♧ علمتنا صروف القدر و نوائب الدهر £

《تعالوا جاوبوا على سؤال ميرغني سوار الدهب》
♧ ياجماعة الخير هل انا غلطان كان غلتان وروني!!
الإسبوع الفات أول مرة في طول حياتي أخش قسم
ما دخلوني حبس لكن كمتهم لغاية ما الأمور إتعالجت
حياتي مافتحت في زول بلاغ ولا بسويها بإذن الله
و لا في حياتي إتفتح فيني بلاغ و لا دخلت خلف
قضبان في أي تهمة( إلا الإعتقالات السياسية) .

● القصة و ما فيها : إنو بالصدفة مشيت أشتري موية
من بقالة لقيت عمنا كدا كبير جلابية و عمة وشال و تاكي
وشو في يدينو و بيبكي يقول خيد يالبكا.. قلت أكيد جاهو
خبر وفاة أو محتاج مبلغ قروش كبير لي حارة المهم بكى زول
مقهور.. حنيت عليه وقفت ربتا على كتفو ياعمنا البركة فيكم
ياخ الصبر طيب.. انعدل على حيلو و قاللي ياريت لو كان خبر
وفاة انا مؤمن بالله لكن انا مغلوب ومقهور.. وبيجهش بالبكاء.

● قال لي انا ولدي دا ربيتو بالحلال كنت مزارع وإشتغلت سواق
لي أنصاص الليالي لمن تعبت من السواقة بقيت كاشير في مطعم بلدي؛
دا كلو شان ما أحوجو وأخواتو لي شيء. لمن كبر بقى يرفع صوتو على
وهسي شان بيصرف على البيت بقى مستعبدنا عديل. قبيل جيت لقيت
أختو تبكي ومجروحة جم عينها قالت دقاها شان ماغسلت ليه بنطلون
كان عاوز يطلع بيه جيتو هنا في مكتبو إتكلمت معاه إنو انا حي
ماتتكلم مع البنات وريني انا البتكلم وبوجه فقام إنفعل فيني
وخنقني مع الباب لمن ناس جات بالجوطة لزاني برا
مكتبو لمن وقعت في الواطة.
● أنا اللحظة ديك كل شواطين الدنيا إتلمت قدام عيوني
صدام حسين قال المواقف العظيمة إذا ماحركت نخوتك
حاتتحرك متين ومتى تهتز الشوارب!!! قلت ليه معليش
يابوي إنتظرني هنا و بجيك هسي راجع وكنت عرفت
مكتبو وإسمو من خلال كلام عمنا الكان ببكي بي حرقة.

عندي (رنق بوبكس) في العربية شلتو دا أفضل يوم تهتز
فيه الشوارب دا ما مقام وردة وبرتقالة. دخلت المكتب سلمت.
إنت استاذ فلان؟ آي قفلت الباب بالمفتاح من جواوتووووشك
بطلوش بنية بالرنقبوكس واتلابعتا معاهو لا من غلبم يفرزونا
باللباسات و لجأوا لحامض { DND} غايتو حسيت إنو فشيت
بعضاً من غبينتي و زعلتي لي عمك. الشرطة كبست والقسم
للأمانة الحاج ركز لامن مشى معانا القسم و كان في شهود
على الموقفين لزتو لي أبوهو لمن وقع ودقتي ليهو.

●وكيل النيابة والتحري كل العساكر لمن فهمو من عمك
إتعاطفو معاي وكمان أقسمو إنو ما أدخل حراسة. أخواتو
جو القسم وزغردو لي وشكلو معيشهم في جحيم.
شوفوا قلب الوالد ياجماعة 👇👇
● نفتح بلاغ في ولدك نقفلو؟ والله ياولدي هو السواهو
لي من عدو ماحصلت لكن مابقدر أشوفو مسجون. الولد
بي كلام العساكر معاهو قعد يبكي ومشى رقد في الواطة
باس كراع أبوهو وأخواتو بكوا معاهم وغايتو..

● ياجماعة مافي زول بعد ربنا في الكون دا مهما بلغ مكانة
علمية أو أخلاقية أو بطولة خارقة أعظم وأهم وأحن وقلبو عليك
زي ابوك وأمك وقضى ربك ألا تعبدوا إلا إياه (طوالي لصقها شنو)
وبالوالدين إحسانا!!! ياجماعة في تعظيم للوالدين اكتر من كدا الآية
دي كانت سبب في إسلام البعض و عندنا هنا حمير مكاديات يحملون
قاعدين بيقروها و لكن مابيحسوها و ما داير أقول يفهموها.

● ياجماعة قسما بالله مازال عندي رغبة اتفشى في الزول دا لمن
أتذكر منظر أبوه وهو بيبكي. أنا إتجاوزت سن النبوة لغاية هسي
بتفادى عيني تقع جوا عيون ابوي هيبة ساي. جغمة أخيرة :
بكل أمانة .. هل انا غلطان في الموقف دا؟ 🙂