امدرمان الثورة والمهدية زكريات بين الازقة

Quote: Date: Mon, 14 Aug 2006 00:11:30 -0700 (PDT) From: "naseer mohd." Add to Address Book Add Mobile Alert Yahoo! DomainKeys has confirmed that this message was sent by yahoo.com. Learn more Subject: عدتم فعدنا والبادي أظلم To: [email protected] أخي الفاضل علي الحسن... مرة تانية جيت ماشي جمب البوست اللذيذ بتاعك وطبعاً ما قدرت غير إني أشرع طوالي في الكتابة ليك ولقراء بوستك الأعزاء...أبدأ ببعض الملاحظات علي مداخلات أخواني الأكارم أولاد الثورات وبصصح ليهم بعض المعلومات البسيطة أو أضيف أو أعلق وشكري الخالص لسعة صدركم جميعاً ... أولاً أخي محمد عادل ذكر إنو التاسعة فيها يسين عمر الإمام وهو أكيد خلط بين يسين عمر الإمام وأخوتة ناس شيخ حامد عمر الإمام وأبنائة الأفاضل الأكارم ناس أسامة ومحمد وعثمان وهم ناس كورنجية من الدرجة الأولي لعباً وتشجيعاً ومن أشهرهم عمر الشهير بعمر الرشاشة..الهلالابي المتعصب وبرضو لي قدام في التاسعة في ناس المرحوم التاج عمر الإمام ...أيضاً ذكر الأخ عادل عن الخامسة إنو فيها أيمن دقلة ومعتز صباحي لكنة بكل أسف ويقيني أن ذلك حدث سهوا نسي أن يذكر أن الخامسة فيها العملاق المرحوم الفنان الإنسان الجابري قبل أن يذكر هولاء الشباب من المبدعين الجدد(علي وزن المحافظين الجدد)...وذكر أيضاً إنو التاسعة كمان فيها أميرة أبوطويلة وأظن أنه يقصد شهيرة أبوطويلة في شقلبان وهي وأخوانها ناس عبد السلام مشهورون بخفة الدم وسرعة البديهة ...أيضاً أظن أنه هو أو أحد المتداخلين ذكر أن جامع الشيخ عثمان الزبير في العاشرة وأنا أظن علي الرغم من فترة غيابي النسبية عن الثورة أن المسجد المذكور يقع في الحارة الثامنة من الناحية الخلفية لميدان مطعم عم فؤاد...الأخ العزيز متولي مالك أيضاً ذكر مامون ود الشهيد وذكرني بأخوه الأصغر مصطفي عوض والغريب أن الأخ مصطفي لم يأخذ لقب ود الشهيد وإنما كان يلقب بمصطفي الجلك أو الجلكين وهو زميل دراسة معي في مدرسة بكار المتوسطة ما زلت أذكر قولتة المشهورة بخصوص حصة الإنجليزي ... كان بيدرسنا أستاذ مهدي ربنا يديه الصحة والعافية ويطراه بالخير وهو في يقيني من أحسن وأكفأ أساتذة اللغة الإنجليزية... وكان يوم الأحد دائماً من الصباح بيكون عندنا حصتين دبل إنجليزي معاه وغالباً بيكون فيها جلد بالسوط في قواعد اللغة الإنجليزية والإملاء الإنجليزية...المعروف عن أستاذ مهدي إنو كان بيضربنا بالسوط في ظهورنا وليس كما تعود باقي الأساتذة... صديقي العزيز مصطفي (الجلكين) قال لي: تعرف أنا ولا بعذب حالي مع أستاذ مهدي دا أول ما يجي ويبدا يقول لي مصطفي (What is the rule of the present continious tense) أو ما هي قاعدة الفعل المضارع طوالي بقبل وأديهو ظهري عشان يجلد ونخلص الموضوع دا .... الرجاء ممن يعرف أين هو صديقي ورفيق الطفولة مصطفي عوض أن يمدني بعنوانه ... أذكر مرة أيضاً في إمتحان مادة التربية الإسلامية كان في شخصية إسمها (حكيم بن حزام) كانت هي الإجابة علي أحد الأسئلة في مادة التربية الإسلامية سأل صديقي مصطفي صديقنا هشام محمد عبد الحليم أو هشام نوبة- والمقيم حالياً بلندن له خالص تحياتي وأشواقي - والذي كان يجلس بجوارة في قاعة الإمتحان وكان المراقب واقف بالقرب منهم ومافي طريقة هشام يوريهو الإجابة كاملة فغايتو إستطاع أن يقول لة همساً كلمة حكيم وأشار إلي الحزام الذي كان يرتدية في بنطلونة فقال لة مصطفي الجلك همساً ليتأكد (تقصد حكيم أبن لباس؟) وهنا لم يتمالك صديقنا هشام نفسة من الضحك بصوت عال هههههههه أيام والله....أيضاً الأخ متولي ذكر حسن باع الطباخ .. تعرف يا متولي إنت أكيد أكبر مني لسبب بسيط وهو إنو أنا كنت لما حسن باع وهو رجل علي ما أذكر متخلف عقلياً سبحان الله وبالرغم من ذلك كان يشتغل ويعمل طباخ عوازيم ولكنة كان يصيح كالخراف باع بااااااع باااااااااااااع بااااااااااااع وأذكر وأنا صغير كنت أخاف منه أشد الخوف ولما يجي ماري بشارعنا كنت بجر جري أدخل البيت ولمن أسمعو يقول بااااااااااااااااع كنت أرتجف وأنا ماسك في توب أمي وإنت يا أخ متولي الزمن داك قاعد في قهوة الجعلي (شكيتك علي الله).....ديناصور أقول ليك شنو.... أيضاً عبد القادر الأطرش بتاع الليمون والشعير عندو الذ شعير في السودان كلو والله وليمونو حاجة خطيرة... بالنسبة للكوارع وأنا من المهتمين بهذا الشأن (علي قول ناس وسائل الإعلام) كان عم فؤاد أحسن مطعم بيقدم كوارع في الثورة وبعديهو أتذكر كان في مرة كدة بتعمل كوارع في الحارة الثلاثة عشر إسمها رايح لي بس ممكن الأخوان يذكروني أظن إسمها أم هاني؟؟؟ برضو في باشري الشهير (ببشبش) في الحارة التاسعة في شارع شيكان فاتح علي الحارة السابعة وهو ما يزال يعمل علي تقديم وجبة الكوارع وبنفس الجودة والهمة العاليتين... أنا ذهبت قريب للسودان وشفت بعيني كوارعوا بتخلص يمكن بعد المغرب بي شوية كدة ... كنت بضطر أهاجر للكوارع هناك الموردة تحت.. مرة نمشي نجيبها من الكوتش ومرات من النسوان الخاتات حلل الكوارع ومفترشات الأرض في الموردة جوة ...ومرات كنا بنهاجر ليها للصحافة في مرة ربنا يديها الصحة والعافية إسمها (ست ريد) أو حاجة بالشكل دا ممكن شباب الصحافة يصححوني كنت بمشي عشان عندها كوارع ذي الباسطة علي قول صديقي العزيز محي الدين... تحياتي لك أخي علي ورجائي أن تضع عنواني البريدي لأي شخص حابي يراسلني مرحب بيه ومرة تانية لك شكري وتقديري ومرة تانية إن عدتم عدنا حتماً أخوك نصير --------------------------------------------------------------------------------