مساهمات سابقة في بوستات سجيمان.. مبادرة ذاتية توثيقية

Quote: هن رحمة لنا....ونحن رحمة ليهن.... ان رضن اوابن.....لو لاهن ما كنا ولولانا ما كانن....النسوان متعة الدنيا وشقاوة الدنيا... وبعد مرات يكرهنك الدنيا.. حاجة نفيسة بت ابضراع....راجلا ميت... وعندها ولد واحد ومعرس...مرضت مرض شديد....ولدا وداها الدكتور.... الدكتور قال لو امك عندها مرض حامد....امك عرس لها...وهي بي برة قاعدة وتسمع في النضم....وفي سرها تدعي للدكتور... انت يا يابا يعرسو لك بنات الحور.....وربنا يسهل عليك ويعدلا عليك محل ما تقبل....يا الفاهم....ان شاء الله يا يابا لا تفوت لا تموت.....دا كلو في سرها والضحك والبسط والكيف داير يكتلا..... في الدرب... سعلت ولدا زي التكنها ما سمعت شي..... السند ولدي.. الدكتور قال لك شنو؟؟؟؟؟؟ نعل مو دايرين يسو لي عملية؟.وقعدت تتنخج وتبكي.. شوفتو شفتنة العجوز دي؟....ولدا قال لها لا يا يمة.... الدكتور قال يعرسو لك.....دحين حسي انا داير اكوس لك راجل..وبعدين يا يمة انت عارفة حق الراجل عليكي.. اصلك ما تغليتي عليهو....والراجل من حقو يدقك ويهجرك في المضجع... المضجع يعني العنقريب يا يمة...قالت لو... الدق دا وحدوووو ما بقدر عليهو.. علا هجر العناقريب دا هئ هئ هئ هئ الله يجازيك يا السند وحات الله خجلتني واكلت لحم وشي..... انت يا البلا الحلب ؟؟؟.... بري بري منك......عاد يا اخوي اشتري لنا عناقريبن جُداد.....عرسو لي حاجة نفيسة....وصباح يوم العرس ولدا جا يصبح عليها.... يمة كيف اصبحتي...... قالت لو انت يا يابا تصبح نبي...يا البترضي علي امك......"من التراث" حضرت مجلس صلح..... بين راجل ومرتو.....المرا مقعدنها في واطة الله....والرجال فوق عناقريب....المرا باين عليها مضروبة ضرب شديد...والجروح باينة في وشيها...المرا قالو غلتت علي الراجل...وشيخ المجلس قال لها تقومي تقعي للراجل دا فوق راسو....وتتعضري لو.... المرا قامت وسلمت علي راس الراجل واتعضرت....لاقيت الزول صاحب القصة دي ..وسعلتو... قلتو انتو مالكم؟....قال لي .. المرا يا سجيمان اخوي شليقة....وما بتعرف تنضم... جيت انا من برا المغرب تعبان قلت لها امرقي لي...العنقريب دا في محل بنوم لانو لو غيرتي بكانو ما بقدر انوم....... ضحكت وقالت سمح... ايوا صُح والله .....وربنا زاتو قال ضنب الكلب عمرو ما بيتعدل....شفت جنس النضم دا؟...دا نضم يقولوهو لي زول جاي يرتاح عند اهلو؟... وهي قايلاها ونسة وونسة سمحة كمان...... يعني بقيت انا واحد من اتنين يا كلب.... يا ضنبو.......وقالت ربنا قال؟...دايرا تقول ربنا نضمن ماقالو شفت قلة ادب المرا دي؟..وامسكها ادقها لك دقة امها بت اعم ابوها واخنقا واهجرا فوق العنقريب لمن قربت تفطس....وقلت لها اوريك النضم القالو ربنا بالصُح..... ربنا قال اضربوهن واهجروهن في المضاجع.....زي شغلتي دي حسي.........