عصام جبرالله حب لاخيك ما تحب لنفسك

Quote: الاخ المحترم نبيل والله أنا ما بعرفك الا من البوست ده لكن حاسة بأنه تبارك ده بالجد عكننك ... وانا بس لأنه سيرة أسرتي جات هنا ... بس بطلب منك طلب خاص جدا الموضوع ده بس خليهو ...ممكن؟ استعمل أدواتك كلها في كظم الغيظ والحلم عند الغضب ...وهاك مني اعتذار صادق من الحسيت بيهو ...واهجر الموضوع ده ... تبارك ما حيتنازل ...وحيستمتع أكتر بأنه يغيظك زيادة ... عليك اعز ناسك ...بس خلي الحوار معاه...لانه حيزيد ويتلوم معاك أكتر وأكتر ...وهوما دايرة أقول لايوق لكن بس كده... .ده من ناحية من ناحية تانية عليك الله يا تبارك احترم احزان الناس وفقدهم ...نحن لما ماتوا لينا العزاز جو الناس بكل رقة واسونا وعزونا وانت جيت شكرتهم وكتبت بوست بالمفهوم ده ليه لما الناس التانيين يكون عندهم فقد غالي وعزيز بتجي انت تبخس ليهم موتاهم وانجازاتهم ...و الفقيد ده ما شخص عادي ..دي رمز سياسي ووطني وفقدو ورحيلو عنده معنى أكبر من معنى الفقد الأسري النحن حسينا بيهو...واهو الجموع طلعت وفاجأت المتخيلين انه الحزب الشيوعي ما عندو مريدين ولا في ناس متابعين اداؤه ....عشان كده انا نزلت ليك الفيديوهات عشان أجاوب على تساؤلاتك ...اذا كل الناس دي حزنت على فقد الفقيد وطلعت تهتف وتنشد الاشعار "جماعيا" يبقى في تأثير واضح على الاجيال الجديدة ...وشغل مبذول من أجل ارساء الفكرة ...يعني ده ما تشييع وبس ..ده موقف وواضح..... وليه احترامو ..حتى الماشيوعيين احترموا موقف الرجل وعبروا عن احترامهم في التشييع ...ياخي لو ما بتحترم الشيوعية ولا الشيوعيين ...احترم الديمقراطية في معناها الاكبر ...لو في فكر عندو جموع هدارة زي دي بتأيدو يبقى الواحد يعمل ليه حساب ...حأدرسك ألف با تا ثا؟ يعني شوية ذوق بس ...وشوية مراعاة للظرف ...ما بتضر ده غير انه المناتلة والمجابدة البتجيب ليك و لغيرك اساءة دي انت ما مجبور عليها ...انت مالك ياخي؟ ياخي ناقش آراءك مافي زول ما نعك ....لكن خليك موضوعي ...وما تجيب بروفايل زول ولا تتكلم عن جنسو ولا عرقو ولا غيرو ...وانت خير العارفين ... كل ما أرجع للبورد ده ألقاك مقوم ليك حرابة ... وزي ماقال المغني: (جدي الريل مالك ..يالمريودي كل يوم تبق نارك؟) انت جدي ريل؟ اضف الموضوع لصفحتن