|
محاولة للفهم : ما الذي حدث ؟!!
|
معدل السرعة التي يتدهور بها سوداننا الشقيق فاقت معدل سرعة سقوط التفاحة في راس نيوتن الأصلع !! منذ الاستقلال و كل يوم يصبح علينا و البلد - بالخطوة السريعة - للخلف در !! التحية للشعب السوداني الشقيق : ساسة و مثقفين ، قادة راي عام و متعلمين، حكاما و ناس ماشة ساي في شوارع الله أكبر : التحية لنا .... فلولانا - جميعا - ما كان هذا ممكنا !!
|
|
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
يا أمين تحياتي
قال صديق بأسي ذات مساء : والله العظيم السودان ده لو أدوهو لي طفل وقالو ليهو خربوا ما كان حيخربوا قدر ده
ثم
ثم ثم بكي يا أمين هذه بلاد أمورها جايطة شديد وركبها سايحة وأنا وكما قلت في كتابة مجاورة بقيت أشك حتي في الناس الماشة في الشوارع بقيت أكلم روحي يا أمين ياربي ديل بشر ولا ما بشر وهل أنا بشر وأنتمي للعالم الإنساني أم مجرد زول سفلي رمتوا الأقدار وسط عالم يمور بالشرطيين والسفليين والeen een een ياخ الناس دي حتفهم متين إنو العمر ده موش بعزقة
تحياتي
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
في سبعينات القرن الماضي أجري بروفيسور عمر بليل -علية رحمة الله- عملية زرع كلي لامير لأمير سعودي في مستشفي الخرطوم .... مستشفي الخرطوم الان لا تستطيع زرع زهرة في حوشه من الأوساخ !! هذه الرحلة الطويلة من التدهور ما كانت لتحدث لولا عمل دؤب مستمر و منظم و عارف نفسو بعمل في شنو !!!!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
سلامات يا بروف وكل عام وانت بخير خالي المغترب منذ الثمانينات قرر الرجوع سنة الفين وخمسة انا يادوب لي سنتين غربة بدا بزنس كدا وما كان لغى اقامته بجي كل ستة شهور في اول زيارتين في الفين وستة و سبعة كان طيلة زيارتو يناقش فيني انو حقو ارجع و البلد فيها فرص و شغل في مجالنا و فتحت وبتاع في الفين وتمانية وتسع النبرة بتاعة الغلاط بقت تخف و صارت اقل ثقة الفين وعشرة و حداشر نهائي ما جاب السيرة آخر زيارة في الفين واطناشر وانا موديه على المطار قال شوف اسمع مش كان فنشوكم ولا عملوا السبعة وزمتها, تتصرف تشوف ليك اقامة ولا شغل تاني ولا اي حاجة أووووووووووعك ترجع البلد بقت - الفاظ بذيئة - و الكيزان الـ - الفاظ ابذأ - خلونا نعمل شنو كدا للنملة
| |
|
|
|
|
|
|
Re: محاولة للفهم : ما الذي حدث ؟!! (Re: عبدالوهاب علي الحاج)
|
في خمسينات القرن الماضي ... حينما كان السود و الملونين في أمريكا الشقيقة ( بالقانون ) لا يستطيعون دخول مطاعم البيض .... كان المواطن السوداني ( بالقانون ) يحصل علي تعويض من الحكومة جراء اهمالها : بالله أقرو الكلام ده من صحيفة الرأي العام 29/7/1958
ما الذي حدث ؟!!
| |
|
|
|
|
|
|
Re: محاولة للفهم : ما الذي حدث ؟!! (Re: صبري طه)
|
و في ستينات نفس القرن - عليه من الله ما يستحق - أرسل رئيس وزرائنا خطاب يطلب مية جنية دين من صديق :
ما الذي حدث ليجعل قادتنا يقتسمون موارد البلاد و العباد غنائما و حوافزا ثم يصرفون ما تبقي علي تنظيمهم ؟!!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
الناس في بلادي كانو أنصار و ختمية و شيوعيين ... كان الوطن أولا و الأحزاب ثانيا ... كان إختلاف الرأي لا يفسد للود قضية ... ما الذي حدث ليجعل إختلاف الراي - في منبر إسفيري - مدعاة لشتائم تطال الأباء و الأمهات و الجيران إذا لزم الأمر ؟!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
امينا الامين
تحيات طيبات
بمناسبة قطعة الخبر بتاعت الخمسينات دي, لما كانت الحكومة مسئلة لو عثر انسان في مجري لتعوضنه, احكي ليك القصة دي:
قبل سنوات و نحن نسوق التاكسي في مدينة ساكرمنتو الشغيغة, و هي عاصمة كاليفورنيا الاشغ, كانت معانا سواقة تكسي فليبينية اسمها روزي, و شغل التكسي في ساكرمنتو اتعب من المكوجي, روزي مرة ماشة على الرصيف و هي تمني نفسها بزبون ان شاء الله بخمس دولارات بعد ما وقفت الاولى في الصف لعدة ساعات, ربك و رب الخير قامت عترت في شق في الرصيف, و جات عربية المطافي و الاسعاف و البوليس و اخدوها للمستشفى بعد ما بقت كويسة عوضوها خمسين الف دولار. بعد فترة تاني روزي وقعت في مجري عملته شركة التلفونات, و تاني اخدت تعويض خمسين الف دولار! بعد داك المدينة قامت بحملة سدوا اي شق في اي رصيف, و بقينا لما نشوف عمال المدينة, اتوماتيكيا, نتبادل النكتة; انه ناس الامن الرصيفي بتاع مدينة ساكرمنتو شافوا روزي جاية في الطريق داك, عشان كدة سبقوها و صلحوه!
ياخ مش مؤسف ياخ انه في خمسينات القرن الماضي تكون حكوماتنا احسن من حكوماتنا في الالفية الجديدة!
معاك بنسأل ليييييييه ليييييه?
| |
|
|
|
|
|
|
Re: محاولة للفهم : ما الذي حدث ؟!! (Re: بدر الدين احمد موسى)
|
علي مستوي الأفراد : نحن من أجمل شعوب الأرض صفاتا ... لكنا ما اجتمعنا إلا و كان الفشل ثالثنا : البلد بقت بلدين و الباقي منها حروب في كل ركن ... الظلم هو الحاكم الشرعي في البلاد !! منذ الاستقلال و ما في حزب ما إنقسم ... مافي إتحاد كان بتاع كورة كان غناء ما إختلف الناس فيه و تقسمو و تشرذمو و كال فيه كل طرف للطرف الأخر .... مافي تجمع سودانيين كان لجنة شعبية في حي كان جالية في بلاد نائية ... إلا و تسكنها المشاكل و الخلافات و التنظير الغير منتج .... اخر إنجاز رياضي ليهو قريب التلتين سنة ... فنانينا لا يعرف عنهم الناس شيئا خارج هذا الوطن ... علمائنا لا ينتجون و لا يعرفون إلا حين خروجهم من هذا الوطن المنكوب .... الفشل هو الشئ الوحيد الذي نجحنا فيه كسودانين !!
-------------- ما الذي حدث ؟!!
| |
|
|
|
|
|
|
Re: محاولة للفهم : ما الذي حدث ؟!! (Re: قيقراوي)
|
يا قيقا أبوحتوت ده زول مُضِّل، وأمّار بالسوء، تباً له، يعني زي كلامو ده تحاول تفرتكو تجهجه مضمونو، وتُلام، تخليهو تكون ضغطت علي نفسك الأمارة بالسوء بعد ما أبوحتوت "وعدها بالحلق وقدّت أضانا"..
| |
|
|
|
|
|
|
Re: محاولة للفهم : ما الذي حدث ؟!! (Re: Ahmed musa)
|
سلامات يا أمين،
طبعآ، فشل مرعب!.
تصور مثلآ جميع الأحزاب الحاكمة في العالم تفخر بذاتها على ما بها من علل (حتى بعث سوريا) ما عدا كيزان السودان... حالفين قسم بإنهم ما "كيزان" ... ناكرين حطب : ). ودا بس عشان يوزعوا "العضة" بيناتهم بس والفشل للجميع ... حرفنة "فشلية" عظيمة وفضيحة مجلجلة!.
--- فعلآ حاجة عجيبة! ... الناس دي حصل فحصت دمها مرة واحدة بس؟.
| |
|
|
|
|
|
|
Re: محاولة للفهم : ما الذي حدث ؟!! (Re: محمد جمال الدين)
|
كلنا ساهمنا في الانهيار. وكلنا نتفرج. وخلال عام - على الأكثر - من الآن لن يكون هناك سودان لنترحم عليه.
ساهم كل منا بطريقته
بسلبية - بتنظير - بفساد - بمشاركة - بهروب - بأنانية - بنهب - أو بغيره
وظللنا مثل ثلاثة إخوة يلعنون مومساً بالنهار ويتسربون إلى فراشها ليلاً دون علم بعضهم.
ولم يكتفوا بالفراش بل تسولوا من المومس مالها ليلاً ولعنوها نهاراً.
| |
|
|
|
|
|
|
Re: محاولة للفهم : ما الذي حدث ؟!! (Re: Ahmed musa)
|
Quote: أشك حتي في الناس الماشة في الشوارع بقيت أكلم روحي يا أمين ياربي ديل بشر ولا ما بشر |
الخال عيد مبارك عليك وعلي الأخوة المشاركون في محاضرة للشيخ محمد حسن الشايقي بتاع الدين النصيحة ذكر ان نصف سكان الخرطوم من الجن وقال شوفوا ناس السوق العربي ديل نصهم جوان الاخ خضر رحم الله الوالد وأدخله فسيح جنانه
| |
|
|
|
|
|
|
Re: محاولة للفهم : ما الذي حدث ؟!! (Re: محمد المسلمي)
|
Quote: قال صديق بأسي ذات مساء : والله العظيم السودان ده لو أدوهو لي طفل وقالو ليهو خربوا ما كان حيخربوا قدر ده
|
يا خضرنا ... الخراب الحصل للبلد دي خراب ممنهج و متعوب فيه ... الأطفال مهما اوتو من قدرة لا يستطيعون فعل نصفه !!
---------------
Quote: آخر زيارة في الفين واطناشر وانا موديه على المطار قال شوف اسمع مش كان فنشوكم ولا عملوا السبعة وزمتها, تتصرف تشوف ليك اقامة ولا شغل تاني ولا اي حاجة أووووووووووعك ترجع البلد بقت - الفاظ بذيئة - و الكيزان الـ - الفاظ ابذأ - خلونا نعمل شنو كدا للنملة |
الحقيقة المرة يا البشرى يا أخوي : نحن ما بقي عندنا بلد نرجع ليهو ذاتو ... و للاسف الكلام ده بقي معروف للقاصي و الداني ... و بقي سبب أساسي لسوء معاملة السوداني في الخارج ... ياخي لمن بلدك يضن عليك بحقوقك الأساسية كبني أدم .... تتوقع شنو من الغريب ؟!!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: امين
ابدا من السطر الاول.
مشكلتنا اننا ماعارفين مشكلتنا شني ذاتا!
والا من نصف قرن كان وصلنا لي حل! |
متفق معاك يا كمال اننا ما عارفين مشكلتنا شنو و إلا كنا حليناها ... علاج أي مرض ببدأ بالتشخيص السليم ... تعال ورينا العلة وين من منظورك و الدبارة شنو !! -------------
Quote: البروف + ود البشرى سلام عليكم وكل سنة وانتو طيبين |
وهبه بالقمردين ....عليكم السلام أمبارح أخوك آخر ونسة في التلفون مع هشام هباني ... الزول ده ما ترفع منو كلو كلو ...
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
سلام للجميع ..
دعوة للتركيز شديد فى الجملة دى ..
Quote: علي مستوي الأفراد : نحن من أجمل شعوب الأرض صفاتا ... لكنا ما اجتمعنا إلا و كان الفشل ثالثنا :
|
وأعتقد ان المساعى تكللت بانجاح الخلل الحاصل فى الجملة بعد العمل الدؤوب على الشق الاول منها !!
| |
|
|
|
|
|
|
Re: محاولة للفهم : ما الذي حدث ؟!! (Re: محمد حيدر المشرف)
|
Quote: يا بروف بعد إذنك أنقل صورة جريدة الرأي العام دي للفيس بوك وللمنابر المجاورة ... |
يا عم صبري ... إذن شنو يا زول ؟!! أعلف ساي خلي العالم دي تشوف نحن جينا من وين !! ------------
Quote: ياخ مش مؤسف ياخ انه في خمسينات القرن الماضي تكون حكوماتنا احسن من حكوماتنا في الالفية الجديدة!
|
يا بدرنا .... حكومتنا في الخمسينيات كان بتدي تعويض بالالاف للوقع في الخور ... هسي عمك ميشيل ده كان وقع في خور ما يلقي اليرفعو خليه يدو تعويض !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: يا بدرنا .... حكومتنا في الخمسينيات كان بتدي تعويض بالالاف للوقع في الخور ... هسي عمك ميشيل ده كان وقع في خور ما يلقي اليرفعو خليه يدو تعويض !! |
ياامين الياسمين والله ضحكته ، من اقتباسك اعلاه ، حتي بانت النواجز (اوبعضها ) ........ وعندي ليك سؤال (وباالله ماتبتزني بموضوع الزيارة ) لو كان الوقع في الخور ، في الخمسينيات دا اسمو (....... ...... ..... اسرح بي خيالك علي مهلك ) كان شمه التعويض شمومه .. ام انتهي به الامر كمتسول بدلالة الاعاقة الباديه علي مظهره !!!!!! عمك عجوز من ناس امدرمان قال لي نحن ظلمنا نفسنا ظلم الحسن والحسين ..... قال لي زمان لمن يموت خواجه (وتعني اغريقي قبطي مصري او مسيحي ناصع البشره ) نلف الععم ونمشي نعزي ... وننسي او نغفل اخوتنا في الدم (مع اختلاف العقيدة ) .... انسي التمايز العقائدي (في ذلك الزمن ) هل كان علي عبد اللطيف الثائر تليق به الاشانه والذم لان بشرته نقيضه لي لون بشرة ميشيل ؟ وهل لو قام بثورة 24 العربي الفلسطيني المسيحي ، مسؤل القلم السياسي حينئذا (الاستخبارات ،الامن ) الذي منح لاحقا لقب السير ، هل كان سيتم تعيريه باصله وفصله ولون بشرته مثل البطل علي عبد اللطيف ؟ مع المفارقه ان انجال البطل علي عبداللطيف وتاريخه الناصع نفضت عنه الغبار باحثه يابانية !!! وابناء وسلالة الفلسطيني العربي المسيحي ناصع البشرة بعضهم عضو مجلس لورادت في المملكة المتحدة . اووووعك تقول للاسف ... وامايحزن عليه او مايدمي القلب انو محجوب ودينا خالد وبشاشا ... والكلام العائم داك ..... تعامل مع الحقائق لا العواطف والامنيات والرغبه الشخصية ..... وانا مستنيك بعصاة البيسبول (Baseball(
| |
|
|
|
|
|
|
Re: محاولة للفهم : ما الذي حدث ؟!! (Re: محمد حيدر المشرف)
|
غايتو النملة بعد دا مفروض ترفع عليكم قضية "رد شرف" ... (إن فضل فوقو حاجة!)
نحن كفرنا بهويتنا ثم كفرنا بدور الدولة في حياتنا فلم تعد لنا قيمة تذكر ...
وكل ذلك بسبب محاولات تكريس الدولة الرسالية ومرجعية سلطة الدولة لله ومن يحكمون نيابةً عنه في الأرض ..
... المهم ....
| |
|
|
|
|
|
|
Re: محاولة للفهم : ما الذي حدث ؟!! (Re: تبارك شيخ الدين جبريل)
|
Quote: حوادث مستشفي ربك ...هسه المحتاج للتاني منو المريض ولا الحوادث ؟
|
غايتو يا معاوية ... بعد صورتك الجبتها دي ... أخير لي أرقد في مقابر ربك من مستشفاها !! --------------
Quote: (.) امين قالوا النقطة ولا صمة الخشم ..!!! |
يا أحمد موسي ... يا زول نقط ساي ... لا فرق بين النقطة و صمة الخشم في أمر سوداننا الشقيق !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: البلد منذ أن ظهر فيها الصادق المهدي وزوج أخته حسن الترابي تاني ما ضاقت عافية.. |
يا ياسر ... التدهور الحاصل ده شغل مؤسس ما بقدرو عليه نفرين !! ----------
Quote: فعلآ حاجة عجيبة! ... الناس دي حصل فحصت دمها مرة واحدة بس؟. |
أيوااه يا جيمي ... القصة فعلا في الدم ... فيروس الفشل ده جاري في دمنا جنبا إلي جنب مع كريات الدم الحمراء ... و القصة دي ما الكيزان بس بالمناسبة ... الكيزان و العملوهو في السودان عبارة عن تجلي لفشلنا كشعب أدمن الفشل في كل المجالات !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: كلنا ساهمنا في الانهيار. وكلنا نتفرج. وخلال عام - على الأكثر - من الآن لن يكون هناك سودان لنترحم عليه.
ساهم كل منا بطريقته
بسلبية - بتنظير - بفساد - بمشاركة - بهروب - بأنانية - بنهب - أو بغيره
وظللنا مثل ثلاثة إخوة يلعنون مومساً بالنهار ويتسربون إلى فراشها ليلاً دون علم بعضهم.
ولم يكتفوا بالفراش بل تسولوا من المومس مالها ليلاً ولعنوها نهاراً. |
شكرا يا عم هاني علي الكلام المليان !! --------------
Quote: في محاضرة للشيخ محمد حسن الشايقي بتاع الدين النصيحة ذكر ان نصف سكان الخرطوم من الجن وقال شوفوا ناس السوق العربي ديل نصهم جوان
|
يا عم محمد ... الشيخ عصر علي الجن ساي ... يا أخوي ده شغل ما بقدرو عليه !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: وأعتقد ان المساعى تكللت بانجاح الخلل الحاصل فى الجملة بعد العمل الدؤوب على الشق الاول منها !! |
والله يا دوك أنا مقتنع تماما بكلامي القلتو ده : نحن كافراد من أجمل شعوب الأرض بس ما تلمنا مع بعض ... العمل الجماعي بدء من ادارة دولة و إنتهاء بحوار في منبر للحوار بيطلع أسوأ ما فينا كبشر !! --------------
Quote: نحن كفرنا بهويتنا ثم كفرنا بدور الدولة في حياتنا فلم تعد لنا قيمة تذكر ...
وكل ذلك بسبب محاولات تكريس الدولة الرسالية ومرجعية سلطة الدولة لله ومن يحكمون نيابةً عنه في الأرض ..
|
تبارك الذي بيده المعرفة ... ده جزء من المشكلة لكنو ما كل المشكلة ... بجيك راجع للكلام ده ... مارق لي مشوار هسي ....
| |
|
|
|
|
|
|
Re: محاولة للفهم : ما الذي حدث ؟!! (Re: محمد حيدر المشرف)
|
اخونا البروف خال حمور كل العام وانت بخير
قابلت رجل اعمال معروف في غرب افريقيا
قال ان اسرته ذهبت للحج في اواخر الثلاثينات
عن طرق السودان واستغرقت رحلتهم للحج و العودة
الي غرب افريقيا حوالي 23 سنة ولقد ولد خلال هذه الرحلة
هو اخوانه و لقد ولد هو في مارنجان و مكث بها حتي بلع
عمره 9 سنوات .......
قال انه زار السودان قبل سنتين و ذهب الي مارنجان
و لم يملك غير البكاء و عاد ادراجه بسال الله اللطف بنا
هذا الرجل ادخل زراعة القطن في بلده و هو رجل اعمال
وليس سياسي ولكن بفضل مولده فقط في مارنجان جعل بوركينافاسو
اكبر بلد افريقي منتج و مصدر للقطن الان !!!!!!!!!!!!!!
المهم يا بروف عايز تفهم الاسباب حلل تركيبة الشخصية السودانية؟؟؟ و ممكن تبدا بمقدمة ابن خلدون!
| |
|
|
|
|
|
|
Re: محاولة للفهم : ما الذي حدث ؟!! (Re: محمد قرشي عباس)
|
بروف امين والمرور الكرام بمناسبة نملة ود البشرى انا اغتربت من نص التسعينات ورجعت فى الفين وتسعة الايام دى نملة زاتو ما لاقى اها فى حالة زى دى احاول افهم ولا اتأمل ولا ارجع ولا العمل شنو بالظبط !!!
Quote: محاولة للفهم : ما الذي حدث |
وما اظن تنجح المحاولة يا بروف
| |
|
|
|
|
|
|
Re: محاولة للفهم : ما الذي حدث ؟!! (Re: احمد الأمين على إدريس)
|
اتنين شبان وهم صاعدين للحافلة واحد قال للتاني "والله البلد دي كل يوم ماشه لي وراء" واحد عمك عجوز من الركاب قاليهم أنا جاي من وراء، زي دا وراء ما في. فدحين شوفوها ماشه لي وين عاجبك كدا يا بروف! يخيل لي أسهل نحاول نفهم انها ماشه لي وين، يمكن نخاف أو نستحي شوية
| |
|
|
|
|
|
|
Re: محاولة للفهم : ما الذي حدث ؟!! (Re: Abdelhai Omar)
|
سلام يا بروف
والله نحن بنغش في نفسنا ساي إنو نحن كنا كويسين
صاح كانت في أخلاق ( انما الأمم والأخلاق مابقيت فإن ذهبت أخلاقهم ذهبوا)
بس نحن اتكلنا على الأخلاق دي بس وما في زول عمل حاجة كويسة تانية عشان الأخلاق دي تستمر
وين التعليم وين تطور الثقافة وتطوير ثقافة العمل الجماعي أي زول بقول أنا كويس ولابد في محلو
مافي أي مبادرات لتطوير المجتمع
كالحمير تحمل أسفارا
معليش غايتو على الكلام دا
| |
|
|
|
|
|
|
Re: محاولة للفهم : ما الذي حدث ؟!! (Re: حمد عبد الغفار عمر)
|
من منتصف التسعينات، أعمل و أعيش في الولايات المتحدة الأمريكية ... مواطن صالح و مثالي .... ماشي علي الصراط المستقيم .... ما أن أنزل من درج الطائرة في مطار الخرطوم إلا و أشعر بضنبي اتسل و قروني مرقت و طلعو لي نايبين يقطر منهم الدم ... أتحول لوحش كاسر ... أخالف كل القوانين ... أتاخر في المواعيد .... أرمي مخلفاتي في الأرض .... ثم العن السودان الشقيق و أعلن اننا شعب متخلف !!!!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: من منتصف التسعينات، أعمل و أعيش في الولايات المتحدة الأمريكية ... مواطن صالح و مثالي .... ماشي علي الصراط المستقيم .... ما أن أنزل من درج الطائرة في مطار الخرطوم إلا و أشعر بضنبي اتسل و قروني مرقت و طلعو لي نايبين يقطر منهم الدم ... أتحول لوحش كاسر ... أخالف كل القوانين ... أتاخر في المواعيد .... أرمي مخلفاتي في الأرض .... ثم العن السودان الشقيق و أعلن اننا شعب متخلف !!!! |
مع كمية من الهواء الساخن الصادر من مكفيات الفريون ... يثقب النافوخ قبل أن يثقب الأوزون ....
وناس كميات ماشة الأمارات ...
... المهم ....
| |
|
|
|
|
|
|
Re: محاولة للفهم : ما الذي حدث ؟!! (Re: تبارك شيخ الدين جبريل)
|
محجوب المعلوف بامباز العلم و المعرفة ...Quote: ياامين الياسمين والله ضحكته ، من اقتباسك اعلاه ، حتي بانت النواجز (اوبعضها ) ........ وعندي ليك سؤال (وباالله ماتبتزني بموضوع الزيارة ) لو كان الوقع في الخور ، في الخمسينيات دا اسمو (....... ...... ..... اسرح بي خيالك علي مهلك ) كان شمه التعويض شمومه .. ام انتهي به الامر كمتسول بدلالة الاعاقة الباديه علي مظهره !!!!!! عمك عجوز من ناس امدرمان قال لي نحن ظلمنا نفسنا ظلم الحسن والحسين ..... قال لي زمc لمن يموت خواجه (وتعني اغريقي قبطي مصري او مسيحي ناصع البشره ) نلف الععم ونمشي نعزي ... وننسي او نغفل اخوتنا في الدم (مع اختلاف العقيدة ) .... انسي التمايز العقائدي (في ذلك الزمن ) هل كان علي عبد اللطيف الثائر تليق به الاشانه والذم لان بشرته نقيضه لي لون بشرة ميشيل ؟ وهل لو قام بثورة 24 العربي الفلسطيني المسيحي ، مسؤل القلم السياسي حينئذا (الاستخبارات ،الامن ) الذي منح لاحقا لقب السير ، هل كان سيتم تعيريه باصله وفصله ولون بشرته مثل البطل علي عبد اللطيف ؟ مع المفارقه ان انجال البطل علي عبداللطيف وتاريخه الناصع نفضت عنه الغبار باحثه يابانية !!! وابناء وسلالة الفلسطيني العربي المسيحي ناصع البشرة بعضهم عضو مجلس لورادت في المملكة المتحدة . اووووعك تقول للاسف ... وامايحزن عليه او مايدمي القلب انو محجوب ودينا خالد وبشاشا ... والكلام العائم داك ..... تعامل مع الحقائق لا العواطف والامنيات والرغبه الشخصية ..... وانا مستنيك بعصاة البيسبول (Baseball( |
الشئ الذي لم يتغير فينا هي عنصريتنا .... البشرية مشت ملايين الخطوات تجاة المساواة و البعد عن تنميط الناس باعراقها و الوانها و خلفيتها الأثنية ... نحن ليوم الليلة في ده عب و ده حلبي و ده منبت لا أصل له .... و بالعكس عمك ميشيل ده حسب كود العنصرية الزمن داك عبارة عن حلبي منبت ما ود بلد ... كونو يدوه تعويض قدر ده بيوريك قدر شنو كان السوداني - حتي الاقليات العرقية في بلد تتنفس العنصرية برئاتها الستة - محترم من الحكومة و كيف القضاء كان عادل و مستقل .... بالنسبة لعلي عبداللطيف ... فالعنصرية التي مورست تجاهو و تجاه كل عرق لا يدعي العروبة أوضح من ان تنكر ... ياخي قادة هذه البلاد - التي كان يدافع عنها علي عبداللطيف ده ذاتو - وصفوه ب"الجزء الو ضيع من الامة" ... و تسالو عن اصله و فصلو و قبيلتو ... لكن العنصرية في ذلك الوقت كانت شائعة و رائجة و جزء من القانون في كل الأجزاء المحتلة في العالم ... بل في في أمريكا و جنوب أفريقيا و بلدان أخري تعنصرت ضد مواطنيها .... في الخمسين سنة الفاتت العالم كلو نأي بنفسة عنها و شرعت قوانين صارمة لمكافحة العنصرية و التمييز علي أساس عرقي إلا في السودان حيث لها حزب يعكس وجهة نظرها و صحيفة تتحدث باسمها ... و من سنة 83 حتي الان مات ملايين السودانيين و نزح اضعافهم في أطول و أقذر حرب تشهدها أفريقيا - ست الحروب نفسها - و السبب عنصري في المقام الاول !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: التنابذ فى هذا البورد كمثال .. لا يمكن الزعم بانو راجع للفشل على انجاز العمل الجماعى .. ده سلوك فردى فى الغالب الأعم ..
|
يا دوك .. أنا أري - و قد أكون غلطان - إنو انحطاط الخطاب في البورد ناتج من عدم قدرتنا -كمجموع- علي تحمل الطرف الاخر و ما سلوك فردي بدليل تعايشنا معاهو و مشاركتنا فيهو بدرجات متفاوتة !! ------------ رغيم الأب .... سلامات ياخي Quote: هذا الرجل ادخل زراعة القطن في بلده و هو رجل اعمال
وليس سياسي ولكن بفضل مولده فقط في مارنجان جعل بوركينافاسو
اكبر بلد افريقي منتج و مصدر للقطن الان !!!!!!!!!!!!!!
المهم يا بروف عايز تفهم الاسباب حلل تركيبة الشخصية السودانية؟؟؟ و ممكن تبدا بمقدمة ابن خلدون!
|
ما قريت تحليل إبن خلدون للشخصية السودانية ... لكن الزول ده حللنا قبل أكتر من ستمية سنة .... كان جاء حللنا هسي بلقي عندنا خمسة صلايب من أمراض الشعوب مستوطنة في دمائنا !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
الحصل هو الفقر يا بروف امين. الفقر هو اللى بيزيد الجهل و المرض و نبقى فى دوامة ذى اللى احنا فيها دى. السودان من الاستقلال سكانوا (اظن اتضاعفوا اكتر من مرة)...لكن ما حصل اى تغيير فى الموارد بتاعة السودان. احنا بنكضب على روحنا لما نقول السودان بلد غنى بالموارد. الكلام ده ما صحيح. السودان دولة فقيرة الموارد. و الان كمان بقينا كتار. الاسبوعين الجايات انا مشغولة...لكن بعدها ن شاء الله ح انكت ليك شوية احصاءيات ....و ح نشوف (بالارقام) لسه السودان دولة فقيرة
| |
|
|
|
|
|
|
Re: محاولة للفهم : ما الذي حدث ؟!! (Re: smart_ana2001)
|
Quote: و لنا في سنن التاريخ عبرة |
يا دوك يا حبيبنا ... والله عبر التاريخ ما مابينها لكن نحن كمان ساعدناها بجكة ... -----------
Quote: بمناسبة نملة ود البشرى انا اغتربت من نص التسعينات ورجعت فى الفين وتسعة الايام دى نملة زاتو ما لاقى اها فى حالة زى دى احاول افهم ولا اتأمل ولا ارجع ولا العمل شنو بالظبط !!!
|
في الحالة دي تبكي بس يا ابوحميد !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: يخيل لي أسهل نحاول نفهم انها ماشه لي وين، يمكن نخاف أو نستحي شوية |
يا معاوية ... البلد دي ما ماشه أي مكان ... واقفه زووت زي ما قال لي عمك بتاع كشك الجرايد !! --------------
Quote: الذي حدث أخي أمين أن هناك جهة ما صرفت لكل واحد منا منظار مكبر ينظر به لعيوب الآخرين. الحل أن نلقي هذا المنظار المكبر من أيدينا ويحمل كل واحد منا مرآه. |
والله صدقت يا عبدالحي !! و الكلام ده مش علي مستوي نظرتنا لبعضنا البعض كافراد ... بل حتي علي مستوي نظرتنا لدول و شعوب أخري ... عندنا راي في أي شعب و أي بلد رغم انهم كلهم فايتننا بملايين السنين !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
Quote: يا بدرنا .... حكومتنا في الخمسينيات كان بتدي تعويض بالالاف للوقع في الخور ... هسي عمك ميشيل ده كان وقع في خور ما يلقي اليرفعو خليه يدو تعويض !! |
هسّع البلد كووووولها وآقعة في الخور، بس إن شاء الله ميشيل يكون من الزمن دآك إتخارج.
سلآم وتحايا للجميع، وعيدكم مبارك.
تعرف يا بروف وآحد قبل كم يوم رآكب معاي في التكسي وبنتكلم عن المدينة (Red Deer) قال لي: نحن ساكت بندعي إننا عندنا ديموقرآطية، لكن حقيقة الأمر نحن بعيدين جداً من الديموقرآطية. وحاتك يا اللمين الخوفة الدخلتني! لي يومك دا ما مرقت...
| |
|
|
|
|
|
|
Re: محاولة للفهم : ما الذي حدث ؟!! (Re: معاوية المدير)
|
حضور نكتة النملة المغتصبة ؤبكثافة هنا نبهتني لي مفارقة غريبة فيها
----------
بالضبط هي تشرح الحال ... المائل حتى في قمة مأساتها ... المغتصب برمي باللائمة على غيرو! اعتراف بالذنب سااااي مافي ... وكان خنت الكيزان بدرعوها لي إبليس في رقبتو!!
لن ينصلح الحال الا بمواجهة عاصفة مع ذواتنا المتشظية .. ومواجهة اللحظات الهابطة من تاريخنا الشخصي .. وكأُمّة!
| |
|
|
|
|
|
|
Re: محاولة للفهم : ما الذي حدث ؟!! (Re: قيقراوي)
|
Quote: حضور نكتة النملة المغتصبة ؤبكثافة هنا نبهتني لي مفارقة غريبة فيها
---------- بالضبط هي تشرح الحال ... المائل حتى في قمة مأساتها ... المغتصب برمي باللائمة على غيرو! اعتراف بالذنب سااااي مافي ... وكان خنت الكيزان بدرعوها لي إبليس في رقبتو!!
لن ينصلح الحال الا بمواجهة عاصفة مع ذواتنا المتشظية .. ومواجهة اللحظات الهابطة من تاريخنا الشخصي .. وكأُمّة! |
بالضبط كدة .. أيّ واحد لازم يخلّي بالو من لغاليغو
ـــــــــ نكتة النملة في نكتة أجمل منها وهي بتاعة السوداني والمصري والوِزّة
| |
|
|
|
|
|
|
Re: محاولة للفهم : ما الذي حدث ؟!! (Re: صبري طه)
|
Quote: خلونا نعمل شنو كدا للنملة |
ظعطونا النملة. بعض النمل عنده رِيّش والبعض الآخر عنده صُوّف، وكِلآهما ينظعط. والله صحي. الضمير اللآبد في كلآهما، واللآ كليهما ما عارف! ممكن يكون رآجع للنملة، وبرضو ممكن يكون رآجع للريش والصوف.
يا ود البشر(ي) لو لقيت ليك نملة مظعوطة حايمة في شوارع دبي أعرف إنها من السودان. والله صحي...
| |
|
|
|
|
|
|
Re: محاولة للفهم : ما الذي حدث ؟!! (Re: محمد علي عثمان)
|
البروف أمين وضيوفه الكرام كل عام وأنتم بخير وعافية
مشكلتنا تعود إلى الأسباب الآتية:-
- شعب ملول يحب تغيير الحكم ولو أدى ذلك ألى أضرار واضحة بالوطن. - الصراع على السلطة. - الكيد السياسي. - دأب السياسيين الأوائل على تقديم المصلحة الشخصية والحزبية على الوطن. - فهم قاصر للديمقراطية حيث يُعتقد أن الديمقراطية معناها الفوضى والإضرابات والمطالب الفئوية واهمال الانتاج - اعتماد الحزبين الكبيرين اللذين حكما البلاد عند استقلال البلاد على قاعدة جماهيرية مكيانيكية نسبة الجهل فيها عالية ولا تفهم غير الولاء للحزبين.
تحياتي ووافر احترامي
| |
|
|
|
|
|
|
Re: محاولة للفهم : ما الذي حدث ؟!! (Re: Haitham Elsiddiq)
|
Quote: يا أمين المحير أنو البلد فيها بإختصار كل شئ أرض زراعية بكر لم تستقل بطريقة مثلي .. موية .. ثروة حيوانية طائلة .. ذهب ومعادن .. إلخ ماذا ينقصنا؟؟!!!
الذي حدث ويحدث هو أزمة حكم !! |
فعلاً أزمة فى الحكم ليس إلا ولا اعتقد بان دولة فى الكرة الأرضية تخلفت أكثر من السودان
| |
|
|
|
|
|
|
Re: محاولة للفهم : ما الذي حدث ؟!! (Re: الفاتح شلبي)
|
دا الزيت
بدل سؤال الهوية، ارى السؤال المتوهط ظن:
كيف نعيش مع بعضينا .. ونتقبل نفسنا وبعضنا
اباء الاسغلال .. ومسغفي الزمن (الذهبي) - من ذهب اي ولى وراح- ضيعوا لينا زمنا ساي في الاسئلة الغلط .. والكسل الذهني عن الاجابة حتى عليها!
-------
Quote: إن مواجهة معاوية للحظات الهابطة في تاريخه الشخصي هي التي وضعت حدا لاغترابه عن العلاقات الحميمة والمعاني الإيجابية. ومن الواضح ان مثل هذه المواجهة مطلوبة ايضا في حالة الامم، ومن بين الامم جميعا هي مطلوبة في حالة السودان.
الراحل المقيم/ الخاتم عدلان
بطل سوداني أحب الجنوب فقتله الشمال
|
| |
|
|
|
|
|
|
Re: محاولة للفهم : ما الذي حدث ؟!! (Re: الفاتح شلبي)
|
سلام يا بروف والمشاركين .. وكل سنة وإنتو طيبين
معاوية المدير
Quote: تعرف يا بروف وآحد قبل كم يوم رآكب معاي في التكسي وبنتكلم عن المدينة (Red Deer) قال لي: نحن ساكت بندعي إننا عندنا ديموقرآطية، لكن حقيقة الأمر نحن بعيدين جداً من الديموقرآطية. وحاتك يا اللمين الخوفة الدخلتني! لي يومك دا ما مرقت... |
مبالغة المبالغة ... خوفة ؟!!! قول نوبة ذعر ... هضربة وبرد وبطاطين الدنيا كلها ما بتنفعنا
تعليق البوست ... أوسكار
| |
|
|
|
|
|
|
Re: محاولة للفهم : ما الذي حدث ؟!! (Re: aydaroos)
|
و عليكم السلام يا عم حمد Quote: سلام يا بروف
والله نحن بنغش في نفسنا ساي إنو نحن كنا كويسين
صاح كانت في أخلاق ( انما الأمم والأخلاق مابقيت فإن ذهبت أخلاقهم ذهبوا)
بس نحن اتكلنا على الأخلاق دي بس وما في زول عمل حاجة كويسة تانية عشان الأخلاق دي تستمر
وين التعليم وين تطور الثقافة وتطوير ثقافة العمل الجماعي أي زول بقول أنا كويس ولابد في محلو
مافي أي مبادرات لتطوير المجتمع
كالحمير تحمل أسفارا
معليش غايتو على الكلام دا |
من وحي القعاد البره و مراقبة لصيقة لصفات مشتركة لشعوب تانية ... وصلت لاننا ما كعبين كلو كلو في حتة الصفات الشخصية ... مشكلتنا اننا ما بنقدر نننجز كجماعة .... و طبعا ده أس البلاء .... لانو مافي وطن بتبني بمجهودات فردية !! و لانو الفكرة دي مسيطرة علي من زمن بقيت في كل تجمع بتاع سودانيين مطروحة فيهو فكرة ما أعاين للفكرة ح تتنفش كيف ... كنت شاهد علي عشرات الأفكار المميزة الماتت قبل و أثناء أو بعد الولادة ما لسبب إلا لاننا ما بنقدر نننجز كجماعة ... أمراض شخصيتنا السودانية بتظهر في أي نوع من أنواع العمل الجماعي و ده جزء من مشكلة العمل العام في السودان ....
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
ده بيت (فُراش) قديم يا بروف
Quote: من مأساة إلى مأساة .. من حزن إلى حزن .. أيتام .. وأرامل .. وأطفال بلا عنوان ... دعارة .. وزبالة .. وابتسامات للمسئولين حوادث .. من سيارات إلى طيارات وحرائق .. العلل معروفة ... ولا علاج .. تنظير في تنظير ... ولافتات تقول (مشروع أدبخانات السوق الشعبي ) !! والدخول بجنيه ... ومن له فضل ظهر فليعد به على من لا ظهر له .. وظهور الغلابة قد انحنت طلباً لحياة .. أياً كانت هذه الحياة .. وظهور الدواب تملأ شوارع بلدي ويوفرون لها من يزيل الحفر و (المطبات ) عن طريقها !! ومطبات بطون الجوعى ليس لها إلا (المزيد من الصبر) .. (وشد البطون ) وكل مقولات : الصبر وتحمل المعاناة إلى حين !!!! (مغلفة بلسان شيخ سيارته الـ VXR خارج السور وبداخلها علبة نيدو وكاتشب) |
ما رفعناهو لي حسي بل وصار النضم الموجود فيهو يعتبر تاريخاً لأني ما أت بعده (جبَ) ما قبله :) تلاقي الباقي هنا لو عايز زيادة (فقع) لمرراتكـ : الســـــــــــــــودان جنَ ....!!!!!
| |
|
|
|
|
|
|
Re: محاولة للفهم : ما الذي حدث ؟!! (Re: عمران حسن صالح)
|
Quote: الحصل هو الفقر يا بروف امين. الفقر هو اللى بيزيد الجهل و المرض و نبقى فى دوامة ذى اللى احنا فيها دى. السودان من الاستقلال سكانوا (اظن اتضاعفوا اكتر من مرة)...لكن ما حصل اى تغيير فى الموارد بتاعة السودان. احنا بنكضب على روحنا لما نقول السودان بلد غنى بالموارد. الكلام ده ما صحيح. السودان دولة فقيرة الموارد. و الان كمان بقينا كتار. الاسبوعين الجايات انا مشغولة...لكن بعدها ن شاء الله ح انكت ليك شوية احصاءيات ....و ح نشوف (بالارقام) لسه السودان دولة فقيرة
|
يا ستهم ... الفقر نتج من فشلنا و ليس العكس !! و اختلف معاك جدا في قصة إنو السودان ما غني بمواردو ... ياخي بلد خصبة كان زرعتي فيها قيقا يطلع ليك زول .... ثروات معدنية ( الدهب زي الشئ الكعب ) .... بترول ... ثروات طبيعية .... مويه .... ثروات حيوانية.... مناطق سياحية و آثار ... و قبل ده كلو كفاءات عالية جدا علي مستوي الأفراد ... عشان كده علي الورق سمو السودان (سلة غذاء العالم ) لكن العلي الورق ده عشان ينزل أرض الواقع مفروض يكون في عمل جماعي و مؤسس .... و ده الربنا ما قسمو لينا !! في إنتظار الاحصائيات يا سمارت ... --------------
Quote: يا أمين المحير أنو البلد فيها بإختصار كل شئ أرض زراعية بكر لم تستقل بطريقة مثلي .. موية .. ثروة حيوانية طائلة .. ذهب ومعادن .. إلخ ماذا ينقصنا؟؟!!!
الذي حدث ويحدث هو أزمة حكم !!
|
كلام سليم جدا يا عبدالرحيم و الأزمة فعلا أزمة حكم في المقام الأول ... لكن في مقامات تانية شاركنا فيها نحن كشعب أدت للانحطاط البقت عليهو البلد دي ... التدهور الحاصل في بلدنا جاي من تضافر جهود الحكومات المتعاقبة مع المواطن السوداني لنفش البلد دي !! الديمقراطيات التي اغتالها العسكر كان فيها أمل مرتجي .... لو العساكر و الأحزاب اللي تحالفت معاهم كانو خلونا مع الديمقراطيات دي نقوم و نقع و نتعلم من اخطائنا...نتعلم نعمل كجماعة ... نخطط و ندبر صالح البلد دي.... كان لي هسي بقينا أمة يرفعو ليها علم !!
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
سلام يا أمين
خلينى أبدا من كلام حمد دا:
Quote: صاح كانت في أخلاق ( انما الأمم والأخلاق مابقيت فإن ذهبت أخلاقهم ذهبوا)
|
واقول بقلب قوى ماكانت فى ذرة أخلاق ولو كانت فى ذرة أخلاق لبقيت أمة السودان أو على الأقل وقفت فى مرحلة معينة وماتدهورت..
الأخلاق كانت موجودة عند الناس البسطاء الذين لايرسمون سياسة الدولة..
لكن لو جيت للناس البرسموا سياسة الدولة بتلقاهم نخبة فى الوسط النيلى علمهم اﻹنجليز بقدر حاجتهم لهم ليحركوا عجلة اﻹقتصاد والإدارة بقدر مايفى بحاجة البلد الدنيا وحاجة اﻹمبراطورية البريطانية العليا..
اﻹنجليز سلموا نخبة مؤتمر الخريجين البلد وطلعوا بعد أن أيقنوا أنهم منبهرين بالخواجات أشد اﻹنبهار ( واﻹنبهار شر لاخير فيه)..
الخواجات سياستهم ليس بالضرورة أن تصب فى مصلحة الوطن والمواطنين, لذلك تعتمد الفهلوة والأنانية والتفريق بين المواطنين وتقريب أصحاب الحظوة من خادمى بلاط اﻹمبراطورية بغير إحسان!
تلك الأدوات تصلح لمستعمر وتعتبر من أدوات نجاحه ولكنها لاتصلح كأدوات لحكم وطنى منوط به اﻹرتقاء بكل مواطنيه ورفعهم الى درجة تحمل عبء الوطن..
فمن ضمن أساليب المستعمر التى استمرت حجر التعليم على المناطق التى بدأ فيها المستعمر بناء المدارس على أن تبقى الأمية فى حد ذاتها حمارا يركب عليه الساسة ليصلوا الى البرلمان.. التعليم أصبح امتيازا لاحقا, وهذا اﻹمتياز يمنحه السادة والساسة, وعليه من ينال هذا اﻹمتياز يصبح دائرا فى فلك السادة والساسة..
العنصرية استمرت لأنها أيضا أستعملت كدابة يركبها الساسة فى الخفاء والعلن حسب الزمان والمكان..
لقد سمعنا حكاوى المحجوب وهو يتأفف من اﻹستماع لدريج فى البرلمان بل ويتأخر خارج البرلمان حتى ينهى دريج كلامه..
ومشكلة الجنوب التى بدأت بشوق الجنوبيين للفدرالية وانتهت باﻹنفصال..
والأنانية: ألم تسمع بدكتور حليم عندما كان فى مجلس السيادة اﻹنتقالى بعد أكتوبر , وكانت دورة الرئاسة للبروف التجانى الماحى, وطلب الأول من الأخير أن يعطيه دورته, وعندما سأله لماذا قال حليم عشان استقبل ملكة بريطانيا, فقال له التجانى الماحى: ليه انا مابعرف انجليزى؟ (ربما لاتكون الرواية الشفاهية دقيقة).. ولكن هو دكتور حليم الذى كان يكره دخول أبناء غير الأطباء والوجهاء لكلية الطب, وكان عندما يجد طالب طب من مارنجان والقرير والفاشر يقول: الطب فسد!!
فى مذكرات عبد الرحمن مختار تجد فيها كيف وضع حزب الأمة بقيادة عبد الله خليل خطة إمالة أعضاء البرلمان من الجنوبيين لصالحهم برشوتهم. ثم عمل عشاء لهم وتسكيرهم حد الثمالة ثم سرقة الرشوة من جيوبهم. فمن يغش هو عديم الأخلاق وليس المغشوش.
عدم الأخلاق جعل جامعة الخرطوم خالية من ميزانية للبحث العلمى ولم تخرج علماء طيلة تاريخها بقدر ماخرجت مثقفين حتى فى المجالات المهنية..
الساسة احتكروا حل كل المشاكل بما فيها مشكلة المياه فى العاصمة والتى تقطع كل صيف مع الكهرباء حتى أصبحت النادرة بأن عاصمة بين النيلين تعانى من العطش. ولم نسمع بأن دراسة جادة من جامعة تبنتها وزارة لحل مشكلة المياه والكهرباء..
دكتور أحمد محمد الحسن كان يدرس علم الأمراض فى كلية الطب من أبحاثه الخاصة لا من الكتب, وفى إحدى الأيام قال له وكيل وزارة الصحة الطبيب: أبحاثك هذه لاتساوى ماننفقه عليها من ميزانية ورق, لم يقل ذلك لأنها الحقيقة ولكن ليرضى العسكرى الوزير أبوالقاسم محمد إبراهيم.
ومن أمثلة إنعدام الأخلاق عند النخبة: حتى عام 1976م كانت بريطانيا تعطى منح لكل خريجى كلية الطب جامعة الخرطوم مجانا.. فذهب دكتور حليم ودكتور وصفى وغيرهم واقنعوا أبوالقاسم أن يلغى المنحة ويعمل تخصص محلى, وذلك ليوقف هجرة الأطباء للخليج بعد التخصص على أساس أن التخصص المحلى غير معترف به فى الخليج حتى عهد قريب ففعل ذلك. ثم أرسلوا أبناءهم للتخصص فى بريطانيا مستغلين علاقاتهم الشحصية واصبح التخصص المحلى لمن قالوا عليهم أنهم أفسدوا الطب.
البلد يا أمين إيقاعها مظبوط على الطبلة (الدربكة)
لذلك الوطنية فيها لاتشهر أحدا والأخلاق فيها تتنافى مع السياسة وهذا منذ خروج اﻹنجليز. المرض مزمن والتدمير مزمن لذلك تجد الغرب متصالح مع كل حكامناحتى هذه اللحظة لأنهم سائرون على نفس الدرب الناخر لعضد الوطن.
ياخى لو الناس ديل مسكوا محو الأمية بس وكل سنة بخرجو 100 كنا أصبحنا جميعنا نقرأ ونكتب..
لكن المصلحة عند السادة والساسة يكون الناس أميين ويكون المثقفون ذوى شفاه تعشق التقبيل وظهور متعودة على اﻹنحناءة شرط أن ينجح المثقف فى جعل الأمى منبهرا به.
وبهذا التغييب للأخلاق يأكل السادة والساسة وربائبهم من المثقفين أكثر من أن ينتجوا حتى تموت البلد موتا بطيئا وقبلها يموت اﻹنسان الأمى المطحون!
| |
|
|
|
|
|
|
Re: محاولة للفهم : ما الذي حدث ؟!! (Re: Balla Musa)
|
wow يا دوك ... و رغم اختلافي معاك في اجزء مما تقول : ياخي إنت مش you made my day إنت you made باقي الحول الفينا ده و البعدو !! يا اخوانا والله ما قدرت استني ترتيب المداخلات عشان أقول لبلة كلامي ده .... لكم العتبي ...
| |
|
|
|
|
|
|
Re: محاولة للفهم : ما الذي حدث ؟!! (Re: أمين محمد سليمان)
|
شكرا يا بروف
الملاحظة
الرصد
التساؤل
التشخيص
ثم وصف العلاج الناجع :
Quote: الديمقراطيات التي اغتالها العسكر كان فيها أمل مرتجي .... لو العساكر و الأحزاب اللي تحالفت معاهم كانو خلونا مع الديمقراطيات دي نقوم و نقع و نتعلم من اخطائنا...نتعلم نعمل كجماعة ... نخطط و ندبر صالح البلد دي.... كان لي هسي بقينا أمة يرفعو ليها علم !! |
| |
|
|
|
|
|
|
Re: محاولة للفهم : ما الذي حدث ؟!! (Re: معاوية الأرباب)
|
معاوية الصائم كتب كلام أقبح مما يمكن السكوت عليه في حق محمد البشرى ... فتحت بوست لانتقاد كلامو و إنتقاد بكري الاكتفي بسحب البوست ... بكري سحب بوستي لانو فيهو نقد ليهو هو ذاتو جنبا إلي جنب مع نقد معاوية ... أن ينحط الناس لهذا الدرك و يكون الحل سحب البوست و البوستات البتنتقد الانحطاط ده بتخلي الزول يحترم نفسو و يشوف ليه حتة تانية يكتب فيها .... آسف جدا و بعتذر لكل من شارك في البوست ده و ما ح أقدر أرد عليه لاني قررت التوقف من الكتابة في هذا المكان ... معذرة مرة أخرى و نلتقي في فضاءت أرحب !!
| |
|
|
|
|
|
|
Re: محاولة للفهم : ما الذي حدث ؟!! (Re: محمد البشرى الخضر)
|
يا بروف إتفقنا زمان إنه المنبر دا ما مثالي لكن أفضل المتاح. السحب ماهو الحل للمشاكل وحتى لو بكري طبق اللايحة برضو الناس من حقها تناقش الموضوع لكن إدارة المنبر ما عملية ساهلة وبكري ما حيقدر يتابع كل كلمة حتتكتب فببقى السحب مرات أسهل الحلول. مافي داعي للقرارات دي وخليك وسدد وقارب.
| |
|
|
|
|
|
|
Re: محاولة للفهم : ما الذي حدث ؟!! (Re: قيقراوي)
|
Quote: دقيقة يا بروف راسلت بكري على المسنجر مستفسرا عن سبب سحب البوست و حقي في الرد فرد بأنو طبق اللائحة على معاوية لخرقه لها لذا يرى قفل الموضوع |
طبّق شنو من اللائحة؟ ___ يا بكري لا بد أن يكون هنالك خطوط حمراء، من يتجازها تطبّق عليه عقوبة رادعة..
| |
|
|
|
|
|
|
Re: محاولة للفهم : ما الذي حدث ؟!! (Re: محمد البشرى الخضر)
|
Quote: حتى عام 1976م كانت بريطانيا تعطى منح لكل خريجى كلية الطب جامعة الخرطوم مجانا.. فذهب دكتور حليم ودكتور وصفى وغيرهم واقنعوا أبوالقاسم أن يلغى المنحة ويعمل تخصص محلى, وذلك ليوقف هجرة الأطباء للخليج بعد التخصص على أساس أن التخصص المحلى غير معترف به فى الخليج حتى عهد قريب ففعل ذلك. ثم أرسلوا أبناءهم للتخصص فى بريطانيا مستغلين علاقاتهم الشحصية واصبح التخصص المحلى لمن قالوا عليهم أنهم أفسدوا الطب. |
بلة يا حبيب هذا كلام خطير للغاية الا انه صحيح بالكلية ارجو شاكرا ان تفتح له بوستا خاصا و يا حبذا بعنوان يشير لمضمونه بوضوح حتى يتسنى للجميع الانتباه له جد يا بلة هناك الهة كذبة فى المهنة الطبية قديما و حديثا و ان اوان تحطيمها
| |
|
|
|
|
|
|
|