|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
- دائرة اختصاص قسم شرطة العمارات تضم اغلب الاندية و امكان حفلات رأس السنة ، الفنان العملاق ............. كان يحي حفل رأس السنة بنادي الخليج (الدبلوماسي حالياً) ، في ذلك اليوم وبحكم عملي في ذلك القسم كنت اقوم بالمرور على الاندية لتفقد الاحوال ثم اعود مرة اخري الى القسم وهكذا .
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
- اطلعت على البلاغ وسألت الاستاذ .......... ؟ انت كنت بتغني في شنو يا استاذ ......... ؟؟؟ عدد لي اغانيه المعروفة والمشهورة. - امسكت بالبلاغ وكتبت : - (يطلق سراح المتهم بالتعهد الشخصي ويعلن لمقابلة المحكمة يوم 2/1/1991م) - ناديت السائق وطلبت منه ان يقوم بتوصيل الاستاذ الى منزله وقد كان.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote: وصافحت الفنان قائلاً شرفتنا يا استاذ .......... انشاء الله خير ؟؟ |
Quote: (جهة امنية) احضرت الاستاذ ........... وطلبت فتح بلاغ في مواجهته |
Quote: - اطلعت على البلاغ وسألت الاستاذ .......... ؟ انت كنت بتغني في شنو يا استاذ ......... ؟؟؟ |
Quote: ان يقوم بتوصيل الاستاذ الى منزله |
جنابو تاني من يوم الليلة البيقول ليْ أستاذ علاء بخْسَرو لوووووووول
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote: - (يطلق سراح المتهم بالتعهد الشخصي ويعلن لمقابلة المحكمة يوم 2/1/1991م) |
يا جنابو ( بالمعاش ) .. لو سمحت ... حاجاتك الارشيفية دى ما تختها بى عنوان كأنها حصلت امبارح ... عيب تخدع القارئ و يجى طاير توش .. تقول ليهو : لما كنت فى قسم العمارات .. يا اخى قدتينا بى قسم العمارات ده .. و كمان نصيحة اخو .. هذا المسلك يقلل من احترامنا لك ... حافظ على رصيدك يا عمر وهو رصيد ليس بالهين ...
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: انور التكينة)
|
Quote: حاجاتك الارشيفية دى ما تختها بى عنوان كأنها حصلت امبارح |
؟؟؟؟
يا أنور ما أظنك قريت العنوان كويس
Quote: فنان مشهور يقضي ليلة رأس السنة في قسم شرطة العمارات |
قال ليك رأس السنة ،،، تقول كأنها حصلت أمبارح؟؟؟ تمهل قبل الرد خاصة النقد
Quote: و كمان نصيحة اخو .. هذا المسلك يقلل من احترامنا لك ... حافظ على رصيدك |
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: انور التكينة)
|
Quote: جنابو ( بالمعاش ) .. لو سمحت ... حاجاتك الارشيفية دى ما تختها بى عنوان كأنها حصلت امبارح ... عيب تخدع القارئ و يجى طاير توش .. تقول ليهو : لما كنت فى قسم العمارات .. يا اخى قدتينا بى قسم العمارات ده .. و كمان نصيحة اخو .. هذا المسلك يقلل من احترامنا لك ... حافظ على رصيدك يا عمر وهو رصيد ليس بالهين ... |
التكينة مالك ياخوى زعلت كدا .. اوع الفنان دا يكون قريبك ولا حاجة.؟
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: انور التكينة)
|
Quote: يا جنابو ( بالمعاش ) .. لو سمحت ... حاجاتك الارشيفية دى ما تختها بى عنوان كأنها حصلت امبارح ... عيب تخدع القارئ و يجى طاير توش .. تقول ليهو : لما كنت فى قسم العمارات .. يا اخى قدتينا بى قسم العمارات ده .. و كمان نصيحة اخو .. هذا المسلك يقلل من احترامنا لك ... حافظ على رصيدك يا عمر وهو رصيد ليس بالهين ... |
الاخ انور تحياتي
أنا ما عارف انت قريت كلامي ده كيف ؟ وخداع شنو ؟ وامبارح شنو ؟ ونحن في شهر 9 يعني رأس السنةلو فرضنا بتاعة 2009 ليهو تسعة شهور
فكيف زول ممكن يفهم انو القصة حصلت امبارح زي ما بتقول.
تاني حاجة قديتك بي قسم العمارات ده متين بالعدد دي المرة التانية احكي عنو !!! وكلامي الانتو شايفو قداد ده في ناس شايفنو كويس
وعاوزين يسمعو قصص زي دي فما تفرض رأيك ووجهة نظرك الشخصية على الناس ، اسه انت ما قادي المنبر ده بي صور الفطور الاول والفطور
التاني في زول قال ليك يا اخي ماتقدنا.
وشنو حكاية هذا المسلك !! مسلك شنو ؟؟ انا لا نبذت زول ولا اتكلمت كلام فارغ عشان تجي تكتب لي مسلك وما مسلك ويقلل من احترامنا ليك
يا اخي انا بحكي في قصة عجبتك كان بها ما عجبتك قول ما عجبتني بدون ما تقلل احترامك لي والكلام الما عندو معني ده.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: داليا حافظ)
|
Quote: جنابو مساءك سعيد
في شي دايما في كلامك فيهو شهامة وإخلاص ..
عليك الله الحصل ليك شنو بعد اخليت سبيل الفنان .. |
شكرا يا داليا ..... حقيقة ما كنت عاوز اكمل القصة لانو بالجد كلام الاخ انور التكينة ده فور دمي ، لكن احتراماً لمداخلتك
ولقرا المنبر والاعضاء الذين من حقهم علي ان اكمل الحكاية ح اكمل.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
يا جنابو/سعادتك
Quote: حقيقة ما كنت عاوز اكمل القصة لانو بالجد كلام الاخ انور التكينة ده فور دمي ، لكن احتراماً لمداخلتك
ولقرا المنبر والاعضاء الذين من حقهم علي ان اكمل الحكاية ح اكمل. |
خلي الحمبكة ووسع صدرك وقول العندك أكيد ما ح ترضي كل الناس ، لكن كمان ما تخلي الناس تحدد ليك خط سيرك طوالي
بس سؤال رتبتك زمان كانت شنو عشان نحدد نقول ليك يا جنابو واللا يا سعادتك
فضل كرار
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: Fadl Karrar)
|
Quote: خلي الحمبكة ووسع صدرك وقول العندك أكيد ما ح ترضي كل الناس ، لكن كمان ما تخلي الناس تحدد ليك خط سيرك طوالي
بس سؤال رتبتك زمان كانت شنو عشان نحدد نقول ليك يا جنابو واللا يا سعادتك
فضل كرار |
تعرف يافضل دي واحدة من عيوبي البعترف بيها لكن الحمد لله برضوا بقدر ما بزعل سريع بنسي الزعل اسرع وما بحقد على زول ابداً
الزمن داك كنا ملازمين بي دبورة واحدة يعني من الورقة
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
- طيب سعادتك : - 1- تلفزيون واذاعة السودان يقدمون هذا (المتهم) في برامجهم ويقولون (الاستاذ) يعني هو استاذ باعتراف الاجهزة الرسمية. - 2- هم قاموا باجراء قانوني عندما فتحوا البلاغ وانا قمت باجراء قانوني عندما اطلقت سراحه بالتعهد الشخصي لانه شخصية معروفة والبلاغ بسيط وفي راي البلاغ بنشطب في المحكمة من اول وهلة . - 3- قمت بتوصيل المتهم لان الشرطة في خدمة الشعب والوقت متأخر ولاتوجد وسيلة مواصلات وبعدين استاذ ...... ده مفروض يعملوا ليهو تمثال ويكرموهو والدولة تديهو عربية مش توصلوا بي عربية الشرطة.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: داليا حافظ)
|
Quote: لأنو من وجهة نظري انو الشرطي المخلص ماهو البنفذ الأوامر ..هو البقدم صورة تليق بالكيان المنتمي
ليهو وبحترم السلطة المخولة ليهو .. |
كلام مزبوط 100% ياداليا ...... هكذا تعلمنا من الذين سبقونا وعلمونا ان (ضابط) ماحاجة ساهلة وزي مابقول واحد صاحبنا ودفعتنا
الزول لازم يبقي (ضابط) ما يبقي (ضب) والضابط يجب ان تكون لديه القدرة على اتخاذ القرار الصحيح بغض النظر عن تبعات هذا القرار وان
يكون لديه فلتر خاص يصفي به الاشياء ولايسمح للاشياء التى تشوه صورته وصورة الشرطة بالمرور من خلال هذا الفلتر ، الضابط يجب ان
يكون هو الحد الفاصل بين الصاح والخطأ والا ما يبقي ضابط.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote: والضابط يجب ان تكون لديه القدرة على اتخاذ القرار الصحيح بغض النظر عن تبعات هذا القرار وان
|
الأخ عمر عثمان كل عام وانت بخير حكى لي صديق عزيز أنه عندما كان برتبة ملازم حدثت مشاجرة كبيرة في بيت أحدى العائلات المرموقة الكبيرة في منطقة عمله ، وعندما وصل بلاغ بالمشاجرة أمره رئيسه الأعلى بأن يذهب لمعالجة الأمر ..ذهب صديقي وعند دخوله ذلك البيت وجد المشاجرة في قمتها واصوات النساء عالية ..صاحبي راح ضارب واحد (بومبان) وفي أقل من دقيقة المشاجرة انفضت وكل واحدة دخلت بيتها..صاحبي طبعا رجع وهو مبسوط جدا أنه أدى واجبه على أكمل وجه وسأله رئيسه ( أها عملت شنو؟) صاحبي أجاب (ضربت بمبان والمشاجرة انتهت) رئيسه الذي كان يبدو عليه (خواف شوية) انزعج وقال ليهو ( يا اخي عملت مصيبة كبيرة تجيب لنا هوا ...كيف تضرب مبان في هذا البيت الكبير؟ النتيجة بعد يومين جاءهم جواب شكر من كبير تلك العائلة الكبيرة يتضمن حسن تصرف صاحبي الذي لولا بمبانه لحدثت كارثة في تلك المشاجرة . صديقي تدرج بعد ذلك حتى وصل رتبة اللواء ونال الدكتوراه في القانون الدولي وكان من خيرة رجال الشرطة السودانية.
تحياتي ومودتي
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
تاني يوم حضر الاستاذ ... الى القسم وكان الجو مشحون بالترقب وبما سيقرره القاضي في القضية ، لحظة حضور الاستاذ كنا نتناول الفطور في مكتب الضباط اصرينا عليه بان يدخل ويتناول معنا الفطور وبسخريته وتعليقاته الظريفة قال ياجماعة انا مش متهم ؟ كيف افطر مع الضباط كلنا بصوت واحد لالالا يا استاذ ماتقول كده انت يا اخي احسن زول في الناس الفي القسم دي كلها ، افراد الجهة الامنية الشاكين في البلاغ بالطبع لم يعجبهم هذا الحال وكان ذلك واضحاً في نظراتهم لكن لم نحفل بها ، بعد دقائق نادي حاجب المحكمة على اطراف القضية
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: محمد عبد الماجد الصايم)
|
Quote: - طيب سعادتك : - 1- تلفزيون واذاعة السودان يقدمون هذا (المتهم) في برامجهم ويقولون (الاستاذ) يعني هو استاذ باعتراف الاجهزة الرسمية. - 2- هم قاموا باجراء قانوني عندما فتحوا البلاغ وانا قمت باجراء قانوني عندما اطلقت سراحه بالتعهد الشخصي لانه شخصية معروفة والبلاغ بسيط وفي راي البلاغ بنشطب في المحكمة من اول وهلة . - 3- قمت بتوصيل المتهم لان الشرطة في خدمة الشعب والوقت متأخر ولاتوجد وسيلة مواصلات وبعدين استاذ ...... ده مفروض يعملوا ليهو تمثال ويكرموهو والدولة تديهو عربية مش توصلوا بي عربية الشرطة.
|
جنابو عمر تحياات طيبات كلامك الأخدر دا عجبنى شديد .. و يا ريت كل من أعطى فى يده سلطة تنفيذ القانون يتعامل بهذا الوعى و الأخلاق العالية و الأمانة أنت تعاملت بأصلك الطيب و يومها كنت خير ممثل للشعب السودانى تجاه مبدعيه .. ومن جهةأخرى إحترمت القانون و نفذته ليت القانون و ما يجرى فى البلاد كان يتيح لك محاسبة من إستغلوا سلطاتهم الأمنية بإلصاق هذه التهم الساذجة على الفنان
أها كنت أتمنى أن تكون النقطة الرابعة الخضراء إنك قمت بالواجب بنفسك بتوصيل الأستاذ الفنان لمنزله .. أكيد بتكون مرت على خاطرك ولكن لم تنفذها لحسابات معينة .. قد تكون متعلة بأنك الضامن ..
يا خى قصة المحكمة الفى قسم البوليس ذكرتنى تجربة شخصية مع القسم الشمالى بأم درمان قضية كنت الشاكى فيها والمتهمين 4 حرامية بيوت قبضناهم آخر الليل متلبسين وا لمال المسروق .. كانت تجربة مؤلمة لى و للشهود أصحاب المال المسروق ، نلتزم بالحضور للمحكمة وكل مرة يتناوب أحد المتهمين بالغياب وتأجل القضية .. ولم نجد من القاضى غير التعامل الفظ والنهير عندما نبدى تحفظنا لهذا الإستغلال للقانون الذى إستمر لأكثر من عام وأنه أثر على أعمالنا و مصالحنا بالمداومة على الحضور للمحكمة .. إستمر المسلسل حتى هجرتى من السودان ولا أعلم كيف إنتهى .. القاضى كان فى رأيى غير مؤهل و هو يخرج عن آداب التعامل مستغلاً لسلطته .. و كم غيره من قضاة ورجال بوليس وأمن يتعاملون بعدم إحترافية مستغلين لسلطة القانون .. ولذلك ما تسرده بهذا البوست فيه مثال لرجل قانون أتمنى أن تسود أخلاقياته فى السودان.
مع تقديرى
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: نادر الفضلى)
|
Quote: أها كنت أتمنى أن تكون النقطة الرابعة الخضراء إنك قمت بالواجب بنفسك بتوصيل الأستاذ الفنان لمنزله .. أكيد بتكون مرت على خاطرك ولكن لم تنفذها لحسابات معينة .. قد تكون متعلة بأنك الضامن ..
|
الاخ نادر تحياتي
شكرا على سطورك الرائعة دي .....
والله هو بستاهل اوصلو بنفسي لكن بي صراحة كنت لاحق برنامج تاني ما الدنيا رأس سنة وكده
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: علاء الدين صالح)
|
بعد ان استمع القاضي للشاكي والشهود والمتهم الاستاذ ....... اصدر حكمه بالبراءة باعتبار ان اغاني الاستاذ مجازة من قبل الجهات المختصة وان الاستاذ غير مسئول عن الزي الفاضح او الرقيص الفاضح الذي يقوم به حضور الحفلة وانما هي مسئولية من قاموا بذلك ومنعهم مسئولية الشرطة التى كانت تحرس الحفلة والفنان ليس مسئولاً عنها البتة
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: علاء الدين صالح)
|
جنابوا عمر كل عام وانت بخير والاسرة الكريمة
ما تواصل مالك مدينا ليها بالقطارة صائم او الحاصل شنو
بس ان شاء الله ما فيها صور زى الكاشف اخوك شال اصبعوا وطبز عينة
قايتو الله لا ورانا مضايكم ابو صور تلاقيه كل ......... والله يستر ههههههه
اها فى انتظار القاضى ولا يكون الفنان من الجزيرة احسن والله نفتح الموضوع من جديد ونطلب سيف بخيت على وجهة السرعه
واااااااااصل متابعين والله يطولك ياروح
ود ابوسنينه
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote:
[q] بعد ان استمع القاضي للشاكي والشهود والمتهم الاستاذ ....... اصدر حكمه بالبراءة باعتبار ان اغاني الاستاذ مجازة من قبل الجهات المختصة وان الاستاذ غير مسئول عن الزي الفاضح او الرقيص الفاضح الذي يقوم به حضور الحفلة وانما هي مسئولية من قاموا بذلك ومنعهم مسئولية الشرطة التى كانت تحرس الحفلة والفنان ليس مسئولاً عنها البتة
|
جنابو عمر
هل يوجد أى نوع من المحاسبة لأفراد الشرطة أو الأمن الذين يخطأون أخطاء فادحة فى تنفيذ القانون ، مما يسبب أضرراً على مواطنين، أبرياء، ومما يشكك فى كفاءتهم و خطر إعطائهم سلطة تنفيذ القانون؟
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: نادر الفضلى)
|
Quote: جنابو عمر
هل يوجد أى نوع من المحاسبة لأفراد الشرطة أو الأمن الذين يخطأون أخطاء فادحة فى تنفيذ القانون ، مما يسبب أضرراً على مواطنين، أبرياء، ومما يشكك فى كفاءتهم و خطر إعطائهم سلطة تنفيذ القانون؟ |
الى حد ما يانادر والسبب في عدم المحاسبة في كثير من الاحيان احجام المواطن عن الشكوي ، رجل الشرطة الفاهم يجب ان لايتخذ اى
اجراء جنائي في مواجهة اى موطن الا اذا توفر الشك المعقول والبينات المبدئية على ارتكاب المواطن للفعل المجرم. ونرجع لحتة
الضابط القبيل مفروض وحسب ضوابط العمل مافي بلاغ يتفتح الا بتوجيه من ضابط او وكيل نيابة وهنا يجب على الضابط ان لاينساق وراء
ادعاءات الافراد الذين ربما يعوزهم التكييف السليم او الرؤية الكلية للاشياء. وحدثت لي شخصياً ان تكون امامك وقائع بلاغ مكتملة
الاركان خصوصاً في البلاغات المتعلقة بالنساء ويكون من الحكمة ابتغاء تحقيق مصالح اكبر ان تغض النظر عن اتخاذ الاجراء القانوني وتكتفي
ربما بالتوجيه او النصح
| |
|
|
|
|
|
|
الاعزاء المتداخلين الكبسورات ان جاز التعبير اللغوى
عمر عثمان - اول دفعتو - من الضباط المميزين فى شرطة السوادن سابقا - والناجحين فى حياتهم العمليه -- ولد عز كمان
عزيزى / عمر
تعرف فى البعض الذى يحب ان يثير البوسات -- ولكن لاتجعل الامور تخرج من السيطرة - احكى ودع المتابعين ممن يطلعوا ويستفيدوا ودع المناكفين على هواهم - والمابعرفك بجهلك. لكن بينى بينك الشمار ده قاطع قلبى كدى لمن نتقابل نعرف الفنان ده منو ودبرى
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: عبد الرحيم محمد عبد الرحيم)
|
Quote: الاعزاء المتداخلين الكبسورات ان جاز التعبير اللغوى
عمر عثمان - اول دفعتو - من الضباط المميزين فى شرطة السوادن سابقا - والناجحين فى حياتهم العمليه -- ولد عز كمان
عزيزى / عمر
تعرف فى البعض الذى يحب ان يثير البوسات -- ولكن لاتجعل الامور تخرج من السيطرة - احكى ودع المتابعين ممن يطلعوا ويستفيدوا ودع المناكفين على هواهم - والمابعرفك بجهلك. لكن بينى بينك الشمار ده قاطع قلبى كدى لمن نتقابل نعرف الفنان ده منو ودبرى |
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: مازن الجمّال)
|
Quote: بعد ان استمع القاضي للشاكي والشهود والمتهم الاستاذ ....... اصدر حكمه بالبراءة باعتبار ان اغاني الاستاذ مجازة من قبل الجهات المختصة وان الاستاذ غير مسئول عن الزي الفاضح او الرقيص الفاضح الذي يقوم به حضور الحفلة وانما هي مسئولية من قاموا بذلك ومنعهم مسئولية الشرطة التى كانت تحرس الحفلة والفنان ليس مسئولاً عنها البتة |
يامازن الكوتيشن الفوق ده هو الحلقة الاخيرة الظاهر مع شتيت كبسور للكورة ما لاحظت ليهو
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote: الأخ عمر عثمان كل عام وانت بخير حكى لي صديق عزيز أنه عندما كان برتبة ملازم حدثت مشاجرة كبيرة في بيت أحدى العائلات المرموقة الكبيرة في منطقة عمله ، وعندما وصل بلاغ بالمشاجرة أمره رئيسه الأعلى بأن يذهب لمعالجة الأمر ..ذهب صديقي وعند دخوله ذلك البيت وجد المشاجرة في قمتها واصوات النساء عالية ..صاحبي راح ضارب واحد (بومبان) وفي أقل من دقيقة المشاجرة انفضت وكل واحدة دخلت بيتها..صاحبي طبعا رجع وهو مبسوط جدا أنه أدى واجبه على أكمل وجه وسأله رئيسه ( أها عملت شنو؟) صاحبي أجاب (ضربت بمبان والمشاجرة انتهت) رئيسه الذي كان يبدو عليه (خواف شوية) انزعج وقال ليهو ( يا اخي عملت مصيبة كبيرة تجيب لنا هوا ...كيف تضرب مبان في هذا البيت الكبير؟ النتيجة بعد يومين جاءهم جواب شكر من كبير تلك العائلة الكبيرة يتضمن حسن تصرف صاحبي الذي لولا بمبانه لحدثت كارثة في تلك المشاجرة . صديقي تدرج بعد ذلك حتى وصل رتبة اللواء ونال الدكتوراه في القانون الدولي وكان من خيرة رجال الشرطة السودانية.
تحياتي ومودتي |
الاخ جعفر تحياتي
كضاب لو في زول قال ليك في كتاب بوليس تقراه يوريك كيف تشتغل شغل البوليس صاح .. اى في كتب واوامر مستديمة وتعليمات لكن
في النهاية لكل حادثة حديث والضابط الصاح يعمل الصاح حتى ولو كان في الظاهر غلط
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
Quote: يامازن الكوتيشن الفوق ده هو الحلقة الاخيرة الظاهر مع شتيت كبسور للكورة ما لاحظت ليهو |
والله اتخيل يا عمر قريتو .. لكن ما عارف لي كنت متخيل انو حتكون في تبعات احتمال لانو الفترة ديك ( بداية التسعينات ) كان فيها نوع من انواع الكبت هاجر بسببو كتير من الفنانين والباقين ما بين المات حسرة والمات فنو واندفن
كنت متصور انو ممكن يكون في رد اعتبار مثلا للاستاذ او انتو مسكتو بتاعين ( الجهة ست البلاغ ) ديل جلدتوهم في ميدان عام بحجة البلاغ الكاذب والحاجات المن النوع دا
عموما انا متابع جيد لرواياتك البوليسية الشيقة
وتقبل خالص احترامي
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: مازن الجمّال)
|
Quote: احتمال لانو الفترة ديك ( بداية التسعينات ) كان فيها نوع من انواع الكبت هاجر بسببو كتير من الفنانين والباقين ما بين المات حسرة والمات فنو واندفن
|
لا الحمد لله ما حصل حاجة من ده وفنانا العظيم لايزال يشدو بالروائع وافرج التلفزيون والاذاعة عن اغانيه واغاني باقي العمالقة
والتى حبست في فترة من الفترات
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: omer osman)
|
الأخ عمر عثمان تحية طيبة وكل عام وانتم بخير والله بمعاملتك الطيبة لذلك الفنان يدل على معدنك الطيب وأخلاقك العالية واذا كان كل المسؤولين عن الأمن بيتعاملوا مع الناس زيك كان السودان اتقدم لقدام.. ولكن هناطباط شرطة يستمتعون بتعذيب البشر..ونرجو أن نقرأ المزيد من ارشيف الحراسات وعالم المتهمين والمجرمين والابرياء الذين سجنوا دون ذنب والمجرمين الذين يُطلق سراحهمأيضا بدون مبرر. ويا النذير أخوى : معقول يكون الفنان هو ابوعركي البخيت؟؟؟؟وابوعركي أظنه عمر ما بيعرف مراكز الشرطة واقفة بوين!!
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: شادية حامد)
|
Quote: جنابو سلامات يعني الوقت داك مافي قانون ولا المادة152 يمكن ان يعاقب بيها باين عليه فنان فنان طلع زي الشعرة من العجين, وا مغيصتي على أصحابه يكونوا لي هسع في الزنزانة ومنتظرين تنفيذ المادة 152الرسول جيب لبنا أخبارهم. |
الاخت شادية تحياتي
لا الزمن داك ما كان في المادة 152 ولا قانون خاص بالنظام العام ، المواد التى تضبط النظام العام كانت موجودة في صلب قانون
العقوبات ومنذ قانون العقوبات لسنة 1925م بالطبع العبرة بالتطبيق السليم المعافي من الهوي والغرض واستصحاب مقاصد المشرع
وروح القانون اكثر من نصوصه.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: السر عبدالله)
|
الأخ عمر عثمان تابعت موضوعك او بالأصح بعض مواضيعك السابقة ومداخلات الأعضاء ولمست ارتياحهم لبوستاتك وطريقة السرد وانا برضو ضابط بوليس بالمعاش ومع ولكننى لم أعمل كثيرا بالجنايات والمباحث الا أن كتاباتك تثير فينى اشجان كثيرة ايام عملنا القصيرة جدا بالأقسام والموزعة بين الجنايات والمباحث والتحرى والأطواف الليلية وبعد كدة فى مجال ابعد ما يكون من هذه الأعمال حتى نزولنا للمعاش فى نهاية يوليو 2006 وكنت حينها مدير لجمارك ولاية غرب بحر الغزال مقيما فى حاضرتها مدينة واو الجميلةونحن فى عز شبابنا وبعد اكتساب خبرات كنا نتمنى تسخيرها لخير هذا البلد ولكن حصل المقدور ... على العموم اتشرف ان اكون واجدا من ضباط الشرطة وزميل لأمثالك وما أكثرهم .. وبالله عليك ما تبخل علينا بذكرياتك وقصصك المشوقة .. ودمتم
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: السر عبدالله)
|
الاخ السر تحياتي
في كل مرفق هناك الصالح والطالح لكن بالطبع عندما يرتبط المرفق بتنفيذ القانون وتكون بيده سلطات وصلاحيات يصبح النشاز فيه
خطير جداً ، الشرطة كمؤسسة لها تاريخها وقوانينها التى يمكن ان تكبح جماح كل من يخرج عن الخط القويم ويبقي هناك دور مهم لكل
مواطن في ان لايتردد في المطالبة بحقوقه والشكوي ضد اى تجاوز يرتكب بحقه.
| |
|
|
|
|
|
|
Re: فنان مشهور يقضي ليلة رأس السنة في قسم شرطة العمارات (Re: محمد سنى دفع الله)
|
المكرم عمر عثمان سلامات عليك
سرد قصصى رشيق ينم عن ذوق ودراية وتمكن ، حقيقة استمتعت به كثيرا ، ضروب الفنون كثيره لكن أصعبها هو القصص القصيرة ذلك لأنك قد تحتاج لإختزال احداث كثير فى قالب ضيق مع الاحتفاظ بالإثارة والبناء العضوى للقصة وهو نهج يصعب على الكثيرين لكننى أراك نجحت فيه وبإمتياز فى إنتظار قصة أخرى .
| |
|
|
|
|
|
|