|
|
|
 Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
لما كنا تلاميذ في مدرسة بخت الرضا
كانت زيارات المواقع من اجمل الاوقات بالنسبة لنا
كانت زيارة المستشفى , والعياده الطبية , والطاحونة .
.ووووووو كنا نتوق دوما لمثل هذه الزيارات ومعنا اساتذتنا
تذكرت هذه الزيارات قبل اسبوعين من الانقلاب المشئوم ,
عندما تم تعييني في تلفزيون السودان
في منتصف الثمانينات من القرن الماضي ,
حيث زارنا عدد 16 ضابط من كلية القادة والاركان
كان من ضمنهم عدد كبير من اعضاء مجلس قيادة الانقلاب ,
تمت الزياره بصورة عادية جدا ,
حيث ان الكثير من طلاب الجامعات والمعاهد العليا
وطلاب الكلية الحربية كانوا كثيرا مايقومون بمثل هذه الزيارات
للتعرف على التلفزيون والاذاعة ,والمسرح
في حينها لم نستغرب هذه الزيارة ,
ولكنها للاسف كانت الزيارة التي اعقبتها المرارة ( وبعد داك بقت ام فت فت )
ونواصـــــــــــــــــــــل
| |
 
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
الحبيب ابو البشير
لدينا من مثل تلك المصطلحات الكثير الذي جادت به علينا ثورة الاجعاز ,
وساورد الكثير من التفاصيل التي لايعلمها الكثير من اعلامي الانابيب
المطبلين الذين ركبو قطار الانقلاب بعد ان انقلب على من اتو به
كت اووت :-
مره بابكر حنين قال لي عوض جادين , والله ياعوض جادين جبتا لينا ناس في التلفزيون دا السيل مايجيبم
ودي كانت من المفارقات العجيبة , منظم ,,, يؤاخذ منظم
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
الراقية اخت الشهيد
تحياتي لك وللاسرة
تعرفي يا استاذه منى , اذا كل واحد فينا بحكي المرارات العاشا
حنوصل رسالة قوية جدا لهؤلاء المدافعين عن الشيطان الاكبر حكومة
ال ..... وحقيقة يامني اعلامي الانابيب ديل الحكومة اتفضلت عليهم بالكثير
انتشلتم من مناطق وظروف يعلم بيها ربنا , ليهم الحق يطبلوا
لانهم خدعوهم ( خدعوها بقولهم حسناء , والغانيات يغرهن الثناء ) وقالوا ليهم انتو ممكن تكونو بشر ,
واتخيلي بعد داك
كيف بكون الولاء !!!
كت اووت :-
اقعدي واتحكري , بس ماتجيبي لي صورة جحشك ديك ,
, لانو البوست دا ممكن يتملي بال...... ..
وبيني وبينك انحنا ماناقصين ..وتسلمي ياغالية
(عدل بواسطة خضر الطيب on 04-20-2007, 08:58 PM)
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
كانت تلك الزيارة لضباط كلية القادة والاركان
والتي كانت في حقيقتها زيارة استكشافية
من هؤلاء النفر لتفقد المداخل والمخارج
لمبنى الاذاعة والتلفزيون ولاحكام الخطة للسيطرة
على هذه الاجهزة ساعة الصفر , من اهم ماقاموا به
تمت دراسة الموقع بكل تفاصيله , حيث تبين لاحقا
بانهم لم يتركو كبيره ولا صغيره الا وسالوا عنها
فيما يختص بطريقة عمل الاجهزة وصلة غرفة الكنترول
بالفيديو سنتر , وغرفة الارسال , ومساعدات الارسال
للعاصمة والاقاليم , كارسال الحلفاية والعرضة وسوبا
كت اووت :-
عزيزي البوردابي اذا اردت ان تقوم بانقلاب يجب ان تسيطر اولا على هذه المرسلات
ارسال الحلفاية والعرضة وسوبا , هذا في السابق حيث كان الارسال يعمل بتقنية المايكرويف
اما الان بعد تقنية البث التماثلي يجب عليك السيطره اولا على المحطات الارضية امدرمان 1
وموقعها جنوب المسرح القومي والمحطة الارضية امدرمان 2 وموقعها في وسط الفتيحاب ,, عسى ولعل
يجيئ من وسط المدينة رجل يفهم !!!
| |
|
|
|
|
|
|
|
|
 Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
لم يهدا بالي ولم اكن مرتاحا لهذه الزيارة
كما كان هذا شعور الكثير من الزملاء في ذلك الوقت
حيث تعودنا ان يزور التلفزيون المنتسبين للكلية الحربية
الذين لم يتخرجو بعد , ويتم تنظيم هذه الزيارة في اخر
ايام تخرجهم ,
كانت حكومة الصادق المهدي تلفظ انفاسهاالاخيره
وهي التي ساهمت كثيرا واعطت الفرصة لهؤلاء للانقضاض
على السلطة , والتسلط على الشعب , لانها اي حكومة الصادق
كانت في تلك الفتره قد بدات في توزيع الثروة على اتباعها
وماتعويضات آل المهدي ببعيدة عنكم
لنا عوده
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
مرت فترة الاسبوعين والتي سبقت الانقلاب المشئوم سريعة كلمح البصر
كانت ساعة الصفر تحديدا عند الساعة الواحده صباح الجمعة اليتيمة
كان العمل داخل اروقة التلفزيون في يوم الخميس يسير بصورة طبيعية
تواجد معنا في تلك الليله عدد مقدر من افراد وضباط سلاح المدرعات
والذي كانت توكل له مهمة حراسة الاذاعة والمسرح , وسلاح المهندسين
والذي اوكلت اليه حراسة مبنى التلفزيون , منذ ايام حكم النميري
كت اوووت :-
طبعا الجماعة ديل كانوا كويسين جدا وعلاقتنا بيهم
كانت علاقة زمالة في موقع واحد بغض النظر عن انتمائهم للقوات المسلحة
بجيكم
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
كان التوقيت مناسبا جدا لتنفيذ الانقلاب
وكان الشارع مهيئا لحدوث اي تغيير , وللاسف
لم يتوقع احد ان يكون التغيير مثل هذا الذي حدث
والا لتمسكوا بمجنونهم
كت اوت :-
في مثل بقول اتمسك بمجنونك لايجيك الاجنا منو ,
او مابكيتم من احد الا وتباكيتم عليه ( ماعارف تباكيتم عليه دي اصلها شنو )
المهم حنواصل ,,, امسكو الخشب يا اعلاميي الانابيب ,
وقبل ماتنومو استحموا واشربو حليب
لانو الحليب ممكن يحفظ توازنكم دا لو كان عندكم توازن اصلا
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
دعونا نتحدث الان عن حقيقة احد( العلابيب) وسنعود للانقلاب
(العلابيب ) دا مصطلح جديد لاعلاميي الانابيب
هذا العلابيب وبعد تخرجه من جامعة امدرمان
الاسلامية قد عمل فترة من الزمن في مجلس الوزراء
في الفترة التي اعقبت تعيين الطيب سيخة
في رئاسة مجلس الوزراء , حيث بدا هذا الاخير في التدقيق
في انصراف وحضور الموظفين بالمجلس , يقف منذ الصباح في مدخل البوابة
ذكرني هذا المشهد مدرستنا المتوسطة حيث كان
مديرنا الاستاذ تاج السر الحضري عليه الرحمة , يقف في مدخل البوابة
لحظة الطابور ممسكا بسوط العنج وياويل من ياتي متاخرا
المهم كان هذا العلابيب الزراع الثاني وناقل الاخبار الاول
لسيادته وكان عصاه التى لاتعصاه
دارت الايام دورتها وهم على هذا الحال
حتى تمت مكافاة الذنب هذا بابتعاثة لاستديو منظمة الدعوة
واستديو ساحات الافتراء لتسجيل البرامج , وعندما احرز تقدما
على حسب تقييمهم الذي يخضع لمبدا الولاء قبل الكفاءة
تمت ترقيته ليكون مذيعا بتلفزيون السودان الذي لم يعد
يحمل من اسم السودان شئيا , هنا شطح ونطح هذا العلابيب
وافرد اجنحته ليحلق في سماء الفضائيات بعد اتفاقية
بئيسة بين حكومة الانقلابيين وبين حكومة انقلابي عربي
اخر اطاح بوالده في ذلك الوقت
وللحديث بقية
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
هذا العلابيب تعلقت به علاليبية صغنونة مثلة
لاتدري من اين تاتي الرياح ( دا مثل عربي بقول ماتدري من وين هي هابه )
المهم حدث ماحدث وبدون الخوض في اعراضهم رغم انهم
خاضوا ومرمطو اعراض الكثيرين من الاسر الكريمة
سقط هذا العلابيب في اول ظهور له في تلك القناة الشهيره
واصبح اثرا بعد عين لاهو اصبح طاؤسا ولا دجاجة كما كان
يعني ( حيور لابقرة ولابقى تور ) سبحان الله
ومازال مسلسل سقوطه ( كسقوط بغداد ) غامضا لمن ابتعثوه ولكنه بالنسبة لنا
واضحا كوضوح الشمس , لانه لايملك ابسط مقومات الاعلامي المحلي
ناهيك عن العمل وسط عمالقة يشهد لهم القاصي والداني بالتميز
والحرفية في مجال اصبح مثل كثير من المجالات التي تتطور
بسرعة الصاروخ , او اسرع من ذلك
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
كان يوم الخميس و اليوم الذي سبق الانقلاب
كان البث يسير بصورة طبيعية حتى انتهى الارسال
عند الساعة 12:30 م وبعد التاكد من اغلاق الماستر رووم
توجهت والزملاء الى منازلنا , وعند خروجنا من بوابة التلفزيون
الشمالية كان السكون والظلام يخيمان على المكان
وتتعذر الرؤية الا من خلال انوار السياره
بعد ان اضاءة انوار السياره تلك العتمة
كانت هناك سيارات جيب صغيره تقف تحت اشجار المشتل
لم يخطر على بالنا بان ساعة الانقلاب قد حانت
حيث ان تواجد الجيش في هذه المنطقة وفي هذه الساعة بالذات
كان شيئا عاديا منذ ايام حكم النميري
نمنا ليلتنا تلك بعد عناء يوم في تكييف ثلاجات التلفزيون ( الاستديوهات )
حتى صباح اليوم الثاني الجمعة 30/يونيو 1989م
ولم يكن الا صباحا اغبر
كت اووت : -
بالليل الجماعة ديل كرفسو العساكر والضباط , واستلموا التلفزيون بدون
مقاومة تذكر الا من بعض الاعتراضات من الضابط الملكلف من سلاح المهندسين
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
بعد السهرة الطويلة يوم الخميس نمت وماكنت مفكر اني اصحي
لا لصلاة الجمعة يعني نص النهار , الساعة تسعة جا اخوي
صحاني وقال لي الظاهر الحكومة انقلبت , قلت ليهو ياخ ماتنقلب
ولا تتنيل وانا مالي ومالم انا الصادق المهدي ؟
سيبني في حالي وامشي صحي المعني بالامر اذا كان بهمو فعلا
اخوي قال لي الموضوع انو عربية التلفزيون منتظراك بره
معاهم سواق اسمو البنا وطبعا البنا دا مسئول من ترحيل بحري
البجيبو في ترحيل امدرمان شنو ؟؟؟
قلت ليهو معاهم منو في العربية , قال لي معاهم اثنين كده
اشكالم كانهم ليهم اسبوعين مانامو .
قلت ليهو يعني ما من ناس التلفزيون ؟ قال لي ولاعمري شفتهم
قلت ليهو اذن شتتم ديل بتاعين استخبارات ولا مصيبة زمان
مشى ليهم قال ليهم الزول دا مامبيت هنا ... طبعا اتخارجو على مضض
عرفت بعد داك انهم مشو لاخونا اول مذيع للانقلاب جمال مصطفي
كان وقتها ساكن في الشهدا , اخدوهو معاهم
وبدوا يلقطو في الزملاء من بيوتم واحد واحد
كت اووت :-
طبعا ماكان في حساباتم انهم يسلقوا ليهم كم واحد كده من جماعتم
عشان يشغل ليهم الاجهزة , غير انهمقدروا سجلوا كلمة قائد الانقلاب
بليل على ما اعتقد في استديو منظمة الدعوة ( البيان الاول )
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
طبعا الجماعة ديل قبل الانقلاب بدو يدربو
في كوادرم على بعض الاجهزة على ما اعتقد في استديو
منظمة الدعوة طبعا تدريب سلق بيض ودا اتضح بعد الانقلاب
بكم شهر كده واغلب المتدربين ديل كانو بتاعين امن
لما جو داخلين التلفزيون والله بس بقر فكوهم في حواشه
والكلام دا ما من عندي , دا كلام قالوا واحد منهم
كان مسئول وقتها , وبعدها اتضح عمق الماساة
كت اووت :-
فاصل وبرجع ليكم ,, عشان نشوف يومي داك كان كيييييف
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
صحيت بعد ساعتين قبل صلاة الجمعة بشوية
فتحت التلفزيون كان في color bars ومارشات عسكرية
الراديو مارشات عسكرية , طلعت مشيت جهة كبري شمبات
لقيت ناس كثيرين جدا متجمعين ومعاهم اجهزة راديو
بعد دقايق جات سيارات من جهة سلاح المظلات عبرت الكبري
واتجهت لجهة الاذاعة , في واحده من السيارات دي كان
في داخلا ولد الصادق المهدي كان وقتها ضابط برتبة ملازم
في سلاح المظلات , اعتقلوهو والظاهر مودنو يتحفظو عليهو
في بيتو ذي ما اتحفظو علي ابوه بعدها ( ودا موضوع تاني )
كت اووت : -
لحدي الوقت داك لا اذاعة ولا تلفزيون البلد اصيبت بحالة شلل تام
مازالت تعاني منه حتى الان , نسال الله العافية
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
اخيرا نطقت الاذاعة ولم يكن اسم قائد الانقلاب واضحا
مره البشير عمر ومره عمر حسن احمد , المهم عرفنا انو
في عسكري استلم السلطه , رجعت البيت التلفزيون بدا البث
وبعد البيان الاول بدات تلاوة المراسيم الدستورية ( قال دستورية )
الا يكون ظار, دستور بتاع شنو ؟؟؟
مر النهار صلينا الجمعة في مسجد السيد المحجوب ببيت المال
كانت ورديتي مسائية
كت اووت :-
مشيت التلفزيون الساعة خمسه مساءا وسط طابور شرف ,, بدا من شارع الازهري وحتى التلفزيون
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
سبحان الله , لقمان همام شخصيا ؟؟؟
كان العرس بعمل كدا , ماكنا عرسنا من زمااااااان
اخبارك والاسره عساكم بالف خير
والله الشوق شلااااااااال
خليك متابع وانت شاهد عيان
كت اووت :-
لكن يالقمان مااااا نجاضة ونار منقد !!!!!!!
رسلتو ليك وبديك تفاصيل دسمة في الخاص , تسلم ياقامة , طبعا دي الوقت
العلابيب بكونو سطحوا .....
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
اتحركت من بيت المال الساعة خمسة الا ربع
دخلت في الطريق البودي للتلفزيون من بداية شارع الازهري
لقيت ناس المظلات واقفين وشايلين السلاح فوق
بين كل واحد والتاني عشره متر والسؤال كان موحد
انتا منو وماشي وين بطاقتك لو سمحتا
انا خضر الطيب ماشي التلفزيون , اتفضل
وهكذا الا ان وصلت بالضبط جنب بيت الصادق المهدي
اخر واحد شاف بطاقتي كان فرد استخبارات كنت بعرفوا
قال لي امشي لي جنابو داك , وكمان جنابو ذاتو ماكان غريب
علينا كان ملازم اول اسمو محمد عمر تابع لسلاح المدرعات
لما كان بجينا في التلفزيون كان واضح انو كوز
مضبلن كدا وكانو روحو على وشك الخروج من جسمو
مشيت ليهو لقيتو مشكل ليهو فصيل من تسعة ولا اتناشر فرد
وبديهم في اوامر و عاين لي كدا وحتى ماشاف البطاقة
قال لي امشي , مشيت فى اتجاه بوابة التلفزيون الرئيسية
قابلني واحد بتاع استخبارات اول مره اشوف خلقتو
بعد ماشاف بطاقتي قال لي انتا شغال في ياتو قسم ؟
قلت ليهو انا شغال في الكنترول رووم
قال لي الكنترول شنو ؟؟؟ قلت ليهو انا عارف طريقي
قال لي لا التعليمات اني امشي اوصلك لحدي الكنترول دي
قلت ليهو سمح , مشى معاي لحدي ما وصلنا الكنترول رووم
فتح الباب لقيت قدامي اتنين ضباط واحد مقدم والتاني عقيد
من سلاح الطيران والاتنين شايلين مدفع استيرلنج
اتشهدت ودخلت
كت اووت :-
اعوذ بالله دى كانت لحظة انا عمري مافي زول حكى لي بيها
انا الجابني هنا شنو ؟؟
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: ASAAD IBRAHIM)
|
الاستاذ خضر الطيب ، انت تسرد وقائع ( سرد احداث موت معلن ) رواية
العالمي غابريال غارسيا ، لان التفاصيل التي تسرد بها حقيقة تشبه تلك
التفاصيل باعتبارك احد شهودها وبالطريقة السينمائية قطع وفلاش باك ، وهي
تفاصيل نخاف ان يلفها النسيان ، وهذا السرد مهم للتوثيق لذلك اليوم المشؤوم
وانت اول من تظر الي تنفيذ الانقلاب في وجهته التنفيذية ، لان الاذاعة والتلفزيون
تعتبران من الخطط ضمن ساعة الصفر وشخصية رئيس الانقلاب ، يعني بلغة
الدراما اسمها شنو ، المهم نحن نتابع ، ولك الود
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
استاذنا / سري
لك التحية والتقدير
احاول قدر الامكان ان اكون دقيقا وصادقا فيما
اقول , ولاتنسى بان هذا الموضوع قد مرت عليه
18 عاما والذاكره مازالت تحتفظ بتفاصيله
لان هذه اللحظات وتداعياتها التي مرت بنا
كانت اقسى من ان يتحملها من في عمرنا
في تلك الفتره , كانت لحظات عصيبة مهما وصفت
لا استطيع ان اصور حجم الماساة التي مرت علينا
في تلك الايام الحالكة ,و ياريت يا استاذ سري
تحكي لينا انت كنت وين يومها
كت اوووت :-
بالمناسبة قائد التراجيديا دي على حسب الصديق جمال حسن سعيد
بكون اسمو الدرامي ( تلب ) لانو جا متلب فيها بليل قبل ان يدع
للصبح فرصة ان يتنفس , كتم على مراوح البلد , وناس البلد
فتك بعافية ياعزيزي, خليك متابع
[qute]انت تسرد وقائع ( سرد احداث موت معلن ) رواية
العالمي غابريال غارسيا ، لان التفاصيل التي تسرد بها حقيقة تشبه تلك
التفاصيل باعتبارك احد شهودها وبالطريقة السينمائية قطع وفلاش باك ، وهي
تفاصيل نخاف ان يلفها النسيان ، وهذا السرد مهم للتوثيق لذلك اليوم المشؤوم
وانت اول من تظر الي تنفيذ الانقلاب في وجهته التنفيذية ، لان الاذاعة والتلفزيون
تعتبران من الخطط ضمن ساعة الصفر وشخصية رئيس الانقلاب ، يعني بلغة
الدراما اسمها شنو ، المهم نحن نتابع ، ولك الود
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
نواصل من داخل غرفة الكنترول
طبعا دي اهم غرفة ولاهمية الغرفة دي
كانو حارسنها اثنين من ضباط سلاح الطيران
وذي ماقلت كان معاهم رشاشات استيرلنج
وطبعا النوع دا من الرشاشات بعرفوه العساكر
الظاهر فيهو 33 طلقة وماعندو تامين ذي باقي الاسلحة
اول مافتح فرد الاستخبارات الجا معاي من البوابة
البره الباب شفت الضباط الاثنين ديل مادين رسينم
ديل لحدي هسي ممكن رسينم تكون اتقطعت يارب
لانهم فعلا كانوا سيئئن بكل المقاييس في تعاملم
مع التيم العامل ,
سالني واحد من الضباط ديل قال لي انت مكانك وين
في الغرفة دي اشرت ليه لوحدة مراقبة الكاميرا
حيث كنت اعمل وكانت هذه وظيفتي في ذلك الوقت
وكان زميلي المفروض ابدلو اخي الحبيب عوض حضره
من شمبات , ماصدق عوض انو حانت لحظة الخلاص
لانو كان فاقد الامل خالص , وديل ماكان عندهم مانع يشغلو
التيم دا لحدي نهاية الارسال
طلع عوض قعدت انا في مكانوا
كت اووت :-
طبعا مافي زول بتكلم مع التاني كان بيت عزاء حقيقي
الله يورينا فيكم يوم ياتربية الشوارع , ياقتلة
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
اخي الحبيب / الصادق خليفة
كيف حالك
عبارة المخرج بياشر لي بانتهاء زمن البرنامج
او دخول وقت الاخبار , العباره دي عندنا ليها
معاني تانية , واحده من المعاني دي لما يكون في واحد
من الزملاء بتكلم معاك وانت مافاضي ليهو بتقول ليهو العباره دي
والثانية لما احب اتخارج من الموضوع برضو بجيب العباره دي
ولما احس اني وصلت الحد الائتماني بتاعي بقول العباره دي
واهي مصطلحات
كت اووت :-
بالمناسبة المخرج بياشر لي عشان ابدا البرنامج
افتكر العباره دي مرييييييييييحة جدا بالنسبة ليك
بالمناسبة المسلسلات دي كنا بنشاهد كل الحلقات خلال يومين اوثلاثة
لانو لجنة المراقبة قبل ماتجيز بث المسلسل لازم تشاهدوكامل
وفي جلسة عمل يوم كامل بنكون شاهدنا نص الحلقات واليوم الثاني او الثالث
بكون المسلسل خلص , بس تصدق انو المسلسلات دي
كلها تجارية يعني اطول مسلسل لو لا التطويل
مفروض القصة تنتهي في حلقتين ثلاثة , لكن تقول شنو
مع العقلية التجارية , وكلو بحسابو
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
| Quote: لانو لجنة المراقبة قبل ماتجيز بث المسلسل لازم تشاهدوكامل وفي جلسة عمل يوم كامل بنكون شاهدنا نص الحلقات واليوم الثاني او الثالث بكون المسلسل خلص |
حبيبنا خضر..كيف حالك..
ذكرتني زميلنا الوقـور ...............الذي كان يتابع فيلم أجنبي بغرض قصقصة اللقطات "الغير مناسبة"..قال لي إنه أعاد لقطة بوســة أو "قبلة عنيفة"..أعادها ثلاثة مرّات قبل أن يوافق على حذفها!!وســط تريقة و تندّر من الزملاء في شكل أسئلة..يا مولانا نشيلها برة؟؟..قال ليهم شيلوها شلل نصفي..واضح انو كان زعلان من قطع اللقطة!
واصــل يا حبيب
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
ابو البشير
اذيييك
انت ما بتجي البوست دا الا مره مره
لكن صراحة بتقول حاجات بتخليني اضحك لحدي مادموعي تسيل
القال انو البوسة دي مايشيلوها معروف بالنسبة لينا
لكن البوسة الانتا بتتكلم عنها دي كانت قمة
الابداع , يعني البوسة المنها والج..... ................ع
مره كنا بنشاهد في فيلم امريكي مدة الفيلم , الخام يعني
كانت 95 دقيقة , وبعد المشاهد بقدرة قادر بقى 45 دقيقة
لما تم بث الفلم في السهره كجزء اول حاولت امسح ذاكرتي
واكون طبيعي واشاهد الفلم بعين المشاهد العادي
والله يالطيب مافهمت اي حاجة من الفلم الاتقطع نصو
ماعارف المشاهدين كان شعورم شنو .
خليك قريب
كت اووت :-
الطيب يوم الانقلاب دا انتا ماكنت قاعد , ماتتكلم ياخ
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
الحبيب / الصادق خليفة
تصدق يالصادق انا لما مشيت التلفزيون في اول يوم للانقلاب
مامشيت عشان الانقلابيين , انا مشيت عشان اقيف مع زملاي
لانهم اكيد كانو بعانو وكان لازم اقيف معاهم واليحصل يحصل
والله انا لما دخلت غرفة الكنترول لقيت عليهم حالة
مهما اوتيت من البلاغة لا استطيع وصفها
فكان لازم امشي التلفزيون في اليوم الاسود دا
ولو قعدت في بيتنا ماكان ممكن اي واحد من الانقلابيين ديل
يجي يجبرني اني اشتغل , لانو كان بكبسة زر واحده في غرفة
التحكم في الاجهزة تتوقف المحطة كلها , واي واحد من الزملاء كان
ممكن يعمل الحاجة دي
كت اووت _
خليك انتا في مشاهدة المسلسلات دي ان شاء الله تبدا
تشاهد المسلسلات المكسيكية . ( والله ضحكت لمن قحيت )
وطولت مارديت , وبعدين معاك لمتين
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
غرفة التحكم
خلوني احكي ليكم شوية عن الغرفة دي
هي غرفة صغيرة لاتتجاوز مساحتا 5 متر في 6 متر
في الجهة الامامية عدد 20 تلفزيون , وامام التلفزيونات مباشرة
توجد طاوله بعرض متر فيها وحدة مراقبة الكاميرا
وجهاز المكسر بتاع الصوره video mixer
وفي الجزء الجنوبي من الغرفة جهة الباب
جهاز التحكم في الصوت ال audio mixer
تبقى المساحة الفاضية من الغرفة دي
لاتتجاوز المترين في مترين ونص ( الله يكرمكم حمام بس )
والضباط ديل باسلحتم الاتوماتيكية والموجهة
مباشرة على ظهورنا , وطبعا هم في النهاية عساكر
بنفذو تعليمات واوامر معينة
كت اووت :-
كنا بنمارس عاده ( مش اللي في بالكم )
لما يدخل زمن الاخبار بتغير التيم بنقوم انحنا
بنمشي نتعشا عشان نجي لمواصلة برنامج السهرة
اليوم داك ( المشئوم طبعا ) حصلت حاجات غريبة
جاييكم , اصبر يالصادق
مادا برضو مسلسل وتسلسل ( بكتب في مذكراتي ياخي الموت مامعروف )
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
لما جا موعد اخبار التاسعة مساء دخل تيم الاخبار
وطبعا كلها كانت تدور حول الانقلاب كالعاده
واعادة المراسيم الانقلابية , والاعفاءات لكبار وصغار الضباط
بعد الاخبار مباشرة , دخلنا السهره وكانت تكرار البيان الاول
وتكرار اخبار التاسعة
كنا دائما في فترة الاخبار بنمشي مجموعة من الزملاء بنتعشى في المورده
ياسلام على المورده وعشاء المورده , وبالمناسبة كان في جماعة من الزملاء بياكلو
صييير في البداية انا كنت بلاوز من الصير دا لكن بعد شوية بقيت من
المداومين على اكل الصيييير , حاولو جربيهو , وخلو الدليل السياحي بتاعكم يكون تمبس
لزوم الخبرة والسكن , وكمان هو برضو بتاع صيييير شهييير , ومرات بنغير بنمشي
نتعشى في بيت المال , كان عندنا صاحبنا اسمو رجب عندو مطعم بيتي روعة
, جاء وقت العشاء ولاحياة لمن تنادي , ولافي واحد جاب سيره للاكل
التفت لواحد من الضباط الواقفين ورانا برشاشاتم ديل
قلت ليهو انحنا عاوزين نتعشى , قال لي جدا هسي بجيكم العشاء
رفع الجهاز بتاع الاتصال الشايلو وقال كلمتين كده مافهمنا منهم اي
حاجة ( وهو يعني انحنا اصلا كنا فاهمين حاجة من الشئ البحصل في الاستديو )
المهم جا واحد لابس ملكي , قال ليهو ظبط للجماعة ديل العشا
طبعا ظبط دي بتعجب اي زول ( اتخيلنا الباربكيو , والعصاير المشكلة , والتحلية ام علي )
حلم الجعان عييييييييش ,,,
كت اووت :-
خلونا ننتظر الوجبة الموعوده دي , الله يوعدم بجهنم
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
في تلك اللحظات , لحظات العشاء الذي ربما كان العشاء الاخير
في تلك الليلة الحالكة وقد بلغ منا التعب مبلغا عظيما نسيت
ان اشير الى نقطةفي غاية الاهمية , زملاءنا الذين سبقونا
في العمل بالتلفزيون كانو قد حكو لنا عن انقلاب هاشم العطا
والجو الذي ساد استديوهات التلفزيون في تلك الفترة
نسالهم بلهفة عن انعكاسات تلك اللحظات وتاثيرها النفسي عليهم
كانت اجاباتهم تحمل الاسي وتصويرهم للوضع آن ذاك كان
ماساة صورتها نبراتهم , وجزء منهم كانوا معنا في هذا
اليوم الحالك
في مقارنة بين ماشهدوه في السابق , وماعاشوه معنا في تلك
اللحظات , اكد لنا باننا نعيش اليوم في ماساة حقيقية
كان يمكن ان نفقد ارواحنا في تلك اللحظات , والكل كان يتخبط
يومها ( اعني الانقلابين ) في حركتهم بين غرفة الكنترول
والاستديو .....
كت اووت :
ما حانسى موضوع العشاء لانو الضابط اوفى بما وعد , الله يعز النعمة
| |
|
|
|
|
|
|
|
|
 Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
أخي العزيز خضر !!!
محبتي ,,,
في الحقيقة طريقة سردك توقف نبضات القلب ,, إهتمامك بالتفاصيل يؤكد مقدرتك الفائقة على السيطرة
على زمام الأحداث ,, أسلوبك الراقي في عرض المواضيع يشير إلى مستوى عال من الحرفية ,, طريقة
استخدامك لأدوات شد الإنتباه تحبس الأنفاس ,,, سأظل أتابع رغم تأخري في الدخول لأسباب قاهرة ولك
مني كل المودة ,,,
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
اختي الحبيبة / المدهشة عواطف
كميات من التحايا العطره تمتد بمساحات ابداعك
التي لاتحدها حدود , شهادتك وسام اعلقه على صدر الزمان
الوجع ياعواطف كان عاصف , عصف بكل روعة ايامنا
التي سبقت تلك الليالي الحالكات , حال ماكنا
وما آل اليه مآآ لنا.
كنا اول من توجع , كنا في موقف لانتمناه لحبيب
كانت تلك اللحظات بالنسبة لنا تحولا احال حياتنا
الى جحيم مقيم حتى كتابة هذا البوست
والسرد يحلو في حضوركم وتشريفكم لهذا البوست
كت اووت :-
قصة العشا دي بعملا فلاش باااك كمبا وكدا ,
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
بعد اقل من ربع ساعة دخل العسكري
الى غرفة الكنترول ومعاهو كمية من
القرقوش بتاع الفرن العسكري الكانو
بعبوهو في شوالات وبودوهو الجنوب
للجماعة البقاتلواخوانا الجنوبيين
وطبعا ديل ماناس دنيا ديل
ناس ماشين يموتو مافارقة
معاهم ياكلو قرقوش ولاتبن عشان شيخ حسن كان وعدم بالحور
العين وصكوك الغفران والنجاح في الامتحان
بالنسبة للعائدين منهم(طلبة الجامعات ) , طبعا المابرجعو
من الجنوب ديل بختهم بكونو في احضان الحور
العين , وياحسرة والحقيقة انهم مدفونين
في الوحل والطين , ماعلينا
القرقوش النصيحة لله كان نضيييف تقول مغسلينو
بكلوريكس , ومعاهو كيس فيهو طحنية والله لون الطحنية
اقرب للون الاسود , وجاب معاهو( كوز) مويةعشان يبل
بيهو القرموش دا
كت اووت :-
بجيكم راجع ,, اصلي راجع لي عيونك مامصيرو الحي بيلاقي
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
الوجبة العجيبة
العسكري بعد ماجاب المكونات العجيبة دي
جاب معاها صحن كبير تقول كان دروة
مطرقع من كل الجهات , ختاهو في الو.اطة
وقعد يكسر في القرقوش دا ماخلا قرقوشة وقعت
بره الصحن , وانا بعاين في المخلوق العجيب
دا وهو شغال باهتمام شديييد وبعد ماكسر القرقوش
شرط كيس الطحنية بالجنب كدا وكبا طحنية سودا وذي الحجار
وبعد شوية مسك كوز الموية الماخمج والله الموية الفيهو
توضي سبعة رجال .
كب الموية وبدا يعجن بايدينو في الخلطة السحرية
دي وبعد ماخلص خرط ايدينو في طرف الصحن كدا
ولحس اصابعو وقال للضابط تمام سعادتك
(الله يتمك موية ذي ماتميت القرقوش دا)
كت اووت :-
المخرج بياشر لي بنو الحته دي محتاجة شوية مؤثرات
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
في اللحظة الكان فيها اخونا العسكري
بيعجن في الخلطة العجيبة دي كل الزملاء
كانوا بعاينو ليهو باستغراب شديد وهو
طبعا كان شغال باهتمام شديييد كان الامر
جلل , بعد ماخلص الضابط قال لينا يلا
اتفضلوا اكلو , زميلنا قدورة كان في
وحدة الصوت قريب جدا من الضابط , قال
ليهو انحنا اصلا ماقاعدين نتعشي ذي الوقت
دا , الضابط قال لينا هسي ماقلتو دايرين
تتعشوا , قلنا ليهو بصوت واحد مادايرين
طبعا زعل جدا واتوتر ومااشتغلنا بيهو كثير
اتصل تاني على العسكري جا اخد الدروة الفيها
العلف دا واتخارج
مرت اللحظات عصيبة وذاد التوتر لانو زمن نهاية
الارسال قرب وانحنا كمان عاوزين نتخارج
جاء واحد لابس جلابية قصيرة كدا وعندو دقن
مستحيل تشوف وشو ترتاح كانو غضب ربنا كلو
في وشو دا , والزول دا كان معاهو واحد تاني
ديل كانو بدخلو الورق لجمال في الاستديو
اغلب الورق دا كان مكتوب فيهو , شيخ قبيلة
مين ماعارف يهنئ الثوار بانقلابهم على السلطة
الشرعية , وجماعة مين تهنئ قائد الانقلاب
وهكذا .....
فاصــــــــــــــــــل
ووووو........
نواصـــــــــــــــــل
| |
|
|
|
|
|
|
|
|
|
Re: الطيب بشير , قصة انقلاب ,,, وسيطرة اعلامي الانابيب ,, والمتاثرين بالخطاب الاعلامي المقلوب (Re: خضر الطيب)
|
عزف منفرد على الطبلة
this is to mr muhanad mamoon
sorry
i mean mohamad jomaa
ـ 1 ـ
الحاكم يضرب على الطبلة
و جميع وزارات الإعلام تدق على ذات الطبلة
و جميع وكالات الأنباء تضخم إيقاع الطبلة
و الصحف الكبرى و الصغرى
تعمل أيضا راقصة
في ملهى تملكه الدولة ! .
لا يوجد صوت في الموسيقى
أردأ من صوت الدولة ! !
ـ 2 ـ
الطرب الرسمي يباع على العربات
مثل السردين ...
و مثل الخبز ...
و مثل الشاي ...
و مثل حبوب الضغط
و مثل غيار السيارات
الكذب الرسمي يبث على كل الموجات ..
و كلام السلطة براق جدا ..
كثياب الراقصات ...
لا أحد ينجو من وَصْفَاتِ الحكم
و أدوية السلطة ..
فثلاث ملاعق قبل الأكل
وثلاث ملاعق بعد الأكل
و ثلاث ملاعق قبل صلاة الظهر
و ثلاث ملاعق قبل صلاة العصر
و ثلاث ملاعق قبل مراسيم التشييع ،
وقبل دخول القبر ..
هل ثمة قهر في التاريخ كهذا القهر ؟
الطبلة تخترق الأعصاب ،
فيا ربي ألهمنا الصبر ..
ـ 3 ـ
الدولة تحسن تأليف الكلمات
و تجيد النصب .. تجيد الكسر ..
تجيد الجر ..
تجيد استعراض العضلات
و لا يوجد شعر أردأ من شعر الدولة
لا يوجد كذب أذكى من كذب الدولة ...
صحف ، أخبار، تعليقات
خُوذٌ لامعة تحت الشمس
نجوم تبرق في الأكتاف ،
بنادق كاذبة الطلقات ..
و طن مشنوق فوق حبال الأنتينات
و طن لا يعرف من تقنية الحرب سوى الكلمات
و طن ما زال يذيع نشيد النصر على الأموات
ـ 4 ـ
الدولة منذ بِدَايَةِ هذا القرن تعيد تقاسيم الطبلة
(( العدل أساس الملك ))
(( الشورى ـ بين الناس ـ أساس الملك ))
((الشعب ـ كما نص الدستور ـ أساس الملك ))
يا رب الكون شبعنا من ضرب الطبلة ..
لا أحد يرقص بالكلمات سوى الدولة ..
لا أحد يزني بالكلمات ،
سوى الدولة ! !
(( القمع أساس الملك ))
(( شنق الإنسان أساس الملك ))
(( حكم البوليس أساس الملك ))
(( تأْلِيهُ الشخص أساس الملك .. ))
(( تجديد البيعة للحكام أساس الملك ))
(( وضع الكلمات على الخَازُوقِ
أساس الملك ... ))
طبلة .. طبلة ..
و السلطة تعرض فتنتها
و حلاها في سوق الجملة ..
و لا عُرْيٌ أقبح من عري الدولة ...
ـ 5 ـ
طبلة .. طبلة ..
و طن عربي تجمعه من يوم ولادته طبلة
و تفرق بين قبائله طبلة ..
و أفراد الجوقة ، و العلماء ، و أهل الفكر ،
و أهل الذكر ، و قاضي البلدة
يرتعشون على وقع الطبلة ..
الطرب الرسمي يجيء كساعات الغفلة
من كل مكان
و الطرب النفطي يحاول تسويق الإنسان
سعر البرميل الواحد أغلى من سعر الإنسان
الطرب الرسمي يعاد كأغنية الشيطان
و علينا أن نهتز إذا غنى الشيطان
و تصيح ـ أمام رجال الشرطة ـ آهْ ...
آهٍ .. يا آهْ
آهٍ .. يا آهْ
طرب مفروض بالإكراه
آهٍ .. يا آهْ
هل صار غناء الحاكم قُدْسِياًً
كغناء الله ؟ ؟ .
نزار قباني
| |
|
|
|
|
|
|
| |
خضر الطيب
الطيب بشير
Muna Khugali
الجيلى أحمد
يسرى معتصم
Amjed
الصادق خليفة
ASAAD IBRAHIM
مصطفي سري
عواطف ادريس اسماعيل
Mahjob Abdalla
Mustafa Mahmoud
فيس بوك
تويتر
انستقرام
يوتيوب
بنتيريست