Anwarking طلب اللجوء فى امريكا ويطلب العون المادى.. سقوط اخر الرجال المحترمين

Quote: يا دكتور... سلام جدد! أنا ما عارف لييه إنتا مُصِّر إنك تواصل في الإفتاء السلبي في موضوع تم توضيح أسبابه ومسبباته. يا أخي لو كان دعم الأصدقاء (أمريكان وسودانيين) لصاحبهم في محنته تسول.... فمرحب بيه وحبابه! أنور عدل آوراقه قبل عشرة أيام.. وممكن يشتغل بضراعه الأخدر.. بس في حاجتين فايتات عليك ويمكن مرن عليك في القطعة الكتبتها مُنيَّة وما إلتفتا عليها وهم: أولاً: المعضلة القانونية للعمل بدون تصريح. نعم السوق الأسود موجود وأي زول ممكن يشتغل ويقبض من "تحت الطاولة" ذي ما بنقول هنا. ولكن إذا تم القبض عليك، فده ممكن يسود ليك ملفك مدى حياتك في أمريكا.. ده لو ما وصل الإمر لأدارة الهجرة وتقوم برفض طلبك وتأمر بترحيك لإرتكابك مخالفة العمل بدون تصريح، وجناية التهرب من الضرائب من الضرائب. وطبعاً ديل لو ما سفروك حـ يبوظو ليك أي طلب للعمل في المستقبل، وبالذات لأكاديمي ذي دكتور دفع الله ده المكانه الجامعات ومراكز البحوث، والبلد دي مثلها مثل أي في مسألة البحث عن عمل.. ونحن في ظروف إقتصادية صعبة تجعل الحصول على عمل فيه أمر نادر وخاصة لمن لا يحمل أوراق. نعم أنور يحمل أوراق إقامة فانونية ولكنه بحاجة لبعض الوثائق والتي يحتاج إخراجها بعض الوقت، ثانياً: أنور جانا ومكث معانا تلاتة شهور، حام فيهم البلد الكبيرة وغالية دي موش من أجل الفسحة والتسوق... بل من أجل مشروع عمل عام هو بيؤمن بيهو لمصلحة وطنه البيحبه. وطبعاً دي مصاريف لزول بياكل من سنامه، صاحب أسرة، وما عنده مصدر دخل. وهنا لو ما عندك ورق مافي حتة بتديك دعم مالي. وماعندك غير أصحابك وأهل بلدك الفيهم الكويس وفيهم ذي الحلف بيهو دكتور بلة طلاق. وفي الحالات الطبيعية ديل ممكن يشيلوك لغاية ما تعبر بر الأمان.. بس ما حـ يشيلوا قضيتك ولا حـ يتحملوا أتعاب المحاميين (الذي النار) وطبعاً مسألة سفرك وترحالك من أجل مبادئك ما حـ تلقى دعم من الناس الشالوك وكتر خيرهم. وللعلم أنور لم يطلب من أصحابه (مليم) واحد، ويعلم الله إنو رفض تقبل أي مساعدة مالية مني ليهو وقال لي: "لو سخنت أنا عندي غيركم منو؟!"، وده حصل مع كم زول، لغاية ما الشباب ديل أقنعوه بهذه الحملة بين الأحباب والأصحاب وقالوا ليهو ده إجراء مؤقت يعوضك خسارتك ويتم مبلغ المحاماة ويساعدك لغاية ما تشيل روحك. وهو بشخصيته المتطورة تقبل هذا الأمر.. فعسى ولعل يسهم فيه هو بنفسه عند مساعدة شخص آخر في المستقبل. رجائي التعامل مع هذا الأمر بموضوعية خالية من العواطف... وشكــــراً!