|
|
|
 Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
جيت الصباح داخل المكتب وكالعادة أول شئ فتحت الكمبيوتر
والمسنجر بتاع الهوت ميل بشتغل مباشرة عند تشغيل الجهاز
قمت جبت لي كباية شاي بلبن خطيرة كدا عاملها براي
قعدت في الكرسي ونظرت الى الشاشة
واذا بي أجد رسالة ناطة من المسنجر زي الكديسة
ناعمة وريحتها حلوة حلا غريبة .
بس ما قدرت أميز نوع (البرفا) _ (البرفا) دي باللبناني طبعا
تأبرني بيروت شو حلوي ـ حلوي كتير كتير .
(قام (سلوية) باضافتك الى جهات الاتصال لديه .. بعدين الأسئلة
هل تريد السماح لهذا الشخص بالاضافة)
طبعا أنا أول ما شفت (سلوية) ما صدقت وكبست على (نعم)
طوالي جا في راسي موضوع الملايات الحايم وقلت يا ولد يمكن
تكون دي ملاية جديدة . أنا بحب الملايات آآآآآوي خصوصا المطرز
وبعدين دي ملاية سلوية مش ايي ايي ولا زيي زيي
اختفت الرسالة ...
وطبعا بعد كدة ح نبدأ في صفحات الأون لاين عشان نشوف الكبع
ونشوف الضرب تحت الحزام ـ وناس دينق وتراجي ووسام وأساسي
وبشاشا وبيان ومجاهد عبد الرحمن وكي كي صاحبي اللعين .
وأهم شئ نشوف معتز القريش هبب شنو مع الشيوعيين 
| |
 
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
بعد نص ساعة بالضبط من اجابتي بنعم على رسالة المسنجر ، أشوف ليك نافذة تفتح وفيها كلمة (hi)
أجبت فورا : هايين مين معاي ؟؟؟
أجابت : سلوية
مين سلوية ؟
أجابت :أنا سلوية سودانية مقيمة في الخرطوم
أهلا حبابك ، وجبتي ايميلي دا من وين
أجابت : من سودانيز أون لاين
هنا نقز الفار في عبي ونقز معه قلبي..
وبادرتها باستفسار حاد مغلف بنعومة
طيب خير تأمري شئ ؟؟
أجابت لا بس حبيت أتعرف عليك أنا متابعة كتاباتك هناك
هنا دق قلبي ورجف ودخلتني خوفة وبدأ راسي يودي ويجيب ، ياربي دي تكون مسلطة علي من الشيوعيين ولا احتمال تكون هناية بتاعة الملاية ، يا ربي دي منو ؟ مش يمكن يا معتز يكون راجل وعاوز يعمل ليك فيها جكسوية وياخد كلامك وينشرو ليك في الأون لاين وحينها لا ينفع الندم ويا شماتة ابله تراجي وهناية بتاعة الملاية فيك .
قلت : اسمعي يا بت الناس أنا ما بعرف اتعامل مع شخصيات مجهولة ممكن اشوف صورتك .
أجابت : لا والله أنا فعلا سلوية ... انت خايف مني ولا شنو ؟؟
قلت : والله بصراحة خايف منك ، أنا زول عندي مشاكل كتيرة في المنبر وأولاد الحرام ما خلو لأولاد الحلال حاجة .
أجابت : من حقك وأنا ما زعلانة وان شاء الله ح تعرف اني ما بكضب عليك وانا فعلا معجبة بيك شديد .
بدا الشيطان يسوس لي يا زول اركز وخليك تقيل ، احتمال يكون دا الخال دينق لأنه عارف انك بكاي قال يوقعك باسم جكسوية .....
قلت : أسمعي يا أخت لو انتي فعلا صادقة ختي لي صورتك في المسنجر .
أجابت : طيب دقيقة .
وماهي إلا لحظات وتظهر صورة فيها بنتين وتلاتة أولاد (صورة جماعية يعني)
واحدة من البنتين شكلها عادي أما التانية ... يا لهويييييييييي ما بتقدر تعاين ليها مرتين ،،، حلا وحَمَار مبالغة
قلت : انتي اكيد اللابسة الأحمر ...
أجابت : عرفتني كيف .
قلت : صوت الأنامل في الكيبورد كفيل بتحديد ملامح الشخصية الاسفيرية المجهولة .
أجابت : يا سلااااام ... كلامك حلو
واردفت : اسمع المدير جاء ـ بكلمك تاني طيب يا عسل ..
عسل !!! أنا عسل !!! دا أنا عسل اسود
بس عسل طالعة من الشاشة زي العسل ـ حسب الصورة طبعا ..
يبدو أن الموضوع بدا يدخل في الغريق ...
قلت وأنا ارتجف : طيب شكرا على الاعجاب وقد تلعثمت الحروف في كيبوردي ...
انها جميلة ... جميلة حقا ... لا فعلا جميلة ...
يا سلاااااام الجمال دا نعمة
الجمال موجود في كل مكان ... لكن الجمال الأصلي في السودان
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: خضر الطيب)
|
Quote: معتز اخوي
الله يكضب الشينة لكن شكلها دي الرابعة (عجمان)
بختك ياصاحبي بقى عندك اربعة رجول (فور ويل درايف)
برطع يامان قشة ماتعتر ليك |
خضر يا رفيق الدرب
بعد تلاتة تجارب
أول مرة اخوك اتكسر متل التكسرة دي
غايتو كان بقت الرابعة والفال تحت اللسان بشارتك عندي
وسأوقف الضرب الاسفيري على جتتك
وكان جلّت ياني الراجع ليك تاني نواصل موضوع عروس لندن
والعرجا لي مراحا ـ لكن صدقني البنية دي مسخت البنوت
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: حافظ العشا)
|
Quote: يامعتز
انت يجوك ناس سلوية
ونحنا يجونا ناس فلل الياسمين
اها ياخوي كان مسكت ماتفك
وكان فكيت ماتندم
|
حافظ يا عشا البايتات
يازول اخوك مسك نار عديل والجماعة مكسرين
كسير التلج ـ أنا رهيب يا ولد (غرور) عديل كدا
تاني ما بتفك منهم الا حمار الوادي يهنق
ولا وألف لا للندم ودموع الشواكيش
وسنستعمل جميع أنواع عروق المحبة
اذا لزم الأمر ـ
خصوصا أن الأخصائي الكجوري الكبير
كي كي اللعين
سوف يغادر الى السودان .
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: عماد محمود علي)
|
Quote: صديقي الحميم الوجيه ود القريش
صباحك عسل يا عسل ( أها البت ما قالتا ليك ) ،
يا أخوي شنو الحكاية عندك ماشاء الله ( 3 ) ، ما كفنك هسه دي بالله كده شوتها لي بي جاي أخوك عنده واحدة بس وماسنجري عمره ما اشتغل والايميل ما فيهو غير الضكور ديل ، أنا طيب خاطري كده بالبنية دي الكذها لي بي جاي ..... و :
|
لا معليش يا عمدة اسمح لي
إلا دي
نحنا اصحاب آه وفرد للطيش برضو آه
بس أحول ليك رصيدي كله
دي صعبة شوية ـ يعني أنا تاني اتصل بي شنو ؟؟
كدي خليني اشوف ليك مسنجر الياهو
كان لقيت ليك حاجة بلكزها ليك
بعدين يا أخي البت دي مليانة كمية من الحنان
لو وزع على حسان العالم لكفاهن وزاد
تصدق انا ابو تلاتة دا ما قدرت عليهو
يعني انت يا اب واحدة ح تروح في خبر كان
ما ترجاني كتير لأنو الموضوع ما فيهو نقاش
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
قفلت كل النوافذ في الكمبيوتر وبقيت بس فاتح المسنجر
منتظر مدير الهم دا يفرتق عشان البت ترجع تدخل لي في المسنجر .
الساعة بقت اطناشر ضهر ولسة البنية ما ظهرت وانا خلاص حيلي برد وحالتي بقت حالة .
دخل علي المدير العام بدر الدين ـ
يومنا اسود مع المدراء ـ كرهت المدراء وكرهت يومهم ذاتو ـ
طلب مني شغلة ما عارفا هي شنو قلت ليه أنا مشغول بعملا بعدين بعد الضهر .
مرق من عندي ـ بس وصل الباب واذا بالحورية ترسل رسالة على المسنجر (هاي) ـ
أجبت هايين يا عسل . وينك مالك اتأخرتي كدا .
قالت : معليش أنا آسفة (البوس) بتاعنا دا ممل خالص ـ
أممممك جابت ليها بوس من أولا ـ
(البوس)؟؟؟ ـ بوس شنو يا ود القريش ـ متين وصلنا مرحلة البوس ...
بعد شوية اتذكرت (البوس) يعني كبيرهم الذي حرمنا من المسنجر ـ ايوااااااا ـ
اما انك غبي وتفكريك بس في متل الحاجات دي ـ بوس ـ ملاية ت سرير ـ والذي منو .
ما خاتية عليك هناية بتاعة الملاية كان قالت عليكم انت ومجاهد شذاذ الآفاق .
المهم اتونسنا ونسة عامة ـ
سالتها عن بوستاتي المتابعاهم ورايها شنو في كتابتي عن الشيوعيين ـ
وأخوكم عامل فيها ولا الطيب صالح .
أها حسيت بالبنية اطمأنت شوية قلت أنا اعصر زيادة ..
قلت : بالمناسبة الصورة الرسلتيها لي دي انتي ما واضحة فيها كويس
(غايتو كضاب كضب) والله الصورة واضحة .
قالت : خلاص يا عيوني دقيقة ح أرسل ليك واحدة تانية ،
بس توعدني انو مافي زول يشوفا ولا تكلم زول بي موضوعنا دا
رديت بسرعة البرق : أكيد والله مافي زول ح يشوفهم ولو عاوزاني امسحهم بعد ما اشوفهم ح امسحهم .
قالت : لا خلاص شوفهم واحفظم عندك ...
وماهي إلا لحظات وياتيني القمر يتهادي من الشاشة .
الآن تذكر اللحظة ديك وما أظني بقدر اواصل ليكم هسة
اشوفكم بكرة ... وامكن ما أواصل خالص ...
ما تسالوني ليه ...
لأني ما ح اقدر اقول
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
حتى هذه المرحلة مازال التواصل بيننا عبر الكيبورد والشاشة البلورية
وما زال الفار ينقز في عبي ولكنها نقزات حنينة هادئة ورومانسية
حتى الآن يمكن أن يكون كل الموضوع عبارة عن مقلب دولي وفصل بايخ
يلعبه معك أما صديق غليظ أو عدو خطير (وفي الحالتين أنا الضائع)
ولكنني مستمتع بهذا الحنان الذي نزل على قلبي خصوصا انه كل حريمنا
قد غادرونا للسودان إما للإجازة أو للولادة ـ عقبال العذابة والعقّر
لابد من الخطوة التالية لكي يطمئن قلبي ...
لابد أن اقطع العرق واسيّح الدم ...
ولابد أن استعد لفقدان تلك الحروف المفرحة
ان كان الموضوع مزاحا أو كمينا
| |
|
|
|
|
|
|
|
|
 Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
صديقي الحبيب الأناني ود القريش
أنعمت ظهراً ،،،
Quote: لابد من الخطوة التالية لكي يطمئن قلبي ...
لابد أن اقطع العرق واسيّح الدم ...
ولابد أن استعد لفقدان تلك الحروف المفرحة
ان كان الموضوع مزاحا أو كمينا |
يا فردة الظاهر البت دي فعلاً لحست عقلك ، يا اخي علشان تعرف حقيقتها خلها تشغل الكاميرا بتاعت الكمبيوتر وهي بتكتب ليك في الماسنجر علشان تعرفها هي ولا لا وكمان خليها تديك رقم جوالها علشان تعرفها وكمان تسمع صوتها ويبقى الموضوع أمامك صوت وصورة . أها رايك شنو ....
| Quote: مازلت أنازع نفسي هل أكمل القصة أم أستمتع بها وحدي |
غايتو جنس أنانية عليك ... براك دي شنو قلنا شوتنا لينا قلت لا أها كمان عايز تحرمنا من المتابعة بعدما شغلتنا معاك بيها . غاتيو الدنيا دي فيها جنس حظوظ ، هسه أنا ماسنجري والايميل يشحدوا الله العافية . جنس ضكور .... الله كريم . خلاص يافردة البنية دي خليناها ليك لكن لو جات واحدة تاني دي تكون من نصيب أخوك أها حاجزين من هسه .
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: عماد محمود علي)
|
Quote: صديقي الحبيب الأناني ود القريش
أنعمت ظهراً ،،، |
العمدة يا اعز عزيز في دنيانا
انعم الله عليك بالصحة والعافية
والجكس في مسنجرك
| Quote: يا فردة الظاهر البت دي فعلاً لحست عقلك ، يا اخي علشان تعرف حقيقتها خلها تشغل الكاميرا بتاعت الكمبيوتر وهي بتكتب ليك في الماسنجر علشان تعرفها هي ولا لا وكمان خليها تديك رقم جوالها علشان تعرفها وكمان تسمع صوتها ويبقى الموضوع أمامك صوت وصورة . أها رايك شنو .... |
هي من ناحية لحست مخي دي لحست مخي ودمي ومخ عظمي .
أما بالنسبة لوصاياك العشرة ، دي كلها حصلت يا فردة بس باقي لينا موضوع الكاميرا دا والقصة جاياك ما تستعجل على رزقك
| Quote: غايتو جنس أنانية عليك ... براك دي شنو قلنا شوتنا لينا قلت لا أها كمان عايز تحرمنا من المتابعة بعدما شغلتنا معاك بيها . غاتيو الدنيا دي فيها جنس حظوظ ، هسه أنا ماسنجري والايميل يشحدوا الله العافية . جنس ضكور .... الله كريم . خلاص يافردة البنية دي خليناها ليك لكن لو جات واحدة تاني دي تكون من نصيب أخوك أها حاجزين من هسه . |
خلاص يا عمدة عشان خاطرك ح نواصل الموضوع حتى النهاية ... نهاية شنو يا زول مافي نهاية ذاتوو
بس خلوني شوية شوية ـ عشان انا غرقان لي شوشتي في الحب والمحنة .
بحكي ليكم بي رواقة ... وليك على أعمل ليك اعلان في البوست دا واخليك تحاحي في النحل محاحا.
بس اول خطوة تعملا تطفش الضكور ديل من مسنجرك ـ عشان النحل بخاف منهم ـ أو أفتح ليك خلية جديدة
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
قررت قطع العرق وتسييح الدم ـ
ويا غرقت يا جيت حازما
طلبت منها أن ترسل لي رقم هاتفها حتى اتاكد أنني اتكلم مع من يكتب لي في المسنجر ..
ترددت قليلا ثم قالت لي بطارية هاتفي غير مشحونة وهاتفي مغلق
لم يكن ذلك مقنعا لي ولم استسلم طلبت منها رقم هاتف المكتب حتى أكلما عليه
وأيضا تحججت بأنها لا تستطيع اعطائي رقم هاتف المكتب لأن المكتب مليان ناس ومعاها موظفين في المكتب .
هنا بدا الفار ينقز بقوة مرة اخرى في عبي وبدات اعود قليلا قليلا الى المربع الأول .
قلت لها : انتي ما تتكلمي أنا ح أتصل وانتي قولي الو بس .
وأخيرا اقتنعت وأعطتني رقم هاتف المكتب واسرعت الى جوالى واتصلت على الرقم .
رررن رررن رررن رن الهاتف وشعرت بمن رفع السماعة ...
قلت الو ... قالت ... ألو
تجمد الدم في عروقي وأحسست بالدنيا تدور بي ولا تقف .
وتذكرت ألو بتاعت كي كي الكسرت تلفونو
قلت منو معاي
قالت معاك سلوية
وانقطع الاتصال الهاتفي ، وبعد ثانية انقطع اتصالي بمسنجرها.
وظهرت لي هذه رسالة
(قد لا تتلقى ردا من سلوية ، يبدو أن سلوية غير متصل الآن سيتم تسليم الرسال عندما يقوم سلوية بالاتصال)
ونواصل ........
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
بعد عشرة دقايق عاد الاتصال وجاءت الرسالة التالية
(لقد تم تسجيل دخول سلوية)
برقت عيناي ومازال صدي صوتها يسري في جسدي
من اذني الى اخمص قدمي كانه دوزنة
من الأنغام ترسم سيمفونية الخلود ... انها موسيقى ما سمعت مثلها
وأنا العازف الموسيقي والمستمع لكل صنوف الغناء والموسيقى
ألــو ... معاك سلوية ...
هل هي شقشقة عصفورة أم مزمار داؤود
هل هو صوت الحنين النابع من جوف الحنان
ألـــو ... معاك سلوية ...
كلمات تنساب كما النسيم العليل
ظلت تداعب طلبة أذني
كأنها....
كأنها ماذا ؟؟؟ ....
لا ادري ...
ويا ويلي وويلي أهلي عندما ادمج الصوت والصورة
ساعود اليكم ... امهلوني ... زادت نبضات قلبي
وتصبب العرق من كل جسمي ...
كأنني مسكون ...
حقا أنا مسكون ..
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
عاد الاتصال وسالتها
خير ان شاء الله النت قطع مالو ؟
أجابت : لمن سمعت صوتك رجفت والنت قطع ما حسيت بيهو
ما عارفة في شنو ..
قلت : يعني صوتي مرعب للدرجة دي ـ حركة طبعا..
أحابت : لا صوتك رهيب
اللـــــــــــــــــه
ما كنت متخيلاهو حلو كدا
هنا اصبت بغرور حقيقي ولكن كان لابد من التواضع
قلت : أعتقد صوتي انو عادي _ عادي يعني صوتي ـ ما للدرجة دي يعني (لاحظو اللخبتة في الكلام)
قالت : لا لالالا صوتك جميل وحنون كمان ـ انت باين عليك حنيّن شديد
عشان كدا يكون نسوانك التلاتة بحبوك شديييييييييد صاح ..
(نسوان شنو يا بت الناس .. دا وكت نسوان)!!!!!!!!!!!!
ثم يدور الحوار طويلا بيننا ـ لم تتردد بتعريفي بنفسها
اسمها كاملا وقبيلتها ومكان سكنها ومكان عملها وطبيعة وظيفتها
وارسلت لي صور اخري وهي في المكتب وهي في مكان ملئ بالأشجار
مكان يشبه الفيــلا ... وصورة في حفل زواج ... اللــه من دي بالذات
وكانت كل صورة أحلا من سابقتها
وارسلت لها مجموع من صوري ...
اخترت احلا صورة من صورها بعد حيرة شديدة
(وصورها كلها حلوة ...)
وأدخلتها الفوتوشوب وعالجتها وارسلتها لها لتضعها على المسنجر
ايضا لم تتردد ووضعت الصورة ووضعت أنا صورتي ودار الحديث بيننا
هادئا ناعما رومانسيا مليئا بالمودات والمحبات وكأننا نعرف بعضنا من سنين
نقرا ما تخط كيبورداتنا ونشاهد صور بعضنا البعض ...
انتهت مواعيد الدوام ولابد من الفراق ... آآآآآآآه من الفراق
ولسان حالنا يقول (أودعكم افارقكم ... لا لالالا ما بقدر ... أودع أودع اودع كيف ... افارق افارق افارق كيف)
كل منا لا يريد أن يخرج أولا
تقولي لي : أقفل
أقول ليها : لا اقفلي انتي
أخيرا خرجنا سويا ـ عدينا من واحد الى تلاتة وعملنا خروج
ولكن قبل أن نخرج من المسنجر ـ أعطتني رقم هاتفها الجوال..
ونواصل ....
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
Quote: وكالعادة أول شئ فتحت الكمبيوتر
والمسنجر بتاع الهوت ميل بشتغل مباشرة عند تشغيل الجهاز
قمت جبت لي كباية شاي بلبن خطيرة كدا عاملها براي
قعدت في الكرسي ونظرت الى الشاشة |
ود القريش
كيف تكون مدير شئون الموظفين و الموارد البشرية و أنت اول حاجة بتعلها في يومك تدخل في الماسنجر بتاع الهوت ميل
Quote: قفلت كل النوافذ في الكمبيوتر وبقيت بس فاتح المسنجر
منتظر مدير الهم دا يفرتق عشان البت ترجع تدخل لي في المسنجر . |
علي باليمين ود الامير ده يشغلني معاه مدير للكمبيوتر و تقنية المعلومات إلا الهوت ميل و الياهو و سودانيز اون لاين ده ما تشمها إلا قدحة.
و اللع احيرك ، البريد الإلكتروني تدخل ليها بواسطة برامج محددة و ثابتة مثل الاوت لوك و ما أخليك تقدر تفتح اي حاجة و كمان يكون هناك مراقبة إدارية عن اي شاردة و واردة حتى على مدير الشئون الإدارية ...
أهه كده ممكن شوية نكبح جماحك و نخليك تبطل البكى ده.
بعدين تعال
إنت ما قلت الزولة المعجبة دي إتعرفت بيك من خلال كتاباتك في سودانز اون لاين, تقوم تفضحها هنا ، اكيد هسع هي متابعة البوست ده.
قايتو يا معتز يا أخوي إحسن تعرس الرابعة و تفكنا و بعده ما تجي تدخل في اي بوست بتاع جكس و كده لانو شرعيا ما عندك حجة ( قلت شنو) و ما ملكت إيمانكم دي بقت ما موجوده.
تحياتي
*******
إحتمال كبير نجي قطر زيارة انا و البنات وأمهم في الصيف ده ، بس بعد ما كيكي يرجع من السودان عشان نضرب كل العصافير بحجر واحد
عمار يس النور
عاشق بخت الرضا
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: عمار يس النور)
|
غايتو يا عمار يس
زمني دا كلو وأنا زميلك وصاحبك وهسة نسيبك كمان
ما قايلك حاسد قدر دا
يا ربي دا حسد ولا غيرة بالنيابة عن بت عمتك
* يا سلاام اسعد خبر حضوركم الى الدوحة ...
نحن في الانتظار نحسب الساعات ...
* بالمناسبة الفارس سيشرف يوم الثلاثاء القادم
ان شاء الله ... دعواتكم ...
عنكبة : نحنا نصيحة المدير ما بناباها إلا الفيك اتعرفت .
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: Siddig A. Omer)
|
Quote: معتز.......
انا داير اقول "كلمة واحدة بس"
كان شوفته السودان الكبير دهــا.....عايش "بفد" "عقل"
منعول "ابوكى بلد""ابوكى بلد""ابوكى بلد"
قاعد معاك و مع عبد الكريم "صديقى "
لا أستطيع أن اقول "كيكى"......"يعنى ابرة ودر"... وعبدو "يعلم ما أعنى"
صديق القاعد بعيد |
صديق يا القاعد بعيد
ان شاء الله كان فاهم حاجة ألحس المكوة حاااااااااااااااااااااارة
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: Abd Alla Elhabib)
|
Quote: بالمناسبة الفارس سيشرف يوم الثلاثاء القادم
ان شاء الله ... دعواتكم ... |
نسأل الله ان يتم عليكم بالخير
***************
نشوف ذاكرتك قوية
نوتة موسيقية قبل 30 سنة :
فا ري ، فا ري ، دو فا
لا صول لا ، دو لا سي
ري دولا دولا
صول لا ، صول لا صول فا
========
ودي كمان (طريق الشوق) :
دو مي ري ري
مي دو مي دو ري لا دو
ري لا دو ....
نسيت الباقي
===============
و دي بتاعت المارش :
مي مي
ري دو ري مي مي
مي مي
ري دو ري مي مي مي
******************
اهه لقيتني كيف متذكر و إلا لا
عارف مرة يا معتز في جامعة الخرطوم واحد من المتحنكشين شويه حبه يستعرض علي و قال لي نمشي نشترك في جمعية الموسيقى ، قلت ليه و الله انا ما عندي وقت و مزنوق شويه في الأكاديميات ، ضحك و قال لي أكيد إنتو في الدويم ما حصل لمست ليك آلة موسيقية أبدا.
طبعا رديت عليه بقوة وقلت ليه انا لمن درست الموسيقي على يد أستاذ محترف و كمادة أساسية في المنهج كنت في الصف الثالث الإبتدائي و من خلال أوكسترا مكتملة. و الله العظيم زولك ما صدق و إفتكرها مبالغة مني و اديتو ليك زيادة و قلت ليه و كمان تعلمت السباحة في حوض سباحة محترم و على ايد أساتذة محترفين في مدينة رياضية تعد في ذلك الزمن من اجمل المدن الرياضية المكتملة في السودان و العالم العربي و الأفريقي.
معتز ،
ما عندك صور لتلك الفترة؟
عليك الله لمن تمشي الدويم في الإجازة أمشي بخت الرضا و بالأخص للأستاذ عبد الفضيل حسن ممكن يساعدك في بعض الصور.
تحياتي
عمار يس النور
عاشق بخت الرضا
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
والله انا متداخل عشان حاجتين الاولي تعليق والتانية سؤال
قسما بالله لو ان سخافات الدنيا كلها، وثقل دم جميع القراد الحي منه والميت ، اجتمعت كلها في سخافة واحدة وثقل دم واحد لما بزت هذا البوست الذي لا يصبر علي سخافته سيدنا ايوب ولن يستطيع معه صبرا سيدنا الخضر نفسه.
بوست ملي بالايحاءات الجنسية وانت رجل في عصمتك كوم نسوان و مع كل واحدة كوم شفع (ربنا يحفظهم) هل تستطيع ان تكتب في هذا البوست امامهم؟ ان قلت لا فذلك يدل علي انحراجك مما تكتب فارحنا وارح نفسك، وان كنت تسمح لهم فاعتقد ان البوهيميين والهيبيز قد نسوا زعيمهم في قطر.
ثم يا اخ لماذا عندك مشكلة مع الجنس؟ مرة مع الشيوعيون والموضوع جنسي ومرة مع هنادي والموضوع جنسي ، المرض ليس عيبا والعلاج واجب .
ثانيا وناتي الي السؤال هل اذا اقترنت مع هذه المجهولة وصار في عصمتك اربعة نساء وقابلت واحدة تانية بنفس الطريقة فماذا ستفعل؟ هل ستستعمل معهن FIFO ولا LIFO؟ وما مصير الابناء؟ ولا اقول ذلك خوفا علي ابنائك من التشرد والضياع وانما اوضح الصورة لكي لا ينخدع من في قلبه مرض متوهما السعادة التي انت فيها وابناءك لهم الله فتكفيهم مصيبة انك والدهم.
والله يا معتز لو ما انت وصلاح غريبة المنبر دا يبقي امسخ من كتابتك دي.
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: خضر الطيب)
|
Quote: والله انا متداخل عشان حاجتين الاولي تعليق والتانية سؤال
قسما بالله لو ان سخافات الدنيا كلها، وثقل دم جميع القراد الحي منه والميت ، اجتمعت كلها في سخافة واحدة وثقل دم واحد لما بزت هذا البوست الذي لا يصبر علي سخافته سيدنا ايوب ولن يستطيع معه صبرا سيدنا الخضر نفسه.
بوست ملي بالايحاءات الجنسية وانت رجل في عصمتك كوم نسوان و مع كل واحدة كوم شفع (ربنا يحفظهم) هل تستطيع ان تكتب في هذا البوست امامهم؟ ان قلت لا فذلك يدل علي انحراجك مما تكتب فارحنا وارح نفسك، وان كنت تسمح لهم فاعتقد ان البوهيميين والهيبيز قد نسوا زعيمهم في قطر.
ثم يا اخ لماذا عندك مشكلة مع الجنس؟ مرة مع الشيوعيون والموضوع جنسي ومرة مع هنادي والموضوع جنسي ، المرض ليس عيبا والعلاج واجب .
ثانيا وناتي الي السؤال هل اذا اقترنت مع هذه المجهولة وصار في عصمتك اربعة نساء وقابلت واحدة تانية بنفس الطريقة فماذا ستفعل؟ هل ستستعمل معهن FIFO ولا LIFO؟ وما مصير الابناء؟ ولا اقول ذلك خوفا علي ابنائك من التشرد والضياع وانما اوضح الصورة لكي لا ينخدع من في قلبه مرض متوهما السعادة التي انت فيها وابناءك لهم الله فتكفيهم مصيبة انك والدهم.
والله يا معتز لو ما انت وصلاح غريبة المنبر دا يبقي امسخ من كتابتك دي. |
لم يمر علي في حياتي اسخف من هذا الكلام وكاتبه ..
| |
|
|
|
|
|
|
|
|
|
Re: ألحقني يا كي كي (ألو) الكسرت تلفونك رمتني من الكرسي بُردُلُب (Re: معتز القريش)
|
ود القريش
شنو يعني ما علقت على مداخلتي دي ،
Quote: نشوف ذاكرتك قوية
نوتة موسيقية قبل 30 سنة :
فا ري ، فا ري ، دو فا
لا صول لا ، دو لا سي
ري دولا دولا
صول لا ، صول لا صول فا
========
ودي كمان (طريق الشوق) :
دو مي ري ري
مي دو مي دو ري لا دو
ري لا دو ....
نسيت الباقي
===============
و دي بتاعت المارش :
مي مي
ري دو ري مي مي
مي مي
ري دو ري مي مي مي |
ما وريتني رايك ، أطلع فوق بتلقاها
اهه طلعت متذكر أم لا ؟
تحياتي
عمار يس النور
عاشق بخت الرضا
| |
|
|
|
|
|
|
| |
معتز القريش
عبدالكريم الامين احمد
محمد البشرى الخضر
محمد عمر الفكي
ابو تميم
Hisham Osman
خضر الطيب
..... 
عمار يس النور
Kostawi
هند محمد
Abd Alla Elhabib
الصادق خليفة
Siddig A. Omer
peace builder
فيس بوك
تويتر
انستقرام
يوتيوب
بنتيريست