|
|
 بوست برعاية سمارت، تعليم الاطفال العادات الغذائية السليمة
|
مشكلة معظم البيوت السودانية انه اطفالهم في مرحلة كده ما بين عمر 3 إلى عشرة سنوات ما بياكلوا كويس، أو على الأقل دي شكوى الأهل عنّهم... دايماً يقولوا ليك ولدي/بتي ديل ما بياكلوا كويس... والمقصود بـ "كويس" هنا، كمية الأكل البياكلوه الأطفال بغض النظر عن النوعية... انا عايزه في الاول اركّز على موضوع الكميّة، وبعداك ممكن نتكلم عن النوعية...
بوست تربوي برعاية سمارت، بهتها في صمّة خشمها...  ، لكن لانه انا مشغوله ومحتاجه دعم لوجستي عشان اقدر انجز البوست...
محاور البوست بتتكلم عن:
1- الكمية المناسبة، كيف نعلّم الطفل يعني شنو شبع ويعني شنو جوع.
2- أوقات الأكل وتنظيمه، وعدد مرّاته حسب المرحلة العُمرية.
3- الوجبات الصغيرة او الsnacks وانواعها ومتين وليه؟
4- تأثير الكلام عن اكل الطفل قدّامه
بعداك ممكن نتكلم عن موضوع النوعية
|
|
  
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: Mohd Ibrahim)
|
يا ام احمد، عايزنك راعي "ماسي" عليك الله، عارفاك عندك خبرة حلوة في الاتجاه ده... الله يخلي ليك احمد ان شاء الله
د.سيف، ما عايزين نحبط الناس، ممكن التغيير على الكبر... حسي احنا مشكلتنا اكبر من مشكلة الملح والسُكر، مشكلتنا في اطفال اهلهم بقولوا ليك نهائي ما بياكلوا... واليوم كله الام تساكك في الاطفال بالصحانه عشان ياكلوا وهم ما دايرين.... طبعا ما حنغفل مشكلة السكريات والاملاح، وممكن نخفف منها كيف، وكيف نشجع اكل الخضار والفواكه وشرب الموية....حنحتاج ليك للرأي العلمي... والتصحيح
محمد ابراهيم... كتير من صديقاتي بتكلموا عن المشكلة دي... انا قلت السودانيين، لكن المشكلة عامة مع اي ام واب، بس خلينا نركز على روحنا...
أول حاجه عايزه اتكلم عنها وأحب ابدأ بيها البوست هي تعليم الطفل الجوع والشبع... الطفل من اول ما يتولد بكون عجينه طرية في يد امه، صفحة بيضاء ممكن نكتب عليها اي شي، ما حنخش في الجدل بتاع العوامل الوراثية، لكن بعني انه الام في يدّها تتحكم في جزء كبير من عادات الطفل من اكل ونوم ولعب ... وبعداك في عوامل اخرى تساعد او تثّبط... بالنسبة لموضوع تعليم الطفل انه يجوع، ما بعني بيه ابداً اننا نجوّع اطفالنا، لكن مهم اننا نعلم الطفل انه ياكل لما يحس بالجوع، من اول الحاجات البعلّمها لأطفالي هو انهم يعملوا اشارة انهم عايزين ياكلوا او اشارة انهم شبعوا... الحاجة دي ما بتبدا بدري شديد.. لانه اصلا اولادي ببدأوا الاكل بعد ستة شهور... قبلها بكون الاعتماد الكامل علي انا، ولا حتى المويه ما بشربوها.... (النقطة دي قد تختلف في السودان شويه باعتبار انه الجو حار، فممكن ندي الطفل مويه عشان الجفاف).... لما يبدا الطفل ياكل، ننظم ليه عدد مرات الاكل بحيث يكون في تباعد بين الوجبات ... وندي الطفل ياكل، لو رفض ياكل، طوالي نوقّف... التحانيس والطيارة القامت وافتح القراش دي كلها مافي داعي ليها... ننتظر ساعة وتاني نجرب... لما نجي نديه الاكل نعمل اشارة معينة او صوت عشان الطفل يربط بينها وبين الاكل... وبعد كم مره الطفل حيبدا يستخدمها.. محمود ولدي كان بخت يده في خشمه زي البياكل في لقمة كده، لولو بتعمل طقطقه بي خشمها بتدل على انها عايزه تاكل.. .اول ما يعمل الحركة دي، طوالي بقوم اعمل ليهم حاجه ياكلوها.... لو اكل الطفل تلاته لقمات وقرر انه ما عايز... طوالي تخليه... صحي الواحده بي جوه بتكون حاسه انه الطفل ما اكل كفاية، لكن نحترم رفض الطفل ده... ممكن يكون شبع وممكن لا.. المهم انه يعرف انه لما يرفض خلاص انتهينا... الحاجة دي مهمة جداً عشان الطفل يتعلم انه الاكل ده بياكلوه بالجوع وبوقفوا منه بعد الشبع... لما نعلم الطفل المهارة دي بنديه خدمة كبيرة... يعني قصة الخسّيم، والرسول تاكل دي، خلوها لينا شويه...
الحاجه دي في الاطفال الكبار برضه ممكن تتعمل... الطفل المتعود على التحانيس على الاكل، ببساطة لو جا وقت الاكل بتاع الاسرة، يختوا الاكل.. مافي تلفزيون مافي اي شي، الطفل يجي يقعد مع الاسرة، عايز ياكل، نديه ما عايز يقعد مع الناس وبعداك يمشي... تنظيم المواعيد مهم عشان الطفل ياكل كويس، ووقت الاكل ده ما اكل بس، ده وقت الاسرة بتتلاقى فيه وتاكل سوا.. نحاول قدر الامكان نظبط وقت اكلنا بحيث الناس كلهم يتجمعوا وياكلوا سوا... ممنوع اي شي في وقت الاكل... الاهم من كده انه الطفل لو رفض ياكل في وقت الاكل، ممكن نحدد زي ساعة ونص لساعتين لقدام انه مافي اكل... ايوه حاره وقاسية وصعبة، لكن مرات الواحد محتاج يكون حاسم شويه عشان مصلحتهم...
حأرجع لنقطة ربط الطفل للأكل بمحبة الاهل، او بي احساسه باهتمامهم، مرات بستخدمه ورقة ضغط عليهم عشان يهتموا بيه... اصلوا الاطفال ديل فيهم ذكاء كده يحير سبحان الله وما شاء الله...
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: حمد عبد الغفار عمر)
|
اذيكم يا جماعة? رمضان كريم.
اها موضوع رعاية اليوست ده كيف??? مفروض اعمل شنو يعنى?
افتح البوست كل يوم الصباح...اقشه و ارشه و عمل شاى للضيوف....معليش الدنيا رمضان.... ما فى شاى.
شكرا يا مريم على فتح البوست.
فى مداخلتك الاخيرة...جبتى الرايحة. ما فى تحنيس. و الاكل فى وقت الاكل.
كان عندى طفل عمره حوالى 15 شهر و مشيت السودان. ما كنت بحنسه. جاءت مواعيد الاكل عاوز ياكل اهلا وسهلا...ما عاوز على راحته. المشكلة انه كان ضعيف. اتولد ضعيف و شكله ح يكون زول Slim طوال حياته. صحته عموما كويسه. الهمقلوبين بتاعه كويس و الdevelopment تمام.
وحتة development دى مهمة. و هى اللى بتحدد اذا كان الطفل فعلا عندو مشكلة فى التغذية. وانا على اساس ان طفلى حبا فى مواعيده و مشى فى مواعيده و كل التطور بتاعه كان بصورة كويسه ما كنتا شايلة هم انه طفل slim . خاصة وانه كان نشيط جدا و بيلعب و ينطط ذى العجب.
و مشينا لاهلنا فى السودان....وعينك ما تشوف الا النور. فى ناس جونى جادين جدا و قالوا لى: الولد ده ما صاح اللى بتعملى فيه ليه ده. لازم تحنسيه و تسكيه للاكل. بقى شكلى ام كسلانه و ما عاوزه احنس ولدى للاكل. اصريت على موقفى مرات...استلمت للضغط مرات....و كانت اجازة صعبة.
امى عندها نظرية ظريفة فى موضوع الاكل....بتقول لاى ام جديدة : {ما تقرقرى بطن الطفل}. زمان كنت بسمعها بتقول كده و كنت متخيلة المضوع مجازا. لكن طلع الموضوع حقيقة...المعدة اذا كبرت تانى ما بتصغر....(الكلام ده طبعل للناس الكبار)
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: smart_ana2001)
|
دكاترة الاطفال بيقولوا ان الطفل ممكن يبدا ياكل فى اى وقت من 4 ل 6 شهور. مريم اختى دى بتبدا معاهم من 6 شهور ...انا قاعده ابدا فى عمر 4 شهور.
قبل فترة عندى طفلة كملت 4 شهور. مشينا الدكتور للكشف الدوري بتاع ال 4 شهور. بعد الكشف الروتينى و الاسئلة و الاجوبة قال لى: {مبروك....ممكن تبدوا الاكل}. ممكن اديها اى شيء....{اكرر اي شيء} ما عادا حاجتين. العسل و لبن البقر و منتجاته.
الاكل مفروض (فى الشهرين الاوائل) يكون سائل تماما عشان البيبي يتعلم الاكل. فى الفترة دى الاكل ما هو المصدر الريئسى للغذا. لبن الام او الحليب الصناعى المخصص للاطفال الرضع هو الغذا الاساسي. الاكل فى الشهور الاولى بيكون لتعليم الاطفال انهم ياكلوا و تعويدهم على اكل الفواكهة و الخضار و النكهات المختلفة. برضوا عشان يتعلموا ان الاكل عندوا مواعيد و مكان محدد.
ذى ما قالت مريم...فى العمر ده بالذات ما فى تحنيس. البيبي عاوز ياكل ادوه ...ما عاوز يجى لحدى مواعيد الوجبة اللى بعدها. ده طبعا بالنسبة للاكل. بالنسبة للرضاعة فدى قصة تانية
لازم اقول انه كان عندى قبل 4 سنوات طفل فى نفس المرحلة. فى الوقت داك الدكتور بالاضافة للعسل و اللبن قال لى ما تديه بيض او مكسرات او لحم فى الشهور الاولى!!!!
باين ان توصيات American Academy of Pediatrics اتغيرت
http://www.aap.org/en-us/aap-store/parent-res...arent-resources.aspx
ده موقعهم و فيه معلومات مفيدة الاهل
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: Dania Elmaki)
|
سلام يا دانية المكي
شكرا لإهتمامك
الناس ديل بتأففوا من الفواكه مع العلم إنو البنت الكبيرة (5) سنوات لما كان عمرها تقريبا سنتين بتأكل الموز والمانجو بصورة طبيعية وبحب شديد فجأة قفلت
النمو طبيعي جدا وبيأكلوا باقي الحاجات بطبيعية بما في ذلك الرغيف والكسرة واللحمة بأنواعها والإندومي (حب شديد) بس التركيز الأكبر على الحليب بشربوا حليب ثلاثة مرات في اليوم تقريبا بمعدل لتر في اليوم للواحد.
مسألة الموية دي هي العاملة لي قلق يعني أنا مرة عملت check يوم جمعة الناس ديل لحدي الساعة ثلاثة بعد الظهر ما في زول طلب موية حليب بس وارجعت المسألة للحليب وبرودة المكيفات
مع العلم أنا ذاتي ما بحس بالعطش بس لأني مدرك لأهمية الموية بشرب حتى بدون رغبة هل المسألة جينية
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: حمد عبد الغفار عمر)
|
اذيك يا دانية?? مشتاقين...رمضان كريم
سلامات يا حمد......ممكن انظر شوية لحدى ما دانية تجى???
Milk is evil
انا عندى قرد كده كان ايام معديها لى كلها حليب. ما بياكل و لا بيشرب موية. عملتا شنو? وقفتا اللبن من البيت. عاوز يقعد جعان....خليه يقعد.
المشكلة فى لبن البقر انه بيملى عشان كده ما بياكلو معه كويس. و بالمناسبة احد الاسباب الرئيسة للانيميا عند الاطفال ما عدم اكل اللحم او اكل مفيد عموما. السبب هو شراب اللبن.
نصيحتى ليك وقفه من البيت نهائي اى شيء ما عاوزهم ياكلوه او يشربوه. انا كتبت الكلام ده اكتر من مرة...لكن ح اقوله تانى...احنا فى بيتنا لاكتر من 8 سنوات ما حصل دخلت صودا.
الاطفال بيحتاجو الكالسيوم فقط من اللبن. لو انت ضامن ح ياكلو كالسيوم من جبنة او ذبادى و كده... وقف الحليب من البيت ...و والإندومي برضو. طبعا ده لو انت حاسي ان شرابهم للحليب اكتر من اللازم. على العموم الاطفال من عمر سنين ما مفروض يشربوا اكتر من 3 كبابى لبن فى اليوم. الكباية حوالى 8OZ . اظن حوالى نص كباية الشب الكبيرة ديك زمان فى ا لسودان.
لو وقفتا كل الجبس والبسكويتات و الحجات دى من البيت ح يتجبروا ياكلو فواكه لما يجوعوا فى غير مواعيد الوجبات
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: smart_ana2001)
|
سمارت، البتسوي فيه ده ما هو الرعاية زااااااااتها... يعني تتعهديه كده وتقابليه وما تخليه يغتس كلو كلو
اخونا حمد ازيك، ومرحب بيك... الجماعة اديهم قرّاصة، بطفشوا ليك من البيت
امسك في كلام سمارت ده قوي جداً.... حأضيف نقطة حول موضوع اكل الفواكه، حاجه كانت بتنفع معانا زمان احنا صغار، وحسي بستخدمها مع اولادي... نص النهار كده، بجيب التفاح وبقطّعه والبرتقال وبقشره واقعد آكل.. ولا بعزم زول ولا بحنس زول... بعد شويه تلقاهم اتلموا فيني واكلوا معاي... الاطفال بحاكوا اهلهم شديد... ومرات بكسلوا يشيلوا فاكهة ياكلوها... برضه وقّف صناديق العصير لو بشربوها... حليب مافي وعصير مافي... حتلقاهم مشوا على الموية في النهاية... حدد لكل زول كبايته الخاصة، ايكيا عندها طقم اكواب ملونة ظريف ورخيص، الاطفال بحبوه... خلي كل واحد عنده كبايته بتاعت المويه ...
في ملاحظة حول موضوع الحليب لأنه over rated جداً... الحليب مهم، لكن ما للدرجة البتخلينا نعتبر انه الاطفال مثلا لو ما بشربوه معناها ما بتغذوا كويس... محمود ولدي ما بطيق الحليب، لكن بحب الزبادي خالص بياكله ساده من غير اي شي ومباشرة من الكباية بتاعته وانتهينا... لا سكر لا ملح... بحب الاجبـان وبياكل منها كويس... مرات بشرب حليب مع كاكاو... مرات بياكله مع الكورنفليكس... كله مقبول وكافي جداً.... طبعا الشي الأهم من وجود الكالسيوم هو وجود فيتامين دال والبيجي من التعرض للشمس من دونه الكالسيوم ما عنده اي فايده... لو مافي طريقة للتعرض للشمس، في قطرات بتتأخد بالفم ممكن تحل المشكلة ... في نقطة تانية، حليب الابقار ما بناسب الاطفال إلا بعد عمر سنة... ممكن ندي بعدها الطفل حليب بقر كامل الدسم، لحدي ما يتم عمر سنتين، بعداك الواحد بنتقل للحليب قليل الدسم... امي حتدقني لو قرت الكلام ده، لكن دي توصية الاطباء... الطفل في عمر سنة بحتاج للدهون الفي الحليب عشان دماغه في مرحلة بناء، وخلايا الدماغ basically خلايا دهنية ... بعد عمر سنتين بتبقى الدهون ما في داعي كبير ليها والطفل ممكن ياخدها من مصادر تانية، الحليب قليل الدسم فيه الفايتمينات المطلوبة، احنا دايرين الكالسيوم في اللبن موش الدهون...
انا ما عايزه اعمل ريجيم لولدي يا جماعة، انا ببساطة عايزاه يتعلم عادات سليمة عشان لما يكبر ما يبقى في سكري وضغط وسُمن، ده كله ببدا من الطفولة...
عندي صاحبتي، بتها ما شاء الله وزنها كان كبير لما وصلت عمر شهرين، الطبيب منعها تديها حليب البزّة، لانه البت ما شاء الله وزنها زايد عن المعدل وطلب منها تكتفي بحليب الام ....احنا مصرين على انه يكون عندنا اولاد مبغبغين لسبب او لآخر... شكل الملابس حلو فيهم، صح! لكن احنا بنضرهم كده... في عالم بقى فيه كمية من الخمول وقلة الحركة
بكرة بجي لموضوع تدخل الاكل في علاقة الطفل بأهله.. بالاضافة لمزيد من الحاجات الممكن نعملها عشان نشجع الاطفال على اكل حاجات جديدة
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: مريم بنت الحسين)
|
سلام سمارت كفت و وفت زي ما بقولوا . الاندومي ده تقطعه من البيت بصوره نهائيه مضر جدا كاروهايدرات زايد صوديوم عالي جدا جدا جدا. وقف الحليب زي ما قالت سمارت او ممكن تشتريه يومي بكميات بسيطه بحيث انه اي طفل يشرب كوبايه واحده او ما يعادل كوبايتين شاي صغار و خلاص الحليب ما بالاهميه البقولوها دي. الحليب بيملا بطن الشافع و يحميه الاكلو سبب رئيسي لفقر الدم. العصاير الملونه و المشروبات الغازيه العن و اضر سبيلا. حتي العصير المكتوب عليه طبيعي ممكن استبداله بالفاكهه و المويه لانه العصير عموما السعرات الحراريه فيه عاليه عشان نحصل علي كوراية عصرير برتقال صافي محتاجين زي سه برتقالات كل واحده حوالي ستين سعر حرا ي و تلاتاشر وحده نشويات و دي اكتر من السعرات البيحتاج ليها الطفل في وجبه واحده يبقي بدل كوباية العصير ندي الطفل برتقاله و كوباية مويه كوجبه خفيفه و يتغدي عادي. انا عارفه الكلام ساهل و التطبيق صعب و الاطفال بديحين و بكايين لكن لازم انت و المدام تجمدوا قليكم عشان صحتهم. انا ام لطفل واحد و مصابه بالسكري من بدري و طبعا العادات الغذائيه الخاطئه ليها دور كبير في الاصابه بالسكري خصوصا عند الاطفال عشان كده عاهدت نفسي اني اعمل العلي و اعلم اولادي عادات صحيه سليمه عشان اجنبهم معاناتي انا مع المرض و الحقن و الانسولين. كلامي ما معناه حرمانهم لكن في حاجات كده مافيها لعب زي السودا و الحلويات و الشبس و الاندومي انا ما بحرم حمودي لكن كل حاجه بمقدار. يعني الشبس مره في الاسبوع بشتري كيس متوسط. الحلاوه بجيب الانواع القليلة السكر و ممكن برضه مره مره اديه قطعه صغيره. المهم الفواكه و الخضار قدامه اليوم كله. اكتر حاجه انا فخوره بيها هي حب احمد للسلطه الخضراء في اي وجبه بقدم السلطه اول و بعدها بجيب الطبق الرئيسي. لي عوده.
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: Dania Elmaki)
|
الكميه او السيرفنق سايز نقطه ما موجوده في الثقافه السودانيه نهائي ممكن عادي الزول يشرب كوباية شب لبن كامل الدسم بجماده و معاه باكو بسكويت. سعرات حرا يه زايد سكر زايد دهون و ده الصباح قبل الفطور و نق ل والله فلان كان شديد شرب كوباية الشاي و اتكل علي الحيطه لمن هبشوه لقوه ميت. الزول ده بتكون شرايينه مقفله من الكولسترول و ضاربه سكري و ما جايب خبر. لو الزول قدم لينا حاجه صحيه او كميه قليله بنقول عليه جعان و بخيل. نحن بنفتكر انه اولادهم لازم نشبعهم قبل ما نطبعهم و من حبنا ليهم بناذيهم . توفير الاكل بكميات مهوله زي البسكويت و كرتونة الاندومي و كراتين العصير مضر جدا جدا. بدلها نجيب كراتين فاكهه. اول ايام حيبكوا و يتدردقوا لينا بالواطه لكن لازم نستحمل. لازم نقرا المكتوب علي العبوه يعني لمن يقولوا السيرفنق سايز بسكويتتين ما ندي الشافع الصندوق كله يقيل بيه قدام التلفزيون و ساعة الوجبه ما يرضي ياكل و بعد نرفع الغدا يقول جعان و يجري على جالون الحليب و كيس الشبس. لمن كمان نمنع العصير حيضطروا يشربوا مويه و اول ايام نطنشهم عشان ما نلفت نظرهم. كلام مريم ممتاز الاطفال بيحاكوا اهلهم. انا بشرب موية كتيره جدا على قول واحده زميلتي التقول بالعه بشكير. حمودي شايفني اليوم كله بشرب بقي زيي كوبايتي و قزازتي و كوبايته و قزازته. بعد الفطور بقطع جزر و تفاح و بخليهم في غرفة المعيشه لمن يتفرج على التلفزيون بياكل منهم.
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: Dania Elmaki)
|
دانية ازيك والله يخلي احمد... عارفه الامراض الوراثية وبالذات السكري ممكن الواحد يتفاداه بالعادات الصحيحة... وزي ما قلت، مافي داعي للحرمان... الاطفال في بيوتهم بكونوا اليوم كله بياكله شوكولاته وحلاوة وشبس... لما تجي الام تخت ليهم تفاح او موز ما حياكلوا منهم، اولاً لانه حيكونوا شبعانين في الحاجات التانية دي، وثانياً لانه الحاجات دي طعمها بالنسبة لطعم الحاجات التانية ما حلو .. بالنسبة ليهم لو الخيارين موجودين احسن يمشوا على الحاجات الحلوه...
احنا نحاول قدر الامكان في البيت ما تكون الحاجات دي موجوده، لانه وقت المدرسة بقية الناس ما بنقدر نتحكم في انهم مربين اولادهم كيف... المدارس برضها بتبيع ليهم الحاجات دي... انا بتكلم طبعا باعتبار اننا هنا في السعودية، غالبا ناس امريكا الوضع عندهم مختلف... هنا عادي المدرسة بتبيع الصودا والشبس والشوكولاته... يا حليل مديرة محمود الزمان، كان الكانتين بتاع المدرسة ما ممكن تدخله الحاجات دي... وقاموا غيروها وبقينا في المشكلة! الشي العملته مع ولدي انه بديه قروش يشتري زيه وزي الاطفال، لكن بحاول في البيت احافظ على نمط اكله ... بقى بطلب الحاجات دي، لكن في البيت بتتعمل بكنترول... شبس ما قاعدين نجيبه خالص، بنجيب شوكولاته، وعندها وقت محدد في اليوم، بكون بعد الغدا... ورغم انه عارف مكانهم، بجي يطلب مني وانا بديه... عندي صندوق شوكولاته في مكان الاستقبال، ممكن يقعد سنين محمود ما يهبشه (ما تخافوا ما قاعد سنين لوووول) ... رغم انه الغرفة دي بين غرفة محمود وغرفة التلفزيون واليوم كله هو بمر بيها.. اصحابه لما يجونا بستلموها كلها..
طيب، نركّز على نقطة معينة مهمة في موضوع الاكل، وهي انه الاطفال بستخدموه لجذب الانتباه ... الطفل مهما اهتموا بيه بكون عايز المزيد من الاهتمام... ده ما بعني تقصير بعني بس انه الطفل ده عايز اهتمام مستمر من اهله، خاصة في وجود اخوان ليه.. من طرق جذب الانتباه الممكن الطفل يعتمدها موضوع الاكل... الحاجه دي بتبدا بانه الاهل بتكلموا قدام الطفل عن اكله، فلان الليلة دي مااااا اكل كويس ما عارفاه ماله، الليلة فلانه دي اكلها ما عاجبني، وعادة التعليقات دي بتكون في حالة عدم الأكل... الطفل لانه ذكي بنتبه انه الشي ده بجذب انتباه الاهل بقوم بسيب الاكل عشان اهله يحنسوه او على الاقل يتكلموا عن الحاجه دي... الاطفال ديل من بدري بنتبهوا للحاجه دي، مرات عادي الطفل نفسه بتكون مقفوله بسبب المرض او التسنين او قلّة النوم... لما الاهل يقعدوا يتكلموا عن الموضوع قدامه ...
الطريقة في السودان صعب تتطبق في الغربة، الاطفال في السودان بياكلوا وبلعبوا معظم اليوم... الطفل لما يكون بياكل بدون حساب ببدا يسمن، المشكلة انه بعداك بصل مرحلة من الوزن، شكله الكان عاجب اهله ببقى ما عاجبهم، وفجأة تتحول شكوى الاهل من اكل الطفل القليل، لتعليقات لإنه بياكل كتير... الطفل بيضطرب وما يعرف الحصل شنو... الاهل كانوا عايزينه ياكل واي وقت يطلب اكل بدوه... وفجأة بقلبوا ويقولوا ليه ما تاكل كتير.... الشي الممكن يفهمه الطفل في الحالة دي انه الاهل اتغيروا من ناحيته او بقوا ما بحبوا... لكن هو بكون اتعود على الاكل، وببقى ليه الاكل ملاذ... شويه شويه ببقى الاكل الممنوع المرغوب... لدرجة انه الطفل ممكن ياكل على عينه ... ويتدسى وياكل... او يستغل فرصة طلوع الاهل عشان ياكل.... وكده بتبدا مشكلة الشره والاكل زيادة عن الحد... والاكل البسموه الemotional eating...
عندي صديقة، اولادها وهم صغار بتبذل مجهود انها تسمّنهم... لدرجة انها بتكون شغاله فيهم اكل اليوم ... ممكن تأكلهم سكر لو حست انهم ما اكلوا كويس... اهم شي انا بحاول اكّد عليه هنا انه الطفل مفروض يكون ادرى ببطنه اكتر من اي زول تاني... احنا بنحس بأولادنا بعاطفة الأمومة والشفقة عليهم، لكن نديهم هم حرية انهم يقرروا متين جعانين ومتين شبعانين... اطفال صديقتي دي لما يصلوا عمر 9-10 سنين بتكون بدت تحس انهم اوزانهم زايده وسريع بتقوم تقلب وتغير في طريقة اكلهم، تشجعهم على الرياضة تحولهم من full-fat ل low-fat... الصغار بتكون مستمرة معاهم بنفس الطريقة بتاعت التسمين... ورغم الاجراءات الجديدة الكبار بكونوا مستمرين يزيد وزنهم، لانهم اتعودوا على كميات ما محدودة... وعلى قول والدة سمارت، بطنهم بتكون وسعت...
كده غطينا موضوع الكمية وموضوع ربط الاكل بعلاقة الاهل بولدهم... برجع بعدين اتكلم عن الحاجات الممكن نعملها عشان نحسن نوعية اكل الاطفال.. برضه عايزه اتكلم عن موضوع الرياضة واهميتها للأطفال..
| |
|
|
|
|
|
|
|
|
 Re: بوست برعاية سمارت، تعليم الاطفال العادات الغذائية السليمة (Re: مريم بنت الحسين)
|
سلام
| Quote: الجماعة اديهم قرّاصة، بطفشوا ليك من البيت |
ولو كنكشوا فيها أمشي أخلي البيت أنا ولا كيف 
.| Quote: و بالمناسبة احد الاسباب الرئيسة للانيميا عند الاطفال ما عدم اكل اللحم او اكل مفيد عموما. السبب هو شراب اللبن. |
أمهم دائما بتقول لي مشككة في أنو البت عندها انيميا بدليل بياض العين وجفاف الفم وبتغالطني على اساس إنها صيدلانية وبتفهم في الحاجات دي ( ودي أنا عارف سببها السهر) ، تقوم بعد يوم أو يومين تقول لي البت عندها نشاط زايد أقول ليها أمس قلتي عندها انيميا والليلة نشاط زايد ؟ حسب معرفتي الزول العندو فقر دم بكون كسلان وحيلوا ميت ويجرج كرعينو جرجرة
ولا أيه رأيكم ؟
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: حمد عبد الغفار عمر)
|
أخونا حمد ازيك...
الانيميا ساهل تجي للاطفال، وما بالضرورة الطفل يكون مبغبغ او ضعيف ما ليها علاقة... الزول ممكن يكون سمين جدا وعنده انيميا... شكل الزول بكون كيف، دي ما بقدر افتي فيها... لكن يمكن لو واحد من اخوانا الاطباء جا ماري يدينا راي.... للضمان كده، اسمع كلام مرتك...
صاحبتي شديد وبعّزها، كتبت لي عن تجربتها مع بتها في موضوع الاكل، قالت انها لما كانت صغيرة كانت بتجبرها تاكل، البت بنيتها اصلها نحيفة، وهي كانت مُصرة انها تاكل بحسب احساسها كأم وخوفها عليها.. قالت انها في مرّه استفرغت من كثرة الاكل، بس صاحبتي بعداك راجعت نفسها وعملت حسابها.... برضها ادتني نصيحة حلوه انهم في البلد الهم فيه بدوا الاطفال snack الساعة 10 صباحاً.. ولازم تكون فواكه او خضروات، ممنوع انهم ياكلوا بسكويت او شوكولاته.. الكلام ده بقولوا انه بخلي العقل خامل....
في نقطة تالته مهمة قالتها صاحبتي عن موضوع الjunk food، وانا كنت ناوية اكتب عنها... ناس McDonald's و KFC والشباب ديل.... حأجي بعدين بالتفصيل، لانه الموضوع ده فيه تحدي كبير ومحتاجين نكون متوازنين فيه...
تحياتي
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: smart_ana2001)
|
سلام عليكم
ياناس البيت
تعليم الاطفال العادات الغذائية السليمة
عنوان سمح
لكن انتو بتتكلمو عن يات اطفال ؟
اطفالكم القاعدين بره السودان ولا اطفال السودان الحدهم فى الاغذية ام رقيقة البدون لحمة وبدون ماجى احيانا ؟
لو اطفالكم البره حبا وكرامة لكن لو اطفال السودان "الفضل " هذه قصة اخرى
فى عام 2006 مشيت البان جديد
وتصادف انه زرنا مدرسة البان جديد الابتدائية
للبنات
كان فيها داخلية قفلوها
وكان فيها مدرسين اتقلص عددهم لاتنين
وكان فيها مراحيض اتقفلت لانه مافيها ابواب او "حفر زاتو "
البنات اللاقيناهم سالتهم من الفطور بياكلو شنو ؟
واحدة قالت
ـ ملاح ويكة بعصيدة
والتانية قالت مافى فطور غدا وبيكون ماتاخر عشان ما يسالو من العشا ديل اطفال عمر الواحدة ما بتجاوز الثمانية اعوام
بتمشى مسافة خمسة اميال على اقدامها لاجل الماء تجئ حاملة اياه على راسها "صفيحة بلاستيك "
وبالمناسبة ما فى ممرضة عشان كشف دورى ولا غيره اقرب مستشفى هى الابيض غالبا يموت المريض فى السكة بين الابيض والبان جيد
الدايات مافى
فاى الاطفال تسالون عنهن يا بناتى الحبيبات ؟
اما فى مدينة نيالا فالوضع افضل لكنه لا يختلف عن البان جديد
ولا يختلف عن الروصيرص او الدمازين او حتى عطبرة فى احسن الاحوال
اما الخرطوم فحدث ولاحرج
عليك ان تنزل الى الشارع وتركب المواصلات الى اطراف الخرطوم لترى القيح والقبح
وامدرمان والابيض
باختصار كل الاطفال فى السودان "الفضل " يحتاجون الى اعادة تاهليل غذائى اجتماعى
اسفة الصورة قاسية لكنها "شوف عين "
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: سلمى الشيخ سلامة)
|
سلامات سلمى....رمضان كريم. و بعد كده مفروض نقول عيد مبارك.
احنا عارفين الحاصل تماما فى السودان. عارفين الحاصل خارج الخرطوم و فى اطرافها...و مرات كتيرة فى قلب الخرطوم.
شيء فعلا مؤسف و مؤلم. لكن...العين بصيرة و اليد قصيرة....يا ريت لو كنت بقدر اوفر غذا مناسب لكل اطفال السودان. يا ريت لو بقدر اوفر كتب مدرسية و مياه نظيفة للشرب و انترنت.
للاسف...فى البوست ده بنتكلم عن اطفالنا احنا...اللى ما عندهم اى نقص فى الغذا.
انا عارفه يا سلمى ممكن تكونى اتالمتى كيف وانتى بتتكلمى مع البنات الصغار ديل. و عارفه ان بوست ذى ده ممكن يكون زعلك عديل كده. لكن يا سلمى نعمل شنو??? ديل اطفالنا و دى مشاكلهم. ده البورد و دى (احد نوعية البوستات الفيه). ما تفهمينى غلط. انا ما بعتزر عن البوست....انا بس حاسه و فاهمة موقفك.
شكرا يا سلمى على المرور
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: smart_ana2001)
|
سمارت، والله ما قصّرتي في الرعاية والتبنّي.. وحنواصل ان شاء الله
العزيزة سلمى... والله كلامك يقطّع القلب ويخلي الواحد فعلا يحس بالعجز... السودان ده فيه مآساي تبكي الما ببكي... لكن كمان يا سلمى، احنا عندنا واجبنا المباشر... اولادنا الفي يدّنا.. والاحنا قادرين نوفر ليهم اكل وشراب وتغذية كويسه... البوست بتاعي ده يا سلمى ما بقل في أهميته عن اهمية التوعية بمشاكل الاطفال الكتبتي عنها دي... وأهو واحد من فوايده انك جيتي كتبتي عنّهم... سوء التغذية بحصل بقلة الأكل او عدم توفّره، وبحصل بي كترته والجهل بأهمية التنويع فيه... العادات الغذائية السيئة ممكن تنتج اطفال عندهم سوء تغذية رغم توفر الاكل ليهم... وممكن تنتج أطفال مصابين بمرض السكّري من أعمار صغيرة، وبرضه بسبب الجهل... انا ما شايفه انه كلامنا عن أطفالنا او عن الاطفال المتوفر ليهم اكل جيّد فيه انصراف عن حالات إنسانية مؤسفة موجوده في بلدنا... وزي ما قالت سمارت، لو في يدّنا كان أكلناهم كلهم... بس الواحد في النهاية يعمل واجبه المباشر... وما يقصّر فيه... ويورّي أطفاله كمان انه في اطفال محرومين وما عندهم المتوفر ليهم...
تحياتي ومحبتي
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: مريم بنت الحسين)
|
نواصل من وين ما وقفنا، ونناقش موضوع الjunk food...
طبعا ده من الحاجات البتعمل إشكالية كبيرة للناس في الغربة، خاصة انه الاطفال بشوفوا اعلانات كتير بتشجع على انهم يشتروا الاكل ده... انا شخصياً حاولت قدر الإمكان أكون متوازنة واكون بنظرية الممنوع مرغوب... عشان كده ما منعت محمود ياكل من برّه... بس كان الموضوع فيه اعتدال شديد... وما بالتكرار البحصل عند الناس التانيين... محمود بعد فترة بقى بالنسبة ليه اكل برّه ما فيه قيمة كبيرة، وممكن يختار ياكل في البيت... بتذكر مرّات نادر وهم راجعين سوا البيت، بسأله يقول ليه عايز McDonald's، يقول ليه لأ، نمشي البيت ناكل هناك...
ما عارفه الناس يكون رأيهم شنو في الحته دي، لكن المنع المطلق قد يخلي الطفل يعمل شي من وراك... مثلا احنا الصودا في بيتنا ممنوعة، لكن لما نمشي لناس، ما قاعدة أمنعه يشربها... لما نكون في البيت ما بتذكرها لأنها ما قدام عيونه، لما كنت حامل بي ليلى كان عندي جن اسمه بيبسي، وبي شكل محدد(ايوه كنت بشرب بيبسي كتير وانا حامل، جن عاد نعمل شنو!) ... يعني ما تنفع من علبة اكب في كباية، لأ... تكون قزازة صغيرة كده ... كوكولا برضه ما تنفع... نادر كان بجيبه يملا التلاجة.. الفترة ديك كانت مشكلة بالنسبة لي، لكن محمود ما كان طموح شديد... يعني ممكن يشرب معاي يوم وبعداك ينسى تلاته أربعة يوم...
نواصل في موضوع تعريف الاطفال على وجبات جديدة وشنو ممكن نعمل عشان نخلي أطفالنا ياكل (almost anything)...
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: مريم بنت الحسين)
|
سلامات بنت الحسين
بوست جميل و يكون أجمل لو جعلتيه علميا و سودانيا . يعنى الكورنفلس وحاجات النصارى دى نخليها بعيد .
ذكرت الأستاذة إسمارت أنا - أن اللبن شر لكم | Quote: الاطفال بيحتاجو الكالسيوم فقط من اللبن. لو انت ضامن ح ياكلو كالسيوم من جبنة او ذبادى و كده... وقف الحليب من البيت |
كلام أختك و صاحبتك خوفنى . اللبن للأطفال مش للكالسيوم وبس
They need to drink more. Milk contains nine essential nutrients and vitamins, including protein, vitamins A, D, and B12, calcium, potassium, phosphorus, riboflavin, niacin, zinc, and magnesium. Children who drink milk tend to have "superior" overall nutrient intakes compared with children who don't drink milk, according to a study released last year by researchers at Environ International Corp., the University of Vermont, and the National Dairy Council. Yet only a third to a half of American children and adolescent boys consume the government-recommended number of dairy servings, and fewer than one in five adolescent girls meets the recommendation. Adolescents should drink three 8-ounce glasses of reduced-fat or skim milk (or #####alent products, such as yogurt) daily.
كلام إسمارت أنا عن الصودا كلام يفرح القلب .
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: Sabri Elshareef)
|
I am in trouble
سلامات د. متوكل و رمضان كريم.
انا اكيد ما ح افهم اكتر من الدكاترة....لكن ح اقول اللى انا فاهماه و انت صححنى لو غلط...مشكور مقدما.
انا قلت Milk is evil .... و قلت ان الاطفال بيحتاجوا فقط للكالسيوم من الحليب. طيب انا شايفه انه:
1- الحليب طعمه جميل جدا...و الاطفال اللى بيحبوه (بصورة خاصة) دائما بيشربوا منه كتير. او اكتر من الازم اللى هو كبايتين فقط فى اليوم.
2- الحليب -ذى ما قيل فى الاقتباس اللى بالانجليزى-فيه فايتميات و معادن مفيده كتيرة غير الكالسيوم. لكن...ممكن ناكل بدله ذباى (ذى ما برضو مكتوب فى الاقتباس بتاعى ) .
My point is:
اذا كان الطفل ممكن يلقى نفس المواد دى من الذبادى...احسن نديه ذبادى بس. لان الاطفال (غالبا) ح يشربوا لبن اكتر من المسموح بيه.
3- كل الفايتمينات و المعادن الاخرى اللى فى اللبن بتتلقى فى مصادر اخرى من الغذاء (ده طبعا لو الطفل بياكل غذا متوازن). المشكلة ديما بتكون فى الكالسيوم و فايتمين D . عشان كده انا قلت ان الطفل بيحتاج (الكالسيوم فقط من اللبن). عبارتى ما كانت دقيقة. كان مفروض اقول ان(اللبن هو المصدر الرئيسي للكالسيوم)
المشكلة ان شراب اللبن الكتير (كتير دى حوالى 3 كبابى و اكتر) بيعمل انيميا للاطفال. و بيعملها بعدة طرق...منها انه بيحميهم الاكل. او انه بيخلى الامعاء الدقيقة تنزف دم بصورة بسيطة جدا لكن مستمرة.
| |
|
|
|
|
|
|
|
|
|
Re: بوست برعاية سمارت، تعليم الاطفال العادات الغذائية السليمة (Re: smart_ana2001)
|
سمارت meet my uncle متوكل :)... واكيد انت ما in trouble..
اعتقد كده الامور واضحة للطرفين...
مرحب اخنا صبري الشريف، ومبروك الوليد مرّه تناية... تاني حتدخل بوستات ما ليها علاقة بالسياسة
نواصل في النقطة بتاعت الpicky eaters.. او الاطفال نوع بقولوا ليك، ده بحبه وده ما بحبه...
ده من المشاكل البتلاقي كتير من الاهل لانه اطفالهم عندهم خيارات متقلبة في انواع الاكل البياكلوها... خلونا نبدا من عمر صغير، لانه في حاجة الاهل مرات ما بنتبهوا ليها... الطفل بعد عمر سنة مفروض يكون مسموح ليه ياكل اي شي... ضروري طبعا قبل العمر ده الناس ينتبهوا للحساسيات من الأكل، لانه في اطفال بتولدوا عندهم مشكلة مع المكسرات او تحديداً الفول السوداني، في اطفال بتكون عندهم مشكلة مع اللاكتوز في الحليب.. او تحسس من بعض انواع الخضار او الفاكهة، فضروري نلاحظ للحاجات دي اول ما نبدا ندي الطفل أكل... الشي التاني انه كتير جداً الطفل يرفض نوع معين من الاكل... لكن الاطباء بقولوا انه حليمات التذوق taste buds بتاعت الاطفال بتتغير يومياً... يعني لو الطفل ذاق شي معين الليلة، ما معناه انه ما بحبه وما تحاولوا معاه تاني... ده طبعا بنطبق على انواع الخضروات والفواكة... كل فترة جربوا ادوه... بغيّر رأيه... ليلى بتّي كانت رافضة الزبادي بي الله واحد، لكن بعد فترة رضت واكلته.. طبعا من غير سكر ولا ملح... صحي هي بتاكل باقى الاكل بي ملح زيّنا... لكن عموماً احنا اكلنا ملحه قليل.. شراب الموية برضه مهم جداً اننا نعودهم عليه... دي من العادات الضرورية جداً...
بالنسبة للأطفال الاكبر سناً، ومابرضوا ياكلوا اكل معيّن، ديل مرات بكونوا استهبال او عناد منّهم.. في عدّة طرق.. اول حاجة الطفل يدخّل يدّه ويساعد في عمل الاكل، الشي ده بشجّعه ياكل الاكل السوّاه... صحي المطبخ بتقلب فوق تحت.. وصحي، انا جنّي وجن حد يشتغل معاي في المطبخ... لكن بلعته شعوري ده، ودخلته ولدي محمود من بدري معاي في المطبخ... حسي محمود بعمل كورنفليكس براه... وبعمل ساندوتشات peanut butter and jelly لي روحو ولي اخته كمان... وقت الفطور بتاع رمضان، اول ما يحس اني دخلته المطبخ بجي ينق فيني انه عايز يساعد... بخليه يعمل حاجات بسيطة، يسخّن حاجات في الميكروويف... يقلّب السلطة، يهرس الطعمية في الفول.... في الخبيز برضه بجيبه وبديه حبّة عجين... منها يلعب ومنها يدخل يدّه... اي شي بساعدني اعمله، قاعد ياكل منّه... على الاقل لقمة... طبعا ممنوع يفتح بوتوجاز .. طبعا الشي ده مرات مطمئن لانه محمود من النوع البصحى بدري، وما بحس بيه لما يصحى... ممكن يجي ياكل براه حاجات من التلاجة... في فترة كده كنت عيّانه شديد، كان بساعدني كتير... الطريقة دي بتعزز التواصل بين الاهل واطفالهم... وبتخلق وقت حلو بينهم... غير كده بتخلي الاطفال يتعلموا يساعدوا، ويعتمدوا على انفسهم ... والشي البعملوه بياكلوه...
الطريقة التانية هي انهم ضروري يجرّبوا الاكل الجديد الما عايزين ياكلوه ده... انا بصر على محمود ياخد لقمة من الشي الرافض ياكله، وممنوع يطلّعه، احتراماً للأكل.. يعني حتى لو ما عجبه الطعم يبلعه.. وفعلا هو اتعود على كده.. وبعداك بخليه ما بضغط عليه... مرات لما اكون متأكده انه الموضوع عناد، بخليه يجرب تلاته لُقم... وفعلا بعدها بنطلق وبياكل كويس...
بالنسبة للأطفال الصغار الممكن يقعدوا في الكرسي وبدأوا ياكلوا... احسن حاجه انه نأكلهم احنا، وفي النهاية نديهم باقي الاكل ياكلوه براهم... بس طبعا بعدها نكون محضرين الحمّام ... الحركة دي بتخلي الطفل ما يخاف من الاكل، وما يخاف يت######... وبتعلم ياكل براه ويمسك الملعقة او الشوكة... ودي مهارات مهمة برضه...
حأرجع عشان اكتب عن اكلات ممكن تعجب الاطفال... وحاجات ممكن نجهّزها سريع، لو احنا اهل مشغولين..
| |
|
|
|
|
|
|
| |
مريم بنت الحسين
Dania Elmaki
سيف النصر محي الدين
Mohd Ibrahim
حمد عبد الغفار عمر
smart_ana2001
سلمى الشيخ سلامة
فيس بوك
تويتر
انستقرام
يوتيوب
بنتيريست