الثنائي/ د.( محمد جعفر +الصادق حسن).. بجمهورية مصر في الثمانينيات...تجربة ثرة يجب أن لا ننساها

Quote: أذكرى أيام صفانا واذكرى عهد اللقاء والليالى الفى حبور ...... كانت من فرمالات الشهيد على فضل , وكنت بأصاحبه فى غناها وغنى كتير تانى . * أذكر أنه جانى (على فضل) وكنت وقتها شغال فى صيدلية بن سينا بأم درمان قصاد مستشفى أمدرمان التعليمى (ودى كانت آخر مرة نتقابل فيها لآنه بعدها بفترة قصيرة تم اعتقاله ثم اغتياله وحصلت الأحداث الكلكم عارفنها) . كان شايل هم حركة الأطباء والشعب السودانى والحزب والرابطة ووووحاجات كتيييرة. اتكلم معاى فى حاجات كتيرة رغم أنه كان يبدو عليهو التعب والارهاق وكان بيركز شديد على موضوع مفاصل التنظيم وبنيته وتأمين عمله وتأمين كوادره وممتلكاته وكيفية التصدى لهجمات الأمن ووووووووو. يعنى يا أحمد فى نفس الخط الكان بيحفظه لينا ونحن فى الزقازيق . وعلى فكرة أنا وعدت عاطف ببعض الصور ولسه على وعدى بس عايز أعمل ليها Scanning . وقتها كانت فى هجمة شرسة للغاية من أجهزة الأمن سبقت أعتقال على فضل ورفاقه من الأطباء وطبعا الهجمة دى شملت كل القطاعات الأخرى وكان من ضمن المعتقلين وضيوف بيوت الأشباح من الصيادلة رفيقى وصديقى الأمدرمانى منذ المرحلة الثانوية ثم الزقازيق ورابطة الصيادلة الاشتراكيين بالسودان" عمار تاج الدين" ودأبوروف. وعمار ده بالمناسبة عايز ليهو بوستات وويبسايتات وكتب . من عمار ومن حركته وسط أى محلة يكون فيها ناس من أى نوع ووسط أى مجموعة من الناس مهما كانت هويتهم وتوجهاتهم ( يعنى بلغة الكيمياء سريع الذوبان ), ممكن تعرف كيف تتحرك وسطهم بكل سهولة وتأثر فيهم( أتمنى أن يكون عمار متابع وعنده خبر بالبوست وأنا عرفت أنه الآن عايش فى كندا ). وزى ما قال أحمد طراوة نحن مجموعة صيدلة وكل دفعتنا فى الجبهة الديمقراطية والحزب فعلا تأثرنا كثيرا بالشهيد على فضل والمرحوم محمد فضل و كل العتاولة وقتها , وما عايز أذكر أسماء لأنه كل واحد فيهم عايز ليهو كتاب كامل وكان التصاقنا بيهم كبير جدا . وعلى ذكرهم كانت الزقازيق وقتها بتشهد حركة سياسية نشطة للغاية فى كل القوى السياسية والتنظيمات . وكان فى منافسة شديدة وسط التنظيمات وحركة استقطاب وتجنيد خيالية) يعنى لو أخدت ليك تكية صغيرة ممكن باقى التنظمات تختف منك الجماعة الساكيهم ) . وفى واحدة من الانتخابات - ما متذكر سنة كم - كانت قائمة الجبهة الديمقراطية بتضم من الأسماء : على فضل ... كلية الطب خالد فضل ... كلية الطب محمد فضل ... كلية الزراعة فاتن فضل ... كلية التجارة وفى طواف فى احدى الشقق - ما متذكر كان معاى عمار ولا زميل تانى - المهم بعد ما أديناهم البرنامج الانتخابى و قائمة المرشحين , واتكلمنا كتير عن برنامج الجبهة وبدينا نتكلم عن المرشحين واحد واحد وكلياتهم واوصافهم , وووو وبعد ما خلصنا وخلاص ماشين واحد منهم كان ماسك اللستة فى ايدو و بيهز فى رأسه ويعاين لينا وحسيت بأنه عايز يقول حاجه , قمت سألت وقلت ليهم فى أى حاجة ؟ قام طوالى قال لى ( هو ما فى حاجة لكن والله أولاد عم فضل جد منورين اللستة بتاعتكم ) . ولنا لقاء ........... ياسر شبيكة