الأدبي أعني ... وإلى أن تقابل في مرابع تانية ..
دام لك ودي وتقديري..
| |
|
|
|
|
|
|
Re: .. حمحمة .. (Re: ibrahim fadlalla)
|
الصديق براهيم..حبابك
كدت أن اقول حمامة بت الكلب..و ذلك ساكت..من باب حسرتين اتنين و بس..حسرة على الدروب لمن تفرق..مثلها و مثل فرقات المرحال..حينما يتفرق الشوق و ياخد مراحيلو..زي الناس و زي السعية..و حسرة تانية على الذكرى لمن تحاحي حنينها الدهاق..و في غمرة هداك حنين.. تنسى روحها عشان تفرحها فرحها الخصوصي لمن تلاقي الفرح في ذات نفسو معدي فيها ماشط .. شفت حال الخواجة ..لمن يدي ربو العجب و يخط الخمسة في الإتنين و يقول صارخا.. Wow! ياهي دي حالي يا صديق.. و الغرابة في ذات نفسها بدت تستغرب..كتر خير النت يا صديق.. و انا اقلب في دفاتر اللحظة..و في يدي "نظرة المختلس"..كان زمن الإستهلاك يمتصني حتى اخر قطرة..ثمالة ثمالة يا ابراهيم..و افتش عن كل الدروب البتلمني بالذكري عيني عينها.. ياها..هي باقية..و قاعدة..و نحن البنمشي.. وما بين القعاد و المشي..بتكتب اللحظة نسيجها الخصوصي..في الشوارع المسقية بالضو المبهرج..و في نوم المداين الصاحي (لأنو متل نوم الديك في الحبل..عين مغمضة..و عين فاتحة)..في اخر الليل يا ابراهيم..و مشغل اذاعة الأبروجنينال (اسمهيم اهل الدار..و يسمهيم الأخرين الهنود الحمر..اتذكر ديوان صديقنا الشاعر الفلسطيني على..حينما قرر أن يحكي لنا عن أعراس الهنود الحمر؟)..في ذاك التشغيل ..و في اخر الليل هداك.. فجأة تطل عليك الفنانة رشا شيخ الدين..و هي تغني يا عذارى الحي..ياه..شفت محنة المفارقة كيف يا صديق؟..في اخر الدنيا..ناس تصر انها تدي رشا شيخ الدين فرصة في كل مساء..ظهيرة..و فجر متنفس..و اذاعة هنا امدرمان.. نست حتى صاحبك أبو داوؤد في ذات نفسه..و اتحداها لو عندها عذارى الحي بصوت رشا شيخ الدين.. صوت رشا..في عذارى الحي..طاخ طوالي.. بيختني في الدروب اياها..و يفتح مشاريع الحنين الماخمج.. الجابك..انشاء الله يجيب صاحب الفخامة..و محجوب..اما عادل اسماعيل..فيكفي اني اسمعه كل يوم في اذاعة (هنا امدرمان و مراسلنا بالدلنج عادل اسماعيل).. فيا اصدقائي..انا تعبت من الكتابة عنكم..و عن حال الشوق..متلي متل حمامة بيضا..حارسة شوقا.. و تاني.. Wow!
كبر
| |
|
|
|
|
|
|
Re: .. حمحمة .. (Re: Kabar)
|
بيان..كتبت:
Quote: شكرا ليك..تاني حأعمل ليك مرصد |
حبابك يا صديقة.. فيما يخص المراصد.. اهديك الذكري التالية.. طبعا اكيد بيكون عندك حنين لمدينة الدلنج.. قدام السنما العتيقة..و المكتوب فيها انها اتأسست سنة 1957..كانوا ثلة اصدقاء..يتلاقوا..بيشتروا التسالي..و بيحضروا افلام ازابيل اٍدجاني..متذكراها؟ كلام في الفلسفة..الشعر..المسرح..الرواية..و دي ايتها شلة شباب سوداني بتسويها..لكن! كانت تجربة الشاعر المصري حسن طلب (لمن جيت مصر حتى دوبك عرفت انو حرف الطاء مكسور)..دوبك في بداياتها..و كان بينشر في مجلة الدوحة (الله يطراها بالخير ايام كان الشوش في رئاسة تحريرها)..و لأنهم شباب مفتونين بالمفارقة و الجدة (مؤخرا تبلورت في فهم الحداثة الشعرية..)..اها كان واحد فيهم.. بتولى شرح حسن طلب..و بيقارنو بشعر أمل دنقل ..تماما كما فعل التجاني يوسف بشير ايام المقارنة بين حافظ و شوقي..و ما ترتب عن ذلك من مأساة خصوصية عاناها تجاني..بس الفرق.. انو الشباب ديل كان نقاشهم بعيد عن المؤسسات.. يعني زي ما تقولي ونسة..وقطع شك لو قالوا رأيهم من داخل المؤسسات.. كان عانوا متل تجاني.. كان ذاك الصاحب.. هو صديقنا ابراهيم فضل الله.. هو الذي كان يسافر كوستي (و هو طالب بمدرسة القوز الثانوية)..و يرجع لينا ..يحكي عن ليالي مصطفى سند الشعرية..و منها نقوم تاني نقرا (البحر القديم)..و نقارن..و نناقش..ونختلف..و نتفق..و هكذا..مثل هذه المثاقفة الشفاهية..(قصة ولد المدينة البيحكي لأولاد الريف عن كتب المغامرات)..هي التي هدى الله صديقنا ابكر ادم ..و يكتب لينا عنها في رواية (الطريق الى المدن المستحيلة).. عبر شخصية على الكضاب..و الغريبة هي كانت ظاهرة..و اي شلة اصحاب في الدلنج بيكون عندهم واحد زي على الكضاب.. بيقرا الكتب الغريبة..و بيشارك الناس فيما حازه من معرفة..
و بعد شوية.. اتعلمنا نقرا و نقارن بين تجربة الأستاذ محمود محمد طه..و روافدها من تجربة الشيخ العارف محي الدين ابن عربي..و عشان ابراهيم جاب لينا سيرة ابن عربي.. يبقى لازما نمشي نشوف الجنيد قال شنو..و البسطامي..والحلاج..و غيرهم من اهل الصوفية.. عشان الكلام ما يبقى نضمي ساكت..شفتي جنس المحن دي كيف يا صديقة؟..طلبة مدراس ثانوية ساكت..و يقعدوا يشطحوا متل الشطحات دي..
صديقنا ابراهيم فضل الله..في واحدة من سفرياتو..رجع لينا في ايدو فتح شعري جديد لنج ..و كان ديوان صديقنا الشاعر معز عمر بخيت (البعد الثالث)..و انا ازعم أن ابراهيم هذا هو اول من احضر اول نسخة من الديوان المذكور لمدينة الدلنج..و لأنو كان مدمن مصطفى سند.. فهو اول من ابتدر المناقشة و المقارنة بين نفس مصطفى سند الشعري..و نفس المعز (بالنسبة لي توقفت قرائتي لتجربة معز مع البعد الثالث).. ايامها قرينا تجربة الفيتوري في (معزوفة لدرويش متجول)..و افتتنا اكثر ب(سقوط دبشليم)..
و سيكون ابراهيم اكثر سعادة.. لو عرف أن من تلك المحاججات..سرب صديقنا ابراهيم صاحب الفخامة..تجربة مصطفى سند الى حي المعاصر بمدينة الدلنج .. لنسمع ام دهب الخير تقرأ لنا البحر القديم ..بصوت رخيم فيهو بحة نوارنية.. قرأتها بطريقة لو سمعها مصطفى سند في ذات نفسه .. لكتب مليون بحر قديم..!!
في الشعر كنا نقرأ و نقرأ..و هو اول من فتح عيوننا على تجربة محمد عفيفي مطر..عشان بعد شوية نكتشف ان احد كتبه المدرسية و ممهمور باسمه .. يقبع في مكتبة والد ابراهيم..و هي المكتبة التي استفدنا منها كثيرا جدا..و عفيفي لو داير كتابو ده اٍلإ يدفع بياض..و بعد شوية يمكن يكون في متحفو الخاص (الراجل بقى واصل شعريا)..
و بعد شوية.. نبهنا ابراهيم.. لتجربة استاذنا و صديقنا يوسف الموصلي..و هو اول من حكي لينا عن (الأماني السندسية)..و الفكرة دايما بتبتدي من قولته الشهيرة (يا شباب اسمعوا التجربة دي و ختوها في بالكم)..اها من ديك و عييك.. كل تجربة نسمعها..ولا نقراها.. نختها في بالنا..لمن اتشكلنا بالصورة العرفونا بيها الناس..
من دخولنا للسنما..حكي لينا ابراهيم..انو ازبيل من اصول جزائرية..وكان بيحب كوميديا ايدي ميرفي.. ياااااااااااه..يا بيان..
عرفنا ابراهيم ببيكاسو..وسلفادور دالي..و الفرق بين التعكيبيه..و السريالية..و هو الذي يجيد تأمل وجوه بيكاسو العجيبة..و يشرحها ليك بصبر عجيب..! اما قصة جمهورية افلاطون..و حوارات المعلم سقراط.. دي براها دايرة ليها مناحة طويلة و عريضة.. يبقى مرصدك تب ما خاب..و ليك قدرة على الشوف الجواني..يا صديقة
طبعا الشمار كاتلك عشان تعرفي الشلة دي مش؟ هم ابراهيم فضل الله (صاحبنا هنا)..ومحجوب على عثمان ..وابراهيم فضل الله (صاحب الفخامة)..وعادل اسماعيل (خال عبد الرحمن عزاز)..وشخصي.. و لو ربنا هداهم..و جوا كتبوا عن تجربة تعاطي المعرفة في دروب المدن البعيدة..اكيد ح تفرح ناس كتيرة..فتشكيل الخطوات الأولى براهو معرفة..
شكرا ليك يا بيان..بالمناسبة اخر مرة شفت فيها ابراهيم .. سنة 1986..و التانية هنا في البوست ده.. كبر
| |
|
|
|
|
|
|
Re: .. حمحمة .. (Re: Kabar)
|
Quote: الله يقوم نفسك... ما ممكن كدا... شكرا ليك تاني حاعمل ليك مرصد... |
بيان الباينة متل قمر 14 كيفك والله انبسطة لي انبساطي فايتي علي القوانين زمان أنا قومته نفسك في معهد التربية ... وهسي ابراهيم قوم نفسك بي الدردرة والحمائم الشرسة
لك التحية يا دكتورة
خالد
| |
|
|
|
|
|
|
Re: .. حمحمة .. (Re: Kabar)
|
الأخ الصديق العزيز الغالي .. محمد النور كبر.. سعدت غاية السعادة برؤيتك وسماع صوتك الأديب .. الناقد .. الشاعر ، كعهدي بك ..كلماتك تتلألأ ..ببريق متوثب .. مثل بريق عينيك المتحديتين ..الذي لا يخبو .. وتوثبك..الذي يجعلك دائما في وضعية ديناميكية ..لا ترسو على حال..ولا ترضى بقمة دون قمة ولا تقنع بولوج دغل دون دغل.. زيارتك أخي وصديقي محمد ..وسام .. تعلي من قيمته أيام قضيناها معا .. ومعرفتي بذوقك وذائقتك الأدبيةالراقية..
مادام إتلاقينا ..هنا في حوش بكري .. أكيد حنتلاقي تاني أكتر من مرة بحول الباري ...
قبلتان للإبنتين ..شهد و شروق ..وتحية وإحترام لربة الدار ..
دام لك ودي وتقديري
| |
|
|
|
|
|
|
Re: .. حمحمة .. (Re: Emad Abdulla)
|
الأديب..الشفيف .. عماد عبد الله ..شكرا للزيارة ..وشكرا للإطراء ..فقد جعلتني أمارس عادة التكرفس تحت الأظافر...خجلا وتواضعا ..أمام حلاوة الإطراء... وشكرا على الوقت الثمين الذي بذلته على القراءة والتصفح .. وأكيد حنتشاوف في مرابع تانية..لو مد في الأجل..
دام لك ودي وتقديري
| |
|
|
|
|
|
|
Re: .. حمحمة .. (Re: Tagelsir Elmelik)
|
الرائع تاج السر ...سعدت حقا بمرورك .. كما سعدت بدخولي على لوحاتك البديعة الممتعة ...المرسومة .. والمكتوبة .. وسعدت بالوسام الذي علقته على صدري..في كلمتين ..إثنتين تساويان عندي ..الكثير .. وأثمنهما عاليا...
شكرا على وقتك المستقطع ...
ودام لك ودي وتقديري
| |
|
|
|
|
|
|
Re: .. حمحمة .. (Re: ibrahim fadlalla)
|
Quote: سلام يا ابنكنبة عايزة اذكر اني دقيتك كم مرة.. |
كنتي بدقي خضر الحاج الألفا وجون شول الجاك ابن الشلك الظريف سمعت انه طبيب في خارج السودان تذكري من كانت الفتوة في الفصل زهرة عطية ... ساكنة في المعهد ابوها يعمل في المعهد والتومة عبدالكريم الصول الطويلة
لك التحية يا بيان
خالد
| |
|
|
|
|
|
|
|