ما انفك وزير العدل السوداني يحدث العالم عن النظام العدلي السوداني وعن حياده وفاعليته ومقدرته... الخ...
ياراجل خليك من دارفور ... ديه تاني مرقت من يدك...! حا تسلموهم ... حا تسلموهم.... ده موضوع انتهي .... خليه...!
ورينا الكتل اهلنا في امري منو...؟ الان اكثر من عام...! وعدت اهلنا باصدار تحقيق عن جريمة القتل.... الي اليوم لا طلع تقرير ولا اتعرف القتل اولادنا منو...! بالرغم من إنه القاتل معروف لديكم ... لكنك تتستر علي الجريمه.... وينو النظام العدلي بتاعك البتكلم عنه العالم...!
الجريمه وان اختلف المقدار واحده... قتل وتهجير قسري ( جريمه ضد الانسانيه)... لو استمرت الحكومه في التستر طبعا سكة القضاء الدولي فاتحه ... وحا نلاحقهم.... في بورتسودان هجمت قوات غير معروفه علي مدنيين عزل وقتلت فيهم 28 شخص... اين نتائج التحقيق وين المحاكمات...! بتفتكروا الناس بنسوا دمهم ولاشنو...! الناس البضربوا المدنيين ويقتلوهم ديل اجانب ولا عساكر تابعين للحكومه... ما تحاكموهم عشان تثبتوا للعالم انه في نظام عدلي... مشكلتكم إنه الواقع بهزمكم... وبتعتقدوا انه العالم ما عارف وما متابع ... مع انه ديه كلها جرائم مرصوده... وقتها جايي...
قفلت جميع ابواب العداله امام اهلنا...! وصرحت انك في اسبوع حا تعلن نتيجة التحقيق... الان اكثر من عام... وتتستر...! ما بحل...! بس تأكد إنه دمنا ما حنخليه...! يا تشوفوا القتل اولادنا وتحاكموه ...او في غير ذلك سكة العداله فاتحه...وإجراءتنا ماشه!
حبل الكذب قصير...
05-05-2007, 08:01 AM
Asskouri Asskouri
تاريخ التسجيل: 06-17-2003
مجموع المشاركات: 4734
يمكن جرائم الاباده والجرائم ضد الانسانيه وغيرها... تكون جرائم كبيره ... والقصور الذاتي والموضوعي بالاضافه للتستر وغيره ...وكذا... ما بمكنك انك تعمل فيها حاجه... وزي ما مرقت دارفور من تحت يدك... التانيات شكلهم حا يطلوعوا للعالم برضه.... عشان كده ما تضيع وقتك... نديك وحده ( صغيره) يا سيادة الوزير ( تقزقز بيها) وتثبت مقدراتك وتوري العالم نظامك العدلي المستقل...!
سته من اولادنا مرميين في سجن كوبر ليهم اكتر من شهر .... بدون اي تهمه....! ما عايزنك ، تطلق سراحهم...! ( عشان كمان نكون موضوعيين وما نكبر عيك الشغلانيه) فقط وضح لينا ووضح للعالم التهمه في حقهم شنو!
إنشاء الله دي ما تكون صعبه... قال نظام عدلي عدلي قال...
05-05-2007, 09:04 AM
abubakr abubakr
تاريخ التسجيل: 04-22-2002
مجموع المشاركات: 16044
ياعلي..قبل هذا الوزير وعندما كانت الوزارة تتبع لواحد من قيادات الجبهة كان الامر واضحا لا يحتاج الي دليل او مناقشة وزير عدل جزء اصيل من النظام والسلطة والوظيفة شكلية اما هذا والذي اتي باسم حكومة وحدة وطنية ومعارضة كانت يوما فامره غريب ويبدو ان الانقاذ او المؤتمر الوطني قصد من التنازل عن وزارة العدل ليثبت للمعارضة انها اي المعارضة لا تسوي شيئا وان العدل هو ما تراه الانقاذ لا وزير العدل ...كيف لا يستقيل مثل هذا والفشل ملازمه منذ اتي ؟؟ ...
05-05-2007, 10:03 AM
Asskouri Asskouri
تاريخ التسجيل: 06-17-2003
مجموع المشاركات: 4734
الوزير الظاهر ولا كان عايز يحقق في القتل من اصله..... بعد اكثر من اسبوع من وقوع جريمة القتل (22-04-06) حتي اصدر قرار بتكوين لجنه... الظاهر في جهه ( لكزته)... لانه اثبتت الايام إنه الرجل اصلا ما كان عايز يحقق عشان كده وبعد عام كامل لم تظهر اي نتيجه للتحقيق... ويظل القتله طلقيين..
Quote: لجنة قانونية للتحقيق في أحداث أمري الصحافه 30-04-06 وزير العدل يشكل لجنة قانونية للتحقيق في أحداث أمريالخرطوم:
الصحافة:اصدر الاستاذ محمد على المرضي، وزير العدل، قرارا يقضي بتشكيل لجنة برئاسة المستشار النذير حامد الفكي وعضوية آخرين للتحري في الاحداث التي وقعت اخيرا بمنطقة امري، وفوض القرار - بحسب المركز السوداني للخدمات الصحافية - المدعي العام، بالاشراف على عمل اللجنة، وجوز القرار للجنة الاطلاع على كافة الوثائق واستجواب اي شخص يشتبه في تورطه بالاحداث.وحدد قرار وزير العدل مدة اسبوع واحد فقط لاكتمال عمل اللجنة ورفع تقريرها النهائي، على ان تبدأ اللجنة تحرياتها اعتبارا من يوم غد الاحد.
05-05-2007, 08:21 PM
Asskouri Asskouri
تاريخ التسجيل: 06-17-2003
مجموع المشاركات: 4734
الراجل ديه إنضم للمؤتمر الوطني منذ فتره... والظاهر إنه الموقع بتاع النائب العام ده كان جزء من ( الديل) طبعا خرج من حزب الامه ( بكل تفرعاته) وجاك يامؤتمر وطني... طبعا جماعة المؤتمر شطار جدا... مسكوه ليك حته حاره جدا.... الراجل لقي نفسه محتاج يدافع عن جرائم الانقاذ منذ 1989... ده اسمه سؤ الخاتمه... الراجل ده تاريخ كان كويس ونضيف... الجماعه انتهوا ليك منو طبعا...
والله اهلنا( كرعينهم حفت) يساسقوا لي مكاتب النائب العام... ياخي ديل رافضين حتي يفتحوا بلاغ ضد مجهول..! للدرجه ديه بستخفوا بحياة اهلنا...! الرجل ده انا لمان كنت بالماليه حضرت معاه كم اجتماع لما كان في اقليم كردفان ايام الديمقراطيه... وكان رجل نضيف وجيد... بقدرة قادر اصبح مدافع عن كبريات الجرائم... واصبح يتستر علي الجرائم... في عرض النهار... انا حقيقة منذهل لهذا التحول الذي اصاب الرجل في هذه المرحله من عمره...!! هل هو المنصب ؟ هل هو المال؟ والله غلبني...! لوكان زول جديد في السياسه او تجربته محدوده... كان الواحد يقول انه ( يمكن اضحك عليه)... لكن لي شخص عنده تجربه ما شويه... وملم بالحاصل في البلد يجي ( ينتحر) هذا الانتحار وينهي تاريخه بهذه الصوره فعلا امر يحير... غايتو نسال الله حسن الخاتمه....
05-06-2007, 09:04 AM
Asskouri Asskouri
تاريخ التسجيل: 06-17-2003
مجموع المشاركات: 4734
ومن جانبه وصف وزير العدل محمد على المرضى تصريحات المدعى العام للمحكمة الجنائية الدولية لويس مورينو اوكامبو التى تتحدث عن معاقبة هارون وكوشيب المطلوبين للمحكمة الدولية بالسجن بانها تجاوز للفهم الصحيح للعدالة وقال المرضى فى تصريحات صحفية امس ان اوكامبو بحديثه عن العقوبات جرد نفسه من الفهم الصحيح للقانون السليم والنظرة العدلية وجدد ان المحكمة الدولية غير مختصة بمحاكمة اى سودانى وشدد وزير العدل أنه إذا تم القبض على أي مواطن سوداني بواسطة المحكمة الجنائية أو عن طريقها فان ذلك سيكون نوعاً من القرصنة الدولية لا تختلف في هذه الحالة عن عمليات الاختطاف التي تمت لرئيس بنما الاسبق نوريقا.
اوكي يا السيد الوزير ... ............ ......... ....... ورينا إذن ... "الفهم الصحيح للعداله" في اعتقال ابنائنا بدون تهمه... وفي انتهاك حرماتنا وسفك دماء ابنائنا من دون تحقيق ولا أتهام...! انتو عندكم ( مفهومين) للعداله يعني!.. مجرد اتهام وجه لبعض كادركم بعد اكثر من عامين من التحقيق... ما قبلتوه... نحن الان لدينا ثلاثه قتلوا برصاص مليشيات ادارة الخزان والي الان ما في تحقيق... ولدينا سته لهم اكثر من شهر مرمين في السجن بدون تهمه... هو دا الفهم الصحيح للعداله....!
05-06-2007, 11:57 PM
Asskouri Asskouri
تاريخ التسجيل: 06-17-2003
مجموع المشاركات: 4734
كلامك في الصميم وفي وجه سلطان جائر وبالدليل القاطع.
عندما يكون هناك مقترح لتوسعة الحرم المكي الشريف يتم معرفة ملاك الأراضي التي تقع فيها التوسعة، ومن ثم الترضية التي يريدونها من قطع أراضي وتعويض بذخي وبسخاء لكل المتأثرين بهذه التوسعة (توسعة بيت الله )!!!! ووالله وصلت يوما لأحد معارفنا في السودان أن يذهب كمندوب عن أهله ومعه كل الوثائق والمستندات، وتم عمل زيارة له من قبل الحكومة السعودية وذلك أن جدهم الكبير قد غادر وجاور في الحرم المكي الشريف، وله قطعة أرض سوف تدخل في توسعة الحرم. وأتي الرجل بالمال الذي فاق التوقعات وهم راضين كل الرضا عن مالهم وعن تنازلهم للحرم الشريف.
أما في وطننا وبين أهلنا يقتل المواطن في أرضه وبين أهله ! ويهجر المواطن إبن أرضه البكر البتول قسوة وعنوة وتحت الرصاص !!! الى الصحراء القاحلة الجافة. وليتهم فعلوها بالتراضي والتعويض المناسب بل بالحقارة والإستخفاف والتهاون بمصالح الناس وأرواحهم وأرضهم،
لكم الله أخوتنا مظلومين أمري وتقبل الله شهدائكم قبولا حسنا! والحرب طويلة مع أهل الغاب لأن الفساد وظلم العباد في أهم مكان ((( وزارة العدل )))!!!!!
وما ضاع حق وراءه مطالب،،
هشام
05-07-2007, 11:14 AM
Asskouri Asskouri
تاريخ التسجيل: 06-17-2003
مجموع المشاركات: 4734
الاخ هشام التحيه شكرا لهذه المساهمه القيمه وشكرا علي التضامن....
والله يا اخي هؤلاء القوم نحن في الحقيقه ما طالبين منهم حتي ( تعويض)! وقلنا لهم هذا الحديث... قلنا ليهم ابنوا خزانكم وامشوا... ولكن يجب ان لا تحاولوا اخراجنا من ارضنا.... ده كله ما كان كافي ... هم مصرين مش يبنوا خزان... مصرين انه يهجرونا بالقوه الي الصحراء... ده اصبح همهم الاساسي.... وهم طبعا ليهم فتره يفتشوا ليهم لي فتنه وحرب في الشمال... والان لقوا ليهم واحده...! اما هذا الرجل فليس له ادني احترام لنفسه ولو كان بحترم نفسه... ما كان بقول الكلام البقول فيه ده... ما هو حبل الكذب قصير... هسي الانقاذيين حا يفكوه عكس الهواء... بالرغم من استماته في الدفاع عنهم والدفاع عن الباطل والظلم...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Asskouri
abubakr
Hisham Ibrahim
فيس بوك
تويتر
انستقرام
يوتيوب
بنتيريست